ᔨᕆᒤᐊᐅᑉ ᐊᒡᓚᖏᑦ 6
6
ᔨᕉᓴᓕᐅᑉ ᐊᕙᓗᔭᐅᓂᖓ ᐊᑭᕋᒥᓄᑦ
1ᐃᓕᑦᓯ ᐱᓐᔭᒥᓂᒧᑦ ᑭᖑᕚᕆᔭᐅᔪᓯ, ᔨᕉᓴᓕᒥᑦ ᕿᒫᓕᕆᑦᓯ, ᑎᑦᑐᓚᐅᓪᓗ ᓂᓪᓕᕐᑎᓯᐅᒃ ᓄᓇᒥ ᑎᑯᐊᒥ! ᖃᐅᔨᑦᔪᑎᒃᓴᒥᒡᓗ ᑕᑯᒃᓴᐅᑎᑦᓯᓕᕆᑦᓯ ᐱᑦ-ᕼᐊᑭᕆᒻᑯᓐᓄᑦ; ᐅᓐᓄᐊᓪᓗᐊᑉ ᓇᓛᓂᑦ ᑲᑉᐱᐊᓇᕐᑐᒥᒃ ᓴᖅᑭᑦᑐᖃᓕᕐᒪᑦ ᐊᓯᕈᕐᑕᐅᓇᕐᑐᒥᒃ. 2ᓮᐅᓂᐅᓪᓗ ᐸᓂᖓᑐᑦ ᑍᒤᑦᑐᑎᑦ ᓄᖑᑕᐅᑎᓐᓂᐊᕐᐸᒋᑦ, ᐱᐅᔫᓪᓗᑎᑦ ᑕᑯᒥᓇᕐᑑᒐᓗᐊᕐᑎᓪᓗᑎᑦ. 3ᓰᐱᓕᕆᔨᓄᑦ ᓰᐱᖁᑎᖏᓐᓄᓪᓗ ᐅᐸᒃᑕᐅᓂᐊᕐᐳᑎᑦ, ᐅᖓᓗᔭᐅᓗᑎᑦ ᑕᖕᒫᕐᑎᕐᓂᐊᕐᐳᑦ ᐊᑐᓂᑦ ᖃᓂᒋᔭᒥᓃᑦᑐᓂᒃ ᑲᒪᒋᔭᖃᕐᓗᑎᒃ. 4ᐅᓇᑕᕆᐊᓕᕐᓯᐅᒃ, ᐅᓪᓗᖅ ᕿᑎᕋᓕᕐᐸᑦ ᐱᒋᐊᕐᓂᐊᕐᐳᒍᑦ ᑭᓯᐊᓂᓕ ᑕᑯᒋᑦ ᐅᓐᓄᓕᕇᕐᐳᖅ ᑖᓗᐊᓕᕇᕐᓗᓂᓗ. 5ᐅᓐᓄᐊᖔᒃᑯᑦ ᐅᓇᑕᕆᐊᕐᕕᒋᓂᐊᕐᐸᕗᑦ, ᐊᕙᓗᕐᔪᐊᖏᓪᓗ ᓱᕋᒃᑎᕐᓗᒋᑦ.
6ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, “ᓇᐹᕐᑐᓂᒃ ᓇᑲᑎᕆᓗᓯ ᐃᑯᕐᕋᓕᐅᕆᑦᓯ ᔨᕉᓴᓕᐅᑉ ᐊᕙᓗᕐᔪᐊᖏᑦ ᓯᖁᑦᑎᕐᑕᐅᔪᒃᓴᐅᖕᒪᑕ, ᐃᒡᓗᒐᓴᒡᔪᐊᖏᑦ ᐱᐅᖏᑦᑐᓂᒃ ᑕᑕᒻᒪᑕ. 7ᓲᕐᓗ ᐃᒥᕐᑕᕐᕕᐅᑉ ᐃᒪᖓ ᐃᒻᒥᕐᓱᕐᑕᐅᕙᖕᒪᑦ, ᑍᒫᒃᑕᐅᖅ ᐱᐅᖏᑦᑐᓕᐅᕐᓂᖏᑦ ᐱᓯᒪᔭᐅᕗᑦ, ᓇᓂᑐᐃᓐᓇᖅ ᑲᑉᐱᐊᓇᕐᑐᖃᕐᐳᖅ ᐊᓯᕈᕐᓇᕐᑐᖃᕐᓗᓂᓗ, ᖃᓂᒪᓐᓇᕐᓂᖏᑦ ᐋᓐᓂᕐᑎᕆᓂᖏᓪᓗ ᑕᐅᑐᐃᓐᓇᕋᒃᑭᑦ. 8ᔨᕉᓴᓕᒥᐅᑕᐅᔪᓯ ᐃᓂᕐᑎᕆᑦᔪᑎᒃᑲ ᑐᓴᕐᓯᐅᒃ. ᑐᓴᕐᓂᐊᖏᒃᑯᑦᓯᐅᒃ ᕿᒪᖕᓂᐊᕐᐸᑦᓯ, ᓄᓇᖁᑎᓯᓗ ᓱᓇᖃᕈᓐᓃᕐᑎᓪᓗᒍ ᓄᓇᒋᔪᒥᓇᕈᓐᓃᕐᑎᓪᓗᒍᓗ ᑭᑯᒃᑐᐃᓐᓇᕐᓄᑦ.”
ᐃᓴᕆᐊᓕᒥᐅᑦ ᐊᑭᕋᕐᑐᕐᓂᖓᑦ
9ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᐃᓴᕆᐊᓕᒥᐅᑦ ᐊᒥᐊᒃᑯᖏᑦ ᐊᒡᒍᕐᑕᐅᓕᑦ ᕔᓂᒃᓮᑦ ᐸᐅᕐᒊᑦ ᐊᒡᒍᕐᑕᐅᕙᖕᓂᖏᑎᑐᑦ ᐅᕐᐱᒐᕐᓂᑦ, ᕿᒥᕐᕈᐊᑦᓯᐊᕐᓗᒍ ᐸᐅᕐᖓᓂᒃ ᐳᑯᒃᑐᑎᑐᑦ.
10ᑭᓇᒃᑯᑦ ᐃᓂᕐᑎᕆᑦᔪᑎᓐᓂᒃ ᑐᓴᕈᓐᓇᕐᓂᐊᕐᐹᑦ? ᑭᓇᒃᑯᓐᓄᓪᓗ ᓈᓚᒃᑕᐅᔪᓐᓇᕐᓂᐊᕐᐳᖔ? ᑐᓵᔪᒪᔪᖃᕈᓐᓃᕐᒪᑦ, ᑕᑯᒋᑦ ᓈᓚᒃᑐᖃᕈᓐᓇᕈᓐᓃᕐᐳᖅ. ᐊᑕᓂᐅᑉ ᐅᖃᐅᓯᖏᑦ ᑐᓴᕐᑕᐅᔭᕆᐊᒃᓴᖅ ᐱᐅᒋᔭᐅᔪᓐᓂᕐᒪᑕ, ᖁᕕᐊᒋᔭᐅᓇᑎᒡᓗ. 11ᐅᕙᖓᓕ ᐊᑕᓂᐅᑉ ᓂᓐᖓᐅᓯᖓᓂᑦ ᐱᑕᖃᓗᐊᓂᕐᒧᑦ ᐱᓯᒪᒋᐊᖓ ᑕᖃᕙᕋ, “ᐊᓂᑎᓕᕈᒃ ᕿᑐᕐᖓᖏᓐᓄᑦ ᐊᖅᑯᑎᒦᑦᑐᓄᑦ, ᐃᓅᓱᒃᑐᖁᑎᖏᓐᓄᓪᓗ ᑲᑎᒪᔪᓄᑦ, ᓄᓕᐊᕇᓄᓪᓗ ᓴᖅᑭᓐᓂᐊᕐᐸᕋ ᐃᓄᑐᖃᐅᓕᕐᑐᓄᓪᓗ. 12ᐃᒡᓗᖏᓐᓂᒃ ᐋᑕᐅᓂᐊᕐᐳᑦ ᐊᓯᖏᓐᓄᑦ ᑐᓂᔭᐅᓗᑎᒃ, ᐱᕈᕐᓰᕕᖁᑎᖏᑦ ᓄᓕᐊᖏᓪᓗ ᐱᖃᓯᐅᑦᔭᐅᓗᑎᒃ, ᑍᒤᓕᐅᕐᓂᐊᕐᐳᑦ ᐊᑭᓂᐊᕐᕕᒋᓕᕈᒃᑭᑦ ᓄᓇᖃᑎᒌᑦ,” ᐊᑕᓂᖅ ᐅᖃᕐᐳᖅ. 13“ᒥᑭᓐᓂᕐᐹᓂᑦ ᐊᖏᓂᕐᐹᑦ ᑎᑭᓪᓗᒋᑦ ᒥᖕᓂᑐᔪᐃᓐᓈᓘᓕᕐᒪᑕ, ᑕᒪᕐᒥᒃ ᓯᓔᕐᕆᒃᓯᓂᒃᑯᑦ ᐱᕚᓪᓕᕈᑎᖃᕋᓱᐊᕐᐳᑦ; ᐱᔪᖃᓛᕐᑐᒥᒃ ᐅᖃᕐᑎᓐᓂᑦ ᑐᓂᕐᕈᓯᕐᑎᑦᓯᔨᓄᑦ ᓴᒡᓗᑭᑦᓯᓂᕐᒥᒃ ᐱᓂᐊᕐᓂᖃᓕᕐᒪᑕ 14#ᐃᓯᑭᐊᓕ 13:10.ᐃᓄᖁᑎᒪ ᑭᓪᓕᖏᓐᓂᒃ ᒪᑦᑐᓯᕐᓯᑐᐃᓐᓇᕐᐳᑦ. ᐅᖃᕐᓗᑎᒃ, ‘ᖃᓄᐃᓐᓇᕐᑐᖃᓐᖏᓚᖅ,’ ᖃᓄᐃᓐᓇᕐᑐᒦᒃᑲᓗᐊᕋᒥᒃ. 15#ᔨᕆᒤᐊ 8:10-12.ᑲᓐᖑᓲᑎᖃᕐᐹᑦ ᑕᒪᒃᑯᓂᖓ ᓈᒻᒪᖏᑦᑐᓕᐅᕐᓂᕆᔭᒥᖕᓃᒃ? ᑍᒤᓐᖏᓚᑦ ᑲᓐᖑᓱᒍᓐᓁᓪᓕᕗᑦ, ᐊᐅᐸᓪᓕᕈᓐᓁᓪᓕᓪᓗᑎᒡᓘᓐᓃᑦ, ᑲᑕᒃᓯᒪᔪᓄᑦ ᑲᑕᖃᑕᐅᕕᒡᔪᐊᕐᓂᐊᕐᐳᑦ; ᓱᒋᐊᓕᕈᒃᑭᑦ, ᐃᒋᑕᐅᔪᒫᕐᐳᑦ,” ᐊᑕᓂᖅ ᐅᖃᕐᐳᖅ.
ᐃᓴᕆᐊᓕᒥᐅᑦ ᐊᑐᕈᒪᖏᓐᓂᖏᑦ ᒎᑎᐅᑉ ᐊᑐᖁᔭᖓᓂᒃ
16ᐃᒫᒃ ᐊᑕᓂᖅ ᐅᖃᕐᐳᖅ, “ᐊᖅᑯᑏᑦ ᑲᑎᓐᓂᖏᓐᓄᑦ ᑕᑯᔭᕐᑐᕆᑦᓯ, ᐊᑐᕐᑕᐅᕙᒃᑐᑐᕾᓪᓗ ᖃᐅᔨᓇᓱᐊᕐᓯᒋᑦ, ᑐᑭᓯᑎᑕᐅᔪᒪᓗᓯ ᐊᖅᑯᒻᒥᒃ ᐊᑲᐅᔪᒥᒃ ᐊᑐᕐᓂᐊᕐᑕᑦᓯᓐᓂᒃ. ᑕᕝᕙ ᑕᕐᓂᑦᓯᓐᓄᑦ ᒥᕐᖑᐃᕐᓯᕐᕕᒃᓴᕐᓯᓂᐊᕐᐳᓯ.
“ᑭᓯᐊᓂᓕ ᐅᖃᕐᐳᑦ, ‘ᐊᖅᑯᒻᒥᒃ ᑍᒤᑦᑐᒥᒃ ᐊᑐᕈᒪᓐᖏᓚᒍᑦ.’ 17ᖃᐅᔨᓴᕐᑎᓂᒃ ᑎᓕᓯᓚᐅᕐᐳᖓ ᐃᓕᑦᓯᓐᓄᑦ ᐅᖃᐅᔨᖁᓪᓗᒋᑦ ᑎᑦᑐᓚᐅᑦ ᓂᐱᖓᓂᒃ ᑐᓴᖁᓪᓗᓯ, ᑭᓯᐊᓂᓕ ᐅᖃᓚᐅᕐᐳᓯ ᓈᓚᒍᒪᖏᓐᓂᕋᕐᓗᓯ.
18“ᑍᒤᒻᒪᑦ ᑐᓴᓕᕆᑦᓯ ᐃᓅᖃᑎᒌᒡᔪᐊᖑᔪᓯ ᖃᐅᔨᓕᕐᓗᓯᓗ, ᖃᐅᔨᓴᕆᑦᓯ ᖃᓄᐃᓕᓂᐊᕐᒪᖔᑕ. 19ᓄᓈ ᑐᓴᓕᕆᑦ, ᐃᓅᖃᑎᒌᑦ ᑖᒃᑯᐊ ᐊᓯᕈᕐᑕᐅᓇᕐᑐᒧᑦ ᑎᑭᕝᕕᐅᑎᓐᓂᐊᕐᐸᒃᑲ, ᐱᓂᐊᕐᓂᖏᑕ ᐱᕈᕐᑎᑕᖏᓐᓄᑦ, ᐅᖃᐅᓯᓐᓂᒃ ᓈᓚᓚᐅᖏᒻᒪᑕ ᐱᖁᔭᓐᓂᒡᓗ ᓇᕐᕈᓚᐅᕐᒪᑕ. 20ᐳᔫᕐᑎᑦᓯᑦᔪᑎᒃᓮᑦ ᓰᐸᒥᑦ ᐱᓯᒪᔪᑦ ᓱᓇᒧᑦ ᐊᑑᑎᖃᕐᐸᑦ, ᓄᓇᓂᓪᓘᓐᓃᑦ ᐅᖓᓯᒃᑐᓂᑦ ᓰᕐᓇᕐᑐᑦ ᐱᑖᕕᓂᖏᑦ? ᑐᓂᕐᕈᑎᓯ ᐆᒪᔪᕕᓃᑦ ᐆᓯᒪᔪᑦ ᑐᓂᕐᕈᓯᕐᕕᖕᒥ ᓈᒻᒪᒋᓐᖏᓚᒃᑲ, ᑐᓂᕐᕈᓯᕈᑎᒋᔭᓯᓗ ᖁᕕᐊᒋᓐᖏᓚᒃᑲ. 21ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, ‘ᑕᑯᒋᑦ, ᐃᓄᖁᑎᓐᓄᑦ ᐊᐳᕈᑎᒃᓴᖃᕐᑎᑦᓯᓂᐊᕐᐳᖓ ᐹᓪᓚᖁᓪᓗᒋᑦ, ᕿᑐᕐᖓᕇᓕᒫᑦ ᐊᐳᕈᑎᒃᓴᖃᕐᓂᐊᕐᐳᑦ, ᓯᓚᖅᑲᑎᒌᑦ ᐃᓚᓐᓈᕇᓪᓗ ᐊᓯᕈᕐᑕᐅᓂᐊᕐᐳᑦ.’”
ᓵᓚᒋᔭᐅᓂᖅ ᐅᓐᓄᐊᓪᓗᐊᑉ ᓇᓛᓂᓐᖔᕐᑐᓄᑦ
22ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦᓯ ᐅᓇᑕᕆᐊᕐᑐᕐᑐᑦ ᐃᓕᑦᓯᓐᓂᒃ ᕾᓕᕐᐳᑦ, ᐅᓐᓄᐊᓪᓗᐊᑉ ᓇᓛᓂᑦ, ᐃᓅᖃᑎᒌᒡᔪᐊᑦ ᐅᓇᑕᕐᑐᒃᓴᖏᑦ ᐅᖓᓯᖕᓂᕐᐹᒥᐅᑦ ᐊᐅᓚᑦᔭᓕᕐᐳᑦ. 23ᐅᓇᑕᐅᑎᖃᕐᐳᑦ ᐱᑎᒃᓯᓂᒃ ᖃᓗᒋᐊᓂᒡᓗ, ᐊᑦᑕᕆᔭᖃᓐᖏᓚᑦ ᓇᒡᓕᖕᓂᖃᕋᑎᒡᓗ, ᓂᐱᖏᑦ ᓂᐱᖃᕐᐳᑦ ᐃᒪᕕᐅᑉ ᐃᒃᑑᓕᔮᕐᓂᖓᑐᑦ, ᐃᖏᕐᕋᓕᕌᖓᒥᒃ ᕿᒻᒥᕐᔪᐊᓄᑦ, ᓮᐅᓂᒥᐅᑕᐅᔪᓯ ᐅᐸᒃᑕᐅᓕᕐᐳᓯ ᐅᓇᑕᐅᓯᔭᕐᑐᓄᑦ.
24“ᑐᓴᐅᒪᓕᕋᑦᑎᒍ ᑕᓕᕗᑦ ᓄᑭᖃᕈᓐᓃᕐᐳᑦ, ᐃᓱᒫᓗᓕᕐᓗᑕᓗ ᐋᓐᓂᐊᓕᕐᐳᒍᑦ ᐊᕐᓇᐅᑉ ᐃᕐᓂᓱᒃᑑᑉ ᐋᓐᓂᐊᓂᖓᑐᑦ. 25ᐃᒡᓗᒐᓴᒡᔪᐊᑦ ᓯᓚᑖᓅᕐᑍᓕᓕᕆᑦᓯ, ᐊᖅᑯᑎᒃᑯᓪᓗ ᐱᓱᒃᑍᓕᓗᓯ ᐊᑭᕋᓯ ᓴᕕᒡᔪᐊᓕᔭᕐᒪᑕ, ᓇᓂᑐᐃᓐᓇᖅ ᑲᑉᐱᐊᓇᕐᓯᕗᖅ.
26“ᐃᓄᖁᑎᒃᑲ, ᐆᒪᔪᑦ ᒥᖅᑯᖏᓐᓂᒃ ᓴᓇᓯᒪᔪᓂᒃ ᐊᓐᓄᕌᕐᑐᓕᕆᑦᓯ, ᐊᕐᔭᓕᓂᒃᑯᓪᓗ ᐊᒃᓴᑳᓗᓯ, ᕿᐊᒋᑦᓯ ᕿᒃᓵᒃᑐᐊᓗᒃᑎᑐᑦ ᐃᕐᓂᑐᐊᒥᓂᒃ ᑐᖁᔨᐊᖃᕋᑖᕐᑐᑎᑐᑦ, ᐅᒡᒍᐊᕐᓗᓯᓗ ᐊᓯᕈᐃᔭᐅᕐᑐᕐᑐᑦ ᑎᑭᓐᓂᐊᕐᒪᑕ ᓂᕆᐅᒡᕕᒋᓐᖏᑕᑦᓯᒍᑦ. 27ᔨᕆᒤᐊ ᖃᐅᔨᓴᕐᑎᓐᖑᕐᑎᓚᐅᕐᐸᒋᑦ ᓴᕕᕋᔭᖕᓂᒃ, ᐃᓄᖁᑎᒃᑲ ᓴᕕᕋᔭᒃᓴᑎᑐᑦ ᑍᒤᒻᒪᑕ, ᐅᑦᔨᕐᓱᓚᐅᒃᑭᑦ ᐃᓕᖅᑯᓯᕆᔭᖏᓪᓗ ᖃᐅᔨᓴᕐᓗᒋᑦ. 28ᐃᓄᖁᑎᒃᑲ ᓯᑎᒃᑎᓐᓂᑰᓕᕐᐳᑦ, ᐃᓕᖅᑯᓯᖃᓕᕐᒪᑕ ᐃᓅᖃᑎᒥᖕᓂᒃ ᑲᑕᒃᑎᑦᓯᓇᓱᖕᓃᓐᓇᕐᒥᒃ, ᖃᑯᕐᓕᒃᑎᑐᑦ ᓴᕕᕋᔭᒃᑎᑐᓪᓗ ᑍᒤᑦᑑᔮᓕᕐᐳᑦ, ᐱᐅᖏᑦᑐᐃᓐᓇᕐᒥᒃ ᐃᓕᖅᑯᓯᖃᓕᕐᒪᑕ. 29ᐃᑯᐊᓚᑦᓯᕕᒃ ᐃᑯᒪᓕᕐᐳᖅ, ᑯᓯᕐᓯᐊᖑᓂᖏᓐᓂᒃ ᐊᐅᒃᑎᑦᓯᓂᐊᕐᓗᓂ, ᐱᐅᓂᖏᓪᓗ ᓴᖅᑭᑐᐃᓐᓇᓕᒑᕗᑦ, ᐱᐅᖏᑦᑐᓕᔪᑦ ᐲᕈᓐᓁᓪᓕᖕᒪᑕ. 30ᑍᔭᐅᔪᒫᕐᐳᑦ ᓯᐅᓪᕕᕆᓂᒃ ᐱᔪᒪᔭᐅᔪᓐᓃᕐᓂᑯᓂᒃ, ᐊᑕᓂᐅᑉ ᓇᕐᕈᒋᓕᕐᒪᒋᑦ ᐱᔪᒪᔪᓐᓃᕐᓗᒋᓪᓗ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 6: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
