ᔨᕆᒤᐊᐅᑉ ᐊᒡᓚᖏᑦ 37
37
ᔨᑎᑬᐊᑉ ᑐᒃᓯᕋᕐᓂᖓ ᔨᕆᒤᐊᒧᑦ
1 #
ᐊᑕᓃᑦ ᐂᑉᐸᖏᑦ 24:17; ᑯᕉᓂᑲ ᐂᑉᐸᖏᑦ 36:10. ᔨᑎᑬᐊ ᔫᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᑎᑕᐅᓚᐅᕐᐳᖅ ᔫᑕᒥᐅᓄᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᐅᓪᓚᕐᑎᑕᐅᓚᐅᕐᐳᕐᓗ ᐃᓇᖐᓪᓗᓂ ᑯᓂᐊ#37:1 ᑯᓂᐊ ᑕᕝᕙ ᔨᕼᐅᐃᐊᑭᓐ ᔨᕼᐅᐃᐊᑭᐅᑉ ᐃᕐᓂᖓᓂᒃ. 2ᑖᓐᓇᓗ ᐊᖓᔪᖅᑳᖁᑎᖏᓪᓗ ᐃᓄᖁᑎᖏᓪᓗ ᐃᒃᐱᒍᓱᓚᐅᓐᖏᓚᑦ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᔨᕆᒤᐊᒃᑯᑦ ᒎᑎᐅᑉ ᐅᖃᕐᑎᖓᒍᑦ.
3ᐊᖓᔪᖅᑳᕐᔪᐊᕐᓗ ᔨᑎᑬᐊ ᑎᓕᓯᓚᐅᕐᐳᖅ ᔨᕼᐅᑲᐅᓕᒥᒃ ᓯᓕᒤᐊᐅᑉ ᐃᕐᓂᖓᓂᒃ, ᑐᓂᕐᕈᓯᕐᑎᑦᓯᔨᒥᒡᓗ ᔨᐸᓁᐊᒥᒃ ᒫᓯᐊᐅᑉ ᐃᕐᓂᖓᓂᒃ ᔨᕆᒤᐊᒧᑦ ᒎᑎᐅᑉ ᐅᖃᕐᑎᖓᓄᑦ ᐃᒫᒃ ᐅᖃᐅᑎᔭᐅᖁᓪᓗᒍ, “ᐊᑕᓂᕐᒧᑦ ᒎᑎᑦᑎᓐᓄᑦ ᑐᒃᓯᐅᑎᑎᒍᑦ.” 4ᔨᕆᒤᐊᓕ ᓱᓕ ᑎᒍᔭᐅᓯᒪᕕᖕᒧᑦ ᐴᕐᑕᐅᓯᒪᖏᓐᓇᒥ ᐃᓄᖕᓃᖃᑕᐅᔪᓐᓇᓚᐅᕐᐳᖅ ᐃᓱᒤᓐᓇᕐᕆᓗᓂ. 5ᐰᕉᓪᓕ ᐅᓇᑕᕐᑐᒃᓴᖁᑎᖏᑦ ᐊᐅᓪᓚᓚᐅᕐᐳᑦ ᐄᑦᔨᑉᑎᒥᑦ, ᑲᐅᓪᑎᐊᒥᐅᓪᓗ ᔨᕉᓴᓕᒥᒃ ᐊᕙᑕᖏᕐᓯᓯᒪᓪᓗᑎᒃ ᐊᔪᓕᕐᑎᑦᓯᓯᒪᔪᑦ ᑐᓴᓕᕋᒥᒃ ᐄᑦᔨᑉᑎᒥᐅᓂᒃ ᔨᕉᓴᓕᒥᑦ ᕿᒪᕉᑎᕗᑦ.
6ᐊᑕᓂᐅᓪᓗ ᔨᕆᒤᐊ ᐅᖃᕐᑎᓂ ᐅᖃᐅᑎᕚ: 7“ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐅᕙᓐᓄᑦ ᑐᒃᓯᐊᕐᕕᖃᖁᔨᓚᐅᕐᑐᖅ ᐅᖃᐅᑎᒍᒃ, ‘ᑕᑯᒋᑦ, ᐰᕉᑉ ᐅᓇᑕᕐᑎᖁᑎᖏᑦ ᐃᓕᑦᓯᓐᓂᒃ ᐃᑲᔪᕆᐊᕐᓗᑎᒃ ᐄᑦᔨᑉᑎᒥᑦ ᐊᐅᓪᓚᕐᑑᒐᓗᐊᑦ, ᓄᓇᒥᖕᓄᑦ ᐄᑦᔨᑉᑎᒧᑦ ᐅᑎᕐᓂᐊᕆᕗᑦ. 8ᑲᐅᓪᑎᐊᒥᐅᓪᓗ ᐅᑎᕐᓂᐊᕆᕗᑦ ᔨᕉᓴᓕᒧᑦ ᓵᓚᒋᓗᓂᑦᔪᒃ ᑎᒍᓂᐊᕐᐹᑦ ᐃᑯᐊᓪᓚᒃᑎᓪᓗᒍᓗ. 9ᐃᒫᒃ ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᐅᐃᕕᕐᕆᑦᑍᓕᒋᑦᓯ ᐃᓱᒪᓗᓯ ᑲᐅᓪᑎᐊᒥᐅᑦ ᐊᐅᓪᓚᕈᑎᒃ ᐅᑎᕐᓂᐊᖏᓐᓇᓱᒋᓕᕐᓗᒋᑦ, ᑖᒃᑯᐊᓕ ᐅᑎᕐᓂᐊᕆᕗᑦ. 10ᑲᐅᓪᑎᐊᒥᐅᑦ ᐅᓇᑕᕐᑎᖁᑎᖏᑦ ᐃᓕᑦᓯᓐᓂᒃ ᐅᓇᑕᕆᐊᕐᑐᑦ ᓵᓚᒋᒐᓗᐊᕈᑦᓯᐅᒃ ᐃᑭᓕᕐᓱᕐᑕᕕᓂᓯᓗ ᓯᓂᒃᑕᕐᕕᖏᓐᓂ ᐊᒥᐊᒃᑯᑐᐊᖑᓕᕋᓗᐊᕐᐸᑕ, ᓱᓕ ᔨᕉᓴᓕᒥᒃ ᐃᑯᐊᓪᓔᔪᓐᓇᕐᐳᑦ.’”
ᔨᕆᒤᐊᑉ ᑎᒍᔭᐅᓂᖓ ᑎᒍᔭᐅᓯᒪᕕᖕᒧᐊᕐᑕᐅᓂᖓᓗ
11ᑲᐅᓪᑎᐊᒥᐅᓪᓕ ᐅᓇᑕᕐᑎᖁᑎᖏᑦ ᔨᕉᓴᓕᒥᑦ ᕿᒪᕉᑎᖕᒪᑕ ᐰᕉᑉ ᐅᓇᑕᕐᑎᖁᑎᖏᑕ ᑕᒪᐅᓐᖓᕐᓂᖏᓐᓄᑦ, 12ᔨᕆᒤᐊ ᐃᒡᓗᒐᓴᒡᔪᐊᓂᑦ ᔨᕉᓴᓕᒥᑦ ᐊᐅᓪᓚᓯᓚᐅᕐᐳᖅ ᐱᓐᔭᒥᓂᐅᑉ ᓄᓇᖓᑕ ᐃᓚᖓᓄᓐᖓᐅᓇᓱᐊᕐᓗᓂ ᓄᓇᖁᑎᑖᕆᔭᒃᓴᒥᓂᒃ ᐃᓄᖏᓐᓂᑦ ᐱᔭᕐᑐᕐᓗᓂ. 13ᑭᓯᐊᓂᓕ ᐱᓐᔭᒥᓂᒥᒃ ᐊᑎᖃᕐᑐᒃᑯᑦ ᐃᑎᕐᑕᕐᕕᒃᑯᑦ ᐊᓂᔭᕐᑐᓕᕐᑎᓪᓗᒍ, ᐅᓇᑕᕐᑏᑦ ᖃᐅᔨᓴᕐᑎᐅᔪᑦ ᐊᖓᔪᖅᑳᖓᑦᑕ ᐂᕅᐊᐅᑉ ᓯᓕᒤᐊᐅᑉ ᐃᕐᓂᖓᑕ, ᕼᐊᓇᓁᐊᐅᑉ ᑭᖑᕚᖓᑕ ᔨᕆᒤᐊ ᑎᒍᕚ, ᐅᖃᐅᑎᓪᓗᒍᓗ, “ᑲᐅᓪᑎᐊᒥᐅᓄᑦ ᕿᒫᓇᓱᐊᕐᐳᑎᑦ!”
14ᔨᕆᒤᐊᐅᑉ ᐅᖃᐅᑎᕚ, “ᓱᓕᓐᖏᓚᑎᑦ ᑲᐅᓪᑎᐊᒥᐅᓄᑦ ᕿᒫᓇᓱᐊᓐᖏᓚᖓ.” ᐂᕅᔭᐅᓪᓕ ᐅᒃᐱᕆᓐᖏᓛ, ᔨᕆᒤᐊᓗ ᑎᒍᓪᓗᓂᐅᒃ ᐊᖓᔪᖅᑳᓄᑦ ᐋᑉᐹ. 15ᔨᕆᒤᐊᓗ ᐊᑲᐅᒋᖏᒻᒪᕆᓕᕐᐹᑦ ᐋᓐᓂᕐᓯᕐᑕᐅᑎᓪᓗᒍᓗ ᑎᒍᔭᐅᓯᒪᕕᖕᒧᐊᕐᑕᐅᑎᑉᐹᑦ ᔫᓇᑕᓂᐅᑉ ᑎᑎᕋᕐᑎᐅᑉ ᐃᒡᓗᕈᓯᖓᓄᑦ, ᑖᓐᓇ ᐃᒡᓗᕈᓯᖅ ᑎᒍᔭᐅᓯᒪᕕᓐᖑᕐᑎᓯᒪᒐᒥᑦᔪᒃ. 16ᔨᕆᒤᐊᓗ ᐃᒡᓘᑉ ᑖᑦᓱᒪ ᐊᑖᓄᐊᕐᑕᐅᕗᖅ ᑎᒍᔭᐅᓯᒪᕕᖕᒧᑦ, ᑕᕝᕙᓃᓕᕐᓗᓂᓗ ᐊᑯᓂ.
17ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᐃᒡᓗᒥᓄᑦ ᕾᑎᑕᐅᖁᕚ, ᑕᕝᕙᓃᓕᕐᑎᓪᓗᒍᓗ ᖃᐅᔨᔭᐅᑦᑍᓕᓪᓗᓂ ᐊᐱᕐᓱᕐᐹ, ᐊᑕᓂᕐᒥᑦ ᑐᓴᒐᒃᓴᕐᑕᖃᕐᒪᖔᑦ.
ᔨᕆᒤᐊᐅᓪᓗ ᐅᖃᐅᑎᕚ, “ᑐᓴᒐᒃᓴᖃᕐᐳᖅ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐱᔭᐅᓂᐊᕐᐳᑎᑦ.” 18ᐊᒻᒪ ᔨᕆᒤᐊᐅᑉ ᐊᖓᔪᖅᑳᕐᔪᐊᖅ ᔨᑎᑬᐊ ᐊᐱᕆᕚ, “ᓱᓇᒥᒃ ᓯᖁᒥᑦᓯᒐᒪ ᐱᖁᓐᖏᑕᕐᓂᒃ ᐊᖓᔪᖅᑳᖁᑎᕕᓪᓘᓐᓃᑦ ᐱᖁᓐᖏᑕᖓᓂᒃ ᑎᒍᔭᐅᑦᔪᑎᖃᕐᐳᖓ? 19ᓇᐅᒡᓖᒃᑯᐊ ᐅᖃᕐᑎᓯ ᐅᖃᓪᓚᒃᐸᒃᑐᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᓇᑕᕐᑕᐅᑦᔮᖏᓐᓂᕅᓪᓗᑎᒃ ᐃᓕᑦᓯᓐᓃᒃ? 20ᐊᑕᓂᕋ ᐊᖓᔪᖅᑳᕐᔪᐊᕋ, ᐅᖃᐅᓯᕆᔭᒃᑲ ᓈᓚᓚᐅᒃᑭᑦ, ᕿᓄᕕᒋᔪᒪᕙᒋᑦ ᐅᑎᕐᑎᑕᐅᔪᒪᓇᖓ ᔫᓇᑕᓂᐅᑉ ᐃᒡᓗᖓᓄᑦ, ᑐᖁᑐᐃᓐᓇᕆᐊᖃᕋᒪ ᑍᑲᓂ.”
21ᐊᖓᔪᖅᑳᕐᔪᐊᖅ ᔨᑎᑬᐊ ᐱᖁᔨᕗᖅ, ᔨᕆᒤᐊ ᐅᓇᑕᕐᑏᑦ ᖃᐅᔨᓴᕐᑎᖏᑕ ᐃᓂᒋᔭᖓᓂ ᐃᓂᖃᖃᑕᐅᖁᓪᓗᒍ, ᓂᕆᑎᑕᐅᖃᑦᑕᖁᓪᓗᓂᐅᒡᓗ ᓯᓚᒥ ᓂᐅᕕᐊᒃᓴᕆᔭᐅᖃᑦᑕᕐᑐᓂᒃ ᓂᐊᖂᔭᓂᒃ ᓄᖑᕈᑎᖏᓐᓂᖏᓐᓂ, ᑕᕝᕙ ᔨᕆᒤᐊ ᐅᓇᑕᕐᑏᑦ ᖃᐅᔨᓴᕐᑎᖏᑕ ᓇᔪᕐᑕᖓᓐᓂ ᐃᓂᖃᓕᓚᐅᕐᐳᖅ.
Currently Selected:
ᔨᕆᒤᐊᐅᑉ ᐊᒡᓚᖏᑦ 37: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
