ᔫᐱᐅᑉ ᐊᒡᓚᖏᑦ 11
11
ᔪᐸᕆ
1ᑕᕝᕙ ᔪᐸᕆ ᓁᒪᑍᑎᒥᐅᖅ ᑭᐅᕗᖅ:
2“ᒪᑯᐊ ᐅᖃᐅᓯᐅᔪᓕᒫᑦ ᑭᐅᔭᐅᔪᓐᓇᓐᖏᓚᑦ,
ᐃᓄᒃ ᐅᖃᓪᓚᒃᑐᐊᓘᓗᓂ ᐃᒻᒥᓂᒃ ᐱᐅᓯᑎᑦᓱᓐᓇᕐᐹ?
3ᑕᒪᒃᑯᓄᖓ ᐅᖃᐅᓯᕐᓄᑦ ᑭᐅᔪᓐᓇᕋᓱᒋᓐᖏᓚᑦᑎᒎᑦ?
ᒪᑯᐊ ᒥᑕᐅᑎᖃᕐᓂᑎᑦ ᑲᓐᖑᓱᒃᑎᑕᐅᑦᑍᓕᑦᔪᑎᒋᔭᑏᑦ?
4ᐅᖃᖅᑲᐅᒐᕕᑦ, ᐅᖃᐅᓯᕆᔭᑎᑦ ᓱᓕᓂᕋᕐᓗᒋᑦ,
ᐅᖃᕐᓗᑎᓪᓗ ᒎᑎᐅᑉ ᓵᖓᓂ ᐸᓯᔭᒃᓴᐅᖏᓐᓂᕋᕐᓗᑎᑦ.
5ᑍᒪᑐᖅ ᒎᑎ ᓇᖕᒥᓂᖅ ᐅᖃᓪᓚᓚᐅᕐᓕ,
ᓇᖕᒥᓂᖅ ᖃᓂᕐᒥᓄᑦ ᐅᖃᓪᓚᒡᕕᒋᓗᑎᑦ,
6ᑖᑦᓱᒪ ᐅᖃᐅᑎᔪᓐᓇᕋᔭᕐᒪᑎᑦ ᓯᓚᑐᓂᖓᑕ ᐃᔨᕐᓯᒪᔭᖏᓐᓂᒃ!
ᐃᓚᖏᑦ ᐃᓄᑐᐃᓐᓇᕐᒧᑦ ᑐᑭᓯᔭᐅᔭᕆᐊᖏᑦ ᐃᑎᓗᐊᕐᒪᑕ.
ᒎᑎᐅᓪᓕ ᓱᒋᐊᕐᓯᒪᕚᑎᑦ ᓱᒋᐊᕐᑕᐅᔭᕆᐊᖃᕐᓂᕐᐱᑦ ᒥᒃᓯᑦᑎᓐᓃᑦᑐᒧᑦ.
7ᖃᐅᔨᔪᓐᓇᕋᓱᒋᕖᑦ ᒎᑎᐅᑉ ᖃᐅᔨᒪᓂᕐᔪᐊᖓᓂᒃ?
ᐊᔪᒐᖃᖏᑦᑐᕐᔪᐊᖑᓂᖓᓗ ᐃᓱᓕᓪᓗᒍ ᖃᐅᔨᔪᓐᓇᕋᓱᒋᕕᐅᒃ?
8ᕿᓚᖕᒥᑦ ᖁᕝᕙᓯᖕᓂᕐᓴᐅᕗᖅ, ᖃᓄᐃᓕᐅᕈᓐᓇᕐᐱᓪᓕ?
ᐃᑎᓂᕐᓴᐅᕗᖅ ᑐᖁᖓᔪᑦ ᐃᓂᖓᓂᑦ, ᖃᓄᕐᓕ ᖃᐅᔨᔪᓐᓇᕐᐱᑦ?
9ᐊᖏᔪᕐᔪᐊᖑᓂᖓ ᓄᓇᕐᔪᐊᕐᒥᑦ ᐊᖏᓂᕐᓴᐅᕗᖅ,
ᐃᒪᕕᖕᒥᓪᓗ ᑕᕆᐅᒥᑦ ᓯᓕᖕᓂᕐᓴᐅᓪᓗᓂ.
10ᒎᑎᐅᑉ ᑎᒍᓗᓂᑎᑦ, ᐃᖅᑲᕐᑐᒐᒃᓴᓕᐊᕆᒃᐸᑎᑦ,
ᑭᓇᒧᓪᓕ ᐊᒡᕕᐊᕐᑕᐅᔪᓐᓇᕋᔭᕐᐹ?
11ᐃᓄᐃᑦ ᖃᐅᔨᒪᕔᑦ ᓇᓪᓕᖏᑦ ᐊᑑᑎᒃᓴᖃᖏᒻᒪᖔᑕ;
ᐱᐅᖏᑦᑐᓕᓂᖏᑦ ᑕᑯᓐᓇᕐᒪᒋᑦ, ᑕᒪᓐᓇᓕ ᐃᓱᒪᒋᔪᓐᓇᓐᖏᓚᐅᒃ?
12ᐊᖑᑦ ᓯᓔᑦᑐᖅ ᓯᓚᑦᑐᕈᓐᓇᕐᐳᖅ,
ᓯᐅᑎᖅᑯᕐᑐᔫᑉ ᓄᔪᐊᕐᑑᑉ ᐃᓕᓐᓂᐊᕐᑎᑕᐅᔪᓐᓇᕐᓂᖓᑐᑦ.
13ᐃᓱᒪᑖᑦᓯᐊᕈᕕᑦ ᐆᒻᒪᑎᒃᑯᑦ, ᒎᑎᒧᑦ ᐃᓴᒻᒥᓕᕐᓂᐊᕐᐳᑎᑦ.
14ᐱᐅᖏᑦᑐᓕᓯᒪᒍᕕᑦ, ᐃᒡᓗᖕᓂᑦ ᐲᔭᓚᐅᒃᑭᑦ,
ᐱᐅᖏᑦᑐᓕᓂᕐᓗ ᐃᓕᖕᓂ ᐃᓂᖃᕈᓐᓃᕐᑎᓪᓗᒍ.
15ᑕᕝᕙ ᒪᑭᑕᑦᓯᐊᕈᓐᓇᕐᓯᓂᐊᕆᕗᑎᑦ ᑲᓐᖑᓲᑎᖃᖏᓪᓗᑎᑦ,
ᒪᕐᕈᒍᓯᖏᑦᓯᐊᕐᓗᑎᑦ, ᓯᕘᕋᖏᓪᓗᑎᓪᓗ.
16ᑕᕝᕙ ᖁᕕᐊᓇᖏᑦᑐᒃᑰᕐᓂᕆᓯᒪᔭᑎᑦ ᐃᖅᑲᐅᒪᔪᓐᓁᕐᓂᐊᕐᐸᑎᑦ,
ᐅᓕᕕᒃᔪᐊᖅ ᐊᓂᒍᕐᓯᒪᓕᕐᒪᑦ ᐃᖅᑲᐅᒪᔭᐅᔪᓐᓁᕐᓯᒪᓂᖓᑐᑦ.
17ᐃᓅᓰᓪᓗ ᖃᐅᒪᓯᐅᓕᕐᓂᐊᕐᐳᖅ ᐅᓪᓗᓪᓗᐊᑉ ᖃᐅᒪᓂᖓᑐᑦ,
ᑖᕐᓯᐅᕐᓂᕐᓗ ᖃᐅᒻᒪᓕᕐᓗᓂ ᐅᓪᓛᒃᑯᑦ ᖃᐅᕙᓪᓕᐊᔪᑎᑐᑦ.
18ᖁᓚᖏᑦᓯᐊᓕᕐᓂᐊᕐᐳᑎᑦ, ᓂᕆᐅᖕᓂᖃᕐᓗᑎᓪᓗ;
ᓴᐳᑦᔭᐅᓯᒪᓂᐊᕐᐳᑎᑦ ᐃᓱᒫᓗᖏᓪᓗᑎᓪᓗ ᐃᓂᓪᓚᖓᑦᓯᐊᕐᓂᐊᕐᐳᑎᑦ.
19ᓯᓂᒐᓱᐊᓕᕋᔭᕐᐳᑎᑦ, ᓱᓇᒥᒡᓘᓐᓃᑦ ᓯᕘᕋᖏᓪᓗᑎᑦ;
ᐅᓄᕐᑐᓄᓪᓗ ᐅᐱᒋᔭᐅᑦᓯᐊᕐᓗᑎᑦ.
20ᐱᐅᖏᑦᑐᓕᔪᓪᓕ ᐃᔨᖏᑦ ᑕᑯᓂᐊᓐᖏᓚᑦ;
ᐊᓐᓇᒡᕕᒃᓴᒥᓂᒡᓗ ᓇᒡᕚᕐᓂᐊᓐᖏᓚᑦ,
ᓂᕆᐅᒋᔭᒃᓴᑐᐊᕆᓕᕐᓂᐊᕐᐹᑦ ᑐᖁᔪᒫᕐᓂᑎᒃ.”
Currently Selected:
ᔫᐱᐅᑉ ᐊᒡᓚᖏᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
