ᔨᕆᒤᐊᐅᑉ ᐊᒡᓚᖏᑦ 28
28
ᕼᐊᓇᓁᐊᐅᑉ ᒎᑎᒧᑦ ᐅᖃᕐᑎᒋᔭᐅᓐᖑᐊᕐᓂᖓ
1 #
ᐊᑕᓃᑦ ᐂᑉᐸᖏᑦ 24:18-20; ᑯᕉᓂᑲ ᐂᑉᐸᖏᑦ 36:11-13. ᐊᕐᕌᒍᒥ ᑕᕝᕙᓂᑦᓮᓐᓇᖅ, ᑕᖅᑮᑦ ᑕᓪᓕᒪᖓᓐᓂ ᐊᕐᕌᒍᐃᑦ ᓯᑕᒪᒋᓕᕐᑕᖓᓐᓂ, ᔨᑎᑬᐊ ᐊᖓᔪᖅᑳᕐᔪᐊᖑᓕᓵᕐᑎᓪᓗᒍ ᔫᑕᒥ, ᐱᔪᖃᓛᕐᑐᒥᒃ ᐅᖃᕐᑎ ᕼᐊᓇᓁᐊ ᐊᔾᔪᕆᐅᑉ ᐃᕐᓂᖓ ᒋᐱᐅᓂᒥᐅᑕᖅ ᐅᕙᓐᓄᑦ ᐅᖃᕐᐳᖅ ᐊᑕᓂᐅᑉ ᐃᒡᓗᖓᓂ ᑐᓂᕐᕈᓯᕐᑎᑦᓯᔩᑦ ᐃᓄᐃᓪᓗ ᑐᓵᑎᓪᓗᒋᑦ, 2“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᕿᒧᒍᑖ ᕿᔪᒃ ᓯᖁᒥᓐᓂᐊᕐᐸᕋ. 3ᐊᕐᕌᒎᖕᓂᒃ ᒪᕐᕉᖕᓂᒃ ᐊᑕᓂᐅᑉ ᐃᒡᓗᖓᑕ ᐱᖁᑎᓕᒫᖏᑦ ᐅᑎᕐᑎᑦᓱᒫᕐᐸᒃᑲ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓪᓚᕈᑎᓚᐅᕐᑕᖏᑦ ᐹᐱᓘᓂᒧᑦ. 4ᐅᑎᕐᑎᓐᓂᐊᕆᕙᕋᓗ ᔨᑯᓁᐊ ᔨᕼᐅᐃᐊᑭᐅᑉ ᐃᕐᓂᖓ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ, ᐊᐅᓪᓚᕈᑦᔭᐅᓯᒪᖃᑕᐅᔪᓕᒫᓪᓗ ᐹᐱᓘᓂᒧᑦ ᐅᑎᕐᑎᒻᒥᓗᒋᑦ ᔫᑕᒧᑦ, ᐊᑕᓂᖅ ᐅᖃᕐᐳᖅ, ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑦᑕ ᐊᓄᓯᒪᐅᑎᖓ ᕿᔪᒃ ᓯᖁᒥᓐᓂᐊᕋᒃᑯ.”
5ᔨᕆᒤᐊᓕ ᒎᑎᐅᑉ ᐅᖃᕐᑎᖓ ᑭᐅᕗᖅ, ᕼᐊᓇᓁᐊᒧᑦ ᑐᓂᕐᕈᓯᕐᑎᑦᓯᔩᑦ ᐃᓄᓕᒫᓪᓗ ᑐᓵᑎᓪᓗᒋᑦ ᑐᒃᓯᐊᕐᕕᒡᔪᐊᕐᒥ. 6ᔨᕆᒤᐊ ᐃᒫᒃ ᐅᖃᕐᓗᓂ, ᐋᒦᓐ! ᐊᑕᓂᖅ ᑍᒤᓕᐅᓚᐅᕐᓕ, ᐊᑕᓂᐅᑦᑐᖅ ᐅᖃᐅᓯᕆᔭᑎᑦ ᓇᓚᐅᑦᓯᑎᓪᓕᒋᑦ ᐅᑎᕐᑎᑦᓯᓗᓂ ᑐᒃᓯᐊᕐᕕᒡᔪᐊᑉ ᐱᖁᑎᓕᒫᖏᓐᓂᒃ; ᐊᐅᓪᓚᕐᑎᑕᐅᓯᒪᔪᕕᓂᓕᒫᓂᒡᓗ ᐹᐱᓘᓂᒧᑦ. 7ᑭᓯᐊᓂ ᐅᖃᐅᑎᔪᒪᕙᒋᑦ ᑐᓵᑎᓪᓗᑎᑦ ᐃᓄᐃᓪᓗ ᑐᓵᑎᓪᓗᒋᑦ. 8ᓯᕗᓂᑦᑎᓐᓂ ᐅᕙᑦᑎᓐᓂᑦ ᒎᑎᒧᑦ ᐅᖃᕐᑎᒋᔭᐅᕙᓚᐅᕐᑐᑦ ᐅᖃᐅᓯᖃᕐᐸᓚᐅᕐᒪᑕ ᐅᓇᑕᕐᓂᕐᑕᖃᓛᕐᑐᒥᒃ, ᖁᐊᕐᓵᖓᓇᕐᑐᖃᓛᕐᑐᓂᒃ, ᐋᓐᓂᐊᓇᕐᑐᖃᓛᕐᑐᓂᒡᓗ ᓄᓇᓕᖕᓄᑦ ᐊᖓᔪᖅᑳᐅᕕᒡᔪᐊᓄᓪᓗ. 9ᒎᑎᒧᓪᓕ ᐅᖃᕐᑎᒋᔭᐅᔪᖅ ᐅᖃᐅᓯᖃᕐᐸᒃᑐᖅ ᓮᒻᒪᕐᑎᑕᐅᔪᒫᕐᓂᕅᓪᓗᓂ ᒎᑎᒥᑦ ᑎᓕᔭᐅᓯᒪᓪᓚᕆᖕᓂᖓ ᓇᓗᓇᕈᓐᓃᕋᔭᕐᐳᖅ ᐅᖃᐅᓯᕆᔭᖏᑕ ᓇᓚᐅᑦᓯᓂᖏᑦ ᓴᖅᑭᓕᕐᐸᑕ ᑭᓯᐊᓂ.
10ᕼᐊᓇᓁᐊᐅᓪᓗ ᔨᕆᒤᐊᐅᑉ ᐊᓄᓯᒪᐅᑎᖓ ᕿᔪᒃ ᖁᖓᓯᖓᓂᑦ ᐲᕐᓗᓂᐅᒃ ᓱᕋᒃᐹ. 11ᐃᓄᐃᓪᓗ ᑐᓵᑎᓪᓗᒋᑦ ᕼᐊᓇᓁᐊᐅᑉ ᐅᖃᐅᑎᕔᑦ, “ᐃᒫᒃ ᐊᑕᓂᖅ ᐅᖃᕐᐳᖅ, ᑍᒫᒃᑕᐅᖅ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᓄᓯᒪᐅᑎᖓ ᕿᔪᒃ ᓯᖁᑦᑎᕈᒫᕐᐸᕋ ᐃᓅᖃᑎᒌᒡᔪᐊᑦ ᖁᖓᓯᖏᓐᓃᑎᑕᖓ ᐲᕈᒫᕋᒃᑯ ᐊᕐᕌᒎᒃ ᒪᕐᕉᒃ ᐊᑐᕐᑎᓪᓗᒋᒃ.” ᑍᒫᒡᓗ ᐅᖃᕐᑎᓪᓗᒍ ᒎᑎᐅᑉ ᐅᖃᕐᑎᖓ ᔨᕆᒤᐊ ᕿᒪᕉᑎᕗᖅ.
12ᕼᐊᓇᓁᐊᐅᓪᓕ ᔨᕆᒤᐊᐅᑉ ᐊᓄᓯᒪᐅᑎᖓ ᕿᔪᒃ ᓱᕋᕋᑖᕐᑎᓪᓗᓂᐅᒃ ᐊᑕᓂᐅᑉ ᔨᕆᒤᐊ ᐅᖃᕐᕕᒋᓕᕐᐹ: 13“ᕼᐊᓇᓁᐊ ᐅᖃᐅᑎᔭᕐᑐᕈᒃ, ᓯᖁᒥᑦᓯᒐᓗᐊᕐᐳᑎᑦ ᐊᓄᓯᒪᐅᑎᒥᒃ ᕿᔪᖕᒥᒃ ᑭᖑᕝᕕᕐᑕᐅᑎᓐᓂᐊᕐᐸᕋᓕ ᐊᓄᓯᒪᐅᑎᒥᒃ ᓴᕕᕋᔭᖕᒥᒃ ᓴᓇᓯᒪᔪᒥᒃ. 14ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ᐃᓅᖃᑎᒌᒡᔪᐊᑦ ᐊᓄᓯᒪᐅᑎᓕᐅᕈᒪᕙᒃᑲ ᓴᕕᕋᔭᖕᒥᒃ ᐱᔨᑦᓯᖁᓪᓗᒋᑦ ᓂᐱᑯᓁᓴᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᑖᑦᓱᒧᖓ ᐊᐅᓚᑕᐅᖁᓪᓗᒋᑦ ᐆᒪᔪᓪᓗᑦᑕᐅᖅ ᐊᒡᓛᑦ ᑖᑦᓱᒧᖓ ᐊᐅᓚᑕᐅᑎᑦᓱᒫᕐᐸᒃᑲ.”
15ᔨᕆᒤᐊᐅᑉ ᕼᐊᓇᓁᐊ ᐅᖃᐅᑎᕚ, “ᕼᐊᓇᓁᐊ, ᐊᑕᓂᕐᒧᑦ ᑎᓕᔭᐅᓯᒪᓇᑎᑦ ᐃᓅᖃᑎᒌᒡᔪᐊᓂᒃ ᓱᓕᖏᑦᑐᒥᒃ ᐅᒃᐱᕆᔭᐅᓕᕐᑎᑦᓯᒐᕕᑦ.” 16ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, “ᑕᑯᒋᑦ, ᓄᓇᕐᔪᐊᒥᑦ ᐃᒋᓐᓂᐊᕐᐸᒋᑦ, ᐊᕐᕌᒍᒥ ᑕᕝᕙᓂ ᑐᖁᔪᒫᕐᐳᑎᑦ ᐊᔪᕆᕐᑐᐃᓯᒪᒐᕕᑦ ᒎᑎᒥᒃ ᐊᑭᕋᕐᑐᕐᑐᓂᒃ.”
17ᑕᖅᑮᑦ 7ᖓᓐᓂ ᐊᕐᕌᒍᒥ ᑕᕝᕙᓂᑦᓮᓐᓇᖅ, ᓇᓚᐅᑦᑍᔪᖅ ᕼᐊᓇᓁᐊ ᑐᖁᕗᖅ.
Currently Selected:
ᔨᕆᒤᐊᐅᑉ ᐊᒡᓚᖏᑦ 28: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
