ᔨᕆᒤᐊᐅᑉ ᐊᒡᓚᖏᑦ 29
29
ᔨᕆᒤᐊᐅᑉ ᑎᑎᕋᕐᑕᖏᑦ ᔫᑎᓄᑦ ᐹᐱᓘᓂᒦᑦᑐᓄᑦ
1 #
ᐊᑕᓃᑦ ᐂᑉᐸᖏᑦ 24:12-16; ᑯᕉᓂᑲ ᐂᑉᐸᖏᑦ 36:10. ᐅᑯᐊ ᑕᕝᕙ ᔨᕆᒤᐊᐅᑉ ᒎᑎᐅᑉ ᐅᖃᕐᑎᖓᑕ ᑎᑎᕋᖏᑦ ᔨᕉᓴᓕᒥᑦ ᐊᐅᓪᓚᕐᑎᑕᐅᓯᒪᔪᑦ ᐊᖓᔪᖅᑳᖏᑕ ᐊᒥᐊᒃᑯᖏᓐᓄᑦ, ᑐᓂᕐᕈᓯᕐᑎᑦᓯᔨᓄᓪᓗ, ᒎᑎᒧᓪᓗ ᐅᖃᕐᑎᒋᔭᐅᔪᓄᑦ, ᐃᓄᖕᓄᓪᓗ ᓂᐱᑯᓁᓴᒧᑦ ᐊᐅᓪᓚᕈᑦᔭᐅᓯᒪᔪᓄᑦ ᔨᕉᓴᓕᒥᑦ ᐹᐱᓘᓂᒧᑦ. 2ᑖᒃᑯᐊ ᑎᑎᕋᓚᐅᕐᐰᑦ ᐊᖓᔪᖅᑳᕐᔪᐊᖅ ᔨᑯᓁᐊ ᓄᓕᐊᖓᑕᓗ ᐊᓈᓇᖓ ᐊᖓᔪᖅᑳᖁᑎᖏᓪᓗ ᔫᑕᒥ ᔨᕉᓴᓕᒥᓗ ᓯᕗᓕᕐᑎᐅᔪᑦ, ᕿᔪᓕᕆᔩᑦ, ᓴᕕᕋᔭᓕᕆᔩᓪᓗ ᔨᕉᓴᓕᒥᑦ ᐊᐅᓪᓚᕈᑦᔭᐅᓯᒪᓕᕐᑎᓪᓗᒋᑦ. 3ᑎᑎᕋᕐᑕᓂᓗ ᑐᓂᕔᑦ ᐃᓖᓴᒧᑦ ᓴᕙᓂᐅᑉ ᐃᕐᓂᖓᓄᑦ ᔨᒪᕅᐊᒧᓪᓗ ᕼᐃᓪᑬᐊᐅᑉ ᐃᕐᓂᖓᓄᑦ, ᑖᑦᓱᒪᓗ ᔨᑎᑬᐊᒧᑦ ᑐᓂᕔᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑖᑦᓱᒪᓗ ᐊᐅᓪᓚᕐᑎᑕᐅᑎᑉᐰᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑖᒃᑯᐊᓗ ᐃᒫᒃ ᐅᖃᐅᓯᖃᕐᐳᑦ:
4“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑍᒃᑯᓄᖓ ᐊᐅᓪᓚᕈᑦᔭᐅᑎᓚᐅᕐᑕᓐᓄᑦ ᔨᕉᓴᓕᒥᑦ ᐹᐱᓘᓂᒧᑦ. 5‘ᓄᓇᖃᑐᖃᕐᓂᐊᕐᑐᑎᑐᑦ ᐃᒡᓗᓕᐅᓕᕆᑦᓯ ᐊᖏᕐᕋᒃᓴᑦᓯᓐᓂᒃ, ᐱᕈᕐᓰᕕᒃᑖᕐᑐᕐᓗᓯᓗ ᓂᕿᖃᕐᕕᒃᓴᑦᓯᓐᓂᒃ. 6ᐂᑉᐸᕐᑖᕐᑐᕆᑦᓯ ᕿᑐᕐᖓᕐᑖᕐᓂᐊᕋᑦᓯ, ᕿᑐᕐᖓᓯᓗ ᐂᑉᐸᕐᑖᕐᑎᓪᓗᓯᐅᒃ ᕿᑐᕐᖓᕐᑖᖁᓪᓗᒋᑦᑕᐅᖅ, ᐅᓄᕐᓯᕙᓪᓕᐊᖁᓪᓗᓯ ᓄᖑᑉᐸᓪᓕᐊᖏᓪᓗᓯ. 7ᐃᓅᖃᑎᒌᑦᓯᐊᕋᓱᐊᕐᓯᒋᒃ ᐱᕙᓪᓕᐊᖃᑎᒋᑦᓯᐊᕋᓱᐊᕐᓗᒋᓪᓗ ᓄᓇᖃᑎᑖᕆᓚᐅᕐᑕᓯ ᐊᐅᓪᓚᕐᑎᑕᐅᕕᑦᓯᓐᓄᑦ, ᐊᑕᓂᕐᒧᑦ ᑐᒃᓯᐊᕈᑎᒋᖃᑦᑕᕐᓗᒍ, ᐱᔪᓐᓇᕐᓯᑦᓯᐊᕐᐸᑕᓗ ᐱᔪᓐᓇᕐᓯᑦᓯᐊᕐᓂᐊᕆᕗᓯ. 8ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐃᒫᒃ ᐅᖃᕐᐳᖅ, ᒎᑎᒧᑦ ᐅᖃᕐᑎᒋᔭᐅᔪᓄᑦ ᓯᓔᕐᕆᔭᐅᑦᑍᓕᒋᑦᓯ, ᐅᕝᕙᓘᓐᓃᑦ ᓯᕗᓂᒃᓴᒥᒃ ᖃᐅᔨᒪᓇᓱᐊᕐᑎᓄᑦ, ᓯᓐᓇᒃᑐᖏᓪᓗ ᐅᒃᐱᕆᑦᑍᓕᓯᒋᒃ. 9ᓇᓚᐅᑦᑍᓂᖏᑦ ᐊᑎᓐᓂ ᓱᓕᖏᒻᒪᑕ, ᑖᒃᑯᐊ ᑎᓕᓯᒪᖏᓐᓇᒃᑭᑦ ᑍᒤᓕᐅᖁᓪᓗᒋᑦ. ᐊᑕᓂᖅ ᐅᖃᕐᐳᖅ.’
10 #
ᑯᕉᓂᑲ ᐂᑉᐸᖏᑦ 36:21; ᔨᕆᒤᐊ 25:11; ᑖᓂᐊᓕ 9:2. ᐃᒫᒡᓕ ᐊᑕᓂᖅ ᐅᖃᕐᐳᖅ, ‘ᐊᕐᕌᒍᐃᑦ 70 ᐹᐱᓘᓂᒦᓐᓂᓯ ᓈᒻᒪᒃᓯᒃᐸᑕ ᑕᕝᕙ ᐅᐸᒍᒫᕐᐸᑦᓯ ᐊᖏᕐᓂᕆᓚᐅᕐᑕᕋᓗ ᐃᓕᑦᓯᓐᓄᑦ ᐊᑑᑎᑎᑦᓱᒫᕐᐸᕋ ᐅᑎᕐᑎᓪᓗᓯᓗ ᑕᒪᐅᖓ. 11ᐃᓱᒪᒋᓯᒪᓪᓗᒋᑦ ᐋᖅᑭᒃᓱᐃᑦᔪᑎᒋᓯᒪᔭᒃᑲ ᐃᓕᑦᓯᓐᓄᑦ ᖃᐅᔨᒪᒐᒃᑭᑦ, ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᐱᔪᓐᓇᕐᓯᑎᑦᓯᔪᒪᓯᒪᓂᕋ, ᐊᓯᕈᐃᔪᒪᓗᖓᐅᖏᑦᑐᖅ ᐋᖅᑭᒃᓱᐃᓯᒪᒐᒪ ᓂᕆᐅᒋᔭᒃᓴᖃᖁᓪᓗᓯ ᓯᕗᓂᒃᓴᖃᖁᓪᓗᓯᓗ. 12ᕿᓄᒍᑦᓯ ᐅᕙᓐᓄᓪᓗ ᑐᒃᓯᐊᕈᑦᓯ ᑐᓴᕐᓂᐊᕐᐸᑦᓯ. 13#ᒨᓯᓯ ᑕᓪᓕᒪᖏᑦ 4:29.ᕿᓂᕈᑦᓯᓐᖓ ᓇᓂᓂᐊᕐᐸᑦᓯᓐᖓ ᐃᓗᖏᕐᓱᕐᓗᓯ ᕿᓂᓕᕈᑦᓯᓐᖓ ᓇᓂᓂᐊᕐᐸᑦᓯᓐᖓ. 14ᐃᓕᑦᓯᓐᓄᑦ ᓇᓂᔭᐅᔪᓐᓇᕐᐳᖓ, ᐊᑕᓂᖅ ᐅᖃᕐᐳᖅ, ᐅᑎᕐᑎᓐᓂᐊᕐᐸᑦᓯᓗ ᑎᒍᔭᐅᓯᒪᕕᒋᓚᐅᕐᑕᑦᓯᓐᓂᑦ, ᐃᓅᖃᑎᒌᒡᔪᐊᓕᒫᓂᑦ ᓇᑭᑐᐃᓐᓇᖅ ᑲᑎᕐᓱᕐᓂᐊᕐᐸᑦᓯ ᐊᐅᓪᓚᕐᑎᑕᐅᕕᒋᓯᒪᓚᐅᕐᑕᑦᓯᓐᓂᑦ, ᐊᑕᓂᖅ ᐅᖃᕐᐳᖅ, ᐊᐅᓪᓚᕐᑎᑕᐅᕕᒋᓚᐅᕐᑕᑦᓯᓐᓂᑦ ᓄᓇᒋᓐᖏᑕᑦᓯᓐᓄᑦ, ᐅᑎᕐᑎᑦᓱᒫᕆᕙᑦᓯ ᓄᓇᑦᓯᓐᓄᑦ.’
15ᐅᖃᕋᓗᐊᕈᑦᓯ, ᐊᑕᓂᐅᑉ ᐅᖃᕐᑎᒥᓂᒃ ᑎᓕᓯᕕᒋᓯᒪᓕᕐᐹᑎᒍᑦ ᐹᐱᓘᓂᒥᑦ. 16ᐃᒫᒃ ᐊᑕᓂᖅ ᐅᖃᕐᓯᒪᕗᖅ ᑍᕕᑎᐅᑉ ᐊᖓᔪᖅᑲᐅᕕᖓᓂ ᐊᖓᔪᖅᑳᕐᔪᐊᖑᔪᒧᑦ ᐃᓄᖕᓄᓪᓗ ᓄᓇᒥ ᑕᕝᕙᓃᑦᑐᓄᑦ ᐊᐅᓪᓚᕈᑦᔭᐅᓚᐅᕐᓯᒪᖏᑦᑐᓄᑦ. 17ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑕᑯᒋᑦ, ᐅᓇᑕᕐᕕᐅᑎᓐᓂᐊᕐᐸᒃᑲ ᑳᖕᓇᕐᑐᕐᔪᐊᒦᑎᓪᓗᒋᓪᓗ, ᐋᓐᓂᐊᓇᕐᑐᖃᕐᑎᑦᓯᕕᒋᓗᒋᓪᓗ ᐱᒋᓕᒃᓴᑎᑐᑦ ᓂᕆᔭᒃᓴᐅᔪᓐᓃᕐᑐᑎᑐᑦ ᑍᒤᑎᑦᓱᒫᕐᐸᒃᑲ. 18ᐅᓇᑕᕐᑕᐅᑎᓐᓂᐊᕐᐸᒃᑲ ᑳᖕᓇᕐᑐᕐᔪᐊᖃᕐᑎᑦᓯᓗᖓᓗ ᐋᓐᓂᐊᓇᕐᑐᖃᕐᑎᑦᓯᓂᐊᕐᐳᖓ ᐃᓅᖃᑎᒌᒡᔪᐊᓄᓪᓗ ᑲᑉᐱᐊᓲᑕᐅᓂᐊᕐᐳᑦ ᑕᒪᒃᑯᐊ ᑕᑯᔭᐅᓕᕈᑎᒃ ᑍᒃᑯᓄᖓ ᑎᑭᑎᒃᑯᒃᑭᑦ. 19ᐅᖃᐅᓯᓐᓂᒃ ᓈᓚᓚᐅᖏᒻᒪᑕ, ᐊᑕᓂᖅ ᐅᖃᕐᐳᖅ, ᐅᓄᕐᑐᐃᕐᓱᕐᓗᖓ ᐅᖃᕐᑕᐅᖁᔭᓐᓂᒃ ᑐᓴᕐᑎᖃᑦᑕᓚᐅᕋᓗᐊᕋᒃᑭᑦ ᐅᖃᕐᑎᒃᑲ ᐊᖅᑯᑎᒋᓪᓗᒋᑦ, ᐃᓕᑦᓯᑦᑕᐅᖅ ᓈᓚᒍᒪᓚᐅᓐᖏᓚᓯ, ᐊᑕᓂᖅ ᐅᖃᕐᐳᖅ. 20ᐊᑕᓂᐅᑉ ᐅᖃᐅᓯᖏᑦ ᑐᓴᓕᕐᓯᐅᒃ ᐃᓕᑦᓯ ᐊᐅᓪᓚᕈᑦᔭᐅᓯᒪᔪᓯ ᔨᕉᓴᓕᒥᑦ ᐹᐱᓘᓂᒧᑦ.
21ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐂᕼᐊᑉ ᐱᓪᓗᒍ ᑯᓔᐊᐅᑉ ᐃᕐᓂᖓ, ᔨᑎᑬᐊᓗ ᐱᓪᓗᒍ ᒫᓯᐊᐅᑉ ᐃᕐᓂᖓ, ᑖᒃᑯᐊᒃ ᓱᓕᖏᑦᑐᓂᒃ ᐊᑎᓐᓂ ᐅᖃᐅᑦᔪᐃᑲᑦᑕᕐᒪᑎᒃ ᐃᓕᑦᓯᓐᓂᒃ, ᑖᒃᑯᐊᒃ ᑎᒍᔭᐅᑎᓐᓂᐊᕐᐹᒃᑲᒃ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑖᑦᓱᒪᓗ ᑐᖁᑕᐅᑎᑦᓱᒫᕐᐹᒃ ᑕᑯᓐᓇᕐᑎᓪᓗᓯ. 22ᐃᓄᐃᓪᓗ ᐊᐅᓪᓚᕈᑦᔭᐅᓯᒪᔪᑦ ᔨᕉᓴᓕᒥᑦ ᐹᐱᓘᓂᒧᑦ ᓱᒋᐊᕐᑕᐅᖁᔨᓕᕌᖓᒥᒃ ᐅᖃᕐᐸᖕᓂᐊᕐᐳᑦ, ‘ᐊᑕᓂᐅᑉ ᐱᓂᐊᕐᕕᒋᓕᑎᑦ ᓲᕐᓗ ᔨᑎᑬᐊᒧᑦ ᐂᕼᐊᑉᒧᓪᓗ ᐱᓂᐊᓚᐅᕐᓂᖓᑐᑦ ᐆᒪᑎᓪᓗᒋᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓄᑦ ᐃᑯᐊᓪᓚᒃᑕᐅᓚᐅᕐᒪᑎᒃ.’ 23ᐃᓴᕆᐊᓕᒥ ᓈᒻᒪᖏᑦᑐᓂᒃ ᐱᓇᓱᐊᕐᓯᒪᖕᒪᑎᒃ, ᓯᓚᖅᑲᑎᒥ ᓄᓕᐊᖏᓐᓂᒃ ᐊᓯᓐᓂᐊᖃᑦᑕᕐᓯᒪᖕᒪᑎᒃ, ᐊᑎᕋᓗ ᐊᑐᕐᓗᒍ ᓴᒡᓗᓪᓗᑎᒃ ᐅᖃᖃᑦᑕᕐᓯᒪᓪᓗᑎᒃ, ᐅᖃᖁᓗᒋᑦ ᐅᖃᓚᐅᕐᓯᒪᑎᓐᓇᖓ. ᐅᕙᖓ ᖃᐅᔨᒪᒐᒪ, ᖃᐅᔨᓯᒪᔫᓂᐊᕐᐳᖓ ᑖᒃᑯᓂᖓ, ᐊᑕᓂᖅ ᐅᖃᕐᐳᖅ.”
ᓯᒤᐊᐅᑉ ᑎᑎᕋᖏᑦ
24ᓯᒤᐊ ᐅᖃᐅᑎᒍᒃ ᓂᕼᐃᓚᒥ ᓄᓇᓕᒃ. 25ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓ ᐃᒫᒃ ᐅᖃᕐᐳᖅ, “ᐃᓕᖕᓂᓐᖔᕐᑐᓂᒃ ᓇᖕᒥᓂᖅ ᔨᕉᓴᓕᒥᐅᓄᑦ ᑎᑎᕋᓚᐅᕐᐳᑎᑦ, ᔨᐸᓁᐊ ᒫᓯᐊᐅᑉ ᐃᕐᓂᖓ ᐊᖅᑯᑎᒋᓪᓗᒍ ᑐᓂᕐᕈᓯᕐᑎᑦᓯᔨᐅᔪᖅ, ᑐᓂᕐᕈᓯᕐᑎᑦᓯᔨᐅᖃᑎᖏᓐᓄᓪᓗ ᔨᐸᓁᐊ ᐅᖃᐅᑎᓚᐅᕋᕕᐅᒃ:
26ᐊᑕᓂᐅᑉ ᑐᓂᕐᕈᓯᕐᑎᑦᓯᔨᓐᖑᕐᑎᑉᐹᑎᑦ ᔨᕼᐅᐃᐊᑕᐅᑉ ᐃᓂᖓᓂ ᑲᒪᔨᒻᒪᕆᐅᓕᖁᓪᓗᑎᑦ ᑐᒃᓯᐊᕐᕕᒡᔪᐊᒥ, ᑍᒤᒻᒪᑦ ᐱᔭᒃᓴᖃᕐᐳᑎᑦ ᐃᓱᒪᖃᑦᓯᐊᖏᑦᑐᑦ ᐅᕝᕙᓘᓐᓃᑦ ᒎᑎᒧᑦ ᐅᖃᕐᑎᒋᔭᐅᓐᖑᐊᕐᑐᑦ ᐊᑦᑐᖏᐅᓯᕐᑕᐅᕙᖁᓪᓗᒋᑦ ᐊᕐᓵᕐᑑᔭᓄᑦ ᖁᖓᓯᕈᓯᕐᑕᐅᓯᒪᓗᑎᒃ ᓴᕕᕋᔭᖕᒥᒃ. 27ᓱᖕᒪᓪᓕ ᔨᕆᒤᐊ ᐊᓇᑑᑎᒥᐅᖅ ᓱᐊᖏᑉᐱᐅᒃ? ᒎᑎᒧᑦ ᐅᖃᕐᑎᒋᔭᐅᓂᕋᕐᓗᓂ ᐃᓕᑦᓯᓐᓄᐊᓚᐅᕐᑐᖅ? 28ᐹᐱᓘᓂᒧᑦ ᐅᖃᐅᓯᒃᓴᖃᓚᐅᕐᒪᑦ ᐃᒤᑦᑐᒥᒃ, ᐊᑯᓂ ᑕᐅᕙᓃᓐᓂᐊᕋᑦᓯ ᐃᒡᓗᓕᐅᓕᕆᑦᓯ ᓄᓇᖃᑯᑖᖕᓂᐊᕐᑐᑎᑐᑦ, ᐱᕈᕐᓰᕕᓕᐅᕆᑦᓯ ᓂᕿᒃᓴᖃᕐᕕᒋᓂᐊᕐᑕᑦᓯᓐᓂᒃ.”
29ᔨᐸᓁᐊᐅᓪᓕ ᑐᓂᕐᕈᓯᕐᑎᑦᓯᔨᐅᑉ ᑎᑎᖅᑲᑦ ᐅᖃᓕᒫᕐᐰᑦ ᔨᕆᒤᐊ ᒎᑎᐅᑉ ᐅᖃᕐᑎᖓ ᑐᓵᑎᓪᓗᒍ. 30ᑕᕝᕙ ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ: 31“ᐊᐅᓪᓚᕈᑦᔭᐅᓯᒪᔪᓕᒫᑦ ᐅᖃᐅᑎᒃᑭᑦ ᐃᒫᒃ ᐊᑕᓂᖅ ᐅᖃᐅᓯᖃᕐᐳᖅ, ‘ᓯᒤᐊ ᓂᕼᐃᓚᒥ ᓄᓇᓕᒃ ᐱᓪᓗᒍ, ᓯᒤᐊ ᐃᓕᑦᓯᓐᓄᑦ ᐱᔪᒫᕐᑐᒃᓴᓂᒃ ᐅᖃᐅᓯᖃᓚᐅᕐᒪᑦ ᑎᓕᓚᐅᖏᒃᑲᓗᐊᕐᑕᕋ ᑍᒫᒃ ᐅᖃᖁᓗᒍ, ᓱᓕᖏᑦᑐᒥᒃ ᐃᓕᑦᓯᓐᓂᒃ ᐅᒃᐱᓕᕐᑎᑦᓯᖕᒪᑦ. 32ᐃᒫᒃ ᐊᑕᓂᖅ ᐅᖃᕐᐳᖅ, ᓯᒤᐊ ᓂᕼᐃᓚᒥ ᓱᒋᐊᕐᓂᐊᕐᐸᕋ ᑭᖑᕚᖏᑦ ᐱᖃᓯᐅᑎᓗᒋᑦ, ᐃᓅᖃᑎᒃᓴᖃᕈᓐᓃᕐᓂᐊᕐᐳᖅ ᐃᓚᒋᔭᒥᓂ, ᐱᐅᔪᓂᒡᓗ ᐃᓄᖁᑎᓐᓄᑦ ᐱᓇᓱᐊᕐᓂᕆᔭᒃᑲ ᑕᑯᓂᐊᓐᖏᓔᑦ, ᐊᑕᓂᖅ ᐅᖃᕐᐳᖅ, ᐅᖃᐅᓯᖃᓚᐅᕐᒪᑦ ᐅᕙᓐᓂᒃ ᐊᑭᕋᕐᑐᕐᑐᓂᒃ.’”
Currently Selected:
ᔨᕆᒤᐊᐅᑉ ᐊᒡᓚᖏᑦ 29: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
