ᔫᐱᐅᑉ ᐊᒡᓚᖏᑦ 31
31
ᔫᐱᐅᑉ ᐅᖃᓪᓚᖕᓂᖓᑕ ᓄᖅᑲᐅᓯᕐᓂᖓ
1“ᐊᖏᒻᒪᕆᒡᓗᖓ ᐅᕙᓐᓄᑦ ᐊᖏᕈᑎᖃᕐᓯᒪᕗᖓ;
ᐅᐃᒡᒐᓱᖕᒥᒃ ᐃᒃᓯᒎᕐᓗᖓ ᑕᑯᓐᓇᖃᑦᑕᕈᒪᓇᖓ.
2ᓱᓇᒥᒡᓕ ᒎᑎᐅᑉ ᑕᑉᐹᓐᖓᑦ ᐊᑭᓕᕐᓂᐊᕐᐹᖔ?
ᓱᓇᒥᒡᓗ ᐊᔪᒐᖃᖏᑦᑑᑉ ᖁᑦᓯᒃᑐᒥᑦ ᑭᖑᕐᖑᑎᔭᒃᓴᖃᕐᑎᑉᐹᖔ?
3ᐃᓱᐃᑦᑐᓕᔪᑦ ᐊᒃᓱᕈᕐᑎᑕᐅᓂᕐᒥᒃ ᑎᑭᕝᕕᐅᔪᒃᓴᐅᓐᖏᓛᑦ?
ᐱᐅᖏᑦᑐᓕᔪᑦ ᐊᓯᕈᕐᑕᐅᓇᕐᑐᒧᑦ ᐊᑭᓕᕐᑕᐅᔪᒃᓴᐅᓐᖏᓛᑦ?
4ᐊᖅᑯᑎᒋᔭᕋ ᒎᑎᐅᑉ ᑕᑯᓐᓇᓐᖏᓚᐅᒃ?
ᐊᓪᓗᕐᓂᓕᒫᒃᑲᓗ ᓈᓴᕈᓐᓇᓐᖏᓔᑦ?
5ᓱᓕᖏᑦᑐᒥᒃ ᐱᓇᓱᐊᖃᑦᑕᕐᓯᒪᓐᓂᕈᒪ,
ᐃᓅᖃᑎᓐᓂᒡᓗ ᓯᓔᕐᕆᒃᓯᕙᓚᐅᕐᓂᕈᒪ;
6ᓱᓕᔪᒃᑯᑦ ᐅᖁᒤᓐᓂᕐᓂᐊᕐᑕᐅᓗᖓ ᖃᐅᔨᓴᕐᑕᐅᑦᓯᐊᕈᒪᕗᖓ,
ᒎᑎᐅᑉ ᓇᖕᒥᓂᖅ ᖃᐅᔨᓂᐊᕐᒪᖓ ᐸᓯᔭᒃᓴᐅᓂᖃᖏᓐᓂᓐᓂᒃ.
7ᐊᓪᓗᕐᓂᒃᑲ ᐊᖅᑯᑎᐅᑉ ᓯᓚᑖᓄᐊᕐᓯᒪᒃᐸᑕ,
ᐆᒻᒪᑎᒐᓗ ᑕᑯᓐᓇᕐᑕᓐᓄᑦ ᒪᓕᒃᓴᓚᐅᕐᓂᕐᐸᑦ,
ᐊᒡᒐᒃᑲᓗ ᐱᐅᖏᑦᑐᓕᓂᕐᒥᒃ ᐊᒃᑐᕐᓯᓚᐅᕐᓂᕐᐸᑕ;
8ᑕᕝᕙ ᑲᓐᖓᕐᓲᑎᒋᓚᐅᕐᑕᒃᑲ ᐊᓯᓐᓄᑦ ᓂᕆᔭᐅᔪᒃᓴᐅᕗᑦ;
ᓂᕿᒃᓮᓪᓗ ᐱᕈᕐᑎᑕᒃᑲ ᐊᓯᓐᓄᑦ ᓄᐊᑕᐅᔪᒃᓴᐅᓪᓗᑎᒃ.
9ᐆᒻᒪᑎᒐ ᐃᒃᓯᒎᕐᓂᖃᕐᓯᒪᓐᓂᕐᐸᑦ ᐃᓅᖃᑎᒪ ᓄᓕᐊᖓᓄᑦ,
ᓯᓚᖅᑲᑎᒪᓗ ᐅᒃᑯᐊᖓᑕ ᓴᓂᐊᓂ ᐃᔨᕐᓯᒪᓗᖓ ᐅᑕᖅᑭᓚᐅᕐᓯᒪᓐᓂᕈᒪ;
10ᑕᕝᕙ ᓄᓕᐊᕋ ᓂᕿᓕᐅᕐᑐᒃᓴᐅᕗᖅ ᐊᓯᒪ ᓂᕆᔭᒃᓴᖏᓐᓂᒃ,
ᐊᓯᓐᓄᓪᓗ ᐅᑯᕕᐅᓗᓂ ᖄᖓᓃᕝᕕᐅᔪᒃᓴᐅᕗᖅ.
11ᑕᒪᓐᓇ ᑕᕝᕙ ᐱᐅᖏᑦᑐᓕᓂᖅ ᐱᕋᔭᖕᓂᐅᒐᔭᕐᐳᖅ;
ᓱᒋᐊᕐᑕᐅᑦᔪᑎᒃᓴᐅᓗᓂ ᐃᖅᑲᕐᑐᕐᑕᐅᑦᔪᑎᒃᓴᐅᒐᔭᕐᐳᖅ.
12ᑕᒪᓐᓇ ᐃᑯᒪᐅᒐᔭᕐᐳᖅ ᓱᒃᑯᑎᕆᓗᓂ ᓯᖁᒥᑕᐅᓂᕐᒧᑦ,
ᐱᖁᑎᓕᒫᒃᑲᓗ ᐊᒫᖏᓐᓄᑦ ᑎᑭᓪᓗᒋᑦ ᓄᖑᑕᐅᒐᔭᕐᐳᑦ.
13ᓇᓪᓕᐊᓐᓄᑦ ᐱᔨᓐᓄᑦ ᓈᒻᒪᒃᓴᖏᑦᑐᓄᑦ ᐅᖃᐅᑦᔭᐅᓗᖓ,
ᓈᓚᓚᐅᕐᓂᖏᒃᑯᒪ ᑲᒪᒋᔪᒪᓚᐅᕐᓂᖏᒃᑯᒃᑭᓪᓗ.
14ᖃᓄᐃᓕᖓᓕᕋᔭᕐᐳᖓᓕ ᒎᑎᒧᑦ ᓵᓐᖓᔭᐅᓕᕈᒪ?
ᐊᐱᕐᓱᓕᕐᐹᖓᓗ ᖃᓄᕐᓕ ᑭᐅᒐᔭᕐᐸᕌ?
15ᑖᓐᓇ ᐅᕙᓐᓂᑦ ᓴᓇᓚᐅᓐᖏᓛᖅ ᐃᒡᓕᐊᑉ ᐃᓗᐊᓃᑎᓪᓗᖓ?
ᑖᓐᓇᑦᓮᓐᓇᐅᓐᖏᓛᖅ ᐋᖅᑭᒃᓱᐃᓯᒪᔪᖅ ᐃᒡᓕᐊᑉ ᐃᓗᐊᓃᑎᓪᓗᑕ?
16ᐊᒃᓱᔪᒥᒃ ᐃᑲᔪᕐᑍᓕᒪᓚᐅᕐᓯᒪᓐᓂᕈᒪ ᐃᑲᔪᕐᑕᐅᔪᒪᔪᒥᒃ,
ᐅᕝᕙᓗ ᐅᐃᒡᒐᕐᓂᕐᒥᒃ ᓂᕆᐅᒋᔭᒃᓴᖃᕈᓐᓁᕐᑎᑦᓯᓚᐅᕐᓯᒪᓐᓂᕈᒪ,
17ᐅᕝᕙᓗ ᓂᕆᔪᑑᓚᐅᕐᓯᒪᓐᓂᕈᒪ ᐃᓄᑑᓗᖓ,
ᐃᓕᐊᕐᔪᐃᑦ ᓂᕆᔭᒃᓴᖃᕐᑎᓐᓇᒋᑦ
18ᐃᓅᓱᒃᑑᓂᓐᓂᑦ ᐊᑖᑕᑦᑐᑦ ᐱᖃᑦᑕᕐᓯᒪᕙᒃᑲ;
ᐊᓈᓇᖓᑕ ᐃᒡᓕᐊᖓᓃᑎᓪᓗᒋᑦ ᓱᓕ ᑲᒪᒋᑦᓯᐊᕈᒪᓯᒪᕙᒃᑲ;
19ᐊᓐᓄᕌᒃᓴᖃᖏᓐᓂᕐᒧᑦ ᑐᖁᓕᕐᑐᒥᒃ ᑕᑯᓚᐅᕐᓯᒪᓐᓂᕈᒪ,
ᐅᕝᕙᓗ ᐊᒃᓱᔪᒥᒃ ᐅᓕᒃᓴᖃᖏᑦᑐᒥᒃ ᐊᔪᕐᓴᕐᓂᕐᒧᑦ;
20ᑕᕝᕙ ᐊᓐᓄᕌᕐᑎᒐᔭᕐᐸᕋ ᓄᕕᕐᓵᒃᓴᔭᒥᒃ ᐅᖅᑰᔪᒥᒃ,
ᓇᖕᒥᓂᖅ ᓰᐱᖁᑎᒪ ᒥᖅᑯᖏᓐᓂᑦ ᐱᓯᒪᔪᒥᒃ.
21ᐃᓕᐊᕐᔪᐃᑦ ᓇᓪᓕᐊᓐᓂᒃ ᐱᑦᓯᐊᓐᖏᑕᖃᓚᐅᕐᓯᒪᓐᓂᕈᒪ,
ᖃᐅᔨᒪᓗᖓ ᐃᖅᑲᕐᑐᐃᕕᖕᒧᐊᕈᓐᓄᒃ ᓵᓚᖃᕋᔭᕐᓂᕋ ᐱᑦᔪᑎᒋᓗᒍ;
22ᑕᕝᕙ ᑕᓕᕋ ᑭᐊᓯᒃᑯᑦ ᐲᕐᓗᓂ ᐊᑲᐅᓂᕐᓴᐅᒐᔭᕐᐳᖅ,
ᑕᓕᕋᓗ ᓇᒡᒍᐊᖓᒍᑦ ᐲᕐᑕᐅᓗᓂ ᐊᑲᐅᓂᕐᓴᐅᒐᔭᕐᐳᖅ.
23ᒎᑎᒧᑦ ᐊᑭᒋᐊᕐᑕᐅᓂᖅ ᓯᕘᕋᒋᒐᒃᑯ,
ᐊᔪᖏᑦᑐᕐᔪᐊᖑᓂᖓᓗ ᓵᓐᖓᔪᒪᒐᔭᕐᓇᒍ.
24ᒎᓗᒥᒃ ᑕᑎᖃᕐᓯᒪᓐᓂᕈᒪ,
ᒎᓗᒥᒡᓗ ᐃᓚᓯᒪᖏᑦᑐᒥᒃ ᓱᖏᕐᓲᑎᖃᕐᓯᒪᓐᓂᕈᒪ;
25ᓱᓇᓕᒫᓂᒃ ᐊᔪᕐᓴᖏᓐᓂᕆᕋ ᓂᕐᑐᕈᑎᒋᓯᒪᓐᓂᕈᒃᑯ,
ᐱᓇᓱᐊᕐᓯᒪᓂᓐᓄᓪᓗ ᐱᖁᑎᖃᕐᓂᕋ ᐱᔪᕆᓯᒪᐅᑎᒋᓐᓂᕈᒃᑯ;
26ᓯᕿᓂᐅᑉ ᖃᐅᒪᑦᓯᐊᕐᓂᖓᓂᒃ ᑲᒪᓇᓱᐊᓚᐅᕐᓯᒪᓐᓂᕈᒪ,
ᑕᖅᑭᐅᓪᓘᓐᓃᑦ ᐃᓗᐃᑦᑑᑦᓯᐊᕐᓂᖓᓄ ᑕᑯᒥᓇᕐᓂᖓᓄᓪᓗ.
27ᑖᒃᑯᓄᖓ ᓯᓔᕐᕆᔭᐅᓂᕐᒧᑦ ᐅᐱᒋᓕᕐᓗᒋᑦ ᐱᓚᐅᕐᓯᒪᓐᖏᓚᖓ,
ᐊᒡᒐᒃᑲᓗ ᑯᓂᖃᑦᑕᓕᕐᓗᒋᑦ ᐊᒡᓛᑦ ᑖᒃᑯᓂᖓ ᐅᐱᒍᓱᖕᓂᕐᒧᑦ;
28ᑕᒪᓐᓇ ᐊᔪᕐᓂᐅᒐᔭᕐᐳᖅ ᓱᒋᐊᕐᑕᐅᑦᔪᑎᒃᓴᐅᓗᓂ ᐃᖅᑲᕐᑐᐃᔨᒧᑦ,
ᒎᑎᒧᑦ ᕿᓚᖕᒦᑦᑐᒧᑦ ᓱᓕᖏᑦᑐᒥᒃ ᐱᓇᓱᐊᕐᓂᐅᖕᒪᑦ.
29ᐆᒥᒋᔨᒪ ᐊᓯᕈᕐᑕᐅᓂᖏᓐᓂᒃ ᖁᕕᐊᓲᑎᖃᓚᐅᕐᓯᒪᓐᓂᕈᒪ,
ᐅᕝᕙᓗ ᐱᐅᖏᑦᑐᒧᑦ ᑎᑭᑕᐅᑎᓪᓗᒋᑦ ᐊᓂᕐᐸᒍᓱᓚᐅᕐᓯᒪᓐᓂᕈᒪ
30ᑕᒪᑐᒧᖓ ᐊᔪᕐᑐᓕᑦᔪᑎᖃᓚᐅᕐᓯᒪᓐᖏᓚᖓ
ᑐᒃᓯᐊᓚᐅᕐᓯᒪᖏᓐᓇᒪ ᐆᒥᒋᔨᓐᓂᒃ ᐆᒥᓇᕐᓯᑎᑕᐅᖁᔨᓗᖓ.
31ᐱᓇᓱᐊᕐᑎᖁᑎᒃᑲ ᖃᐅᔨᒪᑦᓯᐊᕐᐳᑦ,
ᐊᖏᕐᕋᓐᓂ ᑳᒃᑐᖃᓚᐅᕐᓯᒪᖏᒻᒪᑦ ᓇᓪᓕᐊᓐᓂᒡᓘᓐᓃᑦ.
32ᓂᐅᕐᕈᐊᓂᒃ ᐊᖅᑯᑎᑐᐃᓐᓇᕐᒥ ᓯᓂᒃᑕᕐᑐᖃᓚᐅᕐᓯᒪᓐᖏᓚᖅ,
ᐃᒡᓗᒐ ᑍᒪᓐᖓᑦ ᒪᑐᐃᖓᑎᑉᐸᓚᐅᕋᒃᑯ ᐊᖅᑯᓵᕐᓯᒪᔪᓄᑦ;
33ᓈᒻᒪᖏᑦᑐᓕᓂᓐᓂᒃ ᐃᔨᕐᓯᓯᒪᓇᓱᓚᐅᕐᓯᒪᓐᓂᕈᒪ ᐃᓄᖕᓄᑦ,
ᐱᐅᖏᑦᑐᓕᓂᒃᑲ ᐃᔨᕐᓯᒪᓗᒋᑦ ᓵᓐᓂ ᓴᕐᓕᐊᕐᓗᒋᑦ,
34ᐃᓄᒐᓴᖕᓄᑦ ᓴᖅᑭᑦᑕᕆᐊᒃᓴᖅ ᓯᕘᕋᓂᕐᒧᑦ,
ᐅᖃᐅᓯᐅᑲᑕᒋᐊᒃᓴᕐᓗ ᐃᒡᓗᒥᐅᑎᒌᓄᑦ ᑲᑉᐱᐊᓱᖕᓂᕐᒧᑦ,
ᐅᖃᕐᑍᓕᒪᓂᕐᒧᑦ, ᐊᖏᕐᕋᓐᓂᑦ ᐊᓂᑦᑍᓕᒐᔭᕈᒪ.
35ᐊᑕᐅᓯᑐᐊᑦᓯᐊᒧᓪᓕ ᓈᓚᒃᑕᐅᔪᓐᓇᕐᐳᖓ!
ᐅᓇ ᑕᕝᕙ ᓇᓗᓁᕐᓯᑦᔪᑎᒐ! ᐊᔪᒐᖃᖏᑦᑑᖅ ᑭᐅᓚᐅᓐᖓ!
ᐊᑭᕋᕐᑐᕐᑎᓐᓄᑦ ᐸᓯᔭᒃᓴᐅᓂᒃᑲ ᑎᑎᕋᕐᑕᐅᓚᐅᕐᓕᑦ ᑕᑯᓂᐊᕋᒃᑭᑦ!
36ᖁᓚᕐᓇᖏᑦᑐᒥᒃ ᐃᕐᓱᓕᕋᔭᕐᐸᒃᑲ;
ᓂᐊᖁᓐᓄᑦ ᕿᓚᒡᓗᒋᑦ ᓂᐊᖂᓯᔭᐅᑎᒋᓕᕋᔭᕐᐸᒃᑲ,
37ᐊᓪᓗᕐᓂᓕᒫᒃᑲ ᓇᓗᓁᕋᔭᕐᐸᒃᑲ ᑖᑦᓱᒧᖓ;
ᐊᖓᔪᖅᑳᕐᔪᐊᒃᓴᑎᑐᑦ ᑲᓐᖑᓱᖏᓪᓗᖓ ᐅᐸᓕᕋᔭᕐᐸᕋ.
38ᓄᓇᒥᒃ ᐱᕈᕐᓰᕕᒋᔭᓐᓂᒃ ᑎᒡᓕᓚᐅᕐᓯᒪᓐᓂᕈᒪ,
ᓄᓇᖁᑎᓖᓪᓗ ᐅᕙᓐᓂᒃ ᖁᕕᐊᓲᑎᖃᖏᓐᓂᕐᒧᑦ ᕿᐊᓕᕐᐸᑕ;
39ᑕᕝᕙᓂᓗ ᐱᕈᕐᑐᕕᓃᑦ ᓂᕆᓯᒪᒍᒃᑭᑦ ᐊᑭᓕᕐᓇᒋᑦ,
ᐱᖁᑎᓖᓪᓗ ᐱᕈᕐᓰᕕᖕᒥᒃ ᑳᒃᑎᓪᓗᒋᑦ;
40ᑕᕝᕙ ᐅᕐᐱᒊᑦ ᑲᑭᓪᓚᐅᑎᓖᑦ ᐱᕈᖔᕐᑐᒃᓴᐅᕗᑦ ᓂᐊᖂᔭᒃᓴᐅᖏᑦᑐᑦ,
ᐱᕈᕐᓂᕐᓗᒃᑐᓪᓗ ᐱᕈᖔᕐᑐᒃᓴᐅᕗᑦ ᓂᐊᖂᔭᒃᓴᐅᖏᑦᑐᑦ.”
ᑕᕝᕙ ᔫᐱᐅᑉ ᐅᖃᓪᓚᖕᓂᖓᑕ ᐃᓱᐊ.
Currently Selected:
ᔫᐱᐅᑉ ᐊᒡᓚᖏᑦ 31: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
