ᔫᐱᐅᑉ ᐊᒡᓚᖏᑦ 29
29
ᔫᐱᐅᑉ ᓴᐳᓐᓂᐊᕐᓂᖓ ᓁᓕᑎᕐᓯᒪᔪᖅ
ᔫᐱ
1ᑕᕝᕙ ᔫᐱ ᐅᖃᓯᒋᕗᖅ, ᐅᖃᕐᓗᓂᓗ:
2“ᑕᕝᕙᑐᖅ ᐃᓅᓯᕋ ᐅᑎᓚᐅᕐᒥᓕ ᐃᓅᕋᑖᕐᓂᕕᓂᓐᓄᑦ,
ᑍᑦᓱᒪᓂᒧᑦ ᒎᑎᒧᑦ ᑲᒪᒋᔭᐅᑦᓯᐊᕐᓂᕆᓚᐅᕐᑕᓐᓄᑦ;
3ᑍᑦᓱᒪᓂ ᒎᑎᐅᑉ ᖃᐅᒪᓂᖓᓄᑦ ᓇᔪᕐᑕᐅᖏᓐᓇᕐᐸᓚᐅᕋᒪ,
ᑖᕐᑐᒃᑰᓕᕌᖓᒪᓗ ᑖᑦᓱᒪ ᖃᐅᒪᓂᖓᓄᑦ ᑕᓯᐅᕐᑕᐅᕙᓚᐅᕐᐳᖓ;
4ᑍᑦᓱᒪᓂ ᐱᕈᕐᐸᓪᓕᐊᑎᓪᓗᖓ ᐃᓅᓱᒃᑑᓕᕐᑎᓪᓗᖓ,
ᒎᑎᐅᑉ ᐃᓚᓐᓈᖃᕐᓂᖓᑕ ᐊᖏᕐᕋᕋ ᓇᔪᓚᐅᕐᒪᒍ;
5ᐊᔪᒐᖃᖏᑦᑑᑉ ᓱᓕ ᑍᑦᓱᒪᓂ ᓇᔪᓚᐅᕐᒪᖓ,
ᕿᑐᕐᖓᓕᒫᒃᑲᓗ ᐊᕙᑎᓐᓃᑎᓪᓗᒋᑦ;
6ᐆᒪᔪᖁᑎᒃᑲ ᐃᒻᒧᓕᐅᑦᓯᐊᕐᐸᓚᐅᕐᐳᑦ ᐊᒥᒐᖏᑦᑐᒥᒃ,
ᓇᐹᕐᑐᖁᑎᒃᑲᓗ ᐅᕐᓱᒃᓴᓂᒃ ᐱᕈᕐᑎᑦᓯᑦᓯᐊᖃᑦᑕᓚᐅᕐᐳᑦ!
7ᐃᒡᓗᒐᓴᖕᓂ ᐊᖓᔪᖅᑳᕆᔭᐅᔪᓄᑦ ᐅᐸᒍᑎᔭᕌᖓᒪ,
ᐃᓚᒋᓪᓗᒋᑦ ᐃᒃᓯᕙᖃᑎᒋᕙᓚᐅᕐᐸᒃᑲ ᑲᑎᒪᑎᓪᓗᒋᑦ,
8ᐃᓅᓱᒃᑐᑦ ᐅᕙᓐᓂᒃ ᑕᑯᔭᕌᖓᒥᒃ ᐊᖅᑯᑎᒥᑦ ᐊᒡᕔᕐᐸᓚᐅᕐᐳᑦ,
ᐃᓄᑐᕾᓪᓗ ᓂᑯᕕᑉᐸᓚᐅᕐᐳᑦ ᐅᕙᓐᓂᒃ ᐅᐱᒍᓱᖕᓂᕐᒧᑦ;
9ᐊᖓᔪᖅᑳᑦ ᐅᖃᖃᑎᒌᖕᓂᕐᒥᖕᓂᑦ ᓄᖅᑲᕐᐸᓚᐅᕐᐳᑦ,
ᐊᒡᒐᖕᒥᓄᓪᓗ ᖃᓂᓂ ᒪᑐᕙᒃᓗᒋᑦ;
10ᐊᖑᑎᑦ ᐱᓪᓚᕆᖁᑕᐅᔪᑦ ᓂᐸᖏᕐᐸᓚᐅᕐᐳᑦ,
ᐅᖃᖏᑦ ᐊᒡᓛᑦ ᕿᓚᖏᓐᓄᑦ ᓂᐱᓪᓗᑎᒃ.
11ᓇᐅᓕᒫᓄᑦ ᑐᓴᕐᑕᐅᔭᕌᖓᒪ, ᓮᒻᒪᕐᑎᑕᐅᓯᒪᓂᕋᕐᑕᐅᕙᓚᐅᕐᐳᖓ,
ᑕᑯᔭᐅᔭᕌᖓᒪᓗ, ᑕᑯᔪᓄᑦ ᖁᕕᐊᒋᔭᐅᕙᓚᐅᕐᐳᖓ;
12ᐊᒃᓱᔪᑦ ᐃᑲᔪᕐᑕᐅᔪᒪᔭᕌᖓᑕ ᐃᑲᔪᕐᐸᓚᐅᕋᒃᑭᑦ,
ᐃᓕᐊᕐᔪᐃᓪᓗ ᐃᑲᔪᕐᑎᒃᓴᖃᖏᑦᑐᑦ ᐃᑲᔪᕐᐸᓚᐅᕆᕙᒃᑲ.
13ᑐᖁᓕᒑᔪᑦ ᓮᒻᒪᕐᑎᑦᓯᓂᖏᓐᓄᑦ ᑐᕝᕕᐅᕙᓚᐅᕐᐳᖓ,
ᐅᐃᒡᒐᕐᓃᑦ ᐆᒻᒪᑎᖏᑦ ᖁᕕᐊᓱᖕᓂᕐᒧᑦ ᐃᓐᖏᕈᓐᓇᕐᓯᑎᓚᐅᕐᐸᒃᑲ.
14ᐱᑦᓯᐊᕐᓂᕐᒥᒃ ᐱᓂᐊᕐᓂᖃᓚᐅᕐᐳᖓ, ᐱᐅᓯᕆᓪᓗᒍᓗ;
ᐊᑦᔨᒌᒃᑎᑦᓯᓂᖅ ᐊᓐᓄᕌᑎᑐᑦ ᐊᑐᓚᐅᕐᐸᕋ ᓇᓴᕆᓪᓗᒍᓗ.
15ᑕᐅᑐᖏᑦᑐᒧᑦ ᐃᔨᒋᔭᐅᓚᐅᕐᐳᖓ,
ᑐᓯᐊᑦᑐᒧᓪᓗ ᐃᑎᒐᒋᔭᐅᓪᓗᖓ.
16ᐊᒃᓱᔪᓄᑦ ᐊᑖᑕᒋᔭᐅᓚᐅᕐᐳᖓ,
ᖃᐅᔨᒪᓐᖏᑕᓐᓂᒃ ᓈᒻᒪᓐᖏᓕᐅᕐᑐᖃᓕᕐᑎᓪᓗᒍ ᖃᐅᔨᓴᕈᑦᔨᕙᓚᐅᕐᐳᖓ.
17ᐃᓱᐃᑦᑐᓕᔪᑦ ᐱᔪᓐᓇᕐᓂᖏᑦ ᓵᓚᒋᕙᓚᐅᕐᐸᒃᑲ,
ᓱᒃᑯᔨᐊᕆᔭᖏᓪᓗ ᓴᒃᑯᑕᐅᑎᓪᓗᒋᑦ ᓴᐳᑎᕙᒃᓗᒋᑦ.
18ᐃᓱᒪᖃᓚᐅᕐᐳᖓ, ᑐᖁᓛᕋᓱᒋᓪᓗᖓ ᐊᖏᕐᕋᕐᓯᒪᑦᓯᐊᕐᓗᖓ,
ᐅᓪᓗᒃᑲᓗ ᓯᐅᖅᑲᑎᑐᑦ ᐅᓄᕐᑎᒋᓗᑎᒃ ᐊᑯᓂ ᐃᓅᓂᐊᕋᓱᒋᓪᓗᖓ.
19ᓇᐹᕐᑐᑎᑐᑦ ᐊᒫᒃᑲ ᓯᐊᒻᒪᕐᓯᒪᓚᐅᕐᐳᑦ ᐃᒫᓄᑦ,
ᐊᕙᓚᖓᔪᒃᑲᓗ ᖃᐅᓯᕐᑎᑕᐅᓯᒪᓪᓗᑎᒃ ᓄᓇᐅᑉ ᐂᔪᖓᓂᖓᓄᑦ.
20ᓂᕐᑐᕐᑕᐅᓂᕋ ᓄᑖᖑᐃᓐᓇᓚᐅᕐᐳᖅ ᐅᕙᓐᓂ,
ᓄᑭᖃᑦᓯᐊᕐᓂᕋᓗ ᐱᑎᒃᓯᑎᑐᑦ ᓴᖏᔫᑦᓯᐊᕐᓗᓂ.
21ᐃᓄᐃᑦ ᐅᖃᓪᓚᓕᕌᖓᒪ ᓈᓚᑦᓯᐊᕐᐸᓚᐅᕐᐳᑦ,
ᓂᐱᖃᖏᑦᓯᐊᕐᓗᑎᒃ ᑐᑭᓯᓇᓱᑦᓯᐊᕐᓗᑎᒡᓗ.
22ᐅᖃᓪᓚᒌᕅᒐᒪ ᐅᖃᐅᓯᕆᔭᒃᑲ ᐃᓚᔭᐅᒋᐊᒃᑲᓐᓂᕐᐸᓚᐅᓐᖏᓚᑦ,
ᐅᖃᐅᓯᒃᑲ ᓯᓚᓗᒃᑎᑐᑦ ᑯᕕᕙᓚᐅᕐᐳᑦ ᐅᖃᓪᓚᒡᕕᒋᔭᓐᓄᑦ.
23ᐅᕙᓐᓂᒃ ᐅᑕᖅᑭᕙᓚᐅᕐᐳᑦ ᐱᕈᕐᓰᕕᓕᕆᔨᑎᑐᑦ;
ᐅᐱᕐᖔᒃᑯᑦ ᓯᓚᓗᖕᒥᒃ ᐃᒥᕐᑐᑎᑐᑦ ᑐᓐᖓᓱᒃᑎᑦᓯᓪᓗᑎᒃ.
24ᐃᒻᒥᖕᓂᒃ ᐱᔪᓐᓇᕋᓱᒋᔪᓐᓁᕐᑐᑦ ᖁᖓᑉᐸᓚᐅᕐᐸᒃᑲ;
ᑮᓇᓐᓂᒃ ᖁᖓᑦᑐᒥᒃ ᑕᑯᔭᕌᖓᒥᒃ ᐱᕙᓪᓕᕐᑎᑕᐅᕙᓚᐅᕐᐳᑦ.
25ᐊᖓᔪᖅᑳᕆᔭᐅᕙᓚᐅᕐᐳᖓ, ᐃᓱᒻᒥᕐᑐᐃᕙᒡᓗᖓᓗ ᑖᒃᑯᓂᖓ;
ᐊᖓᔪᖅᑳᕐᔪᐊᑉ ᑕᓯᐅᕐᓯᓂᖓᑎᑐᑦ ᐅᓇᑕᕐᑐᒃᓴᖁᑎᒥᓂᒃ,
ᕿᒃᓵᒃᑐᓂᒡᓗ ᓮᒻᒪᕐᓮᔪᑎᑐᑦ ᑍᒤᓚᐅᕐᐳᖓ.”
Currently Selected:
ᔫᐱᐅᑉ ᐊᒡᓚᖏᑦ 29: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
