ᔨᕆᒤᐊᐅᑉ ᐊᒡᓚᖏᑦ 34
34
ᔨᑎᑬᐊᑉ ᑐᓴᖁᔭᐅᓂᖓ ᐅᖃᐅᓯᕐᓂᒃ
1 #
ᐊᑕᓃᑦ ᐂᑉᐸᖏᑦ 25:1-11; ᑯᕉᓂᑲ ᐂᑉᐸᖏᑦ 36:17-21. ᐊᑕᓂᐅᑉ ᐅᖃᐅᓯᖓ ᔨᕆᒤᐊᒧᑦ ᑎᑭᑉᐳᖅ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᖏᑦ ᐊᐅᓚᑕᖏᓐᓃᑦᑐᑦ ᐅᓇᑕᖃᑎᖃᒻᒪᕆᓕᕐᑎᓪᓗᒋᑦ ᔨᕉᓴᓕᒥᐅᓂᒃ ᓄᓇᓕᖕᓂᒡᓗ ᖃᓂᒋᔭᖏᓐᓃᑦᑐᓂᒃ: 2“ᐃᒫᒃ ᐊᑕᓂᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔨᑎᑬᐊᒧᐊᕐᓗᑎᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑎᒍᒃ, ‘ᐃᒫᒃ ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐃᒡᓗᒐᓴᒡᔪᐊᖁᑎᓯ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑐᓂᓂᐊᓕᕐᐸᒃᑲ, ᑖᑦᓱᒪᓗ ᐃᑯᐊᓪᓚᒍᒫᕐᐹ. 3ᑖᑦᓱᒪᓐᖓᑦ ᐊᓐᓇᒡᕕᖃᕐᓂᐊᓐᖏᓚᑎᑦ, ᓵᓚᒋᔭᐅᓗᑎᑦ ᑎᒍᔭᐅᓂᐊᕐᐳᑎᑦ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᓇᖕᒥᓂᖅ ᑕᑯᔪᒫᕐᐸᑦ, ᐃᔨᒥᑦ ᐃᔨᒧᑦ ᐅᖃᖃᑎᒋᓗᒍᓗ ᑮᓇᕐᒥᑦ ᑮᓇᕐᒧᑦ; ᐹᐱᓘᓂᒧᐊᕈᑦᔭᐅᔪᒫᕋᕕᑦ.’ 4ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᐅᖃᐅᓯᖓᓂᒃ ᑐᓴᓕᕆᑦ, ᔨᑎᑬᐊ ᔫᑕᒧᑦ ᐊᖓᔪᖅᑳᕐᔪᐊᖑᔪᑎᑦ, ᐃᒫᒃ ᐊᑕᓂᖅ ᐅᖃᕐᐳᖅ ᐃᕝᕕᑦ ᐱᑦᔪᑎᒋᓗᑎᑦ: ‘ᐅᓇᑕᕐᑐᓂ ᑐᖁᑕᐅᓂᐊᓐᖏᓚᑎᑦ, 5ᖃᓄᐃᖏᑦᓯᐊᕐᓗᑎᑦ ᑐᖁᔪᒫᕐᐳᑎᑦ. ᓯᕗᓕᓯ ᐃᑯᐊᓚᑦᓯᕙᓚᐅᕐᒪᑕ ᐃᓯᕐᓗᐊᕐᓂᑎᑦᓯᓪᓗᑎᒃ ᐃᓅᔪᓐᓃᕐᑐᖃᕌᖓᑦ ᐊᖓᔪᖅᑳᕐᔪᐊᖏᓐᓂᒃ, ᐅᐱᒍᓲᑎᖃᕐᓂᕐᒥᖕᓂᒃ ᓇᓗᓁᕐᓯᑦᔪᑎᒋᓗᒍ, ᑍᒪᒃᑕᐅᖅ ᐃᓕᖕᓂᒃ ᐅᐱᒍᓲᑎᖃᕐᓂᕐᒧᑦ ᐅᒡᒍᐊᕈᑎᖃᕐᓂᕐᒧᓪᓗ ᐃᑯᐊᓚᑦᓯᑦᔪᑕᐅᔪᒫᕆᕗᑎᑦ ᑎᐱᑦᓯᐊᕆᒃᑐᓂᒃ; ᐅᖃᕐᓗᑎᒃ, “ᐊᖓᔪᖅᑳᕆᔭᕗᑦ ᑐᖁᕗᖅ!”’ ᐅᕙᖓ ᑕᒪᑐᒥᖓ ᐅᖃᕐᐳᖓ, ᐊᑕᓂᖅ ᐅᖃᕐᐳᖅ.”
6ᔨᕆᒤᐊᐅᑉ ᑕᒪᒃᑯᐊ ᐅᖃᐅᓯᕆᕔᑦ ᔨᑎᑬᐊᒧᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᔨᕉᓴᓕᒦᓪᓗᓂ. 7ᐅᓇᑕᕕᒃᔪᐊᓕᕐᑎᓪᓗᒋᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑎᖁᑎᖏᑦ ᔨᕉᓴᓕᒥᐅᓂᒃ ᔫᑕᒥᐅᓂᒡᓗ ᖃᓂᒋᔭᖏᓐᓃᕐᑐᓂᒡᓗ ᓄᓇᓕᖕᓂᒃ, ᓱᓕ ᓚᑮᓯᓗ ᐊᔨᑲᓗ ᓄᓇᓕᖏᒃ ᓴᐴᓗᑕᓖᒃ ᐊᒥᐊᒃᑯᑑᓕᓚᐅᕐᐴᒃ ᔫᑕᒥᐅᑦ ᓄᓇᖁᑎᓕᒫᖏᓐᓂ.
ᑎᒍᔭᐅᓯᒪᔪᑦ ᓴᒡᓗᕿᑕᐅᓯᒪᓂᖏᑦ
8ᐊᑕᓂᐅᑉ ᔨᕆᒤᐊ ᐅᖃᐅᑎᕚ, ᔨᑎᑬᐊ ᐊᖓᔪᖅᑳᕐᔪᐊᖅ ᐊᖏᖃᑎᒌᒍᑎᓕᐅᕐᓯᒪᓕᕐᑎᓪᓗᒍ ᔨᕉᓴᓕᒥᐅᓄᑦ ᑎᒍᔭᐅᓯᒪᔪᑦ ᕿᓚᕈᑦᔮᕐᑕᐅᖁᓪᓗᒋᑦ, 9ᑕᒪᕐᒥᒃ ᐄᑉᕉᓂᒃ ᓯᐊᓛᓖᑦ ᐃᓱᒪᕐᓱᓕᕐᑎᑦᓯᖁᔭᐅᕗᑦ, ᓇᓪᓕᐊᑦ ᔫᑎᐅᖃᑎᒥᓂᒃ ᑎᒍᓯᓯᒪᔪᓐᓃᖁᓪᓗᒍ ᓯᐊᓛᕆᓗᒍ. 10ᐊᖓᔪᖅᑳᓕᒫᑦ ᐃᓄᐃᓪᓗ ᐊᖏᖃᑎᒌᒍᑎᓕᐅᓚᐅᕐᐳᑦ ᑎᒍᓯᒪᓪᓗᒋᑦ ᓯᐊᓛᒥᖕᓂᒃ ᐊᖑᑎᓂᒃ ᐊᕐᓇᓂᒡᓗ ᐃᓱᒪᕐᓱᓕᕐᑎᑦᓯᖁᓪᓗᒋᑦ, ᓯᐊᓛᖑᒃᑲᓐᓂᖁᓇᒋᑦ, ᓈᓚᒡᓗᑎᒃ ᓯᐊᓛᑎᒃ ᓴᒃᑯᓚᐅᕐᐰᑦ. 11ᑭᓯᐊᓂᓕ ᑭᖑᓂᖓᒍᑦ ᐃᓱᒪᑖᓕᕐᒥᒐᒥᒃ ᑎᒍᓯᒪᓚᐅᕐᑕᑎᒃ ᐅᑎᕐᑎᓪᓗᒋᑦ ᓯᐊᓛᕐᑕᕆᓕᓚᐅᕆᕔᑦ.
12ᐊᑕᓂᐅᓪᓕ ᔨᕆᒤᐊ ᐅᖃᕐᕕᒋᓕᕆᕚ, 13“ᐃᒫᒃ ᑕᕝᕙ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᓯᕗᓕᓯ ᐊᖏᖃᑎᒌᒍᑎᒥᒃ ᐋᖅᑭᒃᓯᖃᑎᒋᓚᐅᕐᐸᒃᑲ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒃᑭᑦ ᑎᒍᔭᐅᓯᒪᕕᒋᓚᐅᕐᑕᖏᓐᓂᑦ. ᐅᖃᕐᓗᖓᓗ; 14#ᒨᓯᓯ ᐂᑉᐸᖏᑦ 21:2; ᒨᓯᓯ ᑕᓪᓕᒪᖏᑦ 15:12.ᐊᕐᕌᒍᑦ 7ᒋᓕᕌᖓᒍ ᐄᑉᕉᒥᐅᑕᐅᖃᑎᑦᓯᓐᓂᒃ ᐃᓱᒪᕐᓱᓕᕐᑎᑦᓯᖃᑦᑕᕐᑐᒃᓴᐅᕗᓯ ᓂᐅᕕᐊᕆᓪᓗᒍ ᓯᐊᓛᕐᑖᕆᓂᑯᑦᓯᓐᓂᒃ, ᐊᕐᕌᒍᓂᒃ ᐱᖓᓲᔪᕐᑐᓂᒃ ᐃᓕᑦᓯᓐᓂᑦ ᓯᐊᓛᕆᔭᐅᓂᑰᓯᒪᓕᑐᐊᕐᐸᑦ ᐃᓱᒪᕐᓱᓕᕐᑎᑕᒃᓴᕆᕙᓯ, ᑭᓯᐊᓂᓕ ᓯᕗᓕᓯ ᐅᕙᓐᓂᒃ ᓈᓚᓚᐅᓐᖏᓚᑦ ᑐᓴᕈᒪᓇᑎᒡᓗ. 15ᒫᓐᓇᒃᑯᓪᓕ ᓵᒋᐊᓚᐅᕋᑦᓯ ᐊᑲᐅᒋᔭᓐᓂᒃ ᐊᑐᕐᐳᓯ, ᐃᓅᖃᑎᑦᓯᓐᓂᒡᓗ ᐃᓱᒪᕐᓱᓕᕐᑎᑦᓯᔪᓐᓇᕈᒪᓪᓗᓯ ᓇᓗᓁᕐᓯᓚᐅᕐᐳᓯ ᐊᖏᖃᑎᒌᒍᑎᓕᐅᓚᐅᕐᐳᓯᓗ ᓵᓐᓂ ᐃᒡᓗᖁᑎᓐᓃᑦᓗᓯ ᐊᑎᓐᓂᒃ ᑍᔭᐅᔪᒥ. 16ᒫᓐᓇᓕ ᐅᖃᓚᐅᕐᑕᓯ ᓴᖑᑎᓪᓗᒍ ᐊᑎᕋ ᐊᑐᕐᓂᕐᓗᓕᕆᕙᓯ, ᓯᐊᓛᓯ ᐃᓱᒪᕐᓱᓕᕐᑎᑦᓴᕆᐊᖃᓚᐅᕐᑕᓯ ᐊᖑᑏᑦ ᐊᕐᓁᓪᓗ ᐅᑎᕐᑎᒻᒥᒐᑦᓯᐅᒃ, ᑎᒍᓯᒪᓪᓗᒋᑦ ᓯᐊᓛᕆᒃᑲᓐᓂᓕᕐᓗᒋᑦ. 17ᑍᒤᒻᒪᑦ ᐊᑕᓂᖅ ᐅᖃᕐᐳᖅ, ᐅᕙᓐᓂᒃ ᓈᓚᓚᐅᓐᖏᓚᓯ ᐄᑉᕉᒥᐅᑕᐅᖃᑎᑦᓯᓐᓂᒃ ᐃᓱᒪᕐᓱᓕᕐᑎᑦᓯᔪᒪᖏᓐᓇᑦᓯ, ᒫᓐᓇ ᐅᖃᐅᑎᓕᕐᐸᑦᓯ ᐃᓱᒪᕐᓱᕐᑎᓐᓂᐊᓕᕐᐸᑦᓯ ᐊᑕᓂᖅ ᐅᖃᕐᐳᖅ, ᐅᓇᑕᕐᑐᓂ ᑐᖁᑕᐅᖁᓪᓗᓯ ᐋᓐᓂᐊᓇᕐᑐᓄᓪᓗ, ᑳᖕᓇᕐᑐᕐᔪᐊᒧᓪᓗ, ᐃᓅᖃᑎᒌᒡᔪᐊᓄᓪᓗ ᑕᑯᑦᔪᑎᒃᓴᓐᖑᕐᓂᐊᕐᐳᓯ ᓯᕘᕋᓇᕐᑐᒥᒃ. 18ᐊᖏᖃᑎᒌᒍᑎᓕᐊᕆᓚᐅᕐᑕᓐᓂᒃ ᒪᓕᖏᑦᑐᑦ ᓈᓚᖏᑦᑐᓪᓗ ᐊᖏᖃᑎᒌᖕᓂᐅᑉ ᒪᓕᒐᒃᓴᕐᑕᖏᓐᓂᒃ ᐋᖅᑭᓚᐅᕐᑕᑦᑎᓐᓂᒃ ᓵᓐᓂ, ᐃᒻᒧᒃᓯᐅᒐᐅᑉ ᓄᕐᕋᖓᓂᒃ ᒪᕐᕉᓕᓗᒍ ᐊᕕᒃᓯᑦᔪᓯᖓᑦᑎᑐᑦ ᐱᓂᐊᕐᐸᒃᑲ ᒪᕐᕉᓕᓗᒋᓪᓗ ᓇᑲᒌᕈᒃᑭᑦ ᐊᑯᓐᓂᖓᒍᑦ ᐱᓱᖕᓂᐊᕐᐳᖓ. 19ᓲᕐᓗᑦᑕᐅᖅ ᔨᕉᓴᓕᒥᐅᑦ ᔫᑕᒥᐅᓪᓗ ᓯᕗᓕᕐᑎᖏᑦ, ᑐᓂᕐᕈᓯᕐᑎᑦᓯᔨᖏᓪᓗ, ᐃᓄᐃᓪᓗ ᐃᒻᒧᒃᓯᐅᒐᐅᑉ ᓄᕐᕋᖓ ᒪᕐᕉᓕᓪᓗᒍ ᐊᕕᒃᑐᕋᒥᑦᔪᒃ ᐊᑯᓐᓂᖓᒍᑦ ᐱᓱᓚᐅᕐᒪᑕ. 20ᑍᒃᑯᐊ ᐃᓕᑦᓯᓐᓂᒃ ᑐᖁᑦᓯᔪᒪᔪᓄᑦ ᐱᔭᐅᑎᓐᓂᐊᕐᐸᑦᓯ, ᑎᒥᕕᓃᓪᓗ ᓂᕿᒋᔭᐅᓕᕈᒫᕐᐳᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ. 21ᔨᑎᑬᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᖓᔪᖅᑳᖁᑎᖏᓪᓗ ᐊᑭᕋᖏᓐᓄᑦ ᐱᔭᐅᑎᓐᓂᐊᕐᐸᒃᑲ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑐᒃᓴᖁᑎᖏᓐᓄᑦ, ᒫᓐᓇ ᐃᓕᑦᓯᓐᓂᒃ ᐱᓇᓱᐊᕈᓐᓃᕐᐳᑦ. 22ᑎᓕᓯᓂᐊᕐᐳᖓ, ᐊᑕᓂᖅ ᐅᖃᕐᐳᖅ, ᐅᑎᕐᓂᐊᕐᒪᑕ ᑕᕝᕗᖓ ᐃᒡᓗᒐᓴᒡᔪᐊᓄᑦ ᐅᓇᑕᕐᓗᒍᓗ ᓵᓚᒋᒍᓂᑦᔪᒃ ᐃᑯᐊᓪᓚᖕᓂᐊᕐᐹᑦ, ᔫᑕᒥᐅᓪᓗ ᓄᓇᓕᖁᑎᖏᑦ ᓄᓇᒋᔭᒃᓴᐅᔪᓐᓃᕐᑎᓐᓂᐊᕐᐸᒃᑲ ᓄᓇᒋᔭᐅᔪᓐᓃᖁᓪᓗᒋᑦ ᐃᓄᖕᓄᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 34: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
