ᔫᐱᐅᑉ ᐊᒡᓚᖏᑦ 36
36
1ᑕᕝᕙ ᐃᓕᕼᐅ ᑲᔪᓯᓪᓗᓂ, ᐅᖃᓯᒋᕗᖅ:
2“ᕿᓄᐃᓵᕐᓗᑎᑦ ᓈᓚᒃᑲᓐᓂᑬᓐᓇᓐᖓ, ᐅᖃᐅᑎᒃᑲᓐᓂᕐᓂᐊᕋᒃᑭᑦ,
ᓱᓕ ᐅᖃᐅᓯᒃᓴᖃᕋᒪ ᒎᑎ ᐱᑦᔪᑎᒋᓪᓗᒍ.
3ᖃᐅᔨᑎᑕᐅᓯᒪᓂᕋ ᐊᖏᔫᖕᒪᑦ ᐊᑯᓂᓂᑦ,
ᓇᓗᓁᕐᓯᔪᒪᕗᖓ ᐱᓐᖑᕐᑎᑎᔨᒪ ᓇᓛᒎᕐᓂᖓᓂᒃ.
4ᐃᓕᖕᓄᑦ ᐅᖃᐅᓯᕆᔭᒃᑲ ᓱᓕᕗᑦ ᓴᒡᓗᓂᕐᑕᖃᕋᑎᒃ;
ᖃᐅᔨᓯᒪᓪᓚᕆᒃᑐᒥᒃ ᑕᕝᕙ ᑕᑯᓐᓈᕐᐳᑎᑦ ᐃᓚᒋᔭᕐᓂᒃ.
5ᑕᑯᒋᑦ, ᒎᑎ ᐊᔪᒐᖃᖏᑦᑑᕗᖅ, ᓇᓪᓕᐊᓐᓂᒡᓘᓐᓃᑦ ᓇᕐᕈᒋᔭᖃᖏᑦᑐᖅ;
ᐊᔪᒐᖃᖏᑦᑑᒐᒥ ᐱᔪᓐᓇᕐᓂᕐᔪᐊᒥᒍᑦ ᖃᐅᔨᒪᓐᖏᑕᖃᓐᖏᓚᖅ.
6ᐱᐅᖏᑦᑐᓕᔪᑦ ᐃᓅᑯᑖᒃᑎᓐᖏᓔᑦ,
ᐅᖁᒤᑦᑐᒃᑰᕐᑐᓪᓕ ᓈᒻᒪᒃᑐᒥᒃ ᐱᓇᓱᐊᕐᕕᒋᕔᑦ.
7ᐃᓱᐊᕐᑐᓕᔪᑦ ᑕᑯᓐᓇᑦᓮᓐᓇᕐᐰᑦ,
ᐊᖓᔪᖅᑳᕐᔪᐊᓄᑦ ᐊᐅᓚᑦᓯᖃᑕᐅᑎᓐᓂᐊᕐᐰᑦ
ᓂᕐᑐᕐᓇᕐᑎᑕᐅᓗᑎᒡᓗ ᐃᓱᖃᖏᑦᑐᒧᑦ.
8ᐊᑦᓱᖏᕐᑕᐅᓯᒪᒃᐸᑕᓕ ᐊᕐᓵᕐᑑᔭᓄᑦ,
ᕿᓚᒃᑕᐅᓯᒪᒃᐸᑕᓗ ᐅᖁᒤᒃᓴᕐᑎᑕᐅᓂᐅᑉ ᕿᓚᕈᑎᖏᓐᓄᑦ,
9ᑕᕝᕙ ᓇᓗᓁᕐᓯᕕᒋᕔᑦ ᐱᓂᐊᕐᓂᕆᓚᐅᕐᑕᖏᓐᓂᒃ
ᐊᔪᕐᑐᓕᓂᖏᑕᓗ, ᓯᑎᔫᓂᕐᒥᒃ ᑐᓐᖓᕕᖃᕐᓂᖏᓐᓂᒃ.
10ᑕᕝᕙ ᓯᐅᑎᖏᑦ ᓈᓚᒍᓐᓇᕐᓯᑎᓪᓗᒋᑦ ᐊᔪᕆᕐᑐᓕᕐᐰᑦ,
ᐱᐅᖏᑦᑐᓕᓂᕐᒥᖕᓂᒃ ᕿᒤᓗᑎᒃ ᐅᑎᖁᓪᓗᒋᑦ.
11ᑖᑦᓱᒥᖓ ᓈᓚᓕᕐᓗᑎᒃ ᐱᔨᑦᓯᕈᒪᓕᕐᐸᑕᓗ,
ᑕᕝᕙ ᐃᓅᓯᖏᑕ ᐅᓪᓗᖏᑦ ᓈᓗᒋᑦ ᐱᕙᓪᓕᐊᑦᓯᐊᕐᓂᐊᕐᐳᑦ,
ᐊᕐᕌᒍᓂᒡᓗ ᐃᓅᓂᐊᕐᐳᑦ ᖃᓄᐃᖏᑦᓯᐊᕐᓗᑎᒃ.
12ᓈᓚᖏᑉᐸᑕᓕ, ᑕᕝᕙ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ,
ᑐᖁᒐᔭᕐᐳᓪᓗ ᖃᐅᔨᒪᖏᓐᓂᕐᒧᑦ.
13ᒎᑎᖃᖏᑦᑐᑦ ᓂᓐᖓᐅᒪᓂᕐᒥᒃ ᐃᓗᒥᐅᑕᖃᑦᓮᓐᓇᕐᐳᑦ;
ᑖᑦᓱᒧᖓᓗ ᕿᓚᒃᑕᐅᒐᓗᐊᕋᒥᒃ ᐃᑲᔪᕐᑕᐅᔪᒪᓗᑎᒃ ᑐᒃᓯᐊᓚᐅᓐᖏᓚᑦ.
14ᐃᓅᓱᒃᑑᓗᑎᒃ ᓱᓕ ᑐᖁᓂᐊᕐᐳᑦ,
ᐃᓅᓯᖏᓪᓗ ᑲᓐᖑᓲᑦᔨᓇᕐᑐᒥ ᐃᓱᓕᓐᓂᖃᕐᓗᑎᒃ.
15ᒎᑎᓕ ᐱᐅᓕᓯᕙᒃᐳᖅ ᐅᖁᒤᑦᑐᒃᑰᕐᑐᓂᒃ ᐅᖁᒤᒃᓴᕐᑎᑕᐅᓂᖏᑎᒍᑦ,
ᐋᓐᓂᐊᓂᖏᓪᓗ ᐊᑐᕐᓗᒋᑦ ᓯᐅᑎᖏᑦ ᐊᖕᒪᕐᑎᑉᐰᑦ.
16ᐃᕝᕕᑦᑕᐅᖅ ᐅᖁᒤᒃᓴᕈᑎᒋᔭᕐᓂᑦ ᐊᓂᑎᓐᓂᐊᕐᐹᑎᑦ,
ᐱᕕᑐᔪᒧᑦ ᐃᓂᒃᓴᑦᓯᐊᒧᑦ ᓄᖅᑲᖓᑦᔪᑎᒃᓴᕐᑕᖃᖏᑦᑐᒧᑦ,
ᓂᕆᕕᖁᑏᓪᓗ ᐊᑐᐃᓐᓇᕈᐃᕕᐅᓂᐊᕐᐳᖅ ᖁᐃᓂᔪᓂᒃ.
17ᐃᕝᕕᓪᓕ ᓱᒋᐊᕐᑕᐅᓯᒪᕗᑎᑦ ᐱᐅᖏᑦᑐᓕᓂᑎᑦ ᐱᑦᔪᑎᒋᓪᓗᒋᑦ;
ᓱᒋᐊᕐᑕᐅᒃᔪᑎᒋᔭᕆᐊᖃᕐᑕᕐᓄᑦ ᓈᒻᒪᓈᕐᑕᐅᓯᒪᕗᑎᑦ.
18ᐃᒃᐱᒍᓱᑦᓯᐊᓕᕆᑦ ᐊᑭᑦᔪᑎᒃᓴᕐᓯᐅᕐᓂᕐᒧᑦ ᓯᓔᕐᕆᔭᐅᖁᓇᒃ;
ᐊᔪᖏᓐᓂᕐᒧᑦ ᐊᑭᓖᓇᓱᒃᑯᕕᑦ ᑕᒻᒪᕐᑎᑕᐅᑦᔪᑎᖃᖁᓇᒃ.
19ᐊᔪᕐᓴᖏᓐᓂᕐᓄᑦ ᓴᓐᖏᔪᐊᓘᓂᕐᓄᓪᓗ,
ᐃᑲᔪᕐᑕᐅᔪᒪᒐᓗᐊᕈᕕᑦ ᐋᓐᓂᐊᕈᑎᒋᔭᕐᓂᑦ ᐊᔪᕐᐳᑎᑦ.
20ᕿᓚᓈᕐᓂᐊᕐᓇᒃ ᐅᓐᓄᐊᖑᓂᐊᕐᑐᒧᑦ,
ᐃᓅᖃᑎᒌᑦ ᐃᓂᒋᔭᒥᖕᓂᑦ ᓄᖑᑕᐅᕕᒃᓴᖏᓐᓂᒃ.
21ᐃᒃᐱᒍᓱᑦᓯᐊᕆᑦ, ᐱᐅᖏᑦᑐᓕᓂᕐᒧᑦ ᓵᓕᖁᓇᑎᑦ,
ᑕᒪᓐᓇ ᐋᓐᓂᐊᓇᕐᑐᒃᑰᕐᓃᑦ ᐃᓕᖕᓄᑦ ᑎᑭᓯᒪᖕᒪᑦ
ᓴᐳᑎᔭᐅᖁᓪᓗᑎᑦ ᐱᐅᖏᑦᑐᓕᓂᕐᒥᑦ.
22ᑕᑯᒋᑦ, ᒎᑎᐅᑉ ᐱᔪᓐᓇᕐᓂᖓ ᐊᖏᔪᕐᔪᐊᖑᕗᖅ;
ᑭᓈ ᑖᑦᓱᑐᓇᖅ ᐃᓕᓮᑦᓯᐊᕈᓐᓇᕐᑎᒋᕚ?
23ᐱᓂᐊᕐᓂᕆᔭᕆᐊᖃᕐᑕᖓᓂᒃ ᑭᐊ ᐅᖃᐅᑎᔪᓐᓇᕐᐸᐅᒃ?
ᐅᕝᕙᓗ ᑭᐊ ᑕᒻᒪᕐᓯᒪᓂᕋᕈᓐᓇᕐᐸᐅᒃ?
24ᐃᖅᑲᐅᒪᒋᑦ ᑖᑦᓱᒪ ᐱᓇᓱᐊᕐᓂᖓ ᓂᕐᑐᕋᒃᓴᕆᒐᕕᐅᒃ,
ᐱᓇᓱᐊᕐᓂᖓ ᐃᓄᖕᓄᑦ ᐃᓐᖏᕈᑕᐅᖃᑦᑕᕐᓯᒪᖕᒪᑦ.
25ᐱᓂᐊᕐᓂᖓ ᐃᓄᓕᒫᓄᑦ ᑕᑯᔭᐅᓯᒪᕗᖅ;
ᐅᕙᒍᓪᓕ ᐅᖓᓯᒋᔮᓂᑦ ᑭᓯᐊᓂ ᑕᑯᑐᐃᓐᓇᕈᓐᓇᕐᐸᕗᑦ.
26ᑕᑯᒋᑦ, ᒎᑎᐅᑉ ᐊᖏᔪᕐᔪᐊᖑᕗᖅ, ᖃᐅᔨᔪᓐᓇᓐᖏᓚᕗᓪᓗ;
ᑖᑦᓱᒪᓗ ᐊᕐᕌᒍᖏᑦ ᖃᐅᔨᔭᐅᔪᓐᓇᕋᑎᒃ.
27ᑖᑦᓱᒪ ᓄᓇᕐᔪᐊᑉ ᐃᒪᖓ ᖁᒻᒧᐊᒃᑎᖃᑦᑕᕐᐹ,
ᑕᑉᐹᓐᖓᓪᓗ ᐃᒪᕐᒥᒃ ᓯᓚᓗᓕᕐᑎᖃᑦᑕᕐᐹ.
28ᓄᕗᔭᓂᑦ ᓯᓚᓗᒃ ᑯᕕᓕᕐᑎᖃᑦᑕᕐᐹ,
ᐃᓄᓕᒫᑦᓯᐊᓄᓪᓗ ᓯᓚᓗᒃᑎᖃᑦᑕᕐᓗᓂᐅᒃ.
29ᓇᓪᓕᐊᓐᓄᑦ ᑐᑭᓯᔭᐅᔪᓐᓇᕐᐹ ᖃᓄᖅ ᓄᕗᔧᑦ ᐃᖏᕐᕋᕙᖕᒪᖔᑕ?
ᑲᓪᓘᓪᓗ ᐃᕗᓗᖕᓂᖓ ᓯᓚᒃᑯᑦ ᖃᓄᖅ ᓂᓪᓕᐊᖃᑦᑕᕐᒪᖔᑦ?
ᑕᑉᐸᐅᓇ ᐃᒡᓗᕕᒐᐅᔭᐅᑉ ᖁᓛᖓᓂᑦ?
30ᑕᑯᒋᑦ, ᖃᐅᒻᒪᓪᓚᑎᑦᓯᖃᑦᑕᕐᐳᖅ ᓇᐅᒃᑯᑐᐃᓐᓇᓕᒫᖅ ᓯᓚᒃᑯᑦ,
ᐃᒪᕐᕕᐅᓪᓕ ᓱᓕ ᑐᓐᖓᕕᖏᑦ ᒪᑐᓯᒪᕔᑦ.
31ᑕᒪᑐᒧᖓ ᑕᕝᕙ ᐃᓅᒐᓴᒡᔪᐊᑦ ᐃᖅᑲᕐᑐᕐᐰᑦ;
ᓂᕿᒃᓴᖏᓐᓂᒡᓗ ᓈᒻᒪᒃᑐᓂᒃ ᑍᒪᓐᖓᑦ ᑐᓂᓯᕕᒋᓪᓗᒋᑦ.
32ᑖᑦᓱᒪ ᐊᒡᒐᓂ ᐅᓕᒃᓯᒪᕔᑦ ᖃᐅᒻᒪᓪᓚᖕᒧᑦ,
ᐱᖁᔨᓂᖓᒍᓪᓗ ᖃᐅᒻᒪᓪᓚᖃᑦᑕᕐᐳᖅ.
33ᑲᓪᓘᑉ ᐃᒃᑐᓚᐅᕐᓂᖓ ᓇᓗᓁᕐᓯᖃᑦᑕᕐᐳᖅ ᑖᑦᓱᒥᖓ,
ᑖᓐᓇ ᓯᖕᓇᓂᕐᒧᑦ ᓂᓐᖓᐅᑦᔨᓯᒪᖕᒪᑦ ᐊᔪᕐᓂᕐᒥᒃ.”
Currently Selected:
ᔫᐱᐅᑉ ᐊᒡᓚᖏᑦ 36: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
