ᔫᐱᐅᑉ ᐊᒡᓚᖏᑦ 20
20
ᔪᐸᕆ
1ᑕᕝᕙ ᔪᐸᕆ ᓁᒪᑍᑎᒥᐅᑕᖅ ᑭᐅᕗᖅ:
2“ᐃᓱᒫᓗᓕᕋᒪ ᑭᐅᔪᒪᓕᕐᐳᖓ,
ᐃᓗᒃᑯᑦ ᐊᑯᓂᒍᓱᒻᒪᕆᓕᕋᒪ ᑭᐅᔪᒪᓪᓗᖓ.
3ᐅᖃᐅᓯᕆᔭᕐᓄᑦ ᒥᑕᐅᑎᒋᔭᐅᓂᓐᓂᒃ ᑐᓵᒐᒪ,
ᑐᑭᓯᓂᕋᓕ ᒪᓕᒡᓗᒍ ᑭᐅᓂᐊᕐᐸᒋᑦ.
4ᖃᐅᔨᒪᑦᓯᐊᕐᐳᑎᑦ ᑍᑦᓱᒪᓂᐊᓗᖕᓂᑦ,
ᐃᓄᖃᕆᐊᓕᕐᓂᖓᓂᑦ ᓄᓇᕐᔪᐊᕐᒥ,
5ᐱᐅᖏᑦᑐᓕᔫᑉ ᖃᓄᐃᓐᖏᑬᓐᓇᕐᓂᖓ ᓁᑦᑑᕗᖅ,
ᒎᑎᖃᖏᑦᑑᓪᓗ ᖁᕕᐊᓱᑬᓐᓇᕐᓂᖓ ᓯᕕᑭᑦᑑᓪᓗᓂ.
6ᐊᔪᖏᑦᑐᕐᔪᐊᖑᓂᖓ ᕿᓚᖕᒧᑦ ᑎᑭᐅᑎᓯᒪᓕᕋᓗᐊᕈᓂ,
ᓂᐊᖁᖓᓗ ᓄᕗᔭᓄᑦ ᑎᑭᐅᑎᓯᒪᓕᕋᓗᐊᕐᐸᑦ,
7ᐊᓯᐅᔪᒫᕐᐳᖅ ᐃᓱᖃᖏᑦᑐᒧᑦ ᐊᓇᕐᑕᕕᓂᕐᒥᑐᑦ;
ᑖᑦᓱᒥᖓᓗ ᑕᑯᕙᒃᑐᕕᓃᑦ ᐅᖃᕈᒫᕐᐳᑦ, ‘ᓇᒧᓐᖓᕐᑐᕐᓖᓐᓇ?’
8ᓯᓐᓇᒃᑐᑎᑐᑦ ᐊᓯᐅᔪᒫᕐᐳᖅ, ᓇᓂᔭᐅᔪᓐᓁᕐᓗᓂᓗ;
ᐅᓐᓄᐊᒃᑯᑦ ᑕᑯᑎᑕᐅᑦᔪᑎᑐᑦ ᓄᖑᔪᒫᕐᐳᖅ.
9ᑕᑯᔭᐅᖃᑦᑕᓚᐅᕐᓗᓂ ᑕᑯᔭᐅᖃᑦᑕᕈᓐᓁᕈᒫᕐᐳᖅ,
ᐃᓂᒋᕙᓚᐅᕐᑕᖓᑕᓗ ᑕᑯᖃᑦᑕᕈᓐᓁᕈᒫᕐᐹ.
10ᕿᑐᕐᖓᖏᑦ ᐱᑦᓯᐊᕋᓱᓕᕈᒫᕐᐳᑦ ᐊᒃᓱᔪᓂᒃ,
ᐊᒡᒐᖏᑕᓗ ᐱᓂᐊᕐᓂᖏᑎᒍᑦ ᐊᔪᕐᓴᖏᑦᔪᑎᓂᒃ ᐅᑎᕐᕕᐅᔪᒫᕐᐳᑦ.
11ᓴᐅᓂᖏᑦ ᐃᓅᓱᒃᑑᓪᓗᓂ ᐊᔪᕐᑐᓕᓂᕕᓂᖏᓐᓂᒃ ᑕᑕᑉᐳᑦ,
ᐊᑯᓂᐅᖏᑦᑐᕐᓕ ᓇᓪᓚᖓᖃᑎᒋᓕᕈᒫᕐᐰᑦ ᓄᓇᒥ.
12ᐱᐅᖏᑦᑐᓕᓂᖅ ᖃᓂᕐᒥᓂ ᒪᒪᕆᒐᓗᐊᕐᐹ,
ᐃᔨᕐᓯᒪᒐᓗᐊᕐᐹ ᐅᖃᖓᑕ ᐊᑖᓂ,
13ᐊᓐᓂᕆᓗᒍ ᖁᔭᓈᕈᒪᖏᒃᑲᓗᐊᕐᐸᒍ;
ᐱᓯᒤᓐᓇᕈᒪᒐᓗᐊᕐᐸᒍᓗ ᖃᓂᕐᒥᓂ,
14ᓂᕆᔭᖏᓪᓕ ᐊᑭᐊᕈᖓᓂ ᖃᓯᓕᓇᕐᓯᓂᐊᕐᐳᑦ;
ᖁᒡᓗᒋᐊᓪᓗ ᑐᖁᓐᓇᕐᑐᖏᑎᑐᑦ ᓱᖓᕐᑎᑐᓪᓗ ᑍᒤᓕᕐᓗᑎᒃ ᐃᓗᖓᓂ.
15ᐊᔪᕐᓴᖏᑦᔪᑎᓂᒃ ᐄᓯᓯᒪᕗᖅ ᒥᕆᐊᕐᓂᐊᕆᕔᓪᓕ;
ᒎᑎᐅᑉ ᒥᕆᐊᕐᑎᓐᓂᐊᕐᒪᒍ ᐊᕿᐊᕈᕐᒥᐅᑕᖏᓐᓂᒃ.
16ᖁᒡᓗᒋᐊᑉ ᑐᖁᓐᓇᕐᑐᖓᓂᒃ ᐄᓯᓂᐊᕐᐳᖅ;
ᖁᒡᓗᒋᐊᓪᓗ ᑐᖁᓐᓇᕐᑐᓕᐅᑉ ᑮᓯᓂᖓᓄᑦ ᑐᖁᑕᐅᓂᐊᕐᐳᖅ.
17ᑰᖕᓂᒃ ᑕᑯᔪᓐᓇᕐᓯᓂᐊᓐᖏᓚᖅ,
ᖄᒥᑉᐸᓪᓕᐊᔪᒥᒃ ᑰᒐᓛᓂᒃ, ᕼᐊᓂᓂᒃ ᐃᒻᒧᖕᓂᒡᓗ.
18ᐱᓇᓱᐊᕐᓯᒪᔭᖏᑕ ᐱᕈᕐᑎᑕᖏᑦ ᐅᑎᕐᑎᑦᓱᒫᕐᐰᑦ,
ᑕᐅᕐᓰᓂᒃᑯᑦ ᖄᖏᕐᓂᑯᓕᐅᕈᑎᓂ ᖁᕕᐊᓲᑎᒋᓗᒋᑦ ᐊᑐᕈᓐᓇᕐᓯᓂᐊᓐᖏᓔ.
19ᐊᒃᓱᔪᓂᒃ ᐅᖁᒤᒃᓴᕐᑎᑦᓯᓚᐅᕐᒪᑦ ᑲᒪᒋᔪᒪᓇᓂᒋᓪᓗ,
ᐃᒡᓗᒥᒡᓗ ᐊᕐᓵᕐᓯᓪᓗᓂ ᐃᒡᓗᖃᓕᓚᐅᕐᐳᖅ ᓴᓇᓚᐅᓐᖏᑕᒥᓂᒃ.
20ᐱᔪᒪᕕᒡᔪᐊᕐᓂᖓ ᓈᒻᒪᒃᓯᔪᓐᓇᖏᒻᒪᑦ,
ᖁᕕᐊᒋᔭᒥᓂᒃ ᓇᓪᓕᐊᓐᓂᒡᓘᓐᓃᑦ ᐱᐅᓕᒃᓯᔪᓐᓇᕐᓂᐊᓐᖏᓚᖅ.
21ᓂᕆᓕᕌᖓᒥ ᓂᕿᓂᒃ ᐊᒥᐊᒃᑯᖃᕐᐸᓐᖏᓚᖅ;
ᑍᒤᒻᒪᑦ ᐊᔪᕐᓴᖏᑦᔪᑎᒃᓴᖏᑦ ᐃᓱᖃᕐᓂᐊᕐᐳᑦ.
22ᐊᔪᕐᓴᓐᖏᕕᒡᔪᐊᓕᕐᑎᓪᓗᒍ ᐅᖁᒤᑦᑐᒧᑦ ᓵᓚᐅᓂᐊᕐᐳᖅ;
ᐊᒃᓱᕈᕐᓇᕐᑐᕐᔪᐊᕐᒧᑦ ᓱᓇᑐᐃᓐᓇᕐᓄᑦ ᑎᑭᑕᐅᔪᒫᕐᒪᑦ.
23ᓂᕆᓗᓂ ᐊᕿᐊᑦᑐᓕᕐᑎᓪᓗᒍ,
ᒎᑎᐅᑉ ᓂᓐᖓᐅᓯᖓᑕ ᑎᑭᕝᕕᒋᔪᒫᕐᐹ,
ᓱᒋᐊᕈᒫᕐᐹᓗ ᓯᓚᓗᒡᕕᐅᔪᑎᑐᑦ ᓱᓕ ᓂᕆᑎᓪᓗᒍ.
24ᓴᕕᒡᔪᐊᒥᑦ ᓴᕕᕋᔭᖕᒥᑦ ᕿᒫᔪᒪᕐᐳᖅ;
ᖃᕐᔪᒧᓪᓕ ᑲᓐᓄᔭᒧᑦ ᑲᐱᔭᐅᓪᓗᓂ ᐳᑐᔭᐅᔪᒫᕐᐳᖅ.
25ᖃᕐᔪᖅ ᑎᒥᖓᓂᒃ ᐳᑐᒥᓵᕐᓯᓪᓗᓂ ᐊᓂᒎᑎᕗᖅ,
ᓇᖅᑯᖓ ᕿᓪᓕᕐᑐᖅ ᓱᖓᕐᒥᒃ ᑯᑐᒃᐳᖅ;
ᑲᑉᐱᐊᓱᖕᓂᕐᒧᑦ ᑕᕝᕙ ᑎᑭᑕᐅᕗᖅ.
26ᑕᕝᕙ ᑖᕐᑐᕐᔪᐊᕐᒧᑦ ᑲᑎᕐᓱᓚᐅᕐᑕᖏᑦ ᐅᓕᒃᑕᐅᕗᑦ;
ᐃᑯᒪᒧᑦ ᐃᑭᑎᑕᐅᖏᑦᑐᒧᑦ ᓄᖑᑕᐅᔪᒫᕐᐳᖅ;
ᐊᒥᐊᒃᑯᓕᒫᓪᓗ ᐃᒡᓗᖓᓃᑦᑐᑦ ᓄᖑᑕᐅᔪᒪᕐᐳᑦ.
27ᕿᓚᖕᒥᑦ ᓇᓗᓁᕐᑕᐅᔪᒫᕐᐳᖅ ᐱᐅᖏᑦᑐᓕᓯᒪᓂᖓ,
ᓄᓇᕐᔪᐊᕐᓗ ᒪᑭᓪᓗᓂ ᑖᑦᓱᒥᖓ ᐊᑭᕋᕐᑐᓕᕈᒫᕐᐳᖅ.
28ᐃᒡᓗᒥᐅᑕᕆᔭᖏᑦ ᐊᓐᓂᑦᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ,
ᐅᓂᐊᕐᑕᐅᔪᒫᕐᐳᑦ ᒎᑎᐅᑉ ᓂᓐᖓᐅᓯᖓᑕ ᐅᓪᓗᖓᓂ.
29ᑕᕝᕙ ᐱᐅᖏᑦᑐᓕᔪᖅ ᐃᓄᒃ ᑍᒫᒃ ᒎᑎᒧᑦ ᐱᓇᓱᐊᕐᕕᐅᔪᒫᕐᐳᖅ,
ᑭᖑᕐᖑᑎᔭᒃᓴᖃᕐᑎᑕᐅᓗᓂᓗ ᑍᒤᑦᑐᒥᒃ ᒎᑎᒥᑦ ᐱᔪᒥᒃ.”
Currently Selected:
ᔫᐱᐅᑉ ᐊᒡᓚᖏᑦ 20: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
