ᒫᑯᓯᐅᑉ ᐊᒡᓚᖏᑦ 10
10
ᔩᓱᓯᐅᑉ ᐊᔪᕆᕐᑐᐃᓂᖓ ᑲᑎᑎᑕᐅᓯᒪᔪᒃ ᐊᕕᓪᓚᕆᖕᓂᖓᑕ ᒥᒃᓵᓄᑦ
ᒫᑎᐅᓯ 19:1-12; ᓘᑲᓯ 16:18
1ᑕᕝᕙᓐᖓᑦ ᐊᐅᓪᓚᕋᒥ ᔫᑎᐊᑉ ᓄᓇᖓᓄᐊᕐᐳᖅ ᑰᑉ ᔪᐊᕐᑕᓂᐅᑉ ᐊᑭᐊᓃᑦᑐᒧᑦ, ᐃᓄᒐᓴᒡᔪᐊᑦ ᑕᕝᕗᖓ ᑲᑎᓕᕆᕗᑦ; ᐊᔪᕆᕐᑐᕐᐰᑦ, ᐱᐅᓯᕆᕙᒃᑕᒥᑐᑦ.
2ᐹᕆᓯᑦ ᐅᐸᒃᐹᑦ ᐆᒃᑐᕈᒪᓪᓗᒍ ᐊᐱᕆᕚᑦ, “ᐱᖁᔭᑎᓐᓂ ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒍᓐᓇᕐᑎᑕᐅᕚ?”
3ᑭᐅᕔᑦ, “ᖃᓄᖅ ᒨᓯᓯᐅᑉ ᐱᖁᕚᓯ?”
4 #
ᒨᓯᓯ ᑕᓪᓕᒪᖏᑦ 24:1-4; ᒫᑎᐅᓯ 5:31. ᑖᒃᑯᐊ ᑭᐅᕚᑦ, “ᒨᓯᓯ ᐱᔪᓐᓇᕐᑎᑦᓯᓚᐅᕐᐳᖅ ᐊᖑᑦ ᐊᕕᑦᓯᒍᑎᓂᒃ ᑎᑎᕋᕐᓗᓂ, ᓄᓕᐊᒥᓂᒃ ᐊᕕᑦᓯᔪᓐᓇᕐᑎᑦᓯᓪᓗᓂ.”
5ᔩᓱᓯᐅᑉ ᐅᖃᐅᑎᕔᑦ, “ᒨᓯᓯ ᑍᒫᒃ ᐱᖁᔭᒥᒃ ᑎᑎᕋᓚᐅᕐᐳᖅ ᐆᒻᒪᑎᓯ ᓯᑎᔪᐊᓘᓂᖓ ᐱᑦᔪᑎᒋᓪᓗᒍ. 6#ᒨᓯᓯ ᓯᕗᓪᓖᑦ 1:27; 5:2.ᐱᒋᐊᕐᓂᖓᓂᓪᓕ ᓱᓇᑐᐃᓐᓁᑦ ᐱᓐᖑᕐᑎᑕᐅᓕᕐᑎᓪᓗᒋᑦ, ‘ᒎᑎᐅᑉ ᐊᖑᑦ ᐊᕐᓇᕐᓗ ᐱᓐᖑᕐᑎᑉᐹᒃ. 7#ᒨᓯᓯ ᓯᕗᓪᓖᑦ 2:24.ᑍᒤᒻᒪᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᕐᐹᒃ ᓄᓕᐊᓂ ᑲᑎᒫᖓᕈᒪᓗᒍ, 8ᑖᒃᑯᐊᒃᓗ ᒪᕐᕉᒃ ᑎᒥᒃᑯᑦ ᐊᑕᐅᓯᐅᓕᕐᓂᐊᕐᐳᒃ.’ ᒪᕐᕉᔪᓐᓃᕐᓗᑎᒃ ᐅᕕᓂᒃᑯᑦ ᐊᑕᐅᓯᓐᖑᕐᐳᒃ. 9ᑕᕝᕙ ᑍᒤᒻᒪᑦ ᒎᑎᐅᑉ ᑲᑎᑎᑕᖏᒃ, ᐃᓅᑉ ᐊᕕᑎᑕᒃᓴᕆᓐᖏᓛᒃ.”
10ᐃᒡᓗᒧᐊᕋᒥᒃ ᐃᓕᓐᓂᐊᕐᑎᑦ ᔩᓱᓯᒧᑦ ᑕᒪᑐᒥᖓ ᐊᐱᕐᓲᑎᖃᓕᕐᐳᑦ. 11#ᒫᑎᐅᓯ 5:32; 1 ᑯᕆᓐᑎ 7:10,11.ᔩᓱᓯᐅᑉ ᐅᖃᐅᑎᕔᑦ, “ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᑐᖅ ᐊᓯᐊᓂᒃ ᓄᓕᐊᓂᒡᓗᓂ, ᑖᓐᓇ ᓄᓕᐊᒥᓂᒃ ᐊᓯᓐᓂᐊᕐᐳᖅ ᓄᓕᐊᕆᖄᓚᐅᑕᖓ ᐱᑦᔪᑎᒋᓪᓗᒍ. 12ᑍᒫᒃᑕᐅᖅ ᐊᕐᓇᖅ ᐅᐃᒥᓂᒃ ᐊᕕᑦᓯᓪᓚᕆᒃᑐᖅ ᐊᓯᐊᓂᒃ ᐅᐃᓂᒡᓗᓂ, ᑖᓐᓇ ᐅᐃᒋᓚᐅᕐᑕᒥᓂᒃᑕᐅᖅ ᐊᓯᓂᐊᕆᕗᖅ.”
ᔩᓱᓯᐅᑉ ᓄᑕᖅᑲᓂᒃ ᓮᒻᒪᕐᑎᑦᓯᓂᖓ
ᒫᑎᐅᓯ 19:13-15; ᓘᑲᓯ 18:15-17
13ᐃᓄᐃᑦ ᓄᑕᕋᑯᓗᖕᓂᒃ ᔩᓱᓯᒧᑦ ᐋᑦᓯᕗᑦ, ᐸᑎᒻᒥᔭᐅᖁᓪᓗᒋᑦ ᑖᑦᓱᒧᖓ; ᐃᓕᓐᓂᐊᕐᑎᖏᑕᓕ ᐃᓂᕐᑎᕐᐰᑦ. 14ᔩᓱᓯᐅᓪᓕ ᑕᒪᓐᓇ ᖃᐅᔨᒐᒥᐅᒃ, ᐊᑲᐅᒃᓴᖏᒻᒪᕆᓕᕐᐳᖅ, ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᓄᑕᕋᑯᓗᐃᑦ ᐅᕙᓐᓄᑦ ᕾᓕᑦ, ᐊᒡᕕᐊᖏᓪᓗᓯᐅᒃ; ᑖᒃᑯᐊ ᒎᑎᐅᑉ ᐊᑕᓂᐅᕕᖓᓂᒃ ᐱᖃᕐᒪᑕ. 15#ᒫᑎᐅᓯ 18:3.ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᒎᑎᐅᑉ ᐊᑕᓂᐅᕕᖓᓂᒃ ᓄᑕᕋᑯᓗᒃᑎᑐᑦ ᐃᓚᓕᐅᕐᓯᖏᑦᑐᖅ ᑕᑉᕗᖓ ᐃᑎᕐᓂᐊᓐᖏᓚᖅ.” 16ᓄᑕᕋᑯᓗᐃᑦ ᐃᕿᓪᓗᒋᑦ ᐸᑎᒻᒥᓪᓗᒋᓪᓗ ᓮᒻᒪᕐᑎᐰᑦ.
ᐊᖑᑦ ᐊᔪᕐᓴᖏᑦᑐᖅ
ᒫᑎᐅᓯ 19:16-30; ᓘᑲᓯ 18:18-30
17ᐊᐅᓪᓚᓕᕐᑎᓪᓗᒍ, ᐊᖑᒻᒥᑦ ᐅᓪᓚᒃᑐᒥᑦ ᐅᐸᒃᑕᐅᕗᖅ ᓵᖓᓄᑦ ᐹᒻᒪᒃᑎᕐᓗᓂ, ᔩᓱᓯ ᐊᐱᕆᕚ, “ᐊᔪᕆᕐᑐᐃᔩ ᐱᐅᔪᑎᑦ, ᖃᓄᖅ ᐱᓇᓱᐊᕐᑐᒃᓴᐅᕗᖔ, ᐃᓅᓯᕐᒥᒃ ᓄᖑᓱᐃᑦᑐᒥᒃ ᑭᖑᕐᖑᑦᔨᖁᓪᓗᖓ?” 18ᔩᓱᓯᐅᑉ ᐅᖃᐅᑎᕚ, “ᓱᖕᒪᑦ ᐱᐅᓂᕋᕐᐱᖓ? ᐱᐅᔪᖃᓐᖏᓚᖅ ᒎᑎ ᑭᓯᒥ ᐱᐅᔪᑑᕗᖅ. 19#ᒨᓯᓯ ᐂᑉᐸᖏᑦ 20:13; ᒨᓯᓯ ᑕᓪᓕᒪᖏᑦ 5:17; ᒨᓯᓯ ᐂᑉᐸᖏᑦ 20:14; ᒨᓯᓯ ᑕᓪᓕᒪᖏᑦ 5:18; ᒨᓯᓯ ᐂᑉᐸᖏᑦ 20:15; ᒨᓯᓯ ᑕᓪᓕᒪᖏᑦ 5:19; ᒨᓯᓯ ᐂᑉᐸᖏᑦ 20:16; ᒨᓯᓯ ᑕᓪᓕᒪᖏᑦ 5:20; ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16.ᐱᖁᔭᓂᒃ ᖃᐅᔨᒪᕗᑎᑦ: ‘ᐃᓄᐊᕐᑐᒃᓴᐅᓐᖏᓚᑎᑦ, ᓄᓕᐊᕆᔭᕐᓂᒃ ᐅᐃᒋᔭᕐᓂᒃᓘᓐᓃᑦ ᐊᓯᓐᓂᐊᕐᑐᒃᓴᐅᓐᖏᓚᑎᑦ, ᑎᒡᓕᒃᑐᒃᓴᐅᓐᖏᓚᑎᑦ, ᐸᓯᔭᒃᓴᕈᕐᑎᑦᓯᓇᓱᐊᕐᑐᒃᓴᐅᓐᖏᓚᑎᑦ ᓱᓕᖏᑦᑐᒧᑦ, ᐅᐃᕖᕐᕆᒃᓯᔪᒃᓴᐅᓐᖏᓚᑎᑦ, ᐊᑖᑕᖕᓂᒃ ᐊᓈᓇᖕᓂᒃᓗ ᐅᐱᒍᓱᑦᓯᐊᕐᑐᒃᓴᐅᕗᑎᑦ.’”
20ᑖᑦᓱᒪ ᐅᖃᐅᑎᕚ, “ᐊᔪᕆᕐᑐᐃᔩ, ᑕᒪᒃᑯᐊ ᓱᕈᓯᐅᓂᓐᓂᑦ ᑍᒪᓐᖓᑦ ᒪᓕᓚᐅᕐᐸᒃᑲ.”
21ᔩᓱᓯᐅᑉ ᑕᑯᓴᕐᓗᒍ ᓇᒡᓕᒋᓪᓗᓂᐅᒃ ᐅᖃᐅᑎᕚ, “ᐊᑕᐅᓯᕐᒥᒃ ᓱᓕ ᐱᓐᖏᓚᑎᑦ; ᐂᓗᑎᑦ ᐱᖁᑎᖕᓂᒃ ᓂᐅᕐᕈᑎᖃᕆᐊᕐᑐᕆᑦ, ᑮᓇᐅᔭᕐᑖᑎᓪᓗ ᐊᔪᕐᓴᕐᑐᓄᑦ ᑐᓂᕐᕈᑎᒋᓗᒋᑦ, ᑕᕝᕙ ᐱᒃᓴᖃᑦᓯᐊᕐᓂᐊᕐᐳᑎᑦ ᕿᓚᖕᒥ; ᐊᑏ ᕾᓕᕆᑦ, ᒪᓕᒡᓗᖓ.” 22ᑖᑦᓱᒪ ᑕᒪᓐᓇ ᑐᓴᕋᒥᐅᒃ ᑮᓇᕐᓕᕐᐳᖅ, ᑕᕝᕙᓐᖓᑦ ᕿᒪᕉᑎᓕᕐᐳᖅ ᕿᒃᓵᒻᒪᕆᒡᓗᓂ; ᐊᔪᕐᓴᖏᑦᑐᕐᔪᐊᖑᒐᒥ.
23ᔩᓱᓯ ᕿᕕᐊᕐᓗᓂ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᔪᕐᓴᖏᑦᑐᓄᑦ ᐱᔭᕐᓂᖏᑦᑑᓂᐊᕐᐳᖅ ᒎᑎᐅᑉ ᐊᑕᓂᐅᕕᖓᓄᑦ ᐃᓯᕆᐊᒃᓴᖅ!”
24ᐃᓕᓐᓂᐊᕐᑎᖏᑦ ᑕᒪᑐᒥᖓ ᑐᓴᕋᒥᒃ ᖁᐊᕐᓵᕐᐳᑦ. ᔩᓱᓯᐅᑉ ᐅᖃᐅᑎᕔᑦ, “ᕿᑐᕐᖓᒃᑲ, ᐃᓛᒃ ᐱᔭᕐᓂᖏᑦᑑᖕᒪᑦ ᒎᑎᐅᑉ ᐊᑕᓂᐅᕕᖓᓄᑦ ᐃᓯᕆᐊᒃᓴᖅ! 25ᑳᒥᓕ ᐃᓯᕈᓇᕐᓂᕐᓴᐅᒐᔭᕐᐳᖅ ᒥᖅᑯᑎᐅᑉ ᐃᔨᖓᒍᑦ ᐊᔪᕐᓴᖏᑦᑑᑉ ᐃᓯᕋᓱᐊᕐᓂᕆᒐᔭᕐᑕᖓᓂᑦ ᒎᑎᐅᑉ ᐊᑕᓂᐅᕕᖓᓄᑦ.”
26ᐊᖏᔪᕐᔪᐊᒥᒃ ᖁᐊᕐᓵᒻᒪᕆᒃᐳᑦ, ᐅᖃᐅᑎᓪᓗᒍ, “ᑭᓇᓕ ᑕᕝᕙ ᐱᐅᓕᔭᐅᔪᓐᓇᕐᓂᐊᕐᐸ?”
27ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᑕᒪᓐᓇ ᐃᓄᖕᓄᑦ ᐊᔪᕐᓇᕐᐳᖅ, ᒎᑎᒧᓪᓕ ᐊᔪᕐᓇᓐᖏᓚᖅ; ᓱᓇᓕᒫᑦ ᒎᑎᒧᑦ ᐊᔪᕐᓇᖏᒻᒪᑕ.”
28ᐲᑦᑐᕉᓯ ᐅᖃᕐᐳᖅ, “ᑕᑯᒋᑦ, ᓱᓇᑐᐃᓐᓇᕗᑦ ᑕᒪᕐᒥᒃ ᕿᒪᓚᐅᕐᐸᕗᑦ ᐃᓕᓐᓂᒃ ᒪᓕᓕᕐᓗᑕ.”
29ᔩᓱᓯ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᐃᒡᓗᒥᓂᒃ ᕿᒤᔪᖅ, ᐅᕝᕙᓗ ᖃᑕᓐᖑᑎᒥᓂᒃ, ᐅᕝᕙᓗ ᓇᔭᒥᓂᒃ, ᐊᓈᓇᒥᓂᒃ ᐊᑖᑕᒥᓂᒡᓘᓐᓃᑦ, ᕿᑐᕐᖓᒥᓂᒡᓘᓐᓃᑦ, ᓄᓇᒥᓂᒡᓘᓐᓃᑦ, ᐅᕙᖓ ᐱᓪᓗᖓ ᐅᖃᐅᓰᓪᓗ ᑐᓴᕈᒥᓇᕐᑐᑦ ᐱᑦᔪᑎᒋᓗᒋᑦ, 30ᑖᓐᓇ ᐊᖏᓂᕐᓴᓂᒃ ᐱᒃᑲᓐᓂᕐᓂᐊᕐᐳᖅ ᑕᒫᓂ ᐃᓅᑎᓪᓗᒍ 100ᐃᕐᑐᓪᓗᐊᕐᑐᓂᒃ, ᐃᒡᓗᓂᒃ, ᖃᑕᓐᖑᑎᓂᒡᓗ, ᓇᔭᖕᓂᒡᓗ, ᐊᓈᓇᓂᒡᓗ, ᕿᑐᕐᖓᓂᒡᓗ, ᓄᓇᓂᒡᓗ, ᐊᑭᕋᕐᑐᕐᑕᐅᓂᕐᒥᒡᓗ ᐱᖃᓯᐅᑦᔨᓗᓂ, ᐱᔪᒫᕐᑐᒥᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᔪᒫᕐᐳᖅ. 31#ᒫᑎᐅᓯ 20:16; ᓘᑲᓯ 13:30.ᐅᓄᕐᑐᑦ ᓯᕗᓪᓖᑦ ᑭᖑᓪᓕᐅᔪᒫᕐᐳᑦ, ᑭᖑᓪᓖᓪᓗ ᓯᕗᓪᓕᐅᔪᒫᕐᓗᑎᒃ.”
ᔩᓱᓯᐅᑉ ᑐᖁᑕᐅᓂᒃᓴᒥᓂᒃ ᐅᖃᐅᓯᖃᕐᓂᖓᑕ ᐱᖓᔪᐊᑦ
ᒫᑎᐅᓯ 20:17-19; ᓘᑲᓯ 18:31-34
32ᔨᕉᓴᓕᒻᒧᑦ ᐊᖅᑯᑎᖓᒍᑦ ᐱᓱᓕᕆᕗᑦ, ᔩᓱᓯ ᐃᓕᓐᓂᐊᕐᑎᑦ ᓯᕗᓂᖓᓐᓃᑉᐳᖅ; ᐃᓕᓐᓂᐊᕐᑎᑦ ᖁᐊᕐᓵᕐᓯᒪᕗᑦ, ᐃᓄᐃᑦ ᐃᓕᓐᓂᐊᕐᑎᖏᑕ ᑭᖑᓂᖓᓂ ᒪᓕᒃᑐᑦ ᑲᑉᐱᐊᓱᓕᕐᓗᑎᒃ. ᐃᓕᓐᓂᐊᕐᑎᓂ 12 ᐊᖅᑯᒻᒥᑦ ᓴᓂᕐᕙᒃᑎᓪᓗᒋᑦ, ᐅᖃᐅᑎᕔᑦ ᖃᓄᐃᓕᐅᕐᕕᐅᓛᕐᓂᕐᒥᓂᒃ. 33ᐅᖃᐅᑎᓪᓗᒋᑦ, “ᑕᑯᒋᑦ, ᑕᑉᐸᐅᖓ ᔨᕉᓴᓕᒻᒧᑦ ᐂᓕᕐᐳᒍᑦ; ᐃᓅᑉ ᐃᕐᓂᖓ ᑐᓂᔭᐅᔪᒫᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑖᒃᑯᐊ ᑐᖁᑕᒃᓴᓐᖑᕐᑎᑦᓱᒫᕐᐹᑦ, ᔫᑎᐅᖏᑦᑐᓄᑦ ᑐᓂᓗᒍ; 34ᑖᒃᑯᐊ ᒥᑕᐅᑎᒋᔪᒫᕐᐹᑦ, ᑎᕝᕗᓗᒡᓗᒍ, ᑏᒐᕐᑐᕐᓗᒍ, ᑐᖁᓪᓗᒍᓗ; ᐅᓪᓗᐃᓪᓕ ᐱᖓᔪᐊᓐᓂ ᒪᑭᓛᕐᐳᖅ.”
ᔧᒥᓯᐅᑉ ᔪᐊᓇᓯᐅᓪᓗ ᕿᓄᓂᖓᒃ
ᒫᑎᐅᓯ 20:20-28
35ᑕᕝᕙ ᔧᒥᓯᐅᑉ ᔪᐊᓇᓯᐅᓪᓗ ᓯᐱᑎᐅᑉ ᐃᕐᓂᖏᒃᑕ ᔩᓱᓯ ᐅᐸᒃᐹᒃ, ᐅᖃᐅᑎᓪᓗᒍ, “ᐊᔪᕆᕐᑐᐃᔩ, ᐃᓕᖕᓄᑦ ᐱᑎᑕᐅᔪᒪᕗᒍᒃ ᓱᓇᑐᐃᓐᓇᕐᒥᒃ ᕿᓄᐊᕆᔭᑦᑎᓐᓂᒃ.”
36ᔩᓱᓯᐅᑉ ᐅᖃᐅᑎᕚᒃ, “ᓱᒥᒃ ᐅᕙᓐᓄᑦ ᐱᓂᐊᕐᕕᐅᔪᒪᒐᑦᓯᒃ?”
37ᑖᒃᑯᐊᒃ ᐅᖃᐅᑎᕚ, “ᐃᓕᖕᓄᑦ ᐃᒃᓯᕙᔪᓐᓇᕐᑎᑕᐅᓛᕈᒪᕗᒍᒃ, ᐂᑉᐹ ᑕᓕᕐᐱᖕᓂ ᐂᑉᐹᓗ ᓴᐅᒥᖕᓂ, ᐊᑕᓂᐅᕕᖕᓂ ᓂᕐᑐᕐᓇᕐᑐᕐᔪᐊᒥ.”
38 #
ᓘᑲᓯ 12:50. ᔩᓱᓯᐅᑉ ᐅᖃᐅᑎᕚᒃ, “ᕿᓄᐊᕆᔭᑦᓯᖕᓂᒃ ᖃᐅᔨᒪᓐᖏᓚᓯᒃ. ᐃᒥᐅᑎᒥᒃ ᐃᒥᕐᓂᐊᕐᑕᓐᓂᒃ ᐃᒥᕈᓐᓇᕋᓗᐊᕐᐱᓰᒃ? ᐅᕝᕙᓗ ᐹᑉᑎᑕᐅᑦᔪᑎᒋᓂᐊᕐᑕᓐᓄᑦ ᐹᑉᑎᑕᐅᔪᓐᓇᕋᓗᐊᕐᐱᓰᒃ?”
39ᑖᒃᑯᐊᒃ ᑭᐅᕙ, “ᑍᒫᒃ ᐱᔪᓐᓇᕐᐳᒍᒃ.”
ᐅᖃᐅᑎᕚᒃ, “ᐃᒥᐅᑎᒥᒃ ᐃᒥᕆᐊᖃᕐᑕᓐᓂᒃ ᐃᒥᕐᓂᐊᕋᓗᐊᕐᐳᓯᒃ; ᐹᑉᑎᑕᐅᑦᔪᑎᒋᓂᐊᕐᑕᓐᓄᓪᓗ ᐹᑉᑎᑕᐅᔪᓐᓇᕐᓂᐊᕋᓗᐊᕐᐳᓯᒃ; 40ᑭᓯᐊᓂᓕ ᑕᓕᕐᐱᓐᓂ ᓴᐅᒥᓐᓂᓘᓐᓃᑦ ᐃᒃᓯᕙᔪᒃᓴᓂᒃ ᐋᖅᑮᔪᓐᓇᓐᖏᓚᖓ, ᐊᑐᐃᓐᓇᕈᕐᑕᐅᓯᒪᔪᓪᓕ ᑭᓯᒥ ᑕᕝᕙᓂ ᐃᒃᓯᕙᔪᒫᕐᒪᑕ.”
41ᐃᓕᓐᓂᐊᕐᑎᑦ ᖁᓕᑦ ᑕᒪᑐᒥᖓ ᑐᓴᕋᒥᒃ, ᔧᒥᓯᒥᒃ ᔪᐊᓇᓯᒥᒡᓗ ᐊᑲᐅᒃᓴᕈᓐᓃᕐᐳᑦ. 42#ᓘᑲᓯ 22:25,26.ᔩᓱᓯᐅᑉ ᐃᒻᒥᓄᑦ ᕾᖁᓪᓗᒋᑦ ᐅᖃᐅᑎᕔᑦ, “ᖃᐅᔨᒪᕗᓯ ᐊᖓᔪᖅᑳᖑᔪᑦ ᔫᑎᐅᖏᑦᑐᓂ ᐃᓄᖁᑎᒥᖕᓄᑦ ᐱᔪᓐᓇᕐᓂᖃᕐᒪᑕ, ᐊᖓᔪᖅᑳᖏᑦ ᐱᔪᓐᓇᕐᓂᕐᔪᐊᖃᕐᓗᑎᒃ ᐃᓄᖁᑎᒥᓄᑦ. 43#ᒫᑎᐅᓯ 23:11; ᒫᑯᓯ 9:35; ᓘᑲᓯ 22:26.ᑖᒃᑯᐊᑎᑐᑦ ᐊᑯᓐᓇᑦᓯᓐᓂ ᐱᓂᐊᕐᓂᖃᕐᑐᒃᓴᐅᓐᖏᓚᓯ; ᓇᓪᓕᓯ ᐊᖓᔪᖅᑳᖑᔪᒪᔪᖅ ᑖᓐᓇ ᐃᓕᑦᓯᓐᓂᒃ ᐱᔨᑦᓯᕐᑐᒃᓴᐅᕗᖅ, 44ᓇᓪᓕᓯ ᐊᑯᓐᓇᑦᓯᓐᓂ ᓯᕗᓪᓕᕐᐸᐅᔪᒪᔪᖅ ᑖᓐᓇ ᑕᒤᓐᓄᑦ ᐱᔨᑲᑖᕆᔭᐅᔪᒃᓴᐅᕗᖅ. 45ᐊᒡᓛᑦ ᐃᓅᑉ ᐃᕐᓂᖓ ᑎᑭᓯᒪᖏᒻᒪᑦ ᐱᔨᑦᓯᕐᑕᐅᔭᕐᑐᕐᓗᓂ ᐱᔨᑦᓯᕆᐊᕐᑐᕐᐳᕐᓕ, ᐃᓅᓯᕐᒥᓂᒡᓗ ᑐᓂᓯᓪᓗᓂ ᐊᒥᓱᑦ ᐊᑭᓖᑦᔪᑦᔭᐅᑦᔪᑎᒃᓴᖏᓐᓄᑦ.”
ᔩᓱᓯᐅᑉ ᐹᕐᑎᒥᐅᓯᒥᒃ ᑕᐅᑐᓕᕐᑎᑦᓯᓂᖓ
ᒫᑎᐅᓯ 20:29-34; ᓘᑲᓯ 18:35-43
46ᐱᓱᓕᕐᒥᒐᒥᒃ ᔨᕆᑰᒧᑦ ᑎᑭᑉᐳᑦ; ᑕᕝᕙᓐᖓᑦ ᐊᐅᓪᓚᓕᕐᒪᑕ ᐃᓄᒋᐊᒃᑐᕐᔪᐊᑦ ᐃᓚᒋᓪᓗᒋᑦ, ᑕᐅᑐᖏᑦᑐᖅ ᐊᖅᑯᑎᐅᑉ ᓴᓂᐊᓂ ᐃᒃᓯᕙᕗᖅ ᑮᓇᐅᔭᒥᒃ ᕿᓄᔨ, ᐹᕐᑎᒥᐅᓯᒥᒃ ᐊᑎᓕᒃ, ᑎᒥᐅᓯᐅᑉ ᐃᕐᓂᖓ. 47ᑖᓐᓇ ᑐᓴᕋᒥ ᔩᓱᓯ ᓈᓴᕇᑎᒥᐅᒥᒃ ᐊᖅᑯᓵᓕᕐᑐᒥᒃ, ᕾᒐᓛᓕᕐᐳᖅ ᐅᖃᕐᓗᓂ, “ᔩᓱᓰ! ᑍᕕᑎᐅᑉ ᐃᕐᓂᖓ, ᓂᑲᒋᓐᖓ!”
48ᐅᓄᕐᑐᓄᑦ ᐃᓂᕐᑎᕐᑕᐅᕗᖅ, ᓂᐱᖃᖁᓇᒍ; ᑖᓐᓇᓕ ᕾᒐᓛᕆᐊᒃᑲᓐᓂᑐᐃᓐᓇᕐᐳᖅ ᓂᐱᖅᑯᕐᑐᒋᐊᒃᑲᓐᓂᕐᓗᓂ, “ᑍᕕᑎᐅᑉ ᐃᕐᓂᖓ, ᓂᑲᒋᓐᖓ!”
49ᔩᓱᓯ ᓄᖅᑲᕐᓗᓂ ᐅᖃᕐᐳᖅ, “ᕾᖁᔭᐅᓚᐅᕐᓕ.”
ᑕᕝᕙ ᑕᐅᑐᖏᑦᑐᖅ ᕾᖁᓕᕐᐹᑦ ᐅᖃᐅᑎᓪᓗᒍ, “ᖁᕕᐊᓱᓕᕆᑦ; ᓂᑯᕕᓪᓗᑎᑦ, ᑖᑦᓱᒪ ᕾᖁᓕᕐᒪᑎᑦ.”
50ᐅᓕᒡᔪᐊᓂ ᐃᒋᓪᓗᒍ ᓂᑯᕕᑲᐅᕐᑐᕐᐳᖅ ᔩᓱᓯᒧᐊᕐᓗᓂ.
51ᔩᓱᓯᐅᑉ ᐅᖃᐅᑎᕚ, “ᐅᕙᓐᓅᑦ ᖃᓄᐃᓕᐅᕐᕕᐅᔪᒪᕖᑦ?”
ᑕᐅᑐᖏᑦᑑᑉ ᐅᖃᐅᑎᕚ, “ᐊᔪᕆᕐᑐᐃᔩ, ᑕᐅᑐᓕᑲᓐᓂᕈᒪᕗᖓ.”
52ᔩᓱᓯᐅᑉ ᐅᖃᐅᑎᕚ, “ᐊᐅᓚᓕᕆᑦ, ᐅᒃᐱᕐᓂᕕᑦ ᐋᖅᑭᒃᐹᑎᑦ.” ᑕᕝᕔᓐᓇᕐᓗ ᑕᑯᔪᓐᓇᕐᓯᕗᖅ ᒪᓕᓕᕐᓗᒍᓗ.
Currently Selected:
ᒫᑯᓯᐅᑉ ᐊᒡᓚᖏᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
