ᔪᐃᓕᐅᑉ ᐊᒡᓚᖏᑦ 1
1
1ᐊᑕᓂᖅ ᐅᖃᕐᐳᖅ ᔪᐃᓕᒧᑦ ᐱᑐᐃᓕᐅᑉ ᐃᕐᓂᖓᓄᑦ.
ᐃᓄᐃᑦ ᕿᒃᓵᖕᓂᖏᑦ ᓂᐊᖂᔭᒃᓮᑦ ᐊᓯᕈᕐᑕᐅᓂᖏᓐᓄᑦ
2ᒪᑐᒥᖓ ᑐᓴᕆᑦᓯ, ᐃᓕᑦᓯ ᐊᖓᔪᒃᓯᐅᔪᓯ;
ᔫᑕᒥᐅᑕᐅᔪᓯ ᐃᓘᓐᓇᓯ ᓈᓚᒋᑦᓯ!
ᑍᒤᑦᑐᒦᒃ ᓇᓪᓕᐅᑎᔪᖃᓚᐅᕐᓯᒪᕚ ᐃᓅᑎᓪᓗᓯ,
ᐅᕝᕙᓘᓐᓃᑦ ᐊᑖᑕᒋᓚᐅᕐᑕᓯ ᐃᓅᑎᓪᓗᒌᑦ?
3ᕿᑐᕐᖓᓯ ᐅᓂᒃᑲᐅᑎᓯᒋᑦ ᑕᒪᑐᒥᖓ;
ᕿᑐᕐᖓᒥᖕᓄᑦ ᐅᓂᒃᑳᖁᓪᓗᒋᑦ,
ᕿᑐᕐᖓᖏᑕᓗ ᑭᖑᕚᖏᓐᓄᑦ.
4ᐅᓄᕐᑐᕐᔪᐊᑦ ᓂᕆᔩᑦ ᐱᒡᓕᕐᑕᐅᔮᕐᑐᑦ ᓂᕆᓂᐊᕐᐳᑦ ᐱᕈᕐᑐᓂᒃ,
ᐊᒥᐊᒃᑯᖏᑦ ᓂᕆᔭᐅᓂᐊᕐᐳᑦ ᐱᒡᓕᕐᑕᐅᔮᕐᑐᓄᑦ ᐹᕐᖑᕐᑐᓄᑦ ᐅᓄᕐᑐᕐᔪᐊᓄᑦ,
ᐱᒡᓕᕐᑕᐅᔮᕐᑐᓪᓗ ᐹᕐᖑᕐᑐᑦ ᐊᒥᐊᒃᑯᖏᑦ,
ᓂᕆᔭᐅᓂᐊᕐᐳᑦ ᓄᖑᕅᔨᓄᑦ ᐱᒡᓕᕐᑕᐅᔮᕐᑐᓄᑦ.
5ᑐᐸᓕᕆᑦᓯ, ᐃᓕᑦᓯ ᐋᖓᔮᕐᑎᐅᔪᓯ, ᕿᐊᓗᓯᓗ;
ᓂᐹᓕᕆᑦᓯ ᐃᓕᑦᓯ ᕔᓂᑐᕐᑎᐅᔪᓯ,
ᕔᓂᐅᑉ ᐃᑦᓯᒃᓴᖏᑦ ᓄᑖᑦ ᐊᓯᕈᕐᑕᐅᖕᒪᑕ.
6 #
ᑕᑯᑎ 9:8. ᐱᒡᓕᕐᑕᐅᔮᕐᑐᑦ ᐃᓅᖃᑎᒌᒡᔪᐊᑎᑐᑦ ᐊᓯᕈᐃᒋᐊᕐᑐᕐᒪᑕ ᓄᓇᖁᑎᑦᑎᓐᓂᒃ,
ᐅᓄᓗᐊᕐᒪᑕ ᐊᔪᖏᑦᑑᓗᐊᕐᓗᑎᒡᓗ ᓈᓴᒐᒃᓴᐅᖏᑦᑐᑦ;
ᑭᒍᑎᖃᕐᐳᑦ ᓛᔭᑎᑐᑦ,
ᑐᓗᕆᐊᖏᑦ ᓛᔭᐅᑉ ᐊᕐᓇᓪᓗᖏᑎᑐᑦ ᑍᒤᑉᐳᑦ.
7ᕔᓂᓕᐅᕐᕕᕗᑦ ᐊᓯᕈᕐᑕᐅᖕᒪᑕ,
ᓇᐹᕐᑐᐃᓪᓗ ᐸᐅᕐᖓᓖᑦ ᐱᒋᓕᖕᓂᒃ ᓂᕆᔭᐅᖕᒪᑕ,
ᓇᐹᕐᑐᐃᑉ ᐊᒥᕅᔭᑦᓯᐊᕐᓗᒋᑦ ᐃᒋᑕᐅᕗᑦ;
ᐊᕙᓚᖓᔪᖏᓪᓗ ᖃᑯᕐᓯᓪᓗᑎᒃ.
8ᕿᐊᒋᑦᓯ, ᐃᓕᑦᓯ ᐃᓅᔪᓯ,
ᐊᕐᓇᑐᑦ ᐃᓅᓱᒃᑑᓪᓗᓂ ᕿᒃᓵᒍᑎᖃᕐᑐᑐᑦ
ᐅᐃᑖᕆᓂᐊᓚᐅᕐᑕᖓ ᑐᖁᖕᒪᑦ.
9ᓂᐊᖂᔭᒃᓴᒥᒃ ᕔᓂᒥᒡᓘᓐᓃᑦ ᑐᓂᕐᕈᓯᕈᑎᒃᓴᖃᕈᓐᓁᕐᒪᑦ
ᐊᑕᓂᐅᑉ ᐃᒡᓗᖓᓂ;
ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᐸᒃᑐᑦ
ᕿᒃᓵᓕᕐᐳᑦ ᑐᓂᕐᕈᑎᒃᓴᕐᑕᖃᕈᓐᓁᕐᒪᑦ ᐊᑕᓂᕐᒧᑦ.
10ᐱᕈᕐᓰᕖᑦ ᐊᑐᕈᓐᓁᕐᐳᑦ;
ᓄᓇᓗ ᕿᒃᓵᒃᐳᖅ, ᓂᐊᑰᔭᒃᓮᑦ ᐊᓯᕈᕐᑕᐅᓂᖏᓐᓄᑦ,
ᐸᐅᕐᖎᓪᓗ ᐸᓂᕐᐳᑦ ᕔᓂᒃᓮᑦ,
ᓇᐹᕐᑐᐃᓪᓗ ᐅᕐᓱᒃᓴᕐᑕᓖᑦ ᑐᖁᓕᕗᑦ.
11ᐅᒡᒍᐊᓕᕆᑦᓯ ᐃᓕᑦᓯ ᐱᕈᕐᓰᕕᓕᕆᔨᐅᔪᓯ,
ᕿᐊᓕᕆᑦᓯ ᐃᓕᑦᓯ ᕔᓂᓕᐅᕐᑎᐅᔪᓯ,
ᕿᒃᓵᒍᑎᒋᓕᕐᓯᒋᒃ ᐃᕖᑦ ᓂᐊᑰᔭᒃᓮᓪᓗ ᐱᕈᕐᓰᕕᖕᒥ ᐊᓯᕈᕐᑕᐅᖕᒪᑕ.
12ᕔᓂᒃᓮᑦ ᐸᓂᕐᒪᑕ,
ᓇᐹᕐᑐᐃᓪᓗ ᐸᐅᕐᖓᒃᓴᓖᑦ ᑐᖁᓕᖕᒪᑕ;
ᓇᐹᕐᑐᐃᑦ ᐱᕈᕐᑐᓖᑦ ᐃᓘᓐᓇᑎᒃ ᑐᖁᓕᖕᒪᑕ,
ᐃᓄᐃᑦ ᖁᕕᐊᓱᖕᓂᖏᑦ ᐊᓯᐅᕗᑦ.
13ᐊᓐᓄᕌᓕᕆᑦᓯ ᐊᕐᔭᓂᓕᕐᑎᕐᓯᒪᔪᓂᒃ ᕿᐊᓗᓯᓗ,
ᐃᓕᑦᓯ ᑐᓂᕐᕈᓯᕐᑎᑦᓯᔨᐅᔪᓯ,
ᕿᒃᓵᒋᑦᓯ ᐃᓕᑦᓯ ᐱᔨᑦᓯᕐᑎᐅᔪᓯ ᑐᓂᕐᕈᓯᕐᕕᖕᒥ,
ᕾᒋᑦᓯ, ᐅᓐᓄᐊᓕᒫᖅ ᐊᓐᓄᕌᕐᓯᒪᓗᓯ ᐊᕐᔭᓂᓕᕐᑎᕐᓯᒪᔪᓂᒃ,
ᐃᓕᑦᓯ ᐊᔪᕆᕐᑐᐃᕙᒃᑐᓯ! ᑐᓂᕐᕈᓯᕈᑎᒃᓴᖃᕈᓐᓁᕐᒪᑦ
ᓂᐊᖂᔭᒃᓴᓂᒃ ᕔᓂᒥᒡᓘᓐᓃᑦ ᒎᑎᒧᑦ.
14ᓂᕆᑦᑍᓕᖁᔨᒋᑦᓯ,
ᑲᑎᖁᔨᓗᓯ ᐃᓄᓕᒫᓂᒃ;
ᓯᕗᓕᕐᑏᑦ ᑲᑎᖁᓯᒋᑦ ᔫᑕᐅᓪᓗ ᐃᓄᓕᒫᖏᑦ,
ᐊᑕᓂᐅᑉ ᒎᑎᓯ ᐃᒡᓗᖓᓄᑦ,
ᑐᒃᓯᐊᕐᓗᓯ ᕿᓄᒋᑦᓯ ᐊᑕᓂᕐᒧᑦ.
15 #
ᐂᓮᐊᓯ 13:6. ᐊᑕᓂᐅᑉ ᐅᓪᓗᖓ ᖃᒡᓕᕗᖅ;
ᑎᑭᓐᓂᐊᕐᐳᖅ ᐊᓯᕈᐃᔭᕐᑐᕐᑐᑐᑦ ᐊᔪᒐᖃᖏᑦᑐᕐᔪᐊᕐᒥᓐᖔᕐᓗᓂ.
16ᓂᕿᒃᓴᕗᑦ ᐊᓯᕈᕐᑕᐅᕗᑦ ᑕᑯᓐᓇᑐᐃᓐᓇᕐᑎᓪᓗᑕ,
ᖁᕕᐊᓱᖕᓂᕐᑕᖃᕉᓐᓁᕐᐳᖅ ᒎᑎᑦᑕ ᐃᒡᓗᖓᓂ.
17ᐱᕈᕐᓯᐊᒃᓮᑦ ᑐᖁᕗᑦ ᓄᓇᐅᑉ ᐸᓂᕐᓂᖓᓄᑦ,
ᓯᕐᓗᐊᑦ ᓱᕋᒃᑎᕐᐳᑦ ᐃᓗᓕᖃᖏᓐᓇᒥᒃ ᓂᐊᖂᔭᒃᓴᓂᒃ.
18ᐃᒻᒧᒃᓯᐅᒊᑦ ᓂᓪᓕᐊᖏᓐᓇᓕᕐᐳᑦ ᑳᖕᓂᕐᒧᑦ,
ᕿᑲᕈᓐᓁᓪᓕᕗᑦ ᓂᕆᔭᒃᓴᖃᖏᓐᓇᒥᒃ,
ᓰᐲᓪᓗ ᐱᕐᓕᓕᕐᐳᑦ.
19ᐃᓕᖕᓄᑦ ᐊᑕᓃᖅ ᐃᓗᖏᕐᓱᕐᓗᖓ ᑐᒃᓯᐊᕐᐳᖓ,
ᐃᑯᒪᒧᑦ ᓄᓇᐅᑉ ᐱᕈᕐᑐᖏᑦ ᐊᓯᕈᕐᑕᐅᖕᒪᑕ,
ᓇᐹᕐᑐᐃᓪᓗ ᐃᑯᒪᒧᑦ ᓄᖑᑕᐅᖕᒪᑕ.
20ᐆᒪᔪᐃᑦ ᓄᔪᐊᕐᑐᑦ ᐊᒡᓛᑦ ᕾᒐᓛᓕᕐᐳᑦ ᐃᓕᖕᓄᑦ,
ᑰᑦ ᐸᓂᕐᒪᑕ,
ᐃᑯᒪᒧᓪᓗ ᓄᓇᐅᑉ ᐱᕈᕐᑐᖏᑦ ᐊᓯᕈᕐᑕᐅᖕᒪᑕ.
Currently Selected:
ᔪᐃᓕᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
