ᔫᐱᐅᑉ ᐊᒡᓚᖏᑦ 7
7
1“ᐃᓄᒃ ᐅᓇᑕᕐᑐᒃᓴᑐᑦ ᐊᒃᓱᕈᕐᑎᑕᐅᔪᑎᑐᑦ ᑍᒤᓐᖏᓛᖅ ᓄᓇᒥ,
ᐅᓪᓗᖏᓪᓗ ᐱᓇᓱᐊᕐᑎᑕᐅᔪᑎᑐᑦ ᑍᒤᑦᑑᓐᖏᓛᑦ?
2ᓯᐊᓛᕆᔭᐅᔪᑐᑦ ᑖᓪᓕᓂᐅᑉ ᓂᒡᓚᑖᕐᓇᕐᑑᑉ ᓴᓂᐊᓃᑦᓱᒪᔪᑎᑐᑦ,
ᐱᓇᓱᐊᕐᑎᑕᐅᔪᑎᑐᓪᓗ ᐊᑭᓕᕐᑕᐅᓂᐊᕐᓂᕐᒥᓂᒃ ᐅᑕᖅᑭᔪᑎᑐᑦ,
3ᑕᖅᑭᓂᒃ ᐊᓂᒍᐃᑎᑕᐅᓇᓱᐊᖃᑦᑕᕐᐳᖓ ᓱᓇᓱᒐᒃᓴᖃᖏᑦᑐᓂᒃ,
ᐅᓐᓄᑕᒫᓪᓗ ᕿᒃᓵᖕᓇᕐᑐᓄᑦ ᑎᑭᑎᑕᐅᖃᑦᑕᕐᓱᖓ.
4ᐃᓂᓪᓚᒑᖓᒪ ᐅᖃᕐᐳᖓ, ‘ᖃᖓ ᒪᑭᓛᕐᐳᖓ?’
ᐅᓐᓄᐊᖅ ᓯᕕᑐᔫᕗᖅ, ᓇᓪᓕᐊᓐᓄᑦ ᓵᖃᑦᑕᕐᓂᕐᒧᑦ
ᑕᖃᕗᖓ ᖃᐅᒻᒪᓕᕐᓂᖓᓄᑦ ᑎᑭᓪᓗᒍ.
5ᑎᒥᓕᒫᕋ ᐅᓕᒃᑕᐅᓯᒪᕗᖅ ᖁᐱᕐᕈᓄᑦ ᑯᒪᖕᓄᓪᓗ;
ᐅᕕᓂᒐ ᓯᑎᔪᕈᕐᓯᒪᕗᖅ, ᐊᔪᐊᒃᑲᓗ ᐃᒻᒪᒃᓯᒪᓪᓗᑎᒃ.
6ᐅᓪᓗᒃᑲ ᓱᒃᑲᓂᕐᓴᐅᕗᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᑕ ᓇᓕᐊᖕᓄᕋᐅᑎᖓᓂᑦ,
ᐃᓱᓕᑉᐸᓪᓕᐊᕗᓪᓗ ᓂᕆᐅᖕᓂᕐᑕᖃᓚᐅᕋᑎᒃ.
7ᐃᖅᑲᐅᒪᓚᐅᕆᑦ ᐃᓅᓯᕋ ᐊᓂᕐᓂᑐᐃᓐᓇᐅᖕᒪᑦ;
ᐃᔩᒃᑲᒡᓗ ᐱᐅᔪᒥᒃ ᑕᑯᓚᐅᕐᓯᒪᓂᐊᕈᓐᓃᕐᓗᑎᒃ.
8ᐅᕙᓐᓂᒃ ᑕᑯᖃᑦᑕᕐᑐᑦ ᑕᑯᖃᑦᑕᕐᓂᐊᕈᓐᓃᕐᐹᖓ;
ᐅᕙᓐᓂᒃ ᑕᑯᓐᓇᕐᑎᓪᓗᒋᑦ, ᐱᑕᖃᕈᓐᓁᕈᒫᕐᐳᖓ.
9ᓄᕗᔭᐅᑉ ᓄᖑᑉᐸᓪᓕᐊᓪᓗᓂ ᑕᑯᒃᓴᐅᔪᓐᓃᕐᐸᖕᓂᖓᑎᑐᑦ,
ᑍᒫᒃᑕᐅᖅ ᑖᓐᓇ ᑐᖁᖓᔪᒃᑯᕕᖕᒧᐊᕐᑐᖅ ᐅᑎᕐᐸᓐᖏᓚᖅ;
10ᐃᒡᓗᒥᓄᑦ ᐅᑎᖃᑦᑕᕈᓐᓃᕐᐸᒃᐳᖅ,
ᐃᓂᒋᕙᓚᐅᕐᑕᖓᓂᓗ ᑕᑯᔭᐅᖃᑦᑕᕈᓐᓃᕐᐸᒃᓗᓂ.
11ᑍᒤᒻᒪᑦ, ᓂᐰᑦᑑᓂᐊᓐᖏᓚᖓ;
ᐅᖃᓪᓚᖕᓂᐊᕐᐳᖓ ᓂᓐᖓᐅᒪᓪᓚᕆᒃᑲᒪ ᐊᓂᕐᓂᒃᑯᑦ;
ᐊᑲᐅᒃᓴᓐᖏᓚᖓ ᐋᓐᓂᕐᓯᒪᓪᓚᕆᒃᑲᒪ ᑕᕐᓂᒃᑯᑦ.
12ᓱᖕᒪᑦ ᑲᒪᒌᓐᓇᕋᓱᒃᐱᖔ?
ᐃᒪᕐᒥᐅᑕᑎᑐᑦ ᐆᒪᔪᕐᓗᒃᑎᑐᑦ ᑍᒤᓐᓇᓱᒋᕕᖔ?
13ᓇᓪᓚᕐᓗᖓ ᐊᑲᐅᓯᑦᑎᕋᓱᒃᑲᓗᐊᕋᒪ,
ᐋᓐᓂᐊᕈᓐᓁᕐᔫᒥᑦᔪᑎᒃᓴᓐᓂᒃ ᕿᓂᕋᓱᐊᕐᓗᖓ.
14ᑕᕝᕙ ᓯᓐᓇᒃᑑᒪᑎᓪᓗᖓ ᑲᑉᐱᐊᓱᐊᑎᖃᑦᑕᕐᐸᕐᒪ
ᑕᑕᒥᓐᓇᕐᑐᓂᒃ ᑕᑯᑎᓪᓗᖓ ᐅᖁᒪᖏᕐᑎᓪᓗᖓᓗ,
15ᑕᕝᕙ ᕿᒥᑕᐅᒐᓗᐊᕈᒪ ᖃᓄᐃᒃᓴᕈᓐᓁᕐᐳᖓ
ᑐᖁᓗᖓ ᑎᒥᒦᒍᓐᓃᖔᕐᓗᖓ.
16ᐃᓅᓯᓐᓂᒃ ᓴᐱᓕᕐᐳᖓ; ᐃᓅᖏᓐᓇᕐᓂᐊᖏᓐᓇᒪ.
ᑲᒪᒋᔪᓐᓁᓐᖓ, ᐃᓅᓯᕋ ᐊᓂᕐᓂᑐᐃᓐᓇᐅᖕᒪᑦ.
17 #
ᐃᓐᖏᕈᑦ 8:4; 144:3. ᐃᓄᒃ ᓱᖕᒪᑦ, ᐱᓪᓚᕆᐊᓘᑎᑉᐱᐅᒃ?
ᓱᖕᒪᓪᓗ ᐃᓄᒃ ᐃᓱᒪᒋᕕᐅᒃ?
18ᐅᓪᓛᑕᒫᑦ ᐅᐸᖃᑦᑕᕋᕕᐅᒃ,
ᖃᐅᔨᓴᖃᑦᑕᕐᓗᒍᓗ ᐃᑲᕐᕋᑕᒫᑦ.
19ᖃᓄᖅ ᐊᑯᓂᐅᑎᒋᔪᖅ ᐊᓚᐅᒪᑬᓐᓇᕈᓐᓇᕐᐱᖔ?
ᓄᕙᓐᓂᒃ ᐄᖅᑭᒋᐊᕋᓱᖕᓂᓐᓂ?
20ᐊᔪᕐᑐᓕᒍᒪ, ᐃᓕᖕᓅᑦ ᓱᕗᖓ, ᐃᓄᖕᓂᒃ ᖃᐅᔨᓴᕐᑎᐅᔪᑎᑦ?
ᓱᖕᒪᑦ ᐱᒋᐊᖃᑦᑕᕐᕕᒋᓲᕐᓄᑦ ᐱᓕᒻᒪᒃᓴᐅᑎᒃᓴᓕᐊᕆᓯᒪᕕᖔ?
ᓱᖕᒪᓪᓗ ᐃᓕᖕᓄᑦ ᐅᖁᒤᒃᓴᕈᑎᒃᓴᐅᕗᖔ?
21ᐊᔪᕐᑐᓕᓂᒃᑲ ᐃᓱᒪᒋᔪᓐᓁᕈᓐᓁᓪᓕᕕᒌᑦ?
ᐱᐅᖏᑦᑐᓕᓂᒃᑲᓗ ᐲᕈᓐᓁᓪᓕᕕᒌᑦ?
ᒫᓐᓇᓗ ᓄᓇᒥ ᓇᓪᓚᖓᔪᒫᓕᕐᐳᖓ;
ᐅᕙᓐᓂᒃ ᕿᓂᓕᕋᓗᐊᕈᕕᑦ, ᐱᑕᖃᕈᓐᓁᕈᒫᕐᐳᖓ.”
Currently Selected:
ᔫᐱᐅᑉ ᐊᒡᓚᖏᑦ 7: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
