ᔫᐱᐅᑉ ᐊᒡᓚᖏᑦ 19
19
ᔫᐱ
1ᑕᕝᕙ ᔫᐱ ᑭᐅᕗᖅ ᐅᖃᕐᓗᓂ:
2“ᖃᓄᖅ ᐊᑯᓂᐅᑎᒋᔪᖅ ᐋᓐᓂᕐᓯᕐᓂᐊᕐᐱᓯᓐᖔ
ᓯᖁᒥᒐᓱᐊᕐᓗᖓᓗ ᖃᓄᓕᒫᑦᓯᐊᖅ ᐅᖃᐅᓯᕐᓄᑦ?
3ᖁᓖᕐᑐᕐᓗᓯ ᐅᕙᓐᓂᒃ ᓵᓐᖓᓯᓯᒪᓕᕐᐳᓯ;
ᑲᓐᖑᓱᓐᖏᓚᓰ ᐅᕙᓐᓂᒃ ᓱᒃᑯᔨᐊᖃᕋᓱᐊᕐᓂᑦᓯᓐᓂᒃ?
4ᐊᒡᓛᑦ ᑕᒻᒪᕐᓯᒪᒐᓗᐊᕐᓂᕈᒪ,
ᑕᒻᒪᕈᑎᒋᓯᒪᔭᒃᑲ ᐅᕙᓐᓄᑐᐊᖅ ᐃᓱᒫᓗᓇᕐᑐᑑᕗᑦ.
5ᐅᕙᓐᓂᑦ ᐱᐅᓂᕐᓴᐅᓇᓱᒋᕕᓰᑦ, ᑕᒪᒃᑯᐊᓗ ᐊᑲᐅᓐᖏᓕᐅᕈᑎᒃᑲ
ᐸᓯᔭᒃᓴᐅᓂᓐᓄᑦ ᓇᓗᓁᕈᑕᐅᓇᓱᒋᓪᓗᒋᑦ,
6ᖃᐅᔨᔪᓐᓇᓐᖏᓚᓰ ᒎᑎᐅᑉ ᐅᕙᓐᓄᑦ ᑍᒤᓕᐅᕐᓂᖓᓂᒃ?
ᐱᓇᓱᐊᕐᓗᓂᖓ ᓄᓗᐊᕐᑎᑕᒥᑐᑦ ᑍᒤᓯᒪᖕᒪᖓ.
7ᑕᑯᒋᑦ. ᓂᓪᓕᓚᐅᕐᐳᖓ, ‘ᐱᑦᓯᐊᕐᓯᒪᓐᖏᓚᖅ!’ ᑭᐅᔭᐅᓐᖏᓚᖓᓕ;
ᕾᒐᓛᕐᓗᖓ ᐃᑲᔪᕐᑕᐅᔪᒪᓚᐅᕐᐳᖓ, ᐃᑲᔪᕋᓱᐊᕐᑐᖃᓐᖏᓚᕐᓕ.
8ᒎᑎᐅᑉ ᐊᖅᑯᑎᒋᓂᐊᕐᑕᕋ ᒪᑐᓚᐅᕐᒪᒍ, ᑕᕝᕙ ᐊᓂᒎᑎᔪᓐᓁᓪᓕᕗᖓ,
ᐊᖅᑯᑎᒋᓂᐊᕐᑕᕋᓗ ᑖᕐᑐᕐᔪᐊᒧᑦ ᑕᑯᒃᓴᐅᔪᓐᓁᕐᑎᓚᐅᕐᐹ.
9ᐅᐱᒋᔭᐅᑦᔪᑎᒃᓴᓕᒫᒃᑲ ᑖᑦᓱᒪ ᐲᔭᓚᐅᕐᐰᑦ,
ᓂᐊᖂᑎᒐᓗ ᐲᓚᐅᕐᐹ ᓂᐊᖁᓐᓂᑦ.
10ᑖᑦᓱᒪ ᓯᖁᒥᓚᐅᕐᒪᖓ ᐊᕙᑎᓕᒫᓐᓂᑦ, ᓱᓇᐅᔪᓐᓃᕐᐳᖓ,
ᓂᕆᐅᖕᓂᕋᓗ ᓄᓱᓚᐅᕐᐹ ᓇᐹᕐᑐᑎᑐᑦ.
11ᓂᓐᖓᐅᒪᓂᓂ ᐅᕙᓐᓄᑦ ᑐᕌᕐᑎᓯᒪᕚ,
ᐊᑭᕋᕐᑐᑎᒥᑐᓪᓗ ᑍᒤᑎᓕᕐᓗᖓ.
12ᑖᑦᓱᒪ ᐅᓇᑕᕐᑐᒃᓴᖁᑎᓂ ᐅᕙᓐᓄᑦ ᐅᓇᑕᕆᐊᕐᑐᖁᕔᑦ;
ᓴᐴᓗᑕᓕᐅᕐᓯᒪᓕᕐᐳᑦ, ᐊᕙᓗᓯᓯᒪᓕᕐᓗᑎᒡᓗ ᑐᐱᓐᓂᒃ.
13ᖃᑕᓐᖑᑎᒃᑲ ᐅᕙᓐᓂᒃ ᖁᔭᓈᕐᓯᑎᑉᐰᑦ,
ᖃᐅᔨᒪᔭᒃᑲᓗ ᐅᕙᓐᓂᒃ ᐃᓕᑕᕐᓯᕙᒍᓐᓃᕐᐳᑦ.
14ᓇᖕᒥᓂᒃᑲ ᐅᕙᓐᓂᒃ ᐊᕕᑦᓯᕗᑦ;
ᐃᓚᓐᓇᕆᔭᒃᑲᓗ ᐅᕙᓐᓂᒃ ᕿᒤᓪᓗᑎᒃ.
15ᑐᔪᕐᒥᐊᑦᑕ ᐊᒡᓛᑦ ᐳᐃᒍᕐᓯᒪᓕᕐᐹᖓ;
ᐊᕐᓁᑦ ᐊᖏᕐᕋᓐᓂ ᐱᔨᒪ ᑕᑯᓕᒪᓇᖏᑦᑐᑎᑐᑦ ᐱᓕᕐᐹᖓ;
ᓂᐅᕐᕈᐊᑎᑐᓪᓗ ᐱᓇᓱᐊᕐᕕᒋᖃᑦᑕᓕᕐᓗᖓ.
16ᐱᔨᓐᓂᒃ ᓂᓪᓕᐅᑦᔨᒐᓗᐊᕋᒪ, ᑕᕝᕙ ᑭᐅᔭᐅᓐᖏᓚᖓ,
ᐊᒡᓛᑦ ᓂᐱᓐᓄᑦ ᐊᒃᓱᕈᕐᓗᖓ ᕿᓄᔭᕆᐊᖃᓚᐅᕐᐳᖓ.
17ᓄᓕᐊᒪ ᐊᒡᓛᑦ ᐊᓂᕐᓂᕋ ᓁᒪᔪᒪᔪᓐᓁᕐᐹ,
ᖃᑕᓐᖑᑎᒪᓗ ᐊᓈᓇᖃᑎᒪ ᐊᒡᓛᑦ ᖃᒡᓕᔪᒪᔪᓐᓁᕐᐹᖓ.
18ᐊᒡᓛᑦ ᓱᕈᓯᕐᓄᑦ ᒥᑕᐅᑎᒋᔭᐅᖃᑦᑕᕐᐳᖓ;
ᓂᑯᕕᑐᐊᕋᒪᓗ ᑕᕝᕙ ᐅᖃᕐᓂᕐᓘᑎᓕᕐᐹᖓ.
19ᐊᒡᓛᑦ ᐃᓚᓐᓇᕆᓂᕐᐹᓐᓄᑦ ᓇᕐᕈᒋᔭᐅᓕᕐᐳᖓ,
ᓇᒡᓕᒋᔭᓐᓄᓪᓗ ᐊᑭᕋᕐᑐᕐᑕᐅᓕᕐᓗᖓ.
20ᓴᐅᓂᒃᑲ ᐅᕕᓂᓐᓄᑦ ᐊᑕᑎᑕᐅᑐᐃᓐᓇᓕᕐᐳᑦ,
ᐆᒪᓱᖔᕐᔪᑐᐃᓐᓇᓕᕐᐳᖓᓗ ᓯᕐᓚᑦᓯᐊᖅ.
21ᐃᓚᓐᓇᕆᔭᒃᑳ, ᓈᒃᑭᒋᓚᐅᕐᓯᓐᖓ, ᓈᒃᑭᒋᓚᐅᕐᓯᓐᖓ,
ᒎᑎᐅᑉ ᐊᒡᒐᖕᒥᓄᑦ ᐊᒃᑐᕐᓯᒪᖕᒪᖓ!
22ᓱᖕᒪᑦ ᐊᑭᕋᕐᑐᕐᐱᓯᓐᖓ ᒎᑎᒥᑦ ᐊᑭᕋᕐᑐᕐᑕᐅᖕᒥᑎᓪᓗᖓ?
ᓱᖕᒪᑦ ᑎᒥᒪ ᐅᖁᒤᒃᓴᕐᓂᖓ ᓱᓕ ᓈᒻᒪᒋᓕᖏᑉᐱᓯᐅᒃ?
23ᑕᕝᕙᑐᖅ ᐅᖃᐅᓯᒃᑲ ᑎᑎᕋᕐᑕᐅᑦᓴᓚᐅᕐᓕᑦ!
ᐅᖃᓕᒫᒐᓄᓪᓗ ᐃᓕᔭᐅᓗᑎᒃ!
24ᐅᕝᕙᓗ ᐅᓗᕐᓯᓯᒧᑦ ᑎᑎᕋᕐᑕᐅᓗᑎᒃ ᐅᔭᕋᒃᑯᑦ,
ᓄᖑᓐᓂᐊᖏᓪᓗᑎᒃ ᑎᑎᕋᕐᓯᒪᓕᕐᓂᐊᕐᒪᑕ ᐃᓱᖃᖏᑦᑐᒧᑦ!
25ᖃᐅᔨᒪᕗᖓ ᓴᐳᑦᔨᔨᒐ ᐃᓅᖕᒪᑦ,
ᑭᖑᓪᓕᕐᐹᒥᒡᓗ ᓄᓇᕐᔪᐊᕐᒥ ᓇᖏᓕᕈᒫᕐᒪᑦ ᓴᓂᓐᓂ.
26ᐅᕕᓂᒐᓗ ᐋᓐᓂᐊᓇᕐᑐᒧᑦ ᓄᖑᑕᐅᒐᓗᐊᕐᐸᑦ,
ᓱᓕ ᑎᒥᓐᓃᓪᓗᖓ ᒎᑎ ᑕᑯᔪᒫᕐᐸᕋ,
27ᓇᖕᒥᓂᓪᓚᕆᒃ ᑕᑯᔪᒫᕐᐸᕋ ᓴᓂᓐᓃᑎᓪᓗᒍ,
ᐊᓯᐊᓂᒃ ᑕᑯᓐᓇᖏᓪᓗᖓ, ᐃᔨᓐᓄᑦ ᑕᑯᔪᒪᕐᐸᕋ.
ᐆᒻᒪᑎᒐᓕ ᓄᑮᓕᕐᐳᖅ ᐃᓗᓐᓂ!
28ᐅᖃᕋᔭᕈᑦᓯ, ‘ᖃᓄᕐᖑᓇ ᐋᓐᓂᕐᓯᒃᑲᓐᓂᕈᓐᓇᕐᑕᕗᑦ?
ᕿᓂᕋᑦᓯ ᓱᓕ ᐅᕙᓐᓂᒃ ᐱᒋᐊᒃᑲᓐᓂᕈᑎᒃᓴᒥᒃ’;
29ᒫᓐᓇ ᓯᕘᕋᔪᒃᓴᐅᕗᓯ ᓴᕕᒡᔪᐊᒥᒃ,
ᓂᓐᖓᐅᓯᒃᑯᑦ ᓴᕕᒡᔪᐊᖅ ᓱᒋᐊᕐᓯᑦᔪᑕᐅᖕᒪᑦ,
ᖃᐅᔨᖁᓪᓗᓯ ᓱᒋᐊᕐᑕᐅᓂᕐᒥᒃ.”
Currently Selected:
ᔫᐱᐅᑉ ᐊᒡᓚᖏᑦ 19: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
