ᔫᐱᐅᑉ ᐊᒡᓚᖏᑦ 2
2
ᓵᑖᓇᓯᐅᑉ ᐆᒃᑐᕐᓗᐃᒃᑲᓐᓂᕐᓂᖓ ᔫᐱᒥᒃ
1ᐅᓪᓗᕐᓕ ᓇᓪᓕᐅᑎᖕᒥᖕᒪᑦ ᕿᓚᖕᒥᐅᑍᑦ ᐊᑕᓂᐅᑉ ᓵᖓᓄᐊᕐᕕᒃᓴᖓᑦ, ᓵᑖᓇᓯᑦᑕᐅᖅ ᐃᓚᒋᔭᐅᒋᕗᖅ. 2ᐊᑕᓂᐅᓪᓕ ᐊᐱᕆᕚ, “ᓇᑭᓐᖔᕐᐱᑦ?”
ᓵᑖᓇᓯᐅᑉ ᑭᐅᕚ, “ᓇᓂᑐᐃᓐᓇᖅ ᐊᕙᒻᒧᒐᕐᓯᒪᕗᖓ ᓄᓇᕐᔪᐊᓕᒫᒥ.”
3ᐊᑕᓂᐅᑉ ᐊᐱᕆᕚ, “ᐱᔨᒐ ᔫᐱ ᐃᒃᐱᒋᓯᒪᕕᐅᒃ? ᓄᓇᕐᔪᐊᓕᒫᒥ ᑖᑦᓱᑐᓇᖅ ᓱᖁᓯᔪᐃᑦᑑᑎᒋᔪᒥᒃ ᐱᑕᖃᓐᖏᓚᖅ ᐃᓄᑦᓯᐊᕙᐅᑎᒋᔪᖃᕋᓂᓗ, ᑖᑦᓱᒪ ᑐᒃᓯᐊᕐᕕᒋᖃᑦᑕᕐᐹᖓ ᑲᒪᑦᓯᐊᕋᓱᐊᕐᓗᓂᓗ ᐱᐅᖏᑦᑐᒥᒃ ᖃᓄᑐᐃᓐᓇᑦᓯᐊᖅ ᐊᑐᕐᑍᓕᒪᓪᓗᓂ. ᐊᖏᕐᑎᓐᓇᓱᓚᐅᕐᐸᕐᒪ ᑖᑦᓱᒥᖓ ᐱᓂᕐᓗᐃᓇᓱᒍᒪᓪᓗᑎᑦ ᓱᓇᒥᒡᓘᓐᓃᑦ ᐱᑦᔪᑎᒃᓴᖃᖏᑦᓯᐊᕐᓗᑎᑦ, ᔫᐱᓕ ᓱᓕ ᐅᒃᐱᕐᓂᕐᒥᒍᑦ ᑲᔪᓯᓯᒪᑦᓯᐊᕐᐳᖅ ᑍᒪᓐᖓᓕᒫᖅ.”
4ᓵᑖᓇᓯᓕ ᑭᐅᕗᖅ, “ᐊᖑᑦ ᑖᓐᓇ ᓱᓇᓕᒫᓂᒃ ᓄᖅᑲᐅᑦᔨᓂᐊᕐᐳᖅ ᐃᓅᖔᕈᒪᓂᕐᒧᑦ. 5ᑎᒥᖓᒍᑦ ᐋᓐᓂᐊᓕᕐᑎᒃᑯᕕᐅᒃ ᐅᖃᕐᓂᕐᓘᑎᒋᓗᓂᑎᑦ ᓇᕐᕈᒋᓕᕐᓂᐊᕐᐹᑎᑦ!”
6ᐊᑕᓂᕐᓕ ᐅᖃᕐᐳᖅ ᓵᑖᓇᓯᒧᑦ, “ᑕᑯᒋᑦ, ᐱᔪᓐᓇᕐᓂᕐᓄᑦ ᑐᓂᕙᕋ; ᑭᓯᐊᓂᓕ ᑐᖁᑦᑍᓕᒍᒃ.”
7ᑕᕝᕙ ᓵᑖᓇᓯ ᐊᑕᓂᐅᑉ ᓇᔪᕐᑕᖓᓂᑦ ᕿᒪᕉᑎᕗᖅ, ᔫᐱᓗ ᓇᐅᒃᑯᑐᐃᓐᓇᖅ ᐊᔪᐊᓕᕐᑎᑉᐹ ᑎᒥᓕᒫᖓ ᐃᑎᒐᖏᑕ ᐊᓗᖏᖕᓂᑦ ᐱᒋᐊᕐᓗᒍ ᑲᑦᔨᖓᓄᑦ ᑎᑭᓪᓗᒍ. 8ᑕᕝᕙ ᔫᐱ ᒪᕐᕋᕕᓂᕐᓂᒃ ᐃᒋᑦᓯᕕᖕᒧᑦ ᐃᖏᑦᓴᕐᑐᕐᐳᖅ ᑕᕝᕙᓂᓗ ᓯᖁᒥᓯᒪᔪᒥᒃ ᐱᓪᓗᓂ ᐊᔪᐊᓂ ᑖᑦᓱᒧᖓ ᑭᓕᐅᕐᑐᓕᕐᐰᑦ. 9ᑕᕝᕙ ᓄᓕᐊᖓᑕ ᐅᖃᐅᑎᕚ, “ᓱᓕ ᐅᒃᐱᕐᓂᕐᓂᒃ ᓱᕐᕋᒐᓱᐊᓐᖏᓚᑏᑦ? ᒎᑎ ᐅᖃᕐᓂᕐᓘᑎᒋᓗᒍ ᑐᖁᔪᒪᓚᐅᕆᑦ.”
10ᔫᐱᐅᓪᓕ ᑭᐅᕚ, “ᓯᓔᑦᑐᑐᑦ ᐊᕐᓇᑐᑦ ᐅᖃᓪᓚᓕᕐᐳᑎᑦ. ᒎᑎ ᐅᕙᑦᑎᓐᓄᑦ ᐱᐅᔪᒥᒃ ᑐᓂᓯᖃᑦᑕᕐᐳᖅ, ᓱᖕᒪᓪᓕ ᓈᒻᒪᒃᓴᖏᓪᓗᑕ ᐅᖃᕐᕕᒋᒐᔭᕐᐸᕗᑦ ᐱᐅᖏᑦᑐᒧᑦ ᐱᑎᑉᐸᑎᒎᑦ?” ᔫᐱᓕ ᑕᒪᐅᓈᕋᓗᐊᕋᒥ ᐊᔪᕐᑐᓕᓚᐅᓐᖏᓚᖅ ᐅᖃᐅᓯᕐᒥᒍᑦ.
ᔫᐱᐅᑉ ᐱᖃᓐᓇᕆᔭᖏᑕ ᐳᓛᕆᐊᕐᓂᖓᑦ
11ᔫᐱᐅᑉ ᐱᖃᓐᓇᕆᔭᖏᑦ ᐱᖓᓱᑦ ᐃᓕᐹᓯ ᑎᒪᓁᑎᒥᐅᑕᖅ, ᐱᐅᓪᑖᓗ ᓲᕼᐂᑎᒥᐅᑕᖅ, ᔪᐸᕆᓗ ᓁᒪᑍᑎᒥᐅᑕᖅ. ᑐᓴᕋᒥᒃ ᔫᐱᐅᑉ ᐊᖏᔪᒥᒃ ᐋᓐᓂᐊᓂᖓᓂᒃ ᑕᑯᔭᕐᑐᕐᐳᑦ ᓮᒻᒪᕐᓮᔪᒪᓪᓗᑎᒃ ᑖᑦᓱᒥᖓ. 12ᓱᓕᓕ ᐅᖓᓯᒃᑐᒦᓪᓗᑎᒃ ᔫᐱᒥᒃ ᑕᑯᒐᒥᒃ, ᐃᓕᑕᕆᓐᖏᓛᑦ; ᐃᓕᑕᕆᓕᕋᒥᑦᔪᒡᓗ ᕿᐊᓕᕐᐳᑦ; ᐊᓐᓄᕌᑎᒡᓗ ᐊᓕᒃᑐᕐᐰᑦ ᐳᔪᕋᕐᒥᒡᓗ ᖁᒻᒧᐊᒃᑎᑦᓯᓪᓗᑎᒃ ᓂᐊᖁᒥᖕᓂᒃ ᑕᒪᑐᒧᖓ ᑲᑕᒑᕕᐅᑎᑉᐳᑦ. 13ᒪᓂᖅᑲᒥᓗ ᔫᐱ ᐃᒃᓯᕙᖃᑎᒋᓕᕐᐹᑦ ᐅᓪᓗᓂᒃ ᐅᓐᓄᐊᓂᒡᓗ 7ᓂᒃ ᓂᓪᓕᕐᑐᖃᓚᐅᕋᑎᒃ, ᐋᓐᓂᐊᕐᑐᐊᓘᓂᖓᓂᒃ ᑕᑯᓐᓇᕋᒥᒃ.
Currently Selected:
ᔫᐱᐅᑉ ᐊᒡᓚᖏᑦ 2: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
