ᔨᕆᒤᐊᐅᑉ ᐊᒡᓚᖏᑦ 30
30
ᐊᑕᓂᐅᑉ ᐊᖏᕈᑎᖃᕐᓂᖓ ᐃᓄᖁᑎᒥᓄᑦ
1ᐅᑯᐊ ᐅᖃᐅᓰᑦ ᔨᕆᒤᐊᐅᑉ ᐅᖃᐅᑦᔭᐅᑦᔪᑎᒋᕔᑦ ᐊᑕᓂᕐᒧᑦ, 2“ᐃᒫᒃ ᑕᕝᕙ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ᐃᓕᖕᓄᑦ ᐅᖃᐅᓯᕆᔭᓕᒫᒃᑲ ᐊᒡᓚᖕᓄᑦ ᑎᑎᕋᒃᑭᑦ; 3ᐊᑕᓂᖅ ᐅᖃᕐᐳᖅ, ᐅᓪᓗᐃᑦ ᑎᑭᑦᓱᒫᕐᐳᑦ, ᐃᓄᖁᑎᒃᑲ ᐃᓴᕆᐊᓕᒥᐅᑦ ᔫᑕᒥᐅᓪᓗ ᑎᒍᔭᐅᓯᒪᕕᒋᔭᖏᓐᓂ ᐅᑎᕐᑎᑦᓱᒫᕋᒃᑭᑦ: ᓄᓇᖃᓕᖁᓪᓗᒋᑦ ᓯᕗᓕᕕᓂᖏᓐᓄᑦ ᐊᖏᕈᑎᒋᓚᐅᕐᑕᓐᓂᒃ ᓄᓇᒋᔭᐅᖁᓪᓗᒍ, ᐊᑕᓂᖅ ᐅᖃᕐᐳᖅ.”
4ᐅᑯᐊ ᑕᕝᕙ ᐊᑕᓂᐅᑉ ᐅᖃᐅᓯᖏᑦ ᐃᓴᕆᐊᓕᒦᑦᑐᓄᑦ ᔫᑕᒦᑦᑐᓄᓪᓗ:
5“ᑲᑉᐱᐊᓱᐊᔪᑦ ᓂᐱᖏᓐᓂᒃ ᑐᓴᕐᓴᐅᔪᖃᕐᐳᖅ,
ᑲᑉᐱᐊᓱᒃᑐᑦ ᓂᐱᖏᓐᓂᒃ ᓮᒪᔪᓂᐅᖏᑦᑐᖅ.
6ᐃᓱᒪᒋᓕᕐᓯᐅᒃ ᒫᓐᓇ ᑕᑯᓗᓯᓗ, ᐊᖑᑦ ᐃᕐᓂᓱᒡᓗᓂ ᕿᑐᕐᖏᔪᓐᓇᕐᐹ?
ᓱᖕᒪᓪᓕ ᐊᖑᑎᒻᒪᕆᐊᓗᖕᓂᒃ ᑕᑯᓐᓇᕐᐳᖔ?
ᓈᕐᒥᖕᓂᒃ ᐸᑎᒻᒥᒡᓕᕐᑐᓂᒃ ᐊᕐᓇᑎᑐᑦ ᐃᕐᓂᓱᒃᑐᑎᑐᑦ,
ᑮᓇᖏᓪᓗ ᖃᑯᕐᓯᓯᒪᓪᓗᑎᒃ.
7ᐅᓪᓗᖅ ᑍᓐᓇ ᑲᑉᐱᐊᓇᕐᑐᖃᕐᑐᖅ ᐊᑦᔨᖃᕈᒫᓐᖏᓚᖅ
ᔧᑯᒃᑯᑦ ᐊᒃᓱᕈᕐᓇᕐᑐᒦᑦᓱᒫᕐᐳᑦ,
ᑭᓯᐊᓂᓕ ᑕᕝᕙᓐᖓᑦ ᐱᐅᓕᔭᐅᔪᒫᕐᐳᑦ.”
8ᐊᑕᓂᖅ ᐅᖃᕐᐳᖅ, ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᓄᓯᒪᑦᔪᑎᖏᑕ ᕿᔪᒃᑕᖏᑦ ᖁᖓᓯᖏᓐᓃᑦᑐᑦ ᓱᕋᒍᒫᕐᐸᒃᑲ, ᐊᑦᑐᖏᕐᓯᒪᑦᔪᑎᒋᔭᖏᓪᓗ ᐲᔭᕐᓗᒋᑦ, ᐊᔪᓕᕐᑎᑕᐅᓯᒪᒃᑲᓐᓂᖁᓇᒋᑦ ᐊᓯᖏᑕ ᐊᐅᓚᑦᓯᓂᖏᓐᓄᑦ. 9ᑖᒃᑯᐊᓕ ᐱᔨᑦᓯᖁᓪᓗᒋᑦ ᐊᑕᓂᕐᒥᒃ ᒎᑎᒥᖕᓂᒃ, ᐊᖓᔪᖅᑳᕐᔪᐊᕕᓂᐅᓪᓗ ᑍᕕᑎᐅᑉ ᑭᖑᕚᖓᓂᒃ, ᒪᑭᑎᑦᓱᒫᕐᑕᓐᓂᒃ ᑖᒃᑯᓄᖓ.
10 #
ᔨᕆᒤᐊ 46:27,28. “ᔧᑯᒃᑯᑦ ᐃᓄᖁᑎᒃᑲ,
ᓯᕘᕋᓂᐊᕋᓯ ᓴᐱᓕᕐᑍᓕᓗᓯᓗ ᐃᓴᕆᐊᓕᒥᐅᑕᐅᔪᓯ;
ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐱᐅᓕᓂᐊᕐᐸᑦᓯ ᓄᓇᒥᑦ ᐅᖓᓯᒃᑐᒥᑦ,
ᑭᖑᕚᓯᓗ ᐊᐅᓪᓚᕐᑎᑕᐅᓯᒪᕕᒋᔭᖏᓐᓂᑦ,
ᔧᑯᒃᑯᑦ ᐃᓕᒪᓱᖏᓪᓗᑎᒃ ᖃᓄᐃᖏᑦᓯᐊᕐᓗᑎᒡᓗ ᐃᓅᔪᓐᓇᕐᓯᔪᒫᖁᓪᓗᒋᑦ,
ᑭᓇᒧᓪᓘᓐᓃᑦ ᑲᑉᐱᐊᓱᒃᑎᑕᐅᖏᓪᓗᑎᒃ.
11ᐱᖃᑎᒋᒐᒃᑭᑦ ᐱᐅᓕᓂᐊᕐᐸᒋᑦ, ᐊᑕᓂᖅ ᐅᖃᕐᐳᖅ,
ᐃᓅᖃᑎᒌᒡᔪᐊᑦ ᐊᓯᕈᕐᑕᐅᑎᒃᑲᓗᐊᕈᒃᑭᑦ
ᐊᐅᓪᓚᕐᑎᑕᐅᓯᒪᕕᒋᓚᐅᕐᑕᓯ ᓯᐊᒻᒪᕐᑎᑕᐅᕕᒋᓯᒪᓪᓗᒋᑦ,
ᐃᓕᑦᓯᓐᓂᒃ ᓄᖑᑕᐅᓪᓚᕆᒃᑎᑦᓯᓂᐊᓐᖏᓚᖓ,
ᐋᖅᑭᒋᐊᖃᑦᑕᕐᓂᐊᕐᐸᑦᓯ ᐊᑲᐅᔪᖅ ᑭᓯᐊᓂ
ᐱᑦᔪᑎᒋᓗᒍ, ᓱᒋᐊᕐᑕᐅᑎᖏᑦᑑᑎᓐᓂᐊᓐᖏᓚᑦᓯ.”
12ᐃᒫᒃ ᐊᑕᓂᖅ ᐅᖃᕐᐳᖅ,
“ᐃᑭᓕᕐᑕᐅᓯᒪᓂᓯ ᒪᒥᑦᑐᓐᓁᓪᓕᖕᒪᑦ,
ᐋᓐᓂᕐᓯᒪᓂᓯᓗ ᐋᖅᑭᒐᒃᓴᐅᔪᓐᓃᕐᓗᓂ.
13ᐋᖅᑭᒃᓱᐃᔨᖃᕈᓐᓃᕋᑦᓯ, ᑭᓪᓕᑦᓯᓐᓄᑦ,
ᐃᓅᓕᓴᐅᑎᒃᓴᖃᕈᓐᓃᕐᐳᑦ ᐋᖅᑭᒃᑕᐅᑦᔪᑎᒃᓴᖃᕈᓐᓃᕐᓗᓯᓗ.
14ᐅᖓᒋᔨᒋᓚᐅᕐᑕᑦᓯ ᐳᐃᒍᕐᐹᓯ
ᐃᒃᐱᒋᔭᐅᔪᓐᓃᕐᓗᓯᓗ ᑖᒃᑯᓄᖓ,
ᐊᑭᕋᑦᑐᑦ ᐊᑭᓂᐊᕐᕕᒋᒐᑦᓯ,
ᓇᒡᓕᖕᓂᖃᖏᑦᑐᑎᑐᑦ ᓱᒋᐊᕐᐸᑦᓯ
ᐸᓯᔭᒃᓴᐅᓂᓯ ᐊᖏᔫᓗᐊᓕᕐᒪᑦ,
ᐊᔪᕐᑐᓕᓯᒪᓂᓯᓗ ᐅᓄᓗᐊᓕᕐᓗᑎᒃ.
15ᓱᖕᒪᑦ ᐃᑭᓕᕐᑕᐅᓯᒪᓂᑦᓯᓐᓂᒃ ᕿᓄᑦᔪᑎᖃᕋᓱᐊᕐᐱᓰ?
ᐋᓐᓂᐊᓯ ᐋᖅᑭᒍᑎᒃᓴᖃᓐᖏᓚᖅ.
ᑍᒤᓕᐅᕆᕗᖓ ᐃᓕᑦᓯᓐᓂᒃ
ᐅᓄᕐᑐᓂᒃ ᐸᓯᔭᒃᓴᐅᑦᔪᑎᖃᕐᓂᓯ
ᐊᔪᕐᑐᓕᓯᒪᓂᓯᓗ ᐱᓪᓗᒋᑦ.
16ᐃᓕᑦᓯᓐᓂᒃ ᓄᖑᑎᑦᓯᔪᓕᒫᑦ ᓄᖑᑕᔪᒫᕐᐳᑦ;
ᐊᑭᕋᕐᑐᕐᑎᓕᒫᓯ ᐊᐅᓪᓚᕈᑦᔭᐅᔪᒫᕐᐳᑦ,
ᐃᓕᑦᓯᓐᓂᒃ ᐱᖁᑍᕈᑦᔨᔪᑦ ᐱᖁᑍᕈᑦᔭᐅᔪᒫᕐᐳᑦ,
ᐃᓕᑦᓯᓐᓂᒡᓗ ᓱᓇᐅᔪᓐᓃᕐᑎᑦᓯᔪᑦ ᓱᓇᐅᔪᓐᓃᕐᑎᑦᓱᒫᕐᐸᒃᑲ.
17ᐃᓕᑦᓯᓐᓂᒃ ᖃᓄᐃᑦᑐᓐᓃᕐᑎᑦᓯᑦᓯᐊᕐᓂᐊᕆᕗᖓ,
ᐃᑭᓯᓗ ᒪᒥᑎᓪᓗᒋᑦ, ᐊᑕᓂᖅ ᐅᖃᕐᐳᖅ,
ᐃᒋᑕᐅᓯᒪᔪᓂᒃ ᑍᔭᐅᓕᕋᑦᓯ,
‘ᓮᐅᓂ ᐃᒃᐱᒋᔭᐅᔪᓐᓁᕐᒪᑦ.’”
18ᐃᒫᒃ ᐊᑕᓂᖅ ᐅᖃᕐᐳᖅ,
“ᑕᑯᒋᑦ, ᔧᑰᑉ ᐃᒡᓗᖓ ᐱᐅᓯᖓᓄᑦ ᐅᑎᕐᑎᑦᓱᒫᕐᐸᕋ,
ᓇᔪᒐᖏᓪᓗ ᓂᑲᒋᓕᕐᓗᒋᑦ,
ᐃᒡᓗᒐᓴᒡᔪᐊᕕᓂᕐᓂᓪᓗ ᓱᕐᕋᑯᓂᑦ
ᐃᒡᓗᒐᓴᒡᔪᐊᖏᑦ ᓇᑉᐸᕐᑎᑦᓱᒫᕆᕙᒃᑲ,
ᐊᖓᔪᖅᑳᒃᑯᕕᖓᓗ ᐃᓂᒋᕙᒃᑕᒥᓂ ᓇᐸᓕᕈᒫᕆᕗᖅ.
19ᑖᒃᑯᓇᓐᖓᑦ ᓂᕐᑐᐃᔪᓂᒃ ᐃᓐᖏᕐᑐᖃᕈᒫᕐᐳᖅ;
ᖁᕕᐊᓱᒡᕙᓗᒃᑐᓪᓗ ᓂᐱᖃᓕᕈᒫᕆᕗᑦ,
ᐅᓄᕐᓯᕙᓪᓕᐊᔪᒫᕐᐳᑦ ᓄᖑᑉᐸᓪᓕᐊᖏᓪᓗᑎᒃ ᐅᐱᒋᔭᐅᑎᑦᓱᒫᕐᐸᒃᑲ ᐊᖏᔪᕈᕐᑎᓪᓗᒋᓪᓗ.
20ᕿᑐᕐᖓᖃᐅᑦᓯᐊᓕᕈᒫᕆᕗᑦ ᐃᓕᖅᑯᓯᕆᕙᓚᐅᕐᑕᒥᒃᑎᑐᑦ
ᓄᓇᓕᖁᑎᖏᓐᓃᑦᓱᒫᕐᐳᖓᓗ ᐅᖁᒤᒃᓴᕐᑎᑦᓯᔨᒋᔭᖏᓪᓗ ᓱᒋᐊᕈᒫᕐᐸᒃᑲ.
21ᓇᖕᒥᓂᕐᒥᖕᓂᓪᓗ ᓯᕗᓕᕐᑎᑖᕈᒫᕐᐳᑦ
ᐊᖓᔪᖅᑳᕐᔪᐊᖃᕐᓗᑎᒡᓗ ᐃᓅᖃᑎᒥᖕᓂᑦ ᐱᔪᒥᒃ.
ᐅᕙᓐᓄᓪᓗ ᖃᒡᓕᑎᓐᓂᐊᕐᐸᕋ ᖃᓂᒋᔭᓐᓃᓪᓗᓂ ᐃᓅᖁᓪᓗᒍ.
ᑭᓇ ᕾᔪᓐᓇᕐᐹ ᐅᕙᓐᓄᑦ ᑐᓐᖓᓴᕐᑕᐅᖏᓪᓗᓂ?
22ᑖᒃᑯᐊ ᐃᓄᖁᑎᒋᔪᒫᕐᐸᒃᑲ,
ᑖᒃᑯᓇᓐᖓᓪᓗ ᒎᑎᒋᔭᐅᓗᖓ.
ᐊᑕᓂᖅ ᐅᖃᕐᐳᖅ.”
23ᑕᑯᓕᕐᓯᐅᒃ ᐊᑕᓂᐅᑉ ᐊᓄᕆᕐᔪᐊᖁᑎᖓ ᓂᓐᖓᖕᓂᖓᓂᒃ ᑎᑭᐅᑦᔨᔪᖅ, ᐅᓚᔪᔨᕋᕐᑎᑐᑦ ᐊᖅᑲᕐᑐᖅ ᐱᐅᖏᑦᑐᓕᔪᓄᑦ. 24ᐊᑕᓂᐅᑉ ᓂᓐᖓᕕᒡᔪᐊᕐᓂᖓ ᓴᖑᑦᔮᖏᒻᒪᑦ ᐱᓂᐊᕈᒪᔭᒥᓂᒃ ᐱᔭᕇᓚᐅᖏᓐᓂᓕᒫᒥᓂ, ᐅᓪᓗᐃᑦ ᑭᖑᓪᓕᖏᓐᓂ ᑕᒪᓐᓇ ᑐᑭᓯᔪᒫᕐᐸᓯ.
Currently Selected:
ᔨᕆᒤᐊᐅᑉ ᐊᒡᓚᖏᑦ 30: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
