ᔫᐱᐅᑉ ᐊᒡᓚᖏᑦ 8
8
ᐱᐅᓪᑖᑦ
1ᑕᕝᕙ ᐱᐅᓪᑖᑦ ᓲᕼᐂᑎᒥᐅᑕᖅ ᑭᐅᕗᖅ:
2“ᐅᖃᐅᓯᒃᓮᕈᑎᑍᓐᓇᕐᐲᑦ ᐅᖃᐅᓯᕐᑎᑦ
ᐊᓄᕌᕐᕙᓗᑐᐃᓐᓇᐅᔮᓕᕐᑎᓪᓗᒋᑦ?
3ᒎᑎ ᒧᒥᒃᑎᑦᓯᓲᖑᕚ ᓈᒻᒪᓈᕐᓯᒪᓂᕐᒥᒃ;
ᐅᕝᕙᓗ ᐊᔪᒐᖃᖏᑦᑐᖅ ᓈᒻᒪᓈᕐᑐᒥᒃ ᒧᒥᒃᑎᑦᓯᓲᖑᕙ?
4ᕿᑐᕐᖓᑎᑦ ᒎᑎᒧᑦ ᐊᔪᕐᑐᓕᓯᒪᓐᓂᕐᐸᑕ,
ᐱᐅᖏᑦᑐᓕᓂᖏᓐᓄᑦ ᑐᓂᓯᒪᕔᑦ ᑍᒤᑕᐅᔭᕆᐊᖃᕐᓂᖏᓐᓄᑦ.
5ᒫᓐᓇᓕ ᒎᑎᒥᒃ ᕿᓂᕐᓂᐊᕈᕕᑦ
ᕿᓄᕕᒋᓂᐊᕈᕕᐅᒡᓗ ᐊᔪᒐᖃᖏᑦᑐᖅ,
6ᐃᑦᔪᕐᓁᒃᑯᕕᑦ ᐸᓯᔭᒃᓴᐅᓂᖃᖏᒃᑯᕕᓪᓗ,
ᑕᕝᕙ ᑖᑦᓱᒪ ᒪᑭᓪᓗᓂ ᐅᐸᖕᓂᐊᕐᐹᑎᑦ
ᐊᑭᓕᕐᓂᐊᕐᐹᑎᓪᓗ ᓈᒻᒪᓈᕐᓯᒪᓂᕐᓄᑦ.
7ᓯᕗᕐᖓᓂᓗ ᐱᒋᓚᐅᕐᑕᑎᑦ ᒥᑭᔫᓚᐅᕋᓗᐊᕐᐸᑕ,
ᑭᖑᓂᖓᒍᑦ ᐊᖏᓕᔪᕐᔪᐊᖑᔪᒫᕐᐳᑦ.
8ᐊᐱᕐᓱᓚᐅᕆᑦ ᕿᓄᕕᒋᕙᒋᑦ, ᓯᕗᓪᓕᐅᓚᐅᕐᑐᓂᒃ,
ᖃᐅᔨᓇᓱᒡᓗᑎᓪᓗ ᓯᕗᓕᕆᓚᐅᕐᑕᑦᑕ ᖃᐅᔨᓯᒪᔭᖏᓐᓂᒃ.
9ᐃᓅᓯᕗᑦ ᓁᑦᑐᑯᓘᖕᒪᑦ, ᖃᐅᔨᒪᓇᑕᓗ,
ᓄᓇᒦᓐᓂᕗᑦ ᑕᕐᕋᑐᐃᓐᓇᕐᑎᑐᑦ ᑍᒤᒻᒪᑦ.
10ᓯᓚᑐᔫᓚᐅᕐᑐᓄᑦ ᐊᔪᕆᕐᑐᕐᑕᐅᓚᐅᕆᑦ,
ᐅᖃᐅᑦᔭᐅᓂᐊᕋᕕᑦ ᑐᑭᓯᓯᒪᔭᖏᓐᓂᑦ:
11ᐅᖃᐅᔭᕐᔪᐊᑦ ᐱᕈᓲᖑᕚᑦ ᐃᒪᕐᓱᖃᖏᑦᑐᒥ?
ᐃᕕᒃᓱᒊᑦ ᐱᕈᕈᓐᓇᕐᐹᑦ ᐃᒪᖃᖏᑦᑐᒥ?
12ᓱᓕ ᐃᕕᒃᓱᒊᑦ ᓱᓪᓗᓖᑦ ᓇᑲᑕᐅᓚᐅᕋᑎᒃ,
ᑐᖁᓕᓲᖑᕗᑦ ᐊᓯᖏᓐᓂᑦ ᐸᓂᖅᑳᕐᓂᕐᐸᐅᓪᓗᑎᒃ.
13ᒎᑎᒥᒃ ᐳᐃᒍᕐᑐᑦ ᑕᒪᒃᑯᑎᑐᓇᖅ ᑍᒤᑉᐳᑦ;
ᒎᑎᖃᖏᑦᑑᑉ ᓂᕆᐅᖕᓂᖓ ᐊᓯᐅᔪᒫᕐᐳᖅ.
14ᓴᐱᖏᓐᓂᖓ ᐃᕙᓗᒃᓴᑎᑐᑦ ᑍᒤᑉᐳᖅ,
ᑕᑎᖃᕐᓂᖓᓗ ᐋᓯᕙᐅᑉ ᓄᓗᐊᖏᑎᑐᑦ ᑍᒤᓪᓗᓂ.
15ᓄᓗᐊᖏᓐᓄᑦ ᐄᒐᕈᑎᒃ, ᒪᑭᑕᔪᓐᓇᕋᔭᓐᖏᓚᑦ;
ᓄᓗᐊᖏᓐᓂᒃ ᑎᒍᓯᒍᑎᒃ, ᓇᖏᕈᓐᓇᕋᔭᓐᖏᓚᑦ.
16ᐅᖃᐅᔭᕐᔪᐊᑎᑐᑦ ᓯᕿᓐᓂᕐᑎᓪᓗᒍ ᐃᑦᑎᖃᕋᓗᐊᕐᐳᑦ
ᐱᕈᕐᓰᕕᖕᒥ ᐃᓯᕕᖓᔪᑎᑐᑦ ᐆᒻᒪᐅᑦᓯᐊᕐᓗᑎᒃ.
17ᐊᒫᖏᑦ ᐅᔭᕋᖕᓂᒃ ᓂᒦᓯᒪᕗᑦ;
ᐅᔭᕅᑦ ᐊᑯᕐᖓᓐᓂ ᐱᕈᕐᓯᒪᒐᒥᒃ.
18ᐃᓂᒥᓂᓪᓕ ᐊᒧᔭᐅᓗᓂ ᐄᔭᐅᒍᓂ,
ᖃᐅᔨᒪᔭᐅᓂᐊᓐᖏᓚᖅ, ᐅᖃᕐᓗᓂ, ‘ᑕᒫᓂ ᑕᑯᓚᐅᕐᓯᒪᓐᖏᓚᒋᑦ.’
19ᑕᑯᒋᑦ, ᑕᕝᕙ ᑍᒫᒃ ᖁᕕᐊᓲᑎᑐᐊᖃᕐᐳᖅ;
ᐊᓯᖏᑦ ᓄᓇᒥᑦ ᓄᐃᓂᐊᕐᐳᑦ ᑖᑦᓱᒥᖓ ᐃᓇᖐᓗᑎᒃ.
20ᑕᑯᒋᑦ, ᒎᑎ ᐃᒋᑦᓯᓂᐊᓐᖏᓚᖅ ᐸᓯᔭᒃᓴᐅᖏᑦᑐᒥᒃ,
ᐱᐅᖏᑦᑐᓕᔪᓪᓗ ᐊᒡᒐᖏᑦ ᑎᒍᒥᐊᕐᓂᐊᓐᖏᓔᑦ.
21ᖃᓂᓯ ᐃᔪᕈᓐᓇᕐᓯᑎᑦᓱᒫᕆᕔᑦ,
ᖃᓂᑦᓯᒍᓪᓗ ᐃᒡᒋᐊᖅᑰᕐᒥᔮᕐᓂᕐᒥᒃ ᓴᖅᑭᑎᑦᓯᔪᒫᕆᕗᖅ.
22ᐃᓕᑦᓯᓐᓂᒃ ᐆᒥᓱᒃᑐᑦ ᑲᓐᖑᓱᖕᓂᕐᒥᒃ ᐊᓐᓄᕌᕐᑎᑦᓱᒫᕐᐰᑦ,
ᐱᐅᖏᑦᑐᓕᔪᓪᓗ ᐊᖏᕐᕋᖏᑦ ᓄᖑᑦᓱᒫᕐᐰᑦ ᐊᓯᐅᑎᓪᓗᒋᑦ.”
Currently Selected:
ᔫᐱᐅᑉ ᐊᒡᓚᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
