ᔨᕆᒤᐊᐅᑉ ᐊᒡᓚᖏᑦ 35
35
ᔨᕆᒤᐊᑉ ᕆᕼᐊᐰᐅᑉ ᑭᖑᕚᖏᓐᓃᓐᓂᖓ
1 #
ᐊᑕᓃᑦ ᐂᑉᐸᖏᑦ 23:36—24:6; ᑯᕉᓂᑲ ᐂᑉᐸᖏᑦ 36:5-7. ᔨᕆᒤᐊ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᑎᓪᓗᒍ ᔫᓮᐊᐅᑉ ᐃᕐᓂᖓ ᔫᑕᒥᐅᑦ ᐊᖓᔪᖅᑳᕐᔪᐊᖓ: 2“ᐃᓚᒌᑦ ᕆᑳᐰᑎᒃᑯᑦ ᕾᖁᓗᒋᑦ ᐊᑕᓂᐅᑉ ᐃᒡᓗᖓᓄᑦ, ᑲᑎᖃᑎᒋᒃᑭᑦ ᐃᒥᕐᑎᓪᓗᒋᓪᓗ ᕔᓂᒥᒃ.” 3ᑕᕝᕙ ᔭ-ᐊᔭᓁᐊᒧᐊᓚᐅᕐᐳᖓ ᔨᕆᒤᐊᐅᑦᑕᐅᖅ ᐃᕐᓂᖓᓄᑦ, ᕼᐊᐸᔭᓁᐊᒥᒃ ᐊᑖᑕᖃᕐᑐᒧᑦ, ᖃᑕᓐᖑᑎᖏᓪᓗ ᑕᒪᕐᒥᒃ ᐃᕐᓂᖏᓪᓗ ᑖᒃᑯᐊ ᕆᑳᐰᑎᒃᑯᑦ ᐃᓚᒌᓕᒫᑦ. 4ᐊᑕᓂᐅᑉ ᐃᒡᓗᖓᓄᐊᕐᑎᓚᐅᕐᐸᒃᑲ, ᑲᑎᖃᑎᒋᓪᓗᒋᓪᓗ ᒎᑎᐅᑉ ᐅᖃᕐᑎᖓᑕ ᕼᐊᓇᓐᓂᐅᑉ ᐃᓕᓐᓂᐊᕐᑎᖏᑕ ᐃᒡᑕᓔᐊᐅᑉ ᐃᕐᓂᖓᑕ ᐃᒡᓗᕈᓯᕆᖃᑦᑕᓚᐅᕐᑕᖓᓂ ᐊᖓᔪᖅᑳᕐᔪᐊᑦ ᐃᒡᓗᕈᓯᕆᖃᑦᑕᕐᑕᖏᑕ ᓴᓂᐊᓃᑦᑐᒥ, ᒫ-ᐊᓯᐊᑉ ᓴᓗᒻᒥᐅᑉ ᐃᕐᓂᖓᑕ ᐃᑎᕐᑕᕐᕕᓕᕆᔨᐅᑉ ᐃᒡᓗᕈᓯᖓᑕ ᖁᓕᓪᑎᐊᖓᓂ. 5ᐴᒍᑕᓂᒡᓗ ᕔᓂᒥᒃ ᐃᒻᒥᕐᓯᕗᖓ, ᐃᒥᐅᑎᒃᓴᖏᓐᓂᒡᓗ ᐊᑐᐃᓐᓇᕈᐃᓪᓗᖓ; ᕆᑳᐰᑎᒃᑯᑦ ᐃᓚᒌᑦ ᐅᖃᐅᑎᕙᒃᑲ ᕔᓂᒥᒃ ᐃᒥᖁᓪᓗᒋᑦ.
6ᑖᒃᑯᐊᓕ ᑭᐅᕗᑦ, “ᕔᓂᒥᒃ ᐃᒥᕈᓐᓇᓐᖏᓚᒍᑦ; ᓯᕗᓕᑦᑕ ᔫᓇᑖᑉ ᕆᑳᐱᐅᑉ ᐃᕐᓂᖓᑕ ᐱᖁᔭᖃᕐᑎᓚᐅᕐᒪᑎᒍᑦ ᐃᒤᑦᑐᒥᒃ; ‘ᐃᓕᑦᓯ ᑭᖑᕚᓯᓗ ᐃᒥᕐᐸᒃᑐᒃᓴᐅᓐᖏᓚᓯ ᕔᓂᒥᒃ. 7ᐃᒡᓗᓕᐅᕐᑐᒃᓴᐅᓐᖏᓚᓯ, ᐱᕈᕐᓯᐊᒃᓴᓕᕆᕙᖏᓪᓗᓯᓗ, ᕔᓂᓕᒃᓴᓂᒡᓗ ᐱᕈᕐᓰᕕᖁᑎᖃᕐᐸᖏᓪᓗᓯ ᑍᒤᑦᑐᓂᒃ ᐱᓇᓱᐊᕐᐸᒃᑐᒃᓴᐅᓐᖏᓚᓯ, ᑭᓯᐊᓂᓕ ᑐᐱᕐᒥᐅᖑᐃᓐᓇᕐᐸᒃᑐᒃᓴᐅᕗᓯ, ᑕᕝᕙ ᐊᑯᓂ ᓄᓇᒥ ᐃᓅᓯᖃᕈᒫᕐᐳᓯ ᑕᒫᓃᕐᕆᔭᒃᑎᐅᒐᑦᓯ.’ 8ᑕᒪᒃᑯᐊᓕᒫᑦ ᓈᓔᓐᓇᓚᐅᕐᐸᕗᑦ ᓯᕗᓕᑦᑕ ᔨᕼᐅᓇᑕᐅᑉ ᕆᑳᐱᐅᑉ ᐃᕐᓂᖓᑕ ᒪᓕᒐᒃᓴᓕᐊᕆᓚᐅᕐᑕᖏᑦ ᐅᕙᑦᑎᓐᓄᑦ, ᐅᕙᒍᓪᓗ ᓄᓕᐊᕗᓪᓗ ᐃᕐᓂᕗᓪᓗ ᐸᓂᕗᓪᓗ ᐃᒥᓚᐅᕐᓯᒪᓐᖏᓚᑦ ᕔᓂᒥᒃ. 9ᐃᒡᓗᓕᐅᓚᐅᕐᓯᒪᓇᑕᓗ ᕔᓂᒃᓴᖁᑎᖃᓚᐅᕐᓯᒪᓐᖏᓚᒍᑦ ᐱᕈᕐᓰᕕᖃᓐᖏᓚᒍᑦ ᑲᓐᖓᕐᓱᐃᓚᐅᕐᓯᒪᓇᑕᓗ. 10ᑐᐱᕐᒥᐅᖑᐃᓐᓇᕐᐳᒍᑦ ᒪᓖᓐᓇᕐᓗᑕᓗ ᓯᕗᓕᕕᓂᑦᑕ ᔫᓇᑕᐅᑉ ᒪᓕᖁᓚᐅᕐᑕᖏᓐᓂᒃ. 11ᓂᐱᑯᓁᓴᐅᓪᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓄᓇᕗᑦ ᓵᓚᒋᓕᕐᒪᒍ ᐅᖃᓚᐅᕐᐳᖑᑦ, ᔨᕉᓴᓕᒧᐊᕈᒪᓪᓗᑕ ᑲᐅᓪᑎᐊᒥᐅᑦ ᓯᕆᐊᒥᐅᓪᓗ ᐅᓇᑕᕐᑎᖁᑎᖏᓐᓂᑦ ᕿᒫᔪᒪᓪᓗᑕ ᑍᒪᓐᖓᑦ ᑕᕝᕙ ᔨᕉᓴᓕᒥᐅᑕᐅᓕᕐᐳᒍᑦ.”
12ᔨᕆᒤᐊᓕ ᐊᑕᓂᕐᒧᑦ ᐅᖃᕐᕕᐅᓕᕆᕗᖅ, 13“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔫᑕᒥᐅᑦ ᔨᕉᓴᓕᒥᐅᓪᓗ ᐅᖃᐅᑎᔭᕐᑐᒃᑭᒃ ᑐᑭᓯᕚᓪᓕᕐᑐᒃᓴᐅᓕᕋᑦᓯ ᓱᓕ ᐅᖃᐅᓯᓐᓂᒃ ᓈᓚᖕᓂᐊᓐᖏᓚᓰ? ᐊᑕᓂᖅ ᐅᖃᕐᐳᖅ. 14ᔨᕼᐅᓇᑕᐅᑉ ᕆᑳᐱᐅᑉ ᐃᕐᓂᖓᑕ ᐃᕐᓂᓂ ᕔᓂᒥᒃ ᐃᒥᖃᑦᑕᖁᓐᓂᖏᒻᒪᒋᑦ ᓱᓕ ᐅᓪᓗᒥ ᑕᒪᓐᓇ ᑖᒃᑯᐊ ᒪᓕᒃᐹᑦ, ᐃᒥᕈᓐᓇᖏᒻᒪᑕ ᕔᓂᒥᒃ ᐅᓪᓗᒥ, ᓯᕗᓕᕆᔭᒥ ᐱᖁᔭᓕᐊᕆᔭᕕᓂᖓᓂᒃ ᓈᓚᒃᑲᒥᒃ. ᐅᕙᖓᓕ ᐅᓄᕐᑐᐃᕐᓱᕐᓗᖓ ᐅᖃᐅᑎᖃᑦᑕᓚᐅᕐᐸᑦᓯ, ᑭᓯᐊᓂᓕ ᓈᓚᒍᓐᓇᓚᐅᓐᖏᓚᓯ. 15ᐅᓄᕐᑐᐃᕐᓱᕐᓗᖓ ᐅᖃᕐᑎᒃᑲ ᑎᓕᕙᓚᐅᕐᐸᒃᑲ ᐃᓕᑦᓯᓐᓄᑦ, ᐅᖃᕐᐸᓚᐅᕐᐳᓪᓗ, ‘ᓵᒋᐊᕐᑐᒃᓴᐅᕗᓯ ᐱᐅᖏᑦᑐᓕᓂᑦᓯᓐᓂᑦ ᐊᑲᐅᔪᒥᒡᓗ ᐃᓕᖅᑯᓯᖃᓕᕐᓗᓯ; ᒎᑎᓐᖑᐊᓂᒃ ᒪᓕᓕᕐᑍᓕᒋᑦᓯ ᐱᓂᐊᕐᕕᒋᓇᒋᓪᓘᓐᓃᑦ, ᑕᕝᕙ ᐃᓅᓂᐊᕐᐳᓯ ᓯᕗᓕᑦᓯᓐᓄᑦ ᐃᓕᑦᓯᓐᓄᓪᓗ ᓄᓇᒋᔭᐅᖁᓚᐅᕐᑕᓐᓂ.’ ᑭᓯᐊᓂᓕ ᑐᓴᕈᓐᓇᓚᐅᓐᖏᓚᑦᓯᓐᖓ ᓈᓚᒍᒪᓇᖓᓗ. 16ᔨᕼᐅᓇᑕᐅᑉ ᑭᖑᕚᖏᑦ ᕆᑳᐱᐅᑉ ᐃᕐᓂᖓᑕ ᒪᓕᒐᒃᓴᓕᐊᖏᓐᓂᒃ ᒪᓖᓐᓇᓚᐅᕐᐳᑦ, ᐅᑯᐊᓕ ᐃᓅᖃᑎᒌᑦ ᐅᕙᓐᓂᒃ ᓈᓚᒍᒪᓐᖏᓚᑦ. 17ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔫᑕᒥᐅᓄᑦ ᔨᕉᓴᓕᒥᐅᓕᒫᓄᓪᓗ ᑎᑭᑕᐅᑎᑦᓯᔪᒫᕐᐳᖓ ᑲᑉᐱᐊᓇᕐᑐᓂᒃ ᑎᑭᓐᓂᐊᕐᓂᕋᕐᓯᒪᔭᓐᓂᒃ, ᐅᖃᐅᑎᕙᓚᐅᕋᓗᐊᕋᒃᑭᑦ ᓈᓚᒍᒪᓚᐅᖏᒻᒪᑕ, ᑎᓕᓯᑦᔪᑎᓐᓂᒡᓗ ᓈᓚᒍᒪᓚᐅᕋᑎᒃ.”
18ᔨᕆᒤᐊᐅᓪᓗ ᐃᓚᒌᑦ ᕆᑳᐰᑎᒃᑯᑦ ᐅᖃᐅᑎᕔᑦ, ᐃᒫᒃ ᐊᑕᓂᖅ ᐊᔪᖓᖃᖏᑦᑐᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, “ᓈᓚᓚᐅᕋᑦᓯᐅᒃ ᐱᖁᔭᐅᑦᔪᑎᒋᔭᓯ ᓯᕗᓕᕕᓂᑦᓯᓐᓄᑦ ᔨᕼᐅᓇᑕᒧᑦ ᐱᖁᔭᓕᐊᕆᔭᖏᓪᓗ ᒪᓕᒡᓗᓯᐅᒃ ᐊᑐᕐᑕᐅᖁᔭᖏᓪᓗ ᐊᑐᓚᐅᕋᑦᓯᐅᒃ. 19ᑕᒪᓐᓇ ᐱᓪᓗᒍ, ᐃᒫᒃ ᐊᑕᓂᖅ ᐊᔪᖓᖃᖏᑦᑐᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ; ᔫᓇᑕᐅᑉ ᕆᑳᐱᐅᑉ ᐃᕐᓂᖓ ᐱᔨᑦᓯᕐᑎᒃᓴᓂᒃ ᐊᔪᕐᓴᓕᓚᐅᕐᓯᒪᓂᐊᓐᖏᓚᑎᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 35: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
