ᓘᑲᓯᐅᑉ ᐊᒡᓚᖏᑦ 2
2
ᔩᓱᓯᐅᑉ ᐃᕐᓂᐊᖑᓂᖓ
ᒫᑎᐅᓯ 1:18-25
1ᐅᓪᓗᓂ ᑍᒃᑯᓇᓂ ᕉᒪᒥᐅᑦ ᐊᖓᔪᖅᑳᕐᔪᐊᖓᑦ ᓰᓴᕆ ᐋᒐᔅᑕᓯ ᐊᖓᔪᖅᑲᐅᕕᖕᒥᓃᑦᑐᑦ ᐃᓄᓕᒫᑦ ᓈᓴᕐᑕᐅᖁᓚᐅᕐᐰᑦ ᐱᖁᑎᖏᑦ ᐱᖃᓯᐅᑎᓗᒋᑦ. 2ᑕᒪᓐᓇ ᓈᓴᕐᑕᐅᓂᖅ ᓯᕗᓪᓕᕐᐹᖑᓚᐅᕐᐳᖅ ᑯᐃᕆᓂᐊᓯ ᐊᐅᓚᑦᓯᔨᐅᑎᓪᓗᒍ ᓯᕆᐊᒥ. 3ᐃᓄᓕᒫᑦ ᑎᑎᕋᕐᑕᐅᔭᕐᑐᓚᐅᕐᐳᑦ ᓯᕗᓕᕕᓂᖏᑕ ᓄᓇᕕᓂᖏᓐᓄᑦ ᐂᓪᓗᑎᒃ.
4ᔫᓯᐱᑦᑕᐅᖅ ᓈᓴᕇᑎᒥᑦ ᐱᓪᓗᓂ ᒐᓕᓕᐊᒦᑦᑐᒥᑦ ᐱᑦᓕᐊᒧᐊᕆᕗᖅ ᔫᑎᐊᒦᑦᑐᒧᑦ, ᑍᕕᑎᐅᑉ ᐃᒡᓗᒐᓴᖏᓐᓄᑦ, ᐱᑦᓕᐊᒥᒃ ᐊᑎᓕᖕᒧᑦ, ᑕᕝᕗᓐᖓᓚᐅᕐᐳᖅ ᑍᕕᑎᐅᑉ ᑭᖑᕚᕆᖕᒪᒍ. 5ᑎᑎᕋᕐᑕᐅᔭᕐᑐᓚᐅᕐᐳᖅ ᒥᐊᕆ ᐱᖃᑎᒋᓪᓗᒍ, ᑖᓐᓇ ᓄᓕᐊᒃᓴᕇᖕᓂᕐᒧᑦ ᐊᖏᖃᑎᒋᓯᒪᔭᓂ, ᓄᑕᕋᒃᓴᓕᒃ. 6ᐱᑦᓕᐊᒦᓕᕐᑎᓪᓗᒋᒃ, ᒥᐊᕆᐅᑉ ᐃᕐᓂᕕᒃᓴᖓ ᓇᓪᓕᐅᑎᕗᖅ, 7ᑕᕝᕙᓂ ᓄᑕᕋᕐᑖᕆᐅᕈᑎᒥᓂᒃ ᐃᕐᓂᕐᑖᕐᐳᖅ, ᐊᓐᓄᕌᓂᒃ ᐃᒻᒧᓯᕐᐹ, ᐆᒪᔪᐃᑦ ᓂᕆᕕᖓᓄᑦ ᐃᓕᓪᓗᒍ, ᓯᓂᒃᑕᕐᕕᖕᒥ ᐃᓂᒃᓴᖃᖏᓐᓇᒥᒃ.
ᓰᐱᓕᕆᔩᑦ ᐂᖏᓖᓪᓗ
8ᐱᑦᓕᐊᒻᓗ ᖃᓂᒋᔮᓂ ᐰᕐᓯᔨᑕᖃᓚᐅᕐᐳᖅ ᓰᐱᖁᑎᒥᖕᓂᒃ ᒥᐊᓂᕐᓯᔪᓂᒃ ᐅᓐᓄᐊᒃᑯᑦ. 9ᐊᑕᓂᐅᑉ ᐂᖏᓕᖓᑕ ᓴᖅᑭᕝᕕᒋᕔᑦ, ᐊᑕᓂᐅᓪᓗ ᓂᕐᑐᕐᓇᕐᓂᖓᑕ ᖃᐅᒻᒪᒡᕕᒋᕔᑦ, ᑲᑉᐱᐊᓱᓕᕐᓗᑎᒃ. 10ᐂᖏᓕᐅᑉ ᐅᖃᐅᑎᕔᑦ, “ᑲᑉᐱᐊᓱᖏᓪᓗᓯ; ᑕᑯᒋᑦ, ᑐᓴᕈᒥᓇᕐᑐᒥᒃ ᐅᖃᐅᑎᔭᕐᑐᕐᐸᑦᓯ ᖁᕕᐊᓇᕐᑐᕐᔪᐊᒥᒃ ᐃᓄᓕᒫᓄᑦ ᑎᑭᓐᓂᐊᕐᑐᒥᒃ; 11ᐅᓪᓗᒥ ᑕᕝᕙ ᐱᐅᓕᔨ ᐊᑕᓂᖅ ᙭ᔅᑑᓯ ᐃᕐᓂᐊᖑᖕᒪᑦ ᑍᕕᑎᐅᑉ ᐃᒡᓗᒐᓴᖏᓐᓂ. 12ᐃᒫᒃ ᖃᐅᔨᒪᑦᔪᑎᖃᕐᓂᐊᕐᐳᓯ; ᓄᑕᕋᑯᓗᒃ ᑕᑯᓂᐊᕐᐸᓯ ᐊᓐᓄᕌᕕᓂᕐᓂᒃ ᐃᒻᒧᓯᕐᓯᒪᔪᖅ ᐆᒪᔪᐃᓪᓗ ᓂᕐᕆᕕᐊᓂ ᐃᓕᓯᒪᔪᖅ.”
13ᑕᕝᕔᓐᓇᖅ ᐂᖏᓖᒐᓴᒡᔪᐊᑦ ᕿᓚᖕᒥᑦ ᐱᔪᑦ ᐂᖏᓕ ᑖᓐᓇ ᐃᓚᒋᓕᕐᐹᑦ, ᐃᓐᖏᕐᓗᑎᒃ ᒎᑎ ᓂᕐᑐᕐᐹᑦ, ᐅᖃᕐᓗᑎᒃ,
14“ᒎᑎ ᓂᕐᑐᕐᑕᐅᓕ ᖁᑦᓯᖕᓂᕐᐹᖑᔪᖅ,
ᓮᒪᓇᕐᓂᖃᕐᓗᓂᓗ ᓄᓇᕐᔪᐊᕐᒥ ᐃᓄᖕᓄᑦ, ᒎᑎᒧᑦ ᖁᕕᐊᒋᔭᐅᔪᓄᑦ!”
15ᐂᖏᓖᑦ ᕿᓚᓕᐊᕐᒪᑕ, ᓰᐱᓕᕆᔩᑦ ᐃᒻᒥᖕᓄᑦ ᐅᖃᕐᐳᑦ, “ᐱᑦᓕᐊᒧᐊᓚᐅᕐᑕ ᑍᓐᓇ ᐅᖃᐅᓯᐅᕋᑖᕐᑐᖅ ᑕᑯᔭᕐᑐᕐᓗᒍ, ᐊᑕᓂᐅᑉ ᖃᐅᔨᑎᑦᓯᑦᔪᑎᒋᔭᖓ ᐅᕙᑦᑎᓐᓄᑦ.”
16ᑐᐊᕕᕐᓗᑎᒃ ᐂᓕᕐᐳᑦ, ᓇᓂᓯᓪᓗᑎᒃ ᒥᐊᕆᒥᒃ ᔫᓯᐱᒥᒡᓗ, ᓄᑕᕋᑯᓗᖕᒥᒡᓗ ᐆᒪᔪᑦ ᓂᕆᕕᖓᓂ ᓇᓚᔪᒥᒃ. 17ᑕᑯᔭᕇᕋᒥᑦᔪᒃ ᐅᓂᒃᑳᓕᕐᐳᑦ ᐅᖃᐅᑦᔭᐅᓚᐅᕐᓂᕐᒥᖕᓂᒃ ᓄᑕᕋᑯᓗᒃ ᑖᓐᓇ ᐱᓪᓗᒍ; 18ᑐᓴᕐᑐᓕᒫᑦ ᑲᒪᓂᐊᕐᐳᑦ ᓰᐱᓕᕆᔩᑦ ᐅᖃᐅᓯᖏᓐᓂᒃ. 19ᒥᐊᕆᐅᓪᓕ ᑕᒪᒃᑯᐊᓕᒫᑦ ᐃᓱᒪᒥᐅᑕᕆᓕᕐᐰᑦ, ᐃᓱᒪᒃᓴᕐᓯᐅᕈᑎᒋᓪᓗᒋᓪᓗ. 20ᓰᐱᓕᕆᔨᑦ ᑕᕝᕙ ᐅᑎᕆᕗᑦ, ᒎᑎ ᓂᕐᑐᕐᐹᑦ ᖁᕕᐊᓲᑎᒋᓪᓗᒍ ᑐᓴᓚᐅᕐᑕᑎᒃ ᑕᑯᓚᐅᕐᑕᑎᒡᓗ ᐱᑦᔪᑎᒋᓪᓗᒋᑦ, ᐅᖃᐅᑦᔭᐅᓚᐅᕐᓂᑎᒃ ᐂᖏᓖᒧᑦ ᓇᓚᐅᑦᓯᑦᓯᐊᕐᒪᑕ.
ᔩᓱᓯᐅᑉ ᐊᑎᕐᑖᕐᓂᖓ
21 #
ᒨᓯᓯ ᐱᖓᔪᖏᑦ 12:3;
ᓘᑲᓯ 1:31. ᐅᓪᓗᐃᑦ ᓯᑕᒪᐅᔪᕐᑐᑦ ᐊᓂᒍᕐᒪᑕ, ᑭᐱᔭᐅᕕᒃᓴᖓ ᓇᓪᓕᐅᑎᖕᒪᑦ, ᐊᑦᑎᕐᑕᐅᕗᖅ ᔩᓱᓯᒥᒃ, ᐂᖏᓕᐅᑦ ᑍᒫᒃ ᐊᑎᖃᖁᓚᐅᕐᒪᒍ ᓄᑕᕋᒃᓴᕆᔭᐅᓚᐅᕐᑎᓐᓇᒍ ᓱᓕ.
ᔩᓱᓯᐅᑉ ᑐᓂᕐᕈᑕᐅᓂᖓ ᑐᒃᓯᐊᕐᕕᒡᔪᐊᕐᒥ
22ᔫᓯᐱᐅᑉ ᒥᐊᕆᐅᓪᓗ ᐅᒃᐱᕐᓂᒃᑯᑦ ᓴᓗᒻᒪᕐᑎᑕᐅᕕᒃᓴᖓᑦ#2:22 ᔫᑎᑦ ᐱᑦᔪᓯᖃᓚᐅᕐᒪᑕ ᓄᑕᕋᕐᑖᕐᑐᑦ ᓴᓗᒤᓐᓂᕋᕐᑕᐅᓪᓗᑎᒃ ᒨᓯᓯᐅᑉ ᐱᖁᔭᖏᑎᒍᑦ ᓴᓗᒻᒪᕐᑎᑕᐅᔭᕆᐊᖃᕐᓗᑎᒃ ᑐᒃᓯᐊᕐᕕᒡᔪᐊᒥ ᑐᓂᕐᕈᓯᕐᓗᑎᒡᓗ ᓇᓪᓕᐅᑎᖕᒪᑦ ᒨᓯᓯᐅᑉ ᐱᖁᔭᖏᑦ ᒪᓕᒡᓗᒋᑦ, ᔩᓱᓯ ᑐᒃᓯᐊᕐᕕᒡᔪᐊᕐᒧᑦ ᐱᑎᑉᐹᑦ ᔨᕉᓴᓕᒻᒧᑦ, ᐊᑕᓂᕐᒧᑦ ᑐᓂᔭᕐᑐᕐᓗᒍ. 23#ᒨᓯᓯ ᐂᑉᐸᖏᑦ 13:2,12.ᐃᒫᒃ ᐅᖃᕐᓯᒪᖕᒪᑦ ᐊᑕᓂᐅᑉ ᐱᖁᔭᖏᓐᓂ, “ᓄᑕᕋᑯᓗᐃᑦ ᐊᖑᑕᐅᒃᐸᑕ ᓯᕗᓪᓕᕐᐹᒥᒃ ᓄᑕᕋᕐᑖᕆᔭᐅᔪᑦ ᑐᓂᔭᐅᔪᒃᓴᐅᕗᑦ ᐊᑕᓂᕐᒧᑦ.” 24#ᒨᓯᓯ ᐱᖓᔪᖏᑦ 12:6-8.ᔫᓯᐱᒃᑯᒃ ᑐᓂᓯᔭᕆᐊᖃᓚᐅᕐᐴᒃ ᐊᑕᓂᐅᑉ ᐱᖁᔭᖏᑦ ᒪᓕᒡᓗᒋᑦ ᑎᖕᒥᐊᖕᓂᒃ ᒪᕐᕉᖕᓂᒃ, ᑑᕕᖕᓂᒡᓘᓐᓃᑦ ᒪᕐᕉᖕᓂᒃ ᐊᕿᒡᒋᐅᔮᕐᑑᖕᓂᒃ, ᐊᑭᒡᒋᐅᔮᕐᑑᖕᓂᒡᓗ ᒪᕐᕉᖕᓂᒃ ᖃᑯᕐᑕᐅᖏᑦᑑᖕᓂᒃ.
25ᑍᑦᓱᒪᓂ ᐊᖑᑎᑕᖃᓚᐅᕐᐳᖅ ᔨᕉᓴᓕᒻᒥ, ᓯᒥᐅᓂᒥᒃ ᐊᑎᓕᖕᒥᒃ, ᐃᓅᓯᖃᕐᑐᒥᒃ ᒎᑎᒧᑦ ᓈᒻᒪᒋᔭᐅᔪᒥᒃ ᑐᓂᓯᒪᑦᓯᐊᕐᑑᓪᓗᓂ, ᑖᓐᓇ ᐅᑕᖅᑭᓚᐅᕐᐳᖅ ᐃᓴᕆᐊᓕᒥᐅᑦ ᐱᐅᓕᔭᐅᕕᒃᓴᖓᓐᓂᒃ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᓇᔪᕐᐹ. 26ᑖᓐᓇ ᓇᓗᔪᓐᓃᕐᑎᑕᐅᓚᐅᕐᐳᖅ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ ᑐᖁᓂᐊᖏᓐᓂᕐᒥᓂᒃ ᐊᑕᓂᐅᑉ ᙭ᔅᑑᓯᖓᓂᒃ ᑕᑯᓚᐅᖏᓐᓂᕐᒥᓂ. 27ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑕᓯᐅᕐᑕᐅᓪᓗᓂ ᑐᒃᓯᐊᕐᕕᒡᔪᐊᕐᒧᐊᕐᐳᖅ; ᓄᑕᕋᑯᓗᒃ ᔩᓱᓯ ᐊᖓᔪᖅᑳᖏᖕᓂᑦ ᑐᒃᓯᐊᕐᕕᒡᔪᐊᒧᑦ ᐱᑎᑕᐅᑎᓪᓗᒍ, ᐱᖁᔭᑦ ᒪᓕᒃᑕᐅᔭᕆᐊᖃᕐᓂᖏᑦ ᒪᓕᒡᓗᒋᑦ, 28ᓯᒥᐅᓂᐅᑉ ᓄᑕᕋᑯᓗᒃ ᑎᒍᕚ, ᒎᑎ ᓂᕐᑐᕐᓗᒍ ᐅᖃᕐᐳᖅ:
29“ᐊᑕᓃᖅ ᒫᓐᓇ ᐱᔩᑦ ᓮᒪᓂᕐᒥ ᐊᖏᕐᕋᕐᑎᓕᕈᒃ,
ᐅᖃᐅᓯᕆᓚᐅᕐᑍᑦ ᒪᓕᒡᓗᒍ;
30ᐱᐅᓕᔨᒃᓴᐅᑎᑍᑦ ᓇᖕᒥᓂᖅ ᐃᔨᓐᓄᑦ ᑕᑯᒐᒃᑯ,
31ᑖᓐᓇ ᐅᐸᓗᖕᒊᕈᑎᒋᓯᒪᒐᕕᐅᒃ ᐃᓄᓕᒪᑦ ᖃᐅᔨᖁᓪᓗᒋᑦ,
32 #
ᐂᓮᐊᓯ 42:6; 49:6; 52:10. ᖃᐅᒪᔪᖅ ᖃᐅᒻᒪᒃᓮᖁᓪᓗᒍ ᔫᑎᐅᖏᑦᑐᓂᒃ,
ᐃᓄᖁᑎᕕᓪᓗ ᐃᓴᕆᐊᓕᒥᐅᑦ ᓂᕐᑐᕐᓇᕈᑎᒃᓴᖓᑦ.”
33ᐊᑖᑕᖓᑕ ᐊᓈᓇᖓᑕᓗ ᓄᑕᕋᑯᓘᑉ ᑍᒫᒃ ᐅᖃᐅᑦᔭᐅᓂᖓ ᑲᒪᒋᒻᒪᕆᒃᐹᒃ; 34ᓯᒥᐅᓂᐅᑉ ᓮᒻᒪᕐᑎᑉᐰᑦ ᐊᓈᓇᖓᓄᑦ ᒥᐊᕆᒧᑦ ᐅᖃᕐᓗᓂ, “ᑕᑯᒋᑦ, ᐅᓇ ᓄᑕᕋᑯᓗᒃ ᐅᓄᕐᑐᓄᑦ ᐃᓴᕆᐊᓕᒥᐅᓄᑦ ᑲᑕᒍᑕᐅᔪᒫᕐᐳᖅ ᒪᑭᑦᔪᑕᐅᔪᒫᕐᓗᓂᓗ, ᓇᓗᓁᒃᑯᑕᐅᔪᒫᕐᐳᖅ ᐊᑭᕋᕐᑐᑕᐅᓗᓂ. 35ᐃᕝᕕᑦ ᒥᐊᕆ ᐆᒻᒪᑏᑦ ᑭᓪᓕᒃᑕᐅᔪᒫᕐᐳᖅ ᓴᕕᒡᔪᐊᑎᑐᑦ, ᐃᓄᐃᑦ ᐊᒥᓱᑦ ᐃᓱᒪᖏᑦ ᓴᖅᑭᑎᑦᓱᒫᕐᐰᑦ.”
36ᑕᕝᕙᓃᑦᑐᖃᓚᐅᕆᕗᖅ ᓇᓚᐅᑦᑍᔪᒥᒃ ᐊᕐᓇᕐᒥ ᐋᓇᒥᒃ ᐊᑎᓕᖕᒥᒃ, ᐸᓄᐃᓕᐅᑉ ᐸᓂᖓᓂᒃ, ᐋᓱᕆᐅᑉ ᑭᖑᕚᖏᓐᓄᑦ ᐃᓚᒋᔭᐅᔪᒥᒃ; ᑖᓐᓇ ᓂᖏᐅᖑᓕᓚᐅᕐᐳᖅ, ᓯᕗᓂᖓᒍᑦ ᐅᐃᖃᓚᐅᕐᑐᖅ ᐊᕐᕌᒍᓂᒃ 7ᓂᒃ, 37ᐅᐃᒡᒐᕐᓂᐅᓕᕐᑐᖅ ᐊᕐᕌᒍᖃᓕᕐᓗᓂ 84ᓂᒃ.#2:37 ᐅᕝᕙᓘᓐᓃᑦ ᐅᐃᒡᒐᕐᓂᐅᓕᕐᑐᖅ ᐊᕐᕌᒍᓂᒃ 84ᓂᒃ ᓇᓕᐊᓐᓂᑐᐃᓐᓇᖅ ᑐᑭᖃᕐᑐᖅ ᑖᓐᓇ ᖃᐅᑕᒫᑦ ᑐᒃᓯᐊᕐᕕᒡᔪᐊᕐᒦᖃᑦᑕᓚᐅᕐᐳᖅ ᑐᒃᓯᐊᕐᓗᓂ ᓂᕆᑦᑍᓕᕙᒡᓗᓂᓗ. 38ᐃᑲᕐᕋᒥ ᑕᕝᕙᓂᑦᓮᓐᓇᖅ ᐃᑎᕐᐳᖅ ᒎᑎ ᓂᕐᑐᓕᕐᓗᒍ, ᓄᑕᕋᑯᓗᒃ ᐅᖃᐅᓯᕆᕚ ᐅᑕᖅᑭᔪᓕᒫᓄᑦ ᔨᕉᓴᓕᒻᒥᐅᓄᑦ ᐱᐅᓕᔭᐅᕕᒃᓴᐅᓂᖓᓂᒃ.
ᔫᓯᐱᒃᑯᑦ ᐅᑎᕐᓂᖓᑦ ᓈᓴᕇᑎᒧᑦ
39 #
ᒫᑎᐅᓯ 2:23. ᐊᑕᓂᐅᑉ ᐱᖁᔭᖏᑎᒍᑦ ᐊᑐᕆᐊᖃᕐᑕᒥᖕᓂᒃ ᐱᔭᕆᕋᒥᒃ, ᐊᖏᕐᕋᒥᖕᓄᑦ ᐅᑎᕐᐳᒃ ᓈᓴᕇᑎᒧᑦ ᒐᓕᓕᐊᒦᑦᑐᒧᑦ. 40ᓄᑕᕋᑯᓗᒃ ᐱᕈᕐᐸᓪᓕᐊᓕᕐᐳᖅ ᓴᓐᖏᔫᓕᕐᓗᓂ, ᓯᓚᑐᔫᓕᕐᓗᓂᓗ; ᒎᑎᐅᑉ ᓮᒻᒪᓂᖓᑕ ᓇᔪᕐᐹ.
ᔩᓱᓯᐅᑉ ᓱᕈᓯᐅᓪᓗᓂ ᑐᒃᓯᐊᕐᕕᒡᔪᐊᕐᒧᐊᕐᓂᖓ
41 #
ᒨᓯᓯ ᐂᑉᐸᖏᑦ 12:1-27; ᒨᓯᓯ ᑕᓪᓕᒪᖏᑦ 16:1-8. ᐊᕐᕌᒍᑕᒫᑦ ᔩᓱᓯᐅᑉ ᐊᖓᔪᖅᑳᖏᒃ ᔨᕉᓴᓕᒻᒧᐊᖃᑦᑕᓚᐅᕐᐴᒃ ᓇᓪᓕᐅᓐᓂᕐᓯᐅᕆᐊᕐᑐᕐᓗᑎᒃ ᖄᖏᕐᑕᐅᕕᖕᒥᒃ. 42ᔩᓱᓯ 12ᓂᒃ ᐊᕐᕌᒍᖃᓕᕐᑎᓪᓗᒍ, ᐊᖓᔪᖅᑳᖏᒃᑕ ᐃᓚᒋᓪᓗᒍ ᔨᕉᓴᓕᒻᒧᐊᕐᐳᑦ ᓇᓪᓕᐅᓐᓂᕐᓯᐅᕆᐊᕐᑐᕐᓗᑎᒃ ᐃᓕᖅᑯᓯᕆᕙᒃᑕᒥᒃᑎᑐᑦ; 43ᓇᓪᓕᐅᓐᓂᕐᓯᐅᕐᕕᒃ ᐃᓱᓕᒻᒪᑦ, ᐅᑎᓕᓚᐅᕐᐳᑦ, ᔩᓱᓯᓕ ᔨᕉᓴᓕᒻᒥᑦ ᓅᓚᐅᓐᖏᓚᖅ. ᐊᖓᔪᖅᑳᖏᒃ ᖃᐅᔨᓚᐅᓐᖏᓛᒃ ᓅᓚᐅᖏᑦᑐᒥᒃ, 44ᐃᓱᒪᓚᐅᕐᒪᑎᒃ ᐃᓚᒋᔭᒥᖕᓄᑦ ᐃᓚᐅᓇᓱᒋᓪᓗᒍ ᐅᓪᓗᓕᒫᖅ ᐱᓱᓚᐅᕐᐳᑦ, ᑭᖑᓂᖓᒍᑦ ᕿᓂᓕᕐᐹᒃ ᐃᓚᒥᖕᓂ ᐃᓚᓐᓇᕆᔭᒥᖕᓂᓗ; 45ᓇᓂᖏᓐᓇᒥᑦᔪᒃ, ᔨᕉᓴᓕᒻᒧᑦ ᐅᑎᕐᐳᒃ, ᕿᓂᕆᐊᕐᓗᒍ. 46ᐅᓪᓗᐃᑦ ᐱᖓᔪᖓᓐᓂ ᓇᓂᕚᒃ ᑐᒃᓯᐊᕐᕕᒡᔪᐊᕐᒥ, ᔫᑎᑦ ᐃᓕᓮᔨᖏᓐᓂᑦ ᐃᒃᓯᕙᖃᑕᐅᔪᖅ, ᓈᓚᓚᐅᕐᓗᒋᑦ ᐊᐱᕐᓱᖃᑦᑕᕐᐰᑦ. 47ᑐᓵᔪᓕᒫᑦ ᑖᑦᓱᒥᖓ ᑲᒪᓂᐊᕐᐳᑦ ᖃᐅᔨᒪᓂᖓᓂᒃ ᑭᒡᒍᓯᖏᓐᓂᒡᓗ. 48ᐊᖓᔪᖅᑳᖏᒃᑕ ᑕᑯᒐᒥᑦᔪᒃ ᖁᐊᕐᓵᕈᑎᒋᕚᒃ; ᐊᓈᓇᖓᑕ ᐅᖃᐅᑎᕚ, “ᐃᕐᓃᒃ, ᓱᖕᒪᑦ ᑍᒤᓕᐅᕐᐱᑎᒎᒃ? ᑕᑯᒋᑦ, ᐊᑖᑍᓪᓗ ᕿᓂᓚᐅᕐᐸᑦᑎᒋᑦ ᐱᖏᒐᒻᒪᕆᒃᓗᓄᒃ.”
49ᔩᓱᓯᐅᑉ ᑭᐅᕚ, “ᓱᖕᒪᑦ ᐅᕙᓐᓂᒃ ᕿᓂᕐᐱᓯᒃ? ᖃᐅᔨᒪᓐᖏᓚᓰᒃ ᐊᑖᑕᒪ ᐃᒡᓗᖓᓃᑦᓴᕆᐊᖃᕐᓂᓐᓂᒃ?” 50ᐊᖓᔪᖅᑳᖏᒃ ᑐᑭᓯᓐᖏᓛᒃ ᑭᒡᒍᓯᕆᔭᖏᓐᓂᒃ.
51ᔩᓱᓯᐅᑉ ᐊᖓᔪᖅᑳᖕᓂ ᐊᖏᕐᕋᐅᖃᑎᒋᓕᕐᐹᒃ ᓈᓴᕇᑎᒧᑦ, ᓈᓚᑦᓯᐊᕐᓗᒋᒃ; ᐊᓈᓇᖓᑕᓕ ᑕᒪᒃᑯᐊ ᐅᖃᐅᓯᓕᒫᖏᑦ ᐃᓱᒪᒥᐅᑕᕆᓕᕐᐰᑦ. 52#ᓴᒧᐃᓕ ᓯᕗᓪᓖᑦ 2:26; ᓲᓗᒨᓂ 3:4.ᔩᓱᓯ ᐱᕈᕐᐸᓪᓕᐊᓚᐅᕐᐳᖅ ᑎᒥᒥᒍᑦ ᓯᓚᑐᓕᕐᐸᓪᓕᐊᓪᓗᓂ, ᖁᕕᐊᒋᔭᐅᓪᓗᓂᓗ ᒎᑎᒧᑦ ᐃᓄᖕᓄᓪᓗ.
Currently Selected:
ᓘᑲᓯᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
