ᒫᑯᓯᐅᑉ ᐊᒡᓚᖏᑦ 11
11
ᔩᓱᓯ ᔨᕉᓴᓕᒻᒧᑦ ᐃᓯᕐᑎᓪᓗᒍ ᓂᕐᑐᕐᑕᐅᒻᒪᕆᖕᓂᖓ
ᒫᑎᐅᓯ 21:1-11; ᓘᑲᓯ 19:28-40; ᔪᐊᓇᓯ 12:12-19
1ᔨᕉᓴᓕᒻᒧᑦ ᑎᑭᑉᐸᓪᓕᐊᓕᕐᑎᓪᓗᒋᑦ, ᓄᓇᓖᑦ ᐱᑦᐰᒋᒥᐅᑦ ᐱᑕᓂᒥᐅᓪᓗ ᖃᓂᒋᔮᓃᓪᓗᑎᒃ, ᖃᖅᑲᒧᐊᕐᐳᑦ ᓇᐹᕐᑐᓕᖕᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᒐᖃᓲᓂᒃ, ᔩᓱᓯᐅᑉ ᐃᓕᓐᓂᐊᕐᑏᖕᓂ ᒪᕐᕈᒃ ᑎᓕᕚᒃ ᓯᕗᓪᓕᐅᖁᓪᓗᒋᒃ, 2ᐅᖃᐅᑎᓪᓗᒋᒃ, “ᐃᒃᑯᓄᖓ ᓄᓇᓕᖕᓄᐊᓚᐅᕆᑦᓯᒃ, ᑕᕝᕗᖓ ᑎᑭᒃᑯᑦᓯᒃ ᑕᑯᓂᐊᕐᐳᓯᒃ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐃᐱᕐᓯᒪᔪᒥᒃ, ᑭᓇᒧᓪᓘᓐᓃᑦ ᐃᑭᒪᕕᐅᓚᐅᕐᓯᒪᖏᑦᑐᒥᒃ; ᑖᓐᓇ ᐃᐲᓪᓗᒍ ᑕᒪᐅᖓ ᕾᑦᔪᑎᓂᐊᕐᐸᓯᒃ. 3ᐊᐱᕆᔭᐅᒍᑦᓯᒡᓕ ᓱᖕᒪᑦ ᑍᒤᓕᐅᕐᒪᖔᑦᓯᒃ, ᐅᖃᐅᑎᓂᐊᕐᐸᓯᒃ, ‘ᐊᑕᓂᐅᑉ ᐊᑐᕆᐊᖃᕐᒪᒍ ᐅᑎᕐᑎᑦᓴᐅᑎᒋᓂᐊᕐᑕᖓ ᐊᑐᕇᕈᓂᐅᒃ.’”
4ᑖᒃᑯᐊᒃ ᐃᓕᓐᓂᐊᕐᑏᒃ ᓄᓇᓕᖕᓄᐊᕐᐴᒃ, ᑕᑯᓪᓗᑎᒃ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐃᒡᓘᑉ ᐹᖓᑕ ᓴᓂᐊᓂ ᐃᐱᕐᓯᒪᔪᒥᒃ; ᑖᑦᓱᒥᖓᓕ ᐃᐲᑦᓯᓕᕐᑎᓪᓗᒋᒃ. 5ᑕᕝᕙᓃᑦᑐᓄᑦ ᐊᐱᕆᔭᐅᕘᒃ, “ᓱᖕᒪᓄᓇ ᓯᐅᑎᖅᑯᕐᑐᔫᑉ ᓄᕐᕋᖓ ᐃᐲᑉᐱᓯᒃᑯᒃ?”
6ᑖᒃᑯᐊᒃ ᑭᐅᕘᒃ ᔩᓱᓯᒧᑦ ᐅᖃᐅᓯᐅᖁᔭᐅᖅᑲᐅᔪᓂᒃ; ᑖᒃᑯᐊᒃ ᖃᓄᐃᓴᕈᓐᓃᕐᐳᑦ ᑲᔪᓯᑐᐃᓐᓇᖁᔨᓕᕐᓗᑎᒡᓗ. 7ᑖᓐᓇ ᓯᐅᑎᖅᑯᕐᑐᔫᑉ ᓄᕐᕋᖓ ᔩᓱᓯᒧᐊᕈᑎᕚᒃ, ᐅᓕᒡᔪᐊᒥᖕᓂᒃ ᖄᖓᓄᐊᕐᓯᓪᓗᑎᒃ, ᔩᓱᓯ ᖄᖓᓄᑦ ᐃᑭᕗᖅ. 8ᐅᓄᕐᑐᓪᓗ ᐅᓕᒡᔪᐊᒥᖕᓂᒃ ᐊᖅᑯᑎᒧᑦ ᐃᓯᕕᑦᓯᕗᑦ, ᐃᓚᖏᓪᓕ ᓇᐹᕐᑐᐃᑦ ᐊᕙᓚᖓᔪᖏᓐᓂᒃ#11:8 ᐊᑭᕈᖏᓐᓂᒃ ᓇᑲᑦᓯᓪᓗᑎᒃ ᑕᒪᐅᖓ ᐊᖅᑯᑎᒧᐊᖅᑬᕗᑦ. 9#ᐃᓐᖏᕈᑦ 118:25,26.ᐃᓄᐃᑦ ᔩᓱᓯᐅᑉ ᓯᕗᓂᖓᓃᑦᑐᑦ, ᒪᓕᒃᑐᓪᓗ ᕾᒐᓛᓯᕗᑦ, “ᕼᐆᓵᓇ! ᓂᕐᑐᕐᑕᐅᓕ ᐊᑕᓂᐅᑉ ᐊᑎᖓᓂ ᑎᑭᑦᑐᖅ! 10ᒎᑎᐅᑉ ᓮᒻᒪᕐᓕᐅᒃ ᑍᕕᑎᐅᑉ ᓯᕗᓕᑦᑕ ᐊᖓᔪᖅᑲᐅᕕᖓᑕ ᑎᑭᑎᑕᐅᓂᖓ, ᕼᐆᓵᓇ ᓂᕐᑐᕐᑕᐅᓕ ᖁᑦᓯᖕᓂᕐᐹᖑᔪᖅ!”
11ᔩᓱᓯ ᔨᕉᓴᓕᒻᒧᑦ ᑎᑭᑉᐳᖅ, ᑐᒃᓯᐊᕐᕕᒡᔪᐊᒧᑦ ᐃᑎᕐᓗᓂ; ᐃᓘᓐᓇᑦᓯᐊᖓᓂᒡᓗ ᕿᒥᕐᕈᐊᕐᐳᖅ, ᐅᓐᓄᒃᐸᓪᓕᐊᓕᕐᒪᑦ, ᐱᑕᓂᒧᐊᕐᐳᖅ ᐃᓕᓐᓂᐊᕐᑎᓂ 12 ᐃᓚᒋᓪᓗᒋᑦ.
ᔩᓱᓯᐅᑉ ᓇᐹᕐᑐᒥᒃ ᐱᒋᓕᖕᓂᒃ ᐱᕈᕐᕕᐅᒃᑲᓐᓂᖁᔨᔪᓐᓃᕐᓂᖓ
ᒫᑎᐅᓯ 21:18-19
12ᖃᐅᑎᓪᓗᒍᓕ, ᔨᕉᓴᓕᒻᒧᑦ ᐅᑎᓕᕐᓗᑎᒃ ᐱᑕᓂᒥᑦ, ᔩᓱᓯ ᑳᓕᕐᐳᖅ. 13ᓇᐹᕐᑐᒥᒃ ᐱᒋᓕᖕᓂᒃ#11:13 ᐸᐅᕐᒊᑦ ᓴᐅᓂᒐᓛᓖᑦ ᐸᐅᕐᖓᓕᒃᓴᒥᒃ ᑕᑯᒐᒥ ᐅᖓᓯᒃᑐᒦᑎᓪᓗᒍ ᓱᓕ, ᐅᖃᐅᔭᖏᑦ ᐱᕈᕐᓯᒪᑦᓯᐊᓕᕐᑐᓂᒃ, ᐅᐸᒃᐹ ᐸᐅᕐᖓᓂᒃ ᐱᑕᖃᕐᒪᖔᑦ ᑕᑯᔭᕐᑐᕐᓗᒍ, ᐅᐸᒃᑲᒥᐅᒃ ᑕᑯᕚ, ᐅᖃᐅᔭᖃᑐᐃᓐᓇᕐᑐᖅ, ᐸᐅᕐᖓᖃᕐᕕᒃᓴᖓ ᓱᓕ ᓈᒻᒪᒃᓯᓯᒪᖏᒻᒪᑦ. 14ᔩᓱᓯ ᓇᐹᕐᑐᒧᑦ ᐅᖃᕐᐳᖅ, “ᐃᓕᖕᓂᑦ ᐸᐅᕐᖓᓂᒃ ᓂᕆᕕᐅᓚᐅᕐᓯᒪᓂᐊᕈᓐᓃᕐᐳᑎᑦ.”
ᐃᓕᓐᓂᐊᕐᑎᖏᑕ ᑐᓴᕐᐹᑦ ᑍᒫᒃ ᐅᖃᕐᑎᓪᓗᒍ.
ᔩᓱᓯᐅᑉ ᑐᒃᓯᐊᕐᕕᒡᔪᐊᒧᐊᕐᓂᖓ
ᒫᑎᐅᓯ 21:12-17; ᓘᑲᓯ 19:45-48; ᔪᐊᓇᓯ 2:13-22
15ᔨᕉᓴᓕᒻᒧᓪᓕ ᑎᑭᓐᓇᒥᒃ, ᔩᓱᓯ ᑐᒃᓯᐊᕐᕕᒡᔪᐊᒧᐊᕐᐳᖅ ᑕᕝᕙᓂᓗ ᓂᐅᕕᕐᑐᑦ ᓂᐅᕐᕈᑎᖃᕐᑐᓪᓗ ᐊᓂᐅᕋᕐᑎᑉᐰᑦ, ᑮᓇᐅᔭᓂᒡᓗ ᑕᐅᕐᓰᔪᑦ ᓵᖏᑦ ᐅᕐᕈᑎᓪᓗᒋᑦ ᑑᕕᓂᒃ ᓂᐅᕐᕈᑎᓖᑦ ᐃᒃᓯᕙᐅᑕᖏᑦ ᐅᕐᕈᑎᒃᑭᕔᑦ. 16ᓱᓇᑐᐃᓐᓇᒥᒃ ᐊᒡᔭᕐᓯᖁᔨᓐᖏᓚᖅ ᑐᒃᓯᐊᕐᕕᒃᔪᐊᒃᑯᑦ. 17#ᐂᓮᐊᓯ 56:7; ᔨᕆᒤᐊ 7:11.ᐃᓄᐃᑦ ᐊᔪᕆᕐᑐᕐᐰᑦ ᐅᖃᐅᑎᓪᓗᒋᑦ, “ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᖕᒪᑦ, ‘ᐃᒡᓗᖁᑎᒐ ᑍᔭᐅᔭᕆᐊᖃᕐᐳᖅ ᑐᒃᓯᐊᕆᐊᕐᑐᕐᕕᖕᒥᒃ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ.’ ᐃᓕᑦᓯᓕ ᑎᒡᓕᒃᑎᓄᑦ ᐃᓂᒋᔭᐅᑎᓕᕐᐸᓯ!”
18ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᑕᒪᑐᒥᖓ ᑐᓴᕋᒥᒃ ᐱᑦᔪᑎᒃᓴᕐᓯᐅᓕᕐᐳᑦ ᑐᖁᑦᓯᔪᒪᓪᓗᑎᒃ; ᑭᓯᐊᓂᓕ ᑲᑉᐱᐊᒋᕚᑦ, ᐃᓄᒐᓴᒡᔪᐊᑦ ᐊᔪᕆᕐᑑᑎᒋᔭᖏᓐᓂᒃ ᑲᒪᓂᐊᖃᑦᑕᕐᒪᑕ.
19ᐅᓐᓄᓕᕐᒪᓪᓕ ᑕᕝᕙᓐᖓᑦ ᐃᒡᓗᒐᓴᖕᓂᑦ ᐊᐅᓪᓚᕐᐳᑦ.
ᓇᐹᕐᑐᒥᒃ ᐱᒋᓕᖕᓂᒃ ᐸᐅᕐᖓᓕᖕᒥᒃ ᐃᓕᓐᓂᐊᕈᑎᖃᕐᓂᖅ
ᒫᑎᐅᓯ 21:20-22
20ᖃᐅᑎᓪᓗᒍ ᐅᓪᓛᒃᑯᑦ ᓴᓂᖅᑯᓕᕋᒥᑦᔪᒃ ᓇᐹᕐᑐᖅ ᐱᒋᓕᖕᓂᒃ ᐸᐅᕐᖓᓕᒃᓴᖅ ᑕᑯᕚᑦ, ᐸᓂᒻᒪᕆᓕᕐᑐᖅ ᐊᒡᓛᑦ ᐊᒫᒥᓄᑦ. 21ᐲᑦᑐᕉᓯ ᐃᖅᑲᐅᒪᒐᒥ ᖃᓄᐃᓕᓚᐅᕐᒪᖔᑦ ᔩᓱᓯ ᑖᑦᓱᒧᖓ ᓇᐹᕐᑐᒧᑦ, ᐅᖃᐅᑎᕚ, “ᕌᐰ, ᑕᑯᒋᑦ! ᓇᐹᕐᑐᖅ ᐱᒋᓕᖕᓂᒃ ᐸᐅᕐᖓᓕᒃᓴᖅ ᐱᕈᕐᕕᐅᓂᐊᕈᓐᓃᕐᓂᕋᓚᐅᕐᑍᑦ ᐸᓂᕐᓂᕐᐳᖅ.”
22ᔩᓱᓯᐅᑉ ᑭᐅᕔᑦ, “ᒎᑎᒧᑦ ᐅᒃᐱᕆᑦᓯ. 23#ᒫᑎᐅᓯ 17:20; 1 ᑯᕆᓐᑎ 13:2.ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᖃᖅᑲᒧᑦ ᐆᒧᖓ ᐅᖃᕐᐸᑦ, ᑕᕝᕙᓐᖓᑦ ᖃᖓᑦᑕᕆᑦ ᑕᕆᐅᕐᒧᓪᓗ ᑲᑕᒃᓗᑎᒃ, ᐆᒻᒪᑎᒥᒍᑦ ᖁᓚᖏᓪᓗᓂ, ᐅᒃᐱᕐᓗᓂᓗ ᐅᖃᐅᓯᕆᔭᒥ ᑍᒤᓐᓂᐊᕐᓂᖓᓂᒃ, ᑕᕝᕙ ᑍᒤᓕᕐᓂᐊᕐᐳᖅ. 24ᑍᒤᒻᒪᑦ ᐅᖃᐅᑎᕙᑦᓯ, ᑐᒃᓯᐊᕈᑦᓯ ᓱᓇᑐᐃᓐᓇᕐᒥᒃ ᐱᔪᒪᔭᖃᕐᓗᓯ, ᐅᒃᐱᕆᑦᓯ ᐱᔪᒪᔭᓯ ᐱᒐᑦᓯᐅᒃ, ᑕᕝᕙ ᑐᓂᓯᕕᐅᓂᐊᕐᐳᓯ. 25#ᒫᑎᐅᓯ 6:14,15.ᓇᖏᕐᓗᓯᓕ ᑐᒃᓯᐊᕈᑦᓯ, ᐃᓱᒪᒋᔪᓐᓁᕐᕕᖃᕆᑦᓯ ᐃᓅᖃᑎᑦᓯ ᐊᑲᐅᒃᓴᖏᒃᔪᑎᒃᓴᖃᕈᑦᓯ; ᐊᑖᑕᑦᓯᓐᓄᑦᑕᐅᖅ ᕿᓚᖕᒦᑦᑐᒧᑦ ᐃᓱᒪᒋᔪᓐᓁᕐᕕᐅᖁᓪᓗᓯ ᐊᔪᕐᑐᓕᓂᑦᓯᓐᓂᑦ. [ 26ᐃᓅᖃᑎᑦᓯᓐᓂᒃ ᐃᓱᒪᒋᔪᓐᓁᕐᕕᖃᓂᐊᖏᒃᑯᑦᓯ ᐊᑖᑕᑦᓯᑦᑕᐅᖅ ᕿᓚᖕᒦᑦᑑᑉ ᐃᓱᒪᒋᔪᓐᓁᕐᕕᒋᓂᐊᖏᓐᓂᕚᓯ ᐊᔪᕐᑐᓕᓂᓯᓂᑦ.]”#11:26 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ. ᑕᑯᓗᒍ ᒫᑎᐅᓯ 6:15
ᔩᓱᓯᐅᑉ ᐱᔪᓐᓇᕐᑎᑕᐅᓂᖓᓄᑦ ᐊᐱᖅᑯᑎ
ᒫᑎᐅᓯ 21:23-27; ᓘᑲᓯ 20:1-8
27ᔨᕉᓴᓕᒻᒧᑦ ᐅᑎᒃᑲᓐᓂᕆᕗᑦ. ᑐᒃᓯᐊᕐᕕᒡᔪᐊᒃᑯᑦ ᐱᓱᓕᕐᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ, ᐊᖓᔪᖅᑳᓪᓗ ᐅᐸᒃᐹᑦ. 28ᐊᐱᕆᓪᓗᒍ, “ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᑎᑦ ᑕᒪᒃᑯᓂᖓ ᐱᓇᓱᐊᕈᓐᓇᕐᐲᑦ? ᑭᐊᓗ ᑕᒪᑐᒥᖓ ᐱᔪᓐᓇᕐᓂᕐᒥᒃ ᑐᓂᓯᕕᒋᓯᒪᕚᑎᑦ?”
29ᔩᓱᓯᐅᑉ ᐅᖃᐅᑎᕔᑦ, “ᐊᐱᕆᔪᒪᒋᕗᖓ ᐃᓕᑦᓯᓐᓂᒃ ᐊᐱᕐᓲᑎᒋᔭᓐᓂᒃ; ᑭᐅᔪᓐᓇᕈᑦᓯᓐᖓ, ᑕᕝᕙ ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᑕᒪᒃᑯᓂᖓ ᐱᓇᓱᐊᖃᑦᑕᕐᒪᖔᕐᒪ ᐅᖃᐅᑎᓂᐊᕐᐸᑦᓯ. 30ᐅᖃᐅᑎᓚᐅᕐᓯᓐᖓ, ᔪᐊᓇᓯᐅᑉ ᐹᑉᑎᑦᔪᑎᖓ ᒎᑎᒥᑦ ᐱᕙ, ᐅᕝᕙᓗ ᐃᓄᖕᓂᑦ?”
31ᑖᒃᑯᐊᓕ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, “ᐅᖃᕈᑦᑕ, ‘ᒎᑎᒥᑦ ᐱᕗᖅ,’ ᑕᕝᕙ ᐅᖃᐅᑎᓂᐊᕐᐹᑎᒍᑦ, ‘ᓱᖕᒪᓪᓕ ᔪᐊᓇᓯ ᐅᒃᐱᕆᓚᐅᖏᑉᐱᓯᐅᒃ?’ 32ᐅᖃᕈᑦᑕᓕ, ‘ᐃᓄᖕᓂᑦ ᐱᓂᕋᕐᓗᒍ—’” ᐃᓄᖕᓂᒃ ᓯᕘᕋᕗᑦ, ᐃᓄᓕᒫᑦ ᔪᐊᓇᓯᒥᒃ ᓇᓚᐅᑦᑍᔪᓪᓚᕆᐅᓱᕆᒃᓯᒪᑕ. 33ᑍᒤᒻᒪᑦ ᔩᓱᓯ ᑭᐅᕚᑦ, “ᓇᑭᑦ ᐱᖕᒪᖔᑦ ᖃᐅᔨᒪᓐᖏᓚᕗᑦ.”
ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᑦᑕᐅᖅ ᐅᖃᐅᑎᓂᐊᖏᓐᓂᕙᑦᓯ, ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᐱᓇᓱᐊᖃᑦᑕᕐᒪᖔᕐᒪ.”
Currently Selected:
ᒫᑯᓯᐅᑉ ᐊᒡᓚᖏᑦ 11: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
