ᔫᐱᐅᑉ ᐊᒡᓚᖏᑦ 32
32
ᐃᓕᕼᐆᑉ ᐅᖃᓪᓚᖕᓂᖓ
1ᑕᕝᕙ ᑖᒃᑯᐊ ᐊᖑᑎᑦ ᐱᖓᓱᑦ ᔫᐱᒧᑦ ᑭᐅᓇᓱᐊᕈᓐᓁᕐᐳᑦ, ᑐᑭᓯᒐᒥᒃ ᔫᐱᐅᑉ ᐸᓯᔭᒃᓴᐅᓂᖃᖏᓐᓂᖓᓂᒃ. 2ᑕᕝᕙ ᐃᓕᕼᐅ ᐸᕌᑭᐅᑉ ᐃᕐᓂᖓ ᐳᔾᔧᑎᒥᐅᖅ, ᕌᒥᒃᑯᑦ ᑭᖑᕚᖏᓐᓂᑦ ᐱᓯᒪᔪᖅ, ᔫᐱᒧᑦ ᓂᓐᖓᒃᐳᖅ ᐃᒻᒥᓂᒃ ᐸᓯᔭᒃᓴᐅᔪᓐᓁᕐᑎᓐᓇᓱᖕᒪᑦ ᒎᑎᒥᒃ ᐸᓯᒃᓯᖔᕐᓗᓂ. 3ᔫᐱᐅᑉ ᐃᓚᓐᓇᕆᔭᖏᓐᓄᑦ ᐱᖓᓱᓄᑦ ᓂᓐᖓᓚᐅᕆᕗᖅ, ᑭᒡᒍᓯᒃᓴᖃᕈᓐᓁᓚᐅᕐᒪᑕ ᔫᐱᒧᑦ, ᐸᓯᔭᒃᓴᐅᓇᓱᒋᒃᓯᑐᐃᓐᓇᕐᓗᑎᒃ ᑖᑦᓱᒥᖓ. 4ᐃᓕᕼᐅᓕ ᑖᒃᑯᓇᓐᖓᑦ ᓄᑲᕐᓯᕐᐸᐅᒐᒥ ᑕᕝᕙᓃᑦᑐᓂᑦ, ᐅᑕᖅᑭᓚᐅᕐᐳᖅ ᐅᖃᕇᕐᓯᐊᕆᓪᓗᒋᑦ ᔫᐱᒧᑦ ᐅᖃᕈᒪᓪᓗᓂ. 5ᐃᓕᕼᐅᓕ ᖃᐅᔨᓕᕋᒥ ᑖᒃᑯᐊ ᐱᖓᓱᑦ ᑭᐅᔪᓐᓁᓪᓕᓂᖏᓐᓂᒃ, ᑕᕝᕙ ᓂᓐᖓᓕᕐᐳᖅ.
ᐃᓕᕼᐅ
6ᐃᓕᕼᐅᓗ, ᐸᕌᑭᐅᑉ ᐃᕐᓂᖓ ᐳᔾᔧᑎᒥᐅᖅ ᐅᖃᓕᕐᐳᖅ:
“ᐃᓅᓱᒃᑑᒐᒪ, ᐃᓕᑦᓯᓕ ᐃᓄᑐᖃᐅᕗᓯ;
ᑍᒤᒻᒪᑦ ᐃᓕᕋᓱᓚᐅᕐᐳᖓ ᐃᓱᒪᒋᔭᓐᓂᒃ ᐅᖃᕆᐊᒃᓴᖅ.
7ᐃᓱᒪᖃᓚᐅᕋᒪ, ᐊᖓᔪᒃᓰᑦ ᐅᖃᓪᓚᖔᕐᑐᒃᓴᐅᕗᑦ,
ᐃᓄᑐᖃᐅᓂᕐᓴᐅᔪᓯ ᐊᔪᕆᕐᑐᐃᔪᒃᓴᐅᒐᑦᓯ ᓯᓚᑐᓂᕐᒥᒃ.
8ᒎᑎᐅᓪᓕ ᐊᔪᒐᖃᖏᑦᑑᑉ ᐊᓂᕐᓂᖓᑕ ᐃᓄᖕᒦᑦᑑᑉ,
ᓇᔫᑎᓂᖓᓄᑦ ᐃᓄᒃ ᑐᑭᓯᔪᓐᓇᕐᑎᑕᐅᔪᓐᓇᕐᐳᖅ.
9ᐃᓄᑐᖃᐅᓂᕐᒧᑦ ᐃᓄᒃ ᓯᓚᑐᔪᕈᕐᑎᑕᐅᕙᓐᖏᓚᖅ,
ᐊᖓᔪᒃᓯᐅᓂᕐᒥᓄᓪᓗ ᑐᑭᓯᑎᑕᐅᕙᓐᖏᓚᖅ ᓱᓇ ᓇᓚᐅᑦᓯᖕᒪᖔᑦ.
10ᑍᒤᒻᒪᑦ ᒫᓐᓇ ᓈᓚᑬᓐᓇᓚᐅᕐᓯᓐᖓ,
ᐃᓱᒪᒋᔭᓐᓂᒡᓕ ᐅᖃᕐᕕᖃᑬᓐᓇᓚᐅᕐᓚᖓ.
11ᕿᓄᐃᓵᕐᓗᖓ ᓈᓚᓚᐅᕐᐸᑦᓯ ᐅᖃᓪᓚᒃᑎᓪᓗᓯ,
ᐅᖃᐅᓯᕆᔭᓯᓗ ᓯᓚᑐᓂᕐᒥᒃ ᓇᓗᓁᕐᓯᓚᐅᕐᐳᑦ,
ᖃᓄᖅ ᐅᖃᐅᓯᖃᕆᐊᖃᕐᒪᖔᑦᓯ ᐃᓱᒪᒃᓴᕐᓯᐅᕐᑎᓪᓗᓯ.
12ᐃᒃᐱᒍᓱᑦᓯᐊᕐᓗᖓ ᓈᓚᑦᓯᐊᓚᐅᕐᐸᑦᓯ;
ᑭᓯᐊᓂᓕ ᐅᖃᐅᓯᕆᔭᑦᓯᓐᓄᑦ ᔫᐱ ᓇᓚᐅᑕᐅᓚᐅᓐᖏᓚᖅ,
ᐅᖃᐅᓯᕆᔭᖏᓪᓗ ᐃᓕᑦᓯᓐᓄᑦ ᑭᐅᔭᐅᓚᐅᕋᑎᒃ.
13ᓱᖕᒪᑦ ᐃᓕᓯᒪᓂᕐᒥᒃ ᖃᐅᔨᓯᒪᓂᕋᖃᑦᑕᓚᐅᕐᐱᓯ?
ᒎᑎᐅᑉ ᑭᓯᒥ ᑖᓐᓇ ᑭᐅᔪᓐᓇᐹ, ᐃᓄᖕᓂᐅᖏᑦᑐᖅ.
14ᔫᐱ ᐅᕙᓐᓄᑦ ᐅᖃᓪᓚᓚᐅᖏᒻᒪᑦ,
ᐃᓕᑦᓯᓗ ᑭᐅᒪᓂᕆᓚᐅᕐᑕᑦᓯᑐᑦ ᑭᐅᒪᓂᐊᓐᖏᓚᕋ.
15ᐃᓕᖕᓄᑦ ᐅᖃᐅᓯᒃᓴᖃᕈᓐᓁᕐᐳᑦ,
ᑭᒡᒍᓯᒃᓴᖃᕈᓐᓁᕐᓗᑎᒡᓗ.
16ᓱᓕ ᐅᑕᖅᑭᔭᕆᐊᖃᕐᐳᖔ ᑖᒃᑯᐊ ᓂᐱᖃᓐᖏᑎᓪᓗᒋᑦ?
ᑕᕝᕙᓂ ᓇᖏᑐᐃᓐᓇᓕᕐᒪᑕ, ᐅᖃᐅᓯᒃᓴᖃᕈᓐᓁᕐᓗᑎᒃ.
17ᑕᕝᕙ ᑭᐅᓂᐊᓕᕐᐳᖓ ᒫᓐᓇ;
ᐅᖃᐅᑎᓗᑎᓪᓗ ᐃᓱᒪᒋᔭᓐᓂᒃ.
18ᐅᖃᐅᓯᒃᓴᓕᐊᓘᓕᕋᒪ,
ᐊᓂᕐᓂᐅᑉ ᐃᓗᓐᓃᑦᑑᑉ ᓄᖅᑲᖓᑎᑦᑐᓐᓁᓪᓕᖕᒪᖓ.
19ᑕᑯᒋᑦ, ᓈᕋ ᕔᓂᑎᑐᑦ ᐳᓪᓚᒃᑐᑎᑑᓕᕐᐳᖅ;
ᕔᓂᖃᐅᑎᒧᑦ ᕿᓯᖕᒧᑦ ᐴᕐᓯᒪᓪᓗᓂ ᖄᓕᒑᓕᕐᑐᑎᑐᑦ.
20ᐅᖃᕐᓗᖓ ᑭᓯᐊᓂᐅᓕᕐᐳᖅ, ᐸᓚᕐᓯᔪᓐᓇᖁᓪᓗᖓ;
ᓂᓪᓕᕐᓗᖓ ᑭᓯᐊᓂᐅᓕᕐᐳᖅ ᑭᐅᓗᖓᓗ.
21ᓇᓪᓕᐊᓐᓂᒡᓘᓐᓃᑦ ᑕᑉᐱᕐᓱᐃᓗᖓ ᐅᖃᕐᓂᐊᓐᖏᓚᖓ
ᓇᓪᓕᐊᓐᓂᒡᓗ ᐱᐅᓯᑎᑦᓯᓂᕐᓴᐅᓗᖓ ᐱᓂᐊᓐᖏᓚᖓ.
22ᓇᓪᓕᐊᓐᓂᒃ ᐱᐅᓯᑎᑦᓯᓂᕐᓴᐅᔭᕆᐊᒃᓴᖅ ᖃᐅᔨᒪᖏᓐᓇᒪ,
ᑍᒤᑐᐊᕈᒪ ᐱᓐᖑᕐᑎᑎᒪ ᓱᒋᐊᑦᓴᐅᑎᒋᒐᔭᕐᐹᖓ ᑐᖁᑎᓪᓗᓂᖓ.”
Currently Selected:
ᔫᐱᐅᑉ ᐊᒡᓚᖏᑦ 32: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
