ᔫᐱᐅᑉ ᐊᒡᓚᖏᑦ 33
33
1“ᔫᐲ ᐅᖃᐅᓯᕆᔭᒃᑲ ᓈᓚᑦᓯᐊᓚᐅᒃᑭᑦ,
ᐅᖃᐅᓯᓕᒫᒃᑲᓗ ᐃᒃᐱᒋᑦᓯᐊᕐᓗᒋᑦ.
2ᑕᑯᒋᑦ, ᖃᓂᕋ ᐂᑦᑕᕐᐸᕋ;
ᐅᖃᕋ ᐅᖃᓪᓚᖁᓪᓗᒍ ᐅᖃᐅᓯᕐᓂᒃ,
3ᐅᖃᐅᓯᒃᑲ ᓇᓗᓁᕐᓯᕗᑦ ᐆᒻᒪᑎᒪ ᓇᓛᒎᕐᓂᖓᓂᒃ,
ᖃᓂᕋᓗ ᓱᓕᑦᓯᐊᕐᑐᒥᒃ ᐅᖃᐅᓯᖃᕐᓂᐊᕐᐳᖅ.
4ᒎᑎᐅᑉ ᐊᓂᕐᓂᖓᑕ ᓴᓇᓚᐅᕐᐹᖓ,
ᐊᔪᒐᖃᖏᑦᑑᓪᓗ ᐊᓂᕐᓂᖓᑕ ᐃᓅᓯᕐᑖᕐᑎᓚᐅᕐᐹᖓ.
5ᑕᒪᑐᒧᖓ ᑭᐅᑦᔪᑎᒃᓴᖃᕈᕕᑦ ᑭᐅᓐᖓ;
ᐅᖃᐅᓯᒃᓴᑎᑦ ᐋᖅᑭᒃᓱᓕᒃᑭᑦ; ᐃᓕᖕᓂᒃ ᓴᐳᓐᓂᐊᕐᓗᑎᑦ.
6ᒎᑎᐅᑦᑕᐅᖅ ᓵᖓᓂ ᐃᓕᒃᑐᑦ ᑍᒤᒻᒥᒐᒪ;
ᓄᓇᒥᑦᑕᐅᖅ ᓴᓇᔭᐅᓯᒪᖕᒥᒐᒪ.
7ᑍᒤᒻᒪᑦ ᐅᕙᓐᓂᒃ ᑲᑉᐱᐊᓱᒋᐊᖃᓐᖏᓚᑎᑦ;
ᐃᓕᖕᓄᓪᓗ ᐅᖁᒤᑦᑐᓂᒃ ᐅᖃᐅᓯᖃᕐᓂᐊᕐᓇᖓ.
8ᐃᓛᒃ ᑐᓵᑎᓪᓗᖓ ᐅᖃᓪᓚᓚᐅᕋᕕᑦ,
ᐅᖃᐅᓯᕆᔭᑎᑦ ᑐᓵᓚᐅᕐᐸᒃᑲ, ᐅᖃᓚᐅᕋᕕᑦ,
9‘ᐃᑦᔪᕐᓁᑦᑑᕗᖓ, ᐱᐅᖏᑦᑐᓕᓚᐅᕐᓇᖓᓗ;
ᐸᓯᔭᒃᓴᐅᓐᖏᓚᖓ, ᐊᔪᕐᑐᓕᓚᐅᕐᓇᖓᓗ.
10ᒎᑎᓕ ᐱᑦᔪᑎᒃᓴᕐᓯᒐᒥ ᐅᕙᓐᓂᒃ ᐊᑭᕋᕐᑐᓕᓚᐅᕐᐳᖅ,
ᐆᒥᒋᔨᒥᑐᓪᓗ ᐱᓇᓱᐊᕐᕕᒋᓚᐅᕐᐹᖓ.
11 #
ᔫᐱ 13:27. ᐃᑎᒐᒃᑲ ᐊᕐᓵᕐᑑᔭᓄᑦ ᕿᓚᓚᐅᕐᐰᑦ,
ᐊᓪᓗᕐᓂᓕᒫᒃᑲᓗ ᖃᐅᔨᓴᓕᕐᓗᒋᑦ.’
12ᑕᑯᒋᑦ, ᔫᐲ ᑍᒤᓕᑎᓪᓗᑎᑦ ᑕᒻᒪᓚᐅᕐᐳᑎᑦ.
ᒎᑎ ᐊᖏᓂᕐᓴᐅᖕᒪᑦ ᐃᓄᖕᓂᑦ.
13ᓱᖕᒪᑦ ᒎᑎ ᐊᑭᕋᕐᑐᕋᓱᓚᐅᕐᐱᐅᒃ?
ᐅᖃᕐᓗᑎᑦ, ‘ᐅᖃᐅᓯᓐᓂᒡᓘᓐᓃᑦ ᓇᓪᓕᐊᓐᓂᒃ ᑭᐅᔪᓐᓇᓐᖏᓚᖅ.’
14ᒎᑎᓕ ᐅᖃᓪᓚᖃᑦᑕᕋᓗᐊᕐᐳᖅ, ᐊᑦᔨᒌᖏᑦᑐᑎᒍᑦ,
ᑭᓯᐊᓂᓕ ᐅᖃᐅᓯᖏᓐᓂᒃ ᓈᓚᒃᑐᖃᕐᐸᓐᖏᓚᖅ.
15 #
ᔫᐱ 4:13. ᐅᓐᓄᐊᒃᑯᑦ ᐃᓄᐃᑦ ᓯᓂᒃᑎᓪᓗᒋᑦ,
ᓯᓐᓇᒃᑑᒪᒃᑯᑦ ᒎᑎ ᐅᖃᓪᓚᖃᑦᑕᕐᐳᖅ ᑕᑯᑎᑦᓯᕙᒡᓗᓂᓗ.
16ᑍᒫᒃ ᐅᖃᓪᓚᒡᕕᒋᔪᓐᓇᕐᓯᖃᑦᑕᕐᐰᑦ ᓈᓚᒃᑎᓪᓗᒋᑦ,
ᑲᑉᐱᐊᓱᓕᖃᑦᑕᕐᐳᓪᓕ ᐅᓗᕆᐊᓇᕐᑐᓂᒃ ᐅᖃᐅᑎᓕᑐᐊᕐᒪᒋᑦ.
17ᒎᑎ ᐅᖃᓪᓚᖃᑦᑕᕐᐳᖅ ᐊᔪᕐᑐᓕᓂᖏᓐᓂᑦ ᓄᖅᑲᖁᓪᓗᒋᑦ,
ᓴᐳᑎᔪᒪᓪᓗᒋᓪᓗ ᐱᐅᔪᕆᓂᕐᒧᑦ ᑎᑭᐅᑎᓕᖁᓇᒋᑦ.
18ᑕᕐᓂᖏᑦ ᓴᐳᑎᓗᒋᑦ ᐃᑎᕐᓴᒧᑦ ᑲᑕᖕᓂᕐᒥᑦ,
ᐃᓅᓯᖏᓪᓗ ᐱᐅᓕᓪᓗᒋᑦ ᑐᖁᒥᑦ.
19ᒎᑎ ᐋᖅᑭᒋᐊᕐᓯᕙᒃᑭᕗᖅ ᐃᓄᒃ ᖃᓂᒪᓂᒃᑰᕐᑎᓪᓗᒍ,
ᑎᒥᖓᓗ ᐋᓐᓂᐊᓂᕐᒧᑦ ᑎᑭᑕᐅᑎᓪᓗᒍ;
20ᐃᓄᒃ ᖃᓂᒪᓕᕈᓂ ᓂᕆᔪᒪᔪᓐᓁᕈᓐᓇᖁᓪᓗᒍ,
ᐊᒡᓛᑦ ᓂᕿᑦᓯᐊᕙᐅᓂᕐᐹᖑᒐᓗᐊᑦ ᓂᕆᔪᒥᓇᕆᔪᓐᓁᕐᓗᓂᒋᑦ.
21ᑎᒥᖓ ᓴᓗᒃᑎᓐᓂᕐᒧᑦ ᒥᑭᒡᓕᖁᓪᓗᒍ;
ᓴᐅᓂᖏᓪᓗ ᐅᕕᓂᖓᓄᑦ ᑕᕐᕆᓯᒪᑐᐃᓐᓇᕐᑑᔭᓕᕐᑎᓪᓗᒋᑦ.
22ᑕᕐᓂᖓ ᐃᑎᕐᓴᒧᑦ ᖃᒡᓕᑎᓪᓗᓂᐅᒃ,
ᐃᓅᓯᖓᓗ ᑐᖁᒧᑦ ᑎᑭᐅᑎᑎᓪᓗᓂᐅᒃ.
23ᐂᖏᓕᒧᑦ ᐅᐸᒃᑕᐅᓗᓂ ᐃᑲᔪᕐᑕᐅᔪᓐᓇᕐᓯᖁᓪᓗᒍ,
ᒎᑎᐅᑉ ᐂᖏᓕᖁᑎᒐᓴᒡᔪᐊᖏᑕ ᐃᓚᖓᓐᓄᑦ,
ᐃᓄᖕᒧᑦ ᓇᓗᓁᕐᓯᔪᒪᓪᓗᓂ ᓱᓇ ᐊᑲᐅᔫᖕᒪᖔᑦ ᑖᑦᓱᒧᖓ;
24ᑖᓐᓇ ᓂᑲᒋᓗᒍ ᐅᖃᕐᕕᒋᔪᒪᓪᓗᓂᐅᒃ, ᐅᖃᕐᓗᓂ,
‘ᓴᒃᑯᓕᕈᒃ! ᐅᓇ ᑐᖁᖓᔪᑦ ᐃᓂᖓᓄᐊᕐᓂᐊᖏᑦᑐᖅ,
ᑕᓱᕐᑕᐅᑦᔪᑎᒃᓴᖓᓂᒃ ᓇᒡᕚᕐᐳᖓ;
25ᑎᒥᖓ ᐅᑎᕐᑎᓕᕈᒃ ᓄᑕᕋᐅᓂᕆᓚᐅᕐᑕᖓᑐᑦ;
ᓲᖑᓯᑦᓯᐊᕐᒥᓗᓂ ᐃᓅᓱᒃᑑᓪᓗᓂ ᓴᓐᖏᓂᕆᓚᐅᕐᑕᒥᑐᑦ’;
26ᑕᕝᕙ ᑐᒃᓯᐊᓕᕐᓂᐊᕐᐳᖅ ᒎᑎᒧᑦ ᑖᑦᓱᒪᓗ ᑐᓴᕐᓂᐊᕐᐹ,
ᒎᑎᐅᑉ ᓇᔪᕐᑕᖓᓄᐊᕐᓂᐊᕐᐳᖅ ᖁᕕᐊᓱᒡᓗᓂ;
ᑕᕝᕙ ᒎᑎᐅᑉ ᐅᑎᕐᑎᓐᓂᐊᕐᐹ ᐱᐅᓕᓗᓂᐅᒡᓗ.
27ᐃᓄᐃᓪᓗ ᓵᖏᓐᓂ ᐅᖃᕆᒃᓴᐅᑎᒋᓂᐊᕐᐹ, ᐅᖃᕐᓗᓂ,
‘ᐊᔪᕐᑐᓕᓚᐅᕐᐳᖓ, ᓇᓛᒎᕐᓂᕐᒥᓗ ᐃᓅᓚᐅᕐᓇᖓ,
ᒎᑎᐅᓪᓕ ᓂᑲᒋᓪᓗᖓ ᓴᐳᑎᓚᐅᕐᐹᖓ.
28ᑖᑦᓱᒪ ᑕᕐᓂᕋ ᐱᐅᓕᓚᐅᕐᐹ ᑐᖁᖓᔪᑦ ᐃᓂᖓᓄᐊᕐᓂᕐᒥᑦ,
ᐃᓅᓯᕋᓗ ᑕᑯᖁᓪᓗᒍ ᖃᐅᒪᔪᒥᒃ ᐃᓅᒃᑲᓐᓂᕈᓐᓇᖁᓪᓗᖓ.’
29ᑕᑯᒋᑦ, ᒎᑎ ᑕᒪᒃᑯᓂᖓᓕᒫᖅ ᐱᓇᓱᐊᖃᑦᑕᕐᐳᖅ,
ᐃᓄᖕᒧᑦ ᒪᕐᕈᐃᕐᑐᕐᓗᓂ, ᐱᖓᓱᐃᕐᑐᕐᓗᓂᓘᓐᓃᑦ.
30ᑕᕐᓂᖓ ᐅᑎᕐᑎᑦᓱᒪᓪᓗᒍ ᑐᖁᑉ ᓇᕐᓴᖓᓂᑦ,
ᑕᑯᔪᓐᓇᕐᓯᖁᓪᓗᒍ ᐃᓅᓯᐅᑉ ᖃᐅᒪᓂᖓᓂᒃ.
31ᔫᐲ, ᒫᓐᓇ ᐅᖃᐅᓯᕆᔭᒃᑲ ᓈᓚᑦᓯᐊᒃᑭᑦ;
ᓂᐱᖃᖏᓪᓗᑎᑦ, ᐅᖃᓪᓚᒍᓐᓇᕐᑎᓚᐅᓐᖓ.
32ᐅᖃᐅᓯᒃᓴᖃᕈᕕᑦ ᖃᓄᑐᐃᓐᓇᖅ, ᐅᖃᐅᑎᓂᐊᕐᐸᕐᒪ;
ᖁᕕᐊᓱᒡᓗᖓ ᓱᓕᓂᕐᓂᒃ ᓇᓗᓁᕐᓯᔪᒪᒐᒪ.
33ᐅᖃᐅᓯᒃᓴᖃᖏᒃᑯᕕᓪᓕ, ᓈᓚᑦᓯᐊᓚᐅᓐᖓ;
ᓈᓚᑦᓯᐊᕐᓗᑎᑦ, ᑕᕝᕙ ᓯᓚᑐᓂᕐᒥᒃ ᐊᔪᕆᕐᑑᑎᓂᐊᕐᐸᒋᑦ.”
Currently Selected:
ᔫᐱᐅᑉ ᐊᒡᓚᖏᑦ 33: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
