ᔫᐱᐅᑉ ᐊᒡᓚᖏᑦ 1
1
ᓵᑖᓇᓯᐅᑉ ᐆᒃᑐᕐᓗᐃᓂᖓ ᔫᐱᒥᒃ
1ᐊᖑᑎᑕᖃᓚᐅᕐᐳᖅ ᔫᐱᒥᒃ ᐊᑎᓕᖕᒥᒃ, ᓄᓇᒥ ᐅᔾᒥ ᐊᑎᓕᖕᒥ, ᐊᖑᓪᓗ ᑖᓐᓇ ᐸᓯᔭᒃᓴᐅᓂᖃᓚᐅᓐᖏᓚᖅ ᒪᑭᑕᑦᓯᐊᕐᓗᓂᓗ, ᒎᑎᒧᓪᓗ ᑐᒃᓯᐊᕐᕕᖃᖃᑦᑕᕐᓗᓂ, ᐱᐅᖏᑦᑐᓕᓂᕐᒥᒡᓗ ᐊᑐᕐᑍᓕᒪᓪᓗᓂ. 2ᐃᕐᓂᖃᓚᐅᕐᐳᖅ 7ᓂᒃ ᐱᖓᓱᓂᒡᓗ ᐸᓂᖃᕐᓗᓂ. 3ᓰᐱᖁᑎᖃᓚᐅᕐᐳᓪᓗ 7,000ᓂᒃ, ᑳᒥᓕᖁᑎᖃᕐᓗᓂᓗ#1:3 ᑳᒥᓕᒃ ᐅᕝᕙᓗ ᐱᑯᓕᒃ 3,000ᓂᒃ, 1,000ᓂᒡᓗ ᐃᒻᒧᒃᓯᐅᒐᖁᑎᖃᕐᓗᓂ, 500ᓂᒡᓗ ᓯᐅᑎᖅᑯᕐᑐᔪᖁᑎᖃᕐᓗᓂ ᐊᕐᓇᓪᓗᖕᓂᒃ, ᐅᓄᕐᑐᓂᒡᓗ ᐱᔨᖃᕐᓗᓂ; ᐊᔪᕐᓴᖏᓐᓂᕐᐹᖑᓚᐅᕐᐳᕐᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓕᒫᓂᑦ.
4ᔫᐱᐅᓪᓗ ᐃᕐᓂᖏᑦ ᓇᓪᓕᐅᑎᔭᕌᖓᒥᒃ ᐊᑐᓂᑦ ᓇᓪᓕᒃᑭᓪᓗᑎᒃ ᓂᕆᕕᒡᔪᐊᕐᑎᑦᓯᖃᑦᑕᓚᐅᕐᐳᑦ; ᐃᓚᓕᒫᖏᓪᓗ ᐅᐸᒃᐸᒃᑭᓪᓗᑎᒃ, ᑍᒪᓐᖓᓕᒫᕐᓗ ᓇᔭᑎᒃ ᐱᖓᓱᑦ ᐃᓚᐅᑎᑉᐸᒃᓱᒋᑦ ᓂᕆᖃᑎᒋᔪᒪᓪᓗᒋᑦ ᐃᒥᖃᑎᒋᔪᒪᓪᓗᒋᓪᓗ. 5ᐅᓪᓛᑕᒫᓪᓗ ᓂᕆᕕᒡᔪᐊᕐᓂᐅᑉ ᑭᖑᓂᖓᒍᑦ, ᔫᐱ ᐅᓪᓛᕌᕐᔪᒃᑯᑦ ᑐᐸᒃᐸᓚᐅᕐᐳᖅ ᑐᓂᕐᕈᓯᕈᒪᓪᓗᓂ ᑐᖁᑕᒃᓴᒥᒃ ᕿᑐᕐᖓᓂ ᐊᑐᓂᑦ ᐱᑦᔪᑎᒋᓪᓗᒋᑦ ᐊᔪᕐᑐᓕᓂᕐᒧᑦ ᐸᓯᔭᒃᓴᐅᔪᖃᖁᓇᒍ. ᑍᒤᓕᐅᖏᓐᓇᕐᐸᓚᐅᕐᐳᕐᓗ ᐃᓱᒪᖃᕐᓗᓂ ᕿᑐᕐᖓᖏᑕ ᓇᓪᓕᐊᓐᓂᒃ ᒎᑎᒧᑦ ᐱᔮᖅᑯᑕᐅᖏᑦᑐᒥᒃ ᐊᑭᕋᕐᑐᕐᑐᖃᑐᐃᓐᓇᕆᐊᖃᕋᓱᒋᓪᓗᓂᒋᑦ.
6 #
ᒨᓯᓯ ᓯᕗᓪᓖᑦ 6:2. ᐅᓪᓗᕐᓕ ᓇᓪᓕᐅᑎᖕᒪᑦ ᕿᓚᖕᒥᐅᑍᑦ ᐊᑕᓂᐅᑉ ᓵᖓᓅᕐᕕᒃᓴᖓᑦ, ᓵᑖᓇᓯᑦᑕᐅᖅ ᐊᑭᕋᕐᑐᕐᑎ ᑖᒃᑯᓄᖓ ᐃᓚᒋᔭᐅᓚᐅᕆᕗᖅ. 7ᐊᑕᓂᐅᓪᓕ ᓵᑖᓇᓯ ᐊᐱᕆᕚ, “ᖃᓄᐃᓯᒪᓕᕐᐲᑦ?”
ᓵᑖᓇᓯᐅᑉ ᑭᐅᕚ, “ᓇᓂᑐᐃᓐᓇᖅ ᐊᕙᒻᒧᒐᕐᓯᒪᕗᖓ ᓄᓇᕐᔪᐊᓕᒫᒥ.”
8ᐊᑕᓂᐅᓪᓗ ᐊᐱᕆᕚ, “ᐱᔨᒐ ᔫᐱ ᐃᒃᐱᒋᓯᒪᕕᐅᒃ? ᓄᓇᕐᔪᐊᓕᒫᒥ ᑖᑦᓱᑐᓇᖅ ᓱᖁᓯᔪᐃᑦᑑᑎᒋᔪᒥᒃ ᐱᑕᖃᓐᖏᓚᖅ ᐃᓄᑦᓯᐊᕙᐅᑎᒋᔪᖃᕋᓂᓗ, ᑖᑦᓱᒪ ᑐᒃᓯᐊᕐᕕᒋᖃᑦᑕᕐᐹᖓ ᑲᒪᑦᓯᐊᕋᓱᐊᕐᓗᓂᓗ ᐱᐅᖏᑦᑐᒥᒃ ᖃᓄᑐᐃᓐᓇᑦᓯᐊᖅ ᐊᑐᕐᑍᓕᓪᓗᓂ.”
9 #
ᑕᑯᑎ 12:10. ᓵᑖᓇᓯᓗ ᑭᐅᕗᖅ, “ᔫᐱᐅᑉ ᓱᓕ ᑐᒃᓯᐊᕐᕕᒋᖃᑦᑕᕋᔭᕐᐹᑏᑦ ᐃᓕᖕᓄᑦ ᐱᑦᓯᐊᕐᕕᐅᔪᓐᓁᕋᓗᐊᕈᓂ? 10ᑍᒪᓐᖓᑦ ᓴᐳᒻᒥᔧᓐᓇᕋᕕᐅᒃ ᐃᓚᒋᔭᓕᒫᖏᓪᓗ ᐱᖁᑎᓕᒫᖏᓪᓗ ᑲᒪᒋᑦᓯᐊᕐᓗᒋᑦ, ᖃᓄᐃᓕᐅᕐᓂᓕᒫᖓᒍᓪᓗ ᓮᒻᒪᕐᑎᖃᑦᑕᕐᓯᒪᒐᕕᐅᒃ, ᐃᒻᒧᒃᓯᐅᒐᓂᒡᓗ ᐅᓄᕐᑐᐊᓗᖕᓂᒃ ᑐᓂᓯᒪᒐᕕᐅᒃ ᓄᓇᓕᓕᒫᒥᒃ ᓈᓯᓯᒪᓪᓗᐊᕐᑐᓂᒃ. 11ᒫᓐᓇᓕ ᐱᖁᑎᓕᒫᖏᓐᓂᒃ ᓄᖑᕈᑎᒐᔭᕈᕕᐅᒃ ᐃᓕᖕᓄᑦ ᑐᖅᑲᓪᓚᕆᒡᓗᓂ ᓇᕐᕈᓕᕋᔭᕐᐳᖅ!”
12ᑕᕝᕙ ᐊᑕᓂᖅ ᓵᑖᓇᓯᒧᑦ ᐅᖃᕐᐳᖅ, “ᑕᑯᒋᑦ, ᐱᖁᑎᓕᒫᖏᑦ ᐱᔪᓐᓇᕐᓂᕐᓄᐊᕐᐸᒃᑲ, ᔫᐱᓕ ᓇᖕᒥᓂᖅ ᐋᓐᓂᕐᑍᓕᒍ.” ᑍᒤᒻᒪᑦ ᓵᑖᓇᓯ ᑕᕝᕙᓐᖓᑦ ᕿᒪᕉᑎᕗᖅ.
ᔫᐱᐅᑉ ᕿᑐᕐᖓᖏᑕ ᐱᖁᑎᖏᑕᓗ ᓄᖑᑕᐅᓂᖏᑦ
13ᐅᓪᓗᐃᓪᓕ ᐃᓚᖓᓐᓂ ᔫᐱᐅᑉ ᕿᑐᕐᖓᖏᑦ ᓂᕆᕕᒡᔪᐊᕐᑎᓪᓗᒋᑦ ᐃᕐᓂᖓᑕ ᐊᖓᔪᒃᓯᕐᐹᑉ ᐃᒡᓗᖓᓂ; 14ᑐᓴᕐᑎᑦᓯᔨ ᐅᓪᓚᒡᓗᓂ ᔫᐱᒧᐊᕐᐳᖅ ᐅᖃᕐᓗᓂᓗ, “ᓄᓇᓕᕆᑎᓪᓗᑕ ᐱᕈᕐᓰᕕᖕᒥ ᐆᒪᔪᓄᑦ, ᓯᐅᑎᖅᑯᕐᑐᔪᓪᓗ ᖃᓂᒋᔭᑦᑎᓐᓃᓪᓗᑎᒃ ᓂᕆᓇᓱᒃᑎᓪᓗᒋᑦ. 15ᑎᑭᑦᑐᖃᓚᐅᕐᐳᖅ ᓴᐱᐊᒥᐅᓂᒃ ᑕᒪᕐᒥᒡᓗ ᑎᒡᓕᓚᐅᕐᐰᑦ, ᐱᔨᓕᒫᑎᓪᓗ ᑐᖁᓪᓗᓂᒋᑦ ᐅᕙᖓᓕ ᐊᒥᐊᒃᑯᑑᕗᖓ ᕿᒪᒃᓯᓚᐅᕋᒪ ᑐᓴᕐᑎᑦᓱᒪᓪᓗᑎᑦ.”
16ᓱᓕ ᑖᓐᓇ ᐅᖃᓪᓚᒃᑎᓪᓗᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᑲᓪᓕᐅᑉ ᖃᐅᒻᒪᓪᓚᖕᓂᖓᓄᑦ ᓰᐱᓕᒫᑦ ᑐᖁᑕᐅᕗᑦ ᓰᐱᓕᕆᔨᓕᒫᓪᓗ, ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”
17ᓱᓕᓕ ᐅᖃᕇᓚᐅᕐᑎᓐᓇᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᐱᖓᓱᐃᖑᓪᓗᑎᒃ ᑲᐅᓪᑎᐊᒥᐅᑦ ᕿᒻᒥᕐᔪᐊᒃᑰᕐᑐᑦ ᐅᕙᑦᑎᓐᓄᑦ ᐅᓇᑕᕆᐊᕐᒪᑕ ᑳᒥᓕᖁᑎᓕᒫᕗᑦ ᑖᒃᑯᓄᖓ ᐱᔭᐅᕗᑦ ᐱᔨᓕᒫᑎᓪᓗ ᑐᖁᑕᐅᓪᓗᑎᒃ, ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”
18ᓱᓕᓕ ᐅᖃᕇᓚᐅᕐᑎᓐᓇᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᕿᑐᕐᖓᑎᑦ ᓂᕆᕕᒡᔪᐊᕐᑎᓪᓗᒋᑦ ᐃᕐᓂᕐᐱᑦ ᐊᖓᔪᒃᓯᕐᐹᑉ ᐃᒡᓗᖓᓂ, 19ᐊᓄᕆᕐᔪᐊᕐᒧᑦ ᑎᑭᑕᐅᑲᓪᓚᖅᑲᐅᕗᑦ ᓄᓇᖃᕐᕕᐅᕙᖏᑦᑐᒥᑦ ᐱᔪᒧᑦ. ᐃᒡᓗᖓᓗ ᓱᕋᒃᑕᐅᕗᖅ ᐊᓄᕆᒧᑦ ᑕᒪᕐᒥᒡᓗ ᑐᖁᑕᐅᓪᓗᑎᒃ ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”
20ᔫᐱᓗ ᓂᑯᕕᓐᓇᒥ ᐊᓐᓄᕌᓂ ᐊᓕᒃᐰᑦ ᕿᒃᓵᖕᓂᕐᒧᑦ, ᓂᐊᖁᓂᓗ ᓄᔧᔭᕐᐹ, ᒪᓂᖅᑲᒧᓪᓗ ᐹᒻᒪᒃᓗᓂ ᑐᒃᓯᐊᕐᐳᖅ. 21ᐅᖃᕐᓗᓂᓗ, “ᐃᕐᓂᐊᖑᓚᐅᕐᐳᖓ ᓱᓇᖃᕐᓇᖓ, ᑐᖁᓂᐊᕆᕗᖓ ᓱᓇᖃᖏᓪᓗᖓ. ᐊᑕᓂᐅᑉ ᑐᓂᓚᐅᕐᐰᑦ ᒫᓐᓇᓗ ᐊᑕᓂᐅᑉ ᑎᒍᒋᕔᑦ. ᐊᑕᓂᐅᑉ ᐊᑎᖓ ᓂᕐᑐᕐᑕᐅᓕ!”
22ᑕᒪᒃᑯᐊᓕ ᑍᒤᒃᑲᓗᐊᕐᒪᑕ, ᔫᐱ ᐸᓯᒃᓯᖏᓐᓇᒥ ᒎᑎᒥᒃ ᑕᒪᑐᒧᖓ ᐊᔪᕐᑐᓕᓚᐅᓐᖏᓚᖅ.
Currently Selected:
ᔫᐱᐅᑉ ᐊᒡᓚᖏᑦ 1: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
