ᔨᕆᒤᐊᐅᑉ ᐊᒡᓚᖏᑦ 33
33
ᓱᓕ ᓂᕆᐅᒋᔭᒃᓴᒃᑲᓐᓂᕐᒥᒃ ᐊᖏᕐᕕᐅᓯᒪᓂᖅ
1ᔨᕆᒤᐊᓕ ᓱᓕ ᑎᒍᔭᐅᓯᒪᑎᓪᓗᒍ ᐊᖓᔪᖅᑳᕐᔪᐊᑉ ᐃᒡᓗᖁᑎᖓᓂ, ᐊᑕᓂᕐᒧᑦ ᐅᖃᕐᕕᐅᒃᑲᓐᓂᕐᐳᖅ ᐂᑉᐸᖓᓂᒃ: 2“ᐃᒫᒃ ᐊᑕᓂᖅ ᐅᖃᕐᐳᖅ ᑖᓐᓇ ᓄᓇᕐᔪᐊᕐᒥᒃ ᓴᓇᓚᐅᕐᑐᖅ, ᓴᖅᑭᑎᓪᓗᒍ ᐃᓂᒋᓂᐊᕐᑕᖓᓄᐊᕐᓗᒍᓗ, ᑖᓐᓇ ᐊᑕᓂᕐᒥᒃ ᐊᑎᖃᕐᐳᖅ, 3ᑐᒃᓯᐊᕐᕕᒋᒍᕕᖓ ᑭᐅᓂᐊᕐᐸᒋᑦ, ᐅᖃᐅᑎᓗᑎᓪᓗ ᖃᐅᔨᒪᓚᐅᓐᖏᑕᕐᓂᒃ ᐅᓄᕐᑐᓂᒃ. 4ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᒡᓗᒐᓴᒡᔪᐊᑦ ᔫᑕᒥᐅᓪᓗ ᐊᖓᔪᖅᑳᕐᔪᐊᖓᑕ ᐃᒡᓗᖏᑦ ᐱᓪᓗᒋᑦ ᑖᒃᑯᐊ ᓯᖁᑦᑎᕐᑕᐅᔪᒫᕐᐳᑦ ᐅᓇᑕᕐᑐᓄᑦ ᑎᑭᑕᐅᒃᐸᑕ. 5ᐃᓚᖏᓪᓕ ᐊᑭᒪᓇᓱᐊᕈᒫᕐᐳᑦ ᑲᐅᓪᑎᐊᒥᐅᓂᒃ, ᐃᒡᓗᖁᑎᖏᓪᓗ ᑕᑕᑦᓱᒫᕐᐳᑦ ᑐᖁᖓᔪᕕᓂᕐᓂᒃ ᓂᓐᖓᕕᒃᔪᐊᕐᓂᓐᓄᑦ ᐊᑭᓂᐊᕐᕕᒋᓕᕈᒃᑭᑦ, ᑖᒃᑯᐊ ᐃᒡᓗᒐᓴᒡᔪᐊᑦ ᐊᓚᕐᐸᒃᑲ ᑮᓇᓐᓄᑦ ᐃᓄᖏᑕ ᐱᐅᖏᑦᑐᓕᓂᕐᒥᒃ ᐱᓇᓱᐊᑐᐃᓐᓇᓕᕐᓂᖏᑦ ᐱᑦᔪᑎᒋᓪᓗᒋᑦ. 6ᑕᑯᒋᑦ, ᑍᒤᓚᐅᕋᓗᐊᕐᑎᓪᓗᒍ ᐃᒡᓗᒐᓴᒡᔪᐊᑦ ᐃᓄᖏᓪᓗ ᐋᖅᑭᑦᓯᐊᕈᒫᕆᕙᒃᑲ, ᑕᑯᑎᑦᓱᒫᕆᕙᒃᑲᓗ ᐊᔪᕐᓴᕐᓇᖏᑦᑐᕐᔪᐊᒥᒃ ᐃᓅᖃᑎᒋᓕᕐᓗᒋᓪᓗ ᐃᓕᒪᓇᖏᑦᑐᒥ. 7ᐃᓴᕆᐊᓕᒥᐅᑦ ᔫᑕᒥᐅᓪᓗ ᐊᔪᕐᓴᕈᓐᓃᕐᑎᑦᓱᒫᕐᐸᒃᑲ, ᓄᓇᒋᓚᐅᕐᑕᖏᓐᓄᓪᓗ ᐅᑎᕐᑎᒻᒥᓗᒋᑦ ᓯᕗᓪᓕᕐᒥ ᐱᐅᓯᕆᓚᐅᕐᑕᖏᑎᑐᑦ. 8ᓴᓗᒻᒪᕈᒫᕐᐸᒃᑲ ᐊᔪᕐᑐᓕᓂᖏᑕ ᐸᓯᔭᒃᓴᐅᓂᖏᓐᓂᑦ, ᐃᓱᒪᒋᔪᓐᓁᕐᕕᒋᓗᒋᓪᓗ ᐊᔪᕐᓂᖏᓐᓂᒃ ᐊᑭᕋᕐᑐᕐᓂᕆᓚᐅᕐᑕᖏᓐᓂᓪᓗ ᐅᕙᓐᓄᑦ. 9ᔨᕉᓴᓕᒥᐅᑦ ᐅᕙᓐᓄᑦ ᖁᕕᐊᓇᕐᑐᒥᒃ ᐊᑎᖃᓕᕈᒫᕆᕗᑦ, ᓂᕐᑐᕐᑕᐅᓕᕈᒫᕐᐳᑦ ᐅᐱᒋᔭᐅᓗᑎᒡᓗ ᐃᓅᖃᑎᒌᒡᔪᐊᓕᒫᓄᑦ ᓄᓇᕐᔪᐊᕐᒦᑦᑐᓄᑦ ᑐᓴᕈᒫᕐᒪᑕ ᐱᐅᔪᓂᒃ ᐱᓇᓱᐊᕐᕕᒋᒐᒃᑭᑦ; ᐃᓅᖃᑎᒌᒡᔪᐊᓪᓗ ᓯᕘᕋᓕᕈᒫᕐᐳᑦ ᓴᔪᓕᕐᓗᑎᒡᓗ ᔨᕉᓴᓕᒥᐅᓄᑦ ᐱᐅᔪᓂᒃ ᐱᓂᐊᕐᓂᕆᔭᓐᓂᒃ ᐃᓄᖏᓐᓂᒡᓗ ᒪᑭᑎᑦᓯᓂᕆᔭᓐᓂᒃ ᐱᑦᔪᑎᖃᕐᓗᑎᒃ.”
10“ᐃᒫᒃ ᐊᑕᓂᖅ ᐅᖃᕐᐳᖅ: ᑕᕝᕙᓂ ᐅᖃᖃᑦᑕᕐᐳᓯ, ‘ᓄᓇᓖᑦ ᑖᒃᑯᐊ ᓄᓇᓕᕕᓂᑐᐃᓐᓇᐅᓕᕐᐳᑦ ᓱᓇᑕᖃᖏᑦᑐᑦ, ᐃᓄᖃᕋᑎᒃ ᐆᒪᔪᕐᑕᖃᕋᑎᒡᓗ,’ ᑍᒤᓚᐅᕋᓗᐊᕐᑎᓪᓗᒋᑦ ᔫᑕᒥᐅᓂᒃ ᔨᕉᓴᓕᒥᐅᓂᒡᓗ ᓱᓇᑕᖃᖏᑦᑐᓂ ᐃᓄᖃᕋᑎᒃ ᐆᒪᔪᖃᕋᑎᒡᓗ; ᑐᓴᕐᑕᐅᔪᓐᓇᕐᓯᔪᒫᕆᕗᑦ 11#ᑯᕉᓂᑲ ᓯᕗᓪᓖᑦ 16:34; ᑯᕉᓂᑲ ᐂᑉᐸᖏᑦ 5:13; 7:3; ᐄᓱᕋ 3:11; ᐃᓐᖏᕈᑦ 100:5; 106:1; 107:1; 118:1; 136:1.ᓂᐲᑦ ᖁᕕᐊᓱᒡᕙᓗᒃᑐᑦ, ᓯᕆᔪᓪᓗ, ᓄᓕᐊᓂᕋᑖᕐᑐᑦ ᐅᐃᓂᕋᑖᕐᑐᓪᓗ ᓂᐱᖏᑦ ᐃᓐᖏᕐᕙᓗᒃᑐᑦ, ᖁᔭᓕᑦᔪᑎᒥᖕᓂᒃ ᐊᑕᓂᕐᒧᑦ ᑐᓂᕐᕈᓯᕆᐊᕐᑐᕐᑐᑦ ᐊᑕᓂᐅᑉ ᐃᒡᓗᖓᓄᑦ ᐅᖃᕐᓗᑎᒡᓗ,
‘ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᖁᔭᓕᕕᒋᓯᐅᒃ,
ᐊᑕᓂᖅ ᐱᐅᔫᖕᒪᑦ, ᓇᒡᓕᒍᓱᖕᓂᖓᓗ ᐃᓱᖃᖏᑦᑑᓪᓗᓂ.’
ᓄᓇᓯ ᐊᔪᕐᓴᕈᓐᓃᕐᑎᑦᓱᒫᕋᒃᑯ ᐃᓕᖅᑯᓯᕆᓚᐅᕐᑕᖓᓄᑦ ᐅᑎᕐᑎᓪᓗᒍ, ᐊᑕᓂᖅ ᐅᖃᕐᐳᖅ.
12“ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, ᑕᕝᕙᓂ ᓄᓇᓕᖕᓂ ᓱᓇᑕᖃᖏᑦᑐᒥ ᐃᓄᖃᖏᑦᑐᒥᓗ ᐆᒪᔪᕐᑕᖃᖏᑦᑐᒥ ᓄᓇᓕᓕᒫᖏᑦ, ᐃᓄᖃᓕᕈᒫᕐᐳᖅ ᓰᐱᓕᕆᔨᓂᒃ ᐆᒪᔪᖁᑎᖏᓪᓗ ᐃᓂᒃᓴᖃᑦᓯᐊᓕᕐᓗᑎᒃ. 13ᖃᖅᑲᒦᑦᑐᑦ ᐃᒡᓗᒐᓮᑦ, ᓇᑎᕐᓇᓂ ᓄᓇᖃᕐᑐᑦ, ᔫᑕᒥᐅᓪᓗ ᐅᓪᓗᓪᓗᐊᖓᑕ ᓇᓛᓂᒥᐅᑦ ᓂᒋᑉᒥ, ᐱᓐᔭᒥᓂᐅᓪᓗ ᓄᓇᖓᓂ, ᓄᓇᓖᓪᓗ ᔨᕉᓴᓕᐅᑉ ᖃᓂᒋᔭᖓᓃᑦᑐᑦ, ᔫᑕᐅᓪᓗ ᐃᒡᓗᒐᓴᖏᓐᓃᑦᑐᑦ, ᓰᐱᓕᕆᔨᖏᑦ ᓈᓮᔪᓐᓇᕐᓯᔪᒫᕆᕗᑦ ᓰᐱᖁᑎᒥᖕᓂᒃ, ᐊᑕᓂᖅ ᐅᖃᕐᐳᖅ.
14 #
ᔨᕆᒤᐊ 23:5,6. “ᑕᑯᒋᑦ, ᐅᓪᓗᐃᑦ ᓇᓪᓕᐅᑦᓱᒫᕐᐳᑦ, ᐊᑕᓂᖅ ᐅᖃᕐᐳᖅ, ᐊᖏᕐᓂᕆᓚᐅᕐᑕᕋ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ ᓇᓚᐅᑦᓯᑎᑦᓱᒫᕋᒃᑯ. 15ᐅᓪᓗᐃᑦ ᑍᒃᑯᐊ ᓇᓪᓕᐅᑎᒃᐸᑕ ᓴᖅᑭᑎᑦᓯᔪᒫᕐᐳᖓ ᐊᑲᐅᔪᒥᒃ ᑍᕕᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, ᑖᓐᓇ ᐊᑲᐅᔪᒥᒃ ᓈᒻᒪᑦᓯᐊᕐᑐᒥᒡᓗ ᐱᓇᓱᐊᕈᒫᕐᐳᖅ ᓄᓇᒥ. 16ᑍᒃᑯᓇᓂ ᐅᓪᓗᓂ ᔫᑕᒥᐅᑦ ᐱᐅᓕᔭᐅᔪᒫᕐᐳᑦ, ᔨᕉᓴᓕᒥᐅᓪᓗ ᐃᓕᒪᓱᖏᓪᓗᑎᒃ ᐃᓅᔪᒫᕐᐳᑦ ᑍᔭᐅᔪᒫᕐᐳᓪᓗ ‘ᐊᑕᓂᖅ ᐃᓱᐊᕐᓯᑦᔪᑎᒋᕙᕗᑦ.’ 17#ᓴᒧᐃᓕ ᐂᑉᐸᖏᑦ 7:12-16; ᐊᑕᓃᑦ ᓯᕗᓪᓖᑦ 2:4; ᑯᕉᓂᑲ ᓯᕗᓪᓖᑦ 17:11-14.ᐃᒫᒃ ᐊᑕᓂᖅ ᐅᖃᕐᐳᖅ, ᑍᕕᑎᐅᑉ ᑭᖑᕚᖏᓐᓂᑦ ᐱᔪᒥᒃ ᐊᖓᔪᖅᑳᕐᔪᐊᒃᓴᕐᑕᕾᓐᓇᕈᒫᕐᐳᖅ ᐃᓴᕆᐊᓕᒥᐅᓂ. 18#ᒨᓯᓯ ᓯᑕᒪᖏᑦ 3:5-10.ᓕᕔᒃᑯᓐᓂᓪᓗ ᑐᓂᕐᕈᓯᕐᑎᑦᓯᔪᒃᓴᓂᒃ ᐱᑕᕾᓐᓇᕈᒫᕐᐳᖅ ᐆᓯᒪᔪᓂᒃ ᑐᓂᕐᕈᑎᒃᓴᓂᒃ ᑐᓂᔭᐅᔪᒃᓴᓂᒡᓗ ᑐᓂᕐᕈᓯᖃᑦᑕᕐᓂᐊᕐᑐᓂᒃ ᐃᓱᖃᖏᑦᑐᒧᑦ.”
19ᐊᑕᓂᐅᑉ ᐅᖃᐅᓯᖓ ᔨᕆᒤᐊᒧᑦ ᑎᑭᑉᐳᖅ: 20“ᐃᒫᒃ ᐊᑕᓂᖅ ᐅᖃᕐᐳᖅ, ᐊᖏᖃᑎᒌᒍᑎᖃᕐᓯᒪᓂᕋ ᐅᓪᓗᕐᒧᑦ ᐅᓐᓄᐊᒧᓪᓗ ᓯᖁᒥᑦᑐᓐᓇᕈᕕᐅᒃ, ᐅᓪᓗᕐᓗ ᐅᓐᓄᐊᕐᓗ ᐊᐅᓚᓂᕆᕙᒃᑕᖏᑎᒍᑦ ᐊᐅᓚᓂᖃᕈᓐᓃᕐᑎᑦᓱᓐᓇᕈᕕᒋᒃ. 21ᑍᒫᒃᑕᐅᖅ ᐱᔨᓐᓄᑦ ᑍᕕᑎᒧᑦ ᐊᖏᖃᑎᒌᒍᑎᒐ ᓕᕔᑎᓪᓗ ᑐᓂᕐᕈᓯᕐᑎᑦᓯᔨᐅᓂᖏᓐᓄᑦ ᓯᖁᒥᒃᑲᔭᕐᐳᖅ, ᑍᕕᑎᐅᑉ ᑭᖑᕚᖏᓐᓂᑦ ᐱᔪᒃᓴᖃᕈᓐᓃᕋᔭᕐᐳᖅ ᐃᒃᓯᕙᐅᑕᕐᔪᐊᕐᒥ ᐊᖓᔪᖅᑳᕐᔪᐊᖑᔪᒃᓴᓂᒃ. 22ᕿᓚᖕᒥᐅᒐᓴᒡᔪᐃᑦ ᓈᓴᒐᒃᓴᐅᖏᒻᒪᑕ ᓯᐅᕅᓪᓗ ᓯᒡᔭᒦᑦᑐᑦ ᓈᓴᕐᑕᐅᔪᓐᓇᕋᑎᒃ, ᑍᒫᒃᑕᐅᖅ ᑍᕕᑎᐅᑉ ᐱᔨᒪ, ᓕᕔᑎᓪᓗ ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᐸᒃᑐᑦ ᐅᕙᓐᓄᑦ ᐅᓄᕐᓯᑎᑦᓱᒫᕐᐸᒃᑲ.”
23ᐊᑕᓂᖅ ᔨᕆᒤᐊᒧᑦ ᐅᖃᕐᐳᖅ, 24“ᐃᓄᐃᑦ ᐅᖃᓪᓚᖕᓂᖏᑦ ᖃᐅᔨᒪᕕᒌᑦ? ᐅᖃᕐᒪᑕ, ‘ᐊᑕᓂᐅᑉ ᐊᖓᔪᖅᑲᐅᕕᒃ ᓂᕈᐊᓚᐅᕐᑕᓂ ᐃᓚᒌᒃ ᒪᕐᕉᒃ ᓇᕐᕈᒋᓕᕐᐹᒃ.’ ᑍᒤᒻᒪᑦ ᐃᓄᖁᑎᒃᑲ ᓇᕐᕈᒋᓕᕐᐰᑦ ᐃᓅᖃᑎᒌᒡᔪᐊᖑᔪᓐᓃᕐᓗᑎᒡᓗ ᑖᑦᓱᒪ ᓵᖓᓂ. 25ᐊᑕᓂᖅ ᐃᒫᒃ ᐅᖃᕐᐳᖅ, ᐋᖅᑭᒃᓯᓚᐅᕐᓂᖏᒃᑯᒪ ᐊᖏᖃᑎᒌᒍᑎᖃᕐᓗᖓ ᐅᓪᓘᓪᓗ ᐅᓐᓄᐊᓪᓗ ᐊᐅᓚᓂᕆᓂᐊᕐᑕᖏᓐᓂᒃ ᓄᓇᐅᓪᓗ ᕿᓚᐅᓪᓗ ᐊᐅᓚᓂᒃᓴᖏᑕ ᒪᓕᒐᒃᓴᖏᓐᓂᒃ. 26ᑍᒫᒃᑕᐅᖅ ᔧᑰᑉ ᑭᖑᕚᖏᑦ ᖁᔭᓈᕋᔭᓚᐅᕐᐸᒃᑲ, ᑍᕕᑎᐅᓪᓗ ᐱᔨᒋᔭᒪ ᐃᕐᓂᖏᓐᓂᑦ ᐱᓯᒪᔪᒥᒃ ᐂᑉᕋᕼᐋᒻᑯᑦ, ᐂᓴᑭᒃᑯᑦ, ᔧᑯᒃᑯᓪᓗ ᐊᐅᓚᑦᓯᔨᒃᓴᖃᕋᔭᓚᐅᓐᖏᓚᑦ, ᑖᒃᑯᐊ ᒪᑭᑎᑦᓱᒫᕋᒃᑭᑦ ᓂᑲᒋᓪᓗᒋᓪᓗ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 33: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
