ᔮᓱᐊᑉ ᐊᒡᓚᖏᑦ 11
11
ᔮᓱᐊᑉ ᓵᓚᖃᕐᓂᖓ ᔮᐱᓐᒥᐅᓂᒃ ᐃᑲᔪᕐᑎᖏᓐᓂᒡᓗ
1ᐃᓴᕆᐊᓕᒥᐅᑦ ᓵᓚᖃᕐᓂᖏᑦ ᑐᓴᐅᒪᔭᐅᓕᕐᐳᖅ ᐊᖓᔪᖅᑳᕐᔪᐊᒧᑦ ᔮᐱᓂᒧᑦ ᕼᐂᔭᒥᐅᑕᕐᒧᑦ, ᐅᖃᕆᐊᕐᑐᕐᑎᑦᓯᕗᕐᓗ ᐊᖓᔪᖅᑳᕐᔪᐊᕐᒧᑦ ᔫᐸᐱᒧᑦ ᒤᑕᓐᒥᐅᑕᒧᑦ, ᐊᖓᔪᖅᑳᕐᔪᐊᒧᓪᓗ ᓯᒻᕌᓐᒧᑦ ᐊᒃᓴᐸᒥᐅᑕᕐᒧᑦ, 2ᐊᖓᔪᖅᑳᕐᔪᐊᓄᓪᓗ ᑕᕐᕋᒦᑦᑐᓄᑦ ᖃᖅᑲᒥᐅᓄᑦ ᔪᐊᕐᑕᓂᐅᓪᓗ ᓇᑎᕐᓇᖓᓃᑦᑐᓄᑦ ᓯᓂᕆᑎᐅᑉ ᓯᕿᓂᖓᓄᑦ, ᓇᑎᕐᓇᒦᑦᑐᓄᓪᓗ ᓇᐴᑦ-ᑐᐊᕆᐅᑉ ᓯᓈᓃᑦᑐᓄᑦ. 3ᐅᖃᕆᐊᕐᑐᕐᑎᑦᓯᓚᐅᕆᕗᖅ ᑬᓇᓂᒥᐅᓄᑦ ᔪᐊᕐᑕᓂᐅᓪᓗ ᑰᖓᑕ ᓯᓈᓃᑦᑐᓄᑦ, ᐊᒧᕅᒥᐅᓄᑦ, ᕼᐃᑍᑎᒥᐅᓄᑦ, ᐱᕆᔧᑎᒥᐅᓄᑦ, ᔨᐳᓮᑎᒥᐅᓄᑦ ᖃᖅᑲᓃᑦᑐᓄᑦ, ᕼᐃᕔᑎᑎᒥᐅᓄᓪᓗ ᓄᓇᓕᖕᓄᑦ ᓇᑎᕐᓇᒥ ᖃᖅᑲᐅᑉ ᕼᐊᕐᒪᓐ ᐊᑖᓃᑦᑐᓄᑦ ᒥᔅᐸᒥᐅᑦ ᓄᓇᖓᓃᑦᑐᓄᑦ. 4ᐂᓕᕐᐳᓪᓗ ᐅᓇᑕᕐᑐᒃᓴᓕᔭᕐᓗᑎᒃ, ᐅᓇᑕᕐᑎᖏᑦ ᐊᖑᑏᑦ ᐅᓄᕐᑐᒻᒪᕆᐊᓘᓚᐅᕐᐳᑦ ᓯᐅᕋᕐᑎᑐᑦ ᓯᒡᔭᒦᑦᑐᑎᑐᑦ, ᐅᓄᕐᑐᐊᓗᖕᓂᒃ ᕿᒻᒥᕐᔪᐊᖃᕐᓗᑎᒃ ᑲᓕᒐᖃᕐᑐᓂᒡᓗ ᐊᒃᓴᓗᐊᓕᖕᓂᒃ. 5ᑖᒃᑯᐊᓕᒫᓪᓗ ᐊᖓᔪᖅᑳᕐᔪᐊᑦ ᐃᓚᒌᓕᕐᐳᑦ ᑲᑎᓪᓗᑎᒃ, ᑕᖕᒫᓚᐅᕐᐳᓪᓗ ᒥᕉᒻ ᑰᒐᓛᖓᓂ, ᐅᓇᑕᕆᐊᕐᐸᓪᓕᐊᓪᓗᑎᒃ ᐃᓴᕆᐊᓕᒥᐅᓂᒃ.
6ᐊᑕᓂᕐᓗ ᐅᖃᕐᐳᖅ ᔮᓱᐊᒧᑦ, “ᑲᑉᐱᐊᒋᑦᑍᓕᒃᑭᑦ, ᑍᒤᓪᓗᐊᓕᕐᐸᑦ ᖃᐅᒃᐸᑦ ᑐᖁᑦᓱᒫᕐᐸᒃᑲ ᐊᑕᖏᕐᓗᒋᑦ, ᐃᓴᕆᐊᓕᒥᐅᑦ ᐱᓪᓗᒋᑦ; ᕿᒻᒥᕐᔪᐊᖏᑦ ᓂᐅᕈᕐᑕᕐᓗᒋᑦ ᑐᓯᐊᓕᕐᑎᓛᕐᐸᑎᑦ, ᑲᓕᒐᖏᓪᓗ ᐊᒃᓴᓗᐊᓖᑦ ᐃᑯᐊᓪᓚᒡᓗᒋᑦ.” 7ᑍᒤᒻᒪᑦ ᔮᓱᐊᑉ ᐅᓇᑕᕐᑐᒃᓴᖁᑎᓕᒫᓂᓗ ᐃᓚᒋᓪᓗᒋᑦ ᐅᓇᑕᕈᓐᓇᕐᑐᑦ, ᐅᐸᓗᐃᓪᓗᓂᒋᑦ ᐅᓇᑕᕐᐰᑦ ᒥᕉᒻ ᑰᒐᓛᖓᓂ. 8ᐊᑕᓂᐅᓪᓗ ᐃᓴᕆᐊᓕᒥᐅᑦ ᓵᓚᖃᕐᑎᑉᐰᑦ, ᐃᓴᕆᐊᓕᒥᐅᓪᓗ ᑐᖁᕅᓚᐅᕐᐳᑦ ᒪᓕᒡᓗᑎᒃ ᒥᔅᕆᐸᑦ-ᒤᒻᒧᑦ ᓮᑐᓂᒧᓪᓗ, ᓯᕿᓂᐅᑉ ᓄᐃᕕᖓᓄᑦ ᒥᔅᐱᐅᑉ ᓇᕐᓴᖓ ᑎᑭᓪᓗᒍ; ᐅᓇᑍᓐᓇᓚᐅᕐᐰᓪᓗ, ᐊᑕᖏᕐᓗᒋᑦ ᑐᖁᔪᐃᓐᓇᐅᓚᐅᖃᕐᑎᓐᓇᒋᑦ. 9ᔮᓱᐊᓪᓗ ᐱᓂᐊᕐᕕᒋᓚᐅᕐᐰᑦ ᐊᑕᓂᕐᒧᑦ ᑎᓕᔭᐅᓂᓂ ᒪᓕᒡᓗᒍ; ᕿᒻᒥᕐᔪᐊᖏᑕ ᓂᐅᖏᑦ ᐃᑭᓕᕐᓱᓚᐅᕐᐰᑦ ᑐᓯᐊᓕᕐᑎᓪᓗᒋᑦ, ᑲᓕᒐᖏᓪᓗ ᐊᒃᓴᓗᐊᓖᑦ ᐃᑯᐊᓪᓚᒃᓗᒋᑦ.
10ᔮᓱᐊᓗ ᑍᑦᓱᒪᓂᐅᑎᓪᓗᒍ ᐅᑎᕐᐳᖅ, ᕼᐂᔭᓗ ᓵᓚᒋᓪᓗᒍ, ᐊᖓᔪᖅᑳᕐᔪᐊᖓᓪᓗ ᑐᖁᓪᓗᒍ; ᑍᑦᓱᒪᓂ ᕼᐂᔭ ᓂᐊᖁᕆᔭᐅᓚᐅᕐᐳᖅ ᑖᒃᑯᓄᖓ ᐊᖓᔪᖅᑳᕐᔪᐊᖃᕐᕕᐅᔪᓕᒫᓄᑦ. 11ᑕᕝᕙᓃᑦᑐᓕᒫᑦ ᐃᓄᖏᑦ ᑐᖁᑉᐰᑦ, ᐊᑕᖏᑦᓯᐊᕐᓗᑎᒃ ᑐᖁᑕᐅᓚᐅᕐᐳᑦ; ᐊᓂᕐᓂᖃᕐᑐᓕᒫᑦ ᓄᖑᑕᐅᓚᐅᕐᐳᑦ, ᐃᒡᓗᒐᓮᓪᓗ ᕼᐂᔭ ᐃᑯᐊᓪᓚᒃᑎᓚᐅᕐᐰᑦ.
12ᔮᓱᐊᓪᓗ ᓵᓚᒋᓚᐅᕐᐰᑦ ᐃᒡᓗᒐᓴᓕᒫᑦ ᐊᖓᔪᖅᑳᕐᔪᐊᓕᒫᖏᓪᓗ, ᐊᑕᖏᕐᓗᒋᓪᓗ ᑐᖁᓚᐅᕐᐰᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑍᒫᒃ ᐱᖁᓚᐅᕐᓯᒪᖕᒪᒍ. 13ᐃᓴᕆᐊᓕᒥᐅᓪᓕ ᐃᑯᐊᓪᓔᓚᐅᓐᖏᓚᑦ ᐃᒡᓗᒐᓴᕕᓃᑦ ᐃᓂᖏᓐᓂ ᐃᒡᓗᒐᓴᓕᐅᕐᓯᒪᔪᓂᒃ, ᕼᐂᔭ ᑖᓐᓇᑐᐊᖅ; ᔮᓱᐊᑉ ᐃᑯᐊᓪᓚᒃᑕᑐᐊᕆᓚᐅᕐᐹ. 14ᐃᓴᕆᐊᓕᒥᐅᓪᓗ ᑎᒍᓯᓚᐅᕐᐳᑦ ᐃᒡᓗᒐᓴᖕᒥᐅᑦ ᐆᒪᔪᖁᑎᖏᓐᓂᒃ ᐱᖁᑎᖏᓐᓂᒡᓗ ᐱᑖᕆᓚᐅᕐᐰᑦ ᓵᓚᖃᐅᓯᐊᕆᓪᓗᒋᑦ; ᐃᓄᓕᒫᖏᓪᓕ ᑐᖁᓚᐅᕐᐰᑦ, ᐊᑕᖏᑦᓯᐊᕐᓗᒋᑦ ᐊᒥᐊᒃᑯᖃᕈᓐᓃᓚᐅᕐᐳᑦ. 15ᐊᑕᓂᐅᑉ ᐱᔨᓂ ᒨᓯᓯ ᑎᓕᓚᐅᕐᒪᒍ, ᑍᒤᒻᒪᑦ ᒨᓯᓯᐅᑉ ᔮᓱᐊ ᑎᓕᓚᐅᕐᐹ, ᔮᓱᐊᓪᓗ ᓈᓚᒃᓗᒋᑦ ᐱᓇᓱᐊᓚᐅᕐᐳᖅ; ᐊᑕᓂᐅᑉ ᑎᓕᓯᑦᔪᑎᒋᓚᐅᕐᑕᓕᒫᖏᑦ ᒨᓯᓯᒧᑦ ᐱᓇᓱᐊᕐᑍᓐᓇᕆᓚᐅᕐᐰᑦ.
ᔮᓱᐊᑉ ᓄᓇᓕᖁᑎᑖᕆᓚᐅᕐᑕᖏᑦ
16ᔮᓱᐊᑉ ᓄᓇᓕᒫᖅ ᐊᑕᖏᕐᓗᒍ ᓄᓇᑖᕆᕚ, ᖃᖅᑬᑦ ᓇᑎᕐᓁᓪᓗ ᑕᕐᕋᒥᐅᓄᑦ ᓯᕿᓂᕐᒥᐅᓄᑦ ᓂᒋᑉᒥ ᒎᓯᓂᐅᑉ ᖃᓂᒋᔭᓕᒫᖏᑦ ᓄᓇᓗ ᐸᓂᕐᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᔪᐊᕐᑕᓂᐅᓪᓗ ᓇᕐᓴᖓ. 17ᓄᓇᖁᑎᖓ ᑎᑭᐅᒪᕗᖅ ᖃᖅᑲᒥᑦ ᕼᐊᓚᒃᒥᑦ ᐱᒋᐊᕐᓗᒍ ᓰᐊᕆᐅᑉ ᒥᒃᓵᓄᑦ, ᐰᓕ-ᒑᑦᒧᑦ ᑎᑭᓪᓗᒍ, ᓕᐸᓇᓂᐅᑉ ᓇᕐᓴᖓᓄᑦ ᖃᖅᑲᒧᑦ ᕼᐊᕐᒪᓐ ᓯᕿᓂᖓᓄᑦ. ᐊᖓᔪᖅᑳᕐᔪᐊᓕᒫᖏᑦ ᓵᓚᒋᓚᐅᕐᐰᑦ, ᑐᖁᓪᓗᒋᓪᓗ. 18ᔮᓱᐊᑉ ᐊᑯᓂᐊᓗᒃ ᐅᓇᑕᖃᑎᒋᓚᐅᕐᐰᑦ ᑖᒃᑯᐊ ᐊᖓᔪᖅᑳᕐᔪᐊᓕᒫᑦ. 19ᐃᒡᓗᒐᓮᑦ ᐊᖏᖃᑎᖃᓚᐅᕐᑐᑦ ᐅᓇᑕᖃᑎᖃᕈᒪᓇᑎᒃ ᐃᓴᕆᐊᓕᒥᐅᓂᒃ ᐅᑯᐊᖑᕗᑦ ᒋᐱᐅᓂᒥᐅᑦ, ᑕᕝᕙᓂᓗ ᕼᐃᕔᑎᒥᐅᑦ ᐃᓚᖏᑦ ᓄᓇᖃᕐᑐᑦ, ᐊᓯᓕᒫᖏᓪᓕ ᓵᓚᒋᓚᐅᕐᐰᑦ ᐅᓇᑕᕐᓂᒃᑯᑦ. 20#ᒨᓯᓯ ᑕᓪᓕᒪᖏᑦ 7:16.ᐊᑕᓂᐅᑉ ᐅᓇᑕᕈᒪᑎᓚᐅᕐᐰᑦ ᐃᓴᕆᐊᓕᒥᐅᓂᒃ, ᑐᖁᑕᐅᖁᓪᓗᒋᑦ ᐊᓯᕈᕐᑕᐅᖁᓪᓗᒋᓪᓗ ᓄᖑᑕᐅᓗᑎᒃ, ᑕᒪᓐᓇ ᐊᑕᓂᐅᑉ ᑎᓕᓯᑦᔪᑎᒋᓚᐅᕐᒪᒍ ᒨᓯᓯᒧᑦ.
21ᑍᑦᓱᒪᓂᐅᑎᓪᓗᒍ ᔮᓱᐊ ᐂᕗᖅ ᐊᓯᕈᐃᓪᓗᓂᓗ ᐃᓄᒃᐸᖕᓂᒃ ᑍᔭᐅᔪᓂᒃ ᐊᓇᑭᒥᐅᓂᒃ ᓄᓇᖃᕐᑐᓂᒃ ᖃᖅᑲᓂ, ᕼᐃᐸᕋᓐᒥ, ᑎᐱᕆᒥ, ᐊᓈᑉᒥ, ᔫᑕᐅᓪᓗ ᖃᖅᑲᓕᒫᖏᓐᓂ ᓄᓇᖃᕐᑐᓂᒃ, ᐃᓴᕆᐊᓕᐅᓪᓗ ᖃᖅᑲᓕᒫᖏᓐᓂ ᓄᓇᖃᕐᑐᓂᒃ; ᔮᓱᐊᑉ ᐊᓯᕈᕐᑍᓐᓇᕆᓚᐅᕐᐰᑦ ᐃᒡᓗᒐᓴᓕᒫᖏᓪᓗ. 22ᐊᓇᑭᒥᐅᓂᑦ ᓇᓪᓕᐊᓐᓂᒡᓘᓐᓃᑦ ᐊᓐᓇᒃᑐᖃᓚᐅᓐᖏᓚᖅ ᐃᓴᕆᐊᓕᒥᐅᑦ ᓄᓇᖓᓂ; ᐅᓄᖏᑦᑐᑦ ᐊᒥᐊᒃᑯᒋᔭᑑᓚᐅᕐᐳᑦ ᓄᓇᓕᖕᓂ ᐅᑯᓇᓂ ᒑᓴᒥ, ᒑᑎᒥ, ᐋᔅᑖᑦᒥᓗ.
23ᑕᕝᕙ ᔮᓱᐊᑉ ᓄᓇᓕᒫᖅ ᓄᓇᑖᕆᓚᐅᕐᐹ, ᑍᒫᒃ ᐊᑕᓂᐅᑉ ᒨᓯᓯ ᐅᖃᐅᑎᓚᐅᕐᒪᒍ; ᔮᓱᐊᓪᓗ ᐃᓴᕆᐊᓕᒥᐅᓄᑦ ᓇᖕᒥᓂᕐᑖᕆᔭᐅᑎᓚᐅᕐᐹ, ᐊᕕᒃᑐᕐᑕᐅᑎᓪᓗᒍᓗ ᑭᖑᕙᕇᓄᑦ.
ᑭᖑᓂᖓᒍᓪᓗ ᐅᓇᑕᕈᓐᓃᑍᓐᓇᓚᐅᕐᐳᑦ.
Currently Selected:
ᔮᓱᐊᑉ ᐊᒡᓚᖏᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
