ᓘᑲᓯᐅᑉ ᐊᒡᓚᖏᑦ 1
1
ᐱᒋᐊᕈᑎᖏᑦ ᓱᖕᒪᓪᓗ ᑖᒃᑯᐊ ᑎᑎᕋᕐᑕᐅᓯᒪᖕᒪᖔᑕ
1ᐊᒥᓱᑦ ᑎᑎᖅᑲᑎᒍᑦ ᐋᖅᑭᒃᓱᑦᓯᐊᕐᓯᒪᓗᑎᒃ ᐅᓂᒃᑳᕋᓱᐊᕐᓯᒪᖕᒪᑕ ᐱᓂᐊᕐᓂᐅᓯᒪᔪᓂᒃ ᐊᑯᓐᓇᑦᑎᓐᓂ. 2ᑍᒃᑯᐊ ᑎᑎᕋᓚᐅᕐᐳᑦ ᓇᖕᒥᓂᖅ ᐱᒋᐊᕐᓂᖓᓂᒃ ᖃᐅᔨᓚᐅᕐᑕᒥᖕᓂᒃ ᓇᖕᒥᓂᕐᓗ ᑕᑯᖃᑦᑕᓚᐅᕐᑕᒥᓂᒃ, ᐅᕙᑦᑎᓐᓄᑦ ᐅᖃᐅᓯᖃᕐᓯᒪᕗᑦ ᐊᔪᕆᕐᑐᐃᑦᔪᑎᖃᕐᓗᑎᒃ. 3ᑕᕝᕙᓕ ᑎᐅᐱᓘᓰ, ᑕᒪᒃᑯᐊ ᖃᐅᔨᓇᓱᐊᑦᓯᐊᓚᐅᕐᓗᒋᑦ ᐱᒋᐊᕐᓂᕕᓂᖏᓐᓂᑦ, ᐱᐅᓂᕐᓴᐅᓇᓱᒋᓕᕋᒃᑯ ᑎᑎᕋᐅᓯᕆᒍᒃᑭᑦ, ᐱᕙᓪᓕᐊᓯᒪᓂᖏᓪᓗ ᐅᓂᒃᑲᐅᓯᕆᓗᒋᑦ ᐃᓕᖕᓄᑦ. 4ᑐᑭᓯᑦᓯᐊᕐᓂᐊᕋᕕᑦ ᓱᓕᑦᓯᐊᕐᑐᒥᒃ ᑕᒪᒃᑯᓂᖓ ᑐᓴᕐᑎᑕᐅᑦᔪᑎᒋᓯᒪᔭᕐᓂᒃ.
ᐂᖏᓕᐅᑉ ᐅᖃᕆᐊᕐᑐᕐᓂᖓ ᔪᐊᓇᓯᐅᑉ ᐃᕐᓂᐊᖑᔪᒫᕐᓂᖓᓂᒃ
5 #
ᑯᕉᓂᑲ ᓯᕗᓪᓖᑦ 24:10. ᑍᑦᓱᒪᓂ ᐃᕉᑕᓯ ᐊᖓᔪᖅᑳᕐᔪᐊᖑᑎᓪᓗᒍ ᔫᑎᐊᒥ, ᑐᓂᕐᕈᓯᕐᑎᑦᓯᔨᑕᖃᓚᐅᕐᐳᖅ ᓴᑲᕅᐊᒥᒃ ᐊᑎᓕᖕᒥᒃ, ᑐᓂᕐᕈᓯᕐᑎᑦᓯᔨᓄᑦ ᓇᓪᓕᐅᑎᖃᑦᑕᕐᑐᓄᑦ ᐊᐰᔭᒃᑯᓐᓄᑦ ᐃᓚᒋᔭᐅᓪᓗᓂ; ᓄᓕᐊᖓ ᐃᓕᓴᐱᒥᒃ ᐊᑎᖃᕐᐳᖅ ᐂᕉᓂᒃᑯᑦ ᑭᖑᕚᖓᑦ; ᑐᓂᕐᕈᓯᕐᑎᑦᓯᔨᓄᑦ ᑭᖑᕚᕆᔭᐅᒋᓪᓗᓂ. 6ᑖᒃᑯᐊᒃ ᐃᓅᓯᖃᓚᐅᕐᐳᒃ ᒎᑎᐅᑉ ᖁᕕᐊᒋᔭᖓᓂᒃ, ᐊᑕᓂᐅᑉ ᐱᖁᔭᓕᒫᖏᓐᓂᒃ ᐊᑐᕐᑕᐅᑯᔭᖏᓐᓂᒡᓗ ᒪᓕᑦᓯᐊᕐᓗᑎᒃ. 7ᕿᑐᕐᖓᖃᓚᐅᓐᖏᓚᒡᓕ, ᐃᓕᓴᐱ ᕿᑐᕐᖏᓱᐃᑦᑑᓚᐅᕐᒪᑦ, ᐅᐃᒌᒃ ᑕᒪᕐᒥᒃ ᐃᓄᑐᖃᐅᓕᓚᐅᕐᐳᒃ.
8ᓴᑲᕅᐊ ᐱᓇᓱᐊᕐᑎᓪᓗᒍ ᑐᓂᕐᕈᓯᕐᓂᕐᒥᒃ ᒎᑎᐅᑉ ᓵᖓᓂ ᖃᐅᑕᒫᑦ ᐊᑐᕐᑕᐅᕙᒃᑐᒥᒃ ᑐᒃᓯᐊᕐᕕᒡᔪᐊᒥ; ᐱᓇᓱᐊᕐᕕᒃᓴᖓ ᓇᓪᓕᐅᑎᓯᒪᓕᕐᒪᑦ. 9ᑐᓂᕐᕈᓯᕐᑎᑦᓯᔨᐅᑉ ᐃᓕᖅᑯᓯᕆᕙᒃᑕᖏᑦ ᒪᓕᒡᓗᒋᑦ, ᓇᓚᐅᑦᓵᕈᑎᒃᑯᑦ ᓇᓚᐅᑕᐅᒐᒥ ᐱᓇᓱᐊᓕᓚᐅᕐᐳᖅ ᑎᐱᑦᓯᐊᕆᒃᑐᒥᒃ ᐳᔫᕐᑎᑦᓯᔭᕆᐊᖃᓕᕐᓗᓂ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓄᑦ ᐃᓯᓚᐅᕐᐳᖅ. 10ᐃᓄᒋᐊᒃᑐᕐᔪᐊᑦ ᓯᓚᑖᓂ ᑐᒃᓯᐊᕐᑎᓪᓗᒋᑦ ᑎᐱᑦᓯᐊᕆᒃᑐᖅ ᐳᔫᕐᑎᑕᐅᑎᓪᓗᒍ, 11ᐊᑕᓂᐅᑉ ᐂᖏᓕᖓᑕ ᓴᑲᕅᐊ ᓴᖅᑭᕝᕕᒋᕚ ᑐᓂᕐᕈᓯᕐᕕᐅᑉ ᑎᐱᑦᓯᐊᕆᒃᑐᒥᒃ ᐳᔫᕐᑎᑦᓯᕕᐅᑉ ᑕᓕᕐᐱᐊᓂ ᓇᖏᕐᓗᓂ. 12ᓴᑲᕅᐊᐅᑉ ᑕᑯᒐᒥᐅᒃ ᖁᐊᕐᓵᕐᐳᖅ, ᑲᑉᐱᐊᓱᑐᐊᓘᓕᕐᓗᓂ. 13ᐂᖏᓕᐅᑉ ᐅᖃᐅᑎᕚ, “ᓴᑲᕅᐊ ᑲᑉᐱᐊᓱᖏᓪᓗᑎᑦ, ᒎᑎᐅᑉ ᑐᒃᓯᐊᕐᓃᑦ ᑐᓴᕐᐹ, ᓄᓕᐊᑦ ᐃᓕᓴᐱ ᐃᕐᓂᕐᑖᓛᕐᐳᖅ, ᑖᓐᓇ ᔪᐊᓇᓯᒥᒃ ᐊᑎᕐᑕᑎᑕᒃᓴᕆᕙᑦ. 14ᖁᔭᓕᓂᕐᒧᑦ ᖁᕕᐊᓱᒍᒫᕐᐳᑎᑦ, ᐅᓄᕐᑐᓄᑦ ᓄᑕᕋᖅ ᐃᕐᓂᐊᖑᒃᐸᑦ ᖁᕕᐊᓲᑕᐅᔪᒫᕐᐳᖅ; 15#ᒨᓯᓯ ᓯᑕᒪᖏᑦ 6:3.ᐊᔪᖏᑦᑐᕐᔪᐊᖑᔪᒫᕐᒪᑦ ᐊᑕᓂᐅᑉ ᓵᖓᓂ, ᐃᒥᖃᑦᑕᕈᒫᓐᖏᓚᖅ ᐅᐂᓂᒥᒃ ᐃᒥᐊᓗᖕᒥᒡᓘᓐᓃᑦ ᓴᓐᖏᔪᒥᒃ, ᐊᓈᓇᖓᑕ ᐃᒡᓕᐊᖓᓃᓪᓗᓂ ᓱᓕ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᔪᒫᕐᐳᖅ. 16ᐅᑎᕐᑎᑦᓯᔪᒫᕐᐳᖅ ᐃᓴᕆᐊᓕᒥᐅᓂᒃ ᐊᒥᓱᓂᒃ ᐊᑕᓂᕐᒧᑦ ᑖᒃᑯᐊ ᒎᑎᖓᓐᓄᑦ. 17#ᒪᓚᑬ 4:5,6.ᐊᓂᕐᓂᖃᕐᓗᓂ ᐱᔪᓐᓇᕐᓂᖃᕐᓗᓂᓗ ᓇᓚᐅᑦᑍᔪᑐᑦ ᐃᓔᑦᔭᑐᑦ, ᐊᑖᑕᐅᔪᑦ ᐃᓱᒪᒋᔭᖃᑦᓯᐊᓕᕐᑎᑦᓱᒫᕐᐰᑦ ᕿᑐᕐᖓᒥᖕᓂᒃ; ᓈᓚᖏᑦᑐᓪᓗ ᐅᑎᕐᑎᑦᓱᒫᕐᓗᒋᑦ ᓯᓚᑐᔪᒥᒃ ᐃᓱᒪᖃᓕᕐᑎᓪᓗᒋᑦ; ᐊᑕᓂᐅᑉ ᐃᓄᖁᑎᖏᑦ ᐅᐸᓗᖕᒊᔭᕐᓗᒋᑦ ᑖᑦᓱᒧᖓ.”
18ᓴᑲᕅᐊ ᐅᖃᕐᐳᖅ ᐂᖏᓕᒧᑦ, “ᖃᓄᕐᓕ ᑕᒪᓐᓇ ᖃᐅᔨᒪᔪᒫᕐᐸᕌ? ᐃᑦᑑᓕᕋᒪ, ᓄᓕᐊᕋᓗ ᓂᖏᐅᖑᓕᕆᓪᓗᓂ.”
19 #
ᑖᓂᐊᓕ 8:16; 9:21. ᐂᖏᓕᐅᑉ ᑭᐅᕚ, “ᒊᐳᕆᐅᓕᐅᕗᖓ, ᒎᑎᐅᑉ ᓇᔪᒐᖓᓂᓐᖔᕐᐳᖓ; ᑖᑦᓱᒪ ᑎᓕᕚᖓ ᐃᓕᖕᓄᑦ ᐅᖃᕆᐊᕐᑐᖁᓪᓗᖓ; ᑕᒪᑐᒥᖓ ᑐᓴᕈᒥᓇᕐᑐᒥᒃ ᐅᖃᐅᑦᔭᐅᖁᖕᒪᑎᑦ. 20ᑕᑯᒋᑦ, ᐅᖃᕈᓐᓁᓪᓕᓂᐊᕐᐳᑎᑦ ᓂᓪᓕᕈᓐᓁᓪᓕᓗᑎᓪᓗ ᐅᓪᓗᖅ ᑍᓐᓇ ᐅᖃᐅᓯᕆᔭᕋ ᓇᓪᓕᐅᑎᓚᐅᖅᑳᕐᑎᓐᓇᒍ, ᐅᖃᐅᓯᒃᑲ ᐅᒃᐱᕆᖏᓐᓇᕕᒋᑦ, ᓇᓪᓕᐅᑎᕝᕕᓴᖓ ᑎᑭᑉᐸᑦ ᓇᓚᐅᑦᓯᓛᕐᐳᑦ.”
21ᐃᓄᐃᑦ ᐅᑕᖅᑭᓚᐅᕐᐳᑦ ᓴᑲᕅᐊᒥᒃ, ᐃᓱᒪᓪᓗᑎᒃ ᓱᖕᒪᑦ ᐊᑯᓂᐅᓗᐊᓕᕐᒪᖔᑦ. 22ᐊᓂᒐᒥ, ᐃᓄᖕᓄᑦ ᐅᖃᕈᓐᓇᓚᐅᓐᖏᓚᖅ, ᐃᓄᐃᑦ ᖃᐅᔨᓪᓗᑎᒃ ᑕᑯᑎᑕᐅᔪᕕᓂᐅᓂᖓᓂᒃ ᑐᒃᓯᐊᕐᕕᒃᔪᐊᕐᒦᑎᓪᓗᒍ; ᓴᑲᕅᐊ ᐅᖃᕈᓐᓇᖏᓐᓇᒥ ᐃᓄᐃᑦ ᐆᒃᑐᕋᕐᕕᒋᕔᑦ ᐊᒡᒐᖕᒥᓄᑦ.
23ᓴᑲᕅᐊᐅᑉ ᐱᓇᓱᐊᕐᓂᖓ ᑐᒃᓯᐊᕐᕕᒡᔪᐊᕐᒥ ᐃᓱᓕᒻᒪᑦ, ᐃᒡᓗᒥᓄᑦ ᐊᖏᕐᕋᕐᐳᖅ. 24ᑭᖑᓂᖓᒍᑦ ᓄᓕᐊᖓ ᐃᓕᓴᐱ ᓄᑕᕋᒃᓴᖃᓕᕐᐳᖅ, ᐃᒡᓗᒥᓂᑦ ᐊᓂᓚᐅᓐᖏᓚᖅ ᑕᖅᑭᓂᒃ ᑕᓪᓕᒪᓂᒃ, ᐅᖃᕐᓗᓂ, 25“ᑕᕝᕙ ᐊᑕᓂᐅᑉ ᐃᑲᔪᕐᐹᖓ ᑕᑯᓐᓇᓕᕋᒥᖓ, ᕿᑐᕐᖓᕐᑖᕈᓐᓇᖏᓐᓂᕋ ᑲᓐᖑᓲᑎᒋᔭᕋ ᐃᓄᖕᓄᑦ ᐲᕐᐹ.”
ᐂᖏᓕᐅᑉ ᐅᖃᕆᐊᕐᑐᕐᓂᖓ ᒥᐊᕆᒧᑦ ᐃᕐᓂᕐᑖᓛᕐᓂᖓᓂᒃ
26ᑕᖅᑮᑦ ᐱᖓᓲᔪᕐᑐᑦ ᐊᓂᒍᕐᑎᓪᓗᒋᑦ ᒎᑎᐅᑉ ᐂᖏᓕᖁᑎᓂ ᒊᐳᕆᐅᓪ ᑎᓕᕚ ᓄᓇᓕᖕᓄᑦ ᓈᓴᕇᑎᒥᒃ ᐊᑎᓕᖕᒧᑦ ᒐᓕᓕᐊᒦᑦᑐᒧᑦ, 27#ᒫᑎᐅᓯ 1:18.ᐊᕐᓇᒧᑦ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᒧᑦ ᒥᐊᕆᒥᒃ ᐊᑎᓕᖕᒧᑦ; ᐊᖏᕈᑕᐅᓯᒪᔪᒧᑦ ᐅᐃᒃᓴᖃᕐᖢᓂ ᔫᓯᐱᒥᒃ ᐊᑎᓕᖕᒥᒃ, ᑍᕕᑎᐅᑉ ᑭᖑᕚᖓᓄᑦ. 28ᐂᖏᓕᐅᑉ ᒥᐊᕆ ᓴᖅᑭᕝᕕᒋᕚ ᐅᖃᐅᑎᓪᓗᒍ, “ᖁᕕᐊᓱᓕᕆᑦ, ᒎᑎᒧᑦ ᖁᕕᐊᒋᔭᐅᒐᕕᑦ, ᐊᑕᓂᐅᑉ ᐃᓚᒋᕚᑎᑦ!”
29ᒥᐊᕆᓕ ᖁᐊᕐᓵᕐᐳᖅ ᐅᖃᐅᓯᕆᔭᖏᓐᓄᑦ, ᐃᓱᒪᓪᓗᓂ ᖃᓄᖅ ᓂᓪᓕᐅᑦᔭᐅᓂᖓ ᑐᑭᖃᕐᒪᖔᑦ. 30ᐂᖏᓕᐅᑉ ᐅᖃᐅᑎᕚ, “ᒥᐊᕆ ᑲᑉᐱᐊᓱᖏᓪᓗᑎᑦ, ᒎᑎᐅᑉ ᖁᕕᐊᒋᖕᒪᑎᑦ. 31#ᒫᑎᐅᓯ 1:21.ᑕᑯᒋᑦ, ᓄᑕᕋᒃᓴᖃᓕᕐᓂᐊᕐᐳᑎᑦ ᐃᕐᓂᕐᑖᕈᒫᕐᓗᑎᓪᓗ, ᑖᓐᓇ ᔩᓱᓯᒥᒃ ᐊᑎᕐᑖᕐᑎᓛᕐᐸᑦ. 32#ᓴᒧᐃᓕ ᐂᑉᐸᖏᑦ 7:12,13,16; ᐂᓮᐊᓯ 9:7.ᑖᓐᓇ ᐊᖏᓂᕐᐹᖑᔪᒫᕐᐳᖅ, ᑍᔭᐅᔪᒫᕐᓗᓂᓗ ᖁᓪᓕᕐᐸᐅᔫᑉ ᐃᕐᓂᖓᓂᒃ; ᐊᑕᓂᐅᑉ ᒎᑎᐅᑉ ᐊᖓᔪᖅᑳᕐᔪᐊᓐᖑᕐᑎᑦᓱᒫᕐᐹ ᓯᕗᓕᕕᓂᖓᑐᑦ ᑍᕕᑎᑐᑦ. 33ᐊᖓᔪᖅᑳᕐᔪᐊᖑᔪᒫᕐᐳᖅ ᔧᑰᑉ ᑭᖑᕚᖏᓐᓂᑦ ᐃᓱᖃᖏᑦᑐᒧᑦ; ᐊᑕᓂᐅᓂᖓ ᐃᓱᖃᕈᒫᓐᖏᓚᖅ.”
34ᒥᐊᕆᐅᑉ ᐂᖏᓕ ᐅᖃᐅᑎᕚ, “ᖃᓄᖅ ᑕᒪᓐᓇ ᐱᓛᕐᐸ, ᐅᐃᖃᖏᓐᓇᒪ?”
35ᐂᖏᓕᐅᑉ ᐅᖃᐅᑎᕚ, “ᐊᓂᕐᓂᐅᑉ ᐃᑦᔪᕐᓁᑦᑑᑉ ᑎᑭᕝᕕᒋᓂᐊᕐᐹᑎᑦ, ᖁᑦᓯᖕᓂᕐᐸᐅᔫᓪᓗ ᐱᔪᓐᓇᕐᓂᖓᑕ ᐅᓕᖕᓂᐊᕐᐹᑎᑦ; ᑍᒤᒻᒪᑦ ᕿᑐᕐᖓᕐᑖᕆᓛᕐᑍᑦ ᐃᑦᔪᕐᓁᓐᓂᕋᕐᑕᐅᔪᒫᕐᐳᖅ, ᒎᑎᐅᑉ ᐃᕐᓂᖓᓂᒃ ᑍᔭᐅᓗᓂ. 36ᑕᑯᒋᑦ, ᐃᓚᒋᔧᑦ ᐃᓕᓴᐱ ᐃᓄᑐᖃᐅᓕᕋᓗᐊᕐᓗᓂ ᐃᕐᓂᕐᑖᕈᒫᓕᕐᐳᖅ; ᑕᖅᑭᓂᒃ ᐱᖓᓲᔪᕐᑐᓂᒃ ᓄᑕᕋᒃᓴᖃᓕᕐᐳᖅ ᑖᓐᓇ ᕿᑐᕐᖏᓱᐃᑦᑑᓂᕋᕐᑕᐅᔪᖅ. 37#ᒨᓯᓯ ᓯᕗᓪᓖᑦ 18:14.ᒎᑎᒥ ᐊᔪᕐᓇᕐᑐᖃᖏᒻᒪᑦ.”
38ᒥᐊᕆ ᐅᖃᕐᐳᖅ, “ᑕᑯᒋᑦ, ᐊᑕᓂᐅᑉ ᐱᔨᒋᕚᖓ; ᐅᖃᐅᓯᕆᔧᑦ ᒪᓕᒡᓗᒍ ᑍᒤᓕᕐᓚᖓ.” ᐂᖏᓕᐅᑉ ᑕᕝᕙ ᕿᒪᒃᐹ.
ᒥᐊᕆᐅᑉ ᐳᓛᕆᐊᕐᓂᖓ ᐃᓕᓴᐱᒧᑦ
39ᐅᓪᓗᐃᑦ ᑖᒃᑯᐊ ᑭᖑᓂᑦᓯᐊᖓᑦᑎᒍᑦ ᒥᐊᕆ ᐸᕐᓇᓕᕐᐳᖅ ᑐᐊᕕᕐᓗᓂ ᐂᓕᕐᐳᖅ ᓄᓇᒧᑦ ᖃᖅᑲᓕᖕᒧᑦ, ᔫᑕᐅᑉ ᐃᒡᓗᒐᓴᖏᓐᓄᑦ, 40ᑎᑭᓐᓇᒥ ᓴᑲᕅᐊᒃᑯᑦ ᐃᒡᓗᖓᓐᓄᐊᕐᐳᖅ ᐃᓕᓴᐱᓗ ᓂᓪᓕᐅᑎᕚ. 41ᐃᓕᓴᐱᐅᑉ ᒥᐊᕆᐅᑉ ᓂᐱᖓ ᑐᓴᕋᒥᐅᒃ, ᓄᑕᕋᒃᓴᖓ ᓈᖓᓂ ᐊᐅᓚᑦᔭᒃᐳᖅ; ᐃᓕᓴᐱᓗ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᕗᖅ. 42ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᑐᓱᓐᓇᕐᓂᕐᐹᖑᔪᑎᑦ ᐊᕐᓇᓕᒫᓂᑦ ᓄᓇᒦᑦᑐᓂᑦ, ᓄᑕᕋᒃᓮᑦ ᐃᒡᓕᐊᕐᓃᑦᑐᖅ ᑐᓱᓐᓇᕐᓂᕐᐸᐅᒋᕗᖅ. 43ᑕᒪᓐᓇ ᐱᐅᔪᕐᔪᐊᖅ ᐅᕙᓐᓄᑦ ᐅᒃᐱᕐᓇᑦᓯᐊᖏᒻᒪᕆᒃᐳᖅ, ᐊᑕᓂᕐᒪ ᐊᓈᓇᖓᑕ ᐅᐸᖕᒪᖓ? 44ᑕᑯᒋᑦ, ᓂᐲᑦ ᑐᓴᕋᒃᑯ, ᓄᑕᕋᒃᓴᕋ ᐃᒡᓕᐊᓐᓂ ᖁᕕᐊᓱᖕᓂᕐᒧᑦ ᐊᐅᓚᓕᕐᐳᖅ. 45ᖁᕕᐊᓱᖕᓃᑦ ᑐᓱᓐᓇᒻᒪᕆᒃᐳᖅ ᐅᒃᐱᕈᓱᒃᑲᕕᑦ ᐊᑕᓂᕐᒧᑦ ᐅᖃᐅᑦᔭᐅᓯᒪᓂᕐᓂᒃ ᓇᓪᓚᐅᑦᓯᔪᒫᕐᑐᒥᒃ.”
ᒥᐊᕆᐅᑉ ᓂᕐᑐᐃᓪᓗᓂ ᐃᓐᖏᕐᓂᖓ
46ᒥᐊᕆ ᐅᖃᕐᐳᖅ,
“ᑕᕐᓂᕐᒪ ᐊᑕᓂᖅ ᐊᖏᔪᕈᕐᑎᑉᐹ;
47ᐊᓂᕐᓂᕐᒪ ᒎᑎ ᐱᐅᓕᔨᒐ ᖁᕕᐊᓲᑎᒋᕚ,
48 #
ᓴᒧᐃᓕ ᓯᕗᓪᓖᑦ 1:11. ᑍᒫᒃ ᐱᔭᐅᔪᒃᓴᐅᑎᓐᓇᖓ ᐱᑎᒻᒪᖓ,
ᑕᑯᒋᑦ, ᒫᓐᓇᒥᑦ ᐱᒋᐊᕐᓗᒍ ᖁᕕᐊᓱᖕᓂᕋ ᐃᓄᖕᓄᑦ ᐅᖃᐅᓯᐅᕙᒍᒫᓕᕐᐳᖅ;
49ᐊᖏᔪᕐᔪᐊᒥᒃ ᐱᑦᓯᐊᕐᕕᐅᒐᒪ ᒎᑎᒧᑦ ᐊᔪᒐᖃᖏᑦᑐᒧᑦ,
ᐊᑎᖓ ᐃᑦᔪᕐᓁᑦᑑᕗᖅ.
50ᓂᑲᒍᓱᒃᐳᖅ ᓯᕘᕋᒋᔨᒥᓄᑦ,
ᑭᖑᕚᕇᓂᑦ ᑭᖑᕚᕇᓄᑦ.
51ᑕᓕᕐᒥᓄᑦ ᓲᖑᔪᒧᑦ ᐱᔪᓐᓇᕐᓂᓂ ᓴᖅᑭᑎᓚᐅᕐᐹ,
ᐃᓱᒪᒥᒍᑦ ᐱᐅᔪᕆᔪᑦ ᓯᐊᒻᒪᕐᑎᑉᐰᑦ.
52 #
ᔫᐱ 5:11; 12:19. ᐊᖓᔪᖅᑳᕐᔪᐊᑦ ᐱᔪᓐᓇᕐᓂᖏᓐᓂᑦ ᐅᕐᕈᑎᑉᐰᑦ,
ᐱᔪᓐᓇᕐᓂᖃᖏᑦᑐᓪᓗ ᓂᑯᕕᑎᑉᐰᑦ.
53ᑳᒃᑐᑦ ᓂᕿᒃᓴᖏᓐᓂᒃ ᑐᓂᓯᕕᒋᕔᑦ ᐱᐅᔪᓂᒃ,
ᐊᔪᕐᓴᖏᑦᑐᑦ ᓱᓇᑖᕐᑎᓐᓇᒋᑦ ᐊᐅᓪᓚᕐᑎᑉᐰᑦ.
54ᓂᑲᒍᓱᖕᓂᓂ ᓯᕗᓪᓕᕕᓂᑦᑎᓐᓄᑦ ᑲᔪᓯᑎᑉᐹ,
ᐃᓄᖁᑎᓂᓗ ᐃᓴᕆᐊᓕᒥᐅᑦ ᐃᑲᔪᕐᐰᑦ.
55 #
ᒨᓯᓯ ᓯᕗᓪᓖᑦ 17:7. #
ᓴᒧᐃᓕ ᓯᕗᓪᓖᑦ 2:1-10. ᐃᖅᑲᐅᒪᒐᒥ ᓂᑲᒍᓱᖕᓂᕐᒥᓂᒃ ᐂᑉᕋᕼᐋᒻᒧᑦ,
ᑭᖑᕚᓕᒫᖏᓐᓄᓪᓗ ᐃᓱᖃᖏᑦᑐᒧᑦ.”
56ᒥᐊᕆ ᓇᔫᑎᓚᐅᕐᐳᖅ ᐃᓕᓴᐱᒥ ᑕᖅᑭᓂᒃ ᐱᖓᓱᓂᒃ, ᑭᖑᓂᖓᒍᑦ ᐊᖏᕐᕋᕐᐳᖅ.
ᔪᐊᓇᓯ ᐹᑉᑎᑎᕆᔨᐅᑉ ᐃᕐᓂᐊᖑᓂᖓ
57ᐃᓕᓴᐱᐅᑉ ᐃᕐᓂᕕᒃᓴᖓ ᓇᓪᓕᐅᑎᖕᒪᑦ, ᐃᕐᓂᕐᑖᕐᐳᖅ. 58ᓄᓇᖅᑲᑎᖏᑕ ᐃᓚᒋᔭᖏᑕᓗ ᑐᓴᕋᒥᑦᔪᒃ ᐊᑕᓂᐅᑉ ᓂᑲᒍᓱᖕᓂᕐᒥᓂᒃ ᐊᖏᔪᒥᒃ ᓴᖅᑭᑎᑦᓯᕕᒋᖕᒪᒍ, ᖁᕕᐊᓱᖃᑎᒋᕚᑦ.
59 #
ᒨᓯᓯ ᐱᖓᔪᖏᑦ 12:3. ᓄᑕᕋᑯᓗᒃ ᐅᓪᓗᖃᓕᕐᒪᑦ 8ᓂᒃ ᑭᐱᔭᐅᔭᕐᑐᕐᐳᖅ; ᐊᑎᖃᖁᔭᐅᓕᕐᓗᓂ ᐊᑖᑕᖓᑐᑦ ᓴᑲᕅᐊᒥᒃ. 60ᐊᓈᓇᖓᓕ ᐃᓕᓴᐱ ᐅᖃᕐᐳᖅ, “ᑍᒫᒃ ᐊᑎᖃᖁᓐᖏᓚᕋ, ᔪᐊᓇᓯᒥᒡᓕ ᐊᑎᖃᕆᐊᖃᕐᐳᖅ.”
61ᑖᒃᑯᐊ ᐃᓕᓴᐱᒧᑦ ᐅᖃᕐᐳᑦ, “ᑍᒫᒡᓕ ᐊᑎᓕᖕᒥᒃ ᐃᓚᖃᖏᑦᑐᑎᑦ.” 62ᐊᑖᑕᖓ ᓴᑲᕅᐊᓯ ᐆᒃᑐᕋᕐᕕᒋᕚᑦ, ᖃᓄᖅ ᓄᑕᕋᑯᓗᒃ ᐊᑎᖃᖁᖕᒪᖔᒍ.
63ᓴᑲᕅᐊᓯ ᑎᑎᕋᕐᕕᒋᓂᐊᕐᑕᒥᓂᒃ ᕾᑕᐅᖁᔨᕗᖅ, ᑎᑎᕋᕐᓗᓂ, “ᔪᐊᓇᓯᒥᒃ ᐊᑎᖃᕐᐳᖅ.” ᑕᕝᕙᓃᑦᑐᓕᒫᑦ ᑲᒪᔪᐊᓘᕗᑦ. 64ᑕᕝᕔᓐᓇᖅ ᓴᑲᕅᐊᓯ ᐅᖃᕈᓐᓇᕐᓯᒋᕗᖅ, ᒎᑎ ᓂᕐᑐᕐᓗᒍ ᐅᖃᓪᓚᓕᕐᐳᖅ. 65ᓄᓇᖃᑎᓕᒫᖏᓪᓗ ᖁᐊᕐᓵᖓᓕᕐᐳᑦ, ᑕᒪᓐᓇ ᐅᖃᐅᓯᐅᓕᕐᐳᖅ ᔫᑎᐊᒥ ᖃᖅᑲᓂ ᓄᓇᖃᕐᑐᓕᒫᓄᑦ. 66ᑐᓴᕐᑐᓕᒫᑦ ᐃᓱᒪᒃᓴᕐᓯᐅᓕᕐᐳᑦ, ᐅᖃᕐᓗᑎᒃ, “ᖃᓄᐃᓕᐅᕐᑎᒃᓴᐅᒑᒦᓐᓇ ᓄᑕᕋᑯᓗᒃ?” ᓇᓗᓇᓚᐅᖏᒻᒪᑦ ᐊᑕᓂᐅᑉ ᐱᔪᓐᓇᕐᓂᖓᑕ ᓇᔪᕐᒪᒍ.
ᓴᑲᕅᐊᓯᐅᑉ ᒎᑎᒥᑦ ᐅᖃᕐᑎᑕᐅᓂᖓ
67ᔪᐊᓇᓯᐅᑉ ᐊᑖᑕᖓ ᓴᑲᕅᐊ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᒐᒥ, ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᐅᖃᓕᕐᐳᖅ:
68“ᐊᑕᓂᖅ ᓮᒻᒪᕐᑎᑕᐅᓕ, ᐃᓴᕆᐊᓕᒥᐅᑦ ᒎᑎᖓᑦ,
ᐃᓄᖁᑎᓂ ᐊᖅᑲᕐᕕᒋᓪᓗᒋᑦ ᓴᐳᑎᔭᕐᑐᕐᒪᒋᑦ,
69ᐱᐅᓕᔨᕐᔪᐊᒥᒃ ᑐᓂᓯᕕᒋᖕᒪᑎᒍᑦ,
ᐱᔨᒥ ᑍᕕᑎᐅᑉ ᑭᖑᕚᖏᓐᓂ.
70ᐅᖃᕐᓯᒪᒐᒥ ᓇᓚᐅᑦᑍᔪᖁᑎᒥᒍᑦ ᐃᑦᔪᕐᓁᑦᑐᑎᒍᑦ,
71ᓴᐳᑎᔪᒪᓪᓗᑕ ᐊᑭᕋᕐᑐᕐᑎᑦᑎᓐᓂᑦ,
ᖀᒥᒋᔨᑦᑕᓗ ᐊᒡᒐᖏᓐᓂᑦ.
72ᓂᑲᒍᓱᖕᓂᓂ ᓴᖅᑭᑎᑦᓱᒪᓪᓗᒍ ᓯᕗᓕᕕᓂᑦᑎᓐᓄᑦ,
ᐊᖏᕐᓯᒪᓂᓂᓗ ᐃᑦᔪᕐᓁᑦᑐᖅ ᐃᖅᑲᐅᒪᓪᓗᒍ.
73ᐂᑉᕋᕼᐋᒻᒧᑦ ᓯᕗᓕᕕᓂᑦᑎᓐᓄᑦ ᐅᖃᕕᒃᓯᒪᒐᒥ,
74ᓴᐳᑎᔪᒪᓪᓗᑕ ᐊᑭᕋᕐᑐᕐᑎᑦᑕ ᐊᒡᒐᖏᓐᓂᑦ,
ᓯᕘᕋᒋᔭᖃᖏᓪᓗᑕ ᐱᔨᑦᓯᑦᓯᐊᕈᓐᓇᖁᓪᓗᑕ ᒎᑎᒥᒃ,
75ᐃᑦᔪᕐᓁᓐᓂᕐᒥ ᓈᒻᒪᒋᔭᐅᓂᕐᒥᓗ
ᑖᑦᓱᒪ ᓵᖓᓂ ᐃᓅᓯᑦᑕ ᐃᓱᐊᓄᑦ.
76 #
ᒪᓚᑬ 3:1. ᐃᓛᒃ ᐃᕝᕕᑦ ᓄᑕᕋᖅ,
ᑍᔭᐅᔪᒫᕐᐳᑎᑦ ᖁᑦᓯᖕᓂᕐᐸᑉ ᓇᓚᐅᑍᔪᖁᑎᖓᓂᒃ;
ᐊᑕᓂᐅᑉ ᓯᕗᓕᕆᔪᒫᕐᒪᑎᑦ ᐊᖅᑯᑎᒃᓴᖓᓂᒃ ᐋᖅᑭᒃᓱᐃᓗᑎᑦ,
77ᖃᐅᔨᑎᑦᓯᖁᓪᓗᑎᑦ ᐃᓄᖁᑎᖏᓐᓂᒃ ᐱᐅᓕᔭᐅᕕᒃᓴᒥᒃ,
ᐊᔪᕐᓂᖏᑕ ᐃᓱᒪᒋᔪᓐᓁᕐᑕᐅᓂᖏᑎᒍᑦ.
78ᒎᑎᑦᑕ ᓂᑲᒍᓱᖕᓂᕐᔪᐊᖓᒍᑦ,
ᐱᐅᓕᔭᐅᓂᖅ ᖃᐅᓕᕐᑐᑐᑦ ᐅᓪᓛᑐᑦ ᓴᖅᑭᑎᑦᓱᒫᕐᐹ ᐅᕙᑦᑎᓐᓄᑦ.
79 #
ᐂᓮᐊᓯ 9:2. ᖃᐅᒻᒪᒃᑎᓪᓗᒋᑦ ᑖᕐᑐᒥ ᐃᓅᔪᑦ ᑐᖂᓪᓗ ᑕᕐᕋᓕᓂᖓᓃᑦᑐᑦ,
ᐃᑎᒐᕗᓪᓗ ᑕᓯᐅᕐᓗᒋᑦ ᐊᖅᑯᒻᒧᑦ ᓮᒻᒪᕐᑎᑕᐅᓇᕐᑐᒧᑦ.”
80ᓄᑕᕋᑯᓗᒃ ᐱᕈᕐᐸᓪᓕᐊᓕᕐᐳᖅ ᑎᒥᒥᒍᑦ ᐊᓂᕐᓂᒃᑯᓪᓗ ᓴᓐᖏᔫᓕᕐᓗᓂ, ᐃᓄᖃᖏᑦᑐᒥ ᐃᓂᖃᓚᐅᕐᐳᖅ ᐅᓪᓗᖅ ᐃᓴᕆᐊᓕᒥᐅᓄᑦ ᐱᓇᓱᐊᕐᕕᒋᓂᐊᕐᑕᓂ ᑎᑭᓪᓗᒍ.
Currently Selected:
ᓘᑲᓯᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
