ᔨᕆᒤᐊᐅᑉ ᐊᒡᓚᖏᑦ 8
8
1“ᑕᒪᓐᓇ ᓇᓪᓕᐅᑎᒃᐸᑦ, ᐊᑕᓂᖅ ᐅᖃᕐᐳᖅ, ᔫᑕᒥᐅᑦ ᐊᖓᔪᖅᑳᕐᔪᐊᖏᑕ, ᐊᖓᔪᖅᑳᖁᑎᖏᑕᓗ, ᑐᓂᕐᕈᓯᕐᑎᑦᓯᔨᖏᑕᓗ, ᐱᔪᖃᓛᕐᑐᒥᒃ ᐅᖃᑎᖏᑕᓗ, ᔨᕉᓴᓕᒥᐅᑕᕕᓃᓪᓗ ᓴᐅᓂᕕᓂᖏᑦ ᐃᓗᕕᖏᓐᓂᑦ ᐲᕐᑕᐅᔪᒫᕐᐳᑦ. 2ᓴᖅᑭᔮᓕᕐᓗᑎᒃ ᓯᕿᓂᕐᒧᑦ, ᑕᖅᑭᕐᒧᑦ ᐅᓪᓗᕆᐊᓄᓪᓗ, ᐅᖓᒋᓗᒋᑦ ᑭᒡᒐᕐᑐᕐᓗᒋᓪᓗ ᑐᒃᓯᐊᕐᕕᒋᕙᓚᐅᕐᑕᖏᓐᓄᑦ, ᑲᑎᕐᓱᕐᑕᐅᓗᑎᒃ ᐃᓗᕕᕐᓄᐊᕐᑕᐅᔪᒫᓐᖏᓚᑦ, ᑕᒫᓃᕐᕆᑐᐃᓐᓇᕈᒫᕐᐳᑦ ᐊᓇᕐᑎᑐᑦ ᒪᓂᖅᑲᒦᑦᑐᑎᑐᑦ. 3ᑖᒃᑯᓇᓐᖓᑦ ᐊᒥᐊᒃᑰᔪᕕᓃᑦ ᐃᓅᖃᑎᒌᓂᑦ ᐊᔪᕐᑐᓕᔪᓂᑦ ᑐᖁᔪᒪᓂᕐᓴᐅᖔᕐᐸᒍᒫᕐᐳᑦ ᐃᓅᔪᒪᓂᕐᒥᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.”
ᐊᔪᕐᓂᖅ ᓱᒋᐊᕐᑕᐅᓂᕐᓗ
4ᐅᖃᐅᑎᒃᑭᑦ, ᐃᒫᒃ ᐊᑕᓂᖅ ᐅᖃᕐᐳᖅ, “ᐹᓪᓚᒃᑑᒐᓗᐊᑦ ᒪᑭᒃᑲᓐᓂᕐᐸᓐᖏᓛᑦ? ᐃᓄᒡᓗ ᕿᒤᓚᐅᕋᓗᐊᕐᓗᓂ ᐅᑎᒃᑲᓐᓂᕐᐸᓐᖏᓛᖅ? 5ᖃᓄᐃᒻᒪᓪᓕ ᐅᑯᐊ ᐃᓄᐃᑦ ᕿᒤᕙᑦ, ᔨᕉᓴᓕᒥᐅᓪᓗ ᑐᓄᑦᓯᕚᑦ? ᓱᓕᖏᑦᑐᓂᒃ ᐊᑕᕕᖃᕆᐊᖔᕐᓗᑎᒃ ᐅᑎᕈᒪᔪᓐᓃᕐᐸᒃᐳᑦ. 6ᑐᓵᓇᓱᑦᓯᐊᖃᑦᑕᕋᓗᐊᕐᐳᖓ, ᑭᓯᐊᓂᓕ ᐱᐅᔪᒥᒃ ᑐᓴᕐᕕᒋᓚᐅᕐᓯᒪᓐᖏᓚᒃᑲ ᖃᕿᐊᓕᕐᑐᖃᖃᑦᑕᖏᒻᒪᑦ ᐱᐅᖏᑦᑐᓕᓯᒪᓂᕐᒥᖕᓂᑦ, ᐅᖃᕐᑐᖃᕈᓐᓇᖏᒻᒪᓪᓘᓐᓃᑦ, ‘ᑕᒻᒪᕐᑐᐊᓘᕗᖓ.’ ᑕᒪᕐᒥᒃ ᐊᑐᕈᒪᔭᑐᐃᓐᓇᕐᒥᖕᓂᒃ ᐃᓅᓇᓱᑐᐃᓐᓇᓕᕐᒪᑕ ᓲᕐᓗ ᕿᒻᒥᕐᔪᐊᖅ ᐸᖓᓕᒃᓯᔪᖅ ᐅᓇᑕᕆᐊᕈᑕᐅᓕᕋᒥ ᐅᓇᑕᕐᑐᓄᑦ. 7ᑎᖕᒥᐊᑦ ᓂᐅᑯᑖᓕᑦ ᐊᒡᓛᑦ ᖃᐅᔨᒪᕙᒃᐳᑦ ᐊᐅᓪᓚᕐᕕᒃᓴᒥᖕᓂᒃ. ᐃᓄᖁᑎᒃᑲᓕ ᖃᐅᔨᒪᔪᓐᓇᓐᖏᓚᓪᓘᓐᓃᑦ ᐊᑕᓂᐅᑉ ᐊᑐᖁᔭᖏᓐᓂᒃ. 8ᖃᓄᖅ ᐅᖃᕈᓐᓇᕐᐱᓰ? ᓯᓚᑐᓂᕋᕐᓗᓯ ᐊᑕᓂᐅᑉ ᐱᖁᔭᖏᓐᓂᒃ ᓇᔪᕐᑎᖃᕐᓂᑦᓯᓐᓄᑦ, ᑕᑯᒋᑦ, ᐊᒡᓚᖕᓂᒃ ᐃᓕᓯᒪᔪᖁᑎᓯ ᓱᓕᖏᑦᑐᒥᒃ ᐱᓇᓱᐊᕈᑎᖃᓕᕐᑎᓪᓗᒌᑦ? 9ᓯᓚᑐᔪᑦ ᑲᓐᖑᓱᒃᑎᑕᐅᓂᐊᕐᐳᑦ, ᑲᒪᓂᐊᕐᑎᑕᐅᓂᐊᕐᐳᓪᓗ ᐊᔪᓕᕐᑎᑕᐅᓗᑎᒃ, ᐊᑕᓂᐅᑉ ᐱᖁᔭᖏᓐᓂᒃ ᒪᓕᒍᒪᖏᓐᓇᒥᒃ, ᖃᓄᐃᑦᑐᒥᒃ ᑍᒪ ᓯᓚᑐᓂᖃᓕᕐᐹᑦ? 10ᑍᒤᒻᒪᑦ ᓄᓕᐊᖏᑦ ᓄᓕᐊᕐᑖᕆᔭᐅᑎᓐᓂᐊᕐᐸᒃᑲ ᐊᓯᖏᓐᓄᑦ, ᐱᕈᕐᓰᕕᖁᑎᖏᓪᓗ ᐃᓄᒃᑖᕐᑎᓪᓗᒋᑦ ᐊᓯᖏᓐᓂᒃ, ᒥᑭᓐᓂᕐᐹᒥᑦ ᐱᔪᓐᓇᕐᓂᕐᐹᑦ ᑎᑭᓪᓗᒋᑦ ᖃᑭᔪᒪᓃᓐᓈᓗᖕᒥᒃ ᐃᓱᒪᖃᓕᕐᒪᑕ, ᓇᓚᐅᑦᑍᔪᓪᓗ ᑐᓂᕐᕈᓯᕐᑎᑦᓯᔩᓪᓗ ᐅᐃᕕᕐᕆᒃᓯᖃᑕᐅᓕᕐᒪᑕ ᖃᑭᔪᒪᒧᑦ. 11#ᐃᓯᑭᐊᓕ 13:10.ᐃᓄᖁᑎᒪ ᑭᓪᓕᖏᓐᓂᒃ ᕿᑦᑐᑳᒃᓯᒪᔪᑐᐃᓐᓇᕐᑎᑐᑦ ᒪᑦᑐᓯᕐᓯᕙᖕᒪᑕ. ᐅᖃᕐᐸᒃᐳᑦ, ᖃᓄᐃᖏᑦᓯᐊᕐᐳᒍᑦ ᖃᓄᐃᖏᑦᓯᐊᕐᐳᒍ, ᓮᒪᓇᕐᑐᖃᕈᓐᓃᕐᑎᓪᓗᒍ. 12#ᔨᕆᒤᐊ 6:12-15.ᑲᓐᖑᓲᑎᖃᕐᐹᑦ ᓈᒻᒪᖏᑦᑐᓂᒃ ᐃᓕᖅᑯᓯᖃᕐᓂᕐᒥᖕᓃᒃ? ᐋᒃᑲ. ᑲᓐᖑᓱᖏᑦᓯᐊᕐᐳᑦ, ᐊᐅᐸᓪᓕᕆᐊᒃᓵᕐᓘᓐᓃᑦ ᓇᓗᓕᕐᐳᑦ, ᑲᑕᒃᓯᒪᔪᓄᑦ ᑲᑕᖃᑕᐅᓂᐊᕐᐳᑦ, ᓱᒋᐊᓕᕈᒃᑭᑦ ᓱᓇᐅᔪᓐᓃᕈᒫᕐᐳᑦ ᐊᑕᓂᖅ ᐅᖃᕐᐳᖅ.
13“ᑲᑎᕐᓱᐃᕕᖃᕈᓐᓃᕐᑎᑦᓱᒫᕐᐸᒃᑲ ᐊᑕᓂᖅ ᐅᖃᕐᐳᖅ, ᐅᕐᐱᒐᖁᑎᖏᑦ ᕔᓂᒃᓴᓂᒃ ᐸᐅᕐᖓᑕᖃᕈᓐᓃᕐᓗᑎᒃ ᓇᐹᕐᑐᖁᑎᖏᓪᓗ ᐱᕈᕐᕕᐅᔪᓐᓇᕈᓐᓃᕐᓗᑎᒃ ᐸᐅᕐᖓᓂᒃ ᐅᖃᐅᔭᖏᓪᓗ ᑐᖁᓕᔪᒫᕐᐳᑦ ᑐᓂᑦᔪᑎᒋᓚᐅᕐᑕᓐᓂᒃ ᐊᕐᓵᕐᑕᐅᔪᒫᕐᐳᑦ.
14“ᖃᓄᐃᒻᒪᑦ ᑲᑎᒪᓪᓗᑕ ᐃᒃᓯᕚᑐᐃᓐᓇᕐᐱᑖ? ᕿᒫᓚᐅᕐᑕ ᐃᒡᓗᒐᓴᒡᔪᐊᓄᑦ ᐱᔭᐅᑦᔧᕐᓯᒪᔪᓄᑦ ᑐᖁᔭᕐᑐᕐᓗᑕ. ᐊᑕᓂᐅᑉ ᒎᑎᑦᑕ ᑐᖁᔪᒃᓴᐅᖁᓕᕐᒪᑎᒍᑦ, ᑐᖁᓐᓇᕐᑐᒥᒡᓗ ᐃᒥᖁᑎᖃᓕᕐᑎᒻᒪᑎᒍᑦ, ᐊᔪᕐᑐᓕᕕᒋᓚᐅᕋᑦᑎᒍ. 15ᖃᓄᐃᖏᑦᓯᐊᕐᓇᕐᑐᒥᒃ ᓂᕆᐅᓚᐅᕋᓗᐊᕐᐳᒍᑦ, ᐋᖅᑭᒃᑕᐅᓇᕐᑐᒥᒡᓗ, ᑭᓯᐊᓂᓕ ᑲᑉᐱᐊᓇᕐᑐᐃᓐᓁᑦ ᑎᑭᑉᐳᑦ. 16ᐊᑭᕋᑦᑕ ᕿᒻᒥᕐᔪᐊᖏᑕ ᓂᓪᓕᐊᓂᖏᑦ ᑐᓴᕐᓴᐅᓕᕐᐳᑦ ᓄᓇᒥᑦ ᑖᓐᒥᐅᓂᑦ ᐱᔪᑦ, ᕿᒻᒥᕐᔪᐊᖏᑕ ᐊᖑᑕᐅᓂᖏᑕ ᓂᑦᔮᓂᖏᓐᓄᑦ ᓄᓇᓕᒫᖅ ᓴᔪᒃᐱᓗᓕᕐᐳᖅ. ᕾᓕᕐᐳᑦ ᓱᓁᕈᑦᔨᔭᕐᑐᕐᓗᑎᒃ ᓄᓇᒥᒃ, ᐃᒡᓗᒐᓴᒡᔪᐊᖏᓐᓂᒡᓗ ᐃᓄᐃᕈᑦᔨᔭᕐᑐᕐᓗᑎᒃ.
17“ᑕᑯᒋᑦ, ᑎᑭᑕᐅᑎᑦᓱᒫᕐᐸᑦᓯ ᖁᒡᓗᒋᐊᕐᔪᐊᓂᒃ ᑐᖁᓐᓇᕐᑐᖃᕐᑐᓂᒃ ᓯᓔᕐᕆᔭᒃᓴᐅᖏᑦᑐᓂᒃ, ᑖᒃᑯᐊᓗ ᑮᔪᒫᕐᐹᓯ,” ᐊᑕᓂᖅ ᐅᖃᕐᐳᖅ.
ᔨᕆᒤᐅᑉ ᕿᒃᓵᒍᑎᖃᕐᓂᖓ ᐃᓅᖃᑎᒥᓂᒃ
18ᕿᒃᓵᓕᕋᒪ ᒪᓂᒍᒐᒃᓴᐅᖏᑦᑐᒥᒃ; ᐆᒻᒪᑎᒐ ᓄᑮᕈᑎᕗᖅ ᐃᓗᓐᓂ.
19ᐃᓅᖃᑎᒪ ᐊᔪᐃᓐᓇᕐᓗᑎᒃ ᕿᓄᓂᖏᑦ ᐅᖓᓯᒃᑐᒥᑦ ᑐᓴᒃᑭᑦ,
ᐊᑕᓂᖅ ᓮᐅᓂᒦᑦᑐᓐᓃᕐᐹ?
ᐊᖓᔪᖅᑳᕐᔪᐊᖁᑎᖓ ᑍᑲᓃᑦᓱᓐᓃᕐᐹ?
ᓱᖕᒪᑦ ᓂᓐᖓᒃᑎᓐᓇᓱᐊᕐᐹᖓ?
ᓴᓇᓐᖑᐊᕐᓯᒪᓪᓗᑎᒃ ᒎᑎᓐᖑᐊᕐᑖᕆᓯᒪᔭᒥᖕᓄᑦ
ᓄᓇᖃᑎᒋᓐᖏᑕᒥᖕᓂᑦ ᐱᑖᕆᓯᒪᔭᒥᖕᓄᑦ.
20ᑲᑎᕐᓱᐃᕕᒃ ᐱᕈᕐᑐᓂᒃ ᐊᓂᒍᕐᓯᒪᓕᕐᐳᖅ,
ᐊᐅᔭᕐᓗ ᐃᓱᓕᓪᓗᓂ.
ᓱᓕᓕ ᐱᐅᓕᔭᐅᓐᖏᓚᒍᑦ.
21ᐃᓄᖁᑎᒪ ᑭᓪᓕᒃᑕᐅᓂᖏᓐᓄᑦ ᐆᒻᒪᑎᒐ ᑭᓪᓕᒃᑕᐅᖃᑕᐅᕗᖅ,
ᕿᒃᓵᒃᐳᖓ ᑲᑉᐱᐊᓱᖃᑕᐅᓪᓗᖓᓗᑦᑕᐅᖅ.
22ᓄᓇᒥ ᒋᓕᐊᑎᒥᐅᓂ ᐊᓪᓚᕈᑦᔭᒐᕐᑕᖃᓐᖏᓛᖅ? ᐃᓅᓕᓴᐅᑎᒃᓴᒥᒃ?
ᐋᓐᓂᐊᓯᐅᑎᑕᖃᕈᓐᓃᕐᒫᑦ ᑍᑲᓂ?
ᐃᓄᖁᑎᒪ ᑭᓪᓕᖏᓐᓄᑦ ᐋᖅᑭᒃᑕᐅᓇᕐᑐᕐᑕᖃᕈᓐᓃᕐᐹ?
Currently Selected:
ᔨᕆᒤᐊᐅᑉ ᐊᒡᓚᖏᑦ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
