ᔫᐱᐅᑉ ᐊᒡᓚᖏᑦ 9
9
ᔫᐱ
1 #
ᔫᐱ 4:17. ᑕᕝᕙ ᔫᐱ ᑭᐅᕗᖅ:
2“ᐄᓛᒃ, ᑕᒪᓐᓇ ᖃᐅᔨᓯᒪᖕᒥᔭᕋ;
ᐃᓄᒡᓕ ᖃᓄᖅ ᒎᑎᐅᑉ ᓵᖓᓂ ᐃᓱᐊᕐᑑᔪᓐᓇᕐᐹ?
3ᓇᓪᓕᐊᑦᑕ ᑭᐅᒫᖃᑎᒋᔪᒪᒍᓂᐅᒃ,
ᐊᐱᕐᓱᕈᓐᓇᕐᐳᖅ ᐅᓄᕐᑐᐊᓗᖕᓂᒃ ᑭᐅᔭᐅᔪᓐᓇᖏᑦᑐᓂᒃ.
4ᒎᑎ ᓯᓚᑐᔪᕐᔪᐊᖑᖕᒪᑦ ᐊᔪᖏᑦᑐᕐᔪᐊᖑᓪᓗᓂᓗ
ᓇᓪᓕᐊᓐᓄᓪᓘᓐᓃᑦ ᐊᑭᕋᕐᑐᕐᑕᐅᔪᓐᓇᓐᖏᓚᖅ.
5ᖃᐅᔨᔭᒃᓴᕈᓚᐅᕋᓂ ᖃᖅᑲᓂᒃ ᓄᑦᓯᓲᖑᕗᖅ,
ᓂᓐᖓᐅᑎᑐᐊᕈᓂᒋᑦ ᑕᕝᕙ ᓄᖑᑎᑉᐰᑦ.
6ᓄᓇᒥᒃ ᓴᔪᒃᐱᓗᒃᑎᑦᓯᓲᖑᕗᖅ ᐊᐅᓚᑎᓪᓗᓂᐅᒃ,
ᓄᓇᐅᓪᓗ ᓱᑲᖏᑦ ᐊᐅᓚᑎᓲᕆᓪᓗᓂᒋᑦ;
7ᓯᕿᓂᖅ ᑍᒤᖁᑐᐊᕐᐸᒍ ᓴᖅᑭᖏᑦᓱᓐᓇᕐᐳᖅ;
ᐅᓪᓗᕆᐊᓪᓗ ᖃᐅᒻᒪᒃᑎᑦᑍᓕᔪᓐᓇᕐᓗᓂᒋᑦ ᐅᓐᓄᒃᑯᑦ;
8ᐃᑲᔪᕐᑕᐅᓚᐅᕐᓯᒪᓐᖏᓚᖅ ᕿᓚᖕᓂᒃ ᐃᓯᕕᑦᓯᓕᕐᑎᓪᓗᒍ,
ᑐᓪᓕᕋᕈᓐᓇᕐᓗᓂᓗ ᐃᒪᕐᔪᐊᑉ ᐃᖏᐅᓕᖏᓐᓂᒃ;
9 #
ᔫᐱ 38:31; ᐂᒨᓯ 5:8. ᐅᓪᓗᕆᐊᑦ ᓴᓇᓯᒪᕔᑦ ᑐᒃᑐᕐᔪᐃᑦ ᐅᓪᓚᐅᑦᑐᓪᓗ,
ᓴᑭᐊᑦᓯᐊᓪᓗ ᓯᕿᓂᐅᓪᓗ ᓇᓛᓃᑦᑐᑦ ᐅᓪᓗᕆᐊᑦ.
10ᑖᑦᓱᒪ ᐱᓇᓱᐊᕐᓂᕐᔪᐊᖏᑦ ᑐᑭᓯᔪᓐᓇᓐᖏᓚᕗᑦ,
ᑲᒪᓇᕐᑐᓕᓂᖏᓪᓗ ᓈᓴᕐᑕᐅᔪᓐᓇᕋᑎᒃ.
11ᐅᕙᓐᓂᒃ ᓴᓂᖅᑯᐃᒐᓗᐊᕐᒪᑦ, ᑕᑯᔪᓐᓇᓐᖏᓚᕋ;
ᐊᐅᓚᒐᓗᐊᕐᒪᑦ, ᕿᒃᓯᒋᔪᓐᓇᓐᖏᓚᕋ.
12ᑕᑯᒋᑦ, ᐱᔪᒪᔭᒥᓂᒃ ᐱᒃᐸᑦ; ᑭᓇᒧᑦ ᓄᖅᑲᕐᑎᑕᐅᔪᓐᓇᕐᐹ?
ᑭᓇᒧᓪᓘᓐᓃᑦ ᐅᖃᐅᑦᔭᐅᔪᓐᓇᕐᐹ, ‘ᖃᓄᐃᓕᐅᓕᕐᐱᑦ?’
13ᒎᑎᐅᑉ ᓂᓐᖓᖕᓂᖓ ᓄᖅᑲᕐᑎᑕᐅᔪᓐᓇᓐᖏᓚᖅ;
ᑖᑦᓱᒪ ᐊᑖᓄᑦ ᓰᖅᑯᕐᐳᑦ ᐃᑲᔪᕐᓯᒪᔪᑦ ᕅᕼᐊᐱᒥᒃ.
14ᖃᓄᖅ ᑭᐅᑦᔪᑎᒃᓴᖃᕈᓐᓇᕐᐳᖔ,
ᑖᑦᓱᒥᖓ ᑭᐅᓇᓱᐊᕐᓗᖓ?
15ᐸᓯᔭᒃᓴᐅᖏᒃᑲᓗᐊᕐᑐᖓ, ᑭᐅᔪᓐᓇᕋᔭᓐᖏᓚᕋ;
ᑐᒃᓯᐊᕐᓗᖓ ᓂᑲᒋᔭᐅᔪᒪᔪᒃᓴᐅᕗᖓ ᐃᖅᑲᕐᑐᐃᔨᒋᔭᓐᓄᑦ.
16ᓂᓪᓕᐊᒐᔭᕈᒪ ᑖᑦᓱᒧᖓ ᑭᐅᒐᔭᕐᐸᖓᓗ,
ᖃᐅᔨᒪᖏᑦᓯᐊᕐᐳᖓ ᓈᓚᒃᑲᔭᕋᓗᐊᕐᒪᖔᑦ ᐅᕙᓐᓂᒃ.
17ᐊᓄᕆᕐᔪᐊᒥᒃ ᑎᑭᑎᑦᓯᕗᖅ ᐋᓐᓂᕐᑕᐅᖁᓪᓗᖓ,
ᐃᑭᓕᕐᑕᐅᓂᒃᑲ ᐅᓄᕐᓯᒋᐊᕐᓗᒋᑦ ᓱᓇᒥᒃ ᐱᑦᔪᑎᒃᓴᖃᕋᓂ;
18ᑕᕾᕐᓯᕈᓐᓁᓪᓕᑎᑉᐹᖓ ᐊᒡᓛᑦ;
ᐆᒥᓱᖕᓂᐊᓗᖕᒥᒡᓗ ᐃᓗᒻᒥᕐᑎᓯᒪᕚᖓ.
19ᓲᖑᓂᒃᑯᑦ ᐱᓇᓱᐊᕆᐊᖃᕋᔭᕈᒪ, ᑕᑯᒋᑦ ᓲᖑᓗᐊᕐᐳᖅ!
ᐊᑦᔨᒌᒃᑎᑦᓯᓂᒃᑯᑦ ᐱᓇᓱᐊᕆᐊᖃᕋᔭᕈᒪ, ᓇᓪᓕᐊᑦᑕ ᐂᖁᔪᓐᓇᕋᔭᕐᐸᐅᒃ?
20ᐸᓯᔭᒃᓴᐅᖏᒃᑲᓗᐊᕋᒪ, ᓇᖕᒥᓂᖅ ᐅᖃᐅᓯᓐᓄᑦ ᐸᓯᔭᒃᓴᕈᕋᔭᕐᐳᖓ;
ᓵᑕᐅᑦᔪᑎᒃᓴᖃᖏᒃᑲᓗᐊᕈᒪ, ᑖᑦᓱᒪ ᑕᑯᑎᒐᔭᕐᐹᖓ ᓱᒋᐊᕐᑕᐅᔪᒃᓴᐅᓂᓐᓂᒃ.
21ᓵᑕᐅᑦᔪᑎᒃᓴᖃᓐᖏᓚᖓ; ᐅᕙᓐᓂᒡᓕ ᓱᓇᐅᒋᔪᓐᓃᕐᐳᖓ;
ᐃᓅᓯᕋ ᐊᓐᓂᕆᔪᓐᓁᕋᒃᑯ.
22ᑕᒪᓐᓇ ᐊᑕᐅᓯᐅᓕᖅᑲᖓᑐᐃᓐᓇᕐᐳᖅ; ᑍᒤᒻᒪᑦ ᐅᖃᕈᓐᓇᕐᐳᖓ,
ᑖᑦᓱᒪ ᐊᓯᕈᕐᐰᑦ ᑕᒪᕐᒥᒃ ᐸᓯᔭᒃᓴᐅᖏᑦᑐᑦ ᐱᐅᖏᑦᑐᓕᔪᓪᓗ.
23ᐸᓯᔭᒃᓴᐅᖏᑦᑐᕐᓕ ᓂᕆᐅᓇᖏᑦᑐᒃᑯᑦ ᑐᖁᑲᓪᓚᖕᒪᑦ,
ᑕᒪᓐᓇ ᐃᓱᒪᔮᕐᓂᖅ ᑖᑦᓱᒪ ᐃᔪᕈᑎᒋᑐᐃᓐᓇᕐᐹ.
24ᓄᓇᕐᔪᐊᖅ ᐱᐅᖏᑦᑐᓕᔪᓄᑦ ᑐᓂᔭᐅᓯᒪᕗᖅ;
ᐃᓅᖃᑎᒥᖕᓂᒡᓗ ᐋᖅᑭᒃᓱᐃᔨᓕᒫᑦ ᑕᑯᓐᓇᕈᓐᓁᕐᑎᓯᒪᓪᓗᓂᒋᑦ
ᒎᑎᓕ ᑍᒤᑎᑦᓯᖏᑉᐸᑦ, ᑭᓇᓕ ᑍᒪ ᑍᒤᑎᑦᓯᓯᒪᕙ?
25ᐅᓪᓗᒃᑲ ᓱᒃᑲᓂᕐᓴᐅᓕᕐᐳᑦ ᐅᓪᓚᐅᑎᕙᒃᑐᓂᑦ;
ᕿᒫᓚᐅᕐᐳᑦ, ᐱᐅᔪᒥᒃ ᐊᖅᑯᓵᕆᓚᐅᕋᑎᒃ.
26ᐃᓅᓯᕋ ᐊᓂᒍᕐᐸᓪᓕᐊᕗᖅ ᐅᒥᐊᑎᑐᑦ ᓱᑲᑦᑐᔭᑎᑐᑦ,
ᓇᒃᑐᕋᓕᐅᑉ ᓂᕿᒃᓴᒥᓂᒃ ᐊᐅᕐᓵᕐᓗᓂ ᑎᒍᓯᔭᕐᑐᕐᓂᖓᑐᑦ.
27ᐃᓱᒪᓕᕅᒐᒪ, ‘ᐋᓐᓂᐊᓂᕋ ᐃᓱᒪᒋᑦᔮᔪᓐᓁᕐᐸᕋ,
ᖁᕕᐊᓱᖏᓐᓂᕋ ᐃᓱᒪᒋᔪᓐᓁᕐᓗᒍ, ᖁᕕᐊᓱᖕᓂᐊᓕᕐᐳᖓ.’
28ᑕᕝᕙ ᐋᓐᓂᐊᓂᕐᒪ ᑲᑉᐱᐊᓱᒃᑎᓕᖃᑦᑕᕐᐹᖓ;
ᖃᐅᔨᒪᓪᓗᖓᓗ ᐸᓯᔭᒃᓴᐅᖏᓐᓂᕋᕐᓂᐊᕈᓐᓃᕐᒪᖓ.
29ᐸᓯᔭᒃᓴᐅᓂᓐᓄᑦ ᓱᒋᐊᕐᑕᒃᓴᐅᒍᒪ;
ᓱᖕᒪᓪᓕ ᓱᓇᐅᖏᑦᑐᒧᑦ ᐋᓐᓂᐊᑎᑕᐅᔭᕆᐊᖃᕐᐳᖔ?
30ᐅᐊᓴᐅᒻᒧᑦ ᐅᕙᓐᓂᒃ ᐅᐊᓴᕋᓗᐊᕈᒪ,
ᐊᒡᒐᒃᑲᓗ ᓴᓐᖏᔪᒧᑦ ᐅᐊᓴᕋᓗᐊᕈᒃᑭᑦ,
31ᓱᓕ ᐃᒋᒐᔭᕐᐸᕐᒪ ᐃᑎᕐᓴᒧᑦ ᓴᓗᒪᖏᑦᑐᒧᑦ,
ᐊᓐᓄᕌᒃᑲᓗ ᐊᒡᓛᑦ ᐅᕙᓐᓂᒃ ᑲᓐᖑᓲᑦᔨᓕᕐᐳᑦ.
32ᑖᓐᓇ ᐊᑦᔨᒋᖏᓐᓇᒃᑯ, ᑭᐅᒪᔪᓐᓇᕈᓐᓄᒃ,
ᐃᖅᑲᕐᑐᐃᕕᖕᒧᐊᕐᓗᓄᒃ ᐋᖅᑭᒐᓱᐊᕐᓯᒪᓕᕋᔭᕐᐳᒍᒃ.
33ᐊᑯᓐᓂᑦᑎᓐᓄᐊᕐᑐᖃᕈᓐᓇᓐᖏᓚᖅ ᑲᒪᔨᐅᓂᐊᕐᑐᒥᒃ,
ᓇᓪᓕᑦᑎᓐᓂᒃ ᐃᖅᑲᕐᑐᐃᓂᐊᕐᑐᒥᒃ ᒎᑎᒥᒃ ᐅᕙᓐᓂᒡᓗ.
34ᐅᕙᓐᓂᒃ ᓱᒋᐊᕐᓯᓂᕆᔭᓂ ᓄᖅᑲᕐᑎᓚᐅᕐᓕᐅᒃ,
ᑲᑉᐱᐊᓱᒃᑎᑦᓯᓂᕆᔭᓂᓗ ᐅᕙᓐᓂᑦ ᐲᕐᑎᓪᓗᓂᐅᒃ.
35ᑕᕝᕙ ᓯᕘᕋᖏᓪᓗᖓ ᑖᑦᓱᒥᖓ ᐅᖃᓪᓚᓕᕋᔭᕐᐳᖓ,
ᓇᖕᒥᓂᖅ ᐆᒻᒪᑎᒐ ᐅᕙᓐᓂᒃ ᖃᐅᔨᒪᒐᒃᑯ.”
Currently Selected:
ᔫᐱᐅᑉ ᐊᒡᓚᖏᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
