ᔫᐱᐅᑉ ᐊᒡᓚᖏᑦ 21
21
ᔫᐱ
1ᑕᕝᕙ ᔫᐱᐅᑉ ᑭᐅᕚ:
2“ᐅᖃᐅᓯᕆᔭᒃᑲ ᓈᓚᑦᓯᐊᕐᓯᐅᒃ,
ᑕᒪᓐᓇ ᑕᕝᕙ ᓮᒻᒪᕐᑎᑕᐅᑦᔪᑎᒋᔪᒪᔭᕋ ᐃᓕᑦᓯᓐᓂᑦ.
3ᐅᖃᕐᕕᒃᓴᖃᕐᑎᓚᐅᕐᓯᓐᖓ, ᐅᑕᖅᑭᑦᓯᐊᕐᓗᓯ,
ᐅᖃᕇᕈᒪ ᑭᖑᓂᖓᒍᑦ, ᒥᑕᐅᑎᒋᓂᐊᕆᕙᑦᓯᓐᖓ.
4ᓈᒻᒪᒃᓴᖏᑦᔪᑎᒋᔭᒃᑲ ᐃᓄᖕᒧᑦ ᑐᕌᖓᓐᖏᓚᑦ;
ᐱᑦᔪᑎᖃᑦᓯᐊᕐᓗᖓ ᕿᓄᐃᓵᕈᓐᓁᓪᓕᕗᖓ.
5ᑕᑯᑦᓯᐊᓚᐅᕐᓯᓐᖓ, ᓱᓕ ᖃᓄᐃᓕᐅᕐᑕᐅᒃᑲᓐᓂᕆᐊᖃᕐᐳᖓ;
ᑕᑯᑦᓱᐊᖕᓂᕐᒧᑦ ᐅᖃᐅᓯᒃᓴᖃᕈᓐᓁᑐᐃᓐᓇᕐᓂᐊᕐᐱᓰ?
6ᖃᓄᐃᓯᒪᓂᓐᓂᒃ ᐃᓱᒪᓕᕋᒪ ᑕᕝᕙ ᖁᐊᕐᓵᖓᕗᖓ,
ᓴᔪᓕᕐᓗᖓᓗ ᑎᒥᒐᓗ ᕿᑲᕈᓐᓁᓪᓕᕗᖅ.
7ᓱᖕᒪᓪᓕᑭᐊᖅ ᐱᐅᖏᑦᑐᓕᔪᑦ ᐆᒪᑯᑖᒃᑎᑕᐅᕙᑦ?
ᐃᓄᑐᖃᓐᖑᕐᐸᒃᐳᑦ, ᐊᔪᖏᑦᑑᓕᕐᓗᑎᒃ ᐱᔪᓐᓇᕐᓂᖃᕐᓗᑎᒡᓗ.
8ᕿᑐᕐᖓᖏᑦ ᐱᕈᕐᐸᓪᓕᐊᑎᓪᓗᒋᑦ ᑕᑯᓐᓇᖃᑦᑕᕐᐳᑦ,
ᐃᕐᖑᑕᖏᓪᓗ ᐱᕈᕐᐸᓪᓕᐊᑎᓪᓗᒋᑦ ᑕᑯᓐᓇᖅᑲᑦᑕᕆᓪᓗᑎᒃ.
9ᐊᖏᕐᕋᖏᑦ ᖃᓄᐃᑦᑐᖃᖏᑦᓯᐊᕐᐳᑦ ᓯᕘᕋᓇᕐᑐᖃᕋᑎᒡᓗ,
ᒎᑎᐅᓪᓗ ᓱᒋᐊᕐᓯᓂᖓᓄᑦ ᑎᑭᑕᐅᓯᒪᓇᑎᒃ.
10ᐃᒻᒧᓕᐅᕐᑎᖁᑎᖏᑕ ᐸᖕᓂᖏᑦ ᑭᖑᕚᒃᓴᓕᐅᑦᓯᐊᕐᐳᑦ;
ᐃᒻᒧᓕᐅᕐᑏᓪᓗ ᕿᑐᕐᖓᕐᑖᑦᓯᐊᖃᑦᑕᕐᐳᑦ ᐃᕐᓂᔪᓐᓁᓪᓕᓚᐅᕐᓯᒪᓇᑎᒃ.
11ᕿᑐᕐᖓᕐᑖᒥᖕᓂᒃ ᐊᓂᑎᑦᓯᖃᑦᑕᕐᐳᑦ ᓰᐱᑎᑐᑦ,
ᐱᓐᖑᐊᖃᑎᒌᖁᓪᓗᒋᑦ ᒥᓯᒃᑕᕐᓗᑎᒡᓗ.
12ᐃᓐᖏᖃᑦᑕᕐᐳᑦ ᓯᕙᓂᕋᐅᑎᓄᑦ ᑯᑭᑦᑕᐸᐅᑎᐅᔭᓄᓪᓗ,
ᖁᕕᐊᓱᒡᓗᑎᒃ ᑎᑦᑐᓚᐅᑏᑦ ᓂᐱᖏᑦ ᒪᓕᒡᓗᒋᑦ.
13ᐃᓅᓂᕐᒥᖕᓂ ᐊᔪᕐᓴᖏᑦᓯᐊᕐᓗᑎᒃ ᐃᓅᕙᒃᐳᑦ,
ᐃᓱᒫᓘᑎᖃᖏᑦᓯᐊᕐᓗᑎᒡᓗ ᑐᖁᕙᒃᓗᑎᒃ.
14ᒎᑎᒧᓪᓗ ᐅᖃᕐᐸᒃᐳᑦ, ‘ᑲᒪᒋᓐᖏᓚᐅᕐᑎᒍᑦ!
ᐊᖅᑯᓯᓂᕆᔭᕐᓂᒃ ᖃᐅᔨᔪᒪᓐᖏᓚᒍᑦ.
15ᖃᓄᐃᑦᑑᖕᒪᑦ ᐊᔪᒐᖃᖏᑦᑐᖅ, ᓱᖕᒪᑦ ᐱᔨᑦᓯᕆᐊᖃᕐᐸᕘᑦ?
ᖃᓄᕐᓗ ᐱᕙᓪᓕᕈᑎᖃᕋᔭᕐᐱᑕ ᑐᒃᓯᐊᕐᕕᒋᒍᑦᑎᒍ?’
16ᑕᑯᒋᑦ, ᐃᒻᒥᖕᓂᒃ ᐱᔪᓐᓇᕐᓂᕐᒥᖕᓄᑦ ᒪᑭᓯᒪᓂᕋᕐᐳᑦ,
ᐱᐅᖏᑦᑐᓕᔪᓪᓕ ᐃᓱᒪᒋᔭᖏᑦ ᐊᖏᖃᑎᒋᔪᓐᓇᓐᖏᓚᒃᑲ.
17ᖃᓄᖅ ᐊᑯᓔᑎᒋᔪᒥᒃ ᓇᓂᕈᐊᖏᑦ ᖃᒥᑎᑕᐅᖃᑦᑕᕐᓯᒪᕚᑦ?
ᓇᓪᓕᐊᓪᓘᓐᓃᑦ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᓚᐅᕐᓯᒪᕚ?
ᒎᑎᐅᓪᓗ ᓂᓐᖓᒡᕕᒋᓗᓂᒋᑦ ᓱᒋᐊᓚᐅᕐᓯᒪᕙᒌᑦ?
18ᐃᕕᒃᑎᑐᑦ ᐊᓄᕆᒧᑦ ᐊᐅᓚᑕᐅᔪᑎᑐᑦ ᑍᒤᓐᖏᓛᑦ,
ᐅᕝᕙᓗ ᓴᓂᕐᑎᑐᑦ ᐊᓄᕆᒧᑦ ᑎᒃᑕᐅᔪᑎᑐᑦ ᑍᒤᓐᖏᓚᑦ?
19ᐅᖃᕐᐸᒃᐳᓯ, ‘ᒎᑎ ᑭᖑᕚᖏᓐᓂᒃ ᓱᒋᐊᕐᓯᕙᒃᐳᖅ ᐊᑖᑕᒃᑯᖏᑕ
ᐊᔪᕐᑐᓕᓂᕕᓂᖏᑦ ᐱᑦᔪᑎᒋᓪᓗᒋᑦ.’
ᒎᑎ ᐊᔪᕐᑐᓕᔪᓂᒃ ᓱᒋᐊᕐᓯᔪᒃᓴᐅᕗᖅ ᑐᕅᓐᓇᕐᓗᒋᑦ
ᖃᐅᔨᖁᓪᓗᒋᑦ ᐊᔪᕐᑐᓕᓂᕐᒧᑦ ᓱᒋᐊᕐᑕᐅᓂᕐᒥᖕᓂᒃ.
20ᓇᖕᒥᓂᖅ ᑕᑯᔪᒃᓴᐅᕗᑦ ᓱᒋᐊᕐᑕᐅᑦᔪᑎᒥᖕᓂᒃ,
ᐃᒥᕐᑐᒃᓴᐅᕗᓪᓗ ᐊᔪᒐᖃᖏᑦᑑᑉ ᓂᓐᖓᐅᓯᖓᓂᒃ.
21ᐃᓅᑉ ᐃᓅᓯᖓ ᐃᓱᓕᓯᒪᓕᕐᑎᓪᓗᒍ,
ᓱᓕ ᐃᒃᐱᒍᓱᒃᑲᔭᕐᐹ ᐃᓚᒋᔭᖏᑕ ᖃᓄᐃᓐᓂᖏᓐᓂᒃ?
22ᓇᓪᓕᐊᑦ ᒎᑎᒥᒃ ᐊᔪᕆᕐᑐᐃᔪᓐᓇᕐᐹ?
ᐊᖓᔪᖅᑳᖑᓂᕐᐹᓂᒃ ᐊᒡᓛᑦ ᐃᖅᑲᕐᑐᐃᔪᓐᓇᕐᑎᓪᓗᒍ?
23ᐃᓄᐃᑦ ᐃᓚᖏᑦ ᑐᖁᕙᒃᐳᑦ ᐊᔪᕐᓴᖏᑦᓯᐊᕐᓗᑎᒃ,
ᖃᓄᐃᓐᓇᕐᑐᒦᖏᑦᓯᐊᕐᓗᑎᒃ ᐱᔭᕐᓂᖏᑦᑐᒃᑰᓚᐅᕋᑎᒡᓗ,
24ᑎᒥᖏᑦ ᖁᐃᓃᓐᓇᕐᓗᑎᒃ ᐃᓅᔪᓐᓃᕐᐸᒃᐳᑦ
ᓴᐅᓐᓇᕆᑦᓯᐊᕐᓗᑎᒃ ᐸᑎᖏᓪᓗ ᖃᓄᐃᕈᔪᖏᑦᓯᐊᕐᓗᑎᒃ.
25ᐃᓚᖏᓪᓕ ᖁᕕᐊᓇᕐᑐᒃᑰᓚᐅᕐᓯᒪᓇᑎᒃ ᑐᖁᕙᒃᐳᑦ,
ᖁᕕᐊᒋᔭᒥᖕᓂᒃ ᐱᔪᓐᓇᕐᓯᓚᐅᕐᓯᒪᓇᑎᒃ.
26ᑐᖁᕙᒃᐳᑦ ᓴᓂᓕᕇᒃᓗᑎᒃ ᐃᓗᕕᕐᓯᒪᓪᓗᑎᒃ,
ᓄᓇᐅᓪᓗ ᖁᒡᓗᒋᐊᖏᓐᓄᑦ ᐅᓕᒃᑕᐅᕙᒃᐳᑦ.
27ᖃᓄᖅ ᐃᓱᒪᖃᕐᒪᖔᑦᓯ ᖃᐅᔨᒪᕙᑦᓯ,
ᐅᕙᓐᓂᒡᓗ ᐱᑦᓯᐊᕈᒪᓇᓯ ᐃᓱᒪᖃᑎᒌᒃᓯᒪᕗᓯ.
28ᐅᖃᕐᓗᓯᓗ, ‘ᓇᐅᒡᓕ ᐊᖓᔪᖅᑳᕐᔪᐊᑉ ᐃᒡᓗᖓ?
ᐱᐅᖏᑦᑐᓕᔫᓪᓗ ᐊᖏᕐᕋᕆᓚᐅᕐᑕᖓ?’
29ᐃᖏᕐᕋᖃᑦᑕᕐᑐᓂᒃ ᐊᐱᕆᓚᐅᕐᓯᒪᓐᖏᓚᓰ?
ᐅᓂᒃᑳᕆᔭᖏᓪᓗ ᐅᒃᐱᕆᖏᑉᐱᓯᐅᒃ?
30ᐃᓄᒃ ᐱᐅᖏᑦᑐᓕᔪᖅ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᖏᑉᐸᑦ,
ᓂᓐᖓᐅᓯᐅᔪᒫᕐᑑᑉ ᐅᓪᓗᖓᓂ ᓴᐳᑎᔭᐅᔪᓐᓇᕋᔭᕐᐹ?
31ᑭᐊ ᐊᑭᕋᕐᑐᕐᓗᒍ ᐅᖃᐅᑎᔪᓐᓇᕋᔭᕐᐸᐅᒃ?
ᑭᐊᓗ ᐱᓇᓱᐊᕐᓂᕆᓯᒪᔭᖓ ᒪᓕᒡᓗᒍ ᐊᑭᓂᐊᕈᓐᓇᕐᐸᐅᒃ?
32ᐃᓗᕕᖃᕐᕕᖕᒧᑦ ᐊᒡᔭᕐᑕᐅᒐᒥ,
ᖃᐅᔨᓴᕐᑎᓄᑦ ᐃᓗᕕᖓ ᖃᐅᔨᓴᕐᑕᐅᓕᕐᐳᖅ.
33ᓇᑎᕐᓇᒥ ᓂᐊᖁᑦᑍᑦ ᒪᒪᕐᑑᕗᑦ ᑖᑦᓱᒧᖓ;
ᐃᓄᓕᒫᓂᑦ ᑭᖑᓂᖓᓂᑦ ᒪᓕᒃᑕᐅᕗᖅ,
ᑖᑦᓱᒪᓗ ᓯᕗᓂᖓᓃᑦᑐᑦ ᓈᓴᒐᒃᓴᐅᓇᑎᒃ.
34ᓱᖕᒪᑦ ᑐᑭᖃᖏᑦᑐᓄᑦ ᓮᒻᒪᕐᓴᕋᓱᒃᐱᓯᓐᖓ?
ᑭᐅᑦᔪᑎᒋᔭᓕᒫᓯ ᓱᓕᓂᕐᑕᖃᓐᖏᓚᑦ.”
Currently Selected:
ᔫᐱᐅᑉ ᐊᒡᓚᖏᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
