ᔨᕆᒤᐊᐅᑉ ᐊᒡᓚᖏᑦ 31
31
ᐃᓴᕆᐊᓕᒥᐅᑦ ᐊᖏᕐᕋᒧᑦ ᐅᑎᕐᓂᖏᑦ
1ᐊᑕᓂᖅ ᐅᖃᕐᐳᖅ, “ᑕᒪᓐᓇ ᓇᓪᓕᐅᑎᒃᐸᑦ ᒎᑎᒋᔭᐅᔪᒫᕐᐳᖓ ᐃᓴᕆᐊᓕᒥᐅᑦ ᐃᓚᒌᒃᑐᖁᑎᓕᒫᖏᓐᓄᑦ ᑖᒃᑯᐊᓗ ᐃᓄᑯᑎᒋᔪᒫᕐᐸᒃᑲ.” 2ᐃᒫᒃ ᐊᑕᓂᖅ ᐅᖃᕐᐳᖅ, “ᐅᓇᑕᕐᑐᓂᑦ ᐊᓐᓇᒃᑐᑦ ᐱᑦᓯᐊᕐᕕᐅᓯᒪᓂᕐᒥᖕᓂᒃ ᖃᐅᔨᔪᒫᕐᐳᑦ ᓄᓇᖃᕐᕕᐅᕙᖏᑦᑐᓂ, ᐃᓴᕆᐊᓕᒥᐅᑦ ᑕᕾᕐᓯᕐᕕᒃᓴᖃᕈᒫᕐᐳᑦ ᕿᓂᓚᐅᕐᑕᒥᖕᓂᒃ. 3ᐊᑕᓂᖅ ᓯᕗᓕᑦᑎᓐᓄᑦ ᓴᖅᑭᑉᐸᓚᐅᕐᐳᖅ, ᐅᖃᕐᓯᒪᓪᓗᓂᓗ, ᓇᒡᓕᒋᕙᑦᓯ ᓇᒡᓕᒍᓱᖕᓂᕐᒧᑦ ᐃᓱᓕᓐᓂᐊᖏᑦᑐᒧᑦ, ᕾᖁᓚᐅᕐᐸᑦᓯᓗ ᓇᒡᓕᒍᓱᖕᓂᓐᓄᑦ ᐱᑦᓯᐊᕐᕕᒋᓪᓗᓯ. 4ᒪᑭᑎᒃᑲᓐᓂᕈᒫᕐᐸᑦᓯ, ᐱᕈᕐᑎᒃᑲᓐᓂᕐᓗᓯᓗ ᐃᓴᕆᐊᓕᒥᐅᖑᔪᓯ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᑎᑐᑦ ᑍᒤᑦᑑᔪᓯ ᓯᕙᓂᕋᐅᑎᓯ ᐊᑐᕈᓐᓇᕐᓯᔪᒫᕐᐸᓯ ᑖᓂᓯᕐᓗᓯᓗ ᖁᕕᐊᓱᖕᓂᕐᒧᑦ. 5ᐸᐅᕐᖓᓕᒃᓴᓂᒃ ᐱᕈᕐᓰᕕᓕᐅᕈᓐᓇᕐᓯᔪᒫᕆᕗᓯ ᓴᒥᐊᕆᐊᑉ ᖃᖅᑲᖏᓐᓂ ᐱᕈᕐᓰᕕᓕᕆᔪᑦ ᐱᕈᕐᑐᖏᓐᓂᑦ ᓂᕿᒃᓴᖃᑦᓯᐊᕈᒫᕐᐳᑦ. 6ᐅᓪᓗᖅ ᓇᓪᓕᐅᑎᔪᒫᕐᐳᖅ ᐃᕗᕅᒻ ᖃᖅᑲᖏᓐᓂ ᖃᐅᔨᓴᕐᑏᑦ ᕾᒐᓛᕐᕕᒃᓴᖓᑦ, ‘ᕾᓕᕆᑦᓯ ᓮᐅᓂᒧᐊᓚᐅᕐᑕ, ᐊᑕᓂᐅᑉ ᒎᑎᑦᑕ ᓇᔪᕐᑕᖓᓄᑦ.’”
7ᐃᒫᒃ ᐊᑕᓂᖅ ᐅᖃᕐᐳᖅ,
“ᔧᑯᒃᑯᑦ ᖁᕕᐊᓲᑎᒋᓗᒋᑦ ᐃᓐᖏᕆᑦᓯ,
ᓂᐱᖅᑯᕐᑐᓗᓯ ᓂᓪᓕᐊᑦᔪᑎᒋᓯᐅᒃ ᐃᓅᖃᑎᒌᒡᔪᐊᓂᑦ
ᐱᒻᒪᕆᐅᓂᕐᐹᖑᓂᖏᑦ ᐱᑦᔪᑎᒋᓗᒋᑦ,
ᓂᕐᑐᐃᓂᓯ ᑐᓴᕐᑕᐅᑎᓯᐅᒃ, ᐅᖃᕐᓗᓯᓗ,
‘ᐊᑕᓃᖅ ᐃᓄᖁᑎᑎᑦ ᐱᐅᓕᒃᑭᑦ
ᐃᓴᕆᐊᓕᒥᐅᑦ ᐊᒥᐊᒃᑯᒋᔭᖏᑦ.’
8ᑕᑯᒋᑦ, ᑎᑭᑎᒍᒫᕐᐸᒃᑲ ᐅᓐᓄᐊᓪᓗᐊᑉ ᓇᓛᓂᑦ,
ᑲᑎᕐᓱᕈᒫᕐᐸᒃᑲᓗ ᓯᓚᕐᔪᐊᑉ ᑭᒡᓕᖏᓐᓂᑦ,
ᑕᐅᑐᖏᑦᑐᑦ ᑐᓯᐊᑦᑐᓪᓗ, ᓄᑕᕋᒃᓴᓖᑦ ᐃᕐᓂᓱᒃᑐᓪᓗ
ᑖᒃᑯᓄᖓ ᐃᓚᒋᔭᐅᔪᒫᕐᐳᑦ,
ᐃᓄᒋᐊᒃᑐᕐᔪᐊᖑᓗᑎᒃ ᑕᒪᐅᖓ ᐅᑎᕈᒫᕐᒪᑕ.
9ᕿᐊᓗᑎᒃ ᕾᔪᒫᕐᐳᑦ,
ᑐᒃᓯᐊᕐᓗᑎᒡᓗ ᐱᔪᒫᕐᐳᑦ ᐅᑎᕐᑎᓕᕈᒃᑭᑦ,
ᑕᓯᐅᕈᒫᕐᐸᒃᑲ ᑰᖕᒧᑦ ᐃᒥᖃᕐᑐᒧᑦ,
ᒪᓂᕋᑦᑐᒃᑯᑦ ᐱᓱᕕᒃᓴᖃᕈᒫᕐᐳᑦ ᐹᓪᓚᒡᕕᒃᓴᖃᖁᓇᒋᑦ
ᐃᓴᕆᐊᓕᒥᐅᓄᑦ ᐊᑖᑕᐅᒐᒪ,
ᐃᕗᕅᑎᓗ ᐊᖓᔪᒃᓯᕐᐹᖁᑎᒋᕙᕋ.”
10ᐊᑕᓂᖅ ᐅᖃᕐᐳᖅ,
“ᐃᓅᖃᑎᒌᒡᔪᐊᖑᔪᓯ ᐊᑕᓂᐅᑉ ᐅᖃᐅᓯᖏᑦ ᑐᓴᓕᕐᓯᒋᒃ
ᑐᓴᕐᑕᐅᑎᓯᐅᒃ ᐃᒪᐅᑉ ᑭᒡᓕᖓᓂᒥᐅᓄᑦ ᐅᖓᓯᒃᑐᒦᑦᑐᓄᑦ,
ᐃᓴᕆᐊᓕᒥᐅᓂᒃ ᓇᒧᑐᐃᓐᓈᕐᑎᑦᓯᓚᐅᕐᑑᑉ ᑲᑎᕐᓱᕈᒫᕆᕔᑦ
ᐃᓄᖁᑎᓂᓗ ᐰᕆᓂᐊᕐᐰᑦ ᓰᐱᓂᒃ ᐰᕐᓯᔨᑎᑐᑦ.
11ᐊᑕᓂᐅᑉ ᔧᑯᒃᑯᑦ ᐅᑎᕐᑎᑕᐅᓂᖓ ᐊᑭᓕᕈᒫᕐᐹ,
ᓵᓚᒋᔨᒋᓯᒪᔭᖏᓐᓂᓪᓗ ᐱᐅᓕᓗᒋᑦ ᐅᑎᕐᑎᑦᓱᒫᕐᐰᑦ.
12ᕾᔪᒫᕐᐳᑦ ᖁᕕᐊᓱᖕᓂᕐᒧᑦ ᐃᓐᖏᕐᓗᑎᒃ ᕾᒐᓛᕐᓗᑎᒃ ᖃᖅᑲᒥ ᓮᐅᓂᒥ,
ᖁᕕᐊᓲᑎᖃᕈᒫᕐᐳᓪᓗ ᐊᑕᓂᕐᒥᒃ ᐱᓕᐅᓯᐊᒥᖕᓂᒃ ᓂᐊᖂᔭᒃᓴᓂᒃ,
ᐸᐅᕐᒊᑦ ᐃᑦᑎᖏᓐᓂᑦ ᐅᕐᓱᒃᓴᓂᓪᓗ,
ᐆᒪᔪᖁᑎᒃᓴᖏᓪᓗ ᓰᐱᖁᑎᖏᑦ ᐃᒻᒧᒃᓯᐅᒊᓪᓗ
ᐃᓅᔪᒫᕐᐳᑦ ᐱᕈᕐᓰᕕᒃᑎᑐᑦ ᐃᒪᖃᑦᓯᐊᕐᑐᑎᑐᑦ
ᑍᒤᑦᓱᒫᕐᐳᑦ ᕿᒃᓵᒍᑎᒃᓴᖃᕈᓐᓃᕐᓗᑎᒡᓗ.
13ᐊᕐᓁᑦ ᐃᓅᓱᒃᑐᑦ ᑖᓂᓯᕈᒫᕐᐳᑦ ᖁᕕᐊᓱᖕᓂᕐᒧᑦ,
ᐊᖑᑎᓪᓗ ᐃᓅᓱᒃᑐᑦ ᐃᑦᑐᐃᓪᓗ ᖁᕕᐊᓱᖃᑕᐅᔪᒫᕆᕗᑦ,
ᕿᒃᓵᖕᓂᖏᑦ ᒧᒥᒃᑎᑦᓱᒫᕐᐸᒃᑲ ᖁᕕᐊᓱᖕᓂᕐᒧᑦ,
ᓮᒻᒪᕐᑎᑦᓱᒫᕐᐸᒃᑲ, ᕿᒃᓵᖕᓂᕆᓚᐅᕐᑕᖏᑦ ᖁᕕᐊᓱᖕᓂᓐᖑᕐᑎᓪᓗᒋᑦ.
14ᑐᓂᕐᕈᓯᕐᑎᑦᓯᔩᑦ ᓂᕿᒃᓴᓂᒃ ᐊᒥᒐᖏᑦᑐᓂᒃ ᑐᓂᔪᒫᕐᐸᒃᑲ,
ᐃᓄᖁᑎᒃᑲᓗ ᓈᒻᒪᒃᓯᔪᒫᕐᐳᑦ ᑐᓂᕐᕈᑎᓂᒃ, ᐊᑕᓂᖅ ᐅᖃᕐᐳᖅ.”
ᐊᑕᓂᐅᑉ ᓂᑲᒍᓱᖕᓂᖓ ᐃᓴᕆᐊᓕᒥᐅᓄᑦ
15 #
ᒨᓯᓯ ᓯᕗᓪᓖᑦ 35:16-19;
ᒫᑎᐅᓯ 2:18. ᐃᒫᒃ ᐊᑕᓂᖅ ᐅᖃᕐᐳᖅ,
“ᕌᒪᒥ ᓂᐱ ᑐᓴᕐᓴᐅᕗᖅ,
ᕿᐊᓂᖅ ᐅᒡᒍᐊᕐᓂᕐᓗ,
ᕅᒋᓕᐅᑉ ᕿᑐᕐᖓᓂ ᕿᐊᑦᔪᑎᒋᕔᑦ;
ᓮᒻᒪᕐᓴᕐᑕᐅᔪᒪᓐᖏᓚᕐᓗ
ᕿᑐᕐᖓᖏᑦ ᓄᖑᑕᐅᖕᒪᑕ.”
16ᐃᒫᒃ ᐊᑕᓂᖅ ᐅᖃᕐᐳᖅ,
“ᕿᐊᔪᓐᓃᕆᑦ, ᐃᔩᒃᑭᒡᓗ ᖁᕝᕕᖏᐊᕐᓗᒋᒃ
ᐱᓇᓱᐊᕐᓂᑎᑦ ᐊᑭᓕᕐᑕᐅᔪᒫᕐᐳᑦ,
ᐊᑕᓂᖅ ᐅᖃᕐᐳᖅ,
ᐊᑭᕋᖏᑦᑕ ᓄᓇᖏᓐᓂᑦ ᐅᑎᕈᒫᕐᐳᑦ.
17ᓂᕆᐅᖕᓂᒃᓴᖃᑦᓯᐊᕐᐳᖅ ᓯᕗᓂᒃᓴᕐᓂ, ᐊᑕᓂᖅ ᐅᖃᕐᐳᖅ,
ᕿᑐᕐᖓᑎᑦ ᓄᓇᑐᖃᕐᒥᓄᑦ ᐅᑎᕈᒫᕐᐳᑦ.
18ᐃᕗᕅᑎ ᕿᒃᓵᒡᓗᓂ ᐅᖃᕐᑐᖅ ᑐᓴᓚᐅᕐᐸᕋ,
ᐋᖅᑭᒋᐊᓚᐅᕐᐸᕐᒪ ᓄᕐᕋᕐᑎᑐᑦ ᐃᓕᓴᕐᑕᐅᓯᒪᖏᑦᑐᑎᑐᑦ,
ᐃᓂᕐᑎᕋᕕᖓ, ᐋᖅᑭᒍᑎᒋᕙᕋᓗ ᑕᒪᓐᓇ
ᐅᑎᕐᑎᓚᐅᓐᖓ ᐅᑎᕐᓂᐊᕋᒪ
ᐊᑕᓂᐅᒐᕕᑦ ᒎᑎᒐ.
19ᑕᒻᒪᓚᐅᕋᒪ ᖃᕿᐊᓕᕐᐳᖓ;
ᑐᑭᓯᓕᕋᒪᓗ ᖁᒃᑐᕋᕋ ᑎᒡᓗᓚᐅᕐᐸᕋ;
ᑲᓐᖑᓱᓕᓚᐅᕐᐳᖓ ᑕᑯᖅᑯᑎᔪᓐᓃᕐᓗᖓᓗ,
ᒪᒃᑯᖕᓂᕐᒪ ᑕᒻᒪᕐᑎᓚᐅᕐᒪᖓ.
20ᐃᕗᕅᑎ ᐃᕐᓂᕆᓐᖏᓚᕌ?
ᕿᑐᕐᖓᕆᓪᓗᒍ ᖁᕕᐊᒋᕙᕋ
ᐊᑭᕋᕐᑐᕐᑑᔮᕐᓗᒍ ᐅᖃᕐᕕᒋᕙᒃᑕᕋᓗᐊᕋ,
ᑭᓯᐊᓂ ᐳᐃᒍᑦᔮᓐᖏᓚᒋᑦ
ᐆᒻᒪᑎᒃᑯᑦ ᐅᖓᒋᕙᒋᑦ, ᐃᓚᑦᓱᒋᓪᓗᑎᓪᓗ,
ᐊᑕᓂᖅ ᐅᖃᕐᐳᖅ.
21ᐊᖅᑯᑏᑦ ᑎᑎᕋᕐᓯᒪᔪᓂᒃ ᓇᓗᓁᒃᑯᑦᓯᓕᕐᓯᐅᒃ,
ᓇᐸᔪᓕᕐᓱᕐᓗᒋᓪᓗ ᐊᖅᑯᓪᓗ ᐊᑐᒐᓪᓚᕆᐅᔪᖅ
ᓇᓗᓇᕈᓐᓃᕐᑎᓕᕐᓯᐅᒃ ᐊᑐᕐᐸᒃᑕᓯ,
ᐅᑎᓕᕆᑦᓯ, ᐃᓴᕆᐊᓕᑏᑦ,
ᐅᑎᓕᕆᑦᓯ ᐃᒡᓗᒐᓴᒡᔪᐊᓄᑦ ᑖᒃᑯᓄᖓ.
22ᖃᓄᖅ ᐊᑯᓂᐅᑎᒋᔪᖅ ᐱᔭᕐᓂᖏᑦᑑᒐᓱᐊᕐᓂᐊᕐᐱᓰ?
ᐅᒃᐱᕈᓱᒍᓐᓇᖏᑦᑐᓯ, ᐊᑕᓂᖅ ᓄᑖᒥᒃ ᓴᖅᑭᑎᑦᓯᓂᐊᕐᐳᖅ
ᐊᖑᒻᒥᒃ ᐊᕐᓇᒧᑦ ᓴᐳᑦᔭᐅᓯᒪᖔᕐᑐᑎᑐᑦ ᑍᒤᑦᑐᒥᒃ.”
ᒎᑎᐅᑉ ᐃᓄᖁᑎᖏᑕ ᐱᔪᓐᓇᑦᓯᐊᕈᒫᕐᓂᖓᑦ
23ᐃᒫᒃ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ: “ᐊᐅᓪᓚᕈᑦᔭᐅᓯᒪᕕᒋᓚᐅᕐᑕᖏᓐᓂᑦ ᐅᑎᕐᑎᓯᒪᓕᕈᒃᑭᑦ, ᐃᓄᐃᑦ ᔫᑕᐅᑉ ᓄᓇᖓᓂ ᓄᓇᖃᓚᐅᕐᑐᑦ ᐅᖃᕈᓐᓇᕐᓯᔪᒫᕆᕗᑦ ᐃᒫᒃ,
‘ᐊᑕᓂᐅᑉ ᓮᒻᒪᕐᑎᓪᓕᓯ, ᓄᓇᖃᕐᑐᓯ ᐃᓱᐊᕐᑐᓕᓂᕐᒥ,
ᖃᖅᑲᒦᑦᑐᑦ ᐃᑦᔪᕐᓁᑦᑐᒥ.’
24ᐃᓄᐃᑦ ᓄᓇᖃᖃᑎᒌᒍᒫᕐᐳᑦ ᔫᑕᐅᑉ ᓄᓇᓕᖁᑎᖏᓐᓂ, ᐱᕈᕐᓰᕕᓕᕆᔨᖃᐅᕈᒫᕐᐳᖅ ᓰᐱᓕᕆᔨᖃᐅᕐᓗᓂᓗ. 25ᑕᕐᓂᖏᑦ ᑕᖃᓯᒪᔪᑦ ᑕᕾᕐᓯᕐᕕᒃᓴᖃᕐᑎᑦᓱᒫᕐᐸᒃᑲ, ᑳᒡᑐᓪᓗ ᓂᕿᒃᓴᖃᕐᑎᓪᓗᒋᑦ. 26ᐃᓄᐃᓪᓗ ᐅᖃᕈᒫᕐᐳᑦ, ᑕᖃᓪᓗᖓ ᓯᓂᓕᓚᐅᕐᐳᖓ ᑐᐸᒃᐳᖓᓕ ᑕᖃᓯᒪᔪᓐᓃᕐᓗᖓ.
27“ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐅᓪᓗᐃᑦ ᓇᓪᓕᐅᑦᓱᒫᕐᐳᑦ ᐃᓴᕆᐊᓕᐅᑉ ᔫᑕᐅᓪᓗ ᓄᓇᖓ ᑲᓐᖓᕐᓱᐃᕕᒋᔪᒫᕋᒃᑯ ᐃᓄᖕᓂᒃ ᐆᒪᔪᓂᒡᓗ. 28ᓲᕐᓗᑦᑕᐅᖅ ᐱᕈᕐᑎᑦᓯᕙᒃᑲᒪ ᓄᖑᑎᑦᓯᕙᒡᓗᖓᓗ ᓵᓚᐅᑎᑦᓯᕙᒃᑲᒪ ᐊᓯᕈᐃᑎᑦᓯᕙᒡᓗᖓᓗ ᓄᖑᑕᐅᑎᑦᓯᕙᒡᓗᖓᓗ, ᑍᒫᒃᑕᐅᖅ ᐱᕈᕐᑎᑦᓱᒫᕐᐸᒃᑲ ᒪᑭᑎᓪᓗᒋᓪᓗ, ᐊᑕᓂᖅ ᐅᖃᕐᐳᖅ. 29#ᐃᓯᑭᐊᓕ 18:2.ᑍᑦᓱᒪᓂᐅᓕᕐᐸᑦ ᐃᓄᐃᑦ ᐅᖃᖃᑦᑕᕈᓐᓃᕈᒫᕐᐳᑦ ᐃᒫᒃ:
‘ᐊᑖᑕᒋᔭᕗᑦ ᒪᒪᖏᑦᑐᓂᒃ ᐱᕈᕐᑐᓂᒃ ᓂᕆᓚᐅᕐᓂᕐᐳᑦ,
ᕿᑐᕐᖓᖏᑕᓕ ᒪᒪᖏᓐᓂᖓ ᐱᐅᔪᓐᓃᕈᑎᒋᕚᑦ.’
30ᓇᓪᓕᐊᑦ ᑐᖁᔪᒫᕐᐳᖅ ᓇᖕᒥᓂᖅ ᐊᔪᕐᑐᓕᑦᔪᑎᒋᔭᒥᓄᑦ; ᐱᕈᕐᑐᒥᒡᓗ ᒪᒪᖏᑦᑐᒥᒃ ᓂᕆᔫᑉ ᓇᖕᒥᓂᖅ ᐱᐅᔪᓐᓃᕈᑎᒋᔪᒫᕐᐹ.”
31 #
ᒫᑎᐅᓯ 26:28; ᒫᑯᓯ 14:24; ᓘᑲᓯ 22:20; 1 ᑯᕆᓐᑎ 11:25; 2 ᑯᕆᓐᑎ 3:6. #
ᐄᑉᕈᐃᓄᑦ 8:8-12. ᐊᑕᓂᖅ ᐅᖃᕐᐳᖅ, “ᑕᑯᒋᑦ, ᐅᓪᓗᐃᑦ ᓇᓪᓕᐅᑦᓱᒫᕐᐳᑦ, ᓄᑖᒥᒃ ᐊᖏᖃᑎᒌᒍᑎᓕᐅᕈᒫᕐᓂᕋ ᐃᓴᕆᐊᓕᐅᑉ ᔫᑕᐅᓪᓗ ᐃᓅᖃᑎᒌᖏᓐᓄᑦ. 32ᑖᓐᓇ ᐊᖏᖃᑎᒌᒍᑎᒋᔭᕋ ᐊᑦᔨᖃᕈᒫᓐᖏᓚᖅ ᓯᕗᓕᖏᓐᓄᑦ ᐊᖏᖃᑎᒌᒍᑎᒋᓚᐅᕐᑕᓐᓄᑦ, ᑎᒍᓪᓗᒋᑦ ᑕᓯᐅᓚᐅᕋᒃᑭᑦ ᐄᑦᔨᑉᑎᒥᑦ, ᐊᖏᖃᑎᒌᒃᓯᒪᓂᑦᑎᓐᓂᒃ ᓯᖁᒥᑦᓯᓚᐅᕐᒪᑕ, ᐅᐃᒋᔭᐅᔪᑎᑐᑦ ᑖᒃᑯᓄᖓ ᑍᒤᒃᑲᓗᐊᕐᑎᓪᓗᖓ, ᐊᑕᓂᖅ ᐅᖃᕐᐳᖅ. 33#ᐄᑉᕈᐃᓄᑦ 10:16.ᐃᒤᑦᑐᒥᒃ ᐊᖏᖃᑎᒌᒍᑎᓕᐅᕈᒫᕐᐳᖓ ᐃᓴᕆᐊᓕᒥᐅᓄᑦ ᑍᒃᑯᐊ ᐅᓪᓗᐃᑦ ᑭᖑᕐᖓᒍᑦ, ᐊᑕᓂᖅ ᐅᖃᕐᐳᖅ: ᐱᖁᔭᒃᑲ ᑎᑎᕋᕈᒫᕐᐸᒃᑲ ᐃᓱᒪᖏᓐᓄᑦ ᐆᒻᒪᑎᖏᓐᓄᓪᓗ; ᑖᒃᑯᓄᖓ ᒎᑎᒋᔭᐅᔪᒫᕐᐳᖓ ᑖᒃᑯᐊᓗ ᐃᓄᖁᑎᒋᓗᒋᑦ. 34#ᐄᑉᕈᐃᓄᑦ 10:17.ᐃᓅᖃᑎᒥᖕᓂᒃ ᐊᔪᕆᕐᑐᐃᔭᕆᐊᖃᕈᓐᓃᕈᒫᕐᐳᑦ ᖃᑕᓐᖑᑎᒥᖕᓂᒡᓘᓐᓃᑦ ᐅᖃᐅᑦᔨᔪᖃᕐᐸᒍᓐᓃᕐᓗᓂ, ᐊᑕᓂᖅ ᖃᐅᔨᓕᕈᒃ, ᐅᕙᓐᓂᒃ ᖃᐅᔨᒪᔪᐃᓐᓇᐅᓕᕈᒫᕐᐳᑦ ᓱᓇᐅᖏᓐᓂᕐᐹᒥᑦ ᐱᓪᓚᕆᐅᓂᕐᐹᒧᑦ, ᐊᑕᓂᖅ ᐅᖃᕐᐳᖅ; ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓃᕈᒫᕋᒃᑭᑦ ᐃᖅᑲᐅᒪᔪᓐᓃᕐᓗᒋᓪᓗ.”
35ᐃᒫᒃ ᐊᑕᓂᖅ ᐅᖃᕐᐳᖅ, “ᓯᕿᓂᕐᒥᒃ ᖃᐅᒪᑎᑦᓯᔪᖅ ᐅᓪᓘᑎᓪᓗᒍ,
ᐅᓐᓄᐊᒃᑯᓪᓗ ᑕᖅᑭᖃᕐᑎᑦᓯᔪᖅ ᐅᓪᓗᕆᐊᖃᕐᑎᑦᓯᓪᓗᓂᓗ,
ᐃᒪᕐᐱᖕᓂᒃ ᒪᓕᒡᔪᐊᖃᕐᑎᑦᓯᔪᖅ;
ᑖᓐᓇᐅᕗᖅ ᐊᑎᖃᕐᑐᖅ ᐊᑕᓂᕐᒥᒃ ᐊᔪᒐᖃᖏᑦᑐᒥᒃ.
36ᐊᑕᓂᖅ ᐅᖃᕐᐳᖅ, ᑕᒪᒃᑯᐊ ᐋᖅᑭᒃᓯᒪᓂᖏᑦ ᐊᓯᐅᒐᔭᕐᐸᑕ ᓵᓐᓂ,
ᐃᓴᕆᐊᓕᒥᐅᑦᑕᐅᖅ ᑭᖑᕚᖏᑦ ᓄᖑᒃᑲᔭᕐᐳᑦ ᐃᓅᖃᑎᒌᒡᔪᐊᖑᓂᖓ ᓵᓐᓂ ᐃᓱᖃᖏᑦᑐᒧᑦ.”
37ᐊᑕᓂᖅ ᐃᒫᒃ ᐅᖃᕐᐳᖅ,
“ᕿᓚᐅᑉ ᐊᖏᓂᖓ ᐆᒃᑐᕋᕐᑕᐅᔪᓐᓇᕋᔭᕐᐸᑦ,
ᓄᓇᕐᔪᐊᓪᓗ ᑐᓐᖓᕕᖓ ᖃᐅᔨᔭᐅᔪᓐᓇᕐᓯᓗᓂ,
ᑕᕝᕙ ᐃᓴᕆᐊᓕᒥᐅᑦ ᑭᖑᕚᖏᑦ ᐃᒋᑦᓱᒫᕐᐸᒃᑲ
ᐱᓂᐊᕐᓂᕆᓚᐅᕐᑕᖏᑦ ᐱᑦᔪᑎᒋᓪᓗᒋᑦ,
ᐊᑕᓂᖅ ᐅᖃᕐᐳᖅ.”
38ᐊᑕᓂᖅ ᐅᖃᕐᐳᖅ, “ᑕᑯᒋᑦ, ᓇᓪᓕᐅᑦᓱᒫᕐᐳᖅ ᐃᒡᓗᒐᓴᒡᔪᐊᑦ ᓇᑉᐸᕐᑎᑕᐅᒃᑲᓐᓂᕈᒫᕐᓂᖓᑦ ᕼᐊᓇᓂᐅᑉ ᓇᐸᔪᕐᔪᐊᖓᓂᑦ ᐱᒋᐊᕐᓗᒍ ᐃᑎᕐᑕᕐᕕᒃ ᐃᓱᒥᒃ ᐊᑎᓕᒃ ᑎᑭᓪᓗᒍ. 39ᑭᒡᓕᖓᑕᓗ ᓇᓗᓁᕐᓯᒪᓂᖓ ᐱᒋᐊᕈᒫᕐᐳᖅ ᒐᕆᑉ ᐱᖑᖓᓂᑦ ᓴᖑᓗᓂ ᒍᐊᒧᑦ. 40ᓇᕐᓴᓕᒫᖅ ᐃᓗᕕᕐᓯᕕᐅᕙᒃᑐᖅ ᐊᒃᓯᕕᐅᕙᒃᑐᕐᓗ, ᓇᑎᕐᓇᕐᓗ ᑭᑐᕌᓂᐅᑉ ᑰᖓᓂᑦ, ᐃᑎᕐᑕᕐᕕᒃ ᕿᒻᒥᕐᔪᐊᒥᒃ ᑍᔭᐅᔪᖅ ᑎᑭᓪᓗᒍ, ᐊᑕᓂᐅᑉ ᓄᓇᖁᑎᖓᓂᒃ ᐃᑦᔪᕐᓁᑦᑐᒥᒃ ᑍᔭᐅᔪᒃᓴᐅᕗᖅ, ᐃᒡᓗᒐᓴᒡᔪᐊᓪᓗ ᓯᖁᑦᑎᕐᑕᐅᒃᑲᓐᓂᕈᒫᓐᖏᓚᑦ ᐊᓯᕈᕐᑕᐅᒃᑲᓐᓂᓚᐅᕐᓯᒪᔪᓐᓃᕐᓗᑎᒡᓗ ᐃᓱᖃᖏᑦᑐᒧᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 31: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
