ᔫᐱᐅᑉ ᐊᒡᓚᖏᑦ 34
34
1ᑕᕝᕙ ᐃᓕᕼᐅ ᐅᖃᕐᐳᖅ:
2“ᐃᓕᓯᒪᔪᓯ; ᐅᖃᐅᓯᕆᔭᒃᑲ ᑐᓴᓚᐅᕐᓯᒋᒃ,
ᓈᓚᒡᓗᓯᓗ, ᓯᓚᑐᔫᔪᓯ;
3ᓯᐅᑎᓖᑦ ᐅᖃᐅᓯᕐᓂᒃ ᖃᐅᔨᓴᕐᐸᖕᒪᑕ;
ᓂᖀᓪᓗ ᒪᒪᕐᑐᑦ ᖃᐅᔨᕙᒃᑲᑦᓯᐅᒃ ᐆᒃᑐᕐᓗᒋᑦ.
4ᓇᖕᒥᓂᖅ ᓂᕈᐊᓚᐅᕐᑕ ᓈᒻᒪᓈᕐᑐᒥᒃ;
ᑐᑭᑖᖃᑎᒌᓚᐅᕐᑕ ᐅᕙᑦᑎᓐᓄᑦ ᓱᓇ ᐱᐅᔫᖕᒪᖔᑦ.
5ᔫᐱ ᐅᖃᓚᐅᕐᒪᑦ, ‘ᐸᓯᔭᒃᓴᐅᓂᖃᓐᖏᓚᖓ,
ᒎᑎᐅᓪᓕ ᐱᑦᓯᐊᕐᕕᒋᓯᒪᓐᖏᓛᖓ.’
6ᐊᐱᕆᓚᐅᕆᕗᖅ, ‘ᖃᓄᕐᓕ ᓴᒡᓗᓗᖓ ᑕᒻᒪᕐᓯᒪᓂᕋᕈᓐᓇᕐᐳᖓ?
ᐋᓐᓂᐊᓂᕋ ᐋᖅᑭᒃᑕᐅᔪᓐᓁᓪᓕᕗᖅ, ᐱᐅᖏᑦᑐᓕᓚᐅᖏᒃᑲᓗᐊᕋᒪ.’
7ᖃᓄᐃᑦᑐᐊᓗᖑᓇ ᔫᐱ?
ᒥᑕᐅᑎᒃᓴᕐᓂᕐᒥᒃ ᐃᒥᕐᑐᑎᑐᑦ ᑍᒤᑦᑐᖅ,
8ᐱᐅᖏᑦᑐᓕᔪᓂᒃ ᐃᓚᖃᖃᑦᑕᕐᑐᖅ,
ᐊᔪᕐᑐᓕᔪᓂᒡᓗ ᐃᓅᖃᑎᖃᕐᐸᒃᓗᓂ.
9ᐅᖃᓚᐅᕐᒪᑦ, ‘ᐃᓄᒃ ᐱᕙᓪᓕᐅᑎᖃᖏᑦᓯᐊᕐᐳᖅ
ᒎᑎᐅᑉ ᐱᔪᒪᔭᖓᓂᒃ ᒪᓕᒃᑲᓗᐊᕈᓂ.’
10ᑍᒤᒻᒪᑦ, ᓈᓚᓚᐅᕐᓯᓐᖓ ᑐᑭᓯᓯᒪᔪᓯ,
ᒎᑎ ᐱᐅᖏᑦᑐᓕᔪᓐᓇᕐᐹ? ᑕᒪᓐᓇ ᑐᑭᖃᖏᑦᓯᐊᕐᐳᖅ,
ᐊᔪᒐᖃᖏᑦᑐᖅ ᑕᒻᒪᕈᓐᓇᕐᐹ?
11 #
ᐃᓐᖏᕈᑦ 62:12. ᑖᑦᓱᒪ ᐃᓄᒃ ᐱᓂᐊᕐᓂᖓ ᒪᓕᒡᓗᒍ ᐊᑭᓕᖃᑦᑕᕐᐹ,
ᐱᓇᓱᐊᕐᕕᒋᖃᑦᑕᕐᐹᓗ ᐃᓅᓯᖓ ᒪᓕᒡᓗᒍ.
12ᒎᑎ ᓇᓗᓇᓐᖏᓚᖅ ᐱᐅᖏᑦᑐᒥᒃ ᐱᓇᓱᐊᕐᓂᐊᖏᒻᒪᕆᒃᑐᖅ,
ᐊᔪᒐᖃᖏᑦᑐᖅ ᓈᒻᒪᓈᕐᑐᒥᒃ ᒧᒥᒃᑎᑦᓯᓂᐊᖏᓚᖅ ᓈᒻᒪᖏᑦᑐᒧᑦ.
13ᑭᐊ ᓄᓇᕐᔪᐊᕐᒥ ᐱᔪᓐᓇᕐᓂᕐᑖᕐᑎᓚᐅᕐᐸᐅᒃ?
ᑭᐊᓗ ᓄᓇᕐᔪᐊᓕᒫᒧᑦ ᐊᖓᔪᖅᑳᕈᕐᑎᓚᐅᕐᐸᐅᒃ?
14ᑖᑦᓱᒪ ᐃᓱᒪᕐᓲᑎᒋᑦᓯᐊᕐᐹ,
ᐅᑎᕐᑎᑦᓱᒪᒍᓂᒋᒃ ᐊᓂᕐᓂᓂ ᐃᓅᓯᖁᑎᓂᓗ,
15ᑕᕝᕙ ᑎᒥᖃᕐᑐᓕᒫᑦ ᑐᖁᔪᐃᓐᓇᐅᒐᔭᕐᐳᑦ,
ᐃᓄᒡᓗ ᓄᓇᒧᑦ ᐅᑎᕋᔭᕐᓗᓂ.
16ᑐᑭᓯᓂᖃᕈᕕᑦ ᒫᓐᓇ, ᑐᓵᓚᐅᓐᖓ;
ᐅᖃᐅᓯᕆᔭᒃᑲ ᓈᓚᒡᓗᒋᑦ.
17ᓇᓛᒎᕐᓂᕐᒥᒃ ᐆᒥᓱᒃᑐᖅ ᑲᒪᔨᐅᔪᓐᓇᕋᓗᐊᕐᐹ?
ᐸᓯᔭᒃᓴᐅᓂᕋᕈᓐᓇᕐᐱᐅᒃ ᓇᓛᒎᕐᑐᑐᐊᖅ ᐊᔪᒐᖃᖏᑦᑐᖅ?
18ᐃᓄᒃ ᓈᒻᒪᓈᕋᔭᕐᐹ ᐊᖓᔪᖅᑳᕐᔪᐊᕐᒧᑦ ᐅᖃᕐᐸᑦ,
‘ᐊᑑᑎᖃᓐᖏᓚᑎᑦ,’
ᐊᐅᓚᑦᓯᔨᐅᔪᓄᓪᓗ, ‘ᐱᐅᖏᑦᑐᓕᔨᐅᕗᓯ’;
19ᐊᖓᔪᖅᑳᓪᓕ ᓇᓪᓕᐊᓐᓂᒃ ᐱᑦᓯᐊᕐᓂᕐᓴᖃᕐᐸᓐᖏᓚᖅ,
ᐊᒃᓱᐃᑦᑐᓪᓗ ᐱᑦᓯᐊᕐᓂᕐᓴᕆᕙᓐᖏᓔᑦ ᐊᒃᓱᔪᓂᑦ,
ᑕᒪᒃᑯᐊᓕᒫᑦ ᑖᑦᓱᒪ ᓴᓇᓯᒪᔧᓐᓇᕆᖕᒪᒋᑦ.
20ᑕᕝᕔᓐᓇᖅ ᑐᖁᕙᒃᐳᑦ;
ᐅᓐᓄᐊᑉ ᕿᑎᕋᕐᓂᖓᓂ ᐃᓄᐃᑦ ᐊᐅᓚᑎᑕᐅᒐᒥᒃ ᑐᖁᕗᑦ,
ᐊᔪᖏᑦᑐᕐᔪᐊᓪᓗ ᐊᐅᓪᓚᕈᑦᔭᐅᕗᑦ ᐃᓄᖕᓄᑦ ᑎᒍᔭᐅᓚᐅᕋᑎᒃ.
21ᑖᑦᓱᒪ ᐃᓄᓕᒫᑦ ᑕᑯᓐᓇᕐᒪᒋᑦ ᐃᓕᖅᑯᓯᖏᑦ,
ᖃᓄᐃᓕᐅᕐᓂᓕᒫᖏᓪᓗ ᑕᑯᓐᓇᕆᕔᑦ.
22ᑖᕐᓂᕐᑕᖃᓐᖏᓚᖅ ᑐᖂᓪᓘᓐᓃᑦ ᐃᓂᖓᓂ
ᐱᐅᖏᑦᑐᓕᔪᓄᑦ ᐃᔨᕐᕕᐅᔪᓐᓇᕋᔭᕐᑐᒥᒃ.
23ᓇᓪᓕᐊᓐᓄᓪᓘᓐᓃᑦ ᐃᓄᖕᒧᑦ ᐋᖅᑭᒃᓲᑦᔭᐅᔭᕆᐊᖃᓐᖏᓚᖅ ᐱᕕᒃᓴᒥᒃ
ᐃᖅᑲᕐᑐᐃᕕᖕᒥ ᐃᖅᑲᕐᑐᕐᑕᐅᖁᓪᓗᒍ ᒎᑎᐅᑉ ᓵᖓᓂ.
24ᐊᔪᖏᑦᑐᕐᔪᐊᑦ ᓄᖅᑲᕐᑎᖃᑦᑕᕐᐰᑦ ᖃᐅᔨᓴᕐᑕᐅᓚᐅᕋᑎᒃ,
ᐊᓯᖏᓐᓄᓪᓗ ᐃᓇᖏᕐᑕᐅᑎᓪᓗᒋᑦ.
25ᐃᓛᒃ ᖃᐅᔨᒪᑦᓯᐊᕐᒪᒋᑦ ᐱᓂᐊᕐᓂᕆᔭᖏᑦ,
ᐅᓐᓄᐊᒃᑯᑦ ᓵᓚᒋᕔᑦ, ᑕᕝᕙ ᓯᖁᒥᓪᓚᕆᒃᐳᑦ.
26ᐊᔪᕐᑐᓕᔪᑦ ᓱᒋᐊᕐᐰᑦ
ᐃᓄᐃᑦ ᖃᐅᔨᑎᓪᓗᒋᑦ,
27ᒎᑎᒥᒃ ᕿᒤᓯᒪᓂᖏᑦ ᐱᑦᔪᑎᒋᓪᓗᒋᑦ,
ᑖᑦᓱᒪᓗ ᐊᑐᕐᑕᐅᖁᔭᖏᓐᓂᒃ ᓇᓪᓕᐊᓐᓂᒡᓘᓐᓃᑦ ᑲᒪᖏᒻᒪᑕ.
28ᐊᒃᓱᔪᑦ ᐃᑲᔪᕐᑕᐅᔪᒪᓕᖁᓪᓗᒋᑦ ᑖᑦᓱᒧᖓ,
ᐋᓐᓂᐊᓇᕐᑐᒦᑦᑐᑦ ᓂᓪᓕᐊᓕᕐᒪᑕ ᑕᕝᕙ ᑐᓴᓚᐅᕐᐰᑦ.
29ᒎᑎ ᓂᐱᖃᕈᓐᓁᕐᐸᑦ, ᑭᐊ ᐸᒡᕕᓴᕈᓐᓇᕐᐸᐅᒃ?
ᑖᑦᓱᒪᓗ ᑮᓇᓂ ᑕᓕᑎᑉᐸᒍ, ᑭᐊ ᑕᑯᔪᓐᓇᕐᐸᐅᒃ?
ᐃᓅᖃᑎᒌᒡᔪᐊᓄᑦ ᐅᕝᕙᓗ ᐃᓄᑐᐊᒧᑦ?
30ᒎᑎᖃᖏᑦᑐᖅ ᐊᐅᓚᑦᓯᔨᐅᓕᖁᓇᒍ,
ᐃᓄᐃᑦ ᓂᒐᕐᑎᑕᐅᓯᒪᔪᑎᑐᑦ ᐱᖁᓇᒋᑦ.
31ᒎᑎᒧᑦ ᐅᖃᕐᑐᖃᓚᐅᕐᓯᒪᕚ,
‘ᐋᖅᑭᒋᐊᕐᑕᐅᓯᒪᓕᕋᒪ; ᐱᐅᖏᑦᑐᓕᒃᑲᓐᓂᕐᓂᐊᕈᓐᓁᕐᐳᖓ;
32ᐊᔪᕆᕐᑐᓚᐅᓐᖓ ᑕᑯᓐᓇᓐᖏᑕᓐᓂᒃ;
ᐊᔪᕐᑐᓕᓚᐅᕐᓂᕈᒪ, ᑍᒤᓕᐅᕐᓂᐊᕈᓐᓁᕐᐳᖓ.’
33ᑕᕝᕙ ᒎᑎᐅᑉ ᐱᖁᓚᐅᕐᑕᖓᓂᒃ ᐱᓯᒪᓐᖏᑎᓪᓗᑎᑦ,
ᐱᓇᓱᐊᕐᕕᐅᓂᐊᕋᓱᒋᕖᑦ ᐃᓱᒪᒋᔧᑦ ᒪᓕᒡᓗᒍ?
ᓇᖕᒥᓂᖅ ᓂᕈᐊᕆᐊᖃᕐᐳᑎ, ᐅᕙᖓᐅᖏᑦᑐᖅ;
ᐊᑏ ᖃᐅᔨᒪᔭᕐᓂᒃ ᐅᖃᓕᕆᑦ.
34ᐃᓄᐃᑦ ᑐᑭᓯᓯᒪᔪᑦ ᐅᕙᓐᓄᑦ ᐊᖏᖃᑕᐅᒐᔭᕐᐳᑦ,
ᓯᓚᑐᔪᓪᓗ ᐅᕙᓐᓂᒃ ᑐᓵᔪᑦ ᐅᖃᕋᔭᕐᐳᑦ:
35‘ᔫᐱ ᐅᖃᓪᓚᓚᐅᕐᐳᖅ ᖃᐅᔨᒪᓐᖏᑕᒥᓂᒃ,
ᐅᖃᐅᓯᕆᔭᖏᑦ ᓯᓚᑐᓂᒃᑰᕐᓯᒪᓐᖏᓚᑦ.’
36ᐃᓱᒪᒋᓚᐅᕐᓯᒋᒃ ᔫᐱᐅᑉ ᐅᖃᐅᓯᕆᓚᐅᕐᑕᓕᒫᖏᑦ,
ᑕᕝᕙ ᑕᑯᔪᓐᓇᕐᐳᓯ ᐱᐅᖏᑦᑐᓕᔪᑎᑐᑦ ᐅᖃᓪᓚᒡᓯᒪᖕᒪᑦ.
37ᐊᔪᕐᑐᓕᓂᓂ ᐃᓚᓯᒪᕔᑦ ᐊᑭᕋᕐᑐᕐᓂᕐᒥᒃ;
ᑐᓵᑎᓪᓗᑕ ᒎᑎᒥᒃ ᒥᑕᐅᑎᖃᕐᓯᒪᕗᖅ ᐅᖃᓪᓚᖕᓂᕐᒥᒍᑦ.”
Currently Selected:
ᔫᐱᐅᑉ ᐊᒡᓚᖏᑦ 34: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
