ᔨᕆᒤᐊᐅᑉ ᐊᒡᓚᖏᑦ 3
3
ᐃᓴᕆᐊᓕᒥᐅᑦ ᐊᓯᓐᓂᐊᕐᓂᖏᑦ
1ᐊᖑᑦ ᓄᓕᐊᒥᓂᒃ ᐊᕕᑦᑎᒃᐸᑦ ᐊᕐᓇᐅᓪᓗ ᐅᐃᒋᓚᐅᕐᑕᓂ ᕿᒪᒡᓗᒍ ᐊᓯᐊᓂᒡᓗ ᐅᐃᓂᒡᓗᓂ, ᐅᐃᒋᓚᐅᕐᑕᖓᑕ ᐅᑎᕐᕕᒋᔭᕆᐊᖃᕐᐸᐅᒃ? ᐃᓕᑦᓯᓕ ᐊᖑᓐᓂᐊᕐᑎᑎᑐᑦ ᐃᓅᓕᕐᐳᓯ ᐅᓄᕐᑐᓂᒃ ᐅᖓᒋᔭᖃᓕᕐᑐᑎᑐᑦ, ᑕᕝᕙ ᒫᓐᓇ ᐅᕙᓐᓄᑦ ᐅᑎᕈᓐᓇᕐᐱᓰ? ᐊᑕᓂᖅ ᐅᖃᕐᐳᖅ. 2ᐱᖑᐃᑦ ᖄᖏᓐᓄᑦ ᑕᑯᓴᓕᕆᑦᓯ, ᐊᓯᓐᓂᐊᕐᕕᒋᓯᒪᓐᖏᑕᑦᓯᓐᓂᒃ ᐱᑕᖃᕐᐹ? ᐊᖅᑯᑏᑦ ᓴᓂᕌᓂ ᐅᑕᖅᑭᕗᓯ ᐅᖓᒋᔭᑦᓯᓐᓂᒃ, ᓄᓇᖁᑎᖃᖏᑦᑐᑎᑐᑦ ᑍᒤᓪᓗᓯ ᓲᕐᓗ ᐃᓄᖃᔪᐃᑦᑐᒦᑦᑐᑎᑐᑦ ᐋᕋᑉᒥᐅᑎᑐᑦ, ᓄᓇ ᓇᕐᕈᓇᕐᓯᑎᑉᐸᓯ ᐊᖑᓐᓂᐊᕐᑎᑎᑐᑦ ᐃᓕᖅᑯᓯᖃᕐᓂᑦᓯᓐᓄᑦ ᐱᐅᖏᑦᑐᓕᓂᑦᓯᓐᓄᓪᓗ. 3ᑍᒤᒻᒪᑦ ᓄᓇ ᖃᐅᓯᓕᕐᑎᑕᐅᔪᓐᓇᕈᓐᓃᕐᐳᖅ ᐅᐱᕐᖔᒃᑯᓪᓗ ᓯᓚᓗᒍᓐᓇᕈᓐᓃᕐᓗᓂ, ᐊᖑᓐᓂᐊᕐᑎᑎᑐᑦ ᑕᐅᑦᑐᖃᓕᕋᓗᐊᕋᕕᑦ ᑲᓐᖑᓲᑎᒋᔪᒪᓐᖏᓔᓪᓘᓐᓃᑦ. 4ᐅᖃᕐᕕᒋᕋᑖᓚᐅᓐᖏᓚᕐᒫ? ᐊᑖᑕᒋᓂᕋᕐᓗᖓ, ᐃᓚᓐᓈᕆᓂᕋᕐᓗᖓᓗ ᐃᓅᓱᒃᑑᓂᕐᓂᑦ. 5ᐅᖃᕐᐸᒃᐳᑎᑦ, ᓂᓐᖓᒡᕕᒋᓯᒤᓐᓇᕐᓂᐊᕐᐱᑎᒎᑦ? ᑕᐅᕗᖓᓕᒫᖅ, ᑍᒫᒃ ᐅᖃᕋᓗᐊᕐᓗᑎᑦ ᐱᐅᖏᑦᑐᓕᐅᕈᑎᒋᔪᓐᓇᕐᑕᓕᒫᑎᑦ ᐊᑐᕋᓱᐊᖃᑦᑕᕐᐸᑎᑦ.
ᐃᓴᕆᐊᓕᒥᐅᑦ ᔫᑕᒥᐅᓪᓗ ᓵᒋᐊᕐᑐᒃᓴᐅᕗᑦ
6 #
ᐊᑕᓃᑦ ᐂᑉᐸᖏᑦ 22:1—23:30; ᑯᕉᓂᑲ ᐂᑉᐸᖏᑦ 34:1—35:27. ᔫᓮᐊ ᐊᖓᔪᖅᑳᕐᔪᐊᖑᑎᓪᓗᒍ, ᐊᑕᓂᐅᑉ ᐅᖃᕐᕕᒋᕚᖓ, “ᑕᑯᓯᒪᕕᓪᓖ? ᐃᓴᕆᐊᓕᒥᐅᑦ ᐅᒃᐱᕈᒪᖏᑦᑐᑦ ᐃᓕᖅᑯᓯᖏᓐᓂᒃ? ᐱᖑᓕᒫᑦ ᖄᖏᓐᓂ ᓇᐹᕐᑐᐃᓪᓗ ᐊᑖᓐᓂ ᐊᓯᓐᓂᐊᓚᐅᕐᐹᖓ ᐊᖑᓐᓂᐊᕐᑎᑎᑐᑦ. 7ᑍᒤᓕᐅᓚᐅᕋᓗᐊᕐᓗᑎᒃ ᐅᕙᓐᓄᑦ ᐅᑎᕐᓂᐊᕋᓱᒋᓚᐅᕋᓗᐊᕐᐸᒃᑲ ᑭᓯᐊᓂᓕ ᐅᑎᓚᐅᓐᖏᓚᑦ, ᐊᓯᓐᓂᐊᕐᑎᐅᖃᑎᖓᑕᓗ ᔫᑕᐅᑉ ᑕᒪᓐᓇ ᑕᑯᓚᐅᕆᕚ. 8ᐃᓴᕆᐊᓕᒥᐅᑉ ᐊᓯᓐᓂᐊᕐᓂᖓ ᐱᓪᓗᒍ ᐊᕕᑦᑎᑦᔪᑎᓂᒃ ᑐᓂᓚᐅᕐᐸᕋ, ᕿᒪᒡᓗᒍᓗ, ᑍᒤᑎᑦᓯᓂᕋ ᔫᑕᐅᑉ ᑕᑯᒐᓗᐊᕋᒥᐅᒃ ᓯᕘᕋᓕᓚᐅᖏᓐᓂᕗᕐᑕᐅᖅ. ᐊᓯᓐᓂᐊᕐᓂᕐᒥᓂᒡᓗ ᑲᔪᓯᑐᐃᓐᓇᓚᐅᕐᐳᖅ. 9ᐃᓴᕆᐊᓕᒥᐅᑉ ᓈᒻᒪᖏᑦᑐᓕᓂᖓ ᔫᑕᐅᑉ ᓱᕙᓪᓕᕈᑎᒋᓚᐅᖏᒻᒪᒍ. ᓄᓇ ᓇᕐᕈᓇᕐᓯᑎᓚᐅᕐᐹ ᐊᓯᓐᓂᐊᕈᑎᖃᕐᓗᓂᓗ ᐅᔭᕋᖕᒥᒃ ᕿᔪᖕᒥᒡᓗ. 10ᑍᒤᓕᐅᕋᓗᐊᕋᒥᒃ ᐊᓯᓐᓂᐊᕐᑎᐅᖃᑎᖓᑕ ᔫᑕᐅᑉ ᐅᑎᕐᕕᒋᓚᐅᓐᖏᓛᖓ ᓱᓕᑦᓯᐊᕐᓗᓂ, ᑭᓯᐊᓂᓕ ᐅᑎᓐᖑᐊᑐᐃᓐᓇᓚᐅᕐᐳᖅ, ᐊᑕᓂᖅ ᐅᖃᕐᐳᖅ.”
11ᐊᑕᓂᐅᑉ ᐅᖃᐅᑎᒋᕚᖓ, “ᐃᓴᕆᐊᓕ ᐅᒃᐱᕆᔭᖃᓐᖏᓕᕋᓗᐊᕐᓗᓂ ᐅᕙᓐᓂᒃ, ᐸᓯᔭᒃᓴᐅᖏᓐᓂᕐᓴᐅᕗᖅ ᔫᑕᐅᑉ ᐊᓯᓐᓂᐊᕐᓂᖓᓂᑦ. 12ᐂᓕᕆᑦ, ᐅᓐᓄᐊᓪᓗᐊᑉ ᓇᓛᓃᑦᑐᓄᑦ ᐅᖃᕆᐊᕐᑐᕆᑦ. ᐃᓴᕆᐊᓕ ᐅᕙᓐᓄᑦ ᐅᑎᓚᐅᕆᑦ, ᐊᑕᓂᖅ ᐅᖃᕐᐳᖅ, ᓂᓐᖓᐅᒪᓂᕐᒧᑦ ᑕᑯᓂᐊᓐᖏᓚᒋᑦ ᓂᑲᒍᓱᒃᑐᕐᔫᒐᒪ, ᐃᓱᖃᖏᑦᑐᒧᑦ ᓂᓐᖓᐅᒪᓂᐊᓐᖏᓚᖓ. 13ᐸᓯᔭᒃᓴᐅᓃᑦ ᓇᓗᓁᓕᕈᒃ, ᐊᑕᓂᖅ ᒎᑏᑦ ᐊᑭᕋᕐᑐᓚᐅᕋᕕᐅᒃ ᐱᓂᐊᕐᓂᕆᔭᑎᓪᓗ ᔫᑎᐅᖏᑦᑐᑦ ᒎᑎᓐᖑᐊᖏᓐᓄᑦ ᐱᓂᐊᓚᐅᕋᕕᒋᑦ. ᓇᐹᕐᑐᐃᑦ ᓇᒧᑐᐃᓐᓇᖅ ᓯᐊᒻᒪᖓᔪᑦ ᐊᑖᓐᓂ ᐅᕙᓐᓂᒃ ᓈᓚᓚᐅᖏᓐᓇᕕᑦ. ᐊᑕᓂᖅ ᐅᖃᕐᐳᖅ. 14ᐊᑕᓂᖅ ᐅᖃᕐᐳᖅ, ᐊᓯᓐᓂᐊᕐᑎᐅᔪᓯ ᐅᕙᓐᓄᑦ ᐅᑎᕆᑦᓯ, ᐅᐃᒋᒐᑦᓯᓐᖓ. ᓂᕈᐊᕐᓂᐊᕐᐳᖓ ᐊᑕᐅᓯᕐᒥᒃ ᓄᓇᓕᖁᑎᑦᓯᓐᓂᑦ ᑕᒤᓐᓂᑦ, ᒪᕐᕉᓈᕐᑎᕆᓗᖓᓗ ᐃᓚᒌᖕᓂᑦ ᐊᑐᓂᑦ, ᓮᐅᓂᒧᓐᖓᐅᑎᓗᓯᓗ. 15ᐰᕐᓯᔨᑖᕐᑎᓐᓂᐊᕐᐸᑦᓯᓗ ᐅᕙᓐᓂᒃ ᓈᓚᑦᓯᐊᕐᑐᓂᒃ, ᑕᓯᐅᕐᓯᖁᓪᓗᒋᑦ ᓯᓚᑐᓗᑎᒃ ᑐᑭᓯᒪᑦᓯᐊᕐᓗᑎᒡᓗ. 16ᐅᓪᓗᓂ ᑍᒃᑯᓇᓂ ᐅᓄᕐᓯᕙᓪᓕᐊᓕᕈᑦᓯ ᓄᓇᒋᔭᑦᓯᓐᓂ, ᐊᑕᓂᖅ ᐅᖃᕐᐳᖅ, ᐅᖃᕐᑐᖃᕈᓐᓁᓕᔪᒫᕐᐳᖅ, ‘ᐊᑕᓂᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ.’ ᐃᓱᒪᒋᔪᒫᓐᖏᓛᑦ, ᐃᖅᑲᐅᒪᓇᒍᓗ, ᑭᖑᓂᖃᓈᕐᓇᒍᓗ, ᐊᑦᔨᐊᓂᒡᓗ ᓴᓇᔪᖃᕐᓂᐊᓐᖏᓚᖅ. 17ᑕᒪᓐᓇ ᓇᓪᓕᐅᑎᒃᐸᑦ ᔨᕉᓴᓕᒻ ᐊᑕᓂᕐᒧᑦ ᐃᒃᓯᕙᐅᑕᕐᔪᐊᖃᕐᕕᐅᓂᕋᕐᑕᐅᓕᕈᒫᕐᐳᖅ, ᐃᓅᖃᑎᒌᒡᔪᐊᓪᓗ ᔨᕉᓴᓕᒧᑦ ᑲᑎᖃᑦᑕᕈᒫᕐᐳᑦ ᐊᑕᓂᐅᑉ ᐊᑎᖓᓂᒃ ᐅᐱᒍᓱᖕᓂᕐᒥᖕᓂᒃ ᓇᓗᓁᕐᓯᔭᕐᑐᕐᓗᑎᒃ. ᐆᒻᒪᑎᒥᒃᑕ ᓯᑎᔫᓂᖏᓐᓂᒃ ᐱᐅᖏᑦᑐᓕᔪᒪᓂᖏᓐᓂᒡᓗ ᒪᓕᒍᓐᓃᕈᒫᕐᐳᑦ. 18ᑍᒃᑯᓇᓂᓗ ᐅᓪᓗᓂ ᔫᑕᒥᐅᑦ ᐃᓚᓕᐅᑎᔪᒫᕐᐳᑦ ᐃᓴᕆᐊᓕᒥᐅᓄᑦ, ᑖᒃᑯᐊᓗ ᐃᓅᖃᑎᒌᖑᓗᑎᒃ ᐅᓐᓄᐊᓪᓗᐊᑉ ᓇᓛᓂᓐᖓᕐᓗᑎᒃ ᓄᓇᑖᕈᒫᕐᐳᑦ ᓯᕗᓕᑦᓯᓐᓄᑦ ᓄᓇᑖᕆᔭᐅᖁᓚᐅᕐᑕᕋ ᑭᖑᕐᖑᑎᓕᕐᓗᒍ.”
ᒎᑎᐅᑉ ᐃᓄᖁᑎᖏᑕ ᐊᓯᓐᓂᐊᕐᓯᒪᓂᖏᑦ
19ᐊᑕᓂᖅ ᐅᖃᕐᐳᖅ,
“ᐅᖃᓚᐅᕐᐳᖓᓕ, ᖁᕕᐊᓱᒃᑲᔭᓚᐅᕐᐳᖓ ᐃᕐᓂᑦᑐᑦ ᐱᔪᒪᓗᓯ,
ᓄᓇᒃᑯᒥᓇᕐᑐᒥᓗ ᓄᓇᖃᕐᑎᓪᓗᓯ.
ᐃᓅᖃᑎᒌᒡᔪᐊᓄᑦ ᑭᖑᕐᖑᑎᔭᐅᕙᒃᑐᓂᑦ ᐱᐅᓂᕐᐹᒥᒃ.
ᐊᑖᑕᒥᒡᓗ ᑍᔭᐅᕙᖕᓂᐊᕈᒪᓪᓗᖓ, ᖁᔭᓈᕐᑕᐅᓂᐊᕋᓱᒋᓇᖓᓗ.
20ᐊᕐᓇᑎᑐᓪᓕ ᐊᓯᓐᓂᐊᕐᑐᑐᑦ ᐅᐃᒥᓂᒃ,
ᐃᓴᕆᐊᓕᒥᐅᑦ ᐊᓯᓐᓂᐊᓚᐅᕐᐹᖓ,” ᐊᑕᓂᖅ ᐅᖃᕐᐳᖅ.
21ᕿᐊᕙᓗᖕᓂᒃ ᑐᓴᕐᓴᐅᔪᖃᕐᐳᖅ
ᐱᖑᐃᑦ ᖄᖏᓐᓂ ᓇᐹᕐᑐᖃᖏᓐᓂᕐᒥ.
ᑖᒃᑯᐊᖑᕗᑦ ᐃᓴᕆᐊᓕᒥᐅᑦ ᕿᐊᓂᖏᑦ ᕿᓄᓂᖏᓪᓗ
ᓈᒻᒪᖏᑦᑐᓕᓚᐅᕐᓂᕐᒥᖕᓄᑦ ᐊᑕᓂᕐᒥᒡᓗ ᒎᑎᒥᖕᓂᒃ ᐳᐃᒍᓚᐅᕐᓂᕐᒥᖕᓄᑦ.
22ᐅᑎᕆᑦᓯ, ᐊᑕᓂᕐᒥᒃ ᕿᒤᓚᐅᕐᑐᓯ
ᑕᕝᕙ ᑲᑕᒃᓯᒪᓂᑦᓯᓐᓂᑦ ᐋᖅᑭᖕᓂᐊᕐᐸᑦᓯ.
ᐅᖃᕐᐳᓯ, “ᐅᑎᕈᒪᕗᒍᑦ ᐊᑕᓂᐅᒐᕕᑦ ᒎᑎᒋᔭᕗᑦ. 23ᒎᑎᐅᑉ ᐊᓯᐊᓅᕐᓂᕗᑦ ᐱᖑᐃᑦ ᖄᖏᓐᓂ ᖃᖅᑲᓂᓗ ᐃᑲᔪᕐᓯᒪᓐᖏᓚᑦ ᐅᕙᑦᑎᓐᓂᒃ, ᐊᑕᓂᕐᒥ ᒎᑎᑦᑎᓐᓂ ᑭᓯᐊᓂ ᐃᓴᕆᐊᓕᒥᐅᑦ ᐱᐅᓕᔭᐅᕕᒃᓴᖃᕐᐳᑦ. 24ᒎᑎᓐᖑᐊᓅᕐᓂᑦᑕ ᑲᓐᖑᓇᕐᓂᖓ ᐊᓯᐰᑐᐃᓐᓇᕐᓯᒪᕗᖅ ᓯᕗᓕᕕᓂᑦᑕ ᐱᓇᓱᐊᕐᓂᕕᓂᖏᓐᓂᒃ, ᐃᓅᓱᒃᑐᖁᑎᖏᓐᓂᒃ, ᐆᒪᔪᖁᑎᖏᓐᓂᒡᓗ. 25ᑲᓐᖑᓱᖕᓂᕐᒧᑦ ᒪᑭᑕᔪᓐᓇᕈᓐᓃᕐᑐᒃᓴᐅᕗᒍᑦ. ᑲᓐᖑᓱᖕᓂᕐᒧᓪᓗ ᐅᓕᒃᑕᐅᔪᒃᓴᐅᕗᒍᑦ ᐊᔪᕐᑐᓕᓯᒪᒐᑦᑕ ᐊᑕᓂᕐᒧᑦ ᒎᑎᑦᑎᓐᓄᑦ ᑕᒪᑦᑕ ᐅᕙᒍᓪᓗ, ᓯᕗᓕᕗᓪᓗ ᐃᓅᓱᒃᑑᓂᑦᑎᓐᓂᑦ ᐅᓪᓗᒥᒧᑦ ᑎᑭᓪᓗᒍ, ᐊᑕᓂᖅ ᒎᑎᕗᑦ ᓈᓚᓚᐅᖏᓐᓇᑦᑎᒍ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
