ᔮᓱᐊᑉ ᐊᒡᓚᖏᑦ 22
22
ᑭᖑᕚᕇᑦ ᓯᕿᓂᐅᑉ ᓄᐃᕕᐊᓂᑦ ᐱᓯᒪᔪᑦ ᐅᑎᕐᓂᖓᑦ ᓄᓇᒥᖕᓄᑦ
1ᑕᕝᕙ ᔮᓱᐊᑉ ᕉᐱᓂᐅᑉ, ᒑᑎᐅᓪᓗ ᑭᖑᕚᖏᑦ, ᒫᓇᓯᑯᓪᓗ ᑭᖑᕚᖏᑕ ᐊᕙᖏᑦ ᕾᖁᓪᓗᒋᑦ ᑲᑎᖁᕔᑦ. 2#ᒨᓯᓯ ᓯᑕᒪᖏᑦ 32:20-32; ᔮᓱᐊ 1:12-15.ᐅᖃᐅᑎᓪᓗᒋᓪᓗ, “ᒪᓕᓚᐅᕐᐳᓯ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᑕᓕᒫᖏᓐᓂᒃ, ᐅᕙᓐᓂᒡᓗ ᓇᓚᑦᓯᐊᖃᑦᑕᓚᐅᕐᓗᓯ ᑎᓕᓯᑦᔪᑎᒋᓚᐅᕐᑕᓕᒫᓐᓂᒃ. 3ᐊᑕᐅᓯᐊᕐᓗᓯᓘᓐᓃᑦ ᐃᓴᕆᐊᓕᒥᐅᖑᖃᑎᑦᓯᓐᓂᒃ ᕿᒤᓚᐅᓐᖏᓚᓯ ᑖᒃᑯᓇᓂ ᐅᓪᓗᒐᓵᓗᖕᓂ, ᐅᓪᓗᒥᒧᑦ ᑎᑭᓪᓗᒍ, ᑲᒪᑦᓯᐊᓚᐅᕐᐳᓯᓕ ᓈᓚᑦᓯᐊᕐᓗᓯᓗ ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᒋᓯᒪᔭᖏᓐᓂᒃ. 4ᒫᓐᓇᓕ ᐊᑕᓂᐅᑉ ᒎᑎᑦᓯ ᐊᖏᕈᑎᒋᓚᐅᕐᑕᓂ ᒪᓕᒡᓗᒍ, ᒥᕐᖑᐃᕐᓯᕐᕕᖕᒥᒃ ᑐᓂᓚᐅᕐᐰᑦ ᐃᓴᕆᐊᓕᒥᐅᖑᖃᑎᓯ; ᑕᒪᓐᓇ ᐊᖏᕈᑎᒋᓯᒪᖕᒪᒍ ᑖᒃᑯᓄᖓ; ᑍᒤᒻᒪᑦ, ᐊᖏᕐᕋᓕᕆᑦᓯ ᓄᓇᒧᑦ ᓇᖕᒥᓂᕐᑖᕆᓚᐅᕐᑕᑦᓯᓐᓄᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᐃᓕᑦᓯᓐᓄᑦ ᑐᓂᓚᐅᕐᑕᖓᓄᑦ ᓄᓇᒧᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑦᑐᒧᑦ. 5ᑲᒪᑦᓯᐊᕐᓗᓯ ᓈᓚᑦᓯᐊᕐᑐᒃᓴᐅᕗᓯ ᐱᖁᔭᓂᒃ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᑕᖓᓂ ᐃᓕᑦᓯᓐᓄᑦ, ᐊᑕᓂᖅ ᒎᑎᓯ ᐅᖓᒋᔭᒃᓴᕆᕙᓯ, ᐊᑐᕐᑕᐅᖁᔭᓕᒫᖏᓪᓗ ᐊᑐᕐᓗᒋᑦ, ᐱᖁᔭᖏᓪᓗ ᓈᓚᒡᓗᒋᑦ, ᑎᒍᒥᐊᕐᓗᒍ ᓴᒃᑯᑦᑍᓕᓗᒍᓗ, ᐱᔨᑦᓯᕐᓗᒍᓗ ᐆᒻᒪᑎᓕᒫᕐᓄᑦ ᑕᕐᓂᓕᒫᕐᓄᓪᓗ.” 6ᑕᕝᕙ ᔮᓱᐊᑉ ᓮᒻᒪᕐᑎᑉᐰᑦ, ᐊᐅᓪᓚᕐᑎᓪᓗᒋᓪᓗ; ᑖᒃᑯᐊᓗ ᐊᖏᕐᕋᒥᖕᓄᐊᕐᐳᑦ. 7ᒫᓇᓯᐅᓪᓕ ᑭᖑᕚᖏᑕ ᐊᕝᕙᖏᑦ ᒨᓯᓯᐅᑉ ᓄᓇᑖᕐᑎᓚᐅᕐᐰᑦ ᐹᓴᓂᒥᒃ; ᐊᕝᕙᖏᓪᓗ ᖃᑕᓐᖑᑎᖏᑦ ᔮᓱᐊᑉ ᑐᓂᓚᐅᕐᑕᖏᑦ ᓄᓇᑖᖁᓪᓗᒋᑦ ᔪᐊᕐᑕᓂᐅᑉ ᐊᑭᐊᓂ ᓯᕿᓂᐅᑉ ᓂᐱᕕᐊᓃᑦᑐᒥ. ᔮᓱᐊᓪᓗ ᓮᒻᒪᕐᑎᓪᓗᒋᑦ ᐊᖏᕐᕋᖁᕔᑦ, 8ᐅᖃᐅᑎᓪᓗᒋᓪᓗ, “ᑐᐱᑦᓯᓐᓄᑦ ᐊᖏᕐᕋᕐᑐᒃᓴᐅᕗᓯ ᐊᔪᕐᓴᖏᓪᓗᓯ, ᐆᒪᔪᖁᑎᖃᑦᓯᐊᕐᓗᓯ, ᓯᐅᓪᕕᕆᖃᕐᓗᓯ ᒎᓗᖃᕐᓗᓯ ᑲᓐᓄᔭᖃᕐᓗᓯ, ᓴᕕᕋᔭᖃᕐᓗᓯᓗ, ᐊᓐᓄᕌᖃᑦᓯᐊᕐᓗᓯᓗ ᐊᒥᒐᖏᑦᑐᓂᒃ; ᐃᓅᖃᑎᑦᓯᓐᓂᒃ ᐊᒡᒍᖃᑎᖃᑦᓯᐊᕐᑐᒃᓴᐅᕗᓯ ᐊᑭᕋᑦᓯᓐᓂᑦ ᐅᓇᑕᕐᓂᒃᑯᑦ ᐱᑕᕆᓚᐅᕐᑕᑦᓯᓐᓂᒃ.”
9ᑍᒤᒻᒪᑦ ᕉᐱᓂᐅᑉ, ᒑᑦᓗ ᑭᖑᕚᖏᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ ᐅᑎᕐᐳᑦ ᐊᖏᕐᕋᒥᖕᓄᑦ, ᐃᓴᕆᐊᓕᒥᐅᖑᖃᑎᑎᒃ ᕿᒪᒡᓗᒋᑦ ᓮᓗᐊᒧᑦ, ᑖᒃᑯᐊ ᑬᓇᓂᐅᑉ ᓄᓇᖓᓃᑦᑐᑦ, ᐊᐅᓪᓚᕐᐳᑦ ᓄᓇᒧᑦ ᒋᓕᐊᑎᒧᑦ, ᓇᖕᒥᓂᖅ ᓄᓇᖁᑎᑖᕆᓚᐅᕐᑕᒥᖕᓄᑦ ᐊᑕᓂᐅᑉ ᒨᓯᓯᒃᑯᑦ ᑎᓕᓯᓂᕆᓯᒪᔭᖓ ᒪᓕᒡᓗᒍ.
ᑐᓂᕐᕈᓯᕐᕕᒃ ᔪᐊᕐᑕᓂᐅᑉ ᑰᖓᑕ ᓴᓂᐊᓃᑦᑐᖅ
10ᕉᐱᓂᐅᑉ, ᒑᑦᓗ ᑭᖑᕚᖏᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ ᓄᓇᒧᑦ ᑬᓇᓂᒧᑦ ᑎᑭᓐᓇᒥᒃ, ᔪᐊᕐᑕᓂᐅᑉ ᑰᖓᑕ ᐊᑭᐊᓂ ᓴᓇᕗᑦ ᑐᓂᕐᕈᓯᕐᕕᖕᒥᒃ ᐊᖏᔪᐊᓗᖕᒥᒃ. 11ᐃᓴᕆᐊᓕᒥᐅᑦ ᐃᓄᖏᑦ ᐅᖃᐅᑦᔭᐅᕗᑦ, “ᑕᑯᒋᑦᓯ, ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑦ ᑐᓂᕐᕈᓯᕐᕕᖕᒥᒃ ᓴᓇᕗᑦ ᑬᓇᓂᒥ, ᐃᓴᕆᐊᓕᒥᐅᑦ ᐃᓄᖏᑕ ᓄᓇᖓᓂ ᔪᐊᕐᑕᓂᐅᑉ ᑰᖓᑕ ᑭᒡᓕᖓᓂ.” 12ᐃᓴᕆᐊᓕᒥᐅᓪᓗ ᐃᓄᖏᑕ ᑕᒪᓐᓇ ᑐᓴᕋᒥᑦᔪᒃ, ᓄᓇᖅᑲᑎᒌᓕᒫᑦ ᐃᓴᕆᐊᓕᒥᐅᑦ ᑲᑎᕗᑦ ᓮᓗᐊᒥ, ᐅᓇᑕᕆᐊᕈᒪᓪᓗᑎᒃ ᑖᒃᑯᓄᖓ.
13ᑕᕝᕙ ᐃᓴᕆᐊᓕᒥᐅᑉ ᐃᓄᖏᑕ ᑎᓕᕚᑦ ᐱᓂᕼᐋᔅ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓ, ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᓐᓄᑦ, ᒋᓕᐊᑎᒧᑦ. 14ᓯᕗᓕᕐᑏᑦ ᐊᖑᑏᑦ ᖁᓕᑦ ᒪᓕᒃᐳ ᕕᓂᕼᐊᔅᒥᒃ, ᐃᓚᒌᓂᑦ ᐊᑕᐅᓯᕐᒥᒃ ᐊᑐᓂᑦ ᐱᓯᒪᓪᓗᑎᒃ ᐊᖓᔪᖅᑳᖑᔪᑦ ᑭᖑᕚᕇᓂᑦ. 15ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑕ ᓄᓇᖓᓐᓄᐊᕋᒥᒃ ᒋᓕᐊᑎᒧᑦ, ᑖᒃᑯᓄᖓ ᐅᖃᕐᐳᑦ, 16#ᒨᓯᓯ ᑕᓪᓕᒪᖏᑦ 12:13,14.“ᐊᑕᓂᐅᑉ ᐃᓄᖁᑎᖏᑦ ᐅᖃᕐᐳᑦ, ‘ᓲᖕᒪᑦ ᐊᔪᕐᑐᓕᓂᐊᓗᖕᒥᒃ ᐱᓇᓱᐊᕐᐱᓯ ᐃᓴᕆᐊᓕᐅᑉ ᒎᑎᖓᓄ ᐊᑭᕋᕐᑐᓕᕐᓗᓯ? ᐊᑕᓂᕐᒥᒃ ᐊᑭᕋᕐᑐᓕᕐᐳᓯ ᑐᓂᕐᕈᓯᕐᕕᓕᐅᓂᕐᒧᑦ ᓇᖕᒥᓂᑦᓯᓐᓂᒃ ᒪᓕᒍᓐᓃᕋᑦᓯ ᑖᑦᓱᒥᖓ. 17#ᒨᓯᓯ ᓯᑕᒪᖏᑦ 25:1-9.ᐃᖅᑲᐅᒪᕕᓰ ᐊᔪᕐᑐᓕᓂᕆᓚᐅᕐᑕᑦᑎᓐᓂᒃ ᐱᐅᕆᒥ ᐊᑕᓂᐅᑉ ᐃᓄᖁᑎᓂ ᓱᒋᐊᓚᐅᕐᒪᒋᑦ ᖃᓂᒪᓇᕐᑐᒧᑦ ᓱᓕ ᐅᓪᓗᒥᒧᑦ ᑕᒪᓐᓇ ᐅᖁᒤᓪᓕᐅᕈᑎᒋᕙᕗᑦ, ᑍᓐᓇ ᐱᑦᔪᑎᒋᓪᓗᒍ ᐊᔪᕐᑐᓕᓂᕗᑦ ᓈᒻᒪᒋᓕᓚᐅᓐᖏᓚᓯᐅᒃ? 18ᓇᕐᕈᒋᓕᕐᐱᓯᐅᒃ ᒪᓕᒍᓐᓃᕐᓗᒍᓗ ᒫᓐᓇ ᐊᑕᓂᖅ? ᐊᑭᕋᕐᑐᓕᕐᓂᐊᕈᓯ ᐊᑕᓂᕐᒥᒃ ᐅᓪᓗᒥ ᑕᕝᕙ ᖃᐅᒃᐸᑦ ᓂᓐᖓᒍᒫᕐᐳᖅ ᐃᓴᕆᐊᓕᒥᐅᓕᒫᓄᑦ. 19ᒫᓐᓇᓕ, ᓄᓇᖁᑎᑦᓯ ᑐᒃᓯᐊᕐᕕᒋᒋᐊᖓ ᓈᒻᒪᖏᐸᑦ, ᕾᓚᐅᕆᑦᓯ ᐃᑳᕐᓗᓯ ᑕᒪᐅᖓ ᐊᑕᓂᐅᑉ ᓄᓇᖓᓄᑦ, ᑐᐱᖁᑎᖓᓄᑦ ᓇᔪᕐᑕᖓᓄᓪᓗ, ᓄᓇᑖᕈᒪᓗᓯᓗ ᐊᑯᓐᓇᑦᑎᓐᓂ; ᑭᓯᐊᓂᓕ ᐊᑭᕋᕐᑐᓕᕐᑍᓕᒋᑦᓯ ᐊᑕᓂᕐᒥᒃ, ᐅᕝᕙᓘᓐᓃᑦ ᐊᑭᕋᕐᑐᓕᕐᑎᑦᑍᓕᑎᒍᑦ ᑐᓂᕐᕈᓯᕐᕕᓕᐅᕐᓂᑦᓯᓐᓄᑦ ᑐᓂᕐᕈᓯᕐᕕᒋᐊᓪᓚᖕᒥᒃ ᐊᑕᓂᕐᒧᑦ ᒎᑎᑦᑎᓐᓄᑦ. 20#ᔮᓱᐊ 7:1-26.ᐃᖅᑲᐅᒪᕕᓰ? ᐂᑲᓂᐅᑉ ᔨᕋᐅᑉ ᐃᕐᓂᖓᑕ ᐱᖁᔭᒥᒃ ᓈᓚᖏᓐᓂᕆᓚᐅᕐᑕᖓᓂᒃ, ᐃᓴᕆᐊᓕᒥᐅᓕᒫᑦ ᓱᒋᐊᕐᑕᐅᓚᐅᕐᒪᑕ, ᐂᑳᓐᓗ ᐃᓄᑑᓗᓂ ᑐᖁᑕᐅᓚᐅᓐᖏᓚᖅ ᐊᔪᕐᑐᓕᓂᓂ ᐱᓪᓗᒍ.’”
21ᑕᕝᕙ ᕉᐱᓂᐅᑉ, ᒑᓪᓗ ᑭᖑᕚᖏᑦ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑦ ᑭᐅᕗᑦ ᐅᖃᕐᓗᑎᒡᓗ ᐃᓴᕆᐊᓕᒃᑯᑦ ᓯᕗᓕᕐᑎᖏᓐᓄᑦ, 22“ᐊᔪᒐᖃᖏᑦᑐᖅ, ᒎᑎ, ᐊᑕᓂᐅᕗᖅ! ᐊᔪᒐᖃᖏᑦᑐᖅ, ᒎᑎ, ᐊᑕᓂᐅᕗᖅ! ᑖᓐᓇ ᖃᐅᔨᒪᕗᖅ; ᓱᖕᒪᑦ ᑍᒤᓐᓂᑦᑎᓐᓂᒃ, ᐃᓴᕆᐊᓕᑎᓪᓗ ᖃᐅᔨᔪᒃᓴᐅᕗᑦ! ᑕᒪᓐᓇ ᐊᑭᕋᕐᑐᕐᓂᐅᒃᐸᑦ, ᐅᒃᐱᕐᓂᕐᒥᒡᓗ ᐊᑕᓂᕐᒧᑦ ᓱᕅᓂᐅᒃᐸᑦ, ᐅᓪᓗᒥ ᐃᓅᑎᑦᑍᓕᑎᒍᑦ! 23ᐊᑕᓂᕐᒥᒃ ᓈᓚᖏᓪᓗᑕ ᑐᓂᕐᕈᓯᕐᕕᓕᐅᓚᐅᕈᑦᑕ; ᐅᕝᕙᓗ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᒃᓴᓂᒃ ᑐᓂᕐᕈᑎᒃᓴᒥᒡᓗ ᓂᐊᖂᔭᒃᓴᒥᒃ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᓯᕐᓂᕐᒥᒃ, ᐊᑕᓂᐅᑉ ᓇᖕᒥᓂᖅ ᐊᑭᒋᐊᕐᑕᒃᓴᕆᕚᑎᒍᑦ. 24ᑍᒫᒃ ᐱᓂᐊᓚᐅᕐᐳᒍᑦ ᑲᑉᐱᐊᓱᓚᐅᕋᑦᑕ ᓯᕗᓂᒃᓴᑦᑎᓐᓂᒃ ᑭᖑᕚᓯ ᐅᖃᑐᐃᓐᓇᕆᐊᖃᕐᒪᑕ ᑭᖑᕚᑦᑎᓐᓄᑦ ᐃᒫᒃ, ‘ᐊᑕᓂᖃᕋᓱᒋᕕᓰ ᐃᓴᕆᐊᓕᒥᐅᑦ ᒎᑎᖓᓐᓂᒃ? 25ᓄᓇᖁᑎᑦᑎᓐᓄᑦ ᔪᐊᕐᑕᓂᐅᑉ ᑰᖓ ᑭᒡᓕᒋᔭᐅᑎᓚᐅᕐᒪᒍ ᐃᓕᑦᓯᓐᓄ ᐅᕙᑦᑎᓐᓄᓪᓗ ᕉᐱᓂᐅᑉ, ᒑᓪᓗ ᑭᖑᕚᖏᓐᓄᑦ; ᐊᑕᓂᕐᒧᑦ ᐃᓚᒋᔭᐅᓂᖃᓐᖏᓚᓯ.’ ᑕᕝᕙ ᑭᖑᕚᑦᓯ ᑭᖑᕚᑦᑎᓐᓂᒃ ᑐᒃᓯᐊᖃᑦᑕᕐᓂᕐᒥᒃ ᐊᑕᓂᕐᒧᑦ ᓄᖅᑲᕐᑎᑦᓯᑐᐃᓐᓇᕆᐊᖃᕋᔭᕐᐳᑦ. 26ᑍᒤᒻᒪᑦ ᑐᓂᕐᕈᓯᕐᕕᓕᐅᓚᐅᕐᐳᒍᑦ ᐃᑯᐊᓚᑎᑦᓯᓂᕐᒧᑦ ᑐᓂᕐᕈᓯᕐᕕᐅᖏᑦᑐᒥᒃ ᑐᓂᕐᕈᓯᕐᕕᒃᓴᐅᖏᑦᑐᒥᒡᓗ, 27ᑭᓯᐊᓂᓕ ᓇᓗᓁᒃᑯᑕᐅᖁᓪᓗᒍ ᐃᓄᖁᑎᑦᑎᓐᓄᑦ ᐃᓕᑦᓯᓐᓄᓪᓗ ᑭᖑᕚᑦᑎᓐᓄᓪᓗ, ᑐᒃᓯᐊᕐᕕᖃᕐᓂᑦᑎᓐᓂᒃ ᐊᑕᓂᕐᒧᑦ ᐃᑦᔪᕐᓁᑦᑑᑉ ᑐᐱᖓᑕ ᓵᖓᓂ ᑐᓂᕐᕈᑎᒃᓴᕗᓪᓗ ᐃᑯᐊᓚᑎᑕᒃᓮᑦ ᑐᓂᕐᕈᓯᕈᑎᒃᓮᓪᓗ ᐃᓚᒌᑦᓯᐊᕈᑎᒃᓴᒧᓪᓗ ᑐᓂᕐᕈᓯᕐᓃᑦ; ᑍᒤᓚᐅᕐᐳᒍᑦ ᑭᖑᕚᓯ ᐅᖃᓛᖁᓇᒋᑦ ᑭᖑᕚᑦᑎᓐᓄᑦ, ‘ᐊᑕᓂᕐᒧᑦ ᐱᓂᐊᕐᓂᖃᖃᑕᐅᓐᖏᓚᓯ.’ 28ᐃᓱᒪᓚᐅᕋᑦᑕ ᑍᒤᑦᑐᖃᕋᔭᕐᐸᑦ ᑕᕝᕙ ᑭᖑᕚᕗᑦ ᐅᖃᕈᓐᓇᖁᓪᓗᒋᑦ, ‘ᑕᑯᒋᑦ! ᓯᕗᓕᕗᑦ ᑐᓂᕐᕈᓯᕐᕕᓕᐅᓚᐅᕐᐳᑦ ᐊᑕᓂᐅᑉ ᑐᓂᕐᕈᓯᕐᕕᖓᑕ ᐊᑦᔨᖓᓂᒃ, ᓴᓇᔭᐅᓚᐅᓐᖏᓚᕐᓕ ᐃᑯᐊᓚᑦᓯᓂᕐᒧᑦ ᑐᓂᕐᕈᓯᕐᕕᐅᖅᑯᓪᓗᒍ ᐅᕝᕙᓘᓐᓃᑦ ᑐᓂᕐᕈᓯᕐᓂᕐᒧᑦ, ᓇᓗᓁᒃᑯᑕᒃᓴᐅᖁᓪᓗᒍᓕ ᐅᕙᑦᑎᓐᓄᑦ ᐃᓕᑦᓯᓐᓄᓪᓗ.’ 29ᐊᑕᓂᕐᒥᒃ ᐊᑭᕋᕐᑐᕐᓂᐊᓐᖏᓚᒍᑦ, ᒪᓕᒍᓐᓁᕐᓂᐊᕐᓇᒍᓗ ᒫᓐᓇ ᑐᓂᕐᕈᓯᕐᕕᓕᐅᕐᓂᑦᑎᓐᓄᑦ ᐃᑯᐊᓚᑎᑦᓯᓂᕐᒧᑦ ᑐᓂᕐᕈᑎᓂᒃ ᓂᐊᖂᔭᒃᓴᒧᑦ ᑐᓂᕐᕈᑎᓂᒃ ᐅᕝᕙᓘᓐᓃᑦ ᑐᓂᕐᕈᓯᑐᐃᓐᓇᕐᓂᕐᒧᑦ, ᑐᓂᕐᕈᓯᕐᕕᖕᒥᒃ ᓴᓇᓂᐊᓐᖏᓚᒍᑦ ᐊᑕᓂᐅᑉ ᒎᑎᑦᑕ ᑐᓂᕐᕈᓯᕐᕕᖓᑕ ᑐᐱᕐᒦᑦᑑᑉ ᐊᓯᐊᓂᒃ!”
30ᑐᓂᕐᕈᓯᕐᑎᑦᓯᔨ ᐱᓂᕼᐋᔅ ᐊᖑᑏᓪᓗ ᓯᕗᓕᕐᑏᑦ ᓄᓇᖃᑎᒌᓄᑦ, ᑭᖑᕚᕇᓪᓗ ᐊᖓᔪᖅᑳᖏᑦ ᒪᓕᓚᐅᕐᑐᑦ ᑐᓴᕋᒥᒃ ᐃᓄᖕᓂᑦ ᕉᐱᓂᐅᑉ, ᒑᓪᓗ ᒫᓇᓯᐅᓪᓗ ᑭᖑᕚᖏᑕ ᐅᖃᐅᓯᖏᓐᓂᒃ, ᓈᒻᒪᒃᓴᓕᓚᐅᕐᐳᑦ. 31ᐱᓂᕼᐋᓯᓗ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓ ᐅᖃᕐᐳᖅ ᑖᒃᑯᓄᖓ ᕉᐱᓂᒃᑯᓐᓄᑦ, “ᐅᓪᓗᒥ ᖃᐅᔨᕗᒍᑦ ᐊᑕᓂᐅᑉ ᐃᓚᒋᖕᒪᑎᒍᑦ, ᐱᓇᓱᐊᕐᓂᑦᓯᒍᓪᓗ ᐊᑕᓂᕐᒥᒃ ᐊᑭᕋᕐᑐᓕᓚᐅᖏᓐᓇᑦᓯ; ᑍᒤᑦᒪᑦ ᒫᓐᓇ ᐃᓴᕆᐊᓕᒥᐅᑦ ᐃᓄᖏᑦ ᐱᐅᓕᓚᐅᕐᐸᓯ ᐊᑕᓂᐅᑉ ᐊᒡᒐᖏᓐᓂᑦ.” 32ᑕᕝᕙ ᐱᓂᕼᐋᓯᓗ ᐃᓕᓯᕆᐅᑉ ᐃᕐᓂᖓ ᐊᖓᔪᖅᑲᐅᔪᓪᓗ, ᐅᑎᓕᕐᐳᑦ ᕿᒤᓕᕐᓗᑎᒃ ᕉᐱᓂᐅᑉ, ᒑᓪᓗ ᐃᓄᖏᓐᓂᒃ ᒋᓕᐊᑎᐅᑉ ᓄᓇᖓᓂᒃ ᐅᑎᓕᕐᓗᑎᒡᓗ ᑬᓇᓂᒧᑦ, ᐃᓴᕆᐊᓕᐅᑉ ᐃᓄᖏᓐᓄᑦ, ᐅᓂᒃᑳᕐᐳᓪᓗ ᑖᒃᑯᓄᖓ. 33ᐃᓴᕆᐊᓕᒥᐅᓪᓗ ᓈᒻᒪᒃᓴᓕᕐᐳᑦ ᑐᓴᕐᑎᑦᓯᐅᑕᐅᔪᓂᒃ; ᒎᑎᓗ ᓂᕐᑐᓕᕐᐹᑦ, ᐅᖃᐅᓯᖃᕈᓐᓃᕐᐳᓪᓗ ᐅᓇᑕᕈᒪᓂᕐᒥᒃ ᑖᒃᑯᓂᖓ, ᓄᓇᖏᓐᓂᒡᓗ ᐊᓯᕈᐃᔪᒪᓂᕐᒥᒃ ᕉᐱᓂᐅᑉ ᒑᓪᓗ ᓄᓇᒋᓕᕐᑕᖓᓐᓂᒃ.
34ᕉᐱᓂᐅᑉ ᒑᓪᓗ ᐃᓄᖏᑦ ᐅᖃᕐᐳᑦ, “ᐅᓇ ᑐᓂᕐᕈᓯᕐᕕᒃ ᓇᓗᓁᒃᑯᑕᐅᕗᖅ ᐅᕙᑦᑎᓐᓄᑦ ᐃᓕᑦᓯᓐᓄᓪᓗ ᐊᑕᓂᖅ ᒎᑎᐅᖕᒪᑦ.” ᑍᒤᒻᒪᑦ ᐊᑎᕐᑖᕐᑕᐅᕗᖅ “ᓇᓗᓁᕐᓯᕕᖕᒥᒃ.”
Currently Selected:
ᔮᓱᐊᑉ ᐊᒡᓚᖏᑦ 22: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
