ᔮᓱᐊᑉ ᐊᒡᓚᖏᑦ 23
23
ᔮᓱᐊᑉ ᑕᕝᕙᐅᕗᑏᓕᕐᓗᓂ ᐅᖃᓪᓚᖕᓂᖓ
1ᑭᖑᕐᖓᒍᑦ ᐊᑯᓂᑲᓪᓚᒃ, ᐊᑕᓂᐅᑉ ᐃᓴᕆᐊᓕᒥᐅᑦ ᓴᐳᑎᓯᒪᓚᐅᕐᐰᑦ ᐊᑭᕋᖏᓐᓂᑦ ᖃᓂᒋᔮᓃᑦᑐᓂᑦ, ᑍᑦᓱᒪᓂᓗ ᔮᓱᐊ ᐃᓄᑐᖃᐅᓕᓚᐅᕐᐳᖅ, 2ᑍᒤᒻᒪᑦ ᔮᓱᐊᑉ ᐃᓴᕆᐊᓕᒥᐅᓕᒫᑦ ᕾᖁᕔᑦ, ᐊᖓᔪᖅᑳᖏᑦ, ᓯᕗᓕᕐᑎᖏᓪᓗ, ᐃᓱᒪᓕᐅᕐᑎᖏᑦ, ᐱᓇᓱᐊᕐᑎᐅᔪᓪᓗ ᐃᓄᖕᓄᑦ, ᐅᖃᐅᑎᓪᓗᒋᓪᓗ, “ᐃᓄᑐᖃᐅᓕᕋᒪ ᒫᓐᓇ; 3ᑕᑯᓯᒪᕗᓯ ᐊᑕᓂᐅᑉ ᒎᑎᑦᓯ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ ᐃᓅᖃᑎᒌᒡᔪᐊᓕᒫᓄᑦ ᐃᓕᑦᓯ ᐱᓪᓗᓯ, ᐊᑕᓂᖅ ᒎᑎᓯ ᐅᓇᑕᕈᑦᔨᓚᐅᕐᒪᑦ ᐃᓕᑦᓯᓐᓂᒃ. 4ᑕᑯᒋᑦ, ᓇᓚᐅᑦᑖᕈᑎᑎᒍᑦ ᑐᓂᓚᐅᕐᐸᑦᓯ ᑭᖑᕐᖑᑦᔨᖁᓪᓗᓯ ᑭᖑᕚᓯᓗ ᓄᓇᑖᖁᓪᓗᓯ ᐃᓅᖃᑎᒋᒡᔪᐊᑦ ᓄᓇᖃᕋᓗᐊᕐᑎᓪᓗᒋᑦ ᓱᓕ, ᑖᒃᑯᐊᓗ ᐅᓇᑕᕐᓂᒃᑯᑦ ᐃᓅᖃᑎᒌᒡᔪᐊᓂᑦ ᓄᓇᑖᕆᓚᐅᕐᑕᕗᑦ, ᔪᐊᕐᑕᓂᐅᑉ ᑰᖓᓂᑦ ᐱᒋᐊᕐᓗᒍ ᒥᑎᑎᕆᓂᐊᑉ ᑕᕆᐅᖓ ᓯᕿᓂᐅᑉ ᓂᐱᕕᐊᓃᑦᑐᖅ ᑎᑭᓪᓗᒍ. 5ᐊᑕᓂᐅᑉ ᒎᑎᑦᓯ ᐃᓕᑦᓯᓐᓂᑦ ᐊᔭᐅᕈᒫᕐᐰᑦ, ᓯᖏᓪᓗᒋᓪᓗ ᐊᑯᓐᓇᑦᓯᓐᓂᑦ; ᓄᓇᖓᓪᓗ ᓄᓇᑖᕆᔪᒫᕐᐸᓯ, ᐊᑕᓂᐅᑉ ᒎᑎᑦᓯ ᑍᒫᒃ ᐊᖏᕈᑎᒋᓚᐅᕐᒪᒍ ᐃᓕᑦᓯᓐᓄᑦ. 6ᑍᒤᒻᒪᑦ ᑲᒪᑦᓯᐊᕐᑐᒃᓴᐅᕗᓯ ᓈᓚᑦᓯᐊᕐᓗᒋᓪᓗ ᐱᓇᓱᐊᕐᓗᒋᑦ ᑎᑎᕋᕐᑕᐅᓯᒪᔪᓕᒫᑦ ᐊᒡᓚᖕᓂ ᒨᓯᓯᐅᑉ ᐱᖁᔭᖏᓐᓂ, ᓇᓪᓕᐊᓐᓄᓪᓘᓐᓃᑦ ᓴᖑᑦᑍᓕᒋᑦᓯ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ, 7ᐃᓅᖃᑎᒌᒡᔪᐊᓂᓗ ᐊᒥᐊᒃᑰᓯᒪᔪᓂᒃ ᐂᑉᐸᕐᑖᕐᑐᒃᓴᐅᓐᖏᓚᓯ, ᐅᖃᐅᓯᕆᑦᑍᓕᓗᒋᓪᓗ ᒎᑎᖏᑕ ᐊᑎᖏᑦ, ᐊᑎᖏᓪᓘᓐᓃᑦ ᐊᖏᕈᑎᒋᓂᐊᕋᓯᐅᒃ, ᒎᑎᖏᓪᓗ ᑐᒃᓯᐊᕐᕕᒋᔭᒃᓴᕆᓐᖏᓚᓯ, ᐹᒻᒪᒡᕕᒋᓂᐊᕐᓇᒋᓪᓗ. 8ᐊᑕᓂᕐᒥᒡᓕ ᒎᑎᑦᓯᓐᓂᒃ ᓴᒃᑯᐃᑦᑍᓕᔪᒃᓴᐅᕗᓯ, ᐅᓪᓗᒥᒧᑦ ᑎᑭᓪᓗᒍ ᑍᒤᓯᒪᒐᑦᓯ. 9ᐊᑕᓂᐅᑉ ᓯᖏᓚᐅᕐᒪᒋᑦ ᐃᓕᑦᓯ ᐱᓪᓗᓯ ᐱᓯᑎᐊᓗᐃᑦ ᓴᓐᖏᔪᐊᓗᐃᓪᓗ ᐃᓅᖃᑎᒌᒡᔪᐊᑦ; ᐃᓕᑦᓯᓗ ᑭᓇᒧᓪᓘᓐᓃᑦ ᓵᓚᐅᔪᓐᓇᓚᐅᓐᖏᓚᓯ ᐅᓪᓗᒥᒧᑦ ᑎᑭᓪᓗᒍ. 10#ᒨᓯᓯ ᑕᓪᓕᒪᖏᑦ 32:30; ᒨᓯᓯ ᑕᓪᓕᒪᖏᑦ 3:22.ᐃᓕᑦᓯᓗ ᐊᑕᐅᓯᐅᓪᓗᓯ ᐊᖑᑏᑦ 1,000ᓮᑦ ᐅᓇᑕᕈᓐᓇᓚᐅᕐᐸᓯ, ᐊᑕᓂᐅᑉ ᒎᑎᑦᓯ ᐅᓇᑕᕈᑎᖃᑦᑕᓚᐅᕐᒪᓯ, ᑍᒫᒃ ᐃᓕᑦᓯᓐᓄᑦ ᐊᖏᕈᑎᖃᕐᓯᒪᒐᒥ. 11ᑍᒤᒻᒪᑦ ᐃᓕᑦᓯᓐᓂᒃ ᑲᒪᒋᑦᓯᐊᕆᑦᓯ, ᐊᑕᓂᖅ ᒎᑎᓯ ᐅᖓᒋᓗᒍ. 12ᑲᔪᓯᑦᓯᐊᖏᒃᑯᑦᓯ, ᐃᓅᖃᑎᒌᑦᔪᐊᓄᓪᓗ ᐊᒥᐊᒃᑰᔪᓄᑦ ᐃᓚᓕᐅᑎᓗᓯ ᐂᑉᐸᕐᑖᕐᑐᕈᑦᓯ, ᐂᑉᐸᕐᑖᕐᕆᔭᐅᓗᓯ ᐃᓕᑦᓯᓗ ᐊᒥᐊᒃᑰᔪᓂᑦ ᐊᕐᓇᓂᒃ ᐂᑉᐸᕐᑖᕐᓂᐊᕈᑦᓯ, 13ᑕᕝᕙ ᖃᐅᔨᔪᒫᕐᐳᓯ ᖁᓚᕐᓇᖏᑦᑐᒥᒃ ᐊᑕᓂᐅᑉ ᒎᑎᑦᓯ ᓯᖏᑉᐸᓪᓕᐊᔪᓐᓃᕈᒫᕐᒪᒋᑦ ᐃᓅᖃᑎᒌᒡᔪᐊᑦ ᐃᓕᑦᓯᓐᓂᑦ; ᑖᒃᑯᐊᓕ ᐃᓕᑦᓯᓐᓄ ᑲᑉᐱᐊᓇᕐᓯᔪᒫᕐᐳᑦ ᓂᒐᕐᑎᑐᑦ ᒥᑭᒋᐊᑎᑐᓪᓗ, ᐋᓐᓂᐊᑎᑕᐅᓗᓯ ᐊᕙᑎᓕᒫᑦᓯᓐᓂᑦ, ᐃᑦᔨᓯᒪᐅᑎᑐᑦ ᑲᐳᕋᕐᓇᕐᑐᑎᑐᑦ, ᑕᒪᓐᓇᓗ ᑍᒤᒐᔭᕐᐳᖅ ᐊᓂᑎᑕᐅᖅᑳᕐᑎᓐᓇᓯ ᑕᒫᓐᖓᑦ ᓄᓇᑦᓯᐊᕙᖕᒥᑦ ᐊᑕᓂᐅᑉ ᒎᑎᑦᓯ ᑐᓂᓚᐅᕐᑕᖓᓂᒃ ᐃᓕᑦᓯᓐᓄᑦ.
14“ᑕᑯᒋᑦ, ᐅᓪᓗᒥ ᑐᖁᕕᒃᓴᕋ ᓇᓪᓕᐅᑎᓕᕐᐳᖅ, ᖃᐅᔨᒪᔪᐃᓐᓇᐅᕗᓯ ᐆᒻᒪᑎᑦᓯᒍᑦ ᑕᕐᓂᑦᓯᒍᓪᓗ, ᐊᑕᓂᐅᑉ ᒎᑎᑦᓯ ᑐᓂᓚᐅᕐᒪᓯ ᐱᐅᔪᓂᒃ ᐊᖏᕈᑎᒋᓚᐅᕐᑕᓕᒫᒥᓂᒃ ᐃᓕᑦᓯᓐᓄᑦ; ᐊᖏᕈᑎᒋᓚᐅᕐᑕᓕᒫᓂ ᐃᓕᑦᓯᓐᓄᑦ ᑲᔪᓯᑎᓚᐅᕐᒪᒋᑦ; ᐊᑕᐅᓯᕐᒥᒡᓘᓐᓃᑦ ᐊᑐᖏᑦᑑᑎᑦᓯᓚᐅᖏᓚᖅ. 15ᑍᒤᒻᒪᑦ ᑍᒫᒃ ᐊᖏᕈᑎᒥᓂᒃ ᑲᔪᓯᑎᑦᓯᓚᐅᕐᒪᑦ ᐃᓕᑦᓯᓐᓄᑦ ᐱᐅᔪᓂᒃ ᐱᓂᐊᕐᓂᕋᕐᑕᓕᒫᒥᓂᒃ, ᑍᒤᒻᒪᑦ ᐊᑕᓂᖅ ᑲᔪᓯᑎᑦᓯᒐᔭᕆᕗᖅ ᐃᓕᑦᓯᓐᓄᑦ ᐱᐅᖏᑦᑐᓂᒃ ᐋᓐᓂᕐᓇᕐᑐᓂᒡᓗ, ᓄᖒᑦᓯᓚᐅᖏᓐᓂᓕᒫᒥᓂ ᐃᓕᑦᓯᓐᓂᒃ ᑕᒫᓐᖓᑦ ᓄᓇᑦᓯᐊᕙᖕᒥᑦ ᐊᑕᓂᐅᑉ ᒎᑎᓯ ᑐᓂᓚᐅᕐᑕᖓᓂᒃ ᐃᓕᑦᓯᓐᓄᑦ. 16ᐊᖏᖃᑎᒌᒍᑎᒋᓚᐅᕐᑕᓯ ᑲᔪᓯᑎᖏᒃᑯᑦᓯᐅᒃ, ᐊᑕᓂᐅᑉ ᒎᑎᑦᓯ ᑎᓕᓯᑦᔪᑎᒋᓚᐅᕐᑕᖓ ᐃᓕᑦᓯᓐᓄᑦ, ᐱᔨᑦᓯᓕᕈᑦᓯᓗ ᒎᑎᐅᑉ ᐊᓯᐊᓂᒃ ᐹᒻᒪᒃᑎᕐᕕᒋᓕᕐᓗᒋᓪᓗ. ᑕᕝᕙ ᐊᑕᓂᐅᑉ ᓂᓐᖓᐅᓯᕐᒥᓄᑦ ᓱᒋᐊᕈᒫᕐᐹᓯ, ᐊᑯᓂᐅᖏᑦᑐᕐᓗ ᑕᒫᓃᑦᓱᓐᓁᕈᒫᕐᐳᓯ ᓄᓇᒥ ᐱᐅᔪᒥ ᑐᓂᓚᐅᕐᑕᖓᓂ ᐃᓕᑦᓯᓐᓄᑦ.”
Currently Selected:
ᔮᓱᐊᑉ ᐊᒡᓚᖏᑦ 23: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
