ᒫᑎᐅᓯᐅᑉ ᐊᒡᓚᖏᑦ 26
26
ᔩᓱᓯᐅᑉ ᑐᖁᑕᒃᓴᖑᕐᑎᑕᐅᓂᖓ
ᒫᑯᓯ 14:1-2; ᓘᑲᓯ 22:1-2; ᔪᐊᓇᓯ 11:45-53
1ᔩᓱᓯᓕ ᑕᒪᒃᑯᓂᖓ ᐊᔪᕆᕐᑐᐃᑦᔪᑎᒋᔭᒥᓂᒃ ᐱᔭᕇᕋᒥ, ᐃᓕᓐᓂᐊᕐᑎᒥᓄᑦ ᐅᖃᕐᐳᖅ, 2#ᒨᓯᓯ ᐂᑉᐸᖏᑦ 12:1-27.“ᖃᐅᔨᒪᕗᓯ ᐅᓪᓘᒃ ᒪᕐᕉᒃ ᐊᓂᒍᕐᐸᑎᒃ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᐅᓂᐊᓕᕐᒪᑦ, ᐃᓅᑉ ᐃᕐᓂᖓ ᑐᓂᔭᐅᓛᕐᐳᖅ ᑭᑭᐊᒃᑐᕐᑕᐅᖁᓪᓗᒍ.”
3ᑍᑦᓱᒪᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᔫᑎᓪᓗ ᐊᖓᔪᖅᑲᖏᑦ ᑲᑎᓐᖓᓕᕐᐳᑦ, ᑬᐊᐹᓯᐅᑉ ᐃᒡᓗᕐᔪᐊᖓᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ, 4ᔩᓱᓯᒥᒃ ᑎᒍᓯᔪᒪᓪᓗᑎᒃ ᐃᓱᒪᖃᑎᒌᒃᐳᑦ ᖃᐅᔨᔭᐅᑦᑍᓕᓪᓗᑎᒃ ᑐᖁᑕᐅᑎᑦᓱᒪᓪᓗᒍ. 5ᐃᒫᒃ ᐅᖃᖃᑎᒌᒃᐳᑦ, “ᓇᓪᓕᐅᓐᓂᕐᓯᐅᕐᓇᐅᑎᓪᓗᒍ ᑎᒍᔭᕆᐊᖃᓐᖏᓚᕗᑦ, ᐃᓄᐃᑦ ᐅᐃᒪᔮᓗᐊᖁᓇᒋᑦ.”
ᔩᓱᓯᐅᑉ ᓄᓇᒥ ᐱᑕᓂᒥ ᐅᕐᓱᕐᑎᕐᑕᐅᓂᖓ ᑎᐱᑦᓯᐊᕆᒃᑐᒧᑦ
ᒫᑯᓯ 14:3-9; ᔪᐊᓇᓯ 12:1-8
6ᔩᓱᓯᓕ ᐱᑕᓂᒦᑎᓪᓗᒍ ᓮᒨᓂᐅᑉ ᐃᒡᓗᖓᓂ, ᑲᑉᐱᐊᒋᔭᐅᔪᒥᒃ ᐸᕐᑎᓚᐅᕐᑐᒥ. 7#ᓘᑲᓯ 7:37,38.ᐊᕐᓇᒥᑦ ᐅᐸᒃᑕᐅᕗᖅ ᐳᓪᓚᐅᔭᕐᒥᒃ ᐊᑭᑐᔪᒥᒃ ᑎᐱᑦᓯᐊᕆᒃᓴᐅᒻᒥᒃ ᓇᒃᓴᕐᑐᒥᑦ, ᑖᑦᓱᒪ ᔩᓱᓯᐅᑉ ᓂᐊᖁᐊᓄᑦ ᑯᕕᕚ ᓂᕆᕕᖕᒦᑎᓪᓗᒍ. 8ᐃᓕᓐᓂᐊᕐᑎᖏᑕᓕ ᑕᒪᓐᓇ ᑕᑯᒐᒥᑦᔪᒃ, ᐊᖏᔪᒥᒃ ᐊᑲᐅᒃᓴᕈᓐᓃᕐᐳᑦ ᐅᖃᕐᓗᑎᒃ, “ᓱᖕᒪᑦ ᐊᑐᖏᑦᑐᒧᑦ ᐊᑐᕐᑕᐅᕚ? 9ᑖᓐᓇ ᑎᐱᑦᓯᐊᕆᒃᓴᐅᑦ ᓂᐅᕐᕈᑕᐅᒐᔭᕈᓂ ᑮᓇᐅᔭᕐᑖᕈᑕᐅᒐᔭᕐᐳᖅ ᐅᓄᕐᑐᐊᓗᖕᓂᒃ, ᑐᓂᔭᐅᖔᕐᓗᑎᒃ ᐊᔪᕐᓴᕐᑐᓄᑦ!”
10ᔩᓱᓯᐅᓪᓕ ᖃᐅᔨᒪᒐᒥᒋᑦ, ᐅᖃᐅᑎᕔᑦ, “ᓱᖕᒪᑦ ᐊᕐᓇᖅ ᐊᒡᕕᐊᕋᓱᐊᕐᐱᓯᐅᒃ? ᑖᑦᓱᒪ ᐱᐅᔪᒥᒃ ᓈᒻᒪᑦᓯᐊᕐᑐᒥᒡᓗ ᐱᓂᐊᕐᕕᒋᕚᖓ. 11#ᒨᓯᓯ ᑕᓪᓕᒪᖏᑦ 15:11.ᑍᒪᓐᖓᓕᒫᖅ ᐊᔪᕐᓴᕐᑐᓂᒃ ᓇᔪᕐᑎᕾᓐᓇᕐᓂᐊᕐᐳᓯ, ᑭᓯᐊᓂᓕ ᐅᕙᓐᓂᒃ ᓇᔪᕐᑎᕾᓐᓇᕐᓂᐊᓐᖏᓚᓯ. 12ᑖᑦᓱᒪ ᐊᕐᓇᐅᑉ ᑎᒥᓐᓄᑦ ᑎᐱᑦᓯᐊᕆᒃᓴᐅᒻᒥᒃ ᑯᕕᓯᓂᕐᒥᓄᑦ ᐅᐸᓗᖕᒊᔭᕐᐹᖓ ᐃᓗᕕᕐᑕᐅᓂᒃᓴᓐᓄᑦ. 13ᓱᓕᔪᒥᒃ ᐅᖃᐅᑎᕙᑦᓯ, ᓇᓂᑐᐃᓐᓇᓕᒫᖅ ᓄᓇᕐᔪᐊᕐᒥ ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᐅᓕᕌᖓᑕ, ᑖᑦᓱᒪ ᐊᕐᓇᐅᑉ ᐱᓂᐊᕐᓂᕆᔭᖓ ᐅᖃᐅᓯᐅᖃᑦᑕᕈᒫᕐᐳᖅ ᐃᖅᑲᐅᒪᔭᐅᑦᔪᑎᒋᓗᒍ.”
ᔫᑕᓯᐅᑉ ᐊᖏᕐᓂᖓ ᔩᓱᓯᒥᒃ ᐱᔭᐅᑎᑦᓯᔪᒪᓪᓗᓂ
ᒫᑯᓯ 14:10-11; ᓘᑲᓯ 22:3-6
14ᑕᕝᕙ ᐃᓕᓐᓂᐊᕐᑎᑦ 12 ᐃᓚᖓᑦ, ᔫᑕᓯ ᐃᔅᑲᕆᐊᑎᒥᒃ ᐊᑎᓕᒃ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᐊᕐᐳᖅ 15#ᓴᑲᕅᐊ 11:12.ᐊᐱᕆᓪᓗᓂ, “ᓱᓇᒦᒃ ᐅᕙᓐᓄᑦ ᑐᓂᓯᒐᔭᕐᐱᓯ ᔩᓱᓯ ᐃᓕᑦᓯᓐᓄᑦ ᐱᔭᐅᑎᑯᒃᑰ?” ᑖᒃᑯᐊ 30ᓂᒃ ᓯᐅᓪᕕᕆᓂᒃ ᑐᓂᓯᕗᑦ ᔫᑕᓯᒧᑦ. 16ᑕᕝᕙᓐᖓᑦ ᐱᒋᐊᕐᓗᓂ ᔫᑕᓯ ᐱᕕᒃᓴᕐᓯᐅᓕᕐᐳᖅ ᔩᓱᓯᒥᒃ ᐱᔭᐅᒃᑎᑦᓯᕕᒃᓴᒥᓂᒃ ᑐᓂᕐᕈᓯᕐᑎᑦᓯᔨᓄᑦ.
ᔩᓱᓯᐅᑉ ᐃᓕᓐᓂᐊᕐᑎᒥᓂᒃ ᓂᕆᖃᑎᖃᕐᓂᖓ ᖄᖏᕐᑕᐅᕕᒃᒃᓯᐅᑎᒥᒃ
ᒫᑯᓯ 14:12-21; ᓘᑲᓯ 22:7-14,21-23; ᔪᐊᓇᓯ 13:21-30
17ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᕐᑐᕐᕕᐅᑉ ᐅᓪᓗᖏᑕ ᓯᕗᓪᓕᕐᐹᖓᓂ ᐃᓕᓐᓂᐊᕐᑎᖏᑦ ᔩᓱᓯᒧᐊᕐᓗᑎᒃ ᐊᐱᕆᕚᑦ, “ᓇᓂ ᐊᑐᐃᓐᓇᕈᐃᖁᕕᑎᒎᑦ ᖄᖏᕐᑕᐅᕕᖕᒥᒃ ᓂᕆᖃᑎᒌᒃᕕᒃᓴᑦᑎᓐᓂᒃ?”
18ᔩᓱᓯᐅᑉ ᐅᖃᐅᑎᕔᑦ, “ᐃᒡᓗᒐᓴᖕᓄᑦ ᐂᓕᕆᑦᓯ, ᐊᖑᒻᒧᑦ ᑕᕝᕙᓃᑦᑐᒧᑦ ᐅᖃᕐᓗᓯ: ‘ᐊᔪᕆᕐᑐᐃᔨ ᐅᖃᕐᒪᑦ, ᐱᕕᒃᓴᕋ ᓇᓪᓕᐅᑎᖕᒪᑦ; ᐃᒡᓗᖕᓂ ᖄᖏᕐᑕᐅᕕᖕᒥᒃ ᓂᕆᖃᑎᒌᖕᓂᐊᕐᐳᒍᑦ ᐃᓕᓐᓂᐊᕐᑎᒃᑲ ᐃᓚᒋᓗᒋᑦ.’”
19ᐃᓕᓐᓂᐊᕐᑎᖏᑦ ᑍᒤᓕᐅᕐᐳᑦ ᔩᓱᓯᐅᑉ ᐅᖃᐅᓯᕆᔭᖓᑐᑦ, ᐋᖅᑭᒃᓱᐃᓪᓗᑎᒃ ᖄᖏᕐᑕᐅᕕᖕᒥᒃ ᓂᕆᖃᑎᒌᒃᕕᒃᓴᒥᒃ.
20ᐅᓐᓄᖕᒪᑦ, ᔩᓱᓯ ᐃᓕᓐᓂᐊᕐᑎᓂ 12 ᓂᕆᖃᑎᒋᒃᓗᑎᒃ ᐃᒃᓯᕙᓕᕐᐳᑦ; 21ᓂᕆᓗᑎᒃ, ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓚᑦᓯᓐᓄᑦ ᐱᔭᐅᑎᑕᐅᓂᐊᕐᐳᖓ.”
22ᐃᓕᓐᓂᐊᕐᑎᖏᓪᓕ ᕿᒃᓵᒻᒪᕆᓕᕐᓗᑎᒃ ᔩᓱᓯᒧᑦ ᐊᑐᓂᑦ ᐊᐱᕆᖃᑦᑕᓕᕐᐳᑦ, “ᐊᑕᓃᖅ, ᐅᕙᓐᓂᒃ ᐱᖏᒃᑲᓗᐊᕐᐲᑦ?”
23 #
ᐃᓐᖏᕈᑦ 41:9. ᔩᓱᓯᐅᑉ ᑭᐅᕔᑦ, “ᓂᐊᖂᔭᒥᒃ ᐴᒍᑕᕐᒧᑦ ᒥᓱᒃᓯᖃᑎᒋᔭᒪ, ᑖᑦᓱᒪ ᐱᔭᐅᒃᑎᓐᓂᐊᕐᐹᖓ. 24ᐃᓅᑉ ᐃᕐᓂᖓ ᐱᓇᓱᐊᕐᕕᐅᓂᐊᕐᐳᖅ ᒎᑎᐅᑉ ᐅᖃᐅᓯᖏᓐᓂ ᐅᖃᐅᓯᐅᓯᒪᓂᖓ ᒪᓕᒡᓗᒍ, ᑲᑉᐱᐊᓐᓇᒦᒡᓕ ᐃᓅᑉ ᐃᕐᓂᖓᓂᒃ ᐱᔭᐅᑎᑦᓯᓂᐊᕐᑐᖅ! ᐊᑲᐅᓂᕐᓴᐅᒐᔭᓚᐅᕐᐳᖅ ᑖᓐᓇ ᐃᕐᓂᐊᖑᓚᐅᖏᒃᑯᓂ!” 25ᔫᑕᓯᓗ ᐱᔭᐅᒃᑬᓂᐊᕐᑐᖅ ᐅᖃᕐᐳᖅ, “ᕌᑉᐰ#26:25 ᕌᑉᐰ ᐊᑦᔨᓕᒃ ᐊᔪᕆᕐᑐᐃᔩ ᐅᕙᓐᓂᒃ ᐱᖏᒃᑲᓗᐊᕐᐲᑦ?” ᔩᓱᓯᐅᑉ ᐅᖃᐅᑎᕚ, “ᑕᕝᕙ ᐅᖃᕇᕐᐳᑎ.”
ᐊᑕᓂᐅᑉ ᐅᓐᓄᒍᒻᒥᑕᕐᓂᖓ
ᒫᑯᓯ 14:22-26; ᓘᑲᓯ 22:14-20; 1 ᑯᕆᓐᑎ 11:23-25
26ᓱᓕ ᓂᕆᖃᑎᒌᒃᓗᑎᒃ, ᔩᓱᓯ ᓂᐊᖂᔭᒥᒃ ᑎᒍᓯᕗᖅ, ᖁᔭᓕᓪᓗᓂ ᑐᒃᓯᐅᑎᒐᒥᐅᒃ, ᓂᐊᖂᔭᖅ ᐊᕕᒃᐹ, ᐃᓕᓐᓂᐊᕐᑎᒥᓄᑦ ᑐᓂᓪᓗᒍ ᐅᖃᕐᐳᖅ, “ᑎᒍᓗᒍ ᓂᕆᓯᐅᒃ, ᑕᕝᕙ ᑎᒥᒐ.”
27ᐊᒻᒪ ᐃᒥᐅᑦ ᑎᒍᕚ, ᖁᔭᓕᑦᔪᑎᒋᔭᕇᕋᒥᐅᒃ ᐃᓕᓐᓂᐊᕐᑎᒥᓄᑦ ᑐᓂᕚ, ᐅᖃᕐᓗᓂ, “ᑕᒪᑦᓯ ᑕᕝᕙᓐᖓᑦ ᐃᒥᕆᑦᓯ; 28#ᒨᓯᓯ ᐂᑉᐸᖏᑦ 24:8; ᔨᕆᒤᐊ 31:31-34.ᑕᕝᕙ ᐊᐅᒐ ᐊᖏᕈᑎᐅᑉ ᓇᓗᓁᒃᑯᑕᖓ, ᑯᕕᔭᐅᔪᖅ ᐊᒥᓱᑦ ᐊᔪᕐᓂᖏᑕ ᐃᓱᒪᒋᔭᐅᔪᓐᓁᕐᑕᐅᑦᔪᑎᒃᓴᖏᓐᓄᑦ. 29ᐅᖃᐅᑉᐸᑦᓯ ᐅᐂᓂᒥᒃ ᐃᒥᒃᑲᓐᓂᕐᓂᐊᕈᓐᓃᕐᐳᖓ ᐅᓪᓗᖅ ᓇᓪᓕᐅᑎᖅᑳᕐᑎᓐᓇᒍ ᓄᑖᒥᒃ ᐃᒥᖃᑎᒌᒃᕕᒃᓴᕗᑦ ᐊᑖᑕᒪ ᐊᑕᓂᐅᕕᖓᓂ.”
30ᐱᓯᕐᒥᒃ ᐃᓐᖏᕇᕋᒥᒃ, ᑕᕝᕙᓐᖓᑦ ᐊᓂᕗᑦ ᖃᖅᑲᒧᑦ ᓇᐹᕐᑐᓕᖕᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᒧᑦ.
ᔩᓱᓯᐅᑉ ᐅᖃᐅᓯᖃᕐᓂᖓ ᐲᑦᑐᕉᓯᒧᑦ ᓴᒡᓗᑦᔪᑕᐅᓂᐊᕐᓂᕐᒥᓂᒃ
ᒫᑯᓯ 14:27-31; ᓘᑲᓯ 22:31-34; ᔪᐊᓇᓯ 13:36-38
31 #
ᓴᑲᕅᐊ 13:7. ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᒫᓐᓇ ᐅᓐᓄᒃ ᑕᒪᑦᓯ ᕿᒫᓂᐊᕐᐳᓯ ᕿᒪᒃᓗᓯᓐᖓ; ᐊᒡᓚᖕᓂ ᐅᖃᕐᓯᒪᖕᒪᑦ, ‘ᐰᕐᓯᔨ ᑐᖁᓐᓂᐊᕐᐸᕋ, ᓰᐱᖁᑎᖏᓪᓗ ᓇᒧᑐᐃᓐᓇᖅ ᓯᐊᒻᒪᖕᓂᐊᕐᐳᑦ.’ 32#ᒫᑎᐅᓯ 28:16.ᑐᖁᖓᔪᓂᓪᓕ ᒪᑭᓯᒪᓕᕈᒪ, ᓯᕗᓂᑦᓯᓐᓂ ᒐᓕᓕᐊᒧᐊᓛᕐᐳᖓ.”
33ᐲᑦᑐᕉᓯᐅᑉ ᐅᖃᐅᑎᕚ, “ᐅᑯᐊᓕᒫᑦ ᐃᓕᖕᓂᒃ ᕿᒤᒐᓗᐊᕐᐸᑕ, ᐅᕙᖓ ᕿᒪᓚᐅᕐᓯᒪᓂᐊᓐᖏᓚᒋᑦ!”
34ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᒫᓐᓇ ᐅᓐᓄᒃ, ᐊᖑᑎᕕᐊᖅ ᓂᓪᓕᖅᑳᕐᑎᓐᓇᒍ, ᐱᖓᓱᐃᕐᑐᕐᓗᑎᑦ ᖃᐅᔨᒪᖏᓐᓂᕋᕐᓂᐊᕐᐸᕐᒪ.”
35ᐲᑦᑐᕉᓯᐅᑉ ᑭᐅᕚ, “ᑐᖁᖃᑎᒋᓂᐊᕋᓗᐊᕈᒃᑭᑦ ᐊᒡᓛᑦ ᖃᐅᔨᒪᖏᓐᓂᕋᕐᓂᐊᓐᖏᓚᒋᑦ.”
ᐃᓕᓐᓂᐊᕐᑎᑦᑕᐅᖅ ᑍᒤᓕᖃᑕᐅᒋᕗᑦ.
ᔩᓱᓯᐅᑉ ᑐᒃᓯᐊᕐᓂᖓ ᒋᑦᓯᒪᓂᒥ
ᒫᑯᓯ 14:32-42; ᓘᑲᓯ 22:39-46
36ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᒋᑦᓯᒪᓂᒧᐊᕐᐳᑦ, ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᑕᕝᕙᓂ ᐃᒃᓯᕙᒋᑦᓯ, ᐊᕗᖓ ᖃᓂᑦᑐᒧᑦ ᑐᒃᓯᐊᕆᐊᕐᑐᕐᓂᐊᕋᒪ.” 37ᐅᑯᐊ ᐃᓚᒋᓚᐅᕐᐰᑦ ᐲᑦᑐᕉᓯ ᓯᐱᑎᐅᓪᓗ ᐃᕐᓂᖏᒃ ᒪᕐᕉᒃ, ᑕᕝᕙ ᔩᓱᓯ ᕿᒃᓵᖕᓂᕐᒧᑦ ᐊᖏᔪᕐᔪᐊᒧᑦ ᐅᖁᒤᒃᓴᕐᓂᕐᒧᓪᓗ ᑎᑭᑕᐅᕐᕗᖅ. 38ᐃᓚᒋᔭᓂ ᐅᖃᐅᑎᕔᑦ, “ᑕᕐᓂᑯᑦ ᐊᖏᔪᒥᒃ ᐅᖁᒤᒃᓴᕐᓂᕐᒧᑦ ᑎᑭᑕᐅᒐᒪ, ᐊᒡᓛᑦ ᑐᖁᑐᐃᓐᓇᕆᐊᖃᕐᑑᔮᓕᕋᒪ; ᑕᕝᕙᓃᒋᑦᓯ ᖃᐅᔨᓴᖃᑎᒋᓗᖓ.”
39ᑕᐅᕗᓐᖓᒃᑲᓐᓂᑐᐃᓐᓇᕐᖢᓂ ᒪᓂᖅᑲᒧᑦ ᐹᒻᒪᒃᓗᓂ ᑐᒃᓯᐊᕐᐳᖅ, “ᐊᑖᑖᒃ, ᐊᔪᕐᓇᖏᑉᐸᑦ, ᐅᓇ ᐃᒥᐅᑦ ᐅᕙᓐᓂᑦ ᐲᓚᐅᕈᒃ! ᐱᔪᒪᔭᕋᐅᖏᑦᑐᕐᓕ, ᐱᔪᒪᔧᓪᓕ ᐊᑐᕐᓕ.”
40ᐃᓕᓐᓂᐊᕐᑎᒥᓄᑦ ᐱᖓᓱᓄᑦ ᐅᑎᕋᒥ; ᓯᓂᒃᑐᑦ ᐅᐸᒃᐰᑦ; ᐲᑦᑐᕉᓯ ᐅᖃᐅᑎᕚ, “ᖃᐅᔨᓴᖃᑎᒋᔪᓐᓇᓐᖏᓚᑦᓯᓐᖔ ᐃᑲᕐᕋᒥᒃ ᐊᑕᐅᓯᕐᒥᖑᓐᓃᑦ? 41ᖃᐅᔨᓴᕆᓯ ᑐᒃᓯᐊᕐᓗᓯᓗ ᐱᐅᖏᑦᑐᒧᑦ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ; ᐊᓂᕐᓂᖅ ᐱᔪᒪᑦᓯᐊᕋᓗᐊᕐᐳᖅ, ᑎᒥᓕ ᓴᓐᖐᑉᐳᖅ.”
42ᓱᓕ ᐂᑉᐸᖓᓂᒃ, ᔩᓱᓯ ᑐᒃᓯᐊᕆᐊᕐᑐᒃᑲᓐᓂᕐᐳᖅ ᐅᖃᕐᓗᓂ, “ᐊᑖᑖᒃ, ᐅᓇ ᐃᒥᐅᑦ ᐅᕙᓐᓂᑦ ᐲᕈᓐᓇᖏᑉᐸᑦ ᐃᒥᕐᓗᒍ ᑭᓯᐊᓂᐅᒃᐸᑦ, ᐱᔪᒪᔧᑦ ᐊᑐᕐᓕ.” 43ᐃᓚᒥᓄᑦ ᐅᑎᕐᒥᒐᒥ; ᓯᓂᒃᑐᑦ ᐅᐸᒃᐰᑦ; ᐊᒡᓛᑦ ᐅᐃᓴᔪᓐᓁᓪᓕᓚᐅᕐᒪᑕ ᐅᐃᕐᖓᕐᓂᕐᒧᑦ.
44ᑕᕝᕙ ᕿᒪᒃᑭᓪᓗᒋᑦ, ᐱᖓᔪᖓᓐᓂᒃ ᑐᒃᓯᐊᕆᐊᕐᑐᕆᕗᖅ, ᐅᖃᐅᓯᕐᓂᒃ ᑖᒃᑯᓂᖓᑦᓮᓐᓇᖅ ᐊᑐᕐᓗᓂ. 45ᑕᕝᕙ ᑭᖑᓂᖓᒍᑦ ᐃᓕᓐᓂᐊᕐᑎᒥᓄᑦ ᐅᑎᕋᒥ ᐅᖃᐅᑎᕔᑦ, “ᓱᓕ ᓯᓂᒃᐱᓰ ᑕᕾᕐᓯᕐᓗᓯᓗ? ᑕᑯᒋᑦ, ᐃᑲᕐᕋᖅ ᓇᓪᓕᐅᑎᕗᖅ; ᐃᓅᑉ ᐃᕐᓂᖓᑕ ᐱᔭᐅᒃᑲᕐᑕᐅᕕᖓ ᐃᓄᖕᓄᑦ ᐊᔪᕐᑐᓕᔪᓄᑦ ᑎᒍᔭᐅᓗᓂ. 46ᒪᑭᓪᓗᓯ, ᐱᓱᓕᕐᑕ; ᑕᑯᒋᑦ, ᐊᖑᑦ ᐅᕙᓐᓂᒃ ᐱᔭᐅᑎᑦᓯᔪᖅ ᑎᑭᓕᕐᐳᖅ.”
ᔩᓱᓯᐅᑉ ᑎᒍᔭᐅᓂᖓ
ᒫᑯᓯ 14:43-50; ᓘᑲᓯ 22:47-53; ᔪᐊᓇᓯ 18:3-12
47ᔩᓱᓯ ᓱᓕ ᐅᖃᓪᓚᒃᑎᓪᓗᒍ, ᔫᑕᓯ ᐃᓕᓐᓂᐊᕐᑎᑦ 12 ᐃᓚᖓᑦ, ᑎᑭᑉᐳᖅ, ᐃᓚᖃᕐᓗᓂ ᐃᓄᒐᓴᒡᔪᐊᓂᒃ ᓱᒋᐅᓯᔭᕐᑐᓂᒃ ᓴᕕᒡᔪᐊᓂᒃ ᐊᓇᐅᑕᓂᒡᓗ, ᑎᓕᔭᐅᓯᒪᔪᓂᒃ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ, ᔫᑎᓪᓗ ᐊᖓᔪᖅᑳᖏᓐᓄᑦ. 48ᐱᔭᐅᑎᑦᓯᔫᖅ ᐃᓄᒐᓴᒡᔪᐊᑦ ᖃᐅᔨᑦᔪᑎᒃᓴᖏᓐᓂᒃ ᐅᖃᐅᑎᓯᒪᕔᑦ, “ᐊᖑᑦ ᑯᓂᒃᑕᕋ, ᑖᓐᓇᐅᓂᐊᕐᐳᖅ ᐱᔪᒪᔭᓯ; ᑖᓐᓇ ᑎᒍᓂᐊᕐᐸᓯ!”
49ᔫᑕᓯ ᔩᓱᓯᒧᑦ ᐅᐸᒍᑎᓪᓗᓂ#26:49 ᐂᑦᓱᓂ ᐅᖃᐅᑎᕚ, “ᕌᑉᐰ, ᓮᒻᒪᕐᑎᑕᐅᒋᑦ!” ᐃᕿᓪᓗᒍᓗ ᑯᓂᒃᐹ.
50ᔩᓱᓯᐅᑉ ᑭᐅᕚ, “ᐃᓚᓐᓇᕆᔮᒃ,#26:50 “ᐃᓚᓐᓇᕆᔮᒃ, ᑐᑭᖃᕈᓐᓇᕐᒥᔪᖅ ᓱᖕᒪᑦ ᑕᒪᐅᓐᖓᕐᐲᑦ?” ᐱᔭᕆᐊᖃᕐᑕᕐᓂᒃ ᐱᓕᕆᑦ.” ᑕᕝᕙ ᐊᖑᑎᑦ ᐅᐸᒍᑎᓪᓗᑎᒃ ᔩᓱᓯ ᑎᒍᕚᑦ, ᐊᑦᓱᖏᕐᓗᒍ. 51ᔩᓱᓯᐅᓪᓕ ᐃᓚᒋᔭᖏᑕ ᐃᓚᖓᑦ ᓴᕕᒡᔪᐊᕐᒥᒃ ᐊᒧᓯᓪᓗᓂ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ ᐱᔨᖓ ᓯᐅᑎᖓᒍᑦ ᐅᓕᒪᕐᐹ, ᓯᐅᑎᖓ ᓇᑲᓪᓗᒍ. 52ᑕᕝᕙ ᔩᓱᓯᐅᑉ ᐅᖃᐅᑎᕚ, “ᓴᕕᒡᔪᐊᑦ ᐴᖓᓄᑦ ᐅᑎᕐᑎᓕᕈᒃ; ᓴᕕᒡᔪᐊᕐᒥᒃ ᐊᑐᕐᑐᓕᒫᑦ ᓴᕕᒡᔪᐊᕐᒧᑦ ᑐᖁᔪᕐᒫᕐᐳᑦ. 53ᖃᐅᔨᒪᓐᖏᓚᑏᑦ ᐊᑖᑕᒐ ᐃᑲᔪᕐᑕᐅᔪᒪᓗᖓ ᐅᖃᐅᑎᒍᒃᑯ, ᑕᕝᕔᓐᓇᖅ ᑎᓕᓯᔪᓐᓇᕐᒪᑦ ᐂᖏᓖᓂᒃ 12ᓕᖃᖓᔪᓂᒃ ᓕᑦᔭᓐᓂᒃ#26:53 ᓕᑦᔭᓐ ᑐᑭᖃᕐᐸᓪᓔᖕᒥᔪᖅ 6,000ᓂᒃ ᐅᓇᑕᕐᑐᒃᓴᒐᓴᖕᓂᒃ ᐃᒻᒥᒎᓈᕐᑎᕐᓗᑎᒃ ᐊᕕᒃᑐᕐᓯᒪᔪᓂᒃ 12ᓂᒃ ᐅᓄᕐᓂᕐᓴᐅᔪᓂᒃ? 54ᑍᒤᑎᑦᓯᒍᒪᓕ, ᖃᓄᖅ ᒎᑎᐅᑉ ᐅᖃᐅᓯᖏᑦ ᓇᓚᐅᑦᓯᒐᔭᕐᐹᑦ, ᑕᒪᓐᓇ ᐱᓂᐊᕐᓂᕆᔭᐅᔪᖅ ᑍᒤᑦᓴᕆᐊᖃᕐᓂᕋᕐᓗᒍ ᐅᖃᕐᓯᒪᔪᑦ?”
55 #
ᓘᑲᓯ 19:47; 21:37. ᑕᕝᕙ ᔩᓱᓯ ᐅᖃᕐᐳᖅ ᐃᓄᒐᓴᒡᔪᐊᓄᑦ, “ᓴᕕᒡᔪᐊᓕᔭᕐᓗᓯ ᐊᓇᐅᑕᓕᔭᕐᓗᓯᓗ ᐅᕙᓐᓄᑦ ᕾᔭᕆᐊᖃᕐᐱᓰ ᑎᒍᔭᐅᖁᓪᓗᖓ, ᐱᕋᔭᒃᓯᒪᔪᑎᑐᑦ? ᖃᐅᑕᒫᑦ ᑐᒃᓯᐊᕐᕕᒡᔪᐊᕐᒥ ᐃᒃᓯᕚᕐᓗᖓ ᐊᔪᕆᕐᑐᐃᖃᕐᑕᓚᐅᕐᐳᖓ, ᑎᒍᖃᑦᑕᓚᐅᓐᖏᓚᑦᓯᓐᖓ. 56ᑕᒪᒃᑯᐊᓕᒫᑦ ᐱᓂᐊᕐᓂᐅᕗᑦ, ᓇᓚᐅᑦᑍᔫᑉ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᑎᑕᐅᖁᓪᓗᒋᑦ.” ᐃᓕᓐᓂᐊᕐᑎᓕᒫᖏᑦᑕᓕ ᔩᓱᓯ ᕿᒪᑉᐹᑦ ᕿᒫᓪᓗᑎᒃ.
ᑲᑎᒪᔨᕐᔪᐊᑦ ᓵᖓᓃᑎᑕᐅᓂᖓ ᔩᓱᓯᐅᑉ
ᒫᑯᓯ 14:53-65; ᓘᑲᓯ 22:54-55,63-71; ᔪᐊᓇᓯ 18:13-14,19-24
57ᑕᕝᕙ ᔩᓱᓯᒥᒃ ᑎᒍᓯᔪᑦ ᑬᐊᐹᓯᐅᑉ ᐃᒡᓗᖓᓄᐊᕈᑎᕚᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᓄᑦ, ᑕᕝᕙᓂ ᐱᖁᔭᓂᒃ ᐃᓕᓮᔩᑦ, ᔫᑎᓄᓪᓗ ᐊᖓᔪᖅᑲᐅᔪᑦ ᑲᑎᓐᖓᖃᑎᒌᖕᒪᑕ. 58ᐲᑦᑐᕉᓯᓕ ᐅᖓᓯᒋᔮᓃᓪᓗᓂ ᒪᓕᒃᐳᖅ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑕ ᐃᒡᓗᖓᑕ ᐊᕙᓗᐊᑕ ᐃᓗᐊᓄᑦ ᑎᑭᓪᓗᓂ, ᑕᕝᕗᓐᖓᓗ ᑎᑭᓐᓇᒥ ᑲᒪᔨᓄᑦ ᐃᒃᓯᕙᖃᑕᐅᓕᕐᐳᖅ, ᖃᐅᔨᓴᕋᓱᐊᕐᓗᓂ ᔩᓱᓯ ᖃᓄᐃᓕᐅᕐᑕᐅᓂᐊᕐᒪᖔᑦ. 59ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ ᑲᑎᒪᔨᕐᔪᐊᓕᒫᓪᓗ ᓴᒡᓗᓪᓗᑎᒃ ᐱᑦᔪᑎᒃᓴᕐᓯᐅᕋᓱᐊᕐᐳᑦ ᔩᓱᓯᒥᒃ ᑐᖁᑕᐅᑎᑦᓯᔪᒪᓪᓗᑎᒃ; 60ᓇᓂᓯᔪᓐᓇᓐᖏᓚᓪᓕ ᐱᑦᔪᑎᒃᓴᒥᖕᓂᒃ, ᐊᒥᓱᑦ ᓴᒡᓗᓪᓗᑎᒃ ᐅᖃᕋᓱᖃᑦᑕᕋᓗᐊᕐᐳᑦ, ᓇᓂᓯᔪᓐᓇᕋᑎᒡᓕ ᐱᑦᔪᑎᒃᓴᓪᓚᕆᖕᒥᒃ. ᑭᖑᓪᓕᕐᐹᒥᒡᓕ ᐃᓅᒃ ᒪᕐᕉᒃ ᑕᒪᐅᓐᖓᕆᕗᒃ 61#ᔪᐊᓇᓯ 2:19.ᐅᖃᕐᓗᑎᒃ, “ᐅᓇ ᐊᖑᑦ ᐅᖃᓚᐅᕐᑐᖅ, ‘ᒎᑎᐅᑉ ᑐᒃᓯᐊᕐᕕᒃᔪᐊᖁᑎᖓ ᓯᖁᒥᑦᓱᓐᓇᕐᐸᕋ, ᐅᓪᓗᐃᓪᓕ ᐱᖓᔪᐊᓐᓂ ᐅᑎᕐᑎᓪᓗᒍ ᓇᑉᐸᕐᑎᑦᓱᓐᓇᕆᕙᕋ.’”
62ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᒻᒪᕆᖓ ᓂᑯᕕᓪᓗᓂ ᔩᓱᓯᒧᑦ ᐅᖃᕐᐳᖅ, “ᑕᒪᒃᑯᓄᖓ ᐸᓯᔭᐅᑦᔪᑎᒋᔭᕐᓄᑦ ᑭᐅᑦᔪᑎᒃᓴᖃᓐᖏᓚᑏᑦ?” 63ᔩᓱᓯᓕ ᓂᓪᓕᓐᖏᓚᖅ. ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ ᐅᖃᕐᕕᒋᒃᑲᓐᓂᕐᐹ, “ᒎᑎᐅᑉ ᑐᖁᓱᐃᑦᑑᑉ ᐊᑎᖓᓂ ᐅᖃᖁᓪᓚᕆᓕᕐᐸᒋᑦ, ᐅᖃᐅᑎᓚᐅᕐᑎᒍᑦ ᙭ᔅᑑᓯᐅᖕᒪᖔᕐᐱᑦ, ᒎᑎᐅᑉ ᐃᕐᓂᖓ.”
64 #
ᑖᓂᐊᓕ 7:13. ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕐᐳᑎᑦ. ᑕᒪᑦᓯᓕ ᐅᖃᐅᑎᕙᑦᓯ, ᑕᒪᑐᒪ ᑭᖑᕐᖓᓂ ᐃᓅᑉ ᐃᕐᓂᖓ ᑕᑯᔪᒫᕐᐸᓯ ᐱᔪᓐᓇᕐᓂᐅᑉ ᑕᓕᕐᐱᐊᓂ ᐃᒃᓯᕙᔪᖅ, ᕿᓚᐅᓪᓗ ᓄᕗᔭᖏᑎᒍᑦ ᑎᑭᓕᕐᑎᓪᓗᒍ.”
65 #
ᒨᓯᓯ ᐱᖓᔪᖏᑦ 24:16. ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓ ᑕᒪᑐᒥᖓ ᑐᓴᕋᒥ ᐊᓐᓄᕌᓂ ᐊᓕᒃᐰᑦ ᐅᖃᕐᓗᓂ, “ᒎᑎᒥᒃ ᐅᖃᕐᓂᕐᓘᑎᖃᕐᐳᖅ! ᖃᐅᔨᓯᒪᔪᒥᒃ ᑐᓴᒃᑲᓐᓂᕆᐊᖃᕈᓐᓃᕐᐳᒍᑦ, ᑕᕝᕙ ᑐᓵᕐᐸᓯ ᒎᑎᒥᒃ ᐅᖃᕐᓂᕐᓘᑎᖃᕐᑎᓪᓗᒍ. 66ᖃᓄᕐᓕ ᐃᓱᒪᕕᓰ?”
ᑖᒃᑯᐊ ᑭᐅᕚᑦ, “ᐸᓯᔭᒃᓴᐅᓂᕐᒧᑦ ᑐᖁᑕᒃᓴᐅᕗᖅ.”
67 #
ᐂᓮᐊᓯ 50:6. ᑕᕝᕙ ᔩᓱᓯ ᑮᓇᖓᒍᑦ ᑎᕝᕗᓗᒃᐹᑦ, ᑎᒡᓗᒡᓗᒍᓗ; ᐃᓚᖏᑕᓕ ᑮᓇᖓᒍᑦ ᐸᑎᒃᐹᑦ, 68ᐅᖃᐅᑎᓪᓗᒍ, “ᓇᓚᐅᑦᑕᓕᕐᑎᒍᑦ ᙭ᔅᑑᓰ! ᑭᓇᒨᑦ ᑎᒡᓗᒡᑕᐅᕖᑦ!”
ᐲᑦᑐᕉᓯᐅᑉ ᔩᓱᓯᒥᒃ ᖃᐅᔨᒪᖏᓐᓂᕋᕐᓂᖓ
ᒫᑯᓯ 14:66-72; ᓘᑲᓯ 22:56-62; ᔪᐊᓇᓯ 18:15-18,25-27
69ᐲᑦᑐᕉᓯ ᐃᒃᓯᕙᓚᐅᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ ᐃᒡᓗᖓᑕ ᐊᕙᓗᐊᑕ ᐃᓗᐊᓂ. ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᒻᒪᕆᖓᑕ ᐱᔨᖓᑕ ᐊᕐᓇᐅᑉ ᐅᐸᒃᓗᓂᐅᒃ ᐅᖃᐅᑎᕚ, “ᐃᕝᕕᑦᑕᐅᖅ ᔩᓱᓯ ᒐᓕᓕᐊᒥᐅᖅ ᐃᓚᒋᓚᐅᕐᐸᑦ.”
70ᑖᒃᑯᐊ ᑕᕝᕙᓃᑦᑐᓕᒫᑦ ᑐᓵᑎᓪᓗᒋᑦ, ᐲᑦᑐᕉᓯ ᖃᐅᔨᒪᖏᓐᓂᕋᕐᐳᖅ, ᐅᖃᕐᓗᓂ, “ᖃᐅᔨᒪᓐᖏᓚᖓ ᐅᖃᐅᓯᕆᔭᕐᓂᒃ.” 71ᑕᕝᕙᓐᖓᑦ ᐊᓂᓕᕐᑎᓪᓗᒍ, ᐱᔨᑲᑖᑦᑕᐅᖅ ᐊᕐᓇᐅᑉ ᐅᖃᖅᑲᐅᔫᑉ ᐊᓯᐊᑕ ᑕᑯᒐᒥᐅᒃ, ᖃᓂᒋᔭᒥᓃᑦᑐᓄᑦ ᐅᖃᕐᐳᖅ, “ᐅᓇ ᔩᓱᓯᒥᒃ ᓈᓴᕇᑎᒥᐅᒥᒃ ᐃᓚᖃᓚᐅᕐᑐᖅ.”
72ᐲᑦᑐᕉᓯ ᖃᐅᔨᒪᖏᓐᓂᕋᕐᓗᓂ ᐅᖃᕆᕗᖅ, “ᓱᓕᑦᓯᐊᕐᐳᖓ ᐊᖑᑦ ᑖᓐᓇ ᖃᐅᔨᒪᖏᒻᒪᕆᒃᐸᕋ!”
73ᐊᑯᓂᐅᓗᐊᕐᑎᓐᓇᒍ ᓇᖏᕐᑐᑦ ᐃᓚᖓᑦᑕ ᐲᑦᑐᕉᓯ ᐅᐸᒃᓗᒍ, ᐅᖃᐅᑎᕚ, “ᑖᒃᑯᓇᖓᑦ ᐃᓚᒋᔭᐅᕗᑎᑦ, ᐅᖃᓪᓚᐅᓯᕐᐱᑦ ᓇᓗᓁᓕᖕᒪᑎᑦ!”
74ᑕᕝᕙ ᐲᑦᑐᕉᓯ ᐅᖃᕐᐳᖅ, ᐅᖃᕕᒐᓱᐊᕐᓗᓂ, “ᓱᓕᓪᓚᕆᒃᐳᖓ ᒎᑎᐅᑉ ᓱᒋᐊᕐᓂᐊᕐᐹᖓ ᓱᓕᖏᒃᑯᒪ! ᐅᓇ ᐊᖑᑦ ᖃᐅᔨᒪᖏᑦᓯᐊᕐᑕᕋ!”
ᑕᕝᕔᓐᓇᖅ ᐊᖑᑎᕕᐊᖅ ᓂᓪᓕᕐᐳᖅ, 75ᐲᑦᑐᕉᓯ ᐃᖅᑬᓕᕐᐳᖅ ᔩᓱᓯᐅᑉ ᐅᖃᐅᑎᓚᐅᕐᒪᒍ, “ᐊᖑᑎᕕᐊᖅ ᓂᓪᓕᖅᑳᕐᑎᓐᓇᒍ, ᐱᖓᓱᐃᕐᑐᕐᓗᑎᑦ ᖃᐅᔨᒪᖏᓐᓂᕋᓛᕐᐸᕐᒪ.” ᐲᑦᑐᕉᓯ ᑕᕝᕙᓐᖓᑦ ᐊᓂᓪᓗᓂ, ᕿᐊᕕᒡᔪᐊᓕᕐᐳᖅ ᐅᒡᒍᐊᕐᓂᕐᒧᑦ.#26:75 ᐃᓚᓂᐅᖏᑦᑑᕐᓱᓂ
Currently Selected:
ᒫᑎᐅᓯᐅᑉ ᐊᒡᓚᖏᑦ 26: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
