ᓘᑲᓯᐅᑉ ᐊᒡᓚᖏᑦ 3
3
ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᕐᑐᐃᓂᖓ
ᒫᑎᐅᓯ 3:1-12; ᒫᑯᓯ 1:1-8; ᔪᐊᓇᓯ 1:19-28
1ᐊᕐᕌᒍᓂᒃ 15ᓂᒃ ᓰᓴᕆ ᑍᐱᕆᐊᓯ ᐊᖓᔪᖅᑳᕐᔪᐊᖑᓕᕐᑎᓪᓗᒍ, ᐴᓐᑎᐅᓯ ᐰᓛᑑᓯ ᐊᐅᓚᑦᓯᔨᐅᑎᓪᓗᒍ ᔫᑎᐊᒥ; ᐃᕉᑕᓯ ᐊᖓᔪᖅᑳᕐᔪᐊᖑᑎᓪᓗᒍ ᒐᓕᓕᐊᒥ, ᐃᕉᑕᓯᐅᑉ ᖃᑕᓐᖑᑖ ᐱᓕᑉᐴᓯ ᐊᖓᔪᖅᑳᖑᑎᓪᓗᒍ ᐂᑐᕆᐊᒥ ᑐᕌᑯᓁᑎᓯᒥᓗ, ᓔᓴᓂᐊᓯ ᐊᖓᔪᖅᑳᖑᑎᓪᓗᒍ ᐊᐱᓕᓂᒥ, 2ᐋᓇᓯ ᑬᐊᐹᓯᓗ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᑎᓪᓗᒋᒃ, ᔪᐊᓇᓯ ᓴᑲᕅᐊᐅᑉ ᐃᕐᓂᖓ ᒎᑎᐅᑉ ᐅᖃᕐᕕᒋᕚ ᐃᓄᖃᖏᑦᑐᒦᑎᓪᓗᒍ. 3ᔪᐊᓇᓯ ᑰᖕᒥ ᔪᐊᕐᑕᓂᒥ ᖃᓂᒋᔭᓕᒫᖓᓂᓗ ᐱᓇᓱᐊᓕᓚᐅᕐᐳᖅ, ᐊᔪᕆᕐᑐᐃᓪᓗᓂ ᐹᑉᑎᑕᐅᓂᐅᑉ ᓇᓗᓁᒃᑯᑕᐅᓂᖓᓂᒃ ᓵᒋᐊᕐᓂᕐᒧᑦ ᐊᔪᕐᓃᑦ ᐃᓱᒪᒋᔪᓐᓁᕐᑕᐅᓂᖏᓐᓄᑦ. 4#ᐂᓮᐊᓯ 40:3-5.ᓇᓚᐅᑦᑍᔪᖅ ᐂᓮᐊᓯ ᐅᖃᕐᓯᒪᖕᒪᑦ,
“ᐃᓄᖃᖏᑦᑐᒥ ᕾᒐᓛᕐᑐᖃᕐᐳᖅ:
‘ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᕐᓯᐅᒃ;
ᐊᖅᑯᑎᒃᓴᖓ ᑐᑭᓕᐊᕐᓯᑎᓪᓗᒍ.
5ᓇᕐᓮᑦ ᑕᒪᕐᒥᒃ ᓇᖓᕐᑎᕐᑕᐅᔪᒫᕐᐳᑦ,
ᐱᖑᐃᑦ ᖃᖅᑬᓪᓗ ᐳᒃᑭᒡᓕᑎᑕᐅᔪᒫᕐᓗᑎᒃ,
ᐊᖅᑯᑎᑦ ᓴᖑᐃᖓᔪᑦ ᑐᑭᓕᐊᕐᓯᑎᑕᐅᔪᒫᕐᐳᑦ,
ᒪᓃᑦᑐᑦ ᒪᓂᖅᑲᒃᓴᕐᓗᒋᑦ.
6ᐃᓄᓕᒫᑦ ᑕᑯᔪᒫᕐᐳᑦ ᒎᑎᐅᑉ ᐱᐅᓕᔭᐅᕕᒃᓴᐅᑎᑕᖓᓂᒃ.’”
7 #
ᒫᑎᐅᓯ 12:34; 23:33. ᐃᓄᒋᐊᒃᑐᑦ ᔪᐊᓇᓯᒧᐊᕐᒪᑕ ᐹᑉᑎᑕᐅᔪᒪᓪᓗᑎᒃ, ᔪᐊᓇᓯᐅᑉ ᐅᖃᐅᑎᕔᑦ, “ᖁᒡᓗᒋᐊᖑᔮᕐᑐᓯ! ᑭᐊ ᕿᒫᖁᕚᓯ ᒎᑎᐅᑉ ᓂᓐᖓᐅᓯᖓᓂᑦ ᑎᑭᑦᓱᒫᕐᑐᒥᑦ? 8#ᔪᐊᓇᓯ 8:33.ᐊᑏ ᓴᖅᑭᑎᑦᓯᓕᕆᑦᓯ ᓵᒋᐊᕐᓂᓯ ᓇᓗᓁᕐᑕᐅᑦᔪᑎᖓᓂᒃ, ᐃᓱᒪᑦᑍᓕᒋᑦᓯ ᐃᒫᒃ: ‘ᒎᑎᐅᑉ ᐃᓄᖁᑎᒋᕚᑎᒍᑦ ᐂᑉᕋᕼᐋᒻ ᑭᖑᕚᕆᖕᒪᑎᒍᑦ.’ ᐃᒫᒃ ᐅᖃᐅᑎᕙᑦᓯ; ᒎᑎ ᒪᑯᓂᖓ ᐅᔭᕋᖕᓂᒃ ᐂᑉᕋᕼᐋᒻᒧᑦ ᑭᖑᕚᓐᖑᕐᑎᑦᓯᔪᓐᓇᕐᐳᖅ! 9#ᒫᑎᐅᓯ 7:19.ᒫᓐᓇ ᐅᓕᒪᐅᑦ ᐅᐸᓗᖕᒊᕐᑕᐅᓯᒪᓕᕇᕐᐳᖅ ᓇᐹᕐᑐᑦ ᒪᖑᒃᓯᒪᓂᖏᑎᒍᑦ ᓇᑲᑎᕐᑕᐅᖁᓪᓗᒋᑦ; ᑍᒤᒻᒪᑦ ᓇᐹᕐᑐᓕᒫᑦ ᐸᐅᕐᖓᖃᖏᑦᑐᑦ ᓇᑲᑕᐅᓂᐊᕐᐳᑦ ᐃᒋᑕᐅᓗᑎᒃ ᐃᑯᒪᒧᑦ.”
10ᐃᓄᐃᑦ ᔪᐊᓇᓯ ᐊᐱᕆᕚᑦ, “ᖃᓄᕐᓕ ᑕᕝᕙ ᐱᔭᕆᐊᖃᕐᐱᑖ?”
11ᔪᐊᓇᓯᐅᑉ ᑭᐅᕔᑦ, “ᒪᕐᕉᖕᓂᒃ ᐅᕕᓂᕈᖃᕐᑑᑉ, ᐂᑉᐸᖓ ᑐᓂᔭᒃᓴᕆᕚ ᐱᖃᖏᑦᑐᒧᑦ; ᓂᕿᖃᕐᑐᖅ, ᓂᕆᔭᒃᓴᖃᖏᑦᑐᒥᒃ ᐱᑎᑦᓯᔪᒃᓴᐅᕗᖅ.”
12 #
ᓘᑲᓯ 7:29. ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ#3:12 ᔫᑎᑦ ᕉᒪᒥᐅᓂᑦ ᐃᖅᑲᓁᔭᕐᑎᑕᐅᔪᑦ ᑮᓇᐅᔧᕐᑎᑦᓯᔨᐅᓪᓗᑎᒃ ᔫᑎᐅᖃᑎᖏᓐᓂᑦ ᖀᒥᒋᔭᐅᔪᑦ ᐱᐅᖏᑦᑐᓕᔪᒥᒃ ᑍᔭᐅᓪᓗᑎᒃ, ᑐᒃᓯᐊᕐᕕᒡᔪᐊᒧᑦ ᐃᑎᕈᓐᓇᕐᑎᑕᐅᖏᑦᑐᑦ ᕉᒪᒥᐅᓄᑦ ᐃᖅᑲᓁᔭᕐᒪᑕ ᕾᓚᐅᕆᕗᑦ ᐹᑉᑎᑕᐅᔭᕐᑐᕐᓗᑎᒃ, ᔪᐊᓇᓯᒧᑦ ᐅᖃᕐᓗᑎᒃ, “ᐊᔪᕆᕐᑐᐃᔩ, ᖃᓄᖅ ᐱᔪᒃᓴᐅᕕᑖ?”
13ᔪᐊᓇᓯᐅᑉ ᐅᖃᐅᑎᕔᑦ, “ᑮᓇᐅᔧᕐᑎᑦᓯᖁᔭᐅᓂᑦᓯ ᐅᖓᑖᓄᑦ ᐱᖃᑦᑕᕆᐊᖃᓐᖏᓚᓯ.”
14ᐊᒻᒪ ᐅᓇᑕᕐᑐᒃᓮᑦ ᔪᐊᓇᓯ ᐊᐱᕆᒋᕚᑦ, “ᐅᕙᒍᓪᓕ ᖃᓄᖅ ᐱᔪᒃᓴᐅᕕᑖ?”
ᔪᐊᓇᓯᐅᑉ ᐅᖃᐅᑎᕔᑦ, “ᓲᖑᓴᖕᓂᕐᒧᑦ ᑎᒡᓕᖃᑦᑕᖏᓪᓗᓯ ᑮᓇᐅᔭᓂᒃ ᓴᒡᓗᕿᑦᓯᓂᕐᒧᓪᓘᓐᓃᑦ, ᑮᓇᐅᑦᔭᓕᐊᓯ ᓈᒻᒪᒋᓯᐅᒃ.”
15ᐃᓄᐃᓪ ᓂᕆᐅᖕᓂᖃᕐᐸᓪᓕᐊᓕᕐᐳᑦ, ᐃᓱᒪᖃᓕᕐᓗᑎᒡᓗ ᔪᐊᓇᓯ ᙭ᔅᑑᓯᐅᓇᓱᒋᓪᓗᒍ. 16ᔪᐊᓇᓯᐅᑉ ᑕᒪᕐᒥᒃ ᐅᖃᐅᑎᕔᑦ, “ᐃᒥᕐᒧᑦ ᐹᑉᑎᑉᐸᑦᓯ; ᐅᕙᓐᓂᓪᓕ ᐱᔪᓐᓇᕐᓂᕐᓴᖅ ᑎᑭᓐᓂᐊᕐᐳᖅ, ᓇᓗᖅᑯᑎᕗᖓ ᑖᑦᓱᒪ ᐃᑎᒐᒍᑎᖏᓐᓂᒃ ᓯᖐᑦᔮᕐᓯᔭᕆᐊᒃᓴᖅ; ᑖᑦᓱᒪ ᐹᑉᑎᑦᓱᒫᕐᐹᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᑯᒪᒧᓪᓗ. 17ᑖᑦᓱᒪ ᐃᕖᔧᑦᔪᑎᓂ ᑎᒍᒥᐊᕐᐹ, ᓂᐊᖂᔭᒃᓴᓕᕆᕝᕕᖕᒥᓂ ᓂᐊᖂᔭᒃᓴᑦ ᐃᕖᔭᕐᓂᐊᕐᐰᑦ, ᓂᐊᖂᔭᒃᓴᑦ ᐴᖅᑲᕐᓗᒋᑦ ᓂᐊᖂᔭᒃᓴᒃᑯᕕᖕᒥᓄᑦ, ᐃᕕᐅᓂᖏᑦ ᐃᑭᓐᓂᐊᕐᐰᑦ ᐃᑯᒪᒧᑦ ᖃᒥᓱᐃᑦᑐᒧᑦ.”
18ᐊᑦᔨᒌᖏᑦᑐᑎᒍᑦ ᔪᐊᓇᓯ ᐊᔪᕆᕐᑐᐃᓚᐅᕐᐳᖅ ᐃᓄᖕᓄᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ. 19#ᒫᑎᐅᓯ 14:3,4; ᒫᑯᓯ 6:17,18.ᔪᐊᓇᓯᐅᑉ ᐃᕉᑕᓯ ᐊᖓᔪᖅᑲᖅ ᐃᓂᕐᑎᓚᐅᕐᐹ ᐃᕉᑎᐊᓯᒥᒃ ᓄᓕᐊᖃᓕᓚᐅᕐᒪᑦ ᓄᑲᖓᑕ ᓄᓕᐊᖓᓂᒃ, ᐊᓯᖏᓐᓂᒡᓗ ᐱᐅᖏᑦᑐᓕᑦᔪᑎᒋᔭᓕᒫᖏᓐᓂᒃ. 20ᐃᕉᑕᓯ ᐱᐅᖏᑐᓕᓂᕆᔭᒥ ᐱᐅᖏᖅᑭᔭᖏᓐᓂᒃ ᐱᐅᖏᑦᑐᓕᓚᐅᕐᐳᖅ ᔪᐊᓇᓯᒥᒃ ᑎᒍᔭᐅᑎᑦᓯᓚᐅᕐᒪᑦ.
ᔩᓱᓯᐅᑉ ᐹᑉᑎᑕᐅᓂᖓ
ᒫᑎᐅᓯ 3:13-17; ᒫᑯᓯ 1:9-11
21ᐃᓄᓕᒫᑦ ᐹᑉᑎᑕᐅᓯᒪᓕᕐᑎᓪᓗᒋᑦ, ᔩᓱᓯ ᐹᑉᑎᑕᐅᓚᐅᕆᕗᖅ. ᑐᒃᓯᐊᕐᑎᓪᓗᒍ, ᕿᓚᒃ ᐊᖕᒪᕐᐳᖅ, 22#ᒨᓯᓯ ᓯᕗᓪᓖᑦ 22:2; ᐃᓐᖏᕈᑦ 2:7; ᐂᓮᐊᓯ 42:1; ᒫᑎᐅᓯ 3:17; ᒫᑯᓯ 1:11; ᓘᑲᓯ 9:35.ᐊᓂᕐᓂᐅᑉ ᐃᑦᔪᕐᓁᑦᑑᑉ ᐊᖅᑲᕐᕕᒋᕚ ᑕᑯᒃᓴᐅᓪᓗᓂ ᑎᖕᒥᐊᑎᑐᑦ ᑑᕕᑎᑐᑦ, ᓂᐱᒥᒃ ᕿᓚᖕᒥᑦ ᓂᓪᓕᕐᑐᖃᕐᐳᖅ, “ᐃᕐᓂᕆᕙᒋᑦ ᓇᒡᓕᒋᔭᕋ; ᖁᕕᐊᒋᑦᓯᐊᕐᑕᕋ.”
ᔩᓱᓯᐅᑉ ᓯᕗᓕᕕᓂᖏᑦ
ᒫᑎᐅᓯ 1:1-17
23ᔩᓱᓯ ᐱᓇᓱᐊᕆᐊᓯᑎᓪᓗᒍ 30 ᖃᓂᒋᔮᓂ ᐊᕐᕌᒍᖃᓕᓚᐅᕐᐳᖅ, ᑖᓐᓇ ᔫᓯᐱᐅᑉ ᐃᕐᓂᕆᕚ, ᐃᓄᐃᑦ ᐃᓱᒪᒋᔭᖏᑎᒍᑦ, ᔫᓯᐱ ᕼᐃᓕᐅᑉ ᐃᕐᓂᕆᕚ, 24ᕼᐃᓕ ᒫᑕᑎᐅᑉ ᐃᕐᓂᕆᕚ, ᒫᑕᑎ ᓕᕔᑉ ᐃᕐᓂᕆᕚ, ᓕᕔ ᒥᓪᑬᑉ ᐃᕐᓂᕆᕚ, ᒥᓪᑬ ᔮᓁᑉ ᐃᕐᓂᕆᕚ, ᔮᓁ ᔫᓯᐱᐅᑉ ᐃᕐᓂᕆᕚ, 25ᔫᓯᐱ ᒪᑕᑍᐊᓯᐅᑉ ᐃᕐᓂᕆᕚ, ᒪᑕᑍᐊᓯ ᐂᒨᓯᐅᑉ ᐃᕐᓂᕆᕚ, ᐂᒨᓯ ᓁᕼᐅᒥᐅᑉ ᐃᕐᓂᕆᕚ, ᓁᕼᐅᒥ ᐃᔅᓕᐅᑉ ᐃᕐᓂᕆᕚ, ᐃᔅᓕ ᓈᒡᒊᑉ ᐃᕐᓂᕆᕚ, 26ᓈᒡᒊ ᒫᑎᐅᑉ ᐃᕐᓂᕆᕚ, ᒫᑎ ᒪᑕᑍᐊᓯᐅᑉ ᐃᕐᓂᕆᕚ, ᒪᑕᑍᐊᓯ ᓰᒥᓂᐅᑉ ᐃᕐᓂᕆᕚ, ᓰᒥᓂ ᔫᓯᑭᐅᑉ ᐃᕐᓂᕆᕚ, ᔫᓯᑭ ᔫᑕᐅᑉ ᐃᕐᓂᕆᕚ, 27ᔫᑕ ᔪᐊᓇᓇᐅᑉ ᐃᕐᓂᕆᕚ, ᔪᐊᓇᓇ ᕇᓴᐅᑉ ᐃᕐᓂᕆᕚ, ᕇᓴ ᔨᕈᐸᐱᐅᓪ ᐃᕐᓂᕆᕚ, ᔨᕈᐸᐱ ᓯᐊᓪᑎᐅᑉ ᐃᕐᓂᕆᕚ, ᓯᐊᓪᑎᐅᓪ ᓂᕅᐅᑉ ᐃᕐᓂᕆᕚ, 28ᓂᕅ ᒥᓪᑬᑉ ᐃᕐᓂᕆᕚ, ᒥᓪᑬ ᐋᑎᐅᑉ ᐃᕐᓂᕆᕚ, ᐋᑎ ᑰᓴᒥᐅᑉ ᐃᕐᓂᕆᕚ, ᑰᓴᒥ ᐃᓪᒪᑕᒥᐅᑉ ᐃᕐᓂᕆᕚ, ᐃᓪᒪᑕᒥ ᐃᕆᐅᑉ ᐃᕐᓂᕆᕚ, 29ᐃᕆ ᔮᓱᐊᑉ ᐃᕐᓂᕆᕚ, ᔮᓱᐊ ᐃᓔᓴᕆᐅᑉ ᐃᕐᓂᕆᕚ, ᐃᓔᓴᕆ ᔪᕆᒥᐅᑉ ᐃᕐᓂᕆᕚ, ᔪᕆᒻ ᒫᑕᑎᐅᑉ ᐃᕐᓂᕆᕚ, ᒫᑕᑎ ᓕᕔᑉ ᐃᕐᓂᕆᕚ, 30ᓕᕔ ᓯᒥᐅᓂᐅᑉ ᐃᕐᓂᕆᕚ, ᓯᒥᐅᓂ ᔫᑕᐅᑉ ᐃᕐᓂᕆᕚ, ᔫᑕ ᔫᓯᐱᐅᑉ ᐃᕐᓂᕆᕚ, ᔫᓯᐱ ᔫᓇᒥᐅᑉ ᐃᕐᓂᕆᕚ, ᔫᓇᒥ ᐃᓕᐊᑭᒥᐅᑉ ᐃᕐᓂᕆᕚ, 31ᐃᓕᐊᑭᒻ ᒥᓕᐊᑉ ᐃᕐᓂᕆᕚ, ᒥᓕᐊ ᒥᓐᓇᐅᑉ ᐃᕐᓂᕆᕚ, ᒥᓐᓇ ᒪᑖᑕᐅᑉ ᐃᕐᓂᕆᕚ, ᒪᑖᑕ ᓁᑕᓂᐅᑉ ᐃᕐᓂᕆᕚ, ᓁᑕᓂ ᑍᕕᑎᐅᑉ ᐃᕐᓂᕆᕚ, ᑍᕕᑎ ᔨᓯᐅᑉ ᐃᕐᓂᕆᕚ, 32ᔨᓯ ᐅᐱᑎᐅᑉ ᐃᕐᓂᕆᕚ, ᐅᐱᑎ ᐳᐊᓯᐅᑉ ᐃᕐᓂᕆᕚ, ᐳᐊᓯ ᓵᓪᒪᓂᐅᑉ ᐃᕐᓂᕆᕚ, ᓵᓪᒪᓐ ᓁᓴᓇᐅᑉ ᐃᕐᓂᕆᕚ, 33ᓁᓴᓇ ᐊᒥᓇᑕᐅᑉ ᐃᕐᓂᕆᕚ, ᐊᒥᓇᑕᑉ ᐊᑦᒥᓂᐅᑉ ᐃᕐᓂᕆᕚ, ᐊᑦᒥᓂ ᐋᕐᓂᐅᑉ ᐃᕐᓂᕆᕚ, ᐋᕐᓂ ᕼᐃᔅᕋᓂᐅᑉ ᐃᕐᓂᕆᕚ, ᕼᐃᔅᕋᓐ ᐱᕆᓯᐅᑉ ᐃᕐᓂᕆᕚ, ᐱᕆᓯ ᔫᑕᐅᑉ ᐃᕐᓂᕆᕚ, 34ᔫᑕ ᔧᑰᑉ ᐃᕐᓂᕆᕚ, ᔧᑯ ᐂᓴᑭᐅᑉ ᐃᕐᓂᕆᕚ, ᐂᓴᑭ ᐂᑉᕋᕼᐊᑉ ᐃᕐᓂᕆᕚ, ᐂᑉᕋᕼᐋᒻ ᑏᕋᐅᑉ ᐃᕐᓂᕆᕚ, ᑏᕋ ᓇᕼᐅᕆᐅᑉ ᐃᕐᓂᕆᕚ, 35ᓇᕼᐅᕆ ᓯᕈᒋᐅᑉ ᐃᕐᓂᕆᕚ, ᓯᕈᒋ ᕆᐅᑉ ᐃᕐᓂᕆᕚ, ᕆᐅ ᐱᓕᒋᐅᑉ ᐃᕐᓂᕆᕚ, ᐱᓕᒋ ᐃᑉᕆᐅᑉ ᐃᕐᓂᕆᕚ, ᐃᑉᕆ ᓰᓚᐅᑉ ᐃᕐᓂᕆᕚ, 36ᓮᓚ ᑬᓇᓂᐅᑉ ᐃᕐᓂᕆᕚ, ᑬᓇᓂ ᐊᕐᐹᒃᓴᑎᐅᑉ ᐃᕐᓂᕆᕚ, ᐊᕐᐹᒃᓴᑎ ᓰᒥᐅᑉ ᐃᕐᓂᕆᕚ, ᓰᒥ ᓄᐊᑉ ᐃᕐᓂᕆᕚ, ᓄᐊ ᓔᒥᑭᐅᑉ ᐃᕐᓂᕆᕚ, 37ᓔᒥᑭ ᒥᑑᓴᓚᐅᑉ ᐃᕐᓂᕆᕚ, ᒥᑑᓴᓚ ᐃᓅᑭᐅᑉ ᐃᕐᓂᕆᕚ, ᐃᓅᑭ ᔭᕆᑎᐅᑉ ᐃᕐᓂᕆᕚ, ᔭᕆᑎ ᒪᕼᐊᓚᓕᐅᑉ ᐃᕐᓂᕆᕚ, ᒪᕼᐊᓚᓕᐅ ᑬᓇᓂᐅᑉ ᐃᕐᓂᕆᕚ, 38ᑬᓇᓂ ᐃᓅᓯᐅᑉ ᐃᕐᓂᕆᕚ, ᐃᓅᓯ ᓰᑎᐅᑉ ᐃᕐᓂᕆᕚ, ᓰᑎ ᐋᑕᒥᐅᑉ ᐃᕐᓂᕆᕚ, ᐋᑕᒥ ᒎᑎᐅᑉ ᐃᕐᓂᖓ.
Currently Selected:
ᓘᑲᓯᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
