ᔫᐱᐅᑉ ᐊᒡᓚᖏᑦ 12
12
ᔫᐱ
1ᑕᕝᕙ ᔫᐱ ᑭᐅᕗᖅ:
2“ᖁᓚᕐᓇᓐᖏᓚᖅ ᐃᓄᖕᓂᑦ ᐱᓪᓚᕆᖁᑕᐅᒐᕕᑦ,
ᑐᖁᒍᕕᓪᓕ, ᓯᓚᑐᓂᖅ ᑐᖁᖃᑕᐅᓂᐊᕆᕗᖅ.
3ᖃᐅᔨᒪᔭᕐᓂᒡᓕ ᖃᐅᔨᒪᒋᕗᖓ;
ᐃᓕᖕᓂᓪᓗ ᖃᐅᔨᒪᖏᓐᓂᕐᓴᐅᓇᖓ.
ᐅᖃᐅᓯᕆᔭᑎᓪᓗ ᖃᐅᔨᒪᔭᐅᓪᓗᑎᒃ ᐃᓘᓐᓁᓐᓄᑦ.
4ᒫᓐᓇᓕ ᐊᒡᓛᑦ ᐱᖃᓐᓇᕆᔭᓐᓄᑦ ᐃᔪᕿᑕᐅᑕᐅᓕᕐᐳᖓ;
ᓱᓕᓕ ᑐᒃᓯᐊᕐᓂᒃᑲ ᒎᑎᐅᑉ ᑐᓴᖃᑦᑕᕐᐰᑦ,
ᓇᓛᒎᑦᓯᐊᕐᑎᓪᓗᖓ ᐸᓯᔭᒃᓴᐅᑎᓐᓇᖓᓗ, ᐃᔪᕿᑕᒍᑕᐅᕗᖓ.
5ᐊᑲᐅᓐᖏᓕᐅᕈᑎᖃᓐᖏᓐᓇᑦᓯᓕ ᐅᕙᓐᓂᒃ ᒥᑕᐅᑎᖃᕐᐳᓯ;
ᓱᓕᓕ ᐊᖑᒻᒥᒃ ᐋᓐᓂᕐᓯᕆᕗᓯ ᐅᕐᕈᓕᒑᓕᕐᑐᒥᒃ.
6ᑎᒡᓕᒃᑏᑦ ᒎᑎᖃᖏᑦᑐᓪᓗ ᐃᓱᒫᓗᓇᖏᑦᓯᐊᕐᑐᒃᑯᑦ ᐃᓅᕗᑦ,
ᓇᖕᒥᓂᖅ ᐱᔪᓐᓇᕐᓂᕐᒥᖕᓂᒃ ᒎᑎᑐᐊᖃᕐᑐᑦ.
7ᐆᒪᔪᑦ ᐊᐱᕆᒍᕕᒋᑦ, ᑖᒃᑯᓇᓐᖓᑦ ᐃᓕᓐᓂᐊᕐᑎᑕᐅᔪᓐᓇᕐᐳᑎᑦ;
ᑎᖕᒥᐊᓄᓪᓗ ᖃᖓᑕᕙᒃᑐᓄᑦ, ᑖᒃᑯᓄᖓᑦ ᐅᖃᐅᑦᔭᐅᔪᓐᓇᕐᐳᑎᑦ;
8ᐅᕝᕙᓗ ᓄᓇᒥ ᐱᕈᕐᑐᓄᑦ, ᐃᓕᓐᓂᐊᕐᑎᑕᐅᔪᓐᓇᕐᐳᑎᑦ;
ᐃᒪᕐᒥᐅᑕᓄᓪᓗ ᐃᖃᓗᖕᓄᑦ ᐅᖃᐅᑎᔭᐅᔪᓐᓇᕐᐳᑎᑦ.
9ᑕᒪᒃᑯᐊᓕᒫᑦ ᖃᐅᔨᒪᕗᑦ ᐊᑕᓂᐅᑉ
ᐊᒡᒐᖏᓐᓄᑦ ᓴᓇᔭᐅᓯᒪᓂᕐᒥᖕᓂᒃ.
10ᑖᓐᓇ ᐱᓐᖑᕐᑎᓯᒪᔭᓕᒫᒥ ᐃᓅᓯᖏᓐᓂᒃ ᐊᐅᓚᑦᓯᕗᖅ;
ᐊᓂᕐᓂᖃᕐᑐᓕᒫᑦ ᐃᓅᓯᖏᑦ ᑖᑦᓱᒪ ᐱᔪᓐᓇᕐᓂᖓᓃᑉᐳᑦ.
11ᐅᖃᕐᓄᑦ ᓂᕿᐅᑉ ᒪᒪᕐᓂᖓᓂᒃ ᖃᐅᔨᕙᒃᑲᕕᑦ,
ᓯᐅᑏᒃᑭᒃᑕᐅᖅ ᐅᖃᐅᓯᕐᓂᒃ ᑐᓵᔭᕆᐊᒃᓴᖅ ᖁᕕᐊᓱᒃᑭᕘᒃ.
12ᐃᓄᑐᕾᑦ ᓯᓚᑐᓂᖃᕐᐳᑦ,
ᖃᐅᔨᒪᓂᖃᕐᓗᑎᒡᓗ ᐊᑯᓂ ᐃᓅᓯᒪᓂᕐᒥᖕᓄᑦ.
13ᒎᑎᓕ ᓯᓚᑐᓂᖃᕐᐳᖅ ᐱᔪᓐᓇᕐᓂᖃᕐᓗᓂᓗ;
ᑖᑦᓱᒪ ᐃᓕᓯᒪᓂᖅ ᑐᑭᓯᒪᓂᕐᓗ ᐱᒋᖕᒪᒋᑦ.
14ᒎᑎ ᓯᖁᑦᑎᕆᒃᐸᑦ, ᓇᓪᓕᐊᓐᓄᑦ ᓴᓇᔭᐅᒃᑲᓐᓂᕈᓐᓇᓐᖏᓚᖅ;
ᐃᓄᒡᓗ ᐊᑦᓱᖏᐅᑎᒃᐸᒍ, ᑭᓇᒧᓪᓘᓐᓃᑦ ᐊᓂᑎᑕᐅᔪᓐᓇᓐᖏᓚᖅ.
15ᒎᑎ ᓯᓚᓗᒃᑎᑦᓯᔪᓐᓁᕐᐸᑦ, ᑕᕝᕙ ᓄᓇ ᐸᓂᕐᐳᖅ;
ᐃᒪᕐᒥᒡᓕ ᒪᑐᐃᕐᓯᑐᐊᕐᐸᑦ, ᓄᓇ ᐊᑕᖏᕐᓗᓂ ᖄᒥᑉᐳᖅ.
16ᑖᑦᓱᒪᓂ ᐱᔪᓐᓇᕐᓂᕐᑕᖃᕐᐳᖅ ᓯᓚᑐᓂᕐᑕᖃᕐᓗᓂᓗ;
ᑕᒻᒪᕐᑎᑕᐅᔪᑦ ᑕᒻᒪᕐᑎᑦᓯᔪᓪᓗ ᑖᑦᓱᒪ ᐱᔪᓐᓇᕐᓂᖓᓃᑉᐳᑦ.
17ᑖᑦᓱᒪ ᓯᓚᑐᔪᑦ ᓯᓚᑐᓂᖃᕈᓐᓁᕐᑎᑉᐰᑦ,
ᐃᖅᑲᕐᑐᐃᔩᓪᓗ ᓯᓔᑦᑐᑎᑐᑦ ᐱᓇᓱᐊᕐᑎᓪᓗᒋᑦ.
18ᐊᖓᔪᖅᑳᕐᔪᐊᑦ ᕿᓚᒃᓱᕐᓯᒪᔭᖏᑦ ᐲᕐᑎᑉᐰᑦ,
ᕿᑎᖏᑎᒍᓪᓗ ᕿᓚᒃᓯᒪᔭᐅᓕᕐᓗᑎᒃ ᑎᒍᔭᐅᑎᑉᐰᑦ.
19ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᕕᖏᓐᓂᑦ ᐊᐅᓪᓚᕈᑦᔭᐅᑎᑉᐰᑦ,
ᐱᔪᓐᓇᕐᓂᕐᔪᐊᖃᕐᑐᓪᓗ ᓵᓚᒋᓪᓗᒋᑦ ᐊᕐᓵᕐᐰᑦ.
20ᐅᒃᐱᕆᔭᐅᑦᓯᐊᕐᑐᑦ ᐅᖃᓪᓚᒍᓐᓁᓪᓕᑎᑉᐰᑦ,
ᐃᓄᑐᕾᓪᓗ ᖃᐅᔨᒪᓂᖏᑦ ᐲᕐᑎᑉᐰᑦ.
21ᐊᖓᔪᖅᑳᑦ ᑲᓐᖑᓇᕐᑐᒦᑎᑉᐰᑦ,
ᐊᐅᓚᑦᓯᔩᓪᓗ ᐱᔪᓐᓇᕐᓂᖏᑦ ᓄᖑᑎᓪᓗᒋᑦ.
22ᐃᑎᔪᒦᑦᑐᑦ ᑖᕐᑐᕐᔪᐊᕐᒥ ᒪᑐᐃᕈᑎᕔᑦ;
ᑖᕐᑐᕐᔪᐊᒦᑦᑐᑦ ᖃᐅᒪᔪᒧᑦ ᖃᐅᒻᒥᑕᐅᑎᓪᓗᒋᑦ.
23ᐃᓅᖃᑎᒌᒡᔪᐊᑦ ᐃᓄᒐᓴᒡᔪᐊᕈᕐᑎᑉᐰᑦ, ᑭᖑᓂᖓᒍᓪᓗ ᓄᖑᑎᑉᐰᑦ;
ᐃᓄᒋᐊᒃᑐᕐᔪᐊᓐᖑᕐᑎᑦᓯᓚᐅᕐᓗᓂ, ᐊᐅᓪᓚᕐᑎᑦᓯᕙᒃᑭᕗᖅ.
24ᓄᓇᕐᔪᐊᕐᒥᐅᑦ ᐊᖓᔪᖅᑳᖏᑕ ᑐᑭᓯᓯᒪᓂᖏᑦ ᐲᔭᕐᐰᑦ,
ᓇᓗᓕᕐᑎᓪᓗᒋᓪᓗ ᐃᓄᖃᖏᑦᑐᒥ ᐊᓯᐅᑎᑉᐰᑦ.
25ᑖᕐᑐᒥ ᑲᑎᓐᖓᓪᓗᑎᒃ ᖃᐅᒪᖃᖏᑦᑐᒦᑉᐳᑦ;
ᑕᕝᕙᓂᓗ ᐅᕐᕈᔮᕐᑎᑉᐰᑦ ᐋᖓᔮᕐᑐᑎᑐᑦ.”
Currently Selected:
ᔫᐱᐅᑉ ᐊᒡᓚᖏᑦ 12: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
