ᔨᕆᒤᐊᐅᑉ ᐊᒡᓚᖏᑦ 5
5
ᔨᕉᓴᓕᒥᐅᑦ ᐊᔪᕐᑐᓕᓂᖏᑦ
1ᔨᕉᓴᓕᒥᐅᑕᐅᔪᓯ ᐊᖅᑯᑎᓯ ᐱᓱᑲᑕᒡᓗᒋᑦ ᕿᓂᓚᐅᕆᑦᓯ, ᑲᑎᕕᐅᕙᒃᑐᓪᓗ ᐃᓄᖕᓄᑦ, ᑕᑯᔪᓐᓇᕐᒪᖔᑦᓯ ᐊᑕᐅᓯᕐᒥᒃ ᐊᑲᐅᔪᒥᒃ ᐃᓅᓇᓱᐊᕐᑐᒥᒃ ᓱᓕᔪᒥᒡᓗ ᐃᓕᖅᑯᓯᖃᕋᓱᐊᕐᑐᒥᒃ ᐃᓄᒃᑕᖃᕐᒪᖔᑦ, ᑕᕝᕙ ᔨᕉᓴᓕᒻ ᐃᓱᒪᒋᔪᓐᓁᕐᕕᒋᓂᐊᕐᐸᕋ. 2ᐅᖃᕋᓗᐊᕐᓗᑎᒃ ᐊᑕᓂᐅᑉ ᐊᑎᖓᓂ ᐱᓂᐊᕐᓂᕋᕐᓗᑎᒃ ᑭᓯᐊᓂᓕ ᓱᓕᑎᑦᓯᕙᓐᖏᓚᑦ ᐅᖃᕐᑕᒥᖕᓂᒃ. 3ᐊᑕᓃᖅ, ᓱᓕᔪᓂᒃ ᕿᓂᕐᐳᑎᑦ, ᐋᓐᓂᕋᓗᐊᕋᕕᒋᑦ ᐃᒃᐱᖕᓂᓐᖏᓚᑦ, ᐱᕕᒃᓮᕈᑎᒐᓗᐊᕋᕕᒋᑦ ᓱᓕ ᐋᖅᑭᒋᐊᕈᒪᓐᖏᓚᑦ. ᑮᓇᖏᑦ ᓴᖑᑎᑕᒃᓴᐅᖏᑦᑐᑎᑐᑦ ᑕᐅᑦᑐᖃᕐᐳᑦ ᓵᒋᐊᕈᒪᓇᑎᒡᓗ. 4ᐃᓱᒪᓚᐅᕐᐳᖓ, ᐊᔪᕐᓴᕐᑑᓂᕐᒥᖕᓄᑦ ᑍᒤᑦᔪᑎᖃᕋᓱᒋᓪᓗᒋᑦ, ᓯᓔᑦᔪᑎᖃᕋᓱᒋᓚᐅᕐᐸᒃᑲᓗ ᓇᓗᒐᒥᒃ ᒎᑎᐅᑉ ᐱᖁᔭᖓᓂᒃ, ᐱᓂᐊᕐᓂᐅᖁᔭᖏᓐᓂᒡᓗ. 5ᐊᖓᔪᖅᑳᓄᑦ ᐂᓂᐊᕐᐳᖓ, ᐅᖃᓪᓚᒡᕕᒋᓗᒋᓪᓗ ᓇᓗᓇᓐᖏᓚᖅ ᖃᐅᔨᒪᒐᔭᕐᒪᑕ ᐊᑕᓂᐅᑉ ᐱᖁᔭᖓᓂᒃ, ᐱᓂᐊᕐᑕᐅᖁᔭᖏᓐᓂᒡᓗ, ᑭᓯᐊᓂᑦᑕᐅᖅ ᓇᖕᒪᐅᑎᒥᖕᓂᒃ ᓱᕅᓯᒪᕗᑦ, ᕿᓚᕈᑎᖏᓪᓗ ᕿᒃᑐᕋᕐᓗᒋᑦ. 6ᑕᒪᓐᓇ ᐱᓪᓗᒍ ᓛᔭᒧᑦ ᓇᐹᕐᑐᐃᑦ ᐊᑯᓐᓂᖓᓂ ᑐᖁᑕᐅᓂᐊᕐᐳᑦ. ᐊᒪᕈᕐᓄᓪᓗ ᓱᓇᖃᔪᐃᑦᑐᒥᑦ ᐱᔪᓄᑦ ᐹᔭᐅᓂᐊᕐᐳᑦ. ᐃᕐᓯᓇᕐᑐᒧᓪᓗ ᓕᐅᐸᕐᑦᒧᑦ ᐅᑕᖅᑭᔭᐅᓂᐊᕐᐳᑦ ᓄᓇᓕᖏᑕ ᖃᓂᒋᔭᖏᓐᓂ, ᓄᓇᓖᓪᓗ ᓯᓚᑖᓄᐊᕐᑐᑦ ᐅᒋᐊᕐᑕᓂᐊᕐᐳᑦ, ᑕᒻᒪᕐᓯᒪᓂᖓᑦ ᐊᖏᓗᐊᓕᕐᒪᑦ, ᑲᑕᒍᑎᒋᓯᒪᔭᖏᓪᓗ ᐅᓄᓗᐊᓕᕐᓗᑎᒃ. 7“ᓱᖕᒪᑦ ᐃᓱᒪᒋᔪᓐᓁᕐᕕᒋᔭᖃᕐᑐᒃᓴᐅᕗᖔ ᐃᓕᑦᓯᓐᓂᒃ? ᕿᑐᕐᖓᓯ ᐊᒡᓛᑦ ᒪᓕᒍᒪᔪᓐᓁᕐᐳᑦ ᐅᕙᓐᓂᒃ, ᐊᖏᒻᒪᕆᒃᐸᒡᓗᑎᒡᓗ ᒎᑎᓐᖑᐊᑦ ᐊᑎᖏᑦ ᐊᑐᕐᓗᒋᑦ. ᐃᓅᑦᔪᑎᒃᓴᓕᒫᖏᓐᓂᒃ ᐊᔪᕐᓴᕐᑎᖏᒃᑲᓗᐊᕋᒃᑭᑦ, ᓱᓕᓕ ᐊᓯᓐᓂᐊᕐᐳᑦ, ᐊᖑᓐᓂᐊᕐᑎᓪᓗ ᐃᒡᓗᖏᓐᓃᖃᑦᑕᕐᓗᑎᒃ. 8ᕿᒻᒥᕐᔪᐊᑎᑐᑦ ᓂᕆᑎᑕᐅᑦᓯᐊᖃᑦᑕᕐᑐᑎᑐᑦ ᐱᔪᒪᓂᕾᓐᓇᕐᐳᑦ, ᓯᓚᖅᑲᑎᒥ ᓄᓕᐊᖓᓂᒃ ᐃᒡᓕᒍᓱᓂᖃᕐᒪᑕ. 9ᓱᒋᐊᕐᓯᔪᒃᓴᐅᓐᖏᓚᖔ ᐃᓕᖅᑯᓯᕆᔭᖓᑦ ᐱᓪᓗᒍ? ᐊᑭᓂᐊᕐᑐᒃᓴᐅᓐᖏᓚᖔ? ᐃᓅᖃᑎᒌᒡᔪᐊᓄᑦ ᑍᒤᓕᐅᕐᑐᓄᑦ? 10ᐸᐅᕐᖓᓕᒃᓴᓂᒃ ᐱᕈᕐᓰᕕᖁᑎᖏᑦ ᐊᓯᕈᓕᕐᓯᐅᒃ, ᑭᓯᐊᓂ ᓄᖑᑎᒻᒪᕆᒃᑍᓕᓗᒋᑦ, ᐊᕙᓚᖓᔪᖏᑦ ᐱᕈᕐᕕᐅᔪᒃᓴᑦ ᓇᑲᑎᕐᓗᒋᑦ, ᑖᒃᑯᐊ ᐊᑕᓂᐅᑉ ᐱᒋᖏᒻᒪᒋᑦ. 11ᐃᓴᕆᐊᓕᒥᐅᑦ ᔫᑕᒥᐅᓪᓗ, ᐊᓯᓐᓂᐊᓚᐅᕐᒫᖓ, ᐊᑕᓂᖅ ᐅᖃᕐᐳᖅ.”
ᐊᑕᓂᐅᑉ ᖁᔭᓈᕐᓯᓂᖓ ᐃᓴᕆᐊᓕᒥᐅᓂᒃ
12ᐊᑕᓂᖅ ᓴᒡᓗᑎᒋᓪᓗᒍ ᐅᖃᓚᐅᕐᒪᑕ ᐅᖃᕐᓗᑎᒃ, “ᖃᓄᐃᓕᐅᑦᔮᖏᓐᓚᖅ ᐅᕙᑦᑎᓐᓂᒃ, ᐊᓯᕈᕐᓇᕐᑐᒧᑦ ᑎᑭᑕᐅᑦᔮᓐᖏᓚᒍᑦ, ᐅᓇᑕᕐᑐᓂᒃ ᑳᖕᓇᕐᑐᒥᒡᓘᓐᓃᑦ ᑕᑯᓚᐅᕐᓯᒪᑦᔮᓐᖏᓚᒍᑦ.” 13ᒎᑎᐅᑉ ᐅᖃᕐᑎᖏᑦ ᐊᓄᕆᑐᐃᓐᓇᐅᕗᑦ, ᐊᑕᓂᐅᓪᓗ ᐅᖃᐅᓯᖓᓂᒃ ᐅᖃᕐᐸᓐᖏᓚᑦ. ᐅᖃᐅᓯᕆᖃᑦᑕᕐᑕᖏᑦ ᑲᑉᐱᐊᓇᕐᑐᑦ ᑖᒃᑯᓄᖓᑐᐊᖅ ᑐᕌᕐᐳᑦ. 14ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, “ᑍᒫᒃ ᐃᓄᐃᑦ ᐅᖃᖃᑦᑕᕐᒪᑕ, ᑕᑯᒋᑦ ᐅᖃᐅᓯᕋ ᖃᓂᕐᓂ ᐃᑯᐊᓚᔪᑎᑐᑦ ᑍᒤᑎᓐᓂᐊᕐᐸᕋ, ᐃᓄᐃᓪᓗ ᑖᒃᑯᐊ ᐃᑯᒪᒧᑦ ᕿᔪᒃᓴᑎᑐᑦ ᑍᒤᑎᓪᓗᒋᑦ. 15ᐃᓴᕆᐊᓕᒥᐅᓄᑦ, ᐊᑕᓂᖅ ᐅᖃᕐᐳᖅ, ᑎᓕᓯᓂᐊᕐᐳᖓ ᐃᓅᖃᑎᒌᒡᔪᐊᓂᒃ ᐅᖓᓯᒃᑐᒥᑦ ᐱᔪᓂᒃ ᐃᓕᑦᓯᓐᓂᒃ ᐅᓇᑕᕆᐊᕐᑐᕐᑐᓂᒃ. ᐃᓅᖃᑎᒌᒡᔪᐊᑐᖃᐅᔪᓂᒃ ᐱᔪᓐᓇᕐᓂᖃᑦᓯᐊᕐᑐᓂᒃ, ᐅᖃᐅᓯᖃᖃᑎᒋᓐᖏᑕᑦᓯᓐᓂᒃ ᐅᖃᐅᓯᖏᓪᓗ ᑐᑭᓯᓂᐊᓐᖏᓚᓯ. 16ᐱᑎᒃᓯᖃᐅᑎᖏᑦ ᐃᓗᕕᕐᑎᑐᑦ ᒪᑐᐃᖓᔪᑎᑐᑦ ᑍᒤᑉᐳᑦ, ᐊᔪᖏᑦᑐᕐᔪᐊᑦ. 17ᑲᑎᕐᓱᓯᒪᔭᓯ ᐱᕈᕐᑐᑦ ᓂᕿᓯᓗ ᓂᕆᓗᒋᑦ ᓄᖑᓐᓂᐊᕐᐰᑦ, ᐃᕐᓂᓯᓗ ᐸᓂᓯᓗ ᑐᖁᕋᕐᓗᒋᑦ ᐆᒪᔪᖁᑎᓯᓗ ᓂᕆᓂᐊᕐᐰᑦ, ᕔᓂᒃᓴᓂᒡᓗ ᐸᐅᕐᖓᓕᖁᑎᓯ ᐅᕐᐱᒊᑦ, ᓇᐹᕐᑐᐃᓪᓗ ᐱᒋᓖᑦ ᓱᒃᑯᓐᓂᐊᕐᐰᑦ. ᐅᓇᑕᕐᑎᖁᑎᖏᑕᓗ ᐃᒡᓗᒐᓴᒡᔪᐊᖁᑎᓯ ᐱᔭᐅᑦᔧᕐᓯᒪᓇᓱᒋᓚᐅᕐᑕᓯ ᓱᕋᒃᑎᕐᓂᐊᕐᐰᑦ.” 18ᑍᒤᑕᐅᒐᓗᐊᕐᑎᓪᓗᓯ ᐅᓪᓗᓂ ᑍᑯᒃᓇᓂ, ᐊᑕᓂᖅ ᐅᖃᕐᐳᖅ, ᓄᖑᑕᐅᑎᒻᒪᕆᖕᓂᐊᓐᖏᓚᑦᓯ. 19ᐃᓄᐃᓪᓗ ᐊᐱᕆᒃᐸᑕ, “ᖃᓄᐃᒻᒪᑦ ᐊᑕᓂᐅᑉ ᒎᑎᑦᑕ ᑍᒤᓕᐅᕐᑕᐅᑎᑉᐹᑎᒎᑦ? ᐅᖃᐅᑎᔭᒃᓴᕆᕙᑎᑦ, ᓄᓇᒋᔭᑦᓯᓐᓃᒃᑲᓗᐊᕐᓗᓯ ᐅᕙᓐᓂᒃ ᕿᒤᓪᓗᓯ ᐊᓯᑦᓯ ᒎᑎᒋᔭᖏᓐᓂᒃ ᒪᓕᖔᓕᓚᐅᕋᑦᓯ, ᓄᓇᒋᓐᖏᑕᑦᓯᓐᓃᓪᓗᓯ ᔫᑎᐅᖏᑦᑐᓄᑦ ᐊᐅᓚᑕᐅᓕᕈᒫᕐᐳᓯ.”
ᒎᑎᐅᑉ ᐃᓂᕐᑎᕆᓂᖓ ᐃᓄᖁᑎᒥᓂᒃ
20ᐊᑕᓂᖅ ᐅᖃᕐᐳᖅ, “ᔧᑰᑉ ᑭᖑᕚᖏᓐᓄᑦ, ᔫᑕᒥᐅᓄᓪᓗ ᑕᒪᓐᓇ ᐅᖃᐅᓯᕆᒍᒃ. 21#ᐂᓮᐊᓯ 6:9,10; ᐃᓯᑭᐊᓕ 12:2; ᒫᑯᓯ 8:18.ᑐᓴᓕᕆᑦᓯ, ᐃᓕᑦᓯ ᓯᓔᑦᑐᓯ, ᐃᓱᒪᖃᑦᓯᐊᖏᑦᑐᓯᓗ ᐃᔨᖃᕋᓗᐊᕐᓗᓯ ᑕᐅᑐᖏᑦᑐᓯ, ᓯᐅᑎᖃᕋᓗᐊᕐᓗᓯᓗ ᑐᓵᖏᑦᑐᓯ. 22#ᔫᐱ 38:8-11.ᐅᕙᓐᓃᒃ ᓯᕘᕋᔪᒃᓴᐅᓐᖏᓚᓰ? ᐊᑕᓂᖅ ᐅᖃᕐᐳᖅ, ᓴᔪᒃᑐᒃᓴᐅᓐᖏᓚᓰ ᓵᓐᓂ? ᓯᐅᕋᖅ ᑭᒡᓕᒋᔭᐅᑎᓐᓇᒃᑯ ᑕᕆᐅᕐᒧᑦ: ᑕᕆᐅᖅ ᖄᖏᓚᐅᕐᓯᒪᓂᐊᕈᓐᓃᕐᑎᓪᓗᒍ ᐃᓱᖃᖏᑦᑐᒧᑦ, ᒪᓪᓕᕐᑕᐅᖃᑦᑕᕐᓂᐊᕋᓗᐊᕐᐳᖅ ᑭᓯᐊᓂᓕ ᓄᖅᑲᕐᑕᕐᕕᒌᓐᓇᐅᔭᕐᓂᐊᕐᐹ ᒪᓕᐊᓗᐃᑦ ᓯᒡᔭᒧᑦ ᒥᕿᑦᑕᕐᐸᖕᓂᐊᕋᓗᐊᕐᐳᑦ ᑭᓯᐊᓂᓕ ᐅᖓᑖᓄᐊᕈᓐᓇᕐᓂᐊᓐᖏᓚᑦ ᐃᒪᐅᑉ ᑎᑭᑦᑕᕆᐊᖃᓐᖏᑕᖓᓄᑦ. 23ᐃᓄᐃᑦ ᑖᒃᑯᐊ ᓯᑎᔪᒥᒃ ᐊᑭᕋᕐᑐᕐᑐᒥᒃ ᐆᒻᒪᑎᓖᑦ, ᐅᕙᓐᓄᑦ ᒪᓕᒍᒪᖏᓐᓇᒥᒃ ᑐᓄᐃᓯᒪᕗᑦ. 24ᐃᓱᒪᓇᓱᐊᓐᖏᓚᓪᓘᓐᓃᑦ ᐊᑕᓂᖅ ᒎᑎᑎᒃ ᓯᕘᕋᒋᔪᒪᓗᒍ, ᐅᑭᐊᒃᓵᒃᑯᑦ ᐅᐱᕐᖔᒃᑯᓪᓗ ᓇᓪᓕᐅᑎᔭᕌᖓᑦ ᓯᓚᓗᒃᑎᑦᓯᕙᒃᑐᒥᒃ, ᐱᕈᕐᑐᓂᒡᓗ ᐱᕈᕇᕐᑎᑦᓯᕙᒃᑐᒥᒃ ᑲᑎᕐᓱᕐᑕᐅᕕᒃᓴᖏᓐᓂ ᑲᑎᕐᓱᕐᑕᐅᕙᖁᓪᓗᒋᑦ. 25ᓈᒻᒪᖏᑦᑐᓕᓂᑦᓯᓐᓄ ᑕᒪᒃᑯᐊ ᓇᓪᓕᐅᓐᓂᕐᓗᓕᕐᐳᑦ, ᐊᔪᕐᑐᓕᓂᑦᓯᓐᓄᓪᓗ ᐱᐅᔪᑦ ᐱᔭᒃᓴᕋᓗᐊᓯ ᐱᕙᒍᓐᓃᕐᐸᓯ. 26ᐃᓄᖁᑎᒃᑲ ᐃᓚᖃᐅᓕᕐᐳᑦ, ᐱᐅᖏᑦᑐᓕᔪᓂᒃ, ᐅᑕᖅᑭᔪᑎᑐᑦ ᑎᖕᒥᐊᓂᒃ ᓂᒐᕐᑎᓐᓂᐊᕐᑕᒥᖕᓂᒃ, ᐃᓄᖕᓄᓪᓗ ᐊᔪᓕᕐᕕᐅᒐᔭᕐᑐᓂᒃ ᐋᖅᑭᒃᓯᓯᒪᕗᑦ. 27ᑎᖕᒥᐊᓄᓪᓗ ᑎᒍᐊᖃᕐᕕᒃᑎᑐᑦ, ᐃᒡᓗᖏᑦ ᑕᑕᑉᐳᑦ ᓴᒡᓗᕿᑦᑎᑦᔪᑎᒃᓴᒥᖕᓂᒃ, ᑍᒤᒻᒪᑦ ᐃᒻᒥᖕᓂᒃ ᐊᔪᕐᓴᕈᓐᓃᕐᑎᑉᐳᑦ. 28ᓂᕆᓂᕐᒧᓪᓗ ᖁᐃᓂᔫᓕᕐᐳᑦ, ᐱᐅᖏᑦᑐᓂᒡᓗ ᐱᓇᓱᐊᕐᓂᖏᑦ ᐃᓱᓕᑦᑐᓐᓇᓐᖏᓚᑦ, ᐊᑖᑕᖃᖏᑦᑐᓄᑦ ᐱᓇᓱᐊᕐᓂᖏᑦ ᓈᒻᒪᓐᖏᓚᑦ, ᐊᔪᕐᓴᕐᑐᓂᒡᓗ ᐃᑲᔪᕐᑐᐃᓐᖏᓚᑦ. 29ᑕᒪᒃᑯᓄᖓ ᓱᒋᐊᕆᐊᖃᓐᖏᓚᒃᑳ? ᐊᑕᓂᖅ ᐅᖃᕐᐳᖅ, ᐊᑭᓂᐊᕐᑐᒃᓴᐅᓐᖏᓚᖔ ᐃᓅᖃᑎᒋᒡᔪᐊᓂᒃ ᑍᒤᓕᐅᕐᑐᓃᒃ? 30ᑲᑉᐱᐊᓇᕐᑐᒥᒃ ᖁᐊᕐᓵᖓᓇᕐᑐᒥᒡᓗ ᓄᓇᒧᑦ ᓇᓪᓕᐅᑎᓯᒪᔪᖃᕐᐳᖅ. 31ᒎᑎᐅᑉ ᐅᖃᕐᑎᖏᑦ ᐅᖃᐅᓯᖃᕐᒪᑕ ᓱᓕᖏᑦᑐᓂᒃ, ᑐᓂᕐᕈᓯᕐᑎᑦᓯᔩᓪᓗ ᓇᖕᒥᓂᖅ ᐊᑐᕈᒪᔭᒥᖕᓂᒃ ᑭᓯᐊᓂ ᐊᐅᓚᑦᓯᔪᒪᖕᒪᑕ, ᐃᓄᖁᑎᒪᓗ ᑍᒫᒃ ᖁᕕᐊᒋᓪᓗᓂᑦᔪᒃ ᖃᓄᕐᓕ ᐱᔪᒫᕐᐹᑦ ᑕᒪᓐᓇ ᐃᓱᓕᑉᐸᑦ?”
Currently Selected:
ᔨᕆᒤᐊᐅᑉ ᐊᒡᓚᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
