ᒫᑎᐅᓯᐅᑉ ᐊᒡᓚᖏᑦ 27
27
ᔩᓱᓯᐅᑉ ᐰᓛᑑᓯᒧᐊᕈᑦᔭᐅᓂᖓ
ᒫᑯᓯ 15:1; ᓘᑲᓯ 23:1-2; ᔪᐊᓇᓯ 18:28-32
1ᖃᐅᓕᕐᑎᓪᓗᒍ ᐅᓪᓛᒻᒪᕆᒃᑯᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ, ᔫᑎᓄᓪᓗ ᐊᖓᔪᖅᑲᐅᔪᓕᒫᑦ ᐊᖏᖃᑎᒌᒃᐳᑦ ᔩᓱᓯ ᑐᖁᑕᐅᖁᓪᓗᒍ; 2ᐊᑦᓱᖏᕐᓗᒍ ᐰᓛᑑᓯᒧᐊᕈᑎᕚᑦ, ᕉᒪᒥᐅᑦ ᓄᓇᓕᖕᓂ ᐊᐅᓚᑦᓯᔨᖁᑎᖓᓄᑦ.
ᔫᑕᓯᐅᑉ ᑐᖁᓂᖓ
ᐋᐴᓯᑕᓖᑦ 1:18-19
3 #
ᐋᐴᓯᑕᓖᑦ 1:18,19. ᔫᑕᓯ ᐱᔭᐅᑎᑦᓯᓯᒪᔪᖅ, ᖃᐅᔨᓕᕋᒥ ᔩᓱᓯᐅᑉ ᑐᖁᑕᒃᓴᓐᖑᕐᑎᑕᐅᓂᖓᓂᒃ, ᕿᒃᓵᒻᒪᕆᒃᓗᓂ ᖃᕿᐊᓕᕐᐳᖅ, ᑮᓇᐅᔭᐃᑦ ᓯᐅᓪᕕᕇᑦ 30 ᐅᑎᕐᑎᑉᐰᑦ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᔫᑎᓄᓪᓗ ᐊᖓᔪᖅᑲᐅᔪᓄᑦ. 4ᐅᖃᕐᓗᓂ, “ᐊᔪᕐᑐᓕᓯᒪᕗᖓ ᐸᓯᔭᒃᓴᐅᖏᑦᑐᒥᒃ ᐊᖑᒻᒥᒃ ᐱᔭᐅᑎᑦᓯᒐᒪ ᑐᖁᑕᐅᖁᓪᓗᒍ.”
ᑖᒃᑯᐊ ᑭᐅᕚᑦ, “ᑕᒪᓐᓇ ᑍᒤᑎᓐᖏᓚᕗᑦ, ᐃᕝᕕᑦ ᑍᒤᑎᑕᑐᐊᕆᕙᑦ!”
5ᔫᑕᓯᐅᑉ ᑮᓇᐅᔧᑦ ᑐᒃᓯᐊᕐᕕᒃᔪᐊᕐᒧᑦ ᐃᒋᓪᓗᒋᑦ; ᑕᕝᕙᓐᖓᑦ ᐊᓂᕗᖅ; ᐃᒻᒥᓂᒃ ᕿᒥᑦᑕᕐᑐᕐᓗᓂ.
6ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑕ ᑮᓇᐅᔧᑦ ᑎᒍᓪᓗᒋᑦ ᐅᖃᕐᐳᑦ, “ᐅᑯᐊ ᑮᓇᐅᔧᑦ ᐊᐅᖕᒥᒃ ᐊᑭᖃᕐᒪᑕ, ᐱᖁᔭᑦᑎᓐᓂ ᑍᒤᑦᑐᑦ ᑮᓇᐅᔧᑦ ᑐᒃᓯᐊᕐᕕᒡᔪᐊᑉ ᑮᓇᐅᔭᒃᑯᕕᖓᓄᑦ ᐃᓕᔭᐅᖁᔭᐅᓐᖏᓚᑦ.” 7ᐊᖏᖃᑎᒌᒃᑲᒥᒃ, ᑖᒃᑯᐊ ᑮᓇᐅᔧᑦ ᐊᑐᕐᑕᐅᓕᕐᐳᑦ ᒪᕐᕋᓕᕆᔨᐅᑉ ᐱᕈᕐᓰᕕᖁᑎᖓᓂᒃ ᓂᐅᕕᐅᑎᒋᓪᓗᒋᑦ, ᐃᓗᕕᕐᓯᕕᒃᓴᐅᖁᓪᓗᒍ ᓄᓇᓕᑐᖃᐅᖏᑦᑐᓄᑦ. 8ᑍᒤᒻᒪᑦ ᑖᓐᓇ ᐱᕈᕐᓰᕕᒃ ᓱᓕ ᑍᔭᐅᕙᒃᐳᖅ “ᐱᕈᕐᓰᕕᒃ ᐊᐅᒃᑕᓕᒃ” ᐅᓪᓗᒥᒧᑦ ᑎᑭᓪᓗᒍ.
9 #
ᓴᑲᕅᐊ 11:12,13. ᑕᕝᕙ ᓇᓚᐅᑦᑍᔫᑉ ᔨᕆᒤᐊᐅᑉ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᕗᑦ ᐃᒤᓕᔪᑦ, “ᑮᓇᐅᔧᑦ ᓯᐅᓪᕕᕇᑦ 30 ᑎᒍᕔᑦ, ᐃᓴᕆᐊᓕᒥᐅᑦ ᐃᓄᖏᑕ ᐊᖏᖃᑎᒌᒍᑎᒋᓚᐅᕐᑕᖏᑦ ᑖᑦᓱᒧᖓ ᐊᑭᓕᐅᑕᐅᖁᓪᓗᒋᑦ, 10ᑮᓇᐅᔧᑦ ᐊᑐᕐᑕᐅᕗᑦ ᒪᕐᕋᓕᕆᔨᐅᑉ ᐱᕈᕐᓰᕕᖁᑎᖓᓂᒃ ᓂᐅᕕᕈᑎᒋᔭᐅᓪᓗᑎᒃ, ᓲᕐᓗ ᐊᑕᓂᐅᑉ ᑍᒫᒃ ᐱᖁᓚᐅᕐᒪᖓ.”
ᐰᓛᑑᓯᐅᑉ ᐊᐱᕐᓱᕐᓂᖓ ᔩᓱᓯᒥᒃ
ᒫᑯᓯ 15:2-5; ᓘᑲᓯ 23:3-5; ᔪᐊᓇᓯ 18:33-38
11ᔩᓱᓯ ᓇᖏᕐᐳᖅ ᕉᒪᒥᐅᑦ ᓄᓇᓕᖕᓂ ᐊᐅᓚᑦᓯᔨᖓᑕ ᓵᖓᓂ, ᑖᑦᓱᒪ ᐊᐱᕆᕚ, “ᔫᑎᓄᑦ ᐊᖓᔪᖅᑳᕐᔪᐊᖑᕖᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᕐᐳᑎᑦ.” 12ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᔫᑎᓄᓪᓗ ᐊᖓᔪᖅᑲᐅᔪᓄᑦ ᐸᓯᒃᓯᕋᓱᒃᑐᓄᑦ ᐊᑕᐅᓯᐊᕐᓗᓂᓘᓐᓃᑦ ᑭᐅᓚᐅᓐᖏᓚᖅ.
13ᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᐅᑯᐊ ᑐᓵᓐᖏᑕᑏᑦ ᐃᓕᖕᓄᑦ ᐸᓯᒃᓯᕈᑎᒋᔭᖏᑦ ᐊᑦᔨᒌᖏᑦᑐᑦ?”
14ᔩᓱᓯᓕ ᑭᐅᓐᖏᓚᖅ, ᐸᓯᒃᓯᕈᑕᐅᔪᓄᑦ ᐊᑕᐅᓯᕐᒧᓪᓘᓐᓃᑦ ᑭᐅᓚᐅᖏᓐᓂᕗᖅ; ᑕᒪᑐᒧᖓ ᐊᐅᓚᑦᓯᔨᐅᔪᖅ ᐊᖏᔪᒥᒃ ᑲᒪᓂᐊᕐᐳᖅ.
ᔩᓱᓯᐅᑉ ᑐᖁᑕᒃᓴᓐᖑᕐᑎᑕᐅᓂᖓ
ᒫᑯᓯ 15:6-15; ᓘᑲᓯ 23:13-25; ᔪᐊᓇᓯ 18:39—19:16
15ᖄᖏᕐᑕᐅᕕᖕᒥᒡᓕ ᓇᓪᓕᐅᓐᓂᕐᓯᐅᕐᕕᐅᓕᕌᖓᑦ ᕉᒪᒥᐅᑦ ᐊᐅᓚᑦᓯᔨᖏᑦ ᐱᐅᓯᖃᕐᐸᒃᐳᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᑕᐅᓯᕐᒥᒃ ᐊᓂᑎᑦᓯᖃᑦᑕᕐᓗᑎᒃ ᐃᓄᐃᑦ ᐊᓂᑎᑕᐅᖁᔭᖓᓂᒃ. 16ᑍᑦᓱᒪᓂ ᖃᐅᔨᒪᔭᐅᓪᓚᕆᒃᑐᒥᒃ ᑎᒍᔭᐅᓯᒪᔪᖃᓚᐅᕐᐳᖅ ᔩᓱᓯ ᐸᕋᐹᓯᒥᒃ ᐊᑎᓕᖕᒥᒃ.#27:16 ᐃᓚᖏᓐᓂᑦ ᑍᔭᐅᔪᖅ ᔩᓱᓯ ᐸᕋᐹᓯᒥᒃ 17ᐃᓄᒐᓴᒡᔪᐊᑦ ᑲᑎᖕᒪᑕ, ᐰᓛᑑᓯᐅᑉ ᐊᐱᕆᕔᑦ, “ᓇᓪᓕᐊᓐᓂᒃ ᐊᓂᑎᑦᓯᖁᕕᓯᓐᖔ ᐸᕋᐹᓯᒥᒃ ᐅᕝᕙᓗ ᔩᓱᓯᒥᒃ ᑍᔭᐅᔪᒥᒃ ᙭ᔅᑑᓯᒥᒃ?” 18ᖃᐅᔨᒪᒐᒥ ᔫᑎᑦ ᐊᖓᔪᖅᑳᖏᑕ ᔩᓱᓯ ᑕᕝᕗᓐᖓᐅᑎᓯᒪᖕᒪᑦᔪᒃ ᐃᓄᖕᓄᑦ ᓵᓐᖓᔭᐅᓂᕐᓴᐅᓂᖓᓂᒃ ᐊᑲᐅᒃᓴᕋᑎᒃ.#27:18 ᐊᑲᐅᒃᓴᕋᑎᒃ ᐅᕝᕙᓗ ᓯᒡᒐᑦᔨᓪᓗᑎᒃ
19ᐰᓛᑑᓯ ᐃᖅᑲᕐᑐᐃᕕᖕᒥ ᐃᒃᓯᕚᕐᑎᓪᓗᒍ, ᓄᓕᐊᖓᑕ ᐅᖃᐅᑦᔭᐅᔭᕐᑐᕐᑎᑉᐹ: “ᐅᓇ ᐊᖑᑦ ᐸᓯᔭᒃᓴᐅᖏᑦᑐᖅ ᑲᒪᒋᔭᕆᐊᖃᓐᖏᑍᑦ, ᐅᓐᓄᐊᖅ ᓯᓐᓇᒃᑑᒪᓪᓗᖓ ᐊᖏᔪᒥᒃ ᐅᖁᒤᒃᓴᕈᑎᖃᖅᑲᐅᒐᒪ ᑖᓐᓇ ᐱᓪᓗᒍ.”
20ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ ᔫᑎᓄᓪᓗ ᐊᖓᔪᖅᑲᐅᔪᑦ ᐃᓄᖕᓂᒃ ᐃᓱᒪᓕᐅᕆᕗᑦ ᐸᕋᐹᓯᒥᒃ ᕿᓄᖁᓪᓗᒋᑦ, ᔩᓱᓯ ᑐᖁᑕᐅᖁᓪᓗᒍ. 21ᑕᕝᕙ ᐰᓛᑑᓯ ᐊᐱᕆᒃᑲᓐᓂᕐᐳᖅ ᐃᓄᒋᐊᕐᑐᕐᔪᐊᓂᒃ, “ᐅᑯᐊᒃ ᒪᕐᕉᒃ ᓇᓪᓕᐊᓐᓂᒃ ᐊᓂᑎᑦᓯᖁᕕᓯᓐᖔ?”
ᐃᓄᒋᐊᒃᑐᕐᔪᐊᑦ ᐅᖃᕐᐳᑦ, “ᐸᕋᐹᓯᒥᒃ!”
22ᐰᓛᑑᓯᐅᑉ ᐅᖃᐅᑎᕔᑦ, “ᐅᓇᓕ ᖃᓄᖅ ᐱᓂᐊᕐᕕᒋᓂᐊᕐᑕᕋ ᔩᓱᓯ ᙭ᔅᑑᓯᒥᒃ ᑍᔭᐅᔪᖅ?”
ᐃᓄᒋᐊᕐᑐᕐᔪᐊᑦ ᑭᐅᕗᑦ, “ᑭᑭᐊᒃᑐᕐᑕᐅᓕ!”
23ᐰᓛᑑᓯᓗ ᐅᖃᕐᐳᖅ, “ᓱᓇᒥᒃ ᑐᖁᑕᐅᑦᔪᑎᒃᓴᒥᒃ ᐱᓯᒪᖕᒫᑦ?”
ᑕᕝᕙ ᕾᒐᓛᓕᕐᐳᑦ ᓂᐱᖅᑯᕐᑐᓪᓗᑎᒃ, “ᑭᑭᐊᒃᑐᕐᑕᐅᓕ!”
24 #
ᒨᓯᓯ ᑕᓪᓕᒪᖏᑦ 21:6-9. ᐰᓛᑑᓯᓕ ᑐᑭᓯᓕᕋᒥ ᐱᕙᓪᓕᐊᑎᑦᓯᖏᓐᓂᕐᒥᓂᒃ, ᐃᓄᒐᓴᒡᔪᐊᑦ ᐱᕋᔭᑐᐃᓐᓇᕆᐊᖃᕐᑑᔮᓕᕐᒪᑕ, ᐃᒥᕐᒥᒃ ᑯᕕᓯᓪᓗᓂ ᐊᒡᒐᓂ ᐅᐊᓴᕐᐰᑦ ᐃᓄᒐᓴᒡᔪᐊᑦ ᓵᖏᓐᓂ, ᐅᖃᕐᓗᓂ, “ᑖᑦᓱᒪ ᑐᖁᑕᐅᓂᖓᓄᑦ ᐸᓯᔭᒃᓴᐅᓐᖏᓚᖓ; ᐃᓕᑦᓯ ᑐᖁᑕᐅᑎᑉᐸᓯ.”
25ᐃᓄᒐᓴᒡᔪᐊᑦ ᑭᐅᕗᑦ, “ᑖᑦᓱᒪ ᑐᖁᑕᒃᓴᓐᖑᕐᑎᑕᐅᓂᖓ ᐅᕙᑦᑎᓐᓄᑦ ᕿᑐᕐᖓᑦᑎᓐᓄᓪᓗ ᐸᓯᔭᒃᓴᐅᑦᔪᑕᐅᓕᕐᓕ!” 26ᑕᕝᕙ ᐰᓛᑑᓯᐅᑉ ᐸᕋᐹᓯ ᐊᓂᑎᑉᐹ ᑖᒃᑯᓄᖓ; ᔩᓱᓯ ᑏᒐᕐᑐᕐᑕᐅᑎᑦᑕᕇᕋᒥᐅᒃ, ᐂᑦᑑᑎᒋᕚ ᑭᑭᐊᒃᑐᕐᑕᐅᖁᓪᓗᒍ.
ᐅᓇᑕᕐᑐᒃᓮᑦ ᔩᓱᓯᒥᒃ ᒥᑕᐅᑎᖃᕐᓂᖓᑦ
ᒫᑯᓯ 15:16-20; ᔪᐊᓇᓯ 19:2-3
27ᑕᕝᕙ ᐰᓛᑑᓯᐅᑉ ᐅᓇᑕᕐᑐᒃᓴᖁᑎᖏᑕ ᔩᓱᓯ ᐊᖓᔪᖅᑳᑉ ᐃᖅᑲᕐᑐᐃᕕᖓᓄᐊᕈᑎᕚᑦ, ᐅᓇᑕᕐᑐᒃᓮᓪᓗ ᐅᓄᕐᑐᖅ ᑕᕝᕗᓐᖓᕐᑎᑕᐅᒋᕗᑦ. 28ᔩᓱᓯ ᐊᓐᓄᕅᔭᕐᐹᑦ ᐅᓕᒡᔪᐊᒥᒃ ᐊᐅᐸᓪᓚᕆᒃᑐᒥᒃ ᐊᑎᑎᓪᓗᒍ. 29ᐅᕐᐱᐅᔭᓂᒃ ᑲᑭᓪᓚᕐᓇᕐᑐᓂᒃ#27:29 ᑲᐱᓐᓇᕐᑐᓕᕐᓂ ᓂᐊᖂᑎᓕᐅᕐᓗᑎᒃ ᓂᐊᖁᐊᓄᑦ ᐃᓕᕚᑦ, ᓱᓪᓗᓕᖕᒥᒃ ᐊᔭᐅᑉᐱᐊᓕᕐᓗᒍ; ᓵᖓᓄᑦ ᓰᖅᑯᕐᓗᑎᒃ ᒥᑕᐅᑎᒋᓪᓗᒍ ᐅᖃᕐᐳᑦ, “ᓂᕐᑐᕐᑕᐅᓕ ᔫᑎᑦ ᐊᖓᔪᖅᑳᕐᔪᐊᖓᑦ!” 30ᑎᕝᕗᓗᒃᐹᑦ, ᐊᔭᐅᐱᐊᒧᑦ ᓱᓪᓗᓕᖕᒧᑦ ᓂᐊᖁᐊᒍᑦ ᐊᓇᐅᓕᕐᐹᑦ. 31ᒥᑕᐅᑎᒋᔭᕇᕋᒥᑦᔪᒃ, ᐅᓕᒡᔪᐊᖓ ᐲᕐᐹᑦ ᐊᓐᓄᕌᑐᖃᖏᓐᓂᒃ ᐊᑎᑎᓪᓗᒍ, ᐊᐅᓚᕈᑎᓕᕐᐹᑦ ᑭᑭᐊᒃᑐᕆᐊᕐᑐᕐᖢᒍ.
ᔩᓱᓯᐅᑉ ᑭᑭᐊᒃᑐᕐᑕᐅᓂᖓ
ᒫᑯᓯ 15:21-32; ᓘᑲᓯ 23:26-43; ᔪᐊᓇᓯ 19:17-27
32ᑕᕝᕙᓐᖓᑦ ᐊᓂᓪᓗᑎᒃ, ᐊᖑᒻᒥᒃ ᑲᑎᓯᕗᑦ ᓮᕆᓂᒥᐅᑕᕐᒥᒃ, ᓮᒨᓂᒥᒃ ᐊᑎᓕᖕᒥᒃ; ᑖᓐᓇ ᐅᓇᑕᕐᑐᒃᓴᓂᑦ ᐊᒃᓱᕉᑦᔭᐅᓪᓗᓂ ᐊᒡᔭᕐᓯᑎᑕᐅᕗᖅ ᔩᓱᓯᐅᑉ ᓴᓐᓂᖓᔪᓕᒃᓴᖓᓂᒃ. 33ᒎᓪᒑᑕᒧᐊᕋᒥᒃ, ᐊᑎᖓ ᑐᑭᖃᕐᑐᖅ “ᓂᐊᖁᕕᓂᕐᑕᓕᖕᒥᒃ.” 34#ᐃᓐᖏᕈᑦ 69:21.ᑕᕝᕙᓂ ᔩᓱᓯ ᐅᐂᓂᒥᒃ ᖃᓯᓕᓇᕐᑐᒥᒃ ᐃᓚᓕᖕᒥᒃ ᐃᒥᕐᑎᓐᓇᓱᐊᕐᐹᑦ; ᔩᓱᓯᐅᑉ ᐆᒃᑐᕋᒥᐅᒃ, ᐃᒥᕈᒪᓐᖏᓛ.
35 #
ᐃᓐᖏᕈᑦ 22:18. ᑕᕝᕙᓂ ᑭᑭᐊᒃᑐᕇᕋᒥᑦᔪᒃ; ᐊᓐᓄᕌᖏᑦ ᐱᑖᕆᓇᓱᐊᕐᐰᑦ ᓇᓚᐅᑦᑖᕈᑎᓂᒃ ᐊᑐᕐᖢᑎᒃ. 36ᑕᕝᕙᓂ ᐃᒃᓯᕚᓕᕐᐳᑦ ᔩᓱᓯ ᖃᐅᔨᓴᕐᓗᒍ. 37ᓂᐊᖁᖓᑕ ᖁᓛᒍᑦ ᑎᑎᕋᕐᓯᒪᔪᓂᒃ ᐃᓕᓯᕕᐅᕗᖅ ᑭᑭᐊᒃᑐᕐᑕᐅᑦᔪᑎᖓᓂᒃ ᓇᓗᓁᕐᓯᔪᓂᒃ, ᐃᒤᓕᔪᓂᒃ, “ᑖᓐᓇ ᔩᓱᓯ, ᔫᑎᑦ ᐊᖓᔪᖅᑳᕐᔪᐊᖓᑦ.” 38ᐊᖑᑏᖕᓂᒃ ᒪᕐᕉᓂᒃ ᐱᕋᔭᒃᑏᖕᓂᒃ ᑭᑭᐊᒃᑐᕐᑕᐅᖃᑎᖃᕐᐳᖅ, ᐂᑉᐸᖓ ᑕᓕᕐᐱᐊᓂ, ᐂᑉᐸᖓᓕ ᓴᐅᒥᐊᓂ.
39 #
ᐃᓐᖏᕈᑦ 22:7; 109:25. ᑕᕝᕘᓇ ᐊᖅᑯᓵᕐᑐᑦ ᐃᓕᕿᑕᒫᕐᓗᑎᒃ ᐅᖃᕐᓂᕐᓗᐊᖃᑦᑕᕐᐳᑦ ᔩᓱᓯᒧᑦ: ᐅᖃᕐᓗᑎᒃ; 40#ᒫᑎᐅᓯ 26:61; ᔪᐊᓇᓯ 2:19.“ᑐᒃᓯᐊᕐᕕᒡᔪᐊᕐᒥᒃ ᓱᕋᒃᑎᕆᓂᐊᓚᐅᕐᑐᑎᑦ ᐅᓪᓗᓪᓗ ᐱᖓᔪᐊᓐᓂ ᒪᑭᑎᒃᑲᓐᓂᕐᒥᓗᒍ, ᐃᓕᖕᓂᒃ ᐱᐅᓕᓕᕆᑦ! ᒎᑎᐅᑉ ᐃᕐᓂᕆᒃᐸᑎᑦ, ᓴᓐᓂᖓᔪᓕᖕᒥᑦ ᐊᖅᑲᓕᕆᑦ!”
41ᑐᓂᕐᕈᓯᕐᑎᑦᓯᔩᑦᑕᐅᖅ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ, ᔫᑎᓪᓗ ᐊᖓᔪᖅᑳᖏᑦ, ᒥᑕᐅᑎᖃᕆᕗᑦ ᐅᖃᕐᓗᑎᒃ: 42“ᐊᓯᓂ ᐱᐅᓕᓚᐅᕐᐰᑦ; ᐃᒻᒥᓂᒃ ᐱᐅᓕᔪᓐᓇᓐᖏᓚᖅ. ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᒍᓂ ᒫᓐᓇ ᓴᓐᓂᖓᔪᓕᖕᒥᑦ ᐊᖅᑲᓕᕐᓕ, ᑕᕝᕙ ᐅᒃᐱᕆᓕᕐᓂᐊᕐᐸᕗᑦ. 43#ᐃᓐᖏᕈᑦ 22:8.ᒎᑎᒥᒃ ᑕᑎᖃᕐᒪᑦ; ᒫᓐᓇ, ᑕᑯᓐᓇᓕᕐᑕ ᒎᑎᒧᑦ ᐱᐅᓕᔭᐅᑎᓪᓗᒍ, ᓴᐳᑎᔪᒪᒍᓂᐅᒃ; ᐅᖃᓚᐅᕐᒪᑦ, ‘ᒎᑎᒧᑦ ᐃᕐᓂᐅᕗᖓ.’”
44ᑖᒃᑯᐊᒃᑕᐅᖅ ᐱᕋᔭᒃᑏᒃ ᑭᑭᐊᒃᑐᕐᑕᐅᖃᑎᒋᓯᒪᔭᖏᒃᑕ ᑍᒫᑦᓮᓐᓇᖅ ᐅᖃᕐᓂᕐᓘᑎᒋᒋᕚᒃ.
ᔩᓱᓯᐅᑉ ᑐᖁᓂᖓ
ᒫᑯᓯ 15:33-41; ᓘᑲᓯ 23:44-49; ᔪᐊᓇᓯ 19:28-30
45ᐅᓪᓗᖅ ᕿᑎᕋᓕᕐᑎᓪᓗᒍ ᓄᓇᕐᔪᐊᖅ ᑖᕐᓯᓚᐅᕐᐳᖅ, ᐃᑲᕐᕋᓂᒃ ᐱᖓᓱᓂᒃ ᑖᓚᐅᕐᐳᖅ. 46#ᐃᓐᖏᕈᑦ 22:1.3ᒧᐊᕐᑎᓪᓗᒍ, ᔩᓱᓯ ᕾᒐᓛᓕᕐᐳᖅ ᓂᐱᖅᑯᕐᑐᓪᓗᓂ, “ᐃᓔ, ᐃᓔ, ᓛᒪ ᓴᐸᕐᑖᓃ?” ᐃᒫᒃ ᑐᑭᓕᒃ, “ᒎᑎᒐ, ᒎᑎᒐ, ᓲᖅ ᕿᒪᒃᐱᖔ?”
47ᐃᓄᐃᑦ ᑕᕝᕙᓃᑦᑐᑦ ᐃᓚᖏᑕ ᑐᓴᕋᒥᑦᔪᒃ ᐅᖃᕐᐳᑦ, “ᐅᓇ ᐃᓔᑦᔭᒥᒃ ᕾᖁᔨᓕᕐᑐᖅ!” 48#ᐃᓐᖏᕈᑦ 69:21.ᐃᓚᖓᑦ ᑕᕝᕔᓐᓇᖅ ᐅᓪᓚᒃᓗᓂ ᐳᕙᐅᔭᒥᒃ ᑎᒍᓯᕗᖅ ᐅᐂᓂᒥᒃ ᐃᓚᓯᒪᔪᒧᑦ ᐃᑦᓴᒃᑎᕐᓗᓂᐅᒃ, ᐊᔭᐅᑉᐱᐊᒧᑦ ᑲᐳᒻᒥᑖᕐᓗᒍ, ᔩᓱᓯ ᐃᒥᕐᑎᑉᐹ.
49ᐃᓚᖏᑦ ᐅᖃᕐᐳᑦ, “ᐅᑕᖅᑭᑬᓐᓇᕐᑕ, ᐃᓔᑦᔭᐅᑉ ᐱᐅᓕᔭᕐᑐᕐᓂᐊᖕᒪᖔᒍ!”
50ᔩᓱᓯ ᓂᐱᖅᑯᕐᑐᓪᓗᓂ ᕾᒐᓛᒃᑲᓐᓂᕋᒥ ᐊᓂᕐᓂᖃᕈᓐᓃᕐᐳᖅ.
51 #
ᒨᓯᓯ ᐂᑉᐸᖏᑦ 26:31-33. ᑕᑯᒋᑦ, ᑖᓗᑕᕐᔪᐊᖅ ᑐᒃᓯᐊᕐᕕᒡᔪᐊᕐᒦᑦᑐᖅ ᖁᐱᕗᖅ ᒪᕐᕉᓕᓪᓗᓂ, ᖁᓛᓂᑦ ᐊᑖᓄᑦ ᑎᑭᓪᓗᓂ; ᓄᓇᕐᔪᐊᕐᓗ ᓴᔪᒃᐱᓗᒃᐳᖅ, ᐅᔭᕅᓪᓗ ᓯᖁᑦᑎᕐᖢᑎᒃ. 52ᐃᓗᕖᑦ ᒪᑐᐃᕐᐳᑦ, ᐅᓄᕐᑐᓪᓗ ᒎᑎᐅᑉ ᐃᓄᖁᑎᖏᑦ ᑐᖁᖓᔪᑦ ᒪᑭᑉᐳᑦ ᐃᓅᓕᕐᓗᑎᒃ. 53ᐃᓗᕕᕐᓂᑦ ᐊᓂᓪᓗᑎᒃ; ᔩᓱᓯᐅᑉ ᑐᖁᖓᔪᓂᑦ ᒪᑭᓐᓂᖓᑕ ᑭᖑᓂᖓᒍᑦ, ᐃᒡᓗᒐᓴᖕᓄᐊᕐᐳᑦ ᐃᑦᔪᕐᓁᑦᑐᒧᑦ; ᑕᕝᕙᓂ ᐃᓄᖕᓂᑦ ᐅᓄᕐᑐᓂᑦ ᑕᑯᔭᐅᖃᑦᑕᓚᐅᕐᐳᑦ.
54ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐅᓇᑕᕐᑐᒃᓮᓪᓗ ᑕᕝᕙᓃᖃᑦᑎᒋᔭᖏᑕ ᔩᓱᓯᒥᒃ ᖃᐅᔨᓴᕐᑐᑦ, ᓄᓇᐅᑉ ᓴᔪᒃᐱᓪᓚᖕᓂᖓ ᐊᓯᖏᓪᓗ ᑕᒪᒃᑯᐊ ᐱᓂᐊᕐᓂᕆᔭᐅᔪᑦ ᑕᑯᒐᒥᒋᑦ, ᐊᖏᔪᒥᒃ ᑲᒪᓕᕐᓗᑎᒃ ᐅᖃᕐᐳᑦ, “ᐅᓇ ᐃᓛᒃ ᒎᑎᐅᑉ ᓱᓕᔪᒥᒃ ᐃᕐᓂᕆᕚ!”
55 #
ᓘᑲᓯ 8:2,3. ᑕᕝᕙᓂᑦᑕᐅᖅ ᐊᕐᓇᕐᑕᖃᓚᐅᕆᕗᖅ ᐊᒥᓱᓂᒃ, ᐅᖓᓯᒋᔭᖓᓂ ᑕᑯᓐᓈᕐᑐᓂᒃ, ᔩᓱᓯᒥᒃ ᒪᓕᒃᓯᒪᔪᑦ ᒐᓕᓕᐊᒥᓐᖔᕐᑎᓪᓗᒍ, ᐃᑲᔪᓚᐅᕐᑐᓂᒃ ᔩᓱᓯᒥᒃ; 56ᑖᒃᑯᐊ ᐃᓚᖏᑦ ᐅᑯᐊᖑᕗᑦ; ᒥᐊᕆ ᒫᒃᑕᓖᓂ, ᒥᐊᕆᓗ ᔧᒥᓯᐅᑉ ᔫᓯᐱᐅᓪᓗ ᐊᓈᓇᖓ, ᓯᐱᑎᐅᓪᓗ ᓄᓕᐊᖓ.
ᔩᓱᓯᐅᑉ ᐃᓗᕕᕐᑕᐅᓂᖓ
ᒫᑯᓯ 15:42-47; ᓘᑲᓯ 23:50-56; ᔪᐊᓇᓯ 19:38-42
57ᐅᓐᓄᖕᒪᑦ, ᐊᖑᑦ ᐊᔪᕐᓴᖏᑦᑐᖅ ᐊᕆᒪᑎᐊᒥᐅᑕᖅ ᑕᕝᕗᓐᖓᕐᐳᖅ; ᔫᓯᐱᒥᒃ ᐊᑎᓕᒃ, ᑖᓐᓇᑦᑕᐅᖅ ᔩᓱᓯᒥᒃ ᒪᓕᒃᑎᓄᑦ ᐃᓚᒋᔭᐅᕗᖅ. 58ᑖᓐᓇ ᐰᓛᑑᓯᒧᐊᓚᐅᕐᐳᖅ ᔩᓱᓯᐅᑉ ᑎᒥᖓᓂᒃ ᐱᑎᑕᐅᔪᒪᓪᓗᓂ. ᐰᓛᑑᓯ ᑎᓕᓯᕗᖅ ᔩᓱᓯᐅᑉ ᑎᒥᖓ ᔫᓯᐱᒧᑦ ᑐᓂᔭᐅᖁᓪᓗᒍ. 59ᔫᓯᐱᐅᑉ ᔩᓱᓯᐅᑉ ᑎᒥᖓ ᐱᒐᒥᐅᒃ, ᖃᓪᓗᓈᕐᑕᒧᑦ ᓄᑖᒧᑦ ᖃᑯᕐᑕᒧᑦ ᐃᒻᒧᓯᕐᐹ, 60ᐃᓗᕕᒃᓴᒥᓄᑦ ᓇᖕᒥᓂᕐᒥᓄᑦ ᐃᓕᕚ, ᕾᕐᑐᒥ ᐃᓗᓕᐅᕐᓯᒪᔭᒥᓄᑦ; ᒪᑐᒃᓴᖓᓂᒡᓗ ᐅᔭᕋᒃᔪᐊᕐᒥᒃ ᐊᒃᓴᑳᑦᓯᓪᓗᓂ ᒪᑐᓪᓗᒍ, ᕿᒪᒃᐹ. 61ᒥᐊᕆ ᒫᒃᑕᓖᓂ ᑖᑦᓱᒪᓗ ᐊᓯᐊ ᒥᐊᕆ ᑕᕝᕙᓂ ᐃᒃᓯᕙᕘᒃ, ᐃᓗᕕᕐᒧᑦ ᓵᓐᖓᓪᓗᑎᒃ.
ᖃᐅᔨᓴᕐᑏᑦ ᐃᓗᕕᕐᒥ
62ᖃᐅᑎᓪᓗᒍ, ᓴᐸᑎᐅᓕᕐᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐹᕆᓯᓪᓗ ᐰᓛᑑᓯᒥᒃ ᑲᑎᒪᖃᑎᖃᓕᕐᐳᑦ, 63#ᒫᑎᐅᓯ 16:21; 17:23; 20:19; ᒫᑯᓯ 8:31; 9:31; 10:33,34; ᓘᑲᓯ 9:22; 18:31-33.ᐅᖃᕐᓗᑎᒃ, “ᐊᖓᔪᖅᑳᖅ, ᐃᖅᑬᒐᑦᑕ ᑍᓐᓇ ᓴᒡᓗᑐᔪᐊᓗᒃ ᓱᓕ ᐃᓅᓪᓗᓂ ᐅᖃᓚᐅᕐᒪᑦ, ‘ᐅᓪᓗᑦ ᐱᖓᔪᐊᓐᓂ ᒪᑭᑦᓱᒫᕐᐳᖓ ᐃᓅᓕᕐᒥᓗᖓ.’ 64ᑍᒤᒻᒪᑦ ᑎᓕᓯᓚᐅᕆᑦ ᑖᑦᓱᒪ ᐃᓗᕕᖓ ᖃᐅᔨᒪᔭᐅᓇᓱᐊᕐᑕᐅᖁᓗᒍ ᐅᓪᓗᑦ ᐱᖓᓱᑦ ᓈᓚᐅᖏᓐᓂᖏᓐᓂ, ᑖᑦᓱᒪ ᐃᓕᓐᓂᐊᕐᑎᖏᑦ ᑎᒥᖓᓂᒃ ᑎᒡᓕᒋᐊᕐᑐᖁᓇᒋᑦ, ᐃᓄᖕᓄᓪᓗ ᐅᖃᖃᑦᑕᓕᖁᓇᒋᑦ, ᑐᖁᖓᔪᓂᑦ ᒪᑭᓯᒪᓂᕋᕐᓗᒍ, ᑕᒪᓐᓇ ᐅᐃᕕᕆᒃᓯᓂᖅ ᓯᕗᓂᖓᓂᑦ ᐱᐅᖏᓐᓂᕐᓴᐅᓕᖁᓇᒍ.”
65ᐰᓛᑑᓯᐅᑉ ᐅᖃᐅᑎᕔᑦ, “ᖃᐅᔨᓴᕐᑎᖁᑎᖃᕋᑦᓯ ᐅᓇᑕᕐᑐᒃᓴᓂᒃ; ᑎᓕᓯᓕᕆᑦᓯ, ᐃᓗᕕᖅ ᑲᒪᒋᑦᓯᐊᕐᓗᒍ ᖃᐅᔨᒪᓇᓱᐊᕐᑕᐅᑎᓕᕐᓯᐅᒃ.”
66ᑕᕝᕙᓐᖓᑦ ᐊᓂᒐᒥᒃ, ᐃᓗᕕᕐᒧᐊᕐᓗᑎᒃ ᐃᓗᕕᖅ ᐊᑦᑐᖏᕐᓱᕐᐹᑦ ᓇᓗᓁᒃᑯᓯᕐᓗᒍ ᓇᕿᑦᔪᑎᒥᒃ ᑖᓐᓇ ᐅᔭᕋᒃ, ᖃᐅᔨᓴᕐᑎᑦ ᖃᐅᔨᒪᓇᓱᐊᕐᓂᐊᓕᕐᑎᓪᓗᒋᑦ ᕿᒪᒃᑕᐅᕗᑦ.
Currently Selected:
ᒫᑎᐅᓯᐅᑉ ᐊᒡᓚᖏᑦ 27: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
