ᒤᑲᐅᑉ ᐊᒡᓚᖏᑦ 2
2
ᐅᖁᒤᒃᓴᕐᑎᑦᓯᔪᑦ ᑐᕌᕐᑕᖓᑦ
1ᑲᑉᐱᐊᓐᓇᒦᒃ ᐱᐅᖏᑦᑐᓂᒃ ᐃᓱᒪᒃᓴᕐᓯᐅᕈᑎᖃᕐᑐᑦ, ᐱᐅᖏᑦᑐᒥᒡᓗ ᐅᐸᓗᖎᔭᐅᑎᖃᕐᑐᑦ ᐅᓐᓄᐊᒃᑯᑦ ᐃᒡᓕᕐᒥᖕᓂ! ᐅᓪᓛᖓᓂᓗ ᐱᐅᖏᑦᑐᓂᒃ ᑲᔪᓯᑎᑦᓯᔪᑦ, ᑍᒤᓕᐅᕐᐳᑦ ᐱᔪᓐᓇᕐᓂᕐᒥᒃ ᑐᓂᓯᕕᐅᓯᒪᒐᒥᒃ. 2ᐱᕈᕐᓰᕕᖕᓂᒃ ᐱᔪᒪᕕᒃᔪᐊᓕᕌᖓᒥᒃ ᐱᕋᔭᖕᓂᒃᑯᑦ ᐊᕐᓵᕐᓯᕙᒃᐳᑦ, ᐃᒡᓗᑖᕐᐸᒡᓗᑎᒡᓗ ᐊᕐᓵᕐᓯᓪᓗᑎᒃ. ᐅᖁᒤᒃᓴᕐᑎᑦᓯᓪᓗᑎᒡᓗ ᐊᖏᕐᕋᓕᖕᓂᒃ, ᐊᕐᓵᕐᓯᕙᒡᓗᑎᒡᓗ ᑭᖑᕐᖑᑎᔭᒃᓴᕆᔭᐅᔪᓂᒃ.
3ᑍᒤᒻᒪᑦ ᐊᑕᓂᖅ ᐅᖃᕐᐳᖅ: “ᑕᑯᒋᑦ, ᐅᖁᒤᒃᓴᕐᓇᕐᑐᓂᒃ ᐋᖅᑭᒃᓱᐃᕗᖓ ᐃᓄᖕᓄᑦ ᑖᒃᑯᓄᖓ, ᐃᒻᒥᖕᓂᒡᓗ ᓴᐳᑎᔪᓐᓇᕐᓂᐊᓐᖏᓚᑦ; ᐱᐅᔪᕆᓗᑎᒡᓗ ᐱᓱᖃᑦᑕᕐᓂᐊᕈᓐᓁᕐᐳᑦ, ᐅᖁᒤᓐᓇᕐᑐᖅ ᑕᒪᓐᓇ ᓇᓪᓕᐅᑎᓂᐊᓕᕐᒪᑦ. 4ᑍᑲᓂ ᐅᓪᓗᒥ ᐃᓄᖕᓂᑦ ᒥᑕᐅᑎᒋᔭᐅᔪᒫᕐᐳᓯ ᐃᓐᖏᕈᓯᓕᐊᕆᔭᐅᓗᓯᓗ ᕿᒃᓵᒍᑎᓂᒃ, ᐅᒡᒍᐊᕐᓇᕐᑑᔪᒫᕐᐳᖅ ᖃᓯᓕᓇᕐᑐᑎᑐᑦ ᕿᒃᓵᖕᓇᕐᓗᓂ, ᐃᒫᒃ ᐅᖃᕈᒫᕐᐳᑦ, ‘ᐊᓯᕈᕐᑕᐅᓯᒪᒻᒪᕆᒃᐳᒍᑦ! ᐊᑕᓂᐅᑉ ᐊᕐᓵᕐᓯᒪᖕᒪᑎᒍᑦ ᑭᖑᕐᖑᑎᔭᒃᓴᑦᑎᓐᓂᒃ, ᑐᓂᓪᓗᒋᓪᓗ ᐅᕙᑦᑎᓐᓂᒃ ᑎᒍᓯᓚᐅᕐᑐᓄᑦ.’”
5ᑍᒤᒻᒪᑦ ᐱᖃᑎᖃᕐᓂᐊᕈᓐᓁᕐᐳᓯ ᐃᓱᒪᒃᓴᕐᓯᐅᖃᑎᒃᓴᑦᓯᓐᓂᒃ ᓄᓇᖁᑎᑦᓯ ᓇᓚᐅᑦᑖᕈᑎᒃᑯᑦ ᑎᑎᕐᓯᒪᓂᖓᑕ ᑭᒡᓕᖓ ᐱᓪᓗᒍ, ᐊᑕᓂᐅᑉ ᑲᑎᒪᔪᖁᑎᖏᓐᓂ.
6ᓇᓚᐅᑦᑍᔪᒧᑦ ᐅᖃᕐᐳᓯ, “ᑕᒪᒃᑯᓂᖓ ᐊᔪᕆᕐᑐᓐᖏᓚᐅᕐᑎᒍᑦ, ᑍᒤᒻᒪᑦ ᓇᓚᐅᑦᑍᓂᐊᕈᓐᓁᕐᐳᑦ ᐅᕙᑦᑎᓐᓄᑦ; ᓇᕐᕈᓇᕐᓯᑎᑕᐅᓂᐅᑉ ᓵᓚᒋᓂᐊᓐᖏᓛᑎᒍᑦ.” 7ᔧᑯᒧᑦ ᑭᖑᕚᖑᔪᓯ: ᐊᑕᓂᐅᑉ ᐊᓂᕐᓂᖓ ᓂᓐᖓᐅᒪᕚ? ᑕᒪᒃᑯᐊ ᐱᓂᐊᕐᓂᕆᕔᑦ? ᐅᖃᐅᓯᒃᑲ ᐱᐅᔪᒥᒃ ᐱᓇᓱᐊᕐᑎᑦᓯᓐᖏᓛᑦ ᐃᓅᑦᓯᐊᕐᑐᓅᑦ? 8ᒫᓐᓇᑯᓪᓕ ᐃᓄᖁᑎᒃᑲ ᐊᑭᕋᕐᑎᑐᑦ ᐱᓇᓱᐊᓕᕐᐳᑦ, ᐅᓕᒡᔪᐊᖏᓐᓂᒃ ᐊᓐᓄᕌᖏᓐᓂᒡᓗ ᐊᕐᓵᕐᓯᖕᒪᑕ, ᐃᓕᑦᓯᓐᓂᒃ ᐃᓱᒪᔮᕈᑎᖃᕋᑎᒃ ᐊᖅᑯᓵᕐᑐᑦ, ᐊᖑᑎᑎᑐᑦ ᐅᑎᕋᑖᕐᑐᑎᑐᑦ ᐅᓇᑕᕐᓂᕐᒥᑦ. 9ᐃᓄᖁᑎᒃᑲ ᐊᕐᓁᑦ ᐊᓂᑎᓚᐅᕐᐸᓯ ᐊᖏᕐᕋᖏᓐᓂᑦ; ᐊᖏᕐᕋᕐᓯᒪᑦᓯᐊᕐᑐᑦ ᖁᕕᐊᓱᒃᓗᑎᒃ; ᕿᑐᕐᖓᖏᓐᓃᑦᑐᕐᓗ ᐱᓐᓇᕐᓇᕐᓂᕋ ᐲᕐᓯᒪᕙᓯ ᐃᓱᖃᖏᑦᑐᒧᑦ. 10ᒪᑭᓪᓗᑎᑦ ᐊᐅᓪᓚᓕᕆᑦ, ᑖᓐᓇ ᑕᕾᕐᓯᕐᕕᒋᖏᓐᓇᕕᐅᒃ; ᓱᕈᕐᑎᕐᑕᐅᓯᒪᓕᕐᒪᑦ ᐊᓯᕈᕐᑕᐅᓪᓗᓂᓗ, ᓯᖁᒥᑕᐅᓪᓚᕆᖕᓂᐊᕐᐳᖅ ᐋᖅᑭᒍᓐᓁᓪᓕᓗᓂ.
11ᐃᓄᒃ ᓴᒡᓗᑐᔪᖅ ᓴᒡᓗᓗᓂ ᐅᖃᕐᐸᑦ ᐃᒫᒃ, “ᓇᓚᐅᑦᑍᓂᐊᕐᐳᖓ ᐃᓕᑦᓯᓐᓄᑦ ᕔᓂᖃᑦᓯᐊᕐᓂᐊᕐᐳᓯ ᐃᒥᐊᓗᖃᕐᓗᓯᓗ ᓴᓐᖏᔪᒥᒃ,” ᑍᒤᑦᑐᒥᒃ ᐊᔪᕆᕐᑐᐃᔨᖃᕈᒪᕗᓯ ᐃᓄᖕᓄᑦ. 12ᓱᓕᑦᓯᐊᕐᓗᖓ ᑲᑎᕐᓱᕈᒫᕐᐸᑦᓯ, ᔧᑯᒧᑦ ᑭᖑᕚᖑᔪᓯ; ᑲᑎᕐᓱᕈᒫᕐᐸᒃᑲ ᐃᓴᕆᐊᓕᒥ ᐊᒥᐊᒃᑰᔪᑦ; ᓰᐱᑎᑐᑦ ᓰᐱᒃᑯᕕᖕᒧᑦ ᑲᑎᕐᓱᕐᑕᐅᔪᑎᑐᑦ, ᓰᐱᑎᑐᓪᓗ ᓂᕿᒃᓴᓕᖕᒦᑦᑐᑎᑐᑦ; ᑐᓴᒡᒐᕕᒃᓴᐅᓛᓐᖏᓚᕐᓗ ᐃᓄᒋᐊᓗᐊᒧᑦ. 13ᐅᒃᑯᐃᕐᓯᔫᑉ ᐊᐅᓪᓚᐅᑎᓂᐊᕐᐰᑦ ᑎᒍᔭᐅᓯᒪᕕᖏᓐᓂᑦ; ᐊᐅᓪᓚᕐᓗᑎᒡᓗ ᐃᒡᓗᒐᓮᑦ ᐃᑎᕐᑕᕐᕕᐊᒍᑦ ᐊᓂᓗᑎᒃ. ᐊᖓᔪᖅᑳᕐᔪᐊᖓᑦᑕ ᐊᑕᓂᐅᑉ, ᑕᓯᐅᕐᓂᐊᕐᒪᒋᑦ.
Currently Selected:
ᒤᑲᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
