ᔪᐃᓕᐅᑉ ᐊᒡᓚᖏᑦ 2
2
ᐱᒡᓕᕐᑕᐅᔮᕐᑐᑦ ᓇᓗᓁᒃᑯᑕᐅᓂᖏᑦ ᐊᑕᓂᐅᑉ ᐅᓪᓗᖓᓄᑦ
1ᑎᑦᑐᓚᐅᑏᑦ ᓂᓪᓕᕐᑎᓯᒋᑦ ᓮᐅᓂᒥ, ᐊᑕᓂᐅᑉ ᖃᖅᑲᖓᓂ ᐃᑦᔪᕐᓁᑦᑐᒥ,
ᓄᓇᓕᓕᒫᓪᓗ ᓴᔪᒡᓕᑦ, ᐊᑕᓂᐅᑉ ᐅᓪᓗᖓ ᑎᑭᓕᕐᒪᑦ, ᖃᓂᑦᑑᓕᕐᓗᓂ.
2ᐅᓪᓗᖅ ᑖᕐᓯᔪᒫᕐᒪᑦ ᑲᑉᐱᐊᓇᕐᓗᓂᓗ, ᐅᓪᓗᖅ ᑖᕐᓯᔪᒫᕐᒪᑦ ᓄᕗᔭᓗᓂᓗ.
ᐱᒡᓕᕐᑕᐅᔮᕐᑐᑦ ᐅᓄᕐᑐᕐᔪᐊᑦ ᑖᕐᓯᑎᑦᓯᔪᒫᕐᐳᑦ ᖃᖅᑲᒥᒃ, ᐊᔪᖏᑦᑐᕐᔪᐊᑦ ᐱᔪᓐᓇᕐᑐᕐᔪᐊᓪᓗ ᐊᑭᕅᑦ ᑎᑭᑦᓱᒫᕐᐳᑦ,
ᑍᒫᒃ ᐱᔪᖃᓚᐅᕐᓯᒪᓐᖏᓚᖅ ᑍᒤᑦᑐᖃᓚᐅᕐᓯᒪᓂᐊᕋᓂᓗ ᒪᑐᒪ ᑭᖑᓂᐊᒍᑦ.
3ᐃᑯᒪᒧᑦ ᓄᖑᑕᐅᕗᑦ ᓯᕗᓂᐊᓃᑦᑐᑦ ᑭᖑᓂᐊᓃᑦᑐᓪᓗ ᐃᑯᐊᓚᕗᑦ;
ᓄᓇᓗ ᓯᕗᓂᐊᓃᑦᑐᖅ ᐱᕈᕐᓰᕕᒃ ᐄᑕᓂᒥᐅᖑᔮᕐᑐᖅ,
ᑭᖑᓂᐊᓂᓗ ᓄᓇ ᐃᓄᖃᔪᐃᑦᑐᑐᑦ ᑍᒤᓕᕐᐳᖅ,
ᑭᓇᓘᓐᓃᑦ ᕿᒫᔪᓐᓇᕐᓂᐊᓐᖏᓚᖅ.
4 #
ᑕᑯᑎ 9:7-9. ᕿᒻᒥᕐᔪᐊᑎᑐᑦ ᑕᑯᒃᓴᐅᕗᑦ, ᕿᒻᒥᕐᔪᐊᑎᑐᑦ ᐅᓇᑕᕐᑐᕐᓯᐅᑎᑐᑦ ᓱᑲᑦᑑᑎᒋᕗᑦ.
5ᐅᓇᑕᐅᑎᑐᑦ ᐊᒃᓴᓗᐊᓕᒃᑎᑐᑦ ᑍᒫᒃ ᓂᐱᖅᑯᕐᑐᑎᒋᕗᑦ,
ᒥᓯᒃᑕᕐᐳᑦ ᖃᖅᑲᐅᑉ ᖄᖏᑎᒍᑦ; ᐃᕕᒃᑎᑐᑦ ᐃᑯᒪᔪᑐᑦ ᓂᓪᓕᐊᕗᑦ,
ᓯᐊᒻᒪᒃᐳᑦ ᐅᓇᑕᕐᑐᒃᓴᕐᔪᐊᑎᑐᑦ ᐅᓇᑕᕆᐊᕐᑐᕐᑐᑎᑐᑦ.
6ᐃᓄᐃᑦ ᓯᕗᓂᐊᓃᑦᑐᑦ ᓴᔪᒃᐳᑦ ᑲᑉᐱᐊᓱᖕᓂᕐᒧᑦ,
ᑮᓇᖏᓪᓗ ᐊᐅᖏᕈᑎᕗᑦ.
7ᐅᓪᓚᒃᐳᑦ ᐊᔪᖏᑦᑐᕐᔪᐊᑎᑐᑦ ᐅᓇᑕᕐᑎᑎᑐᑦ,
ᐊᑭᓐᓇᒃᑯᑦ ᒪᔪᕋᕐᐳᑦ ᐊᖑᑎᑎᑐᑦ ᐅᓇᑕᕆᐊᕐᑐᕐᑐᑎᑐᑦ;
ᐱᓱᒃᐳᑦ ᑐᑭᓕᐊᕐᓗᑎᒃ ᓴᖑᐃᕋᑎᒡᓗ.
8ᐃᒻᒥᖕᓄᑦ ᐱᖑᔭᐅᑎᓐᖏᓚᑦ, ᐱᓱᒃᐳᑦ ᐃᒻᒥᖕᓂᒃ ᐊᑐᕆᐊᓕᑎᒃ ᐊᑐᕐᓗᒍ,
ᐅᓇᑕᐅᑎᓄᑦ ᐱᒋᐊᕐᑕᐅᒐᓗᐊᕈᑎᒃ ᓄᖅᑲᕐᑎᑕᐅᓂᐊᓐᖏᓚᑦ.
9ᑐᐊᕕᕐᓗᑎᒃ ᐃᒡᓗᒐᓴᖕᓄᐊᕐᐳᑦ, ᐊᕙᓗᕐᔪᐊᒃᑯᑦ ᐅᓪᓚᒃᐳᑦ;
ᒪᔪᕋᕐᐳᓪᓗ ᐃᒡᓗᓄᑦ, ᐃᒐᓛᑎᒍᑦ ᐃᑎᕐᐳᑦ ᑎᒡᓕᒃᑎᑐᑦ.
10 #
ᑕᑯᑎ 8:12. ᓄᓇᕐᔪᐊᕐᓗ ᓴᔪᒃᑎᑉᐹᑦ, ᕿᓔᓪᓗ ᓴᔪᒃᐳᑦ;
ᓯᕿᓂᕐᓗ ᑕᖅᑭᕐᓗ ᑖᕐᓯᕘᒃ, ᐅᓪᓗᕆᐊᓪᓗ ᖃᐅᒪᔫᓐᓃᕐᐳᑦ.
11 #
ᑕᑯᑎ 6:17. ᐊᑕᓂᐅᑉ ᓂᐱᒥᓄᑦ ᐅᓇᑕᕐᑐᒃᓴᖁᑎᓂ ᐊᐅᓚᑉᐰᑦ,
ᐅᓇᑕᕐᑐᒃᓴᖁᑎᖏᑦ ᐅᓄᕐᑐᕐᔪᐊᖑᕗᑦ;
ᓂᐱᖓᓂᒃ ᓈᓚᒃᑐᖅ ᓲᖑᔪᕐᔪᐊᖑᕗᖅ.
ᐊᑕᓂᐅᑉ ᐅᓪᓗᖓ ᑲᑉᐱᐊᓇᕐᐳᖅ;
ᑭᓇᓖ ᑕᒪᑐᒥᖓ ᐊᓂᒍᐃᔪᓐᓇᕐᐹ?
ᖃᕿᐊᓕᖁᔨᓂᖅ
12ᐊᑕᓂᖅ ᐅᖃᕐᐳᖅ, “ᒫᓐᓇ ᑍᒤᒻᒪᑦ, ᐃᓗᖏᕐᑐᕐᓗᓯ ᐅᕙᓐᓄᑦ ᐅᑎᓕᕆᑦᓯ,
ᓂᕆᑦᑍᓕᓗᓯ, ᕿᐊᓗᓯ, ᕿᒃᓵᒡᓗᓯᓗ.”
13ᐆᒻᒪᑎᓯ ᐊᓕᒃᓯᒋᑦ, ᐊᓐᓄᕌᓯ ᐱᓇᒋᑦ;
ᐊᑕᓂᕐᒧᑦ ᒎᑎᑦᓯᓐᓄᑦ ᐅᑎᓕᕆᑦᓯ,
ᑖᓐᓇ ᐱᑦᓯᐊᕐᓂᖃᕐᒪᑦ ᓂᑲᒍᓱᒡᓗᓂᓗ,
ᓂᓐᖓᒃᓴᕅᖏᑦᑐᖅ ᓇᓪᓕᒍᓱᒃᑐᕐᔪᐊᖑᓂᕐᒥᓄᓪᓗ ᓱᒋᐊᕐᓯᔪᒪᓐᖏᓚᖅ.
14ᐃᒻᒪᖄᓕ ᐃᓱᒪᓂ ᐊᓯᑦᔨᕐᓂᐊᕐᐹ ᓮᒻᒪᕐᑎᓪᓗᓯᓗ,
ᓂᐊᖂᔭᒃᓴᒥᒃ ᕔᓂᒥᒡᓗ ᑐᓂᕐᕈᓯᕈᑎᒃᓴᖃᓕᕐᓗᓯ ᐊᑕᓂᕐᒧᑦ ᒎᑎᑦᓯᓐᓄᑦ.
15ᑎᑦᑐᓚᐅᑎᓯ ᓂᓪᓕᕐᑎᓯᒋᑦ ᓮᐅᓂᒥ,
ᓂᕆᑦᑍᓕᖁᔨᒋᑦᓯ, ᐃᓄᐃᓪᓗ ᑲᑎᖁᓗᒋᑦ.
16ᐃᓄᐃᑦ ᑲᑎᖁᓯᒋᑦ, ᐃᑦᔪᕐᓁᓕᑎᓪᓗᒋᓪᓗ;
ᐃᓄᑐᖃᐅᔪᑦ, ᓱᕈᓰᓪᓗ ᐊᒫᒪᒃᑎᑕᐅᔪᓪᓗ;
ᓄᓕᐊᓂᕋᑖᕐᑐᑦ ᐅᐃᓂᕋᑖᕐᑐᓪᓗ ᐊᖏᕐᕋᒥᖕᓂᒃ ᕿᒤᓕᕐᓕᑦ ᑲᑎᖃᑕᐅᖕᒥᓗᑎᒃ.
17ᑐᓂᕐᕈᓯᕐᑎᑦᓯᔩᑦ ᐱᔨᑦᓯᕐᐸᒃᑐᑦ ᑭᒡᒐᕐᑐᕐᓗᑎᒃ ᐊᑕᓂᕐᒥᒃ,
ᕿᐊᓕᕐᓕᑦ ᑐᒃᓯᐊᕐᕕᒡᔪᐊᑉ ᑐᕐᓲᖓᑕ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓂ;
ᐅᖃᕐᓗᑎᒡᓗ, “ᐃᓄᖁᑎᑎᑦ ᓂᑲᒋᓚᐅᒃᑭᑦ, ᐊᑕᓃᖅ;
ᐃᓅᖃᑎᒌᒡᔪᐊᓄᑦ ᔫᑎᐅᖏᑦᑐᓄᑦ ᓇᕐᕈᓇᕐᓯᑎᑕᐅᖁᓇᒋᑦ ᒥᑕᐅᑎᒋᔭᐅᖁᓇᒋᓪᓗ
ᐅᖃᖁᓇᒋᓪᓗ, ‘ᓇᐅᒡᓕ ᒎᑎᖓᑦ?’”
ᒎᑎᐅᑉ ᐅᑎᕐᑎᑦᓯᓂᖓ ᓄᓇᒥᒃ ᐱᕈᕐᑐᖃᑦᓯᐊᓕᕐᑎᓪᓗᒍ
18ᑕᕝᕙ ᐊᑕᓂᐅᑉ ᓯᕐᓈᕐᓂᐊᕐᐹ ᓄᓇᖁᑎᓂ,
ᐃᓄᖁᑎᓂᓗ ᐃᓚᑦᓱᒋᓕᕐᓂᐊᕐᐰᑦ.
19ᐊᑕᓂᐅᓪᓗ ᐃᓄᖁᑎᓂ ᑭᐅᔪᒫᕐᐰᑦ ᐅᖃᐅᑎᓗᒋᓪᓗ,
“ᑕᑯᒋᑦ, ᑐᓂᓯᕕᒋᓂᐊᕐᐸᑦᓯ ᓂᐊᖂᔭᒃᓴᒥᒃ ᕔᓂᒥᒡᓗ ᓄᑖᒥᒃ
ᐸᐅᕐᖎᓪᓗ ᐅᕐᓱᖏᓐᓂᒃ, ᓈᒻᒪᒃᓯᓂᐊᕐᐳᓯ
ᐃᓅᖃᑎᒌᒡᔪᐊᓄᓪᓗ ᓇᕐᕈᒋᔭᐅᓂᐊᕈᓐᓁᕐᐳᓯ.
20ᐅᓇᑕᕐᑐᒃᓮᑦ ᐅᓐᓄᐊᑉ ᓇᓛᓂᑦ ᐱᔪᑦ ᐅᖓᓯᒋᔭᑦᓯᓐᓄᑦ ᐊᐅᓪᓚᕐᑎᑦᓱᒫᕐᐸᒃᑲ,
ᓯᖏᓪᓗᒋᑦ ᐃᓄᖃᔪᐃᑦᑐᒧᑦ ᓯᐅᕅᓐᓇᕐᒧᑦ,
ᓯᕗᓪᓖᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓄᐃᕕᐊᓄᑦ ᐂᑎᓐᓂᐊᕐᐸᒃᑲ,
ᑭᖑᓪᓖᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓂᐱᕕᐊᓄᑦ ᐂᑎᓪᓗᒋᑦ.
ᑕᕝᕙᓂᓗ ᐃᒍᓇᕈᒫᕐᐳᑦ ᑎᐹᕿᓗᑎᒃ
ᐱᐅᖏᑦᑐᐊᓗᖕᒥᒃ ᐃᓕᑦᓯᓐᓄᑦ ᐱᓂᐊᓚᐅᕐᓂᖏᑦ ᐱᓪᓗᒋᑦ.
21ᓄᓈ ᑲᑉᐱᐊᓱᖕᓂᐊᕐᓇᒃ ᖁᕕᐊᓱᓕᕆᑦ ᓯᕆᓗᑎᓪᓗ,
ᐊᑕᓂᖅ ᐱᓂᐊᕐᓂᖃᕐᒪᑦ ᑲᒪᓇᕐᑐᓂᒃ!
22ᓯᕘᕋᓂᐊᕋᓯ ᐆᒪᔪᐃᑦ ᓄᔪᐊᕐᑐᑦ
ᐱᕈᕐᑐᐃᑦ ᓇᑎᕐᓇᒦᑦᑐᑦ ᑐᖑᔪᕐᓯᓕᕐᒪᑕ;
ᓇᐹᕐᑐᓪᓗ ᐸᐅᕐᖓᕐᑖᓕᕐᒪᑕ,
ᓇᐹᕐᑐᐃᑦ ᐱᒋᓕᒃᓮᑦ ᕔᓂᒃᓮᓪᓗ ᐸᐅᕐᖓᖏᑦ ᐱᕈᑦᓯᐊᓕᕐᒪᑕ.
23ᖁᕕᐊᓱᒋᑦᓯ, ᓮᐅᓂᐅᑉ ᕿᑐᕐᖓᖏᑦ,
ᖁᕕᐊᓱᒋᑦᓯ ᐊᑕᓂᖅ ᒎᑎᓯ ᐃᓕᑦᓯᓐᓄᑦ ᐱᓂᐊᕐᓯᒪᓂᖓ ᐱᑦᔪᑎᒋᓗᒍ,
ᓯᓚᓗᒡᕕᐅᑎᒻᒪᓯ ᓯᕗᓪᓕᕐᓯᐅᒻᒥᒃ ᓱᖁᓯᔪᐃᑦᑑᓂᕐᒥᓄᑦ,
ᓯᓚᓗᒡᕕᐅᑎᓕᕐᒪᓯ ᓯᕗᓪᓕᕐᓯᐅᒻᒥᒃ ᑭᖑᓪᓕᕐᓯᐅᒻᒥᒡᓗ
ᓲᕐᓗ ᑍᑦᓱᒪᓂᑐᑦ.
24ᓂᐊᑰᔭᒃᓮᑦ ᐃᕖᔭᕐᑕᐅᕕᖏᑦ ᑕᑕᓐᓂᐊᕐᐳᑦ ᓂᐊᖂᔭᒃᓴᓂᒃ,
ᐴᒃᓮᑦ ᕔᓂᒧᑦ ᐸᐅᕐᖎᓪᓗ ᐅᕐᓱᖏᓐᓄᑦ ᑕᑕᑦᓱᒫᕐᐳᖅ ᖄᒥᓪᓗᑎᒃ.
25ᐅᑎᕐᑎᑦᓯᕕᒋᓂᐊᕐᐸᑦᓯ ᐊᕐᕌᒍᓂᒃ ᐊᓯᐅᔨᓚᐅᕐᑕᑦᓯᓐᓂᒃ
ᐱᒡᓕᕐᑕᐅᔮᕐᑐᑦ ᐅᓄᕐᑐᕐᔪᐊᑦ ᓂᕆᓚᐅᕐᑕᖏᓐᓂᒃ,
ᐱᒡᓕᕐᑕᐅᔮᕐᑐᑦ ᐹᕐᖑᕐᑐᑦ, ᓄᖒᑦᓯᔪᓪᓗ, ᑕᒧᐊᔪᓪᓗ
ᑎᓕᓚᐅᕋᒃᑭᑦ ᐅᓇᑕᕐᑐᒃᓴᕐᔪᐊᑎᑐᑦ ᐊᑯᓐᓇᑦᓯᓐᓄᑦ.
26ᐊᒥᒐᖏᑦᑐᒥᒃ ᓂᕆᔪᒫᕐᐳᓯ ᐊᕿᐊᑦᑐᕐᓗᓯᓗ,
ᓂᕐᑐᕈᒫᕐᐸᓯ ᐊᑕᓂᐅᑉ ᒎᑎᐅᑉ ᐊᑎᖓ.
ᑲᒪᓇᕐᑐᓂᒃ ᐱᓂᐊᕐᓯᒪᓂᖓ ᐃᓕᑦᓯᓐᓄᑦ ᐱᓪᓗᒍ,
ᐃᓄᖁᑎᒃᑲ ᑲᓐᖑᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑦ.
27ᖃᐅᔨᔪᒫᕐᐳᓯᓗ ᐃᓴᕆᐊᓕᒥᐅᑦ ᐊᑯᓐᓂᖓᓃᓐᓇᒪ:
ᐅᕙᖓ ᐊᑕᓂᐅᕗᖓ ᒎᑎᓯ ᐊᓯᓐᓂᒃ ᐱᑕᖃᓐᖏᓚᖅ.
ᐃᓄᖁᑎᒃᑲ ᖃᖓᓕᒫᖅ ᑲᓐᖑᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑦ.”
ᐊᑕᓂᐅᑉ ᐅᓪᓗᖓ
28“ᓇᓪᓕᐅᑎᔪᒫᕐᐳᖅ ᒪᑐᒪ ᑭᖑᕐᖓᒍᑦ ᐊᓂᕐᓂᕋ ᑯᕕᔪᒫᕋᒃᑯ ᐃᓄᓕᒫᓄᑦ;
ᐃᕐᓂᓯ ᐸᓂᓯᓗ ᐅᖃᐅᓯᖃᖃᑦᑕᕈᒫᕐᐳᑦ ᐅᖃᐅᓯᐅᖁᔭᓐᓂᒃ,
ᐃᓄᑐᖃᓯ ᓯᓐᓇᒃᑑᒪᖃᑦᑕᕈᒫᕐᐳᑦ,
ᐃᓅᓱᒃᑐᓯᓗ ᑕᑯᑎᑦᔪᑎᓂᒃ ᑕᑯᖃᑦᑕᕈᒫᕐᐳᑦ.
29ᑭᒡᒐᓐᓄᓪᓗ ᐊᖑᑎᓄᑦ ᐊᕐᓇᓄᓪᓗ ᐊᓂᕐᓂᕋ ᑯᕕᔪᒫᕐᐸᕋ,
ᐅᓪᓗᓂ ᑍᒃᑯᓇᓂ.
30ᑲᒪᓇᕐᑐᓂᒃ ᓇᓗᓇᕐᑐᓂᒡᓗ ᑕᑯᒃᓴᐅᑎᑦᓯᔪᒫᕐᐳᖓ ᕿᓚᖕᒥ ᓄᓇᒥᓗ,
ᐊᐅᖕᒥᒃ ᐃᑯᒪᒥᒃ ᐃᓯᕐᓗᒡᔪᐊᒥᒡᓗ.
31 #
ᒫᑎᐅᓯ 24:29; ᒫᑯᓯ 13:24,25; ᓘᑲᓯ 21:25; ᑕᑯᑎ 6:12,13. ᓯᕿᓂᕐᓗ ᑖᕐᓯᔪᒫᕐᐳᖅ,
ᑕᖅᑭᕐᓗ ᐊᐅᒃᑎᑐᑦ ᐊᐅᐸᕐᓯᓗᓂ,
ᐊᑕᓂᐅᑉ ᐅᓪᓗᕐᔪᐊᖓ ᑲᒪᓇᕐᑐᕐᔪᐊᖅ ᓇᓪᓕᐅᑎᖅᑳᕐᑎᓐᓇᒍ.
32 #
ᐋᐴᓯᑕᓖᑦ 2:17-21. #
ᕉᒪᒥᐅᓄᑦ 10:13. ᒪᑐᒪ ᑭᖑᕐᖓᒍᑦ ᓇᓪᓕᐊᑦ ᐊᑕᓂᐅᑉ ᐊᑎᖓᓂ ᑐᒃᓯᐊᕐᑐᖅ ᐱᐅᓕᔭᐅᓛᕐᐳᖅ.
ᖃᖅᑲᒥ ᓮᐅᓂᒥ ᔨᕉᓴᓕᒥᓗ ᓴᐳᑦᔭᐅᕕᒃᓴᖃᕈᒫᕐᐳᖅ.
ᐊᑕᓂᖅ ᐅᖃᓚᐅᕐᒪᑦ, ᑍᒤᑦᓱᒫᕐᐳᖅ ᐃᓄᖁᑎᖏᓐᓂ ᐊᒥᐊᒃᑰᔪᓂ
ᐊᑕᓂᐅᑉ ᕾᖁᔭᖏᓐᓂ.”
Currently Selected:
ᔪᐃᓕᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
