ᒤᑲᐅᑉ ᐊᒡᓚᖏᑦ 7
7
ᐃᓴᕆᐊᓕᒥᐅᑉ ᐱᓂᐊᕐᓂᖏᑦ ᐱᐅᖏᑦᑐᑦ
1ᑲᑉᐱᐊᓐᓇᒦᒃ! ᐊᐅᔭᒥ ᑲᑎᕐᓱᐃᔪᑐᑦ ᐱᕈᕐᑐᓂᒃ ᑲᑎᕐᓱᐃᓴᕇᕐᑎᓪᓗᒋᑦ ᐊᒥᐊᒃᑯᖏᓐᓂᑦ ᑲᑎᕐᓱᐃᔭᕐᑐᕋᓗᐊᕋᒪ, ᐸᐅᕐᖓᓂᒃ ᕔᓂᒃᓴᓂᒃ ᑲᑎᓐᖓᔪᓂᒃ ᓂᕆᔭᒃᓴᓂᒃ ᐱᑕᖃᓐᖏᓚᖅ, ᐸᐅᕐᖓᓂᒡᓗ ᐱᒋᓕᖕᓂᒃ ᐱᕈᕋᑖᕐᓂᑯᓂᒃ ᑕᐅᑐᓐᖑᐊᕐᑕᓐᓂᒃ ᐱᑕᖃᖏᒻᒪᑦ. 2ᐅᒃᐱᕐᓇᑦᓯᐊᕐᑐᑦ ᐊᓯᐅᓯᒪᖕᒪᑕ ᓄᓇᕐᔪᐊᕐᒥᑦ, ᐃᓄᖕᓂᓗ ᐃᓱᐊᕐᑐᖃᕈᓐᓁᕐᐳᖅ; ᐃᓄᓕᒫᑦ ᐅᑕᖅᑭᐅᕐᐳᑦ ᑐᖁᑦᓯᔪᒪᓪᓗᑎᒃ; ᐃᓘᓐᓇᑎᒡᓗ ᖃᑕᓐᖑᑎᒥᖕᓂᒃ ᕿᓂᕐᐳᑦ ᓄᓗᐊᕐᑎᑦᓯᔪᒪᓪᓗᑎᒃ. 3ᐱᓇᓱᐊᕐᐳᑦ ᐱᐅᖏᑦᑐᓂᒃ ᐊᒡᒐᒥᖕᓄᑦ; ᐊᐅᓚᑦᓯᔨᐅᔪᑦ ᑐᓐᓂᕐᓴᕐᑕᐅᔪᒪᑐᐃᓐᓇᕐᐳᑦ, ᐃᖅᑲᕐᑐᐃᔩᓪᓗ ᐱᓕᕆᖃᑦᑕᕐᐳᑦ ᐊᑭᓕᕐᑕᐅᓂᒃᑯᑦ ᐃᓅᑉ ᐱᔪᒪᔭᖓᓂᒃ, ᐱᔪᓐᓇᕐᓂᓖᑦ ᐱᔪᒪᔭᑎᒃ ᐊᖓᔪᖅᑲᐅᓯᕈᑎᒋᕔᑦ; ᑲᑐᑦᔨᓪᓗᑎᒡᓗ ᓯᓔᕐᕆᒃᓯᕗᑦ. 4ᐱᐅᓂᕐᐹᕆᔭᕋᓗᐊᖏᑦ ᑲᑭᓪᓚᐅᑎᓕᒃᑎᑑᕐᐳᑦ; ᐅᒃᐱᕐᓇᕐᓂᕐᐹᖏᓪᓗ ᐅᕐᐱᖕᓂᑦ ᑲᑭᓪᓚᐅᑎᓕᖕᓂᑦ ᐱᐅᖏᓐᓂᕐᓴᐅᕗᑦ. ᐅᓪᓗᖅ ᓇᓪᓕᐅᑎᕗᖅ ᖃᐅᔨᓴᕐᑎᑦᓯ ᐅᖃᐅᓯᕆᓯᒪᔭᖏᑦ ᓱᒋᐊᕐᑕᐅᕕᒃᓴᓯᓗ ᐅᓪᓗᖅ ᑎᑭᓪᓗᓂ. ᒫᓐᓇ ᓇᓗᓕᐅᒪᓂᐊᓕᕐᐳᓯ. 5ᑕᑎᖃᕐᑍᓕᒋᑦᓯ ᐱᖃᓐᓇᕆᔭᑦᓯᓐᓂᒃ, ᐅᒃᐱᕈᓱᒃᑍᓕᒋᑦᓯᓗ ᐃᓅᖃᑎᑦᓯᓐᓂᒃ. ᐊᒡᓛᑦ ᐅᖃᐅᓯᓯ ᐅᑦᔨᕐᑐᕐᓯᐅᒃ ᐃᓐᓇᖓᖃᑎᒋᕙᒃᑕᑦᓯᓐᓄᑦ. 6#ᒫᑎᐅᓯ 10:35,36; ᓘᑲᓯ 12:53.ᐃᕐᓂᐅᑉ ᐊᑖᑕᓂ ᐅᐱᒋᓐᖏᓛ, ᐸᓂᒡᓗ ᐊᑭᕋᕐᑐᕐᐳᖅ ᐊᓈᓇᒥᓂᒃ, ᐅᑯᐊᕐᓗ ᓴᑭᒥᓄᑦ ᐊᑭᕋᕐᑐᕐᐳᖅ, ᐃᓅᑉ ᐊᑭᕋᕐᑐᕐᑎᒋᓂᕐᐹᕆᓂᐊᕐᐰᑦ ᐃᒡᓗᒥᐅᖃᑎᓂ.
7ᐅᕙᖓᓕ ᐊᑕᓂᕐᒥᒃ ᓂᕆᐅᒃᐳᖓ; ᐅᑕᖅᑭᓪᓗᖓᓗ ᒎᑎᓐᓂᒃ ᐱᐅᓕᕐᓯᔨᓐᓂᒃ, ᒎᑎᒪᓗ ᑐᓴᕐᓂᐊᕐᐹᖓ.
ᐊᑕᓂᐅᑉ ᐱᐅᓕᕐᓯᓂᖓ
8ᖁᕕᐊᓲᑎᒋᑦᑍᓕᓐᖓ ᐊᑭᕌᒃ! ᐹᓪᓚᒃᑲᓗᐊᕈᒪ ᒪᑭᑦᓱᒫᕐᐳᖓ, ᑖᕐᑐᒥ ᐃᒃᓯᕙᒐᓗᐊᕈᒪ, ᐊᑕᓂᖅ ᖃᐅᒪᓂᕆᔪᒫᕐᐸᕋ. 9ᐊᑕᓂᕐᒧᑦ ᐱᐅᖏᑦᑐᓕᓚᐅᕋᒪ, ᕿᓄᐃᓵᕐᓗᖓ ᐊᑐᕈᒪᕙᕋ ᐊᑕᓂᐅᑉ ᓂᓐᖓᐅᓯᖓ, ᕿᓄᑦᔪᑎᒋᔭᓐᓂᒃ ᐋᖅᑭᒃᓯᓚᐅᖅᑳᕐᑎᓐᓇᒍ ᐃᓱᐊᕐᓯᑎᓪᓗᖓᓗ, ᖃᐅᒪᓂᕐᒧᐊᕈᑎᓂᐊᕐᐹᖓ ᖃᐅᔨᓗᒍᓗ ᐃᓱᐊᕐᓂᖓ. 10ᐊᑭᕋᕋ ᑕᑯᔪᒫᕐᐳᖅ, ᑲᓐᖑᓱᖕᓂᕐᒧᓪᓗ ᐅᓕᒃᑕᐅᔪᒫᕐᐳᖅ ᐅᕙᓐᓄᑦ ᐅᖃᓚᐅᕐᑐᖅ, “ᓇᐅᒡᓕ ᐊᑕᓂᖅ ᒎᑏᑦ?” ᐃᔨᓐᓄᑦ ᑕᑯᔪᒫᕐᐸᕋ ᓵᓚᐅᔪᖅ ᑐᓪᓕᕌᕐᑕᐅᔪᕐᓗ ᒪᕐᕋᑎᑐᑦ ᐊᖅᑯᑎᒥ.
11ᐅᓪᓗᖅ ᑎᑭᑦᓱᒫᕐᐳᖅ ᐊᕙᓗᕐᔪᐊᓕᐅᕐᕕᒃᓴᓯ, ᐅᓪᓗᕐᓗ ᑎᑭᑦᓱᒫᕐᐳᖅ ᓄᓇᖁᑎᓯ ᐊᖏᒡᓕᒋᐊᕐᑕᐅᕕᒃᓴᖓ. 12ᐅᓪᓗᒥ ᑍᑲᓂ ᐃᓅᖃᑎᓯ ᐃᓕᑦᓯᓐᓄᑦ ᐅᑎᕈᒫᕐᐳᑦ, ᐊᓯᕆᐊᒥᑦ ᐃᒡᓗᒐᓴᖕᓂᓪᓗ ᓴᐴᓗᑕᓕᖕᓂᑦ, ᐊᒡᓛᑦ ᐄᑦᔨᑉᑎᒥᑦ ᐃᕗᕅᑎᒥᓪᓗ ᐃᒪᕕᐅᑉ ᑭᒡᓕᖓᓂᑦ ᐃᑎᕕᐊᓄᑦ ᖃᖅᑬᓪᓗ ᐊᑭᓕᕇᑦ ᐊᑯᓐᓂᖓᓂᑦ ᐱᔪᑦ. 13ᓄᓇᓕ ᓱᓇᖃᔪᐃᑦᑑᓕᕈᒫᕐᐳᖅ ᓄᓇᖃᕐᑐᑦ ᑕᕝᕙᓂ ᐱᑦᔪᑎᒋᓗᒋᑦ, ᐱᓂᐊᕐᓂᖏᑕᓗ ᐱᕈᕐᑎᑕᖏᑦ ᐱᓪᓗᒋᑦ.
ᐊᑕᓂᐅᑉ ᓂᑲᒍᓱᖕᓂᖓ ᐃᓴᕆᐊᓕᒥᐅᓂᒃ
14ᐃᓄᖁᑎᑎᑦ ᐰᕆᒃᑭᑦ ᐊᔭᐅᑉᐱᐊᕐᓄᑦ, ᓰᐱᖁᑎᑎᑦ ᓇᖕᒥᓂᕆᒋᒐᕕᒋᑦ ᑭᖑᕚᒃᓴᓯ, ᓄᓇᖃᕐᑐᑦ ᑭᓯᒥᐅᓗᑎᒃ ᓇᐹᕐᑐᓕᖕᓂ, ᐱᕈᕐᑐᖃᑦᓯᐊᕐᑐᒥᓗ. ᓂᕆᓕᕐᓕᑦ ᐹᓴᓂᒥ ᒋᓕᐊᑎᒥᓗ ᑍᑦᓱᒪᓂ ᐱᐅᓯᐅᕙᓚᐅᕐᑐᑎᑐᑦ.
15ᑍᑦᓱᒪᓂ ᐅᓪᓗᓂ ᐊᐅᓪᓚᓚᐅᕋᑦᓯ ᐄᑦᔨᑉᑎᒥᑦ, ᑍᒫᒃᑕᐅᖅ ᑖᒃᑯᐊ ᑲᒪᓇᕐᑐᓂᒃ ᑕᑯᔪᒫᕐᐳᑦ. 16ᐃᓅᖃᑎᒌᒡᔪᐊᑦ ᑕᑯᔪᒫᕐᐳᑦ ᑲᓐᖑᓲᑎᖃᓕᕐᓗᑎᒡᓗ ᐱᔪᓐᓇᕐᓂᕆᔭᕋᓗᐊᒥᖕᓂᒃ. ᖃᓂᑎᒃ ᐊᒡᒐᖕᒥᖕᓄᑦ ᒪᑐᔪᒫᕐᐰᑦ, ᑐᓵᔪᓐᓁᕐᓗᑎᒡᓗ. 17ᒪᓂᖅᑲᒥᒡᓗ ᐊᓗᒃᑐᕈᒫᕐᐳᑦ ᖁᒡᓗᒋᐊᑎᑐᑦ; ᖁᐱᕐᕈᑎᑐᓪᓗ ᐹᕐᖑᕈᒫᕐᐳᑦ ᓄᓇᒦᑦᑐᑐᑦ. ᓯᑎᒥᖕᓂᑦ ᓴᔪᒡᓗᑎᑦ ᐊᓂᔪᒫᕐᐳᑦ, ᓯᕘᕋᓗᑎᒃ ᐊᑕᓂᕐᒥᒃ ᒎᑎᑦᑎᓐᓂᒃ, ᑲᑉᐱᐊᓱᒍᒫᕐᐳᑦ ᐃᓕᖕᓂᒃ.
18ᑭᓇ ᐃᓕᒃᑐᑦ ᒎᑎᐅᕙ, ᐃᓱᒪᒋᔪᓐᓁᕐᓯᔪᓐᓇᕐᑐᖅ ᐱᐅᖏᑦᑐᓕᓂᕐᓂᒃ ᐊᔪᕐᑐᓕᓂᕐᓂᒡᓗ ᐊᒥᐊᒃᑰᔪᓄᑦ ᐃᓄᖁᑎᒥᓄᑦ ᑭᖑᕚᕆᔭᐅᔪᓄᑦ, ᓂᓐᖓᐅᒤᓐᓇᕈᓐᓇᖏᑦᑐᖅ ᖁᕕᐊᒋᔭᖃᕋᒥ ᓇᒡᓕᖕᓂᕐᒥᒃ ᓱᖁᓯᔪᐃᑦᑐᒥᒃ. 19ᐃᓚᑦᓱᒍᓱᓕᕐᓂᐊᕐᒥᔪᖅ ᐅᕙᑦᑎᓐᓂᒃ, ᐱᐅᖏᑦᑐᓕᓂᕗᑦ ᓵᓚᒋᓂᐊᕐᐰᑦ. ᐊᔪᕐᑐᓕᓂᕗᑦ ᐃᒋᓐᓂᐊᕐᐸᑎᑦ ᐃᒪᕐᕕᐅᑉ ᐃᑎᓂᕐᐹᖓᓄᑦ. 20ᓱᓕᑦᓯᐊᕐᓃᑦ ᓴᖅᑭᑎᓐᓂᐊᕐᐸᑦ ᔧᑯᒧᑦ ᓇᒡᓕᒍᓱᖕᓃᓪᓗ ᓱᖁᓯᔪᐃᑦᑐᖅ ᐂᑉᕋᕼᐋᒻᒧᑦ, ᑍᑦᓱᒪᓂᐊᓗᒃ ᐊᖏᕈᑎᒋᓚᐅᕐᑍᑦ ᓯᕗᓕᕕᓂᑦᑎᓐᓄᑦ.
Currently Selected:
ᒤᑲᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
