ᒤᑲᐅᑉ ᐊᒡᓚᖏᑦ 1
1
1 #
ᐊᑕᓃᑦ ᐂᑉᐸᖏᑦ 15:32-38; ᑯᕉᓂᑲ ᐂᑉᐸᖏᑦ 27:1-7;
ᐊᑕᓃᑦ ᐂᑉᐸᖏᑦ 16:1-20; ᑯᕉᓂᑲ ᐂᑉᐸᖏᑦ 28:1-27;
ᐊᑕᓃᑦ ᐂᑉᐸᖏᑦ 18:1—20:21; ᑯᕉᓂᑲ ᐂᑉᐸᖏᑦ 29:1—32:33. ᒎᑎᐅᑉ ᐅᖃᐅᓯᖏᑦ ᒤᑲᒧᑦ ᒧᕆᓯᑎᒥᐅᑕᕐᒧᑦ ᔫᑕᒻ, ᐊᕼᐊᔅᓗ, ᕼᐃᓯᑬᐊᓗ ᐊᖓᔪᖅᑳᕐᔪᐊᖑᑎᓪᓗᒋᑦ ᑭᖑᓕᕇᒃᓗᑎᒃ ᔫᑕᒥᐅᓄᑦ. ᑐᑭᓯᑎᑕᐅᓚᐅᕐᐳᖅ ᓴᒥᐊᕆᐊᒥᐅᑦ ᔨᕉᓴᓕᒥᐅᓪᓗ ᐱᓪᓗᒋᑦ.
ᕿᒃᓵᖕᓃᑦ ᓴᒥᐊᕆᐊ ᔨᕉᓴᓕᓗ ᐱᓪᓗᒋᑦ
2ᑐᓴᕆᑦᓯ ᐃᓄᓕᒫᖑᔪᓯ! ᓈᓚᒋᑦᓯ ᐃᓘᓐᓇᓯ ᓄᓇᖃᕐᑐᓕᒫᖑᔪᓯ ᓄᓇᕐᔪᐊᒥ! ᐊᑕᓂᐅᑉ ᒎᑎᐅᑉ ᐊᑭᕋᕐᑐᕐᓂᕐᒥᓂᒃ ᓇᓗᓁᕐᓯᕕᒋᓂᐊᕐᐹᓯ, ᐊᑕᓂᖅ ᐅᖃᕐᐳᖅ ᐃᓂᒥᓂ ᐃᑦᔪᕐᓁᑦᑐᒥ ᑐᒃᓯᐊᕐᕕᒡᔪᐊᖁᑎᒥᓂᑦ. 3ᑕᑯᒋᑦ, ᐊᑕᓂᖅ ᑎᑭᓐᓂᐊᕐᐳᖅ ᐃᓂᒋᔭᒥᓂᑦ; ᐊᖅᑲᕐᓂᐊᕐᐳᖅ ᐱᓱᖕᓂᐊᕐᓗᓂᓗ ᓄᓇᕐᔪᐊᑉ ᐳᕐᑐᓂᖏᑕ ᖄᖏᑎᒍᑦ. 4ᖃᖅᑬᑦ ᐊᐅᒍᒫᕐᐳᑦ, ᐳᓐᓂᕐᑎᑐᑦ ᐃᑯᒪᒧᑦ ᐊᐅᒃᑐᑎᑐᑦ ᓇᕐᓮᓪᓗ ᐊᕕᒡᓗᑎᒃ, ᑰᒍᒫᕐᐳᖅ ᐃᒪᕐᑎᑐᑦ ᓯᕕᖓᔪᒃᑯᑦ ᑰᒃᑐᑎᑐᑦ.
5ᑕᒪᓐᓇ ᑍᒤᓐᓂᐊᕐᐳᖅ ᐃᓴᕆᐊᓕᐅᑉ ᐊᔪᕐᑐᓕᓂᖓ ᐱᓪᓗᒍ, ᔧᑰᑉ ᑭᖑᕚᖏᓐᓄᑦ. ᑭᓈ ᐸᓯᔭᒃᓴᐅᕚ ᐃᓴᕆᐊᓕᐅᑉ ᐊᔪᕐᑐᓕᓂᖏᑦ ᐱᓪᓗᒌᑦ? ᓴᒥᐊᕆᐊᒥᐅᑦ ᐸᓯᔭᒃᓴᐅᕗᑦ! ᓴᒥᐊᕆᐊ ᑭᓈ ᐸᓯᔭᒃᓴᐅᕚ ᔫᑕᐅᑉ ᒎᑎᓐᖑᐊᖃᕐᓂᖏᓐᓅᑦ? ᔨᕉᓴᓕᒻ ᐸᓯᔭᒃᓴᐅᕗᖅ! 6“ᑍᒤᒻᒪᑦ ᓴᒥᐊᕆᐊ ᓯᖁᑦᑎᕈᒫᕐᐸᕋ, ᐱᕈᕐᓰᕕᐅᓕᕐᓗᓂ ᕔᓂᒃᓴᓂᒃ, ᐅᔭᕋᖏᓪᓗ ᑎᓲᒃᑎᑦᓱᒫᕐᐸᒃᑲ ᓇᕐᓴᒧᑦ, ᑐᓐᖓᕕᖏᑦ ᑭᓯᐊᓂ ᐊᒥᐊᒃᑰᓗᑎᒃ. 7ᓴᓇᓐᖑᐊᕐᓯᒪᔪᑦ ᒎᑎᓐᖑᐊᖏᑦ ᓯᖁᒥᑦᓱᒫᕐᐸᒃᑲ, ᐊᑭᓕᐅᑎᒋᓚᐅᕐᑕᖏᓪᓗ ᐊᕐᓇᓄᑦ ᐊᑐᒐᕐᓄᑦ ᐃᑯᐊᓪᓚᒃᑎᓐᓂᐊᕐᐸᒃᑲ. ᒎᑎᓐᖑᐊᓕᒫᖏᑦ ᐊᓯᕈᕈᒫᕐᐸᒃᑲ, ᑲᑎᕐᓱᓚᐅᕐᒪᒋᑦ ᐊᑭᓕᕐᑕᐅᓂᒃᑯᑦ ᐊᕐᓇᓄᑦ ᐊᑐᒐᕐᓄᑦ, ᑖᒃᑯᓄᖓᑦᓮᓐᓇᖅ ᐊᕐᓇᓄᑦ ᐊᑐᒐᕐᓄᑦ ᐊᑐᕐᑕᐅᓂᐊᕐᐳᑦ.”
8ᑕᒪᓐᓇ ᐱᑦᔪᒋᓗᒍ ᓂᐹᕐᓗᖓ ᕿᐊᔪᒫᕐᐳᖓ, ᐱᓱᒍᒫᕐᐳᖓ ᐊᓐᓄᕌᖃᖏᓪᓗᖓ ᑲᒥᓪᓛᕐᓗᖓᓗ ᐱᓱᒍᒫᕐᐳᖓ ᓂᐹᕐᓗᖓ ᕿᒻᒥᖓᔪᑎᑐᑦ, ᕿᒃᓵᒡᓗᖓᓗ ᑎᖕᒥᐊᕐᔪᐊᑎᑐᑦ ᐋᔅᑐᕆᓯᑎᑐᑦ. 9ᔫᑕᐅᑉ ᑭᓪᓕᖏᑦ ᒪᒥᑎᑕᐅᔪᓐᓇᓐᖏᓚᑦ; ᐊᓯᕈᕐᑕᐅᓂᖅ ᔨᕉᓴᓕᐅᑉ ᐃᑎᕐᑕᕐᕕᖓᓃᓕᕐᐳᑦ, ᐃᓄᖁᑎᒪ ᓄᓇᖓᓂ.
ᐊᑭᕅᑦ ᔨᕉᓴᓕᒧᐊᕐᓂᖏᑦ
10ᒑᑎ ᐅᖃᐅᑦᔭᐅᑦᑍᓕᓕ, ᕿᐊᓂᐊᕋᓯᓗ; ᐱᑦ-ᓕᐊᐸᕋᒥᐅᑕᐅᔪᓯ ᓄᓇᒥ ᐳᔪᕋᕐᒥ ᐊᒃᓴᑳᖃᑦᑕᓕᕆᑦᓯ. 11ᐊᐅᓪᓚᓕᕆᑦᓯ ᑲᓐᖑᓱᒡᓗᓯ ᐊᓐᓄᕌᖃᖏᓪᓗᓯ ᐃᓕᑦᓯ ᓴᐱᕆᒥᐅᖑᔪᓯ; ᔮᓇᓐᒥᐅᖑᔪᓯ ᑖᒃᑯᓇᓐᖓᑦ ᐊᓂᓇᓱᐊᕐᑍᓕᒋᑦᓯ; ᐱᑦ-ᐃᔨᐅᓪᒥᐅᑦ ᕿᒃᓵᖕᓂᖏᓐᓄᑦ ᖃᐅᔨᓂᐊᕋᑦᓯ ᐃᓂᒃᓴᕐᑕᖃᕈᓐᓃᕐᓂᖓᓂᒃ. 12ᐃᓕᑦᓯ ᒪᕉᑎᒥ ᓄᓇᖃᕐᑐᓯ ᐃᓱᒫᓗᒡᓗᓯ ᐅᑕᖅᑭᓕᕆᑦᓯ ᐱᐅᔪᒥᒃ, ᑲᑉᐱᐊᓇᕐᑐᖅ ᐊᑕᓂᕐᒥᑦ ᐱᔪᖅ ᔨᕉᓴᓕᐅᑉ ᐃᑎᕐᑕᕐᕕᖓᓄᑦ ᑎᑭᐅᑎᖕᒪᑦ. 13ᓚᑮᓯᒥᐅᖑᔪᓯ ᐊᒃᓴᓗᐊᓖᑦ ᐅᓇᑕᐅᑏᑦ ᐊᑐᐃᓐᓇᕈᓕᕐᓯᒋᑦ, ᐊᔪᕐᑐᓕᓂᕐᒥᒃ ᐱᒋᐊᕐᑎᑦᓯᓚᐅᕋᑦᓯ ᓮᐅᓂᐅᑉ ᐸᓂᖓᓂᒃ ᐃᓴᕆᐊᓕᒥᐅᓪᓗ ᐱᐅᖏᓐᓂᖏᑦ ᓇᓂᔭᐅᓯᒪᖕᒪᑕ ᐃᓕᑦᓯᓐᓂ. 14ᑍᒤᒻᒪᑦ ᑐᓂᔭᒃᓴᑦᓯᓐᓂᒃ ᑐᓂᓯᓕᕆᑦᓯ ᒧᕆᓯᑦ-ᒑᑎᒧᑦ, ᐊᑲᔨᒥᐅᓪᓗ ᑕᑎᒋᔭᒃᓴᐅᓐᖏᓚᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᓐᓄᑦ.
15ᒪᕇᓴᒥᐅᖑᔪᓯ ᓵᓚᐅᓂᕐᒧᑦ ᑎᑭᑕᐅᑎᑦᓱᒫᕐᐸᑦᓯ. ᐃᓴᕆᐊᓕᒥᐅᓪᓗ ᐱᓐᓇᕐᓇᕐᓂᖓ ᐊᑑᓚᒻ ᕾᕈᓱᐊᓄᐊᕈᒫᕐᐳᖅ. 16ᓄᔧᔭᓕᕆᑦᓯ ᓂᐊᖁᓯ ᓄᔧᕈᑎᓗᒍ ᕿᒃᓵᖕᓂᕐᒧᑦ, ᓄᔧᕈᑎᓕᕆᑦᓯ ᑎᖕᒥᐊᑎᑐᑦ ᑎᒥᕕᓂᕐᑐᓲᑎᑐᑦ, ᕿᑐᕐᖓᓯ ᓇᒡᓕᒋᔭᓯ ᐱᓪᓗᒋᑦ, ᐊᐅᓪᓚᐅᑦᔭᐅᔪᒫᕐᒪᑕ ᑎᒍᔭᐅᓗᑎᒃ.
Currently Selected:
ᒤᑲᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
