ᔫᐱᐅᑉ ᐊᒡᓚᖏᑦ 14
14
1“ᐃᓄᒃ ᐊᕐᓇᒥᑦ ᐃᕐᓂᐊᖑᓯᒪᔪᖅ ᐅᓪᓗᖃᕐᐳᖅ ᓁᑦᑐᓂᒃ,
ᐊᑲᐅᖏᑦᔪᑎᒃᓴᓂᒡᓗ ᑕᑕᓪᓗᓂ.
2ᐱᕈᕐᓯᐊᑎᑐᑦ ᐱᕈᕐᐳᖅ, ᑐᖁᓕᓗᓂᓗ;
ᑕᕐᕋᑎᑐᑦ ᕿᒫᕗᖅ, ᐱᑕᖃᕈᓐᓁᕐᓗᓂᓗ.
3ᒎᑏ, ᓱᖕᒪᑦ ᑍᒤᑦᑐᒥᒃ ᑕᑯᓐᓇᕋᓱᐊᕐᐱᑦ?
ᓵᖕᓄᐊᕐᑎᑉᐱᐅᒃ ᐃᖅᑲᕐᑐᕈᒪᓪᓗᒎ?
4ᑭᓇ ᓴᓗᒪᔪᒥᒃ ᓴᖅᑭᑎᑦᓯᔪᓐᓇᕐᐹ ᓴᓗᒪᖏᑦᑐᒥᑦ?
ᐃᓄᓕᒫᑦ ᐃᑦᔪᕐᓁᑦᑐᖃᖏᒻᒪᑕ.
5ᐃᓅᓯᖓᑕ ᑕᑭᓂᒃᓴᖓ ᓯᕗᓂᖓᒍᑦ ᐋᖅᑭᒃᓱᕐᑕᐅᔭᕇᕐᓯᒪᕗᖅ,
ᑕᖅᑮᓪᓗ ᐃᓅᕕᒋᓂᐊᕐᑕᖏᑦ ᐃᓕᖕᓃᑉᐳᑦ,
ᑕᒪᓐᓇ ᐋᖅᑭᒃᓱᕇᕐᓯᒪᒐᕕᐅᒃ ᑭᓇᒧᓪᓘᓐᓃᑦ ᐊᓯᑦᔨᕐᑕᐅᔪᓐᓇᓐᖏᓚᖅ.
6ᐃᓄᒃ ᑕᑯᓐᓇᕈᓐᓁᕈᒃ, ᓱᖁᑎᒋᔪᓐᓁᑬᓐᓇᕐᓗᒍᓗ,
ᖁᕕᐊᒋᔭᒥᓂᒃ ᐃᓅᑬᓐᓇᖁᓪᓗᒍ, ᐃᓅᓯᕐᒥᓂ ᐃᓅᑬᓐᓇᕐᓂᕐᒥᓂ.
7ᓇᐹᕐᑐᖅ ᓱᓕ ᐊᑐᕈᓐᓇᕐᐳᖅ ᓇᑲᑕᐅᓯᒪᓕᕐᓗᓂ;
ᐆᒻᒪᕈᒃᑲᓐᓂᕐᓗᓂ ᐆᒻᒪᕈᓐᓇᕐᒪᑦ ᐱᕈᕐᕕᐅᓕᕐᓗᓂᓗ.
8ᐊᒫᖏᑦ ᐱᑐᖃᐅᓕᕋᓗᐊᕐᓗᑎᒃ ᓄᓇᐅᑉ ᐃᓗᐊᓃᑦᑐᑦ,
ᓇᑲᑕᐅᓂᕕᓂᖓᑕᓗ ᐃᓂᕕᓂᖓ ᑐᖁᖓᓕᕋᓗᐊᕐᑎᓪᓗᒍ.
9ᐃᒫᓃᓕᕈᓂᓕ ᐊᒫᕐᑖᓕᕈᓐᓇᕐᐳᖅ
ᐊᕙᓚᖓᔪᕐᑖᓕᕐᓗᓂᓗ ᐱᕈᕐᑎᑦᓯᓕᕋᔭᕐᐳᖅ.
10ᐃᓄᒡᓕ ᑐᖁᒍᓂ, ᑕᕝᕙ ᐃᓱᓕᑉᐳᖅ;
ᐃᓄᒃ ᐊᓂᕐᓂᖃᕈᓐᓁᕈᓂ, ᑍᒪ ᓇᒧᓐᖓᕐᐸ?
11ᑰᒃᑎᑐᑦ ᑕᓯᕐᒥᑦ ᑰᒎᓐᓃᕐᑐᑎᑐᑦ,
ᑕᓯᕐᑎᑐᓪᓗ ᐃᒪᖃᕈᓐᓁᕐᑐᑎᑐᑦ ᐸᓂᕐᓯᒪᓕᕐᑐᑎᑐᑦ,
12ᐃᓄᐃᑦ ᑐᖁᖃᑦᑕᕐᐳᑦ, ᒪᑭᓐᓂᐊᕈᓐᓁᕐᓗᑎᒃ;
ᓯᓚᖃᕐᓂᓕᒫᖓᓂ ᑐᐸᖕᓂᐊᕈᓐᓁᕐᓗᑎᒃ,
ᐅᕝᕙᓗ ᑐᐹᕐᑕᐅᓂᐊᕈᓐᓁᕐᓗᑎᒃ ᓯᓂᖕᓂᕐᒥᖕᓂᑦ.
13ᑕᕝᕙᑐᖅ ᐃᔨᕐᓯᒪᑎᓚᐅᓐᖓ ᑐᖁᖓᔪᑦ ᓄᓇᖓᓂ;
ᑕᕝᕙᓂᓗ ᐃᔨᕐᓯᒪᑎᓪᓗᖓ ᓂᓐᖓᐅᒪᓃᑦ ᐊᓂᒍᓚᐅᖏᓐᓂᖓᓂ,
ᐱᕕᒃᓴᒥᒡᓗ ᐋᖅᑭᒃᓯᓗᑎᑦ, ᐃᖅᑲᕐᑕᐅᔪᓐᓇᖁᓪᓗᖓ ᓈᒻᒪᒃᓯᒃᐸᑦ.
14ᐃᓄᒃ ᑐᖁᒍᓂ, ᑭᖑᓂᖓᒍᑦ ᐃᓅᓕᒃᑲᓐᓂᕈᓐᓇᕐᐹ?
ᐅᑕᖅᑭᔪᒪᖔᕐᐳᖓᓕ ᐅᓪᓗᓂᒃ ᐱᐅᓂᕐᓴᐅᓕᕐᓂᐊᕐᑐᓂᒃ,
ᑕᒪᓐᓇ ᐊᓂᒍᕐᓯᐊᕆᓗᒍ.
15ᐅᕙᓐᓄᑦ ᓂᓪᓕᐊᓕᕈᕕᑦ, ᑭᐅᓂᐊᕐᐸᒋᑦ,
ᕿᓚᓈᕆᓕᕐᓂᐊᕐᐸᕐᒪᓗ, ᓴᓇᓯᒪᒐᕕᖓ.
16ᑕᕝᕙ ᐊᐅᓚᓂᕆᔭᓕᒫᒃᑲ ᖃᐅᔨᓴᕈᓐᓇᕐᓂᐊᕐᐸᑎᑦ,
ᐊᔪᕐᓂᓐᓂᒡᓕ ᖃᐅᔨᓴᑦᓮᓐᓇᕐᑐᒃᓴᐅᓐᖏᓚᑎᑦ.
17ᐱᐅᖏᑦᑐᓕᓂᒃᑲ ᐃᒃᐱᐊᕐᔪᖕᒧᑦ ᐴᕐᓯᒪᔪᒃᓴᐅᕗᑦ,
ᐊᔪᕐᑐᓕᓂᒃᑲᓗ ᒪᑦᑐᑎᔭᒃᓴᕆᕙᑎᑦ.
18ᖃᖅᑬᑦᑕᐅᖅ ᓯᖁᒥᑦᓱᒫᕐᐳᑦ ᐊᓯᐅᓗᑎᒡᓗ,
ᕾᕐᓱᐃᓪᓗ ᐃᓂᖕᒥᖕᓂᑦ ᐊᐅᓚᑕᐅᔪᒫᕆᕗᑦ;
19ᐃᒪᕐᒧᑦ ᐅᔭᕅᑦ ᓄᖑᑕᐅᔪᓐᓇᕐᐳᑦ;
ᓯᓚᓗᒡᔪᐊᓕᕐᐸᓪᓗ ᑰᖕᒧᑦ ᐃᑦᔪᖅ ᓄᖑᑕᐅᔪᓐᓇᕐᐳᖅ;
ᑍᒫᒃᑕᐅᖅ ᐃᓅᑉ ᓂᕆᐅᖕᓂᖓ ᓄᖑᑎᓯᒪᕙᑦ.
20ᐃᓄᒃ ᓵᓚᒋᓪᓗᒍ ᐊᓯᐅᑎᓯᒪᕙᑦ ᐃᓱᖃᖏᑦᑐᒧᑦ;
ᑮᓇᖓᑕᓗ ᑕᑯᒃᓴᐅᓂᖓ ᐊᓯᑦᔨᕐᐸᑦ, ᐊᐅᓪᓚᕐᑎᓪᓗᒍᓗ.
21ᑖᑦᓱᒪ ᐃᕐᓂᖏᑦ ᐅᐱᓐᓇᕐᑎᑕᐅᕗᑦ, ᑖᑦᓱᒪᓕ ᖃᐅᔨᓐᖏᓛ;
ᐅᖃᐅᑦᔭᐅᓯᒪᓐᖏᓚᓪᓗ ᑲᓐᖑᓇᕐᑐᒦᑎᑕᐅᓂᕐᒥᖕᓂᒃ.
22ᑎᒥᒥᒍᓪᓕ ᐋᓐᓂᐊᓂᕐᒥᓂᒃ ᐃᒃᐱᒋᒐᓗᐊᕐᐳᖅ,
ᐃᒻᒥᓂᒡᓗ ᓇᖕᒥᓂᑐᐊᖅ ᕿᒃᓵᒍᑎᒋᓪᓗᓂ.”
Currently Selected:
ᔫᐱᐅᑉ ᐊᒡᓚᖏᑦ 14: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
