ᔨᕆᒤᐊᐅᑉ ᐊᒡᓚᖏᑦ 2
2
ᒎᑎᐅᑉ ᐃᓱᒪᒋᔭᖃᑦᓯᐊᕐᓂᖓ ᐃᓴᕆᐊᓕᒥᐅᓂᒃ
1ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ, 2ᐂᓕᕆᑦ ᐅᖃᕆᐊᕐᑐᕐᓗᑎᓪᓗ ᔨᕉᓴᓕᒥᐅᑦ ᑐᓵᑎᓪᓗᒋᑦ, ᐊᑕᓂᖅ ᐃᒫᒃ ᐅᖃᕐᐳᖅ,
“ᐃᖅᑲᐅᒪᕗᖓ ᐃᓅᓱᒃᑑᑎᓪᓗᑎᑦ ᐅᒃᐱᑦᓯᐊᓚᐅᕋᕕᑦ,
ᐅᕙᓐᓄᓪᓗ ᑲᑎᑎᑕᐅᖃᑎᖃᕋᑖᕐᓗᑎᑦ ᓇᒡᓕᒍᓱᖕᓂᖃᑦᓯᐊᓚᐅᕋᕕᑦ;
ᒪᓕᑦᓯᐊᓚᐅᕐᐸᕐᒪᓗ ᐃᓄᖃᔪᐃᑦᑐᒃᑯᑦ ᐱᕈᕐᑐᖃᖏᑦᑐᒃᑯᑦ.
3ᐃᓴᕆᐊᓕ ᐃᑦᔪᕐᓁᓚᐅᕐᐳᖅ ᐊᑕᓂᕐᒧᑦ;
ᓯᕗᓪᓕᕐᐸᐅᕗᖅ ᐸᐅᕐᖓᓂ ᐱᕈᕐᑐᓂᑦ ᑲᑎᕐᓱᐃᕕᖕᒥ,
ᓂᕆᔪᓕᒪᑦ ᐸᓯᔭᒃᓴᐅᓕᕐᐳᑦ;
ᐱᐅᖏᑦᑐᓄᑦ ᑎᑭᑕᐅᕗᑦ, ᐅᕙᖓ ᐊᑕᓂᐅᔪᖓ ᐅᖃᕐᐳᖓ.”
ᐃᓴᕆᐊᓕᒥᐅᑦ ᓯᕗᓕᖏᑕ ᐊᔪᕐᑐᓕᓂᖏᑦ
4ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ ᐃᓕᑦᓯ ᔧᑯᒧᑦ ᑭᖑᕚᕆᔭᐅᔪᓯ, ᐃᓴᕆᐊᓕᒥᐅᓄᓪᓗ ᑭᖑᕚᕆᔭᐅᔪᓯ. 5ᐊᑕᓂᖅ ᐅᖃᕐᐳᖅ:
“ᓱᓇᒥᒃ ᓯᕗᓕᓯ ᐸᑦᓯᑎᒃᓴᖃᓚᐅᕐᐹᑦ ᐅᕙᓐᓄᑦ?
ᓱᓇᒧᑦ ᐅᕙᓐᓂᒃ ᑐᓄᐃᑎᑕᐅᕚᑦ?
ᑐᒃᓯᐊᕐᕕᖃᓕᕐᓗᑎᒡᓗ ᐊᑑᑎᒃᓴᖃᖏᑦᑐᓂᒃ ᒎᑎᓐᖑᐊᓂᒃ,
ᓇᖕᒥᓂᖅ ᓱᓇᐅᔪᓐᓃᕐᓗᑎᒃ.
6ᐅᖃᓚᐅᓐᖏᓚᓪᓘᓐᓃᑦ, ᐊᑕᓂᖅ ᓇᓃᒻᒪᖔᑦ,
ᑭᓇᒧᓪᓗ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓚᐅᕐᒪᖔᕐᒥᒃ;
ᑭᓇᒧᓪᓗ ᐃᓄᖃᖏᑦᑐᒃᑯᑦ ᑕᓯᐅᕐᑕᐅᓚᐅᕐᒪᖔᕐᒥᒃ,
ᓄᓇᒃᑯᑦ ᓯᐅᕋᒃᑯᑦ ᑭᕕᓐᓇᕐᑐᓕᒃᑯᓪᓗ,
ᓄᓇᒃᑯᓪᓗ ᑳᖕᓇᕐᑐᖃᕐᑐᒃᑯᑦ ᑲᑉᐱᐊᓇᕐᑐᖃᕐᑐᒃᑯᓪᓗ,
ᓄᓇᒃᑯᑦ ᐊᐅᓚᕝᕕᐅᕙᖏᑦᑐᒃᑯᑦ ᓄᓇᖃᕐᕕᐅᕙᖏᑦᑐᒃᑯᓪᓗ.
7ᓄᓇᒧᐊᕐᑎᓚᐅᕐᐸᑦᓯ ᐱᕈᕐᑐᖃᑦᓯᐊᕐᑐᒧᑦ,
ᐱᕈᕐᑐᖏᓐᓂᒃ ᓂᕿᖃᖁᓪᓗᓯ, ᐱᕈᕐᑎᑦᓯᖁᓪᓗᓯᓗ,
ᑕᒪᐅᓐᖓᕋᑦᓯᓕ ᓄᓇᖁᑎᒐ ᓇᕐᕈᓇᕐᓯᑎᓚᐅᕐᐸᓯ,
ᑭᖑᕐᖑᑎᔭᐅᒐᔭᕐᑐᕐᓗ ᐱᐅᔪᓐᓃᕐᑎᓪᓗᒍ.
8ᑐᓂᕐᕈᓯᕐᑎᑦᓯᔩᓪᓗ ᑐᑭᓯᓇᓱᓚᐅᓐᖏᓚᑦ,
‘ᐊᑕᓂᖅ ᓇᓃᒻᒪᖔᑦ?’
ᐱᖁᔭᓂᒡᓗ ᐱᓇᓱᐊᕐᐸᒃᑑᒐᓗᐊᑦ ᐅᕙᓐᓂᒃ ᖃᐅᔨᒪᓚᐅᓐᖏᓚᑦ;
ᓯᕗᓕᕐᑎᐅᔪᓪᓗ ᐅᕙᓐᓂᒃ ᐊᑭᕋᕐᑐᓚᐅᕐᐳᑦ,
ᓇᓚᐅᑦᑍᔩᓪᓗ ᐰᓕᒧᑦ ᓇᓚᐅᑦᑍᔨᒋᔭᐅᓕᕐᓗᑎᒃ,
ᒪᓕᒃᑲᒥᒃ ᒎᑎᓐᖑᐊᓂᒃ ᐊᑑᑎᒃᓴᖃᖏᑦᑐᓂᒃ.”
ᐊᑕᓂᐅᑉ ᐃᖅᑲᕐᑐᐃᑦᔪᑎᒃᓴᖃᕐᓂᖓ ᐃᓄᖁᑎᒥᓄᑦ
9“ᑍᒤᒻᒪᑦ ᐃᖅᑲᕐᑐᐃᑦᔪᑎᒃᓴᖃᕐᐳᖓ ᐃᓕᑦᓯᓐᓄᑦ,
ᐊᑕᓂᖅ ᐅᖃᕐᐳᖅ, ᐃᖅᑲᕐᑐᐃᑦᔪᑎᒃᓴᖃᕈᒫᕐᐳᖓᓗ
ᕿᑐᕐᖓᑦᓯ ᕿᑐᕐᖓᖏᓐᓄᑦ.
10ᐃᑳᕐᓗᓯ ᕿᑭᕐᑕᒧᑦ ᓮᐸᕋᓯᒥᒃ ᐊᑎᓕᖕᒧᑦ,
ᓄᓇᒧᓪᓗ ᑭᑕᕆᒧᑦ ᑎᓕᓯᓕᕆᑦᓯ,
ᑕᑯᓕᕆᑦᓯ ᐅᑦᔨᕐᓱᕐᓗᓯᓗ ᑍᒤᑦᑐᖃᓚᐅᕐᓯᒪᓐᓂᕐᒪᖔᑦ ᓯᕗᓂᖓᒍᑦ.
11ᐃᓅᖃᑎᒌᒡᔪᐊᑦ ᒎᑎᒥᖕᓂᒃ ᐊᓯᑦᔩᓲᖑᕚᑦ?
ᒎᑎᐅᖏᒃᑲᓗᐊᕐᑎᓪᓗᒋᑦ ᒎᑎᒋᔭᖏᑦ,
ᐃᓄᖁᑎᒪᓕ ᐃᓅᖃᓐᓂᕐᓯᑎᑕᐅᓯᒪᓂᕆᔭᑎᒃ
ᐃᓇᖏᕐᑕᐅᑎᑉᐹᑦ ᒎᑎᓐᖑᐊᓄᑦ ᐊᑑᑎᒃᓴᖃᖏᑦᑐᓄᑦ.
12ᖁᑦᓯᖕᓂᕐᐹᖑᔪᓯ ᑲᒪᓂᐊᕈᑎᖃᓕᕆᑦᓯ ᑕᒪᑐᒥᖓ,
ᑲᑉᐱᐊᓱᖕᓂᕐᒧᓪᓗ ᓴᔪᒃᑎᑕᐅᓕᕆᑦᓯ, ᐊᑕᓂᖅ ᐅᖃᕐᐳᖅ.
13ᐃᓄᖁᑎᒃᑲ ᒪᕐᕉᖕᓂᒃ ᐊᔪᕐᑐᓕᖕᒪᑕ,
ᐅᕙᓐᓂᒃ ᕿᒤᓚᐅᕐᒪᑕ,
ᐃᒥᕐᒥᒃ ᐃᓅᓯᖃᕐᓇᕐᑐᒥᒃ ᑰᒃᑐᒥᒃ,
ᓇᖕᒥᓂᕐᓗ ᐃᒥᕐᑕᕐᕕᒃᓴᓕᐅᕐᓗᑎᒃ
ᐃᒥᕐᑕᕐᕕᖕᓂᒃ ᓄᑎᒃᓯᒪᔪᓂᒃ ᐃᒪᖃᕈᓐᓇᖏᑦᑐᓂᒃ.”
ᐃᓴᕆᐊᓕᒥᐅᑦ ᐅᒃᐱᕈᓐᓃᕐᓂᖏᑕ ᓴᖅᑭᑎᑕᖏᑦ
14“ᐃᓴᕆᐊᓕ ᓯᐊᓛᖑᕚ, ᐃᕐᓂᐊᖑᓂᕐᒥᓂᑦ?
ᓱᖕᒪᓪᓕ ᐊᑭᕋᕐᑐᕐᑎᖏᑕ ᐱᓇᓱᐊᕐᐰᑦ?
15ᓛᔭᑎᑐᑦ ᖃᓕᖑᐊᕐᑕᐅᖕᒪᑕ, ᐃᕐᓯᓵᕐᑕᐅᓪᓗᑎᒡᓗ;
ᓄᓇᖓᓗ ᓱᓁᕈᑦᔭᐅᖕᒪᑦ,
ᐃᒡᓗᒐᓴᒡᔪᐊᖁᑎᖏᓪᓗ ᐃᑭᑕᐅᓪᓗᑎᒃ ᓄᖑᑕᐅᖕᒪᑕ ᐃᓄᖃᕈᓐᓃᕐᓗᑎᒃ.
16ᒥᒻᐱᓯᒥᐅᑦ ᑕᐸᓂᓯᒥᐅᓪᓗ
ᐊᖑᑎᖏᓐᓄᑦ ᓂᐊᖁᓯ ᓱᕋᒃᑕᐅᕗᑦ.
17ᑕᒪᓐᓇ ᓇᖕᒥᓂᖅ ᐃᓕᑦᓯᓐᓂᑦ ᓴᖅᑭᑎᑉᐸᓯ
ᐊᑕᓂᖅ ᒎᑎᓯ ᕿᒪᓚᐅᕋᑦᓯᐅᒃ,
ᑕᓯᐅᕐᓯᓚᐅᕐᑐᖅ ᐊᖅᑯᑎᑦᓯᓐᓂ ᐊᑐᕐᑕᑦᓯᓐᓂ.
18ᓱᓇᒥᒃ ᐱᕚᓪᓕᕋᔭᕐᐱᓯ ᐄᑦᔨᑉᑎᒧᓐᖓᐅᒍᓰ?
ᓴᕼᐊᕆᐅᑉ ᑰᖓᓂᑦ ᐃᒥᕈᒪᓪᓗᓰ?
ᓱᖕᒪᓪᓗ ᐊᓯᕆᐊᒧᑦ ᐂᕕᓯ ᑰᖏᓐᓂᑦ ᐃᒥᕈᒪᓪᓗᓰ?
19ᐱᐅᖏᓐᓂᑦᓯ ᐋᖅᑭᒋᐊᕐᑕᐅᑎᓐᓂᐊᕐᐹᓯ,
ᑲᑕᒃᓯᒪᓂᑦᓯᓗ ᓱᐊᖕᓂᐊᕐᐹᓯ.
ᐃᓱᒪᒋᑦᓯᐊᕐᓯᐅᒃ ᑐᑭᓯᓇᓱᐊᕐᓗᒍᓗ ᐱᐅᖏᑦᑑᓂᖓ
ᖁᕕᐊᓇᖏᑦᑑᓂᖓᓗ ᐊᑕᓂᕐᒥᒃ ᒎᑎᑦᓯᓐᓂᒃ ᕿᒤᓯᒪᓗᓂ
ᓂᕐᑐᕐᓇᕐᓂᖓᓗ ᐃᓱᒪᒋᔪᓐᓃᕐᓗᒍ,
ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᒎᑎ ᐅᖃᕐᐳᖅ.”
ᐃᓴᕆᐊᓕᒥᐅᑦ ᑐᒃᓯᐊᕐᕕᖃᕈᒪᖏᓐᓂᖓᑦ ᐊᑕᓂᕐᒥᒃ
20ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ,
“ᑍᑦᓱᒪᓂᐊᓘᓕᕐᐳᖅ ᓇᖕᒪᐅᑍᑦ ᓱᕋᓚᐅᕋᕕᐅᒃ,
ᕿᓚᕈᑏᓪᓗ ᕿᒃᑐᕋᕐᓗᒍ
ᐅᖃᕐᓗᑎᓪᓗ, ‘ᐱᔨᑦᓯᕐᓂᐊᕈᓐᓃᕐᐸᒋᑦ.’
ᑍᒤᓚᐅᕐᐳᕐᓗ ᑕᒪᓐᓇ ᐱᖑᐃᑦ ᖄᖏᓐᓂ,
ᓇᐹᕐᑐᐃᓪᓗ ᐊᑖᓂ ᐊᓯᓐᓂᐊᖃᑦᑕᓚᐅᕐᐸᕐᒪ ᐊᖑᓐᓂᐊᕐᑎᑎᑐᑦ.
21ᐱᕈᕐᓮᓚᐅᕐᐳᖓ ᐃᓕᖕᓂᒃ
ᕔᓂᒃᓴᓂᒃ ᐸᐅᕐᖓᖃᕐᕕᒃᓴᑎᑐᑦ ᓂᕈᐊᕐᑕᐅᓯᒪᔪᑎᑐᑦ,
ᐱᐅᓂᕐᐹᒥᒃ ᐱᕈᕐᑐᒃᓴᓂᑦ,
ᖃᓄᕐᓕ ᐅᕙᓐᓂᒃ ᓇᕐᕈᓕᓚᐅᕐᓂᕆᕖᑦ?
ᐸᐅᕐᖓᖃᕐᕕᒃᓴᑎᑐᑦ ᐱᕈᕐᓂᕐᓗᕕᐅᔪᑎᑐᑦ ᐱᕈᕐᓰᕕᐅᖏᑦᑐᒥ.
22ᓴᓗᒻᒪᕐᓴᕋᓗᐊᕈᕕᑦ ᓴᓗᒻᒪᕐᓴᐅᑎᒧᑦ,
ᐅᐊᓴᐅᑎᖃᑦᓯᐊᕐᑐᒧᓪᓗ ᐅᐊᓴᕐᓗᑎᑦ,
ᐸᓯᔭᒃᓴᐅᓂᕐᐱᑦ ᓴᓗᒪᖏᓐᓂᖓ ᓱᓕ
ᑕᑯᒃᓴᐅᕗᖅ ᐅᕙᓐᓄᑦ.” ᐊᑕᓂᖅ ᒎᑎ ᐅᖃᕐᐳᖅ.
23ᖃᓄᕐᓕ ᐅᖃᕈᓐᓇᕐᐲᑦ, ᓴᓗᒤᓐᓂᖃᖏᓐᓂᕋᕐᓗᑎᑦ,
ᒎᑎᓐᖑᐊᒧᓪᓗ ᐰᓕᒧᑦ ᒪᓕᓚᐅᖏᓐᓂᕋᕐᓗᑎᑦ,
ᑕᑯᓕᕆᑦ ᓇᕐᓴᐅᑉ ᐃᓗᐊᓂ ᐃᓕᖅᑯᓯᕆᓚᐅᕐᑕᕐᓂᒃ,
ᐱᓇᓱᐊᓚᐅᕐᑕᑎᓪᓗ ᑭᓲᖕᒪᖔᑕ,
ᑳᒧᓕᒃᑎᑐᑦ ᓄᓕᐅᔪᑎᑐᑦ ᐃᓕᖅᑯᓯᖃᓚᐅᕋᕕᑦ ᓇᒧᑐᐃᓐᓇᖅ ᐂᖃᑦᑕᕐᑐᑎᑐᑦ.
24ᓯᐅᑎᖅᑯᕐᑐᔪᑎᑐᓪᓗ ᐃᓄᖃᖏᑦᑐᒥ ᓱᖏᐅᓯᒪᔪᑎᑐᑦ,
ᐱᔪᒪᓂᖃᓗᐊᒧᑦ ᐊᖑᒻᒧᑦ ᓇᕆᐊᕐᐳᖅ,
ᓄᓕᐅᔪᑎᑐᑦ ᓄᖅᑲᕐᑎᓯᒪᔭᒃᓴᐅᓐᖏᓚᖅ,
ᐊᖑᑎᓪᓗ ᑖᑦᓱᒥᖓ ᐱᓇᓱᐊᕐᓗᑎᒃ ᐊᒃᓱᕈᕆᐊᖃᓐᖏᓚᑦ,
ᓄᓕᐊᕐᕕᖓᑦ ᓇᓪᓕᐊᑎᒃᐸᑦ ᒪᓂᒪᑲᐅᑎᒋᖕᒪᑦ.
25ᐅᓪᓚᖕᓂᕐᒧᑦ ᑲᒦᕈᑎᑦᑍᓕᒋᑦ,
ᐃᒡᒋᐊᓪᓗ ᐸᓂᕐᑍᓕᓕ,
ᐅᖃᕐᐳᑎᓪᓕ, ᑲᓄᐃᖏᑦᑐᖅ,
ᐃᓅᖃᑎᑐᖃᕆᓐᖏᑕᑦᑕ ᒎᑎᖏᓐᓂᒃ
ᐅᖓᒐᒪ ᑖᒃᑯᐊ ᒪᓕᖕᓂᐊᕐᐸᒃᑲ.
ᐃᓴᕆᐊᓕᒥᐅᑦ ᓱᒋᐊᕐᑕᐅᔭᕆᐊᖃᕐᓂᖓᑦ
26ᐊᑕᓂᖅ ᐅᖃᕐᐳᖅ, “ᑎᒡᓕᒐᕐᑎ ᑲᓐᖑᓇᕐᑐᒥᒃ ᐊᑐᓕᕐᐸᖕᒪᑦ ᖃᐅᔨᔭᐅᔭᕌᖓᒥ, ᑍᒫᒃᑕᐅᖅ ᐃᓴᕆᐊᓕᒥᐅᑦ ᐃᓄᖏᑦ ᑲᓐᖑᓇᕐᑐᒥᒃ ᐊᑐᕐᓂᐊᕐᐳᑦ, ᐊᖓᔪᖅᑳᕐᔪᐊᖏᑦ, ᐊᖓᔪᖅᑳᖁᑎᖏᑦ, ᑐᓂᕐᕈᓯᕐᑎᑦᓯᔩᑦ, ᒎᑎᒧᓪᓗ ᐱᔪᖃᓛᕐᑐᒥᒃ ᐅᖃᕐᑎᐅᔪᑦ. 27ᕿᔪᖕᒧᑦ ᐅᖃᕐᐳᑦ, ᐊᑖᑕᒋᕙᒋᑦ, ᐅᔭᕋᖕᒧᓪᓗ ᐅᖃᕐᓗᑎᒃ, ᐃᕐᓂᐊᕆᓚᐅᕐᐸᕐᒪ. ᐅᕙᓐᓂᒃ ᑐᓄᐃᕗᑦ ᓵᓐᖓᔪᒪᓇᑎᒡᓗ ᐅᕙᓐᓄᑦ, ᑭᓯᐊᓂᓕ ᐅᖁᒤᒃᓴᓕᕌᖓᒥᒃ ᐅᖃᕐᐸᒃᐳᑦ, ᐱᐅᓕᔭᐅᔪᒪᓪᓗᑎᒃ ᐅᕙᓐᓄᑦ.
28“ᒎᑎᓯᓕ ᓴᓇᓚᐅᕐᑕᓯ ᓇᓃᒻᒪᑖ? ᐊᑲᐅᖏᑦᑐᒦᓕᕐᑎᓪᓗᓯ ᐱᐅᓕᓯᔪᓐᓇᕐᐸᑕ ᑍᒃᑯᐊ ᕾᓚᐅᕐᓕᑦ! ᒎᑎᖃᕐᐳᓯ ᓄᓇᓕᖁᑎᑦᓯᑐᑦ ᐅᓄᕐᑎᒋᔪᓂᒃ ᔫᑕᒥᐅᑕᐅᔪᓯ. 29ᓱᖕᒪᑦ ᐅᕙᓐᓄᑦ ᐊᑭᕋᕐᑐᕐᐱᓰ? ᐃᓘᓐᓇᓯ ᐅᕙᓐᓂᒃ ᕿᒤᓯᒪᕗᓯ, ᐊᑕᓂᖅ ᐅᖃᕐᐳᖅ. 30ᓱᒋᐊᕋᓗᐊᕋᑦᓯ, ᓱᒋᐊᕐᑕᐅᑦᔪᑎᓯ ᐋᖅᑭᒋᐊᕈᑎᒋᓐᖏᓚᓯ, ᓴᕕᒡᔪᐊᑦᓯᓐᓄᑦ ᐱᔪᖃᓛᕐᑐᒥᒃ ᐅᖃᕐᑎᖁᑎᓯ ᑐᖁᑉᐸᓯ ᓛᔭᑎᑐᑦ ᐃᕐᓯᓵᕐᑐᑎᑐᑦ. 31ᑭᖑᕚᖑᖃᑎᒌᖑᔪᓯ ᐊᑕᓂᐅᑉ ᐅᖃᐅᓯᕆᔭᖏᑦ ᑐᓴᕐᓯᒋᒃ, ᐃᓴᕆᐊᓕᒥᐅᓄᑦ ᓄᓇᑎᑐᑦ ᐃᓄᖃᔪᐃᑦᑐᑎᑐᑦ ᑍᒤᓐᓇᒫ? ᓄᓇᑎᑐᓪᓘᓐᓃᑦ ᑲᑉᐱᐊᓇᕐᑐᕐᑕᖃᕐᑐᑎᑐᑦ! ᓱᖕᒪᓪᓕ ᐃᓄᖁᑎᒃᑲ ᐅᖃᕐᐹᑦ, ᐃᓱᒪᕐᓱᕐᐳᒍᑦ, ᐃᓕᖕᓄᑦ ᐅᐸᒍᑎᓂᐊᕈᓐᓃᕐᐳᒍᑦ. 32ᐊᕐᓇᐅᑉ ᐃᓅᓱᒃᑑᑉ ᐱᐅᓴᐅᑎᓂ ᐳᐃᒍᕈᓐᓇᕐᐸᒌᑦ? ᐅᐃᑖᕐᓂᐊᓕᕐᑐᕐᓗ ᐊᓐᓄᕌᓂ ᑲᑎᑎᑕᐅᔪᕐᓯᐅᑏᑦ ᐳᐃᒍᕈᓐᓇᕐᐸᒌᑦ? ᐃᓄᖁᑎᒪᓕ ᐳᐃᒍᕐᓯᒪᓕᕐᐹᖓ ᐅᓪᓗᑦ ᐊᒡᓛᑦ ᓈᓴᕐᓗᒋᑦ ᐳᐃᒍᕐᓯᒪᓂᖏᑦ ᐅᓄᓗᐊᓕᕐᐳᑦ. 33ᐅᖓᒋᔭᒃᓴᕐᓯᐅᓕᕌᖓᑦᓯ ᐱᓯᑎᐊᓘᕗᓯ, ᐊᕐᓁᑦ ᐱᐅᖏᑦᑐᓕᔪᑦ ᐱᐅᓯᑦᓯᓐᓂᒃ ᐃᓕᓴᕐᐸᓯ. 34ᐊᓐᓄᕌᓯ ᐊᐅᒥᓯᒪᕗᑦ ᐸᓯᔭᒃᓴᐅᖏᑦᑐᑦ ᐊᔪᕐᓴᕐᑐᓪᓗ ᐊᐅᖏᓐᓂᒃ, ᖃᐅᔨᒪᒐᓗᐊᕐᓗᓯᐅᒃ ᑎᒡᓕᒐᕐᑎᐅᖏᒻᒪᑕ.
“ᑍᒤᒐᓗᐊᕐᑎᓪᓗᒍ, 35ᐅᖃᕐᐳᓯ ᐸᓯᔭᒃᓴᐅᖏᓐᓂᕋᕐᓗᓯ, ᓂᓐᖓᐅᑦᔭᐅᔪᒃᓴᐅᖏᓐᓂᕋᕐᓗᓯᓗ ᐅᕙᓐᓄᑦ. ᑕᑯᒋᑦ ᐃᖅᑲᕐᑐᐃᓂᐊᕐᐳᖓ ᐃᓕᑦᓯᓐᓂᒃ, ᐅᖃᓚᐅᕋᑦᓯ ᐊᔪᕐᑐᓕᓚᐅᖏᓐᓂᕋᕐᓗᓯ. 36ᓱᖕᒪᑦ ᐱᐅᓯᑦᓯᓐᓂᒃ ᐊᓯᑦᔩᓴᕅᑉᐱᓰ? ᐄᑦᔨᑉᑎᒥᐅᓄᑦ ᑲᓐᖑᓱᒃᑎᑕᐅᔪᒫᕐᐳᓯ ᓲᕐᓗᑦᑕᐅᖅ ᐊᓯᕆᐊᒥᐅᓄᑦ ᑍᒤᑎᑕᐅᓚᐅᕋᑦᓯ. 37ᑍᓐᓇᑦᑕᐅᖅ ᓄᓇ ᕿᒪᖕᓂᐊᕐᐸᓯ ᑲᓐᖑᓱᒃᑎᑕᐅᓂᒃᑯᑦ, ᑕᑎᒋᓚᐅᕐᑕᓯ ᐊᑕᓂᐅᑉ ᓇᕐᕈᒋᖕᒪᒋᑦ, ᑖᒃᑯᐊᓗ ᐃᑲᔪᕐᑎᒋᔪᓐᓇᕐᓂᐊᓐᖏᓚᓯ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
