ᔫᐱᐅᑉ ᐊᒡᓚᖏᑦ 15
15
ᐅᖃᖃᑎᒌᖕᓂᐅᑉ ᐂᑉᐸᖓ
15:1—21:34
ᐃᓕᐹᓯ
1ᑕᕝᕙ ᐃᓕᐹᓯ ᑎᒪᓁᑎᒥᐅᖅ ᑭᐅᕗᖅ:
2“ᐃᓄᒃ ᓯᓚᑐᔪᖅ ᑭᐅᔪᓐᓇᕐᐹ ᐊᓄᕆᑎᑐᑦ ᖃᐅᔨᒪᓂᖃᕐᓗᓂ,
ᐃᒻᒥᓂᒡᓗ ᐃᓗᒻᒥᕐᑎᓪᓗᓂ ᐊᓄᕆᒥᒃ ᓯᕿᓂᐅᑉ ᓄᐃᕕᐊᓂᑦ ᐱᔪᒥᒃ?
3ᐃᓄᒃ ᓯᓚᑐᔪᖅ ᐃᓕᒃᑐᑦ ᐅᖃᓪᓚᒃᑲᔭᓐᖏᓚᖅ
ᐅᕝᕙᓗ ᐃᒻᒥᓂᒃ ᓴᐳᑎᓇᓱᐊᕋᔭᓐᖏᓚᖅ ᐅᖃᐅᓯᑐᐃᓐᓇᕐᓄᑦ.
4ᒎᑎᒥᒃ ᓯᕘᕋᖏᓐᓂᕐᒥᒃ ᐱᓇᓱᐊᓕᕐᐳᑎᑦ,
ᑖᑦᓱᒧᖓᓗ ᑐᒃᓯᐊᕐᓂᕐᒥᒃ ᐊᒡᕕᐊᕈᑎᒃᓴᓕᐅᕐᓗᑎᑦ.
5ᐱᐅᖏᑦᑐᓕᓂᕐᐱᑦ ᐊᔪᕆᕐᑐᕐᐹᑎᑦ ᐅᖃᐅᓯᒃᓴᕐᓂᒃ,
ᐅᖃᐅᓰᓪᓗ ᓂᕈᐊᕐᓯᒪᓪᓗᒋᑦ ᓯᓔᕐᕆᒃᓯᓇᓱᐊᕈᑎᑎᑦ.
6ᓇᖕᒥᓂᖅ ᐅᖃᐅᓯᕐᓄᑦ ᐸᓯᔭᐅᕗᑎᑦ, ᐅᕙᓐᓅᖏᑦᑐᖅ;
ᖃᓂᕐᓄᑦ ᓇᖕᒥᓂᖅ ᓇᓗᓁᕐᐳᑎᑦ ᐊᑭᕋᕐᑐᕐᑕᐅᒐᕕᑦ.
7ᐃᓄᓕᒫᓂᑦ ᐃᕐᓂᐊᕆᔭᐅᓯᒪᔪᓂᑦ ᓯᕗᓪᓕᕐᐸᐅᓯᒪᕖᑦ?
ᐅᕝᕙᓗ ᐃᓅᓕᓚᐅᕐᐲᑦ ᖃᖅᑬᑦ ᓴᓇᔭᐅᓚᐅᕐᑎᓐᓇᒋᑦ?
8ᒎᑎᐅᑉ ᐋᖅᑭᒃᓱᕋᓱᐊᓕᕐᑕᖏᓐᓂᒃ ᑐᓵᓚᐅᕐᓯᒪᕖᑦ?
ᐃᓅᓪᓗ ᓯᓚᑐᓂᕆᔪᓐᓇᕐᑕᓕᒫᖏᓐᓂᒃ ᐱᓯᒪᔪᑑᕖᑦ?
9ᓱᓇᒥᒃ ᖃᐅᔨᒪᕖᑦ ᖃᐅᔨᒪᓐᖏᑕᑦᑎᓐᓂᒃ?
ᓱᓇᒥᒃ ᑐᑭᓯᓯᒪᕖᑦ ᑐᑭᓯᐅᒪᓐᖏᑕᑦᑎᓐᓂᒃ?
10ᐃᓕᑎᑕᐅᓯᒪᕗᒍᑦ ᖀᖃᓕᕐᑐᓄᑦ ᐃᓄᑐᖃᐅᓕᕐᑐᓄᓪᓗ,
ᐊᑖᑕᖕᓂᑦ ᐊᖓᔪᒃᓯᕐᓄᑦ ᓯᕗᓪᓕᐅᓯᒪᔪᓄᓪᓗ.
11ᒎᑎᐅᑉ ᒪᓂᒍᕐᓯᒪᕚᑎᑦ ᓱᖕᒪᓪᓕ ᐃᓕᖕᓄᑦ ᓱᓇᐅᓐᖏᓗᐊᕐᐸ?
ᐅᕝᕙᓗ ᐅᖃᐅᓰᑦ ᐃᓕᖕᓂᒃ ᓂᑲᒍᓱᓗᐊᕆᕕᒌᑦ?
12ᓱᖕᒪᑦ ᐆᒻᒪᑎᒃᑯᑦ ᐃᓱᒪᒋᔭᕕᑦ ᐊᐅᓚᑐᐃᓐᓇᓕᕐᐹᑎᑦ,
ᓱᖕᒪᓪᓗ ᓈᒻᒪᒃᓴᖏᓐᓂᕐᒧᑦ ᐃᔨᒃᑭᐅᒥᔭᒃᐱᑦ?
13ᒎᑎᒥᒃ ᐊᓂᕐᓂᒃᑯᑦ ᐊᑭᕋᕐᑐᓕᕐᐳᑎᑦ,
ᐅᖃᓪᓚᒡᕕᒋᓕᕐᓗᒍᓗ ᓈᒻᒪᒃᓴᖏᓐᓂᕆᔭᕐᓂᒃ?
14 #
ᔫᐱ 25:4-6. ᐃᓄᒃ ᓇᓪᓕᐊᑦ ᐊᔪᕐᓂᖃᖏᑦᓯᐊᕈᓐᓇᕐᐸ?
ᐅᕝᕙᓗ ᐊᕐᓇᒥᑦ ᐃᕐᓂᐊᖑᓯᒪᔪᖅ ᖃᓄᖅ ᐃᓱᐊᕐᑑᔪᓐᓇᕐᐸ?
15ᑕᑯᒋᑦ ᒎᑎᐅᑉ ᐂᖏᓕᖁᑎᓂ ᐊᒡᓛᑦ ᑕᑎᒋᔪᓐᓇᓚᐅᓐᖏᓔᑦ,
ᐊᒡᓛᑦ ᑖᑦᓱᒪ ᓵᖓᓂ ᕿᓔᑦ ᐃᑦᔪᕐᓁᑦᑑᓚᐅᖏᒻᒪᑕ.
16ᐃᓄᒃ ᐱᐅᖏᑦᑐᓕᓂᕐᒥᒃ ᐃᒥᖃᑦᑕᕐᐳᖅ ᐃᒥᐅᔮᕐᑎᓪᓗᒍ,
ᐄᓛᒃ, ᐃᓄᒃ ᓇᕐᕈᓇᕐᑐᐊᓘᕗᖅ; ᓱᓇᐅᖏᑦᓯᐊᕐᓗᓂᓗ.
17ᔫᐲ, ᓈᓚᓚᐅᓐᖓ; ᑕᑯᓯᒪᔭᓐᓂᒃ ᐅᓂᒃᑳᕐᑎᓪᓗᖓ.
18ᓯᓚᑐᔪᓄᑦ ᐊᔪᕆᕐᑐᕐᑕᐅᓯᒪᒐᒪ,
ᓯᕗᓕᕕᓂᕐᒥᖕᓄᑦ ᐅᖃᕐᕕᐅᓯᒪᒐᒥᒃ ᐊᓐᖏᒍᑦᔭᐅᓇᑎᒃ,
19ᑖᒃᑯᓄᖓᑐᐊᖅ ᓄᓇ ᑐᓂᔭᐅᓯᒪᓚᐅᕐᒪᑦ,
ᑕᕝᕙᓂᓗ ᓄᓇᖃᖏᑦᑐᓄᑦ ᐊᖅᑯᓵᕐᑕᐅᕙᓚᐅᕋᑎᒃ.
20ᐃᓄᒃ ᐱᐅᖏᑦᑐᓕᔪᖅ ᐃᓅᖃᑎᒥᓂᒃ ᐅᖁᒤᒃᓴᕐᑎᑦᓯᕙᒃᑐᖅ,
ᐋᓐᓂᐊᓇᕐᑐᒦᓐᓂᐊᕐᐳᖅ ᐃᓅᓯᓕᒫᓂ ᓈᓗᒍ.
21ᑲᑉᐱᐊᓱᐊᕙᓗᖕᒥᒃ ᓂᐱᒥᒃ ᑐᓵᕙᖕᓂᐊᕐᐳᖅ;
ᐃᓱᒫᓗᓇᕐᑐᖃᕐᑎᓐᓇᒍ ᐊᓯᕈᐃᔨᒧᑦ ᑎᑭᑕᐅᔪᒫᕐᐳᖅ.
22ᑖᕐᑐᒥᑦ ᐊᓂᔭᕆᐊᒃᓴᖅ ᐊᔪᓕᕐᐳᖅ,
ᓴᕕᒡᔪᐊᕐᓗ ᑐᖁᑦᓯᔪᒃᓴᖅ ᑖᑦᓱᒥᖓ ᐅᑕᖅᑭᕗᖅ.
23ᑎᖕᒥᐊᑦ ᑎᒥᕕᓂᕐᑐᓲᑦ ᐅᑕᖅᑭᕗᑦ ᓂᕆᔪᒪᒧᑦ,
ᓇᖕᒥᓂᕐᓗ ᖃᐅᔨᒪᕗᖅ ᓯᕗᓂᖓ ᑖᕐᑐᒦᒻᒪᑦ.
24ᐃᓱᒪᔮᕐᓂᖅ ᐃᓱᒫᓘᑎᖃᕐᓂᕐᓗ ᐅᖁᒤᒃᓴᕈᑎᒋᕚ,
ᐊᖓᔪᖅᑳᕐᔪᐊᑉ ᐅᓇᑕᕐᓂᕐᒧᑦ ᐸᕐᓇᖕᓂᖓᑐᑦ ᐱᓇᓱᐊᕐᑕᐅᕗᖅ.
25ᑍᒤᑦᑐᒦᑉᐳᖅ ᒎᑎᒥᒃ ᐊᒡᒐᖕᒥᓄᑦ ᐊᑭᕋᕐᑐᕐᓯᒪᓂᕐᒥᓄᑦ,
ᓵᓚᖃᕋᓱᐊᕐᓯᒪᓪᓗᓂᓗ ᐊᔪᒐᖃᖏᑦᑐᒥᒃ.
26ᓴᖑᑎᑕᐅᔪᓐᓇᕋᓂ ᓵᓐᖓᓚᐅᕐᒪᑦ ᓴᐴᓗᑕᓂ
ᑖᑦᓱᒧᖓ ᖁᒻᒧᐊᒃᑎᓪᓗᓂᐅᒃ;
27ᑍᒤᑦᑑᑉ ᑮᓇᓂ ᖁᐃᓂᓂᕐᒧᑦ ᐅᓕᒃᑕᐅᑎᓯᒪᕚ,
ᑎᒥᓂᓗ ᐅᕐᓱᒧᑦ ᐅᓕᒃᓯᒪᔭᐅᑎᓪᓗᒍ.
28ᑖᓐᓇᐅᕗᖅ ᐃᒡᓗᒐᓴᖕᓂᒃ ᓄᓇᑖᕐᓯᒪᔪᖅ ᓵᓚᖃᕐᓂᒃᑯᑦ,
ᐃᒡᓗᑖᕐᓯᒪᓪᓗᓂᓗ ᐃᓄᖏᓐᓂᑦ ᕿᒪᒃᑕᐅᓯᒪᔪᓂᒃ,
ᐃᒡᓗᐃᓪᓕ ᐃᒡᓗᒐᓮᓪᓗ ᓄᖑᑕᐅᔪᒫᕐᐳᑦ ᐊᓯᕈᕐᑕᐅᓂᕐᒧᑦ.
29ᑖᑦᓱᒪᓕ ᐊᔪᕐᓴᖏᓐᓂᖓ ᓄᖑᔪᒫᕐᐳᖅ ᐊᑯᓂᐅᖏᑦᑐᖅ,
ᐱᖁᑎᖏᓪᓗ ᓄᓇᕐᔪᐊᕐᒧᑦ ᓯᐊᒻᒪᕐᑎᑕᐅᓂᐊᕋᑎᒃ;
30ᑖᕐᑐᕐᔪᐊᒥᑦ ᐊᓂᔪᓐᓇᕐᓂᐊᓐᖏᓚᖅ,
ᓇᐹᕐᑐᑎᑐᑦ ᐊᕙᓚᖓᔪᖏᑦ ᐃᑯᐊᓪᓚᒃᓯᒪᔪᑎᑐᑦ ᑍᒤᑉᐳᖅ,
ᐱᕈᕐᑐᖏᓪᓗ ᐊᓄᕆᒧᑦ ᑎᒃᑕᐅᔪᒫᕐᐳᑦ.
31ᐃᒻᒥᓂᒃ ᓯᓔᕐᕆᓯᒪᕗᖅ; ᓱᓇᐅᖏᑦᑐᒥᒃ ᑕᑎᖃᕐᓯᒪᒐᒥ,
ᑖᓐᓇ ᓱᓇᐅᖏᑦᑐᒥᒃ ᐊᑭᓕᕐᑕᐅᑦᔪᑎᖃᕈᒪᕐᐳᖅ.
32ᐃᓅᓯᖓ ᓈᓚᐅᕐᑎᓐᓇᒍ ᐊᑭᓕᕐᑕᐅᔭᕇᕈᒫᕐᐳᖅ,
ᐱᕈᕐᑐᖏᓪᓗ ᐊᕙᓚᖓᔪᑦ ᑐᖑᔪᕐᓯᓂᐊᕋᑎᒃ.
33ᕔᓂᒃᓴᓕᒃᑎᑐᑦ ᐱᕈᕇᖏᑦᑐᓂᒃ ᑲᑕᒊᔪᑎᑐᑦ ᑍᒤᑉᐳᖅ,
ᓇᐹᕐᑐᑎᑐᓪᓗ ᐅᕐᓱᒃᓴᓂᒃ ᑲᑕᒊᔪᑎᑐᑦ ᑍᒤᓪᓗᓂ.
34ᒎᑎᖃᖏᑦᑐᑦ ᓇᔪᕐᑕᖏᑦ ᑭᖑᕚᒃᓴᖃᕐᓂᐊᓐᖏᓚᑦ,
ᐃᒡᓗᖏᑦ ᐃᑯᒪᒧᑦ ᓄᖑᑕᐅᔪᒫᕐᐳᑦ ᓯᓔᕐᕆᒃᓯᓂᒃᑯᑦ ᐱᓕᕆᓯᒪᔪᑦ.
35ᐊᑲᐅᖏᑦᑐᓕᓂᕐᒥᒃ ᓄᑕᕋᒃᓴᕐᑖᕋᒥᒃ ᐱᐅᖏᑦᑐᒥᒃ ᕿᑐᕐᖓᕐᑖᕐᐳᑦ;
ᐆᒻᒪᑎᖏᓪᓗ ᓯᓔᕐᕆᒃᓯᓂᕐᒥᒃ ᐅᐸᓗᖎᔧᓯᒪᓪᓗᑎᒃ.”
Currently Selected:
ᔫᐱᐅᑉ ᐊᒡᓚᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
