ᔮᓱᐊᑉ ᐊᒡᓚᖏᑦ 10
10
ᐊᒧᕅᒥᐅᑦ ᓵᓚᐅᓂᖏᑦ
1ᐊᑐᓁ-ᔨᑎᒃᓕ ᔨᕉᓴᓕᐅᑉ ᐊᖓᔪᖅᑳᕐᔪᐊᖓ ᑐᓴᕋᒥ ᔮᓱᐊᑉ ᓵᓚᖃᕐᓂᖓᓂᒃ ᐊᓯᕈᕐᓯᓂᖓᓂᒡᓗ ᐂᒥᐅᑦ ᐊᖓᔪᖅᑳᕐᔪᐊᖓᓂᒃ, ᑐᖁᑦᓯᓂᖓᓂᓪᓗ ᐱᓂᐊᕐᓂᕆᓚᐅᕐᑕᖓᓂᒡᓗ ᔨᕆᑰᑉ ᐊᖓᔪᖅᑳᕐᔪᐊᖓᓄᑦ, ᑐᓴᓚᐅᕆᕗᕐᓗ ᒋᐱᐅᓂᒥᐅᑦ ᐊᖏᖃᑎᖃᕐᓯᒪᓂᖏᓐᓂᒃ ᐃᓴᕆᐊᓕᒥᐅᓂᒃ ᐃᓅᖃᑎᖃᑦᓯᐊᓕᕐᓂᒋᓐᓂᒡᓗ, 2ᔨᕉᓴᓕᒥᐅᑦ ᐊᖏᔪᒥᒃ ᑲᑉᐱᐊᓱᓕᕐᐳᑦ, ᒋᐱᐅᓂᒥᐅᑦ ᐃᒡᓗᒐᓴᖏᑦ ᐊᖏᔪᐊᓘᖕᒪᑕ, ᐊᖏᓂᕐᓴᐅᓚᐅᕐᒪᓪᓗ ᐂᒥᑦ, ᐅᓇᑕᕐᑎᖁᑎᖏᓪᓗ ᐊᔪᖏᑦᑐᐊᓘᓪᓗᑎᒃ. 3ᑍᒤᒻᒪᑦ ᐊᑐᓁ-ᔨᑎᒃ ᔨᕉᓴᓕᐅᑉ ᐊᖓᔪᖅᑳᕐᔪᐊᖓ ᐅᖃᕆᐊᕐᑐᕐᑎᑦᓯᕗᖅ ᐅᑯᓄᖓ ᐊᖓᔪᖅᑳᕐᔪᐊᓄᑦ ᕼᐅᕼᐊᒻᒧᑦ ᕼᐃᐸᕋᓐᒥᐅᑕᕐᒧᑦ, ᐱᕋᒻᒧᑦ ᔭᕐᒨᑎᒥᐅᑕᕐᒧᑦ, ᔮᐱᐊᒧᑦ ᓚᑮᓯᒥᐅᑕᕐᒧᑦ, ᑎᐱᕆᒧᓪᓗ ᐃᒡᓚᓐᒥᐅᑕᕐᒧᑦ ᐅᖃᐅᑎᓪᓗᒋᑦ, 4“ᕾᓗᓯ ᐃᑲᔪᕆᐊᓚᐅᕆᑦᓯ ᐅᕙᓐᓂᒃ ᐅᓇᑕᕆᐊᕐᓂᐊᕋᑦᑕ ᒋᐱᐅᓂᒥᐅᓂᒃ; ᑖᒃᑯᐊ ᐊᖏᖃᑎᖃᓚᐅᕐᒪᑕ ᐅᓇᑕᖃᑎᖃᕈᒪᓇᑎᒃ ᔮᓱᐊᒥᒃ ᐃᓴᕆᐊᓕᒥᐅᓂᒡᓗ.” 5ᑍᒤᒻᒪᑦ ᑖᒃᑯᐊ ᐊᖓᔪᖅᑳᕐᔪᐊᑦ ᑕᓪᓕᒪᑦ ᐊᒧᕅᑎᒥᐅᑦ, ᑲᑎᓚᐅᕐᐳᑦ ᐃᓚᒌᓕᕐᓗᑎᒃ, ᔨᕉᓴᓕᒥᐅᑦ ᐊᖓᔪᖅᑳᕐᔪᐊᖓ, ᕼᐃᐸᕋᓐ ᐊᖓᔪᖅᑳᕐᔪᐊᖓ, ᔭᕐᒨᑎᒥᐅᑦ ᐊᖓᔪᖅᑳᕐᔪᐊᖓ, ᓚᑮᓯᒥᐅᑦ ᐊᖓᔪᖅᑳᕐᔪᐊᖓ, ᐃᒡᓚᓐ ᐊᖓᔪᖅᑳᕐᔪᐊᖓ, ᒋᐱᐅᓂ ᓴᓂᐊᓂ ᑕᖕᒫᕐᐳᑦ ᐅᓇᑕᕈᒪᓪᓗᒍ, ᐅᓇᑕᓕᓚᐅᕐᐳᓪᓗ.
6ᒋᐱᐅᓂᒥᐅᓪᓗ ᐅᖃᕆᐊᕐᑐᕐᑎᑦᓯᕗᑦ ᔮᓱᐊᒧᑦ ᑕᖕᒫᕐᓯᒪᑎᓪᓗᒋᑦ ᒋᐅᓪᒐᐅᓪᒥ ᐅᖃᕐᓗᑎᒃ: “ᑲᒪᒋᖏᑦᑑᑦᑍᓕᑎᒍᑦ ᐊᖓᔪᖅᑳᒃ; ᕾᑦᓴᐅᑎᒋᓚᐅᕆᑦ ᐃᑲᔪᕆᐊᕐᓗᑕ, ᐱᐅᓕᓚᐅᕐᑎᒍᑦ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᓕᒫᖏᑦ ᖃᖅᑲᒥᐅᑍᑦ ᑕᐱᕇᒃᓗᑎᒃ ᐅᓇᑕᕆᐊᓕᕐᒪᑕ ᐅᕙᑦᑎᓐᓂᒃ.”
7ᔮᓱᐊᓗ ᐅᓇᑕᕐᑎᖁᑎᒥᓂᒃ ᐱᓯᑎᐅᓂᕐᐹᓂᒃ ᐱᖃᑎᖃᕐᓗᓂ ᐊᐅᓪᓚᕐᐳᖅ ᒋᐅᓪᒐᐅᓪᒥᑦ. 8ᐊᑕᓂᕐᓗ ᔮᓱᐊᒧᑦ ᐅᖃᕐᐳᖅ, “ᑲᑉᐱᐊᒋᑦᑍᓕᒃᑭᑦ, ᑐᓂᓯᕕᒋᔭᕇᕐᐸᒋᑦ ᓵᓚᖃᕐᓂᕐᒥᒃ ᑖᒃᑯᓂᖓ; ᐊᑕᐅᓯᕐᒧᓪᓘᓐᓃᑦ ᐊᑭᒪᔭᐅᓂᐊᓐᖏᓚᑎᑦ.” 9ᐅᓐᓄᐊᓕᒫᖅ ᔮᓱᐊᒃᑯᑦ ᒋᐅᓪᒐᐅᓪᒥᑦ ᒋᐱᐊᓐᒧᐊᕋᓱᓚᐅᕐᐳᑦ, ᐅᐸᓗᐃᓪᓗᒋᓪᓗ ᐊᒧᕅᑎᒥᐅᑦ ᐅᓇᑕᓕᕐᐰᑦ. 10ᐊᑕᓂᐅᓪᓗ ᐊᒧᕅᑎᒥᐅᑦ ᐅᐃᒪᔮᕐᑎᓚᐅᕐᐰᑦ ᑕᑯᑐᐊᕐᒪᑕ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ, ᐃᓴᕆᐊᓕᒥᐅᓂᑦ ᒋᐱᐅᓂᒥ ᐅᓄᕐᑐᐊᓗᐃᑦ ᑐᖁᕋᕐᑕᐅᓚᐅᕐᐳᑦ, ᒪᓕᒃᑕᐅᓪᓗᑎᒡᓗ ᐊᖅᑯᑎᒃᑯᑦ ᖃᖅᑲᒥᑦ ᐱᑦ-ᕼᐅᕋᓐᒧᑦ ᑐᕌᕐᑐᒃᑯᑦ, ᐅᓇᑍᓐᓇᓚᐅᕐᐰᓪᓗ ᐊᔨᑲᒧᑦ ᒪᑮᑕᒧᓪᓗ ᑎᑭᓪᓗᑎᒃ. 11ᐊᒧᕅᑎᒥᐅᑦ ᕿᒫᑎᓪᓗᒋᑦ ᐃᓴᕆᐊᓕᒥᐅᓂᒃ, ᐊᖅᑲᕐᑎᓕᕐᑎᓪᓗᒋᑦ ᐱᑦ-ᕼᐅᕋᓐᒥᑦ, ᐊᑕᓂᖅ ᓇᑕᖅᑯᕐᓇᕐᔪᐊᓂᒃ ᐊᖏᔫᑎᓂᒃ ᕿᓚᖕᒥᑦ ᑲᑕᒐᕐᑎᑦᓯᕗᖅ ᓄᓇ ᐊᔨᑲ ᑎᑭᓪᓗᒍ, ᑖᒃᑯᐊᓗ ᑐᖁᑕᐅᓚᐅᕐᐳᑦ ᑕᒪᒃᑯᓄᖓ; ᓇᑕᖅᑯᕐᓇᕐᔪᐊᓄᑦ ᑐᖁᑕᐅᔪᑦ ᐅᓄᕐᓂᕐᓴᐅᓚᐅᕐᐳᖅ ᐃᓴᕆᐊᓕᒥᐅᓂᑦ ᓴᕕᒡᔪᐊᒧᑦ ᑐᖁᑕᐅᔪᓂᑦ. 12ᐅᓪᓗᒥ ᑍᑦᓱᒪᓂ ᐊᑕᓂᐅᑉ ᓵᓚᖃᕐᑎᒻᒪᒋᑦ ᐊᒧᕅᑎᒥᐅᓂᒃ, ᔮᓱᐊ ᐃᓴᕆᐊᓕᒥᐅᓕᒫᑦ ᖃᐅᔨᑎᓪᓗᒋᑦ ᐊᑕᓂᕐᒧᑦ ᐅᖃᕐᐳᖅ,
“ᓯᕿᓃᖅ ᓄᖅᑲᕆᑦ ᒋᐱᐅᓂᐅᑉ ᖁᓛᓄᑦ;
ᑕᖅᑮᕐᓗ ᓄᖅᑲᖓᓗᑎᑦ ᐂᔭᓚᓐ ᓇᕐᓴᖓᑕ ᓇᓛᓂ.”
13 #
ᓴᒧᐃᓕ ᐂᑉᐸᖏᑦ 1:18. ᑕᕝᕙ ᓯᕿᓂᖅ ᓄᖅᑲᖓᓚᐅᕐᐳᖅ, ᑕᖅᑭᕐᓗ ᐊᐅᓚᑦᔭᓚᐅᓐᖏᓚᖅ, ᑖᒃᑯᐊ ᐃᓅᖃᑎᒌᒡᔪᐊᑦ ᓵᓚᖃᓚᐅᖅᑳᕐᑎᓐᓇᒋᑦ ᐊᑭᕋᒥᖕᓂᒃ. ᑕᒪᓐᓇᓗ ᑎᑎᕋᕐᑕᐅᓯᒪᕗᑦ ᔧᓵᑉ ᐊᒡᓚᖏᓐᓂ, ᓯᕿᓂᖅ ᓄᖅᑲᖓᓚᐅᐳᖅ ᕿᓚᐅᑉ ᕿᑎᐊᓂ, ᓂᐱᓚᐅᓐᖏᓚᕐᓗ ᐅᓪᓗᓕᒫᖅ ᓈᓪᓗᒍ. 14ᑍᒤᑦᑐᖃᓚᐅᕐᓯᒪᓐᖏᓚᖅ ᑕᒪᑐᒪ ᓯᕗᕐᖓᒍᑦ ᑍᒤᑦᑐᖃᕐᓂᐊᕈᓐᓃᕐᐳᕐᓗ ᑭᖑᓂᖓᒍᑦ, ᐊᑕᓂᐅᑉ ᓈᓚᖕᓂᕆᓚᐅᕐᑕᖓ ᐃᓄᑐᐃᓐᓇᕐᒥᒃ, ᐊᑕᓂᖅ ᐅᓇᑕᖃᑕᐅᓚᐅᕐᐳᖅ ᐃᓴᕆᐊᓕᒥᐅᑉ ᐃᓚᒋᓪᓗᒋᑦ!
15ᑕᒪᑐᒪ ᑭᖑᕐᖓᒍᑦ ᔮᓱᐊᒃᑯᑦ ᐅᓇᑕᕐᑎᖁᑎᓕᒫᖏᓪᓗ ᐅᑎᕐᐳᑦ ᑕᖕᒫᕐᓯᒪᕕᖕᒥᖕᓄᑦ ᒋᐅᓪᒐᐅᓪᒧᑦ.
ᔮᓱᐊᑉ ᑎᒍᓯᓂᖓ ᐊᒧᕅᑎᑦ ᐊᖓᔪᖅᑳᕐᔪᐊᖏᓐᓂᒃ ᑕᓪᓕᒪᓂᒃ
16ᑖᒃᑯᐊ ᐊᒧᕅᑎᑦ ᐊᖓᔪᖅᑳᕐᔪᐊᖏᑦ ᑕᓪᓕᒪᑦ ᕿᒫᕗᑦ, ᐃᔨᕐᓗᑎᒡᓗ ᕾᕈᓱᖕᒧᑦ ᒪᑮᑕᒦᑦᑐᒧᑦ. 17ᖃᐅᔨᔭᐅᒐᒥᒃ ᔮᓱᐊ ᐅᖃᐅᑦᔭᐅᕗᖅ, “ᐊᖓᔪᖅᑳᕐᔪᐊᑦ ᑕᓪᓕᒪᑦ ᓇᓂᔭᐅᕗᑦ, ᕾᕈᓱᖕᒥ ᐃᔨᕐᓯᒪᔪᑦ ᒪᑮᑕᒦᑦᑐᒥ.” 18ᔮᓱᐊᓗ ᐅᖃᕐᐳᖅ, “ᐅᔭᕋᒡᔪᐊᓂᒃ ᐊᖏᔫᑎᓂᒃ ᐊᒃᓴᑳᑎᑦᓯᒋᑦᓯ ᕾᕈᓲᑉ ᐹᖓᓄᑦ, ᖃᐅᔨᓴᕐᑎᑦᓯᓗᓯᓗ ᐹᖓᓂ ᑖᒃᑯᐊ ᖃᐅᔨᓴᕐᑕᐅᖁᓪᓗᒋᑦ; 19ᐃᓕᑦᓯᓕ ᓇᖕᒥᓂᖅ ᑕᕝᕙᓃᖏᓐᓇᕐᑍᓕᒋᑦᓯ, ᑲᔪᓯᒋᑦᓯ ᐊᑭᕋᓯ ᐅᓇᑕᕆᐊᕐᓗᒋᑦ ᑐᓄᐊᓂᑦ, ᐃᒡᓗᒐᓴᖏᓐᓄᐊᕐᑎᑦᑍᓕᓯᐅᒃ; ᐊᑕᓂᐅᑉ ᒎᑎᑦᓯ ᑖᒃᑯᓂᖓ ᓵᓚᖃᕐᓂᕐᒥᒃ ᑐᓂᓯᕕᒋᖕᒪᓯ.” 20ᔮᓱᐊᒃᑯᓪᓕ ᐃᓚᖏᓪᓗ ᐃᓴᕆᐊᓕᒥᐅᑦ ᑐᖁᕅᕕᒡᔪᐊᓚᐅᕐᐳᑦ ᑖᒃᑯᓂᖓ, ᓄᖒᑦᓯᓚᐅᖏᓐᓂᓕᒫᒥᖕᓂ, ᐊᒥᐊᒃᑯᖏᓪᓕ ᕿᒫᕗᑦ ᐃᒡᓗᒐᓴᖕᓄᑦ ᐊᕙᓗᓕᐅᕐᓯᒪᔪᓄᑦ, 21ᔮᓱᐊᑉ ᑕᕝᕙ ᐃᓚᓕᒫᖏᑦ ᐅᑎᕐᐳᑦ ᑕᖕᒫᕐᓯᒪᕕᖕᒥᖕᓄᑦ ᒪᑮᑕᒧᑦ ᖃᓄᐃᖏᑦᓯᐊᕐᓗᑎᒃ.
ᑭᓇᒧᓪᓘᓪᓃᑦ ᐃᓄᖕᓄᑦ ᐃᓴᕆᐊᓕᒥᐅᑦ ᐅᖃᕐᓂᕐᓘᑎᒋᔭᐅᓚᐅᓐᖏᓚᑦ.
22ᑕᕝᕙ ᔮᓱᐊ ᐅᖃᕐᐳᖅ, “ᕾᕈᓱᒃ ᒪᑐᐃᕐᓗᒍ, ᐊᖓᔪᖅᑳᕐᔪᐊᑦ ᑕᓪᓕᒪᑦ ᐅᕙᓐᓄᑦ ᕾᑎᓚᐅᕐᓯᐅᒃ.” 23ᑕᕝᕙ ᕾᕈᓱᒃ ᒪᑐᐃᕐᐹᑦ, ᐊᖓᔪᖅᑳᕐᔪᐊᓪᓗ ᑕᓪᓕᒪᑦ ᐊᓂᑎᑕᐅᕗᑦ, ᐅᑯᓇᓐᖓᑦ ᐱᓯᒪᔪᑦ ᔨᕉᓴᓕᒥᑦ, ᕼᐃᐸᕋᓐᒥᑦ, ᔭᕐᒨᑎᒥᑦ, ᓚᑮᓯᒥᑦ, ᐃᒡᓚᓐᒥᓪᓗ. 24ᑎᑭᐅᑎᒐᒥᑦᔪᒃ ᔮᓱᐊᑉ ᓵᖓᓄᐊᕐᑎᑉᐰᑦ, ᔮᓱᐊᑉ ᐃᓴᕆᐊᓕᒥᐅᑦ ᐅᓇᑕᕐᑎᖏᓐᓄᑦ ᐊᖓᔪᖅᑳᑦ, ᑲᒪᔨᐅᔪᓪᓗ ᐱᖃᑎᒋᓚᐅᕐᑕᓂ ᕾᖁᕔᑦ ᐅᖃᐅᑎᓪᓗᒋᓪᓗ, “ᒪᐅᖓ ᖃᒡᓕᒋᐊᕐᓗᓯ, ᐊᖓᔪᖅᑳᕐᔪᐊᑦ ᖁᖓᓯᖏᑎᒍᑦ ᑐᑎᓚᐅᕐᓯᐅᒃ.” ᑕᕝᕙ ᕾᓪᓗᑎᒃ, ᖁᖓᓯᖏᑎᒍᑦ ᑐᑎᒻᒥᓕᕐᐰᑦ. 25ᔮᓱᐊᓪᓗ ᐅᖃᐅᑎᕔᑦ, “ᑲᑉᐱᐊᓱᒐᓯ, ᓴᐱᕐᑍᓕᒋᑦᓯᓗ; ᓴᓐᖏᔫᓗᓯ ᓯᕘᕋᔪᐃᑦᑑᒋᑦᓯ; ᑍᒫᒃ ᑕᕝᕙ ᐊᑕᓂᐅᑉ ᐱᓇᓱᐊᕐᕕᒋᖃᑦᑕᕐᓂᐊᕐᐰᑦ ᐊᑭᕋᓕᒫᓯ ᐅᓇᑕᕐᑕᓯ.” 26ᑕᒪᑐᒪ ᑭᖑᓂᖓᒍᑦ ᔮᓱᐊᑉ ᐊᖓᔪᖅᑳᕐᔪᐊᑦ ᑐᖁᑉᐰᑦ, ᕿᒥᓪᓗᒋᑦ ᓇᐹᕐᑐᓂ ᑕᓪᓕᒪᓂ, ᑎᒥᖏᓪᓗ ᓂᕕᖓᓚᐅᕐᐳᑦ ᐅᓐᓄᖕᒧᑦ ᑎᑭᓪᓗᒍ. 27ᓯᕿᓂᕐᓕ ᓂᐱᓕᕐᑎᓪᓗᒍ ᔮᓱᐊ ᑎᓕᓯᕗᖅ, ᑎᒥᖏᑦ ᐲᕐᑕᐅᑯᓪᓗᒋᑦ ᓇᐹᕐᑐᓂᑦ, ᐃᒋᑕᐅᓗᑎᒡᓗ ᕾᕈᓱᖕᒧᑦ ᐃᔨᕐᓯᒪᕕᒋᓚᐅᕐᑕᖓᓐᓄᑦ, ᐅᔭᕋᒡᔪᐊᒧᓪᓗ ᕾᕈᓲᑉ ᐹᖓ ᒪᑐᔭᐅᕗᖅ, ᐅᓪᓗᒥᒧᑦ ᓱᓕ ᑎᑭᓪᓗᒍ ᑖᒃᑯᐊ ᑍᒤᓕᖓᕗᑦ.
ᔮᓱᐊᒃᑯᑦ ᓵᓚᖃᒃᑲᓐᓂᕐᓂᖏᑦ ᐊᒧᕅᑎᑦ ᓄᓇᖏᓐᓂ
28ᔮᓱᐊᓗ ᐅᓇᑕᕆᐊᐳᖅ ᒪᑮᑕᒥᐅᓪᓗ ᓵᓚᒋᓪᓗᒋᑦ ᐅᓪᓗᒥ ᑕᕝᕙᓂ, ᐊᖓᔪᖅᑳᕐᔪᐊᖓᓪᓗ ᐃᒡᓗᒐᓴᖕᒥᐅᓕᒫᓪᓗ ᓄᖑᑦᓯᐊᕐᓗᒋᑦ ᑐᖁᕋᓚᐅᕐᐰᑦ; ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᑕᖃᓚᐅᓐᖏᓚᖅ; ᒪᑮᑕᒥᐅᑦ ᐊᖓᔪᖅᑳᕐᔪᐊᖓ ᐱᓂᐊᕐᕕᒋᓚᐅᕐᐹ ᔨᕆᑰᑉ ᐊᖓᔪᖅᑳᕐᔪᐊᖓᓄᑦ ᐱᓂᐊᕐᓂᕆᓚᐅᕐᑕᒥᑐᑦ.
29ᑕᒪᑐᒪ ᑭᖑᓂᖓᒍᑦ ᔮᓱᐊ ᐅᓇᑕᕐᑎᖏᓪᓗ ᒪᑮᑕᒥᑦ ᓕᑉᓇᒧᑦ ᐂᕗᑦ, ᑖᒃᑯᐊ ᐅᓇᑕᕆᐊᕐᓗᒋᑦ. 30ᐊᑕᓂᐅᑉ ᐃᓴᕆᐊᓕᒥᐅᑦ ᓵᓚᖃᕐᑎᓚᐅᕐᐰᑦ ᐃᒡᓗᒐᓴᖕᓂᒃ ᑖᒃᑯᓂᖓ ᐊᖓᔪᖅᑳᕐᔪᐊᖏᓐᓂᒡᓗ; ᔮᓱᐊᓗ ᐊᑕᐅᓯᕐᒥᒡᓘᓐᓃᑦ ᐃᓅᓕᒃᓯᓚᐅᓐᖏᓚᖅ, ᑐᖁᑍᓐᓇᕆᓚᐅᕐᐰᑦ; ᐊᖓᔪᖅᑳᕐᔪᐊᖓᓪᓗ ᐱᓂᐊᕐᕕᒋᓚᐅᕐᐹ ᔨᕆᑰᑉ ᐊᖓᔪᖅᑳᕐᔪᐊᖓᓄᑦ ᐱᓂᐊᕐᓂᕆᓚᐅᕐᑕᒥᑐᑦ.
31ᑕᒪᑐᒪ ᑭᖑᕐᖓᒍᑦ ᔮᓱᐊ ᐅᓇᑕᕐᑎᓕᒫᖏᓪᓗ ᐊᐅᓪᓚᕐᐳᑦ ᓕᑉᓇᒥᑦ ᓚᑮᓯᒧᑦ; ᐊᕙᑕᖏᕐᓗᒍᓗ ᐅᓇᑕᓕᕐᐹᑦ. 32ᐊᑕᓂᐅᓪᓗ ᐃᓴᕆᐊᓕᒥᐅᑦ ᓵᓚᖃᕐᑎᑉᐰᑦ ᓚᑮᓯᒥᐅᓂᒃ, ᐅᓇᑕᕐᓂᖏᑕ ᐅᓪᓘᑉ ᐂᑉᐸᖓᓂ, ᑍᒫᑦᓮᓐᓇᖅ ᐱᓚᐅᕋᒥᒃ ᓕᑉᓇᒥ, ᐊᑕᐅᓯᕐᒥᒡᓘᓐᓃᑦ ᐃᓅᓕᒃᓯᓚᐅᓐᖏᓚᖅ, ᐃᒡᓗᒐᓴᖕᓃᑦᑐᓕᒫᑦ ᑐᖁᑉᐰᑦ. 33ᐊᖓᔪᖅᑳᕐᔪᐊᖅ ᕼᐅᕌᒻ ᒋᔨᕆᒥᐅᑕᖅ ᐃᑲᔪᕆᐊᕐᐳᖅ ᓚᑮᓯᒥᐅᓂᒃ; ᔮᓱᐊᓪᓕ ᓵᓚᒋᕚ ᐃᓄᓕᒫᖏᓪᓗ ᑐᖁᓪᓗᒋᑦ, ᐊᑕᐅᓯᕐᒥᒡᓘᓐᓃᑦ ᐊᓐᓇᒃᑐᖃᓚᐅᓐᖏᓚᖅ.
34ᑭᖑᓂᐊᒍᑦ, ᔮᓱᐊᒃᑯᑦ ᐅᓇᑕᕐᑎᖏᓪᓗ ᐊᐅᓪᓚᕐᐳᑦ ᓚᑮᓯᒥᑦ ᐃᒡᓚᓐᒧᑦ, ᐊᕙᑕᖏᕐᓗᒍᓗ ᐅᓇᑕᓕᕐᐹᑦ. 35ᓵᓚᒋᕚᓪᓗ ᐅᓪᓗᒥ ᑍᑦᓱᒪᓂᑦᓮᓐᓇᖅ; ᐃᓄᓕᒫᖏᓪᓗ ᑐᖁᕋᕐᐰᑦ ᐅᓪᓗᒥ ᑖᑦᓱᒪᓂ, ᑍᒫᑦᓮᓐᓇᖅ ᑍᒤᓚᐅᕋᒥᒃ ᓚᑮᓯᒥᐅᓄᑦ.
36ᑕᒪᑐᒪ ᑭᖑᕐᖓᒍᑦ ᔮᓱᐊ ᐅᓇᑕᕐᑎᖏᓪᓗ ᐊᐅᓪᓚᕐᐳᑦ ᐃᒡᓚᓐᒥᑦ ᕼᐃᐸᕋᓐ ᖃᖅᑲᖏᓐᓄᑦ, ᐅᓇᑕᕆᐊᕐᓗᒋᑦ. 37ᓵᓚᒋᕔᓪᓗ, ᐊᖓᔪᖅᑳᕐᔪᐊᖓᓗ ᑐᖁᑉᐹ ᐃᒡᓗᒐᓴᖕᓃᑦᑐᓪᓗ ᓄᓇᓖᓪᓗ ᖃᓂᒋᔭᖓᓃᑦᑐᓕᒫᑦ; ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᖃᓚᐅᓐᖏᓚᖅ, ᑍᒫᑦᓮᓐᓇᖅ ᑍᒤᓚᐅᕋᒥ ᐃᒡᓚᓐᒧᑦ, ᐊᓯᕈᓚᐅᕐᐹ ᐃᓄᓕᒫᖏᓪᓗ ᓄᖑᓪᓗᒋᑦ.
38ᑭᖑᓂᐊᒍᑦ ᔮᓱᐊᒃᑯᑦ ᐅᓇᑕᕐᑎᓕᒫᖏᓪᓗ ᐅᑎᕐᐸᓪᓕᐊᓕᕐᓗᑎᒃ ᑎᐱᕆᒧᐊᕐᐳᑦ; ᐅᓇᑕᓕᕐᓗᒍᓗ. 39ᓵᓚᒋᕚᓗ ᐊᖓᔪᖅᑳᕐᔪᐊᖓᓪᓗ ᓄᓇᓖᓪᓗ ᖃᓂᒋᔭᖓᓃᑦᑐᓕᒫᑦ ᑐᖁᕋᕐᐰᑦ; ᐊᑕᐅᓯᕐᒥᒡᓘᓐᓃᑦ ᐊᓐᓇᒃᑐᖃᓚᐅᓐᖏᓚᖅ; ᑍᒫᑦᓮᓐᓇᖅ ᕼᐃᐸᕋᓐᒧᑦ ᓕᑉᓇᒧᓪᓗ ᐊᖓᔪᖅᑳᕐᔪᐊᖏᓐᓄᓪᓗ ᑍᒤᓕᐅᓚᐅᕋᒥ, ᑍᒫᑦᓮᓐᓇᖅ ᐱᓇᓱᐊᓚᐅᕐᐳᖅ ᑎᐱᕆᒥᐅᓄᑦ ᐊᖓᔪᖅᑳᕐᔪᐊᖓᓄᓪᓗ.
40ᑕᕝᕙ ᔮᓱᐊᑉ ᓄᓇᓕᓕᒫᑦ ᓵᓚᒋᓚᐅᕐᐰᑦ, ᐊᖓᔪᖅᑳᕐᔪᐊᑦ ᖃᖅᑲᓃᑦᑐᑦ ᓵᓚᒋᓪᓗᒋᑦ, ᓯᕿᓂᐅᓪᓗ ᓄᐃᕕᐊᓃᑦᑐᑦ ᓂᒋᑉᒥ ᓯᕕᖓᔪᓂ ᓄᓇᓖᑦ, ᓯᕿᓂᐅᓪᓗ ᓂᐱᕕᐊᓃᑦᑐᑦ ᖃᖅᑲᓃᑦᑐᑦ, ᐊᒡᓛᑦ ᓯᕿᓂᐅᑉ ᓇᓛᓃᑦᑐᑦ ᓄᓇᒥ ᐸᓂᕐᑐᒥ ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᓚᐅᓐᖏᓔᑦ; ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑦᑕ ᑍᒤᓕᐅᖁᓚᐅᕐᒪᒍ. 41ᔮᓱᐊᓪᓗ ᐃᓚᒋᔭᖏᑕᓗ ᓵᓚᒋᓚᐅᕐᐰᑦ ᑲᑎᓯ-ᐸᕐᓂᐊᒥᑦ ᒑᓴᒧᑦ ᐃᒪᐅᑉ ᓯᓈᓄᑦ ᑎᑭᓪᓗᒋᑦ, ᒎᓯᓂᐅᓪᓗ ᓄᓇᓕᓕᒫᖓ ᐱᖃᓯᐅᑎᓪᓗᒍ, ᑕᑉᐸᐅᖓᓕᒫᖅ ᓯᕿᓂᐅᑉ ᑕᕐᕌᖓᓄᑦ ᒋᐱᐅᓂ ᑎᑭᓪᓗᒍ. 42ᔮᓱᐊᓪᓗ ᐊᖓᔪᖅᑳᕐᔪᐊᓕᒫᑦ ᓵᓚᒋᕔᑦ ᓄᓇᖁᑎᓕᒫᖏᓪᓗ ᐊᑕᐅᓯᐊᕐᓗᑎᒃ ᐅᓇᑕᕆᐊᕐᓗᒋᑦ, ᐊᑕᓂᐅᑉ ᐃᓴᕆᐊᓕᒥᐅᑉ ᒎᑎᖓᑦᑕ ᐅᓇᑕᕈᑎᓚᐅᕐᒪᒋᑦ ᐃᓴᕆᐊᓕᒥᐅᑦ. 43ᑕᕝᕙ ᔮᓱᐊᒃᑯᑦ ᐅᓇᑕᕐᑎᓕᒫᖏᓪᓗ ᐅᑎᕐᐳᑦ ᑕᖕᒫᕐᓯᒪᕕᖕᒥᓄᑦ ᒋᐅᓪᒐᐅᓪᒧᑦ.
Currently Selected:
ᔮᓱᐊᑉ ᐊᒡᓚᖏᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
