ᔨᕆᒤᐊᐅᑉ ᐊᒡᓚᖏᑦ 7
7
ᔨᕆᒤᐅᑉ ᐊᔪᕆᕐᑐᐃᓂᖓ ᑐᒃᓯᐊᕐᕕᒡᔪᐊᕐᒥ
1ᔨᕆᒤᐊ ᐅᖃᐅᓯᒃᓴᕐᑖᕐᑎᑕᐅᓚᐅᕐᐳᖅ ᐊᑕᓂᕐᒥᑦ. 2ᐊᑕᓂᐅᑉ ᐃᒡᓗᖓᑕ ᐃᑎᕐᑕᕐᕕᖓᓃᓪᓗᑎᑦ ᐅᖃᐅᓯᕆᔭᐅᖁᔭᒃᑲ ᐅᖃᒃᑭᑦ: “ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ, ᔫᑕᒥᐅᑕᐅᔪᓯ ᑐᒃᓯᐊᕐᕕᒡᔪᐊᕐᒧᑦ ᑐᒃᓯᐊᕆᐊᕐᑐᕐᐸᒃᑐᓯ ᐅᕘᓇ ᐃᑎᕐᑕᕐᕕᒃᑯᑦ. 3ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᓕᖅᑯᓯᕆᔭᓯ ᐱᓂᐊᕐᓂᕆᔭᓯᓗ ᐋᖅᑭᒋᐊᕐᑕᒃᓴᕆᕙᓯ ᓄᓇᖃᕈᒪᒍᑦᓯ ᑕᒫᓂ. 4ᐅᖃᐅᓯᑦᓯᓐᓄᑦ ᓯᓔᕐᕆᔭᐅᑦᑍᓕᒋᑦᓯ ᐅᖃᓕᕌᖓᑦᓯ, ‘ᐊᑕᓂᐅᑉ ᐅᓇ ᑐᒃᓯᐊᕐᕕᒃᔪᐊᖁᑎᖓ, ᐊᑕᓂᐅᑉ ᑕᕝᕙ ᑐᒃᓯᐊᕐᕕᒡᔪᐊᖁᑎᖓ, ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓ!’ 5ᐃᓕᖅᑯᓯᕆᔭᑦᓯᓐᓂᒃ ᐱᓂᐊᕐᓂᕆᔭᑦᓯᓐᓂᒡᓗ ᐋᖅᑭᒋᐊᓪᓚᕆᖕᓂᐊᕈᑦᓯ, ᐃᓅᖃᑎᑦᓯᓐᓄᓪᓗ ᓈᒻᒪᑦᓯᐊᕐᑐᒥᒃ ᐱᓂᐊᕐᓂᖃᕐᓗᓯ, 6ᐅᖁᒤᒃᓴᕐᑎᑦᓯᖏᓪᓗᓯᓗ ᐃᓅᖃᑎᑐᖃᕆᓐᖏᑕᑦᓯᓐᓂᒃ, ᐃᓕᐊᕐᔪᖕᓂᒃ, ᐅᐃᒡᒐᕐᓂᕐᓂᒡᓗ ᐸᓯᔭᒃᓴᐅᖏᑦᑐᓂᒡᓗ ᑐᖁᑕᐅᑎᑦᓯᕙᖏᓪᓗᓯ, ᒎᑎᓐᖑᐊᓂᒡᓗ ᒪᓕᒐᖃᕐᓂᑦᓯᓐᓄᑦ ᓇᖕᒥᓂᖅ ᓱᕋᒍᑎᒋᕙᖕᓂᐊᖏᓐᓇᑦᓯᐅᒃ. 7ᑕᕝᕙ ᓄᓇᖃᕐᑎᑦᓱᓐᓇᕋᔭᕐᐸᑦᓯ ᑕᒫᓂ, ᓯᕗᓕᕕᓂᑦᓯᓐᓄᑦ ᓄᓇᑖᕆᔭᐅᑎᓚᐅᕐᑕᕋ ᓄᓇᒋᔭᐅᖏᓐᓇᖁᓪᓗᒍ ᐃᓱᖃᖏᑦᑐᒧᑦ. 8ᑕᑯᒋᑦ! ᓱᓕᖏᑦᑐᓂᒃ ᐅᖃᐅᓯᕐᓂᒃ ᐅᒃᐱᕆᔭᖃᓗᐊᓕᕋᑦᓯ ᐃᑲᔫᑎᖏᑦᑐᓂᒃ. 9ᑎᒡᓕᖃᑦᑕᕐᓂᐊᕐᐱᓰ? ᐃᓄᐊᕐᐸᒡᓗᓯᓗ, ᐊᓯᓐᓂᐊᕐᐸᒡᓗᓯᓗ ᐊᖏᕈᑎᒋᔭᕕᓂᑦᓯᓐᓂᒡᓗ ᐱᔮᖅᑯᒥᒃ ᐊᑐᕈᓐᓃᕐᐸᒡᓗᓯ, ᒎᑎᓐᖑᐊᒧᓪᓗ ᐰᓕᒧᑦ ᑐᓂᕐᕈᓯᕐᐸᒡᓗᓯ, ᒎᑎᓐᖑᐊᓂᒡᓗ ᒪᓕᓕᕐᐸᒡᓗᓯ ᖃᐅᔨᒪᓚᐅᓐᖏᑕᑦᓯᓐᓄᑦ. 10ᐊᒻᒪ ᑐᒃᓯᐊᕐᕕᖁᑎᑦᓯᓐᓄᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᐃᑎᕌᖓᑦᓯ ᐅᖃᓕᕐᐸᖕᒥᓗᓯ ‘ᐅᕙᓂ ᓴᐳᑦᔭᐅᓂᐊᕐᐳᒍᑦ.’ ᓴᐳᑎᔭᐅᓯᒪᓂᐊᕐᐱᓰ? ᑕᒪᒃᑯᓂᖓ ᓈᒻᒪᖏᑦᑐᐊᓗᖕᓂᒃ ᐱᓇᓱᐊᕐᑎᓪᓗᓯ? 11#ᒫᑎᐅᓯ 21:13; ᒫᑯᓯ 11:17; ᓘᑲᓯ 19:46.ᐃᒡᓗᖁᑎᒐ ᐊᑎᓐᓂᒃ ᓇᓗᓁᒃᑯᑕᖃᕐᑐᖅ, ᐃᒡᓗᒋᔭᐅᓕᕐᑎᑉᐱᓯᐅᒃ ᑎᒡᓕᒃᑎᓄᑦ? ᑕᑯᒋᑦ ᐅᕙᖓ ᓇᖕᒥᓂᖅ ᑕᑯᓯᒪᕙᕋ, ᐊᑕᓂᖅ ᐅᖃᕐᐳᖅ. 12#ᔮᓱᐊ 18:1; ᐃᓐᖏᕈᑦ 78:60; ᔨᕆᒤᐊ 26:6.ᐂᓕᕆᑦ ᓮᓗᐊᒦᑦᑐᒧᑦ ᑐᒃᓯᐊᕐᕕᐅᒋᐊᕐᖓᓚᐅᕐᑐᒧᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ, ᑕᑯᓗᑎᓪᓗ ᖃᓄᐃᓕᓐᓂᕐᒪᖔᒃᑯ ᐃᓄᖁᑎᒪ ᐱᐅᖏᑦᑐᓕᓂᖏᑦ ᐱᓪᓗᒋᑦ. 13ᑕᒪᒃᑯᓂᖓ ᐱᔪᒥᓇᖏᑦᑐᓂᒃ ᐱᓇᓱᐊᕐᑎᓪᓗᓯ, ᐊᑕᓂᖅ ᐅᖃᕐᐳᖅ ᐃᓕᑦᓯᓐᓄᑦ ᐅᖃᕋᓱᐊᖃᑦᑕᓚᐅᕋᓗᐊᕐᐳᖓ ᐅᓄᕐᑐᐃᕐᓱᕐᓗᖓ, ᓈᓚᓚᐅᓐᖏᓚᑦᓯᓐᖓᓕ, ᐅᖃᐅᑦᔨᓇᓱᐊᕋᓗᐊᕐᑎᓪᓗᖓ ᑭᐅᔪᓐᓇᓚᐅᓐᖏᓚᓯ. 14ᑍᒤᒻᒪᑦ, ᓮᓗᐊᒧᑦ ᐱᓂᐊᕐᓂᕆᓯᒪᔭᕋ ᐃᒡᓗᖁᑎᓐᓄᑦᑕᐅᖅ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᐱᓂᐊᕈᑎᒋᓂᐊᓕᕆᕙᕋ, ᑐᒃᓯᐊᕐᕕᒃᔪᐊᖅ ᐅᒃᐱᕆᔭᓯ ᑐᓂᓚᐅᕐᓯᒪᔭᕋ ᐃᓕᑦᓯᓐᓄᑦ ᓯᕗᓕᕕᓂᑦᓯᓐᓄᓪᓗ. 15ᐃᒋᓐᓂᐊᕐᐸᑦᓯ ᓵᓐᓂᑦ, ᖃᑕᓐᖑᑎᑦᓯᑐᑦ ᐃᕗᕅᒥᐅᑎᑐᑦ ᑖᒃᑯᐊ ᑭᖑᕚᕇᓕᒫᑦ ᐃᒋᓚᐅᕋᒃᑭᑦ.”
ᐃᓄᐃᑦ ᓈᓚᖏᓐᓂᖏᑦ
16“ᐃᕝᕕᓪᓕ, ᐃᓄᐃᑦ ᑖᒃᑯᐊ ᑐᒃᓯᐅᑎᑦᑍᓕᒃᑭᑦ, ᕿᓄᑦᔪᑎᒋᑦᑍᓕᒃᑭᓪᓗ, ᑐᒃᓯᐊᕐᕕᒋᑦᑍᓕᓐᖓ ᑐᒃᓯᐅᑎᒐᓗᐊᕈᕕᒋᑦ ᑐᓴᑦᔮᓐᖏᓚᒋᑦ. 17ᑕᑯᖃᑦᑕᓐᖏᓚᑏᑦ? ᖃᓄᐃᓕᐅᕐᓂᕆᔭᖏᓐᓂᒃ ᔫᑕᒥ ᔨᕉᓴᓕᒥᐅᓪᓗ ᐊᖅᑯᓯᓂᖏᓐᓃ? 18#ᔨᕆᒤᐊ 44:17-19.ᕿᑐᕐᖓᖏᑦ ᐃᑯᐊᓚᑦᓯᑦᔪᑎᒃᓴᓂᒃ ᕿᔪᒃᑕᕐᐳᑦ, ᐊᑖᑕᖏᑕᓗ ᐃᑭᓵᕐᓗᓂᒋᑦ, ᐊᕐᓇᖏᓪᓗ ᓂᐊᖂᔭᓕᐊᒃᓴᒥᖕᓂᒃ ᐃᖑᑦᓯᕗᑦ, ᓂᐊᖂᔭᓂᒡᓗ ᖃᓚᑦᑎᕗᑦ ᕿᓚᐅᑉ ᑯᐃᖓᑕ ᐱᓂᐊᕐᑕᖏᓐᓂᒃ. ᐃᒥᕐᑕᐅᔪᒃᓴᓂᒡᓗ ᑐᓂᕐᕈᓯᕐᐳᑦ ᒎᑎᓐᖑᐊᓄᑦ ᐅᕙᓐᓂᒃ ᓂᓐᖓᒃᓮᓪᓗᑎᒃ. 19ᐅᕙᓐᓂᒃ ᓂᓐᖓᒃᓮᒐᓗᐊᕐᐹᑦ? ᐊᑕᓂᖅ ᐅᖃᕐᐳᖅ, ᑍᒤᓕᐅᕐᓂᕐᒥᖕᓄᑦ ᐃᒻᒥᖕᓂᖔᖅ ᐊᓯᕈᕈᑎᒃᓴᓕᐅᓕᓐᖏᓛᑦ ᑲᓐᖑᓇᕐᑐᒦᑎᓪᓗᑎᒡᓗ? 20ᐃᒫᒃ ᑕᕝᕙ ᐊᑕᓂᖅ ᒎᑎ ᐅᖃᕐᐳᖅ: ᑕᑯᒋᑦ, ᓂᓐᖓᒃᑯᒪ ᓂᓐᖓᐅᒪᓗᖓ ᐱᓇᓱᐊᕐᕕᒋᓂᐊᕐᐸᒃᑲ ᐃᓄᐃᓗ ᐆᒪᔪᓪᓗ, ᓇᐹᕐᑐᐃᓪᓗ, ᐸᐅᕐᒊᓪᓗ ᓄᓇᒥ ᐱᕈᕐᐸᒃᑐᑦ, ᐃᑯᐊᓚᓂᐊᕐᐳᑦ ᖃᒥᑕᐅᔪᓐᓇᖏᑦᑐᒥᒃ.
21“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ ᐊᑏ ᑐᓂᕐᕈᑕᐅᕙᒃᑐᑦ ᐆᑕᒃᓴᑦ ᑐᓂᕐᕈᑎᒃᓴᓄᑦ ᐊᓯᖏᓐᓄᑦ ᐃᓚᓕᐅᑎᓕᕐᓯᐅᒃ ᓂᕿᐅᓂᖏᑦ ᓂᕆᓗᓯᐅᒃ ᓇᖕᒥᓂᖅ. 22ᓯᕗᓕᕕᓂᕐᓯ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒃᑭᑦ, ᐅᖃᐅᑎᓚᐅᓐᖏᓚᒃᑲ ᐱᖁᔭᕐᑖᕐᑎᓚᐅᓐᖏᓚᒃᑲᓗ ᑐᓂᕐᕈᑏᑦ ᐆᑕᒃᓮᑦ ᑐᓂᕐᕈᑎᒃᓮᓪᓗ ᐱᓪᓗᒋᑦ. 23ᑭᓯᐊᓂᓕ ᐱᖁᔭᕐᑖᑎᓚᐅᕐᐸᒃᑲ ᐃᒤᓕᔪᒥᒃ, ᓂᐱᒐ ᓈᓚᒃᑕᒃᓴᕆᕙᓯ, ᒎᑎᒋᔭᐅᓂᐊᕋᒪ ᐃᓕᑦᓯᓐᓄᑦ, ᐃᓕᑦᓯᓗ ᐃᓄᖁᑎᒋᓂᐊᕐᐸᑦᓯ, ᐱᖁᔭᒃᑲ ᒪᓕᒡᓗᒋᑦ ᐃᓅᔪᒃᓴᐅᕗᓯ, ᐃᓅᓯᖃᑦᓯᐊᖁᓪᓗᓯ. 24ᑭᓯᐊᓂᓕ ᑐᓴᓚᐅᓐᖏᓚᑦ, ᓈᓚᓚᐅᓐᖏᓚᓪᓘᓐᓃᑦ, ᒪᓕᖔᑐᐃᓐᓇᓕᓚᐅᕐᐳᑦ ᓈᒻᒪᖏᑦᑐᓂᒃ ᐆᒻᒪᑎᖏᑦ ᓯᑎᔫᒐᒥᒃ, ᐃᓱᒪᒥᖕᓂᒃ ᐃᓅᑐᐃᓐᓇᐅᓚᐅᕐᐳᑦ ᑭᖑᒧᑦ ᑕᑯᓐᓇᕋᒥᒃ ᓯᕗᒨᖏᑦᑐᖅ. 25ᓯᕗᓕᕕᓂᓯ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᓂᖓᑕ ᑭᖑᓂᖓᓂᑦ ᐱᒋᐊᕐᓗᒍ ᐅᓪᓗᒥᒧᑦ ᑎᑭᓪᓗᒍ, ᖃᐅᑕᒫᑦ ᐅᓄᕐᑐᐃᕐᓱᕐᓗᖓ ᑎᓕᓯᕕᒋᖃᑦᑕᕐᓯᒪᕙᒃᑲ ᐱᔪᖃᓛᕐᑐᒥᒃ ᐅᖃᕐᑎᓐᓂᒃ. 26ᑐᓴᕐᑕᐅᕙᓚᐅᓐᖏᓚᖓ ᓈᓚᒃᑕᐅᓇᖓᓗ ᓯᑎᒃᑎᑉᐸᓪᓕᐊᖔᑐᐃᓐᓇᓚᐅᕐᐳᑦ. ᐱᐅᖏᑦᑐᓕᑦᑍᓕᖏᓐᓂᕐᓴᐅᓪᓗᑎᒡᓗ ᓯᕗᓕᕕᓂᑦᓯᓐᓂᑦ. 27ᑕᒪᒃᑯᓂᖓ ᐅᖃᐅᑎᒐᓗᐊᕈᕕᒋᑦ ᑐᓴᕐᑕᐅᑦᔮᓐᖏᓚᑎᑦ ᕾᖁᒐᓗᐊᕈᕕᒋᓪᓗ ᑭᐅᑦᔮᓐᖏᓛᑎᑦ. 28ᐅᖃᐅᑎᔭᒃᓴᕆᕙᑎᑦ, ᐃᓅᖃᑎᒌᒡᔪᐊᖑᓂᕋᕐᓗᒋᑦ ᐊᑕᓂᕐᒥᒃ ᒎᑎᒥᖕᓂᒃ ᑐᓵᖏᑦᑐᓂᒃ, ᐋᖅᑭᒋᐊᕈᑎᖃᕈᓐᓇᖏᑦᑐᑦ ᐋᖅᑭᒋᐊᕐᑕᐅᑦᔪᑎᒋᓇᓱᒃᑕᒥᖕᓂᒃ, ᓱᓕᑦᓯᐊᕐᓂᖅ ᐃᓄᖕᓂᑦ ᐊᑐᕐᑕᐅᔪᓐᓃᕐᐳᖅ, ᐅᖃᐅᓯᖏᓐᓃᑦᑐᓐᓃᕐᓗᓂ.”
ᐊᔪᕐᑐᓕᓃᑦ ᐱᓂᐊᕐᑕᐅᓂᖏᑦ ᕼᐃᓇᒻᒥᐅᓄᑦ ᓇᕐᓴᒦᑦᑐᓄᑦ
29“ᓄᔧᔭᕐᓗᓯ ᓄᔧᔭᕐᓂᑯᓯ ᐃᒋᓪᓗᒋᑦ,
ᕿᒃᓵᖕᓂᑦᓯᓐᓂᒃ ᓴᖅᑭᑎᑦᓯᓕᕆᑦᓯ ᐱᖑᐃᑦ ᖄᖏᓐᓂ,
ᐊᑕᓂᐅᑉ ᑭᖑᕚᖑᖃᑎᒌᖑᔪᓯ ᖁᔭᓈᕐᒪᓯ ᓂᓐᖓᐅᒪᕕᒋᓕᕐᐹᓯ.
30“ᔫᑕᒥᐅᑦ ᓵᓐᓂ ᐊᔪᕐᑐᓕᓯᒪᖕᒪᑕ, ᐊᑕᓂᖅ ᐅᖃᕐᐳᖅ, ᒎᑎᓐᖑᐊᓂᒃ ᓇᕐᕈᓇᕐᑐᓂᒃ ᐃᓕᐅᖅᑬᓯᒪᖕᒪᑕ ᑐᒃᓯᐊᕐᕕᒡᔪᐊᖁᑎᓐᓄᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᓇᕐᕈᓇᕐᓯᑎᑦᓯᕗᑦ ᑍᒤᓕᐅᕐᓂᕐᒥᖕᓄᑦ. 31#ᐊᑕᓃᑦ ᐂᑉᐸᖏᑦ 23:10; ᔨᕆᒤᐊ 32:35; ᒨᓯᓯ ᐱᖓᔪᖏᑦ 18:21.ᑐᓂᕐᕈᓯᕐᕕᓕᐅᕐᓯᒪᖕᒪᑕ ᑐᐱᑎᒥ ᐱᐊᓐ ᕼᐃᓇᒻ ᓇᕐᓴᖓᓂ ᐃᕐᓂᕐᒥᖕᓂᒃ ᐸᓂᖕᒥᖕᓂᒡᓗ ᑐᓂᕐᕈᓯᕐᕕᒋᖃᑦᑕᕐᒪᑦᔪᒃ ᐃᑯᐊᓚᓪᓗᒋᑦ ᐱᖁᔭᓕᐅᕈᑎᒋᓚᐅᕐᓯᒪᓐᖏᑕᕋ ᐊᑐᕐᑕᐅᖁᓗᒍ ᐃᓱᒪᒋᓚᐅᕐᓯᒪᓐᖏᑕᕋᓘᓐᓃᑦ. 32ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᕾᓕᕐᐳᑦ, ᐊᑕᓂᖅ ᐅᖃᕐᐳᖅ, ᐃᓄᖕᓄᑦ ᑖᓐᓇ ᓄᓇ ᑍᔭᐅᔪᓐᓃᕈᒫᕐᐳᖅ ᑐᐱᑎᒥᒃ ᐅᕝᕙᓗ ᐱᐊᓐ ᕼᐃᓇᒻ ᓇᕐᓴᖓᓂᒃ, ᑐᖁᕅᕕᖕᒥᒃ ᑍᔭᐅᖔᓕᕈᒫᕐᒪᑦ ᑐᖁᖓᔪᓂᒃ ᐃᓗᕕᕐᓯᕕᒃᓮᕈᑎᔪᒫᕐᐳᖅ. 33ᐃᓗᕕᕐᓯᕕᒃᓴᖃᕈᓐᓃᕐᐸᑦ ᑎᒥᕕᓃᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ ᓂᕿᒋᔭᐅᑐᐃᓐᓇᓕᕈᒫᕐᐳᑦ, ᕿᒫᑎᑦᓯᔪᒃᓴᕐᑕᖃᕈᒫᓐᖏᓚᕐᓗ ᑕᒪᒃᑯᓂᖓ. 34#ᔨᕆᒤᐊ 16:9; 25:10; ᑕᑯᑎ 18:23.ᖁᕕᐊᓇᕐᑐᖃᕈᓐᓃᕈᒫᕐᐳᖅ ᖁᕕᐊᓱᒡᕙᓗᒃᑐᑦ ᓄᓕᐊᓂᒃᑐᑦ ᐅᐃᓂᒃᑐᓪᓗ ᓂᐱᖓᑐᑦ ᑐᓴᕐᓴᐅᔪᓐᓇᕈᓐᓃᕈᒫᕐᐳᑦ ᔫᑕᒥᐅᓂ ᔨᕉᓴᓕᒥᐅᓂᓗ, ᓄᓇᖏᑦ ᑭᓱᑕᖃᕈᓐᓃᕈᒪᕐᒪᑕ ᐃᓄᖃᔪᐃᑦᑐᑎᑐᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
