ᔨᕆᒤᐊᐅᑉ ᐊᒡᓚᖏᑦ 36
36
ᐸᕉᑉ ᐊᒡᓚᓂᒃ ᐅᖃᓕᒫᕐᑎᑕᐅᓂᖓ ᑐᒃᓯᐊᕐᕕᒡᔪᐊᒥ
1 #
ᐊᑕᓃᑦ ᐂᑉᐸᖏᑦ 24:1; ᑯᕉᓂᑲ ᐂᑉᐸᖏᑦ 36:5-7; ᑖᓂᐊᓕ 1:1,2. ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᓂᖓᑕ ᔫᑕᒥᐅᓄᑦ ᓯᑕᒪᒋᓕᕐᑕᖓᓐᓂ ᔫᓮᐊᐅᑉ ᐃᕐᓂᖓᑕ, ᔨᕆᒤᐊ ᐃᒫᒃ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ: 2“ᑎᑎᕋᕐᕕᒃᓴᒥᒃ ᐃᒧᓯᒪᔪᒥᒃ ᐱᓗᑎᑦ ᑎᑎᕋᓕᕆᑦ ᐅᖃᐅᓯᕆᖃᑦᑕᓚᐅᕐᑕᓕᒫᓐᓂᒃ ᐃᓴᕆᐊᓕᒥᐅᑦ ᐱᑦᔪᑎᒋᓪᓗᒋᑦ, ᔫᑕᒥᐅᓪᓗ ᐊᓯᖏᓪᓗ ᐃᓅᖃᑎᒌᒡᔪᐊᑦ, ᔫᓮᐊ ᐊᖓᔪᖅᑳᕐᔪᐊᖑᑎᓪᓗᒍ ᐅᖃᖃᑦᑕᓚᐅᕐᑕᒃᑲ ᐱᒋᐊᕐᕕᒋᓗᒋᑦ ᐅᓪᓗᒥᒧᑦ ᑎᑭᓪᓗᒋᑦ. 3ᐃᒻᒪᖄ ᔫᑕᒥᐅᑦ ᑖᕙᓐᖓᓂᑦ ᑲᑉᐱᐊᓇᕐᑐᓂᒃ ᑎᑭᑦᑐᖃᕈᒫᕐᓂᖓᓂᒃ ᐅᖃᖃᑦᑕᕐᓂᕆᓕᓚᐅᕐᑕᕋ ᑐᓴᓕᕈᓂᑦᔪᒃ ᓵᒋᐊᕈᓐᓇᕐᓯᒐᔭᕐᐳᑦ ᐱᐅᖏᑦᑐᓕᓯᒪᓂᕐᒥᖕᓂᑦ, ᑕᕝᕙ ᐱᐅᖏᑦᑐᓕᓯᒪᓂᖏᑦ ᐊᔪᕐᑐᓕᓂᖏᓪᓗ ᐃᓱᒪᒋᔪᓐᓁᕋᔭᕐᐸᒃᑲ.”
4ᔨᕆᒤᐊᑉ ᐸᕉᒃ ᓂᕅᐊᐅᑉ ᐃᕐᓂᖓ ᕾᖁᓚᐅᕐᐹ, ᔨᕆᒤᐊ ᐅᖃᓪᓚᒃᐸᓪᓕᐊᑎᓪᓗᒍ ᐱᐅᕋᒃ ᑎᑎᕋᕐᕕᒃᓴᒃᑯᑦ ᐃᒧᑦᑕᕐᑐᒃᑯᑦ ᑎᑎᕋᖁᓪᓗᒍ, ᐊᑕᓂᐅᑉ ᐅᖃᐅᓯᕆᓚᐅᕐᑕᓕᒫᖏᓐᓂᒃ ᑖᑦᓱᒧᖓ. 5ᔨᕆᒤᐊᐅᓪᓗ ᐸᕉᒃ ᐅᖃᐅᑎᕚ, “ᐊᓂᔪᓐᓇᕐᑎᑕᐅᖏᓐᓂᓐᓄᑦ ᐊᑕᓂᐅᑉ ᐃᒡᓗᖓᓄᑦ ᐃᑎᕈᓐᓇᖏᓐᓇᒪ. 6ᑐᒃᓯᐊᕐᕕᒃᔪᐊᕐᒧᐊᕐᓗᑎᑦ ᓂᕆᑦᑍᓕᕕᒃ ᓇᓪᓕᐅᓯᒪᓕᕐᐸᑦ ᐃᓄᐃᑦ ᐅᖃᓕᒫᕐᕕᒋᓛᕐᐸᑎᑦ ᐅᖃᓪᓚᒃᐸᓪᓕᐊᑎᓪᓗᖓ ᑎᑎᕋᖅᑲᐅᔭᕐᓂᒃ ᐃᒧᑦᑕᕐᑐᒃᑯᑦ. ᐅᖃᓕᒫᕐᕕᒋᓛᕐᐸᑎᑦ ᔫᑕᒥᐅᓕᒫᑦ ᑎᑭᓯᒪᔪᑦ ᓄᓇᓕᖁᑎᒥᖕᓂᑦ. 7ᐃᒻᒪᖄ ᐊᑕᓂᕐᒧᑦ ᕿᓄᔪᓐᓇᕐᓯᒐᔭᕐᒪᑕ, ᐊᑐᓂᓪᓗ ᓵᒋᐊᕐᓗᑎᒃ ᐱᐅᖏᑦᑐᓕᓂᕐᒥᖕᓂᑦ, ᐊᑕᓂᐅᑉ ᓂᓐᖓᕕᒃᔪᐊᕐᓂᕐᒥᓄᑦ ᓱᒋᐊᕐᓯᔪᒪᓂᖓ ᐊᖏᔪᐊᓘᖕᒪᑦ ᑖᒃᑯᓄᖓ.” 8ᐸᕉᒃ ᓂᕅᐊᐅᑉ ᐃᕐᓂᖓ ᐱᓇᓱᐊᓚᐅᕐᐳᖅ ᔨᕆᒤᐊᐅᑉ ᒎᑎᐅᑉ ᐅᖃᕐᑎᖓᑕ ᐱᓇᓱᐊᕐᑕᐅᖁᔭᓕᒫᖏᓐᓂᒃ, ᑐᒃᓯᐊᕐᕕᒃᔪᐊᕐᒥ ᐅᖃᓕᒫᓚᐅᕐᐳᖅ ᐊᑕᓂᐅᑉ ᐅᖃᐅᓯᖏᓐᓂᒃ ᐊᒡᓚᖕᓂᑦ ᐃᒧᓯᒪᔪᓂᓐᖔᕐᑐᓂᒃ.
9ᔫᓮᐊᐅᑉ ᐃᕐᓂᖓᑕ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᓂᖓᑕ ᔨᕉᓴᓕᒥ ᑕᓪᓕᒪᒋᓕᕐᑕᖓᓐᓂ ᑕᖅᑭᖏᑕ 9ᖓᓐᓂ, ᐃᓄᐃᑦ ᓂᕆᑦᑍᓕᕗᑦ ᐊᑕᓂᕐᒧᑦ ᓈᒻᒪᒋᔭᐅᔪᒪᓪᓗᑎᒃ, ᑕᒪᓐᓇᓗ ᓂᕆᑦᑍᓕᕕᐅᓚᐅᕐᐳᖅ ᔨᕉᓴᓕᒥᐅᓕᒫᓄᑦ ᔫᑕᒥᐅᓄᓪᓗ ᓄᓇᓕᖕᓂᑦ ᑎᑭᓯᒪᔪᓄᑦ. 10ᐃᓄᐃᓪᓗ ᑐᓵᑎᓪᓗᒋᑦ, ᐸᕉᒃ ᐅᖃᓕᒫᓚᐅᕐᐳᖅ ᐊᑕᓂᐅᑉ ᐃᒡᓗᖓᓂ ᐊᒡᓚᖕᓂᑦ ᐃᒧᑦᑕᕐᑐᓂᑦ ᔨᕆᒤᐊᐅᑉ ᐅᖃᐅᓯᕆᓚᐅᕐᑕᖏᓐᓂᒃ, ᔭᒪᕅᐊᐅᑉ ᐃᒡᓗᕈᓯᖃᕐᕕᒋᔭᖓᓂᑦ ᓴᕙᓂᐅᑉ ᐃᕐᓂᖓᑕ ᐃᖅᑲᕐᑐᐃᔨᐅᔫᑉ ᑎᑎᕋᕐᑎᖓ, ᐃᒡᓗᕈᓯᖓ ᐃᓂᖃᓚᐅᕐᒪᑦ ᑐᒃᓯᐊᕐᕕᒃᔪᐊᒥ ᐃᑎᕐᑕᕐᕕᖕᒥᒃ ᓄᑖᒥᒃ ᑍᔭᐅᔫᑉ ᖁᓛᓂ.
ᐊᒡᓔ ᐃᒧᓯᒪᔪᑦ ᐅᖃᓕᒫᕐᑕᐅᓂᖏᑦ ᐊᖓᔪᖅᑳᓄᑦ
11ᒤᑬᐊᐅᑉ ᔭᒪᕅᐊᐅᑉ ᐃᕐᓂᖓᑕ ᓴᕙᓂᐅᑉ ᐃᕐᖑᑕᖓᑕ, ᐸᕉᒃ ᐊᑕᓂᐅᑉ ᐅᖃᐅᓯᖏᓐᓂᒃ ᐃᒧᑦᑕᕐᑐᒦᑦᑐᓂᒃ ᐅᖃᓕᒫᕐᑎᓪᓗᒍ ᑐᓴᕋᒥᐅᒃ. 12ᐊᖓᔪᖅᑳᑦ ᑲᑎᒪᕕᖓᓐᓄᐊᕐᐳᖅ ᑎᑎᕋᕐᑎᖓᓐᓄᑦ. ᐊᖓᔪᖅᑳᖑᔪᓪᓗ ᑲᑎᒪᕕᖕᒥᓃᑉᐳᑦ ᐅᑯᐊᖑᓪᓗᑎᒃ; ᐃᓔᓴᒪ ᐃᖅᑲᕐᑐᐃᕕᐅᑉ ᑎᑎᕋᕐᑎᖓ, ᑎᓔᐊ ᓯᒤᐊᐅᑉ ᐃᕐᓂᖓ, ᐃᐅᓪᓇᓴᓐ ᐂᒃᐹᕆᐅᑉ ᐃᕐᓂᖓ, ᔭᒪᕅᐊ ᓴᕙᓂᐅᑉ ᐃᕐᓂᖓ, ᔨᑎᑬᐊ ᕼᐊᓇᓁᐊᐅᑉ ᐃᕐᓂᖓ ᐊᓯᖏᓪᓗ ᐊᖓᔪᖅᑳᖑᔪᑦ ᑕᕝᕙᓃᓚᐅᕆᕗᑦ. 13ᒤᑬᐊᐅᑉ ᐅᓂᒃᑳᕐᕕᒋᕔᑦ ᑐᓴᕐᑕᒥᓂᒃ, ᐸᕉᒃᒧᑦ ᐅᖃᓕᒫᕐᑕᐅᖅᑲᐅᔪᓂᒃ ᐃᓄᖕᓄᑦ. 14ᑖᒃᑯᐊᓗ ᐊᖓᔪᖅᑳᖑᔪᑦ ᑎᓕᓯᕗᑦ ᔨᕼᐅᑍᒥᒃ ᓂᑕᓁᐊᐅᑉ ᐃᕐᓂᖓᓂᒃ, ᓯᓕᒤᐊᐅᑉ ᐃᕐᖑᑕᖓᓂᒃ, ᑯᓯᐅᑉ ᐃᓗᓕᖓᓂᒃ, ᑕᕝᕙ ᐸᕉᒃ ᓂᕅᐊᐅᑉ ᐃᕐᓂᖓ ᐅᖃᓕᒫᖅᑲᐅᔭᒥᓂᒃ ᐃᓄᖕᓄᑦ ᓇᒃᓴᖁᓪᓗᒍ, ᐸᕉᒃᓗ ᑖᒃᑯᓄᓐᖓᕐᐳᖅ ᐅᖃᓕᒫᖅᑲᐅᔭᓂ ᓇᒃᓴᕐᓗᓂᒋᑦ. 15ᑖᒃᑯᐊᓗ ᐸᕉᒃ ᐅᖃᐅᑎᕚᑦ, “ᐃᖏᓪᓗᑎᑦ ᐅᕙᑦᑎᓐᓄᑦ ᐅᖃᓕᒫᓚᐅᒃᑭᑦ.” ᐸᕉᑭᐅᑉ ᑕᕝᕙ ᐅᖃᓕᒫᕐᕕᒋᓕᕐᐰᑦ. 16ᐅᖃᓕᒫᕐᑕᖏᓐᓂᒃ ᑐᓴᕇᕋᒥᒃ ᐃᒥᖕᓄᑦ ᑕᑯᓴᖃᑦᑕᐅᑎᕗᑦ ᖁᐊᕐᓵᖓᓪᓗᑎᒃ, ᐸᕉᒃᓗ ᐅᖃᐅᑎᕚᑦ, “ᐊᖓᔪᖅᑳᕐᔪᐊᖅ ᑕᒪᒃᑯᓂᖓ ᑐᓴᕐᑎᑕᒃᓴᕆᕙᕗᑦ.” 17ᐸᕉᒃᓗ ᐊᐱᕆᕚᑦ, “ᖃᓄᕐᓕ ᑕᒪᒃᑯᐊ ᑎᑎᕋᕐᐱᒌᑦ? ᑍᑦᓱᒧᖔ ᐅᖃᓪᓚᒡᕕᐅᓪᓗᑏᑦ?”
18ᐸᕉᒃ ᑭᐅᕗᖅ, ᐅᖃᕐᓗᓂ, “ᐅᖃᕐᐸᓪᓕᐊᑎᓪᓗᒍ ᑎᑎᕋᕐᕕᒃᓴᒧᑦ ᐃᒧᓲᒧᑦ ᒥᓱᒃᑕᐅᒻᒧᑦ ᑎᑎᕋᓚᐅᕐᐸᒃᑲ.”
19ᐊᖓᔪᖅᑳᖑᔪᓪᓗ ᐸᕉᒃᒧᑦ ᐅᖃᕐᐳᑦ, “ᔨᕆᒤᐊᓗ ᐃᔨᕆᐊᕐᑐᕆᐊᖃᕐᐳᓯᒃ, ᑭᓇᑐᐃᓐᓇᕐᒧᑦ ᖃᐅᔨᒪᔭᐅᖏᑦᑐᒧᑦ.”
ᐊᖓᔪᖅᑳᕐᔪᐊᖅ ᐃᑯᐊᓪᓔᕗᖅ ᐊᒡᓚᖕᓂᒃ
20ᐃᓔᓴᒪᐅᑉ ᐃᖅᑲᕐᑐᐃᕕᐅᑉ ᑎᑎᕋᕐᑎᖓᑕ ᐊᒡᓔᑦ ᐃᒡᓗᕈᓯᖓᓄᐊᕐᑕᐅᕗᑦ, ᐊᖓᔪᖅᑳᓪᓗ ᐊᖓᔪᖅᑳᕐᔪᐊᕐᒧᐊᕐᐳᑦ ᑲᑎᒪᕕᖕᒦᑎᓪᓗᒍ ᐅᖃᓪᓚᒡᕕᒋᓪᓗᒍᓗ ᑐᓴᕐᑕᓕᒫᒥᖕᓂᒃ. 21ᐊᖓᔪᖅᑳᕐᔪᐊᓪᓗ ᔨᕼᐅᑍ ᐊᒡᓚᖕᓂᒃ ᐂᒡᓯᖁᕚ, ᔨᕼᐅᑍᓪᓗ ᐂᒐᒥᒋᑦ, ᐃᓔᓴᒪᐅᑉ ᐃᖅᑲᕐᑐᐃᕕᐅᑉ ᑎᑎᕋᕐᑎᖓᑕ ᐃᒡᓗᕈᓯᖓᓂᑦ, ᐊᖓᔪᖅᑳᕐᔪᐊᕐᒧᑦ ᐅᖃᓕᒫᕐᐰᑦ ᐊᖓᔪᖅᑳᖁᑎᖏᑦ ᓴᓂᐊᓃᑎᓪᓗᒋᑦ. 22ᑕᖅᑮᑦ 9ᒋᓚᐅᕐᒪᒍ ᐊᖓᔪᖅᑳᕐᔪᐊᖅ ᐅᑭᐅᒃᑯᑦ ᓇᔪᕐᐸᒃᑕᒥᓃᓐᓇᒥ, ᐃᑯᐊᓚᔫᑉ ᓴᓂᐊᓃᓚᐅᕐᐳᖅ, ᑖᑦᓱᒪᓗ ᐃᑯᐊᓚᔫᑉ ᕿᔪᒃᑐᕐᕕᐊᑕ ᓯᕗᕌᓃᑉᐳᖅ. 23ᔨᕼᐅᑍᓪᓗ ᐅᖃᓕᒫᕇᕐᐸᓪᓕᐊᔭᖏᑦ ᐊᖓᔪᖅᑳᕐᔪᐊᑉ ᓴᕕᖕᒧᑦ ᓇᑲᓪᓗᒋᑦ ᐃᑯᒪᒧᑦ ᐃᒋᑉᐸᓪᓕᐊᖕᒪᒋᑦ ᐅᖃᓕᒫᕇᕐᑎᓪᓗᒍ ᐃᑯᒪᒧᐊᕐᑍᓐᓇᕆᓚᐅᕐᐰᑦ. 24ᐊᖓᔪᖅᑳᕐᔪᐊᖅ ᐱᖃᑎᒋᔭᖏᓪᓗ ᐅᖃᐅᓯᕐᓂᒃ ᑐᓴᕋᓗᐊᕋᒥᒃ ᖁᐊᕐᓵᖓᓚᐅᓐᖏᓚᑦ ᐊᓐᓄᕌᒥᖕᓂᒡᓗ ᐊᓕᒃᓯᓇᑎᒃ. 25ᐃᐅᓪᓇᓴᓂᐅᓪᓕ, ᑎᓔᐊᐅᓪᓗ ᒐᒧᕅᐊᓪᓗ ᐊᖓᔪᖅᑳᕐᔪᐊᖅ ᐅᖃᐅᑎᒐᓗᐊᕐᐹᑦ ᐊᒡᓚᖕᓂᒃ ᐃᒧᑦᑕᕐᑐᓂᒃ ᐃᑯᐊᓪᓔᖁᓇᒍ, ᓈᓚᓚᐅᓐᖏᓚᖅ. 26ᐊᖓᔪᖅᑳᕐᔪᐊᕐᓕ ᐅᖃᖔᓚᐅᕐᐳᖅ, ᔨᕋᒥᐅᓪᓕ ᐃᕐᓂᓂ ᓯᕅᐊᓗ ᐊᔭᕆ-ᐃᐅᑉ ᐃᕐᓂᖓ ᓯᓕᒤᐊᓗ ᐊᐸᑎᐅᓕᐅᑉ ᐃᕐᓂᖓ ᑎᒍᓯᔭᕐᑐᖁᓪᓗᒋᑦ ᐸᕉᒃᒥᒃ ᐊᒡᓚᖕᓂᒃ ᑎᑎᕋᕐᑎᒥᒃ, ᔨᕆᒤᐊᒥᒡᓗ ᒎᑎᐅᑉ ᐅᖃᕐᑎᖓᓂᒃ, ᐊᑕᓂᐅᓪᓕ ᐃᔨᓚᐅᕐᐹᒃ.
ᔨᕆᒤᐊᑉ ᑎᑎᕋᕐᑎᑦᓯᒃᑲᓐᓂᕐᓂᖓ ᐊᒡᓚᖕᓂᒃ ᐃᒧᑦᑕᕐᑐᓂᒃ
27ᐊᖓᔪᖅᑳᕐᔪᐊᖅ ᐃᑯᐊᓪᓔᓚᐅᕐᑎᓪᓗᒍ ᐊᒡᓚᖕᓂᒃ ᐸᕉᑭᐅᑉ ᑎᑎᕋᕐᑕᕕᓂᖏᓐᓂᒃ ᔨᕆᒤᐊ ᐅᖃᕐᐸᓪᓕᐊᑎᓪᓗᒍ, ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ: 28“ᑎᑎᕋᕐᕕᒃᓴᒥᒃ ᐃᒧᑦᑕᕐᑐᒥᒃ ᐱᒃᑲᓐᓂᕐᓗᑎᑦ ᑎᑎᕋᓕᕐᒥᒋᑦ ᓯᕗᓪᓕᕐᒥ ᑎᑎᕋᕐᓯᒪᓚᐅᕐᑐᓕᒫᓂᒃ ᔫᑕᒥᐅᑦ ᐊᖓᔪᖅᑳᕐᔪᐊᖓᑕ ᔨᕼᐅᐃᐊᑭᐅᑉ ᐃᑯᐊᓪᓚᓚᐅᕐᑕᖏᓐᓂᒃ. 29ᔨᕼᐅᐃᐊᑭᒻᓗ ᔫᑕᐅᑉ ᐊᖓᔪᖅᑳᕐᔪᐊᖓ ᐅᖃᐅᑎᓗᒍ, ᐃᒫᒃ ᐊᑕᓂᖅ ᐅᖃᕐᐳᖅ, ᐊᒡᓔᑦ ᐃᒧᑦᑕᕐᑐᑦ ᐃᑯᐊᓪᓚᓕᕋᕕᒋᑦ ᐅᖃᓚᐅᕋᕕᑦ, ‘ᖃᓄᐃᒻᒪᑦ ᑎᑎᕋᐅᓯᖃᕐᐱᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓄᓇᕗᑦ ᐊᓯᕈᕐᑕᐅᔪᒫᕐᓂᕋᕐᓗᒍ ᐃᓄᐃᕈᑦᔭᐅᓗᓂ ᐆᒪᔪᖃᕈᓐᓃᕈᒫᕐᓂᕋᕐᓗᒍ?’ 30ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᐅᓯᒃᓴᖃᕐᐳᖅ ᔨᕼᐅᐃᐊᑭᒧᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ: ᑍᕕᑎᐅᑉ ᐊᖓᔪᖅᑲᐅᕕᖓᓂ ᐊᖓᔪᖅᑳᖑᔪᒃᓴᖁᑎᖃᕐᓂᐊᓐᖏᓚᑎᑦ, ᑎᒦᑦ ᐃᒋᑕᐅᔪᒫᕐᐳᖅ ᒪᓂᖅᑲᒧᑦ ᐅᓪᓗᒃᑯᑦ ᓯᕿᓂᕐᒧᑦ ᐆᑕᐅᖁᓪᓗᑎᑦ, ᐅᓐᓄᐊᒃᑯᓪᓗ ᖁᐊᕐᓇᕐᑐᒧᑦ ᐱᔭᐅᖁᓪᓗᑎᑦ. 31ᐱᐅᖏᑦᑐᓕᓂᓯ ᐱᓪᓗᒋᑦ ᓱᒋᐊᕐᓂᐊᕐᐸᒋᑦ ᑭᖑᕚᑎᓪᓗ ᐊᖓᔪᖅᑳᖁᑎᑎᓪᓗ: ᔨᕉᓴᓕᒥᐅᓄᑦ ᔫᑕᒥᐅᓄᓪᓗ ᑕᒤᓐᓄᑦ ᑎᑭᑎᑦᓯᓂᐊᕐᐳᖓ ᑲᑉᐱᐊᓇᕐᑐᓂᒃ ᓇᓪᓕᐅᑎᔪᒫᕐᓂᕋᕐᑕᓐᓂᒃ ᑕᒤᓐᓂᒃ ᐅᕙᓐᓂᒃ ᓈᓚᓚᐅᖏᓐᓂᖏᑦ ᐱᑦᔪᑎᒋᓗᒋᑦ.”
32ᑕᒪᓐᓇ ᐱᓪᓗᒍ ᔨᕆᒤᐊ ᑎᑎᕋᕐᕕᒃᓴᒥᒃ ᐃᒧᑦᑕᕐᑐᒥᒃ ᐱᓪᓗᓂ ᐸᕉᒃᒧᑦ ᑎᑎᕋᕐᑎᒧᑦ ᓂᕅᐊᐅᑉ ᐃᕐᓂᖓᓄᑦ ᑐᓂᕔᑦ, ᔨᕆᒤᐊ ᐅᖃᕐᐸᓪᓕᐊᑎᓪᓗᒍ ᐸᕉᒃ ᑎᑎᕋᕐᐸᓪᓕᐊᓕᕐᐳᖅ ᓯᕗᓪᓕᕐᒦᓚᐅᕐᑐᑦ ᐅᖃᐅᓯᕐᑕᖏᑕ ᐊᑦᔨᖏᓐᓂᒃ, ᔨᕼᐅᐃᐊᑭᐅᑉ ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᑯᐊᓪᓚᓚᐅᕐᑕᖏᑦ ᐃᓚᒃᑲᓐᓂᕐᓗᒋᑦ ᑍᒫᑦᓮᓐᓇᑲᓵᒃ ᐅᖃᐅᓯᖃᕐᑐᓂᒃ.
Currently Selected:
ᔨᕆᒤᐊᐅᑉ ᐊᒡᓚᖏᑦ 36: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
