ᔫᐱᐅᑉ ᐊᒡᓚᖏᑦ 28
28
ᔫᐱᐅᑉ ᓯᓚᑐᓂᕐᒥᒃ ᓂᕐᑐᕐᓇᕐᑎᑦᓯᓂᖓ
1“ᓄᓇᒥ ᐃᑎᕐᓴᓕᐅᕆᓪᓗᑎᒃ ᓯᐅᓪᕕᕆᒥᒃ ᑲᑎᑦᓯᔪᖃᓲᖑᕗᖅ,
ᒎᓗᐃᓪᓗ ᐊᐅᒃᑎᑦᓯᕕᖕᒥ ᓴᓗᒻᒪᕐᓴᕐᑕᐅᓲᖑᓪᓗᑎᒃ.
2ᓴᕕᕋᔭᒃᓮᑦ ᓄᓇᐅᑉ ᐃᓗᐊᓂᑦ ᐱᔭᐅᓲᖑᕗᑦ,
ᑲᓐᓄᔧᓪᓗ ᐊᐅᒃᑎᑕᐅᓲᖑᕗᑦ ᓴᕕᕋᔭᒃᓴᓂᑦ.
3ᐊᖑᑎᑦ ᑖᕐᑐᐊᓗᖕᒥ ᕿᓂᓲᖑᕗᑦ,
ᓄᓇᐅᑉ ᐃᓗᐊᓄᑦ ᖃᒧᖔᓗᒃ ᐃᑎᕐᓴᓕᐅᕆᓪᓗᑎᒃ
ᓴᕕᕋᔭᒃᓴᒥᒃ ᕿᓂᓲᖑᕗᑦ ᑖᕐᑐᐊᓗᖕᒦᓪᓗᑎᒃ.
4ᓄᓇᒋᔭᐅᖏᑦᑐᒥ ᓇᕐᓴᒥ ᐅᔭᕋᒃᑕᕐᕕᖕᒥᒃ ᐃᑎᕐᕕᓕᐅᕐᐳᑦ;
ᐃᓄᖕᓄᑦ ᐃᖏᕐᕋᕕᐅᓚᐅᕐᓯᒪᖏᑦᑐᒥ, ᑕᕝᕙᓂ ᓴᓇᕗᑦ ᐅᐸᒃᑕᐅᕙᖏᑦᑐᒥ,
ᐊᒃᓱᓈᓄᑦ ᓂᕕᖓᐅᑎᖃᕐᓗᑎᒃ ᐱᓇᓱᐊᕐᐸᒃᐳᑦ ᐊᐅᓚᑲᑦᑖᖃᑦᑕᕐᓗᑎᒃ.
5ᓄᓇᕐᔪᐊᕐᒥᑦ ᓂᕿᒃᓴᓂᒃ ᐱᕈᕐᑐᖃᕐᐸᒃᐳᖅ;
ᐊᑖᒍᓪᓕ ᓄᓇ ᒧᒥᒃᑎᑕᐅᓯᒪᕗᖅ ᓯᖃᓪᓕᔭᐅᓯᒪᓪᓗᓂ.
6ᐅᔭᕋᖏᑕ ᐃᓗᐊᓂᑦ ᓴᐰᕆ ᑕᑯᒥᓇᕐᑐᑦ ᓇᒡᕚᕐᑕᐅᕗᑦ,
ᓯᐅᕋᖓᓗ ᒎᓗᑕᖃᕆᓪᓗᓂ.
7ᑖᓐᓇ ᐅᔭᕋᒃᑕᕐᕕᐅᔪᖅ ᑎᖕᒥᐊᓄᑦ ᖃᐅᔨᒪᔭᐅᓐᖏᓚᖅ,
ᑭᒡᒐᕕᐊᕐᔪᖕᓄᓪᓗ ᑕᑯᔭᐅᓚᐅᕐᓯᒪᓇᓂ.
8ᐆᒪᔪᓄᑦ ᐊᔪᖏᑦᑐᕐᔪᐊᓄᑦ ᐱᓱᒡᕕᐅᓚᐅᕐᓯᒪᓐᖏᓚᖅ;
ᓛᔭᓄᓪᓗ ᐃᕐᓯᓇᕐᑐᓄᑦ ᐊᖅᑯᓵᕐᑕᐅᓚᐅᕐᓯᒪᓇᓂ ᐊᖅᑯᑖ.
9ᐊᖑᑎᑦ ᐃᑎᕐᓴᓕᐅᕆᕗᑦ ᐅᔭᕋᒃᑯᑦ ᓯᑎᓂᕐᐹᑎᒍᑦ,
ᖃᖅᑬᓪᓗ ᑐᓐᖓᕕᖏᑎᒍᑦ ᐃᑎᕐᓴᓕᐅᕆᓪᓗᑎᒃ.
10ᕾᕐᓱᑎᒍᑦ ᑰᒡᕕᓕᐅᕐᓗᒋᑦ,
ᓇᒡᕚᕐᐳᑦ ᐅᔭᕋᑦᓯᐊᕙᓕᒫᓂᒃ ᐱᕕᐊᕐᓇᕐᑐᓂᒃ.
11ᑰᑦ ᓯᒥᒃᑐᕐᑕᐅᕗᑦ ᑰᒍᓐᓃᕐᑎᑕᐅᓪᓗᑎᒃ;
ᑕᓕᐅᒪᔪᑦ ᓴᖅᑭᑎᑕᐅᕗᑦ ᖃᐅᒪᔪᒧᑦ.
12ᓇᑭᓪᓕ ᓯᓚᑐᓂᖅ ᓇᒡᕚᕐᑕᐅᔪᓐᓇᕐᐹ?
ᓇᑭᓪᓗ ᑐᑭᓯᓂᖅ ᓇᓂᔭᐅᔪᓐᓇᕐᐹ?
13ᓯᓚᑐᓂᐅᑉ ᐊᖅᑯᑎᖓ ᐃᓅᑉ ᖃᐅᔨᒪᓐᖏᓛ,
ᐃᓅᔪᓂᓗ ᓇᓂᔭᐅᔪᓐᓇᕋᓂ.
14ᐃᒪᕕᐅᑉ ᐃᑎᓂᖓ ᐅᖃᕐᐳᖅ, ‘ᐅᕙᓐᓃᓐᖏᓚᖅ,’
ᐃᒪᕐᕕᒡᓗ ᐅᖃᕆᕗᖅ, ‘ᐱᓯᒪᓐᖏᓚᕋ.’
15ᓯᓚᑐᓂᖅ ᓂᐅᕕᕐᑕᐅᔪᓐᓇᓐᒋᓚᖅ ᒎᓗᒧᑦ,
ᓯᐅᓪᕕᕆᒧᓪᓗ ᐅᖁᒤᓐᓂᕐᓂᐊᕈᑕᐅᓗᓂ ᐊᑭᓕᕐᑕᐅᔪᓐᓇᕋᓂ.
16ᓇᓪᓕᕐᑕᐅᔪᓐᓇᓐᖏᓚᖅ ᒎᓗᒧᑦ ᐅᐱᕼᐃᒥᐅᑕᒧᑦ ᑕᑯᒥᓇᕐᑐᓄᓪᓗ,
ᐊᑭᑐᔪᓄᑦ ᐅᓂᒃᓯᓄᑦ ᓴᐰᕆᓄᓪᓗ ᓇᓪᓕᕐᑕᐅᔪᓐᓇᖏᓐᓂᕗᖅ.
17ᒎᓗᒧᑦ ᐊᓕᒍᕐᒧᓪᓗ ᐊᑭᑐᔪᒧᑦ ᓇᓪᓕᕐᑕᐅᔪᓐᓇᓐᖏᓚᖅ,
ᑕᐅᕐᓯᕐᑕᐅᔪᓐᓇᕋᓂᓗ ᐱᐅᓴᐅᑎᓄᑦ ᒎᓗᑦᓯᐊᕙᐅᓂᕐᐹᓄᓪᓗ.
18ᒪᑯᐊ ᑍᒤᓪᓗᐊᖃᖏᓐᓂᕗᑦ ᑕᑯᒥᓇᕐᑐᑦ ᑰᕋᓕᒥᒃ ᐊᑎᓖᑦ ᐊᓕᒍᐃᓪᓗ;
ᓯᓚᑐᓂᐅᑉ ᐊᑭᑐᓂᖓ ᐱᒃᑯᒥᓇᕐᑐᓂᑦ ᐊᑭᑐᓂᕐᓴᐅᖕᒪᑦ.
19ᐅᔭᕋᑦᓯᐊᕔᑦ ᐃᑎᐅᐱᐊᒥᐅᑕᑦ ᑑᐸᔅᓰᑦ ᓇᓪᓕᕐᓲᑎᖏᓐᓂᕗᑦ,
ᒎᓗᑦᓯᐊᕙᐅᓂᕐᐹᓄᓪᓗ ᓇᓪᓕᕐᑕᐅᔪᓐᓇᕋᓂ.
20ᓇᑭᓪᓕ ᑍᒪ ᓯᓚᑐᓂᖅ ᐱᓯᒪᓕᕐᐹ?
ᑐᑭᓯᓂᕐᓗ ᓇᓂ ᐃᓂᖃᓕᕐᐹ?
21ᐃᓅᔪᓕᒫᓄᑦ ᑕᑯᔭᐅᔪᓐᓇᓐᖏᓚᖅ,
ᑎᖕᒥᐊᓄᓪᓗ ᖃᖓᑕᕙᒃᑐᓄᑦ ᑕᑯᔭᐅᔪᓐᓇᕐᒥᓇᓂ.
22ᓄᖑᕈᑦᔭᐅᓂᖅ ᑐᖁᓗ ᐅᖃᕐᐴᒃ,
‘ᐅᖃᐅᓯᐅᑎᓪᓗᒍ ᑐᓴᑐᐃᓐᓇᓚᐅᕐᐸᕗᑦ.’
23ᒎᑎᐅᑉ ᑭᓯᒥ ᓯᓚᑐᓂᐅᑉ ᐊᖅᑯᑎᖓ ᖃᐅᔨᒪᕚ,
ᐃᓂᒋᔭᖓᓗ ᓇᑭᑦ ᓇᒡᕚᕐᑕᐅᔪᓐᓇᕐᓂᖓ ᖃᐅᔨᒪᓪᓗᒍ.
24ᑖᓐᓇ ᑕᑯᓐᓇᕐᒪᑦ ᓄᓇᐅᑉ ᐃᓱᐊᓄᑦ,
ᕿᓚᐅᓪᓗ ᐊᑖᓃᑦᑐᓕᒫᑦ ᑕᑯᓐᓇᕐᒪᒋᑦ.
25ᒎᑎᐅᑉ ᐊᓄᕆ ᐱᔪᓐᓇᕐᓂᕐᑖᕐᑎᓯᒪᖕᒪᒍ,
ᐃᒪᐅᓪᓗ ᐊᖏᓂᒃᓴᖓ ᐋᖅᑭᒃᓯᒪᒋᕚ.
26ᓯᓚᓗᒃ ᐋᖅᑭᒃᓯᒪᕚ ᐱᒋᐊᕐᕕᒃᓴᖓᓗ,
ᑲᓪᓘᓪᓗ ᑲᓪᓕᕐᕕᒃᓴᖓ ᐋᖅᑭᒃᓯᒪᒋᕚ;
27ᑕᕝᕙ ᓯᓚᑐᓂᖅ ᑕᑯᒐᒥᐅᒃ ᓇᓗᓁᓚᐅᕐᐹ;
ᐋᖅᑭᒃᓱᓚᐅᕐᐹ, ᖃᐅᔨᓴᕋᒥᐅᒃ ᓈᒻᒪᒋᓚᐅᕐᐹ.
28 #
ᐃᓐᖏᕈᑦ 111:10; ᓲᓗᒨᓂ 1:7; 9:10. ᐃᓄᖕᒧᓪᓗ ᐅᖃᕐᓗᓂ,
‘ᑕᑯᒋᑦ, ᐊᑕᓂᕐᒥᒃ ᓯᕘᕋᓂᖅ, ᑕᒪᓐᓇ ᓯᓚᑐᓂᐅᕗᖅ;
ᐊᔪᕐᓂᕐᒥᒡᓗ ᕿᒤᓂᖅ ᑕᕝᕙ ᑐᑭᓯᓂᐅᕗᖅ.’”
Currently Selected:
ᔫᐱᐅᑉ ᐊᒡᓚᖏᑦ 28: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
